ᤕᤛᤤᤕᤠ 51 - LIFOTNTᤕᤖᤢᤛᤗᤧᤔ ᤁᤧᤕᤢᤱᤒᤠᤜᤠ᤹ᤖᤧ ᤗᤠᤃᤡ ᤀᤠ᤺ᤴᤇᤡᤱᤔᤠ 1 ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤖᤥ. “ᤛᤠᤶᤕᤥᤏᤡᤔᤠᤀᤥ ᤁᤧᤒᤵᤐᤠ ᤏᤢ ᤕᤜᤘᤣ ᤍᤠᤱᤒᤠᤴ ᤁᤧᤃᤥ᤺ᤵᤐᤠᤛᤣ. ᤂᤧᤏᤡ᤹ᤃ ᤗᤢᤱᤕᤠᤰᤐᤣ᤹ᤗᤠᤶ ᤑᤢᤱ ᤗᤰᤔᤏᤠ ᤗ᤺ᤵᤔᤏᤠᤀᤠᤱ ᤁᤧᤘᤕᤡᤖᤥ. ᤗᤢᤱ ᤗ᤺ᤵᤔᤠᤍᤧᤴᤏᤥᤗᤠᤶ ᤂᤧᤏᤡ᤹ ᤗ᤺ᤵᤔᤏᤠᤏᤡᤱᤅᤠᤱ ᤁᤧᤘᤕᤡᤖᤥ. ᤁᤴ ᤐᤠ᤺ᤴᤜᤠ᤹ ᤂᤧᤏᤡ᤹ ᤏᤡᤱᤘᤠ᤹ ᤀᤡ᤺ᤳᤋᤧᤶᤔᤧ᤹ᤀᤥ॥ 2 ᤂᤡᤏᤡ᤹ ᤌᤠ᤺ᤰᤌᤧᤒᤠ ᤀᤒᤪᤠᤜᤠᤶᤔᤡᤴ ᤜᤧᤰᤁᤩᤠᤱ ᤂᤧᤏᤡ᤹ ᤁᤧᤃᤵᤔᤠ ᤛᤠᤖᤠᤴ ᤏᤡᤱᤘᤠ᤹ ᤀᤡ᤺ᤳᤋᤧᤶᤔᤧ᤹ᤀᤥ॥ ᤀᤠᤱᤃᤠ᤹ ᤀᤒᤪᤠᤜᤠᤶᤔᤡᤴ ᤀᤢ᤺ᤳᤋᤢᤱᤅᤡᤸᤗᤧ ᤂᤢᤏᤧ᤹ᤖᤰ ᤀᤧᤰᤗᤣ᤺ᤰ ᤘᤕᤧᤖᤥ. ᤁᤖ ᤂᤧᤴ ᤀᤠᤱᤃᤠ᤹ ᤜᤠᤱᤘᤠᤔᤢ᤹ᤀᤡ ᤐᤡᤖᤢᤱᤗᤥ ᤂᤧᤒᤩᤠᤱ ᤂᤧᤴ ᤕᤖᤡᤰ ᤑᤥᤛᤢᤱᤗᤥ॥ 3 “ᤕᤜᤘᤣ ᤍᤠᤱᤒᤧᤸᤗᤧ ᤛᤧᤰᤂᤠᤛᤠᤱ ᤕᤖᤢᤛᤗᤧᤔ ᤁᤧᤕᤢᤱᤒᤠᤜᤠ᤹ ᤜᤠᤱᤜᤠᤱ ᤔᤧᤳᤋᤢᤛᤡᤖᤥ. ᤜᤧᤰᤁᤩᤠᤱ ᤂᤢᤏᤧ᤹ ᤂᤧᤴ ᤁᤧᤗᤢ᤺ᤶᤒᤠ ᤜᤡᤶᤕ᤺ᤰᤜᤠ᤹ ᤗᤢᤱᤔᤠ᤹ ᤋᤢᤰᤋᤢᤀᤠᤱ ᤀᤥᤔᤧᤳᤋᤢᤖᤥ॥ ᤂᤧᤒᤩᤠᤱ ᤂᤧᤵᤔᤥᤒᤠ ᤔᤢᤖᤧᤰ ᤂᤠᤖᤧᤰᤐᤠ ᤕᤧ᤺ᤱᤄᤠᤍᤧᤴᤏᤡᤴ ᤀᤍᤏ ᤛᤡᤱᤛᤣ᤹ᤀᤡᤰᤁᤧᤴ ᤁᤢᤛᤡᤱ ᤆᤥᤃᤢᤖᤥ. ᤜᤧᤰᤁᤩᤠᤱ ᤆᤠ ᤔᤧᤴᤏᤢ᤹ᤔᤏᤠᤒᤠ ᤂᤠᤶᤒᤣ᤺ᤰᤁᤧᤴ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤡᤱᤛᤣ᤹ᤀᤡᤰ ᤜᤧᤰᤁᤣ ᤆᤥᤃᤢᤖᤥ॥ ᤐᤛ᤺ᤳ ᤛ᤺ᤵᤔᤠ ᤏᤢ ᤏᤡᤱᤘᤠ᤹ ᤋᤠᤔᤠ. ᤜᤧᤰᤁᤩᤠᤱ ᤏᤢᤃᤧᤴ ᤐᤡᤔᤠ ᤏᤢ ᤛᤠᤶᤗᤥᤔᤠᤖᤧ ᤀᤡᤰᤗᤠᤴ ᤂᤧ᤹ᤕᤥ ᤂᤥᤍᤧᤳᤗᤥ॥ 4 “ᤀᤠᤔᤏᤠᤛᤣ. ᤀᤠᤱᤃᤠ᤹ ᤀᤠᤒᤠ᤺ᤴᤏᤡᤴ ᤂᤧᤶᤛᤠᤶᤔᤧ᤹ᤀᤥ. ᤀᤠᤱᤃᤠ᤹ ᤀᤠᤛᤢᤘᤠᤱᤛᤣ. ᤀᤠᤒᤠ᤺ᤴᤏᤡᤴ ᤏᤡᤱᤘᤠ᤹ ᤐᤡᤖᤧᤶᤔᤧ᤹ᤀᤥ॥ ᤀᤠᤱᤃᤠ᤹ᤀᤥᤗᤠᤶ ᤛᤠᤶᤕᤥᤌᤡᤶ ᤀᤡᤱᤈᤠᤱ ᤗ᤺ᤴᤗᤥ. ᤂᤧᤒᤩᤠᤱ ᤀᤠᤱᤃᤠ᤹ ᤀᤠᤄᤠᤛᤧᤴᤏᤡᤴ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤀᤥ᤺ᤳᤋᤡ ᤐᤥᤱᤗᤥ॥ 5 ᤀᤠᤱᤃᤠ᤹ ᤀᤠᤛᤠᤶᤕᤥᤒᤠ ᤐᤠ᤺ᤴᤜᤠ᤹ ᤜᤠᤖᤠ ᤏᤡ᤺ᤳᤋᤠᤱ ᤋᤠᤖᤥ. ᤀᤠᤱᤃᤠ᤹ ᤀᤠᤛᤧᤴᤗᤵᤐᤡᤴ ᤗᤠᤶᤔᤥᤛᤠ ᤋᤠᤖ ᤐᤳᤗᤥ. ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤔᤢᤰᤛᤠᤶᤔᤡᤸᤗᤧ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤀᤥ ᤂᤠᤛᤧᤴ ᤋᤠᤖᤢᤱᤗᤥ॥ ᤘᤖ᤺ᤱᤅᤡᤸᤗᤧ ᤁᤢᤕᤠᤀᤥ ᤁᤧᤕᤢᤱᤒᤠᤜᤠ᤹ᤖᤧ ᤀᤠᤱᤃᤠ᤹ ᤀᤥᤔᤧᤔᤧᤳᤋᤠᤖᤥ. ᤂᤧᤒᤩᤠᤱ ᤀᤠᤱᤃᤠ᤹ ᤀᤠᤔᤢᤰᤛᤠᤶᤔᤥ ᤂᤧᤱᤜᤠ᤹ᤖᤧ ᤗᤠᤶ ᤀᤥᤔᤧᤔᤧᤳᤋᤢᤖᤥ॥ 6 ᤂᤧᤏᤡ᤹ ᤀᤠᤒᤠᤅᤣ ᤔᤡᤰᤁᤡᤴ ᤜᤴᤍᤧᤶᤔᤧ᤹ᤀᤠᤱ ᤌᤠ᤺ᤱ ᤋᤠᤱᤛᤠᤱᤒᤥ ᤀᤥᤔᤕᤧᤶᤔᤧ᤹ᤀᤥ. ᤜᤧᤰᤁᤩᤠᤱ ᤕᤥ ᤀᤡᤰᤛᤠ ᤂᤠᤶᤒᤣ᤺ᤰᤁᤡᤴ ᤀᤥᤔᤧᤳᤋᤧᤶᤔᤧ᤹ᤀᤥ॥ ᤋᤠᤱᤛᤠᤱᤒᤧᤴ ᤔᤡ᤺ᤰᤂᤥ᤹ ᤜᤧᤰᤁᤣ ᤔᤠᤒᤣ᤺ᤰᤗᤥ. ᤂᤧᤒᤩᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤁᤡᤴ ᤆᤠᤱᤍᤣᤳ ᤁᤢᤛᤡᤱ ᤁᤢᤍᤪᤧᤰ ᤐᤥᤱᤒᤣ᤺ᤰᤗᤥ॥ ᤂᤧᤶᤒᤩᤠᤱ ᤂᤧᤵᤔᤥ ᤁᤧᤕᤢᤱᤒᤠᤜᤠ᤹ ᤛᤡᤈᤠ ᤁᤢᤀᤡᤛᤡᤰ ᤔᤧᤛᤡᤖᤥ. ᤁᤖ ᤀᤠᤱᤃᤠ᤹ ᤀᤠᤛᤧᤴᤗᤵᤐᤡᤴ ᤛᤍᤠᤍᤡᤱ ᤀᤠᤓᤧᤸᤗᤧᤛᤠᤱ ᤘᤠ᤹ᤖᤥ. ᤀᤠᤱᤃᤠ᤹ ᤀᤠᤛᤠᤶᤕᤥᤒᤠ ᤐᤠ᤺ᤴᤏᤡᤴ ᤀᤠᤓᤧᤸᤗᤧᤀᤠᤱ ᤔᤧᤔᤧᤰᤏᤧᤸᤗᤥ॥ 7 “ᤌᤣ᤺ᤴ ᤏᤢᤒᤠ ᤆᤥᤰ ᤂᤧᤴ ᤁᤢᤛᤡᤱ ᤁᤧᤏᤡ᤺ᤵᤐᤠᤜᤠ᤹ᤖᤧ ᤂᤧᤵᤛᤠᤶᤔᤧ᤹ᤀᤥ. ᤜᤧᤰᤁᤩᤠᤱ ᤂᤧᤏᤡ᤹ ᤏᤡᤱᤘᤠ᤹ᤀᤥ ᤀᤠᤱᤃᤠ᤹ ᤀᤠᤀᤡᤱᤈᤠᤱᤅᤡᤴ ᤘᤠ᤹ᤖᤥ. ᤔᤏᤠᤜᤠ᤹ᤖᤧ ᤆᤧᤰᤕᤠ ᤁᤧᤶᤔᤧᤳᤋᤡᤸᤗᤧ ᤔᤧᤃᤡᤛᤧᤶᤔᤡᤴᤏᤧ᤹ᤀᤥ. ᤂᤧᤒᤩᤠᤱ ᤂᤧᤱᤜᤠ᤹ᤖᤧ ᤁᤢᤏᤠᤔᤧᤴᤇᤠ᤹ ᤁᤧᤶᤔᤧᤳᤋᤡᤸᤗᤧ ᤂᤧᤏᤡ᤹ ᤕᤱᤔᤠ ᤔᤧᤛᤩᤧ᤹ᤀᤡᤴᤏᤧ᤹ᤀᤥ॥ 8 ᤌᤣᤀᤠᤱᤓᤧᤸᤗᤧ ᤌᤰᤐᤧᤸᤗᤧ ᤆᤡᤖᤡᤰᤁᤧᤴ ᤆᤒᤠ ᤁᤢᤀᤡᤛᤡᤰ ᤂᤧᤱᤜᤠ᤹ ᤆᤛᤡᤖᤥ. ᤂᤡ᤺ᤴ ᤆᤒᤠ ᤁᤢᤀᤡᤛᤡᤰ ᤌᤠ᤹ᤒᤠ᤺ᤸᤗᤧ ᤂᤧᤱᤜᤠ᤹ ᤆᤛᤡᤖᤥ॥ ᤁᤖ ᤀᤠᤱᤃᤠ᤹ ᤀᤠᤛᤠᤶᤕᤥᤒᤠ ᤐᤠ᤺ᤴᤏᤡᤴ ᤛᤍᤠᤍᤡᤱᤗᤧ ᤗᤠᤃᤡ ᤘᤠ᤹ᤖᤥ. ᤀᤠᤱᤃᤠ᤹ ᤀᤠᤛᤧᤴᤗᤵᤐᤡᤴ ᤌᤠ᤺ᤰᤌᤠ᤺ᤰᤁᤥ ᤌᤠᤖᤡᤰ ᤘᤠ᤹ᤖᤥ॥” 9 ᤐᤥᤃᤧ᤹ᤀᤥ. ᤐᤥᤃᤧ᤹ᤀᤥ. ᤕᤜᤘᤣ ᤍᤠᤱᤒᤠᤀᤣ. ᤜᤧᤰᤁᤩᤠᤱ ᤀᤠᤓᤠ᤹ᤖᤧ᤹ᤀᤥ᥄ ᤁᤧᤔᤢᤰᤛᤠᤶᤔᤡᤴ ᤀᤥᤃᤵ ᤆᤥᤃᤧ᤹ᤀᤠᤱ ᤀᤠᤏᤡᤃᤣ ᤀᤠᤓᤠ᤹ᤖᤧ᤹ᤀᤥ᥄ ᤀᤢᤏᤠᤜᤢᤖᤡᤒᤠ ᤕᤧᤶᤔᤥ ᤀᤥᤃᤵ ᤁᤧᤈᤥᤃᤢᤒᤠ ᤜᤧᤰᤁᤣᤀᤣ ᤐᤥᤃᤧ᤹ᤀᤥ. ᤖᤠᤜᤠᤒ ᤀᤠᤈᤠᤈᤠᤒᤧᤴ ᤛᤩᤠᤰ ᤛᤩᤠᤰ ᤁᤧᤓᤢ᤹ᤒᤠᤴ ᤂᤧᤏᤧ᤹ᤀᤣᤖᤥ. ᤂᤧᤒᤩᤠᤱ ᤂᤧᤴ ᤀᤛᤣ᤺ᤰᤁᤡᤴ ᤑᤩᤠᤰ ᤗᤛ᤻ᤛᤢᤖ ᤁᤧᤎᤢᤒᤢᤖᤥ॥ 10 ᤂᤧᤏᤧ᤹ᤀᤣ ᤘᤖ᤺ᤱᤅᤡᤴ ᤆᤵᤐᤪᤧᤰ ᤁᤧᤈᤵᤛᤢᤖᤥ. ᤋᤢᤱᤃᤥᤍᤡᤱ ᤘᤖ᤺ᤱᤅᤥᤒᤠ ᤆᤫᤠ᤺ᤳᤋᤡᤴ ᤁᤧᤜᤣᤛᤢᤖᤥ. ᤜᤧᤰᤁᤩᤠᤱ ᤂᤧᤏᤧ᤹ ᤁᤧᤛᤧ᤺ᤵᤋᤢᤛᤡᤒᤠᤜᤠ᤹ ᤏᤠᤎᤠ᤺ᤶᤒᤡ ᤋᤣ᤹ᤔᤠᤛᤡᤖᤧ ᤗᤠᤃᤡ ᤘᤖ᤺ᤱᤛᤡᤃᤠᤱ ᤗᤠᤶ ᤁᤧᤈᤥᤃᤢ ᤁᤧᤒᤡᤖᤢᤛᤡᤖᤥ॥ 11 ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤧᤸᤗᤢᤱ ᤜᤢᤅᤢᤀᤠᤱ ᤌᤧ᤹ᤖᤢᤛᤡᤒᤠᤜᤠ᤹ ᤔᤧᤏᤢ᤺ᤱ ᤔᤧᤍᤠᤖᤥ. ᤂᤧᤱᤜᤠ᤹ ᤛᤡᤕᤥᤏ ᤕᤧᤰᤕᤰᤁᤥ ᤛᤠᤶᤔᤧᤗᤥᤖ ᤔᤧᤗᤠ᤺ᤳᤗᤥ. ᤂᤶᤒᤩᤠᤱ ᤛᤍᤠᤍᤡᤱ ᤛ᤺ᤵᤔᤠᤴ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤌᤧᤃᤣ᤺ᤰᤁᤥᤒᤠ ᤋᤡᤆ ᤜᤧᤰᤁᤣ ᤐᤥᤱᤗᤥ॥ ᤂᤧᤱᤜᤠ᤹ᤖᤧ ᤛ᤺ᤵᤔᤠ ᤏᤢ ᤏᤡᤱᤘᤠ᤹ ᤋᤠᤔᤠᤴ ᤔᤧᤄᤥᤛᤢᤖᤥ. ᤂᤧᤒᤩᤠᤱ ᤜᤠ᤺ᤵᤔᤠ ᤏᤢ ᤔᤧᤖᤡᤱᤎᤰᤔᤠ ᤔᤧᤒᤥᤱᤏᤧᤸᤗᤥ॥ 12 ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢ᤹. “ᤂᤡᤏᤡ᤹ ᤜᤠᤱᤜᤠᤱᤘᤠ ᤁᤧᤒᤡᤒᤠᤱᤃ ᤀᤠᤱᤃᤠ᤹ᤀᤣᤖᤥ. ᤕᤠ᤺ᤴᤛᤢᤱ ᤜᤧᤰᤁᤣ ᤀᤡᤃᤧᤗᤧᤶᤒᤠᤀᤠᤱ ᤁᤧᤛᤡᤒᤠ ᤁᤧᤒᤣ᤺ᤰᤐᤠ ᤔᤏᤠᤜᤠ᤹ᤏᤢ ᤂᤧᤏᤡ᤹ ᤌᤣᤀᤠᤱ ᤁᤧᤃᤡᤛᤡᤒᤠᤒᤣ᥅ 13 ᤂᤡᤏᤡ᤹ ᤏᤠᤘᤠᤃᤧᤴ ᤆᤀᤡ᤺ᤳ ᤁᤧᤈᤥ᤺ᤰᤐᤠ ᤋᤠᤱᤛᤠᤱᤒᤧᤴ ᤁᤧᤈᤥ᤺ᤰᤐᤠᤀᤠᤱ ᤂᤧᤴ ᤁᤧᤄᤡᤱᤒᤠ ᤏᤢ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤧᤸᤗᤧ ᤁᤢᤒᤢᤱ ᤁᤧᤕᤢᤱᤒᤠ. ᤕᤜᤘᤣ ᤍᤠᤱᤒᤧᤴ ᤂᤡᤏᤡ᤹ ᤏᤡᤱᤘᤠ᤹ ᤁᤧᤓᤣ᤺ᤳᤇᤢᤶᤒᤡ᥅ ᤂᤡᤏᤡ᤹ ᤔᤧᤱᤔᤠ ᤁᤧᤀᤡ᤺ᤵᤐᤠᤜᤠ᤹ ᤏᤢ ᤂᤡᤏᤡ᤹ ᤋᤢᤰᤂᤣ ᤁᤧᤈᤠ᤺ᤵᤐᤠᤜᤠ᤹ᤖᤧ ᤂᤢᤴᤇᤡ᤹ ᤛᤡᤰᤐᤥ᤺ᤰᤔᤠᤸᤗᤧ ᤆᤥᤃᤢᤸᤗᤧ ᤆᤰᤔᤧᤸᤗ᤹ᤀᤣ ᤂᤡᤏᤡ᤹ ᤁᤧᤃᤡᤛᤡᤀᤠᤱ ᤁᤧᤘᤕᤡᤒᤠᤒᤡ᥅ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤛᤡᤰᤐᤥ᤺ᤰᤔᤠᤸᤗᤧ ᤂᤡᤏᤡ᤹ ᤛᤢᤔᤠ ᤁᤧᤴᤇᤢᤰᤋᤡᤴᤗᤥ॥ 14 ᤁᤡᤔᤧᤸᤗᤧ ᤕᤢᤶᤛᤢᤱᤔᤠ ᤁᤧᤒᤥᤱᤒᤠ ᤔᤧᤍᤧᤶᤛᤢ ᤔᤧᤍᤣ᤹ᤖᤢᤛᤡᤒᤠᤜᤠ᤹ ᤜᤠᤖᤠᤀᤣ ᤔᤧᤗᤧᤖᤢᤛᤡᤖᤥ॥ ᤂᤧᤱᤜᤠ᤹ ᤐᤢᤱᤗᤠᤜᤡᤶᤔᤥᤒᤠ ᤕᤠᤰᤑᤠᤱᤅᤥ ᤔᤧᤴᤇᤡᤏᤧᤸᤗᤥ. ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤆᤠᤔᤠ ᤌᤢᤱᤔᤠᤜᤠ᤹ ᤔᤧᤛᤢ᤺ᤴᤏᤧᤗᤥ॥ 15 ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤠ ᤂᤧᤏᤧ᤹ ᤁᤧᤏᤡᤱᤘᤠ᤹ᤑᤢᤔᤠᤱᤀᤠᤖᤥ. ᤘᤖ᤺ᤱᤅᤡᤴ ᤇᤡᤶᤗᤡᤱ ᤇᤡᤶᤗᤡᤱ ᤁᤧᤔᤧᤵᤐᤠ. ᤜᤧᤰᤁᤩᤠᤱ ᤘᤠᤓᤧᤸᤗᤧᤱᤜᤠ᤹ ᤜᤢ᤺ᤰᤗ ᤁᤧᤕᤠ᤺ᤶᤒᤠ ᤀᤠᤱᤃᤠ᤹ᤀᤣᤖᤥ. ᤀᤠᤱᤃᤠ᤹ ᤀᤠᤔᤡᤱ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤠᤖᤥ᥄ 16 ᤀᤠᤱᤃᤠ᤹ ᤀᤠᤒᤠ᤺ᤴᤈᤠ᤺ᤰᤁᤡᤴ ᤂᤧᤏᤧ᤹ ᤁᤧᤶᤒᤪᤠᤀᤥ ᤁᤣ᤺ᤳᤋᤢᤱ ᤐᤡᤏᤧᤀᤠᤱ ᤘᤠ᤹ᤖᤥ ᤀᤠᤱᤃᤠ᤹ ᤀᤠᤜᤢᤰ ᤛᤠᤶᤔᤡ᤺ᤰᤂᤢᤱᤒᤠᤸᤗᤧ ᤂᤧᤏᤧ᤹ ᤌᤣ᤺ᤰᤏᤧᤀᤠᤱ ᤘᤠ᤹ᤖᤥ— ᤀᤠᤱᤃᤠ᤹ ᤋᤠᤱᤛᤠᤱᤒᤧᤴ ᤀᤠᤒᤠᤅᤣ ᤁᤢᤒᤵᤔᤠᤍᤧᤴᤏᤥ ᤑᤳᤇᤢᤱᤅᤠᤱ ᤐᤳᤗᤥ. ᤜᤧᤰᤁᤩᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤧᤸᤗᤧ ᤁᤢᤒᤢᤱ ᤕᤰᤂᤢᤱᤅᤠᤱ ᤕᤢᤱᤗᤥ. ᤂᤧᤒᤩᤠᤱ ᤛᤡᤕᤥᤏ ᤕᤧᤰᤕᤰᤁᤡᤴ ‘ᤀᤠᤔᤏᤠᤏᤧ’ ᤔᤧᤳᤋᤢᤱᤅᤠᤱ ᤘᤠ᤹ᤖᤥ॥” ᤕᤖᤢᤛᤗᤧᤔᤖᤧ ᤗᤠᤃᤡ ᤛᤠᤶᤍᤡᤱ 17 ᤕᤖᤢᤛᤗᤧ᤺ᤶᤔᤣ. ᤛᤥᤖᤧ᤹ᤀᤥ᥄ ᤛᤥᤖᤧ᤹ᤀᤥ ᤜᤧᤰᤁᤩᤠᤱ ᤐᤥᤃᤧ᤹ᤀᤥ᥄ ᤕᤜᤘᤣ ᤍᤠᤱᤒᤧᤸᤗᤧ ᤛᤠ᤹ᤖᤡᤰ ᤁᤢᤛᤠᤰᤁᤧᤴ ᤐᤥᤃᤧᤸᤗᤧ ᤌᤢᤱᤔᤠ ᤁᤧᤒᤡᤖᤧᤒᤠ ᤁᤢᤛᤡᤰᤁᤧᤸᤗᤧᤴ ᤆᤸᤗᤠᤱᤏᤠ ᤂᤥᤷᤕᤠᤴ ᤂᤧᤏᤧ᤹ ᤁᤧᤎᤢᤅᤢᤀᤠᤱ ᤁᤧᤘᤠ᤹ᤖᤥ॥ ᤂᤧᤏᤧ᤹ ᤂᤧᤴ ᤁᤢᤕᤢ᤺ᤴᤍᤠᤱᤘᤠ᤺ᤴᤏᤠᤱ ᤛᤖᤰ ᤁᤧᤎᤢᤅᤢᤀᤠᤱ ᤂᤧᤏᤧ᤹ ᤁᤧᤗᤠᤱᤜᤠ᤹ ᤀᤧᤳᤇᤡᤱᤗᤥ॥ 18 ᤂᤧᤏᤧ᤹ ᤗᤠᤶ ᤀᤥ᤺ᤴᤃᤧᤎᤠᤰᤐᤠ ᤀᤠᤳᤋᤡᤴᤏᤠᤱ ᤜᤥᤵᤗᤥ. ᤁᤧᤔᤏᤠᤜᤠ᤹ᤗᤢᤶᤔᤥ ᤁᤧᤜᤢᤰ ᤁᤧᤍᤧᤶᤒᤠᤀᤠᤱ ᤗᤠᤶᤃᤧᤗᤥᤒᤠ ᤜᤠ᤺ᤳᤋᤠᤱ ᤔᤧᤜᤥᤵᤗᤥ॥ 19 ᤁᤴ ᤏᤧᤳᤇᤡ ᤐᤕᤶ ᤕᤶᤒᤠ ᤋᤢᤰᤂᤣᤜᤠ᤹ ᤂᤧᤏᤧ᤹ ᤁᤧᤛᤶᤎᤠᤱ ᤀᤡᤍᤠᤖᤥ— ᤂᤧᤏᤧ᤹ ᤜᤠ᤺ᤳᤗᤧ ᤜᤠᤱᤜᤠᤱ ᤔᤧᤵᤔᤠ ᤁᤧᤛᤢᤰᤐᤣ᥅ ᤂᤧᤏᤧ᤹ ᤁᤧᤗᤠᤈᤣᤴ ᤌᤱᤅᤡᤸᤗᤧ ᤂᤠᤵᤐᤢᤌᤩ᤺ᤱ ᤐᤥ᤺ᤰᤂᤧᤀᤠᤱ ᤏᤧᤖᤥ. ᤁᤧᤔᤏᤠᤜᤠ᤹ ᤛᤠᤰᤁᤡᤸᤗᤧ ᤋᤖᤢᤛᤡᤀᤠᤱ ᤔᤧᤘᤠ᤹ᤖᤥ. ᤂᤧᤏᤧ᤹ ᤜᤠᤱᤜᤠᤱ ᤁᤧᤔᤧᤵᤐᤠ ᤜᤠ᤺ᤳᤋᤠᤱ ᤜᤥᤵᤗᤥ॥ 20 ᤁᤧᤖᤧᤰ ᤗᤠᤶᤜᤠ᤹ᤖᤧ ᤁᤢᤕᤠ ᤁᤢᤍᤡᤱ ᤁᤧᤔᤏᤠᤜᤠ᤹ ᤂᤢᤴᤇᤡ᤹ ᤌᤏᤠ ᤗᤧᤰᤂᤧᤀᤠᤱ ᤜᤷᤈᤢ᤹ ᤔᤧᤈᤥ᤺ᤴᤍᤧᤀᤠᤱ ᤔᤧᤏᤧᤖᤥ॥ ᤂᤧᤱᤜᤠ᤹ᤃ ᤛᤠᤘᤠᤃᤧᤶᤒᤠᤸᤗᤧ ᤁᤢᤀᤡᤀᤥ ᤁᤧᤎᤠᤒᤠ ᤐᤧ᤺ᤱᤘᤠ ᤁᤢᤛᤡᤰ ᤔᤧᤗ᤹ᤖᤥ. ᤂᤧᤱᤜᤠ᤹ᤀᤥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤡᤰ ᤐᤥ᤺ᤰᤔᤧᤴ ᤌᤠᤛᤢᤀᤠᤱ ᤘᤠ᤹ᤖᤥ॥ ᤜᤧᤰᤁᤩᤠᤱ ᤂᤢᤴᤇᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤠ᤹ᤖᤡᤰ ᤑᤧ᤺ᤰᤋᤢᤛᤡᤀᤠᤱ ᤔᤧᤘᤠ᤹ᤖᤥ॥ 21 ᤂᤧᤸᤗᤧᤆᤥᤃᤢᤸᤗᤧ ᤁᤴ ᤂᤧᤵᤛᤧᤶᤔᤧ᤹ᤀᤥ. ᤋᤢᤰᤂᤣ ᤁᤧᤍᤢᤶᤒᤠᤛᤣ. ᤁᤧᤔᤛᤡᤱᤒᤠᤛᤣ. ᤁᤖ ᤛᤣᤈ᤺ᤱᤘᤠ᤺ᤸᤗᤧᤃ ᤔᤣ᤺ᤴᤗᤥ. 22 ᤂᤡᤏᤡ᤹ ᤋᤠᤱᤃᤧᤛᤧ᤺ᤵᤐᤠ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤰᤂᤣ ᤐᤠ᤺ᤳᤋᤢ᤹. “ᤀᤠᤛᤠᤰᤁᤧᤴ ᤐᤥᤃᤧᤀᤠᤱ ᤌᤣᤀᤠᤱ ᤔᤧᤴᤏᤡᤒᤧᤴᤏᤡᤸᤗᤧ ᤂᤡᤏᤡ᤹ ᤐᤡᤏᤡᤱᤒᤠ ᤆᤸᤗᤠᤱᤏᤠ ᤂᤥᤷᤕᤠᤴ ᤂᤧᤳᤋᤢᤱᤗ ᤐᤳᤋᤠᤖᤥ॥ ᤂᤡᤏᤡ᤹ ᤗᤠᤱ ᤀᤧᤳᤇᤡᤱᤗ ᤁᤧᤕᤠ᤺ᤶᤒᤠ ᤆᤸᤗᤠᤱᤏᤠ ᤂᤥᤷᤕᤠᤴ ᤀᤠᤸᤗᤀᤠᤱᤎᤥ ᤀᤠᤑᤠᤸᤗᤧᤀᤠᤱ ᤌᤢᤱᤔᤠ ᤔᤧᤒᤥᤱᤏᤧᤸᤗᤥ॥ 23 ᤂᤧᤴ ᤆᤸᤗᤠᤱᤏᤠ ᤂᤥᤷᤕᤠᤴ ᤂᤡᤏᤡ᤹ ᤋᤠᤵᤑᤧ᤺ᤸᤗᤡᤰ ᤁᤧᤔᤧᤵᤐᤠᤜᤠ᤹ ᤐᤡᤖᤢᤱᤛᤡᤱᤗᤥ. ᤂᤧᤱᤜᤠ᤹ᤖᤧ ᤂᤡᤏᤡ᤹ ᤀᤰᤂᤣ ᤁᤧᤶᤔᤧᤳᤋᤡᤀᤠᤱ ᤔᤧᤘᤕᤧᤖᤥ. ‘ᤂᤡᤏᤡ᤹ ᤛᤠᤶᤒᤥᤴᤏᤠᤱ ᤗᤶᤒᤧᤳ ᤏᤧᤛᤠᤶᤔᤧ᤹ᤀᤥ ᤀᤠᤏᤡᤃᤣ ᤂᤡᤏᤡ᤹ ᤛᤶᤎᤠᤱ ᤗᤠᤱᤄᤣᤃᤡᤃᤧᤖᤥ॥ ᤜᤧᤰᤁᤩᤠᤱ ᤂᤡᤏᤡ᤹ ᤀᤣ᤺ᤰᤁᤧᤴ ᤂᤠᤶᤒᤠᤱ ᤁᤢᤛᤡᤱ ᤆᤥᤃᤧᤶᤔᤧ᤹ᤀᤥ ᤂᤧᤒᤩᤠᤱ ᤗᤠᤱᤄᤣ᤺ᤰᤔᤠ ᤗᤠᤶ ᤜᤧᤰᤋᤱᤒᤠ ᤐᤥᤱᤗᤖᤥ॥’” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.