ᤕᤛᤤᤕᤠ 50 - LIFOTNT

ᤀᤡᤛᤪᤠᤀᤡᤗᤖᤧ ᤁᤢᤗᤠᤕᤥ ᤜᤧᤰᤁᤩᤠᤱ ᤛᤧᤘᤠᤖᤥᤒᤠᤸᤗᤧ ᤀᤡᤱᤈᤠᤱ ᤀᤡ᤺ᤳᤋᤢᤒᤠ

¹ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤖᤥ. “ᤀᤠᤱᤃᤠ᤹ ᤏᤠᤈᤱᤛᤰ ᤛᤠᤵᤋᤢᤱᤐᤡᤖᤢᤱᤒᤠᤸᤗᤧ ᤆᤥᤃᤢᤸᤗᤧ ᤁᤧᤶᤔᤠ ᤔᤧᤒᤠᤱᤛᤢ ᤔᤧᤍᤣᤛᤢᤀᤠᤱ ᤘᤕᤧᤒᤠᤒᤡ᥅ ᤀᤡᤃᤪ ᤀᤠᤱᤃᤠ᤹ ᤀᤠᤳᤋᤡᤴ ᤛᤡᤱᤏᤠᤳᤛᤠᤒᤧᤸᤗᤧ ᤁᤢᤜᤢᤰᤁᤥ ᤂᤧᤏᤡ᤹ ᤛᤱᤏᤡᤱᤒᤣ᥅ ᤔᤣ᤺ᤴᤗᤥ. ᤂᤧᤏᤡ᤹ ᤗᤠᤕᤥᤜᤠ᤹ᤖᤧ ᤆᤥᤃᤢᤸᤗᤧ ᤂᤧᤏᤡ᤹ ᤁᤧᤶᤛᤱᤛᤡᤒᤠᤖᤥ. ᤜᤧᤰᤁᤩᤠᤱ ᤂᤧᤏᤡ᤹ ᤔᤠ᤺ᤴᤏᤠᤱ ᤂᤧᤏᤡ᤹ ᤗᤠᤕᤥᤸᤗᤧ ᤆᤥᤃᤢᤸᤗᤧ ᤔᤠ᤺ᤱᤄᤠ ᤔᤧᤒᤠᤱᤛᤢᤒᤠᤖᤥ॥

² ᤀᤠᤱᤃᤠ᤹ ᤂᤧ᤹ᤕᤥ ᤑᤧᤖᤠᤱᤅᤡᤸᤗᤧ ᤌᤣᤀᤠᤱ ᤜᤠ᤺ᤳᤋᤠᤱ ᤜᤥ᤺ᤵᤋᤧᤒᤠᤒᤣ᥅ ᤀᤠᤱᤃᤠ᤹ ᤐᤠ᤺ᤴᤇᤠ᤺ᤳᤋᤢᤱᤛᤡᤱᤅᤧᤸᤗᤧ ᤏᤢᤃᤵ ᤁᤧᤒᤡᤒᤠ ᤌᤣᤀᤠᤱ ᤀᤣ᤺ᤴᤏᤠᤱ ᤔᤧᤘᤕᤧᤏᤧᤶᤒᤠᤒᤣ᥅ ᤌᤣ ᤀᤠᤱᤃᤠ᤹ ᤀᤠᤜᤢᤰᤁᤡᤴ ᤂᤧᤏᤡ᤹ ᤌᤧ᤹ᤔᤠ ᤔᤧᤴᤇᤢᤰᤔᤏᤠ ᤐᤥ᤺ᤰᤂᤧᤀᤠᤱ ᤘᤕᤧᤒᤡ᥅ ᤌᤣ ᤂᤧᤏᤡ᤹ ᤋᤠᤱᤛᤧ᤺ᤵᤔᤠᤖᤧ ᤗᤠᤃᤡ ᤀᤠᤱᤃᤠ᤹ ᤀᤠᤔᤢᤰᤛᤠᤶᤔᤡᤴ ᤛᤢ᤺ᤶᤒᤡ᥅ ᤀᤠᤱᤃᤠ᤹ ᤘᤖ᤺ᤱᤅᤡᤴ ᤆᤒᤧ᤺ᤳᤇᤡᤰ ᤑᤧ᤺ᤰᤋᤢᤱᤅᤡᤸᤗᤧ ᤂᤧᤴ ᤆᤵᤐᤪᤧᤰ ᤆᤵᤗᤥ. ᤘᤜ᤺ᤱᤜᤠ᤹ ᤀᤠᤱᤃᤠ᤹ ᤔᤢᤖᤧᤰ ᤂᤠᤖᤧᤰᤐᤠ ᤕᤧ᤺ᤱᤄᤠᤍᤧᤴ ᤆᤥᤃᤢᤱᤗᤥ॥ ᤆᤫᤠ᤺ᤳᤋᤡᤴ ᤛᤢ᤺ᤶᤒᤠᤸᤗᤧ ᤆᤥᤃᤢᤸᤗᤧ ᤂᤧᤵᤔᤥᤒᤠ ᤅᤠᤜᤠ᤹ ᤜᤷᤃᤡ᤹ ᤔᤧᤃᤡᤖᤥ ᤂᤧᤒᤩᤠᤱ ᤘᤠᤔᤡ᤺ᤰᤔᤠᤸᤗᤧ ᤔᤧᤛᤡᤖᤥ॥

³ ᤀᤠᤱᤃᤠ᤹ ᤋᤠᤱᤛᤠᤰᤐᤠᤴ ᤔᤠᤰᤋᤠᤱᤒᤠ ᤐᤥᤱᤗ ᤆᤥᤃᤢᤱᤗᤥ. ᤜᤧᤰᤁᤩᤠᤱ ᤂᤧᤴ ᤛᤃᤡ ᤋᤣ᤺ᤳᤋᤡᤸᤗᤧ ᤋᤧᤵᤋᤢᤱᤗᤥ॥”

⁴ ᤁᤧᤏᤠᤒᤠᤜᤠ᤹ ᤁᤧᤎᤢᤶᤒᤠ ᤆᤥ᤺ᤰᤔᤠ ᤛᤢᤰᤋᤢᤱᤛᤡᤱᤗ ᤑᤠ᤹ᤀᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤡᤰᤁᤢᤶ ᤏᤡᤱᤘᤠ᤹ᤒᤠ ᤐᤠ᤺ᤴᤈᤠ᤺ᤰᤁᤡᤴ ᤐᤡᤖᤠᤱᤅᤠᤱ ᤘᤠ᤹ᤖᤥ॥ ᤂᤢᤏᤧ᤹ ᤀᤠᤱᤃᤠ᤹ ᤋᤠᤏᤠᤶ ᤌᤰᤔᤠ ᤑᤥᤱᤅᤠᤖᤥ ᤁᤧᤜᤢ᤹ᤛᤡᤱᤒᤠ ᤜᤧᤰᤁᤣ ᤏᤢᤖᤡᤰᤁᤠᤱ ᤂᤧᤶᤔᤠᤖᤧ ᤗᤠᤃᤡ ᤂᤢᤏᤧ᤹ ᤀᤠᤱᤃᤠ᤹ ᤀᤠᤏᤧᤰᤂᤥ᤹ᤒᤠᤴ ᤜᤴᤍᤢ ᤐᤡᤀᤠᤖᤥ॥

⁵ ᤕᤜᤘᤣ ᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤱᤃᤠ᤹ ᤀᤠᤴᤓᤠᤰᤁᤡᤴ ᤜᤴᤍᤠᤱ ᤐᤡᤖᤠᤱᤅᤠᤱ ᤘᤠ᤹ᤖᤥ. ᤜᤧᤰᤁᤩᤠᤱ ᤀᤠᤱᤃᤠ᤹ ᤁᤢᤍᤰᤗᤧᤱᤘᤠᤀᤥ ᤐᤡᤑᤩᤢᤱ ᤔᤧᤴᤈᤥ᤺ᤰᤐᤠᤸᤗᤥ ᤀᤠᤱᤃᤠ᤹ ᤀᤣᤃᤠᤱ ᤔᤧᤏᤢ᤺ᤰᤂᤠᤱᤅᤡᤸᤗᤥ॥

⁶ ᤀᤠᤱᤃᤠ᤹ ᤕᤠᤵᤔᤡ ᤁᤧᤜᤡᤵᤐᤠᤜᤠ᤹ ᤀᤠᤀᤣ᤺ᤰᤁᤡᤴ ᤋᤠ᤺ᤰᤋᤢᤱ ᤐᤡᤖᤢᤱᤛᤡᤱᤗᤥ. ᤜᤧᤰᤁᤩᤠᤱ ᤀᤠᤶᤎᤥ᤹ ᤁᤧᤀᤠ᤺ᤱᤒᤠᤜᤠ᤹ ᤀᤠᤴᤍᤣᤱᤒᤧᤴ ᤜᤡᤛᤢᤱ ᤐᤡᤖᤢᤱᤛᤡᤱᤗᤥ॥ ᤕᤠᤵᤔᤡ ᤁᤡᤏᤠ᤺ᤴᤍᤡ ᤁᤧᤒᤡᤒᤠᤜᤠ᤹ ᤏᤢ ᤕᤠᤵᤔᤡ ᤌᤩᤠ᤺ᤳ ᤁᤧᤎᤥᤰᤐᤠᤜᤠ᤹ᤗᤠᤶ ᤀᤠᤱᤃᤠ᤹ ᤀᤠᤏᤠᤖᤠᤴ ᤔᤧᤈᤡᤰᤂᤢᤱᤅᤡᤸᤗᤥ॥

⁷ ᤁᤖ ᤀᤠᤱᤃᤠ᤹ ᤛᤡᤖᤡᤱᤔᤔᤠ ᤔᤧᤒᤥᤱᤏᤧᤸᤗᤥ. ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤑᤠ᤹ᤀᤠᤖᤥ॥ ᤁᤸᤗᤧᤆᤥᤃᤢᤸᤗᤧ ᤀᤠᤱᤃᤠ᤹ ᤀᤠᤏᤠᤖᤠᤴ ᤌᤡᤱᤎᤡᤱ ᤔᤧᤳᤋᤢᤱᤗᤥ. ᤁᤢᤏᤡᤱᤘᤠ᤹ ᤀᤡᤛᤡ᤺ᤰ ᤆᤥ᤺ᤰᤔᤠ ᤏᤡᤱᤛᤣᤰ ᤆᤥᤃᤢᤱᤗᤥ. ᤂᤧᤒᤩᤠᤱ ᤀᤠᤱᤃᤠ᤹ ᤀᤠᤏᤠ ᤔᤧᤎᤠᤏᤧᤴ ᤑᤠ᤹ᤀᤠᤱ ᤀᤠᤱᤃᤠ᤹ ᤏᤡᤛᤢᤱᤗᤥ॥

⁸ ᤀᤠᤱᤃᤠ᤹ ᤀᤠᤵᤋᤡᤰ ᤔᤣ᤺ᤴᤏᤣᤒᤠ ᤆᤥ᤺ᤰᤁᤠ᤹ ᤑᤠ᤹ᤀᤠᤱ ᤐᤠ᤺ᤵᤔᤠ ᤁᤧᤛᤢᤰᤐᤧᤴ ᤀᤠᤒᤣᤛᤠᤱ ᤘᤠ᤹ᤖᤥ॥ ᤁᤸᤗᤧᤆᤥᤃᤢᤸᤗᤧ ᤀᤠᤱᤃᤠ᤹ ᤀᤠᤍᤰᤗᤧᤱᤘᤠᤀᤥ ᤀᤣ᤺ᤸᤗᤧ ᤐᤠ᤺ᤴᤎᤡᤰᤁᤠᤒᤣ᥅ ᤀᤠᤏᤡ᤹ ᤗᤢ ᤏᤠᤍᤢᤶᤍᤢᤶᤒᤠ ᤐᤣᤃᤡᤖᤥ᥄ ᤀᤠᤱᤃᤠ᤹ ᤐᤠ᤺ᤴᤃᤧᤎᤡᤰᤐᤠ ᤜᤠᤳ ᤘᤠ᤹᥅ ᤂᤧᤴ ᤀᤠᤱᤃᤠ᤹ᤏᤢ ᤂᤧᤔᤠ᤹ ᤆᤥ᤺ᤰᤗᤖᤥ᥄

⁹ ᤕᤜᤘᤣ ᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤀᤠᤒᤠᤅᤣ ᤀᤠᤱᤃᤠ᤹ ᤗᤧᤵᤔᤠᤱ ᤐᤥᤱᤅᤠᤱ ᤐᤠ᤺ᤳᤗᤥ॥ ᤀᤠᤱᤃᤠ᤹ ᤀᤠᤳᤋᤡᤸᤗᤧ ᤐᤠᤴ ᤌᤡᤰᤔᤠ ᤛᤢᤰᤁᤠᤒᤣ᥅ ᤂᤧᤱᤜᤠ᤹ ᤁᤧᤖᤧᤰ ᤆᤠᤱᤍᤣᤳ ᤁᤢᤛᤡᤱ ᤁᤢᤍᤪᤧᤰ ᤔᤧᤒᤥᤱᤗᤥ. ᤌᤰᤐᤠᤸᤗᤧ ᤂᤧᤱᤜᤠ᤹ ᤆᤛᤡᤖᤥ॥

¹⁰ ᤂᤧᤏᤡ᤹ᤀᤥ ᤜᤠ᤺ᤳᤗᤧ ᤕᤜᤘᤣ ᤍᤠᤱᤒᤧᤴ ᤔᤡᤱᤛᤥ ᤀᤡᤱᤎᤠᤱ ᤐᤡᤖᤢᤒᤣ᥅ ᤜᤧᤰᤁᤩᤠᤱ ᤀᤠᤳᤋᤡᤸᤗᤧ ᤂᤢᤏᤧ᤹ ᤁᤢᤛᤧᤘᤠᤖᤥᤒᤧᤸᤗᤧ ᤁᤢᤒᤠ᤺ᤴᤏᤡᤴ ᤂᤧᤵᤛᤢᤒᤣ᥅ ᤀᤥ᤺ᤳᤋᤡ ᤔᤣ᤺ᤴᤏᤣ ᤂᤠᤔᤠᤰᤔᤥ ᤗᤠᤱᤃᤧᤄᤣ᤺ᤰᤐᤧᤸᤗᤧ ᤕᤜᤘᤣ ᤍᤠᤱᤒᤠᤴ ᤋᤠ᤺ᤰᤐᤥ ᤆᤥᤃᤢᤖᤖᤥ. ᤜᤧᤰᤁᤩᤠᤱ ᤀᤠᤒᤠᤅᤣ ᤁᤢᤏᤡᤱᤘᤠ᤹ᤑᤢᤔᤠᤱᤅᤥ ᤁᤢᤏᤡᤱᤘᤠᤴ ᤕᤢᤰᤂᤢᤖᤖᤥ॥

¹¹ ᤁᤖ ᤀᤠᤸᤗ ᤂᤡᤏᤡ᤹ ᤁᤧᤖᤧᤰ ᤀᤠᤳᤋᤡᤴᤜᤠ᤹ᤖᤧ ᤔᤡ ᤁᤧᤜᤠ᤺ᤴᤍᤢᤶ ᤜᤧᤰᤁᤩᤠᤱ ᤜᤢᤖᤢᤖᤢ ᤗ᤹ᤖᤡᤰ ᤁᤧᤜᤠ᤹ᤒᤠ ᤔᤡᤈᤥ᤺ᤳᤋᤧᤴ ᤁᤧᤃᤠᤵᤐᤠᤛᤡ. ᤂᤡᤏᤡ᤹ ᤐᤣᤃᤧᤶᤔᤧ᤹ᤀᤥ. ᤂᤡᤏᤡ᤹ ᤁᤧᤜᤠ᤺ᤴᤍᤢᤶᤒᤠ ᤔᤡ ᤏᤢ ᤔᤡᤈᤥ᤺ᤳᤋᤧᤸᤗᤧ ᤀᤥ᤺ᤳᤋᤡᤀᤥ ᤗᤠᤱᤄᤣᤃᤧᤶᤔᤧ᤹ᤀᤥ॥ ᤂᤧᤏᤡ᤹ ᤀᤠᤱᤃᤠ᤹ ᤀᤠᤜᤢᤰᤁᤥᤗᤠᤶ ᤜᤠᤒᤠ ᤁᤴ ᤁᤧᤍᤢᤔᤢᤶᤗᤥ— ᤂᤡᤏᤡ᤹ ᤁᤧᤛᤠᤰᤐᤠ ᤋᤢᤰᤂᤣᤗᤠᤰᤂᤣᤀᤥ ᤁᤧᤎᤩᤧ᤹ᤀᤡᤖᤥ॥