ᤕᤛᤤᤕᤠ 52 - LIFOTNT

ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤕᤖᤢᤛᤗᤧᤔ ᤕᤧᤰᤕᤰᤁᤡᤴ ᤛᤧ᤺ᤵᤋᤢ

¹ ᤛᤡᤕᤥᤏᤀᤥ ᤁᤧᤕᤢᤱᤒᤠ ᤔᤏᤠᤛᤣ. ᤐᤥᤃᤧᤶᤔᤧ᤹ᤀᤥ. ᤐᤥᤃᤧᤶᤔᤧ᤹ᤀᤥ. ᤂᤡᤏᤡ᤹ ᤁᤧᤎᤢᤶᤒᤠ ᤐᤥ᤺ᤰᤂᤧᤶᤔᤧ᤹ᤀᤥ ᤜᤧᤰᤁᤩᤠᤱ ᤕᤠᤶᤔᤥ ᤐᤕᤶ ᤕᤶᤒᤠ ᤐᤥ᤺ᤰᤂᤧᤶᤔᤧ᤹ᤀᤥ᥄ ᤛᤣᤛᤣ ᤕᤧᤰᤕᤰ ᤕᤖᤢᤛᤗᤧ᤺ᤶᤔᤥ ᤁᤧᤕᤢᤱᤒᤠ ᤔᤏᤠᤛᤣ. ᤜᤠᤱᤘᤠ ᤔᤠᤱᤘᤠᤖᤧ ᤆᤠᤱ ᤆᤠᤰᤂᤠᤶᤔᤧ᤹ᤀᤥ॥ ᤜᤷᤍᤥ ᤔᤧᤴᤜᤧᤰᤔᤏᤠᤒᤠ ᤏᤢ ᤀᤠᤛᤢᤳᤌᤥᤒᤠᤜᤠ᤹ ᤕᤶᤒᤠ ᤁᤧᤗᤠᤶᤎᤣ᤺ᤳᤋᤥ ᤕᤠᤶᤔᤥ ᤀᤠᤓᤧᤸᤗᤧᤀᤠᤱ ᤔᤧᤴᤗᤠ᤺ᤳᤏᤧᤸᤗᤥ॥

² ᤕᤖᤢᤛᤗᤧᤔ ᤁᤧᤕᤢᤱᤒᤠᤛᤣ. ᤐᤥᤃᤧᤶᤔᤧ᤹ᤀᤠᤱ ᤂᤠᤶᤜᤡ᤺ᤰᤁᤡᤴ ᤌᤠᤵᤛᤠᤶᤔᤧ᤹ᤀᤥ. ᤜᤧᤰᤁᤩᤠᤱ ᤀᤠᤒᤠᤅᤣ ᤜᤠᤱᤕᤢᤰᤏᤠᤀᤥ ᤕᤢᤅᤠᤶᤔᤧ᤹ᤀᤥ᥄ ᤗᤠᤈᤣ᤹ᤗᤠᤶ ᤔᤧᤍᤧᤶᤛᤢ ᤔᤧᤍᤣ᤹ᤖᤢᤛᤡᤒᤠ ᤛᤡᤕᤥᤏᤖᤧ ᤁᤢᤛ᤻ᤛᤠ ᤔᤧᤴᤇᤡᤴᤛᤣ. ᤂᤧᤏᤡ᤹ ᤑᤧᤴᤌᤰᤁᤪᤱᤜᤠ᤹ ᤑᤢ᤹ᤖᤠᤶᤔᤧ᤹ᤀᤥ᥄

³ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤏᤠᤜᤠ᤹ ᤀᤰᤂᤣ ᤔᤧᤳᤋᤢᤛᤡᤖᤥ. “ᤕᤥᤃ᤻ᤒᤠ ᤕᤥ᤺ᤃ᤻ᤔᤠ ᤐᤥᤱᤛᤧ ᤂᤧᤏᤡ᤹ ᤕᤠᤱ ᤔᤣ᤺ᤴᤏᤣ ᤁᤧᤶᤛᤱᤄᤡᤒᤠ ᤁᤢᤀᤡᤛᤡᤰ ᤕᤠᤱ ᤔᤣ᤺ᤴᤏᤣᤀᤣ ᤂᤧᤏᤡ᤹ ᤁᤧᤶᤎᤧ᤹ᤖᤡᤖᤥ॥”

⁴ ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢ᤹. “ᤋᤃᤡ ᤀᤠᤱᤃᤠ᤹ ᤀᤠᤔᤏᤠᤜᤠ᤹ ᤔᤡᤛᤪ ᤗᤠᤈᤣ᤹ᤀᤥ ᤕᤢᤱᤛᤧ ᤔᤧᤒᤣᤖᤥ. ᤜᤧᤰᤁᤩᤠᤱ ᤀᤠᤸᤗᤥ ᤀᤛ᤻ᤛᤢᤖᤡᤜᤠ᤹ᤖᤧ ᤂᤧᤱᤜᤠ᤹ ᤋᤢᤰᤂᤣ ᤔᤧᤈᤠ᤺ᤳᤋᤢᤛᤡᤖᤥ॥

⁵ ᤜᤧᤰᤁᤩᤠᤱ ᤀᤠᤸᤗᤥ ᤒᤣᤒᤡᤗᤥᤏ ᤗᤠᤈᤣ᤹ᤀᤥᤀᤠᤱ ᤜᤠᤒᤠᤜᤧᤰᤁᤣ ᤐᤥ᤺ᤰᤂᤧᤀᤠᤱ ᤘᤠ᤹ᤖᤥ॥ ᤂᤧᤏᤡ᤹ ᤁᤧᤶᤍᤧᤶᤛᤡ ᤁᤧᤶᤍᤣ᤹ᤖᤡᤀᤠᤱ ᤁᤧᤘᤕᤡᤖᤥ ᤜᤧᤰᤁᤩᤠᤱ ᤜᤠ᤺ᤳᤗᤧᤀᤠᤱ ᤁᤢᤔᤧᤴ ᤔᤧᤴᤜᤢᤱᤅᤣ ᤘᤠ᤹ᤖᤥ॥ ᤂᤧᤏᤡ᤹ ᤛᤶᤎᤠᤱ ᤕᤢᤰ ᤁᤧᤈᤥ᤺ᤰᤐᤠᤜᤠ᤹ ᤔᤧᤜᤧᤴᤇᤡᤱᤗᤥ ᤂᤧᤒᤩᤠᤱ ᤀᤠᤱᤃᤠ᤹ ᤀᤠᤈᤠ᤺ᤳᤌᤡ ᤁᤧᤍᤣᤛᤢᤶᤔᤠᤱ ᤘᤠ᤹ᤖᤥ॥

⁶ ᤁᤖ ᤀᤠᤱᤃᤠ᤹ ᤀᤠᤔᤏᤠᤜᤠ᤹ ᤀᤠᤔᤡᤱᤅᤡᤴ ᤀᤥᤛᤣ᤺ᤴᤍᤠᤱ ᤆᤥᤃᤢᤱ ᤐᤡᤖᤢᤱᤛᤡᤱᤗᤥ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤀᤠᤱᤃᤠ᤹ ᤀᤠᤔᤡᤱᤅᤡᤸᤗᤧ ᤁᤢᤔᤢᤰᤛᤠᤶᤔᤡᤴ ᤁᤢᤛᤡᤱ ᤔᤧᤏᤡ᤺ᤳᤋᤢᤖᤥ. ᤂᤧᤒᤩᤠᤱ. ᤁᤢᤏᤢᤵᤔᤥ ᤂᤧᤱᤜᤠ᤹ᤏᤢ ᤁᤧᤒᤠ᤺ᤵᤐᤧᤱᤃ ᤀᤠᤱᤃᤠ᤹ᤀᤣᤖᤥ ᤑᤠ᤹ᤀᤠᤱ ᤂᤧᤱᤜᤠ᤹ᤖᤧ ᤁᤢᤛᤡᤱ ᤔᤧᤏᤡ᤺ᤳᤋᤢᤖᤥ॥”

⁷ ᤁᤥ᤺ᤰᤔᤠ ᤑᤠᤱᤈᤱᤜᤠ᤹ᤀᤥ ᤛᤢᤏᤠᤀᤡᤱ ᤁᤧᤛᤧᤒᤠᤜᤠ᤹ᤖᤧ ᤂᤢᤴᤇᤡ᤹ ᤗᤠᤱᤜᤠ᤹ ᤛᤠ᤹ᤖᤡᤰ ᤁᤧᤄᤧᤶᤛᤡᤱᤒᤠ ᤆᤥᤰᤗᤥ. ᤂᤧᤱᤜᤠ᤹ᤖᤧ ᤛᤢᤏᤠᤀᤡᤱ ᤀᤡᤱᤔᤧᤓᤥᤛᤢᤖᤥ. ᤂᤧᤱᤜᤠ᤹ᤖᤧ ᤛᤏᤠᤖᤢᤱ ᤀᤢᤘᤠ ᤔᤧᤈᤥᤃᤢᤖᤥ॥ ᤂᤧᤱᤜᤠ᤹ᤖᤧ ᤛᤧᤴᤗᤵ ᤂᤥᤔᤠ ᤐᤠ᤺ᤴᤜᤠ᤹ ᤀᤢᤘᤠ ᤔᤧᤈᤥᤃᤢᤖᤥ. ᤂᤢᤏᤧ᤹ ᤛᤡᤕᤥᤏᤒᤠ ᤔᤏᤠᤜᤠ᤹ ᤔᤧᤳᤋᤢᤛᤡᤖᤥ. “ᤂᤧᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤜᤠᤱᤕᤢᤰ ᤆᤥᤃᤢᤖᤥ॥”

⁸ ᤏᤢᤖᤡᤰᤁᤠᤱ ᤂᤧᤵᤛᤧ᤹ᤀᤥ. ᤕᤧᤰᤕᤰᤁᤥ ᤂᤧᤏᤧ᤹ ᤁᤧᤀᤡᤰ ᤁᤧᤃᤥᤒᤠᤜᤠ᤹ ᤕᤶᤒᤠ ᤀᤡᤰᤗᤠᤀᤥ ᤛᤥᤖᤡᤰ ᤔᤧᤛ᤺ᤳᤗ ᤛᤠᤶᤔᤧᤗᤥᤖᤥ॥ ᤕᤜᤘᤣ ᤍᤠᤱᤒᤧᤴ ᤛᤡᤕᤥᤏ ᤁᤥ᤺ᤰᤔᤠᤀᤥ ᤏᤢ᤺ᤱᤍᤠᤖᤥ. ᤜᤧᤰᤁᤣ᤺ᤸᤗᤧ ᤂᤧᤱᤜᤠ᤹ᤖᤧ ᤀᤠᤒᤠᤅᤣ ᤂᤢᤴᤇᤡ᤹ ᤔᤡᤰᤁᤡᤸᤗᤧ ᤂᤢᤏᤧ᤹ ᤔᤧᤏᤡᤛᤢᤖᤥ॥

⁹ ᤕᤖᤢᤛᤗᤧᤔ ᤕᤧᤰᤕᤰᤐᤠ ᤁᤧᤗᤢ᤺ᤶᤒᤠ ᤁᤧᤎᤢᤵᤐᤠ ᤐᤠᤱᤕᤰᤛᤣ. ᤛᤥᤖᤡᤰ ᤐᤥ᤺ᤰᤂᤧᤶᤔᤧ᤹ᤀᤠᤱ ᤏᤡᤱᤘᤠ᤹ ᤋᤠᤖ ᤛᤠᤶᤗᤥᤖᤠᤶᤔᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤏᤠᤜᤠ᤹ ᤀᤠ᤺ᤴᤇᤡᤱᤔᤠ ᤐᤡᤖᤢᤛᤡᤀᤠᤱ ᤘᤠ᤹ᤖᤥ॥ ᤂᤢᤏᤧ᤹ ᤁᤢᤔᤧᤸᤗᤢᤱ ᤜᤢᤅᤢᤀᤠᤱ ᤕᤖᤢᤛᤗᤧᤔ ᤕᤧᤰᤕᤰᤁᤡᤴ ᤌᤧ᤹ᤖᤢᤀᤠᤱ ᤏᤧᤖᤥ॥

¹⁰ ᤕᤜᤘᤣ ᤍᤠᤱᤒᤧᤸᤗᤧ ᤀᤠᤒᤠᤅᤣ ᤁᤢᤛᤣᤛᤣ ᤔᤢᤰᤛᤠᤶᤔᤡᤴ ᤀᤥᤛᤣ᤺ᤴᤎᤠᤱ ᤆᤥᤃᤢᤖᤥ. ᤂᤢᤏᤧ᤹ ᤁᤢᤔᤏᤠᤜᤠ᤹ ᤋᤠᤱᤛᤧ᤺ᤵᤋᤢᤛᤡᤖᤥ ᤜᤧᤰᤁᤩᤠᤱ ᤂᤧᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤁᤧᤖᤧᤰ ᤔᤧᤴᤇᤠᤶ ᤕᤠᤵᤔᤡᤜᤠ᤹ᤖᤧ ᤔᤧᤏᤡᤛᤢᤖᤥ॥

¹¹ ᤐᤣᤃᤧᤶᤔᤧ᤹. ᤐᤣᤃᤧᤶᤔᤧ᤹. ᤁ᤹ᤕᤥᤗᤠᤶᤒᤠ ᤐᤣᤃᤧᤶᤔᤧ᤹ᤀᤥ. ᤀᤠᤈᤡ᤺ᤴᤈᤡ᤺ᤶᤒᤠ ᤐᤠ᤺ᤴᤜᤠ᤹ ᤔᤧᤛᤢᤛᤠᤶᤔᤡᤴᤏᤧ᤹ᤀᤥ᥄ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤥᤒᤠ ᤛᤠᤔᤠᤒᤢᤔᤠ ᤁᤧᤒᤱᤒᤠᤛᤣ. ᤂᤧᤵᤔᤥᤗᤠᤶ ᤗ᤺ᤴᤍᤧᤶᤔᤧ᤹ᤀᤠᤱ ᤑᤧᤖᤠᤶᤔᤧ᤹ᤀᤥ. ᤜᤧᤰᤁᤩᤠᤱ ᤀᤠᤒᤠᤅᤣ ᤛᤣᤛᤣᤛᤠᤱᤛᤠᤱ ᤆᤥ᤺ᤰᤁᤠᤛᤡᤶᤔᤧ᤹ᤀᤥ॥

¹² ᤁᤖ ᤂᤧᤏᤡ᤹ ᤁᤧᤈᤠᤳᤋᤡᤖ ᤐᤣ᤺ᤰᤔᤠ ᤔᤧᤒᤥᤱᤏᤧᤸᤗᤥ ᤀᤡᤃᤪ ᤁᤧᤄᤧᤳᤋᤠᤛᤡᤀᤠᤱ ᤁᤧᤶᤒᤣᤃᤡᤸᤗᤥ. ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤧᤴ ᤂᤧᤏᤡ᤹ ᤋᤃᤡ ᤋᤃᤡ ᤐᤣ᤺ᤰᤗᤥ. ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤏᤡ᤹ ᤀᤣᤃᤠᤱ ᤋᤠᤱᤃᤧᤛᤧ᤺ᤵᤋᤡᤖᤥ॥

ᤋᤢᤰᤂᤣ ᤗᤠᤰᤂᤣ ᤁᤧᤍᤢᤶᤒᤠ ᤛᤧᤘᤠᤖᤥᤒᤠ

¹³ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢ᤹. “ᤀᤥᤔᤧᤳᤋᤠᤶᤔᤧ᤹ᤀᤥ. ᤀᤠᤛᤧᤘᤠᤖᤥᤒᤧᤸᤗᤧ ᤛᤡᤰᤁᤢᤶᤍᤡᤱ ᤏᤡᤱᤘᤠ᤹ᤖᤧ ᤕᤠ᤺ᤶᤒᤰ ᤆᤥᤃᤢᤖᤥ. ᤂᤢᤏᤧ᤹ ᤌᤥ ᤐᤥᤰ. ᤂᤢᤏᤧ᤹ ᤛᤠ᤹ᤖᤡᤰ ᤁᤢᤔᤡᤱᤛᤥ ᤁᤢᤎᤠ᤺ᤱᤛᤥ ᤔᤧᤈᤥᤃᤢᤖᤥ॥

¹⁴ ᤕᤖᤡᤰ ᤔᤏᤠᤜᤠ᤹ᤖᤧ ᤔᤧᤏᤡᤛᤢᤸᤗᤧ ᤂᤢᤴᤇᤡ᤹ ᤕᤠᤶ ᤆᤡᤈᤡᤱ ᤗ᤹ᤖᤧᤀᤠᤱ ᤘᤕᤧᤖᤥ. ᤂᤢᤏᤧ᤹ ᤔᤏᤠ ᤑᤠ᤹ᤀᤠᤱ ᤁᤢᤛᤡᤱᤅᤣ ᤔᤧᤴᤏᤡ᤺ᤳᤋᤣ ᤌᤠᤖᤡᤰ ᤁᤢᤏᤠᤖᤠᤴ ᤛᤠ᤹ᤖᤡᤰ ᤑᤧᤳᤔᤧᤗᤠ᤺ᤴᤍᤢ ᤔᤧᤒᤡᤖᤢᤀᤠᤱ ᤘᤕᤧᤖᤥ॥

¹⁵ ᤜᤧᤰᤁᤣᤗ᤹ᤖᤡᤰᤁᤣ ᤂᤢᤏᤧ᤹ ᤕᤖᤡᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤂᤢᤴᤇᤡ᤹ ᤏᤡᤱᤘᤠ᤹ ᤔᤠᤛᤢ ᤐᤡᤖᤢᤛᤡᤖᤥ ᤂᤢᤏᤧ᤹ ᤆᤥᤃᤢᤸᤗᤧ ᤜᤠᤱᤜᤠ᤹ ᤛᤫᤠ᤺ᤳ ᤔᤧᤶᤒᤠ᤺ᤳᤋᤣ ᤔᤧᤕᤢᤱᤗᤥ. ᤌᤣᤀᤠᤱᤓᤧᤸᤗᤧ ᤂᤢᤴᤇᤡ᤹ ᤔᤧᤶᤔᤧᤳᤇᤡᤱᤅᤣ ᤁᤧᤘᤠ᤹ᤒᤠ ᤐᤠ᤺ᤴᤜᤠ᤹ ᤂᤧᤱᤜᤠ᤹ᤖᤧ ᤔᤧᤏᤡᤛᤢᤖᤥ. ᤂᤧᤒᤩᤠᤱ ᤂᤧᤱᤜᤠ᤹ᤖᤧ ᤔᤧᤱᤄᤧᤶᤔᤣ ᤁᤧᤘᤠ᤹ᤒᤠ ᤐᤠ᤺ᤴᤜᤠ᤹ ᤁᤢᤛᤡᤱ ᤔᤧᤏᤡ᤺ᤳᤋᤢᤖᤥ॥”