ᤕᤛᤤᤕᤠ 5 - LIFOTNTᤆᤧᤸᤗᤧᤰᤛᤣ᤹ ᤀᤡᤰᤋᤠᤵᤐᤥᤒᤠ ᤛᤠᤶᤗᤥ 1 ᤀᤠᤱᤃᤠ᤹ ᤀᤠᤛᤡᤖᤠ᤹ ᤁᤧᤎᤠᤱᤒᤧᤴ ᤂᤢᤏᤧ᤹ ᤁᤢᤈᤧᤸᤗᤧᤰᤛᤣ᤹ ᤀᤡᤰᤁᤧᤸᤗᤧ ᤁᤢᤕᤠ᤺ᤶᤒᤣᤀᤥ ᤗᤳᤇᤠ ᤛᤠᤶᤗᤥᤎᤡᤰ ᤛᤠᤶᤔᤧᤳᤋᤢᤱᤗᤥ॥ ᤛᤠ᤹ᤖᤡᤰ ᤆᤠᤃᤧᤏᤢ᤹ᤒᤠ ᤁᤥ᤺ᤰᤔᤠ ᤛᤶᤎᤠᤱ ᤀᤠᤱᤃᤠ᤹ ᤗᤢᤱᤔᤠ᤹ ᤜᤡ᤺ᤵᤋᤢᤱᤒᤠ ᤔᤏᤠ᤺ᤸᤗᤧ ᤗᤳᤇᤠ ᤁᤢᤈᤧᤸᤗᤧᤰᤛᤣ᤹ ᤀᤡᤰᤌᤡᤰ ᤂᤧᤳᤌᤥ ᤏᤧᤛ᤻ᤛᤧᤖᤥ॥ 2 ᤂᤧᤴ ᤔᤏᤠ᤺ᤸᤗᤧ ᤂᤧᤴ ᤕᤠᤴ ᤔᤕᤢᤖᤥ ᤜᤧᤰᤁᤩᤠᤱ ᤂᤧ᤹ᤕᤥᤒᤠ ᤗᤢᤱᤜᤠ᤹ ᤂᤵᤛᤢᤀᤠᤱ ᤗᤠᤵᤑᤢᤛᤢᤖᤥ. ᤜᤧᤰᤁᤩᤠᤱ ᤂᤧ᤹ᤕᤥ ᤁᤧᤖᤧᤰᤏᤢ᤺ᤸᤗᤧ ᤏᤢᤒᤠ ᤆᤧᤸᤗᤧᤰᤛᤣ᤺ᤴ ᤗᤣ᤺ᤳᤋᤢᤖᤥ॥ ᤂᤧᤴ ᤆᤧᤸᤗᤧᤰᤛᤣ᤹ ᤀᤡᤰᤁᤡᤸᤗᤧ ᤁᤢᤗᤢᤶᤔᤥ ᤗᤳᤇᤠ ᤕᤠᤰᤔᤠᤜᤡᤶᤎᤡᤰ ᤆᤥᤃᤢᤖᤥ ᤂᤧᤒᤩᤠᤱ ᤕᤠᤰᤐᤣ᤺ᤸᤗᤧ ᤁᤢᤒᤣᤛᤠᤱ ᤗᤳᤇᤠ ᤆᤧᤸᤗᤧᤰᤛᤣ᤹ ᤀᤣ᤺ᤶᤔᤠᤍᤧᤴ ᤌᤡᤰᤁᤠᤱ ᤆᤥᤃᤢᤖᤥ॥ ᤜᤧᤰᤁᤩᤠᤱ ᤁᤧᤗᤡᤶᤒᤠ ᤆᤧᤸᤗᤧᤰᤛᤣ᤹ ᤌᤥ᤺ᤰᤐᤡᤗᤠ ᤑᤠ᤹ᤀᤠᤱ ᤂᤧᤸᤗᤧ ᤏᤡᤱᤛᤠᤱ ᤆᤥ᤺ᤰᤔᤠ ᤜᤣ᤺ᤰᤋᤢᤖᤥ ᤁᤖ ᤂᤧ᤹ᤕᤥᤃ ᤁᤧᤛᤢ᤺ᤵᤐᤠ ᤆᤧᤸᤗᤧᤰᤛᤣ᤹ᤏᤡ ᤌᤥ᤺ᤰᤋᤧᤖᤥ॥ 3 ᤁᤸᤗᤧᤆᤥᤃᤢᤸᤗᤧ ᤀᤠᤱᤃᤠ᤹ ᤀᤠᤛᤡᤖᤠ᤹ ᤁᤧᤎᤠᤱᤒᤧᤸᤗᤧ ᤐᤠ᤺ᤳᤋᤢᤖᤥ. “ᤕᤖᤢᤛᤗᤧᤔ ᤏᤢ ᤕᤜᤢᤍᤠᤒᤠ ᤔᤏᤠᤛᤣ. ᤀᤠᤱᤃᤠ᤹ ᤏᤢ ᤀᤠᤈᤧᤸᤗᤧᤰᤛᤣ᤹ ᤀᤡᤰᤗᤢᤶᤔᤥ ᤂᤠᤛᤧᤴ ᤆᤥᤃᤧ ᤀᤠᤒᤡᤖᤧ᤹ᤖᤥ॥ 4 ᤀᤠᤱᤃᤠ᤹ ᤀᤠᤈᤧᤸᤗᤧᤰᤛᤣ᤹ ᤀᤡᤰᤁᤡᤸᤗᤧ ᤁᤢᤗᤠᤃᤡ ᤔᤧᤴᤈᤥ᤺ᤰᤁᤣ ᤁᤧᤘᤠ᤹ᤒᤠ ᤕᤠ᤺ᤶᤒᤰ ᤌᤣ ᤘᤠ᤹ᤀᤠᤱᤒᤣ᥅ ᤁᤧᤗᤡᤶᤒᤠ ᤆᤧᤸᤗᤧᤰᤛᤣ᤹ᤏᤡ ᤌᤥ᤺ᤰᤁᤡ ᤑᤠ᤹ᤀᤠᤱ ᤏᤡᤱᤛᤠᤱ ᤆᤥᤃᤢᤱᤗᤥ ᤁᤖ ᤌᤣᤀᤠᤱ ᤁᤧᤛᤢ᤺ᤵᤐᤠ ᤆᤧᤸᤗᤧᤰᤛᤣ᤹ ᤌᤥ᤺ᤰᤋᤧᤒᤠᤒᤣ᥅ 5 ᤀᤠᤸᤗ ᤀᤠᤱᤃᤠ᤹ ᤀᤠᤈᤧᤸᤗᤧᤰᤛᤣ᤹ ᤀᤡᤰᤁᤡᤴ ᤌᤧᤔᤠ ᤆᤥᤃᤢᤱ᤹. ᤀᤠᤱᤃᤠ᤹ ᤂᤧᤸᤗᤧ ᤁᤢᤕᤠ᤺ᤶᤒᤣᤀᤥ ᤂᤧᤏᤡ᤹ ᤔᤧᤳᤏᤡᤱᤗᤥ— ᤀᤠᤱᤃᤠ᤹ ᤂᤧ᤹ᤕᤥ ᤑᤠᤱᤔᤏᤠᤀᤠᤱ ᤁᤧᤒᤵᤐᤠ ᤁᤢᤎᤣ᤺ᤰᤔᤠᤜᤠ᤹ ᤜᤠ᤹ᤕᤠᤰ ᤘᤕᤠᤰ ᤀᤠ᤺ᤰᤂᤢᤱᤍᤣᤛᤢᤱᤗᤥ. ᤜᤧᤰᤁᤩᤠᤱ ᤂᤧᤴ ᤂᤠᤵᤐᤢᤌᤩ᤺ᤱ ᤐᤥᤱᤗᤥ॥ ᤂᤧᤴ ᤆᤧᤸᤗᤧᤰᤛᤣ᤹ ᤀᤡᤰᤁᤡᤴ ᤌᤣ᤺ᤰᤔᤠᤖᤧ ᤗᤠᤃᤡ ᤛᤧᤵᤔᤏᤠᤒᤠ ᤗᤢᤱᤎᤠᤰᤜᤠ᤹ ᤗᤢ᤺ᤴᤍᤢᤱᤍᤣᤛᤢᤱᤗᤥ. ᤂᤧᤶᤒᤩᤠᤱ ᤂᤧᤴ ᤆᤧᤸᤗᤧᤰᤛᤣ᤹ ᤀᤡᤰᤁᤡᤴ ᤆᤡᤖᤠᤰ ᤆᤡᤖᤠᤰ ᤔᤧᤗᤠ᤺ᤰᤋᤢᤖᤥ॥ 6 ᤀᤠᤱᤃᤠ᤹ ᤂᤧᤴ ᤔᤢᤖᤧᤰ ᤂᤠᤖᤧᤰ ᤆᤥᤃᤢᤱᤅᤠᤱ ᤗᤠᤵᤑᤢᤛᤢᤱᤗᤥ. ᤂᤧᤴ ᤜᤠ᤺ᤳᤗᤧᤀᤠᤱ ᤔᤧᤴᤇᤡᤳᤋᤢᤴ ᤔᤧᤴᤇᤠ᤺ᤰᤋᤢᤴᤗᤥ॥ ᤂᤧ᤹ᤕᤥ ᤛᤣᤷᤍᤪᤠ᤺ᤰᤔᤠ ᤏᤢ ᤋᤡᤱᤜᤠ᤹ᤖᤰ ᤗᤡᤱᤗᤥ ᤀᤠᤱᤃᤠ᤹ ᤂᤠ᤹ᤔᤡ᤺ᤳᤋᤧᤴᤏᤠᤱ ᤂᤧ᤹ᤕᤥ ᤘᤜᤡᤳ ᤔᤧᤎᤠᤏᤧᤸᤗ ᤑᤠ᤹ᤀᤠᤱ ᤀᤡᤱᤈᤠᤱ ᤐᤡᤖᤢᤱᤗᤥ॥” 7 ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤈᤧᤸᤗᤧᤰᤛᤣ᤹ ᤀᤡᤰᤁᤡᤱᤃ ᤀᤡᤛᤪᤠᤀᤡᤗᤒᤠ ᤜᤡᤶᤛᤕᤱᤗᤥ. ᤜᤧᤰᤁᤩᤠᤱ ᤕᤜᤢᤍᤠᤒᤠ ᤔᤏᤠᤜᤠ᤹ᤃ ᤂᤢᤏᤧ᤹ ᤁᤢᤕᤠᤶᤏᤠ᤺ᤶᤔᤡᤸᤗᤧ ᤛᤡᤱᤛᤣ᤹ ᤀᤡᤰᤗᤥ॥ ᤂᤢᤏᤧ᤹ᤃ ᤏᤢᤒᤠ ᤂᤠᤛᤧᤴ ᤐᤥᤱ ᤁᤧᤗ᤹ᤒᤠ ᤏᤡᤱᤛᤠᤱ ᤆᤥᤃᤢᤖᤥ. ᤁᤖ ᤔᤠᤰᤂᤡ᤹ ᤘᤖᤰ ᤐᤥ᤺ᤰᤂᤧᤖᤥ. ᤛᤠᤶᤕᤥᤒᤠ ᤐᤥᤱ ᤁᤧᤗ᤹ᤒᤠ ᤏᤡᤱᤛᤠᤱ ᤆᤥᤃᤢᤖᤥ. ᤁᤖ ᤋᤢᤰᤂᤣᤗᤠᤰᤂᤣ ᤏᤢ ᤔᤧᤖᤡᤱ ᤐᤥ᤺ᤰᤂᤧᤖᤥ॥ ᤕᤜᤢᤍᤠᤒᤠ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤋᤠᤵᤑᤧ᤺ᤶᤒᤠ ᤕᤠ᤺ᤶᤒᤰ 8 ᤀᤠᤳᤋᤡᤴ ᤔᤏᤠᤜᤠ᤹ᤖᤧ ᤘᤣ᤹ᤖᤧ ᤗᤠᤃᤡ ᤆᤢᤰᤛᤠ ᤂᤠᤶᤒᤣᤰ ᤗᤧᤵᤌᤡᤰᤁᤠᤱ ᤔᤧᤴᤕᤠ᤺ᤰᤁᤣ ᤌᤠᤖᤡᤰ ᤕᤖᤡᤰ ᤜᤡᤶᤗᤧ ᤜᤡᤶ ᤔᤧᤀᤡᤅᤢ. ᤜᤧᤰᤁᤩᤠᤱ ᤐᤩᤠᤱᤛᤡᤃᤧᤴ ᤀᤡᤰᤋᤠᤵᤗᤧ ᤀᤡᤰᤋᤠᤵ ᤔᤧᤀᤡᤅᤢ᤹ ᤂᤧᤱᤜᤠ᤹ᤃ ᤔᤧᤈᤡ᤺ᤳᤋᤧ ᤔᤧᤛᤩᤧᤖᤥ᥄ ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ ᤗᤠᤈᤣ᤹ᤀᤥ ᤀᤧᤰᤗᤣ᤺ᤰ ᤕᤢᤱᤔᤠ ᤐᤥᤱᤗᤥ॥ 9 ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤠᤱᤃᤠ᤹ ᤂᤧᤵᤛᤢᤱᤗ ᤐᤠ᤺ᤳᤋᤢᤀᤠᤱ ᤘᤠ᤹ᤖᤥ. “ᤛᤧᤰᤂᤠᤛᤠᤱ ᤕᤶᤒᤕᤶᤒᤠ ᤜᤡᤶᤜᤠ᤹ ᤆᤡᤈᤡ ᤂᤰᤂᤰ ᤐᤥᤱᤗᤥ. ᤜᤧᤰᤁᤩᤠᤱ ᤏᤢᤒᤠ ᤐᤕᤶ ᤕᤶᤒᤠ ᤜᤡᤶᤜᤠ᤹ᤀᤠᤱ ᤆᤡᤈᤡ ᤂᤰᤂᤰ ᤐᤥᤱᤗᤥ॥ 10 ᤌᤥᤱᤔᤠᤸᤗᤧ ᤌᤡᤒᤥᤱ ᤁᤢᤃᤠᤵ ᤐᤡᤳ ᤁᤧᤗᤠ᤺ᤵᤐᤠ ᤆᤧᤸᤗᤧᤰᤛᤣ᤹ ᤀᤡᤰᤁᤥ ᤑᤢᤗᤰ ᤅᤠᤛᤡ ᤆᤧᤸᤗᤧᤰᤛᤣ᤹ ᤌᤡᤖᤰ ᤗ᤺ᤴᤗᤥ. ᤜᤧᤰᤁᤩᤠᤱ ᤑᤢᤗᤰ ᤅᤠᤒᤥᤱ ᤕᤠ᤹ᤖᤡ᤺ᤶᤒᤠ ᤁᤧᤗᤠ᤺ᤵᤐᤥ ᤑᤢᤗᤰ ᤗᤡᤛᤡᤖᤰ ᤁᤢᤈᤠ᤹ ᤌᤥ᤺ᤰᤗᤥ᥄” 11 ᤋᤠᤏᤠᤶᤛᤠ ᤁᤧᤒᤥ᤺ᤰᤐᤠᤀᤠᤱ ᤌᤡ ᤁᤧᤎᤢᤱᤒᤠ. ᤜᤧᤰᤁᤩᤠᤱ ᤌᤡ᤺ᤸᤗᤧ ᤔᤕᤢᤛᤡᤀᤠᤱ ᤗᤧᤖᤧᤶᤓᤧᤏᤠ ᤐᤥᤱᤔᤠᤖᤧ ᤗᤠᤃᤡ ᤀᤠᤰᤂᤥ ᤛᤧᤴᤍᤡᤰ ᤌᤠᤖᤡᤰ ᤁᤧᤕᤢᤱᤒᤠ ᤔᤏᤠᤜᤠ᤹ᤃ ᤔᤧᤈᤡ᤺ᤳᤋᤧ ᤔᤧᤛᤩᤧᤖᤥ᥄ 12 ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤛᤠᤓ᤺ᤱᤈᤠᤜᤠ᤹ᤀᤥ ᤀᤴᤔᤣ ᤂᤡᤱᤔᤏᤠᤒᤠ ᤋᤢᤱᤏᤠ ᤏᤢ ᤋᤢ᤺ᤱᤃᤣ. ᤁᤣ ᤏᤢ ᤔᤢᤑᤪᤠᤔᤠ ᤜᤧᤰᤁᤩᤠᤱ ᤛᤣᤈ᤺ᤱᤘᤠ ᤘᤠ᤹ᤖᤥ. ᤁᤖ ᤂᤧᤱᤜᤠ᤹ᤖᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤕᤠ᤺ᤶᤒᤰᤁᤡᤴ ᤂᤧᤶᤄᤧᤶ ᤏᤡᤏᤡᤀᤠᤱ ᤔᤧᤸᤗᤠᤵᤋᤢᤴᤗᤥ॥ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤁᤢᤜᤢᤰᤁᤡᤸᤗᤧ ᤆᤥᤃᤢᤒᤠ ᤕᤠ᤺ᤶᤒᤰᤁᤡᤴ ᤔᤡᤱᤛᤥ ᤀᤡᤱᤎᤠᤱᤅᤣ ᤔᤧᤶᤒᤡᤖᤢᤴᤗᤥ॥ 13 ᤂᤧᤸᤗᤧᤆᤥᤃᤢᤸᤗᤧ ᤀᤠᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤏᤧᤜᤡᤏᤡᤱᤘᤠ᤹ ᤜᤥ᤺ᤵᤔᤠᤖᤧ ᤂᤧᤱᤜᤠ᤹ ᤛᤠᤰᤁᤧᤸᤗᤧᤰ ᤗᤠᤈᤣ᤹ ᤗᤧᤵᤔᤠ ᤔᤧᤒᤠᤱᤄᤢᤛᤡᤖᤥ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤔᤡᤱᤛᤥ ᤀᤡᤱᤎᤠᤱ ᤔᤧᤒᤡᤖᤢᤛᤡᤒᤠ ᤔᤏᤠᤜᤠ᤹ ᤛᤠᤰᤁᤡᤸᤗᤧ ᤔᤧᤛᤡᤖᤥ ᤜᤧᤰᤁᤩᤠᤱ ᤔᤏᤠᤗᤢᤵᤜᤠ᤹ ᤘᤠᤔᤡ᤺ᤰᤔᤠᤸᤗᤧ ᤔᤧᤛᤡᤖᤥ॥ 14 ᤁᤸᤗᤧᤆᤥᤃᤢᤸᤗᤧ ᤂᤧᤔᤠᤕᤱᤛᤱᤅᤡᤸᤗᤧ ᤁᤢᤛᤡᤰᤗᤠ᤺ᤰᤔᤧᤴ ᤑᤥᤛᤢᤀᤠᤱ ᤘᤠ᤹ᤖᤥ. ᤜᤧᤰᤁᤩᤠᤱ ᤁᤢᤶᤒᤪᤠ᤺ᤴ ᤀᤠᤳᤋᤠᤋᤠᤴᤏᤣ ᤕᤶᤒᤠ ᤜᤠ ᤔᤧᤳᤋᤢᤀᤠᤱ ᤏᤧᤖᤥ॥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤛᤢᤜᤠᤱᤕᤢᤰᤐᤠᤜᤠ᤹ ᤂᤧᤒᤩᤠᤱ ᤔᤏᤠᤗᤢᤵᤜᤠ᤹. ᤂᤧᤱᤜᤠ᤹ᤏᤢ ᤂᤧᤔᤠ᤹ ᤁᤧᤈᤥ᤺ᤰᤐᤠ ᤔᤏᤠᤜᤠ᤹ ᤏᤢ ᤁᤧᤀ᤺ᤰᤐᤠ ᤁᤧᤓᤡ᤺ᤰᤐᤠᤀᤠᤱ ᤏᤡᤱᤎᤧᤴᤎᤧᤴ ᤁᤧᤔᤧᤵᤐᤠᤜᤠ᤹ ᤂᤧᤴ ᤛᤡᤃᤠᤱ ᤔᤧᤗᤠ᤺ᤳᤗᤥ॥ 15 ᤀᤰᤂᤣᤗ᤹ᤖᤡᤰ ᤕᤶᤒᤠ ᤁᤧᤗᤧᤱᤛᤡᤱᤒᤠ ᤔᤏᤠᤜᤠ᤹ ᤕᤥ ᤂᤠᤶᤒᤠᤱᤅᤥ ᤌᤠᤖᤡᤰ ᤔᤧᤎᤠᤖᤥ॥ ᤜᤧᤰᤁᤩᤠᤱ ᤀᤠᤱᤍᤡᤱ ᤁᤧᤗ᤹ᤒᤠ ᤔᤏᤠᤜᤠ᤹ ᤆᤢᤱᤈᤡᤃᤧᤴ ᤏ᤺ᤶᤏ᤺ᤶᤒᤠ ᤔᤧᤒᤥᤱᤗᤥ. ᤂᤧᤒᤩᤠᤱ ᤁᤧᤜᤧᤴᤇᤡᤱᤒᤠ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤔᤡᤰᤁᤡᤴ ᤛᤢᤖᤧᤶ ᤗ᤹ᤖᤥ॥ 16 ᤁᤖ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤡᤱᤅᤡᤴ ᤂᤠᤛᤧᤴᤗᤠᤶᤒᤠ ᤌᤥᤎᤥ ᤐᤥᤱᤗᤥ. ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤛᤣᤛᤣᤒᤠ ᤆᤥᤰᤗᤥ ᤑᤠ᤹ᤀᤠᤱ ᤀᤠᤒᤠᤅᤣ ᤁᤢᤛᤠᤶᤕᤥᤒᤠᤗᤠᤶ ᤀᤥᤛᤣ᤺ᤴᤎᤠᤱ ᤆᤥ᤺ᤰᤛᤡᤱᤗᤥ॥ 17 ᤂᤧᤒᤩᤠᤱ ᤔᤧᤸᤗᤢᤰᤜᤠ᤹ ᤀᤠᤒᤠᤅᤣ ᤆᤠᤖᤠᤶᤍᤧᤴᤏᤥ ᤜᤧᤰᤁᤣ ᤆᤠᤖᤠᤔᤧᤖᤠᤶᤗᤥ. ᤜᤧᤰᤁᤩᤠᤱ ᤌᤢ᤺ᤶᤒᤠᤜᤠ᤹ᤖᤧᤃ ᤕᤠᤱᤛᤠᤁᤢᤴᤎᤣᤛᤠᤒᤠᤜᤠ᤹ᤖᤧ ᤂᤢᤴᤇᤡ᤹ ᤁᤧᤗᤢ᤺ᤶᤒᤠ ᤏᤢ ᤁᤧᤕᤶᤒᤠ ᤁᤧᤕᤠ᤺ᤰᤐᤠ ᤗᤢᤶᤔᤥ ᤔᤧᤈᤖᤥ॥ 18 ᤛᤧᤰᤂᤠ ᤔᤣ᤺ᤶᤒᤠ ᤀᤡᤱᤗᤧᤰᤁᤣ ᤐᤠ᤺ᤴᤏᤡᤸᤗᤧ ᤁᤧᤄᤣ᤺ᤱᤒᤠ ᤜᤧᤰᤁᤩᤠᤱ ᤗᤠᤕᤥᤜᤠ᤹ ᤂᤢᤴᤇᤡ᤹ ᤀᤣᤃᤠᤱ ᤀᤣᤃᤠᤱ ᤁᤧᤀᤢ᤺ᤱᤒᤠ ᤁᤧᤍᤠ᤺ᤵᤐᤠ ᤔᤏᤠᤜᤠ᤹ᤖᤧ ᤗᤠᤃᤡ ᤂᤢᤴᤇᤡ᤹ ᤔᤧᤰᤔᤠᤛᤡᤔᤧᤴ ᤂᤠ ᤛᤧᤰᤂᤠᤀᤣ ᤘᤠ᤹ᤖᤥ. ᤂᤧᤱᤜᤠ᤹ᤃ ᤔᤧᤈᤡ᤺ᤳᤋᤧ ᤔᤧᤛᤩᤧᤖᤥ᥄ 19 ᤂᤧᤱᤜᤠ᤹ᤖᤧ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤠᤱ ᤁᤡᤏᤠ᤺ᤴᤍᤡ ᤔᤧᤒᤡᤖᤢᤀᤠᤱ ᤔᤧᤒᤠ᤺ᤳᤋᤢᤖᤥ. “ᤜᤠᤖᤠᤀᤠᤱ ᤌᤣᤜᤠ᤹ᤀᤡ ᤆᤥᤃᤧ᤹ᤀᤥ. ᤌᤣ ᤆᤥ᤺ᤰᤔᤠ ᤁᤧᤛᤢᤰᤋᤢ ᤀᤠᤏᤡᤃᤣ ᤆᤠᤸᤗᤡᤰ ᤀᤥᤛᤣ᤺ᤴ ᤀᤠᤎᤠᤰᤋᤧ᤹ᤀᤥ॥ ᤀᤡᤛᤪᤠᤀᤡᤗᤒᤠ ᤛᤣᤛᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤆᤥ᤺ᤰᤔᤠ ᤏᤡᤱᤛᤣ᤺ᤰ ᤁᤧᤈᤥᤃᤢᤒᤧᤴ ᤀᤠᤏᤡᤃᤣ ᤀᤥᤔᤧᤵᤔᤠ ᤏᤡᤱᤘᤠ᤹ ᤁᤳᤋᤢᤶᤒᤧᤖᤥ॥” 20 ᤂᤧᤏᤡ᤹ᤃ ᤁᤧᤈᤡ᤺ᤳᤋᤡ ᤁᤧᤛᤩᤧ᤹ᤀᤡᤖᤥ. ᤂᤧᤏᤡ᤹ ᤏᤢᤒᤠ ᤐᤠ᤺ᤴᤏᤡᤴ ᤋᤠᤵᤑᤧ᤺ᤶᤒᤠ ᤏᤢ ᤋᤠᤵᤑᤧ᤺ᤶᤒᤠ ᤐᤠ᤺ᤴᤏᤡᤴ ᤏᤢᤒᤠ ᤁᤧᤒᤠ᤺ᤳᤋᤢᤶᤗᤥ. ᤜᤧᤰᤁᤩᤠᤱ ᤛᤧᤴᤍᤡᤰᤁᤡᤴ ᤗᤧᤴᤍᤡᤰ ᤏᤢ ᤗᤧᤴᤍᤡᤰᤁᤡᤴ ᤛᤧᤴᤍᤡᤰ ᤁᤧᤒᤠ᤺ᤳᤋᤢᤶᤗᤥ ᤜᤧᤰᤁᤩᤠᤱ ᤁᤧᤄᤡ᤺ᤰᤐᤧᤴ ᤁᤧᤗᤡᤶᤒᤠ ᤏᤢ ᤁᤧᤗᤡᤶᤒᤧᤴ ᤁᤧᤄᤡ᤺ᤰᤐᤠ ᤁᤧᤒᤠ᤺ᤳᤋᤢᤶᤗᤥ॥ 21 ᤀᤠᤒᤠᤅᤣ ᤀᤥᤃᤧᤔᤧᤳᤇᤡᤱᤒᤠᤀᤠᤱ ᤛᤡᤰᤁᤢᤶᤏᤡᤒᤠ ᤏᤢ ᤀᤠᤒᤠᤅᤣ ᤂᤢᤴᤇᤡ᤹ ᤏᤡᤱᤘᤠ᤹ᤒᤥ ᤆᤠ᤺ᤵᤐᤠᤍᤡᤃᤧ ᤁᤧᤗ᤹ᤒᤠᤜᤠ᤹ ᤔᤧᤈᤡ᤺ᤳᤋᤧ ᤔᤧᤛᤩᤧᤖᤥ॥ 22 ᤆᤧᤸᤗᤧᤰᤛᤣ᤹ ᤌᤡ ᤌᤢᤱᤔᤠ ᤁᤧᤎᤢᤶᤒᤠ ᤁᤧᤗᤧᤱᤛᤡᤱᤒᤠ. ᤜᤧᤰᤁᤩᤠᤱ ᤌᤡᤀᤥ ᤀᤠᤔᤔᤒᤠ ᤑᤢᤵᤔᤠ ᤁᤧᤗᤧᤒᤠ ᤔᤏᤠᤜᤠ᤹ᤃ ᤔᤧᤈᤡ᤺ᤳᤋᤧ ᤔᤧᤛᤩᤧᤖᤥ᥄ 23 ᤀᤰᤋᤱᤒᤠ ᤔᤏᤠᤜᤠ᤹ᤖᤧ ᤛᤢᤖᤢᤋᤩᤠᤱ ᤔᤧᤈᤀᤠᤱ ᤋᤠᤵᤑᤧ᤺ᤶᤒᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤜᤠ᤹ ᤀᤠᤵᤋᤡᤰ ᤔᤣ᤺ᤴᤏᤣᤒᤠ ᤔᤧᤈᤥᤃᤢᤛᤡᤖᤥ. ᤜᤧᤰᤁᤩᤠᤱ ᤁᤢᤍᤥ᤺ᤵᤔᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤜᤠ᤹ ᤂᤠᤛᤧᤴ ᤔᤧᤸᤗᤥ᤺ᤴᤍᤢᤴ ᤔᤧᤶᤒᤡᤖᤢᤛᤡᤴᤗᤥ॥ 24 ᤂᤧᤸᤗᤧᤆᤥᤃᤢᤸᤗᤧ ᤔᤡ᤺ᤸᤗᤧ ᤕᤠ᤹ᤗᤠᤱᤅᤡᤴ ᤜᤠ᤹ᤖᤢᤀᤠᤱ ᤂᤠᤵᤐᤢᤌᤩ᤺ᤱ ᤆᤥᤃᤢᤒᤠ ᤏᤢ ᤁᤧᤜᤣᤒᤠ ᤕᤠ᤺ᤴᤏᤡᤴ ᤔᤡ᤺ᤸᤗᤧ ᤜᤠ᤹ᤖᤢᤀᤠᤱ ᤂᤠᤵᤐᤢᤌᤩ᤺ᤱ ᤐᤥᤱᤒᤠ ᤁᤢᤀᤡᤛᤡᤰ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤛᤠ᤺ᤵᤐᤧᤴ ᤁᤡᤒᤣ᤺ᤰᤗᤥ॥ ᤂᤧᤒᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤑᤢᤱᤅᤡᤴᤏᤠᤱ ᤂᤠᤶᤜᤡ᤺ᤰ ᤐᤣᤒᤠ ᤁᤢᤀᤡᤛᤡᤰ ᤐᤧᤒᤣ᤺ᤰᤗᤥ ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤎᤡᤶᤔᤧᤴ ᤀᤡ᤺ᤵᤔᤠ ᤏᤠ᤺ᤵᤔᤠ ᤔᤧᤗᤧᤖᤢᤀᤠᤱ ᤘᤠ᤹ᤖᤥ॥ ᤜᤧᤰᤁᤩᤠᤱ ᤀᤡᤛᤪᤠᤀᤡᤗᤒᤠ ᤛᤣᤛᤣᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤀᤡᤱᤈᤠᤱᤅᤡᤴ ᤁᤢᤏᤠᤔᤧᤴᤇᤠ᤹ ᤔᤧᤔᤧᤳᤋᤢᤀᤠᤱ ᤘᤠ᤹ᤖᤥ॥ 25 ᤂᤧᤸᤗᤧᤆᤥᤃᤢᤸᤗᤧ ᤕᤜᤘᤣ ᤍᤠᤱᤒᤠᤴ ᤀᤠᤒᤠᤅᤣ ᤁᤢᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤋᤰᤗᤧᤱᤘᤠᤀᤥ ᤁᤢᤛᤡᤰ ᤐᤥᤃᤧᤀᤠᤱ ᤘᤠ᤹ᤖᤥ॥ ᤂᤧᤴ ᤔᤏᤠᤜᤠ᤹ ᤂᤢᤶᤍᤡᤱ ᤐᤡᤔᤠᤛᤡ ᤑᤠ᤹ᤀᤠᤱ ᤂᤢᤏᤧ᤹ ᤁᤢᤜᤢᤰᤁᤡᤴ ᤌᤠ᤺ᤱ ᤑᤥ᤺ᤰᤂᤢᤀᤠᤱ ᤐᤳᤗᤥ. ᤜᤧᤰᤁᤩᤠᤱ ᤀᤠᤸᤗ ᤂᤧᤱᤜᤠ᤹ ᤜᤡᤵᤋᤢᤛᤡᤖᤥ॥ ᤁᤥ᤺ᤰᤔᤠ ᤑᤠᤱᤈᤱ ᤌᤧᤃᤢ ᤔᤠᤱᤘᤠᤜᤠ᤹ ᤕᤱᤗᤥ ᤂᤶᤒᤩᤠᤱ ᤁᤧᤛᤡᤒᤠ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤏᤠᤛᤡᤱᤃᤧᤴ ᤆᤣᤎᤰᤗᤠᤜᤠ᤹ ᤔᤠᤖᤠᤶᤜᤠ᤹ᤀᤥ ᤋᤠᤶᤈᤡ᤹ ᤁᤢᤀᤡᤛᤡᤰ ᤏᤧᤖᤥ॥ ᤁᤶᤓᤩᤠᤖᤡᤰᤛᤠᤱ ᤂᤢᤏᤧ᤹ ᤁᤢᤛᤠᤰᤁᤧᤴ ᤐᤥ᤺ᤰᤔᤠ ᤔᤧᤈᤡᤵᤋᤢᤴᤏᤠᤱ ᤂᤢᤶᤍᤡᤱ ᤐᤡᤔᤠᤛᤡᤖᤧ ᤗᤠᤃᤡ ᤀᤠᤸᤗᤛᤠᤱ ᤂᤢᤏᤧ᤹ ᤁᤢᤜᤢᤰᤁᤡᤴ ᤜᤠᤒᤠ ᤌᤠ᤺ᤱ ᤐᤥᤃᤧᤀᤠᤱ ᤐᤳᤗᤥ॥ 26 ᤂᤢᤏᤧ᤹ ᤔᤠ᤺ᤱᤄᤠᤒᤠ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤗᤳᤌᤡᤰ ᤏᤡᤛᤠ ᤗᤣ᤺ᤳᤋᤢᤖᤥ. ᤜᤧᤰᤁᤩᤠᤱ ᤂᤢᤏᤧ᤹ ᤕᤥ᤹ᤒᤠ ᤗᤠᤈᤣ᤺ᤸᤗᤧ ᤁᤢᤏᤢᤵᤔᤥ ᤌᤠᤖᤡᤰ ᤁᤧᤕᤢᤱᤒᤠ ᤛᤢᤘᤠᤱᤜᤠ᤹ ᤂᤩᤥ᤺ᤰᤘᤠᤗᤠᤶᤒᤠ ᤀᤢ᤺ᤳᤋᤢᤛᤡᤖᤥ. ᤂᤧᤱᤜᤠ᤹ ᤜᤠᤖᤠᤀᤠᤱ ᤆᤠ᤺ᤳᤆᤠ᤺ᤳ ᤗ᤹ᤖᤡᤰ ᤔᤧᤍᤠᤖᤥ᥄ 27 ᤂᤧᤱᤜᤠ᤹ᤀᤥ ᤀᤠᤳᤋᤡᤴᤜᤠ᤹ᤀᤠᤱ ᤔᤧᤴᤏᤠᤏᤧᤴᤗᤥ ᤜᤧᤰᤁᤩᤠᤱ ᤂᤢᤴᤇᤡ᤹ ᤗᤠᤱᤜᤠ᤹ᤀᤠᤱ ᤔᤧᤍᤥ᤺ᤰᤏᤧᤴᤗᤥ. ᤂᤧᤱᤜᤠ᤹ᤀᤥ ᤀᤠᤳᤋᤡᤴᤜᤠ᤹ᤀᤠᤱ ᤀᤡᤶᤎᤰᤘᤠ ᤔᤧᤸᤗᤥᤏᤧᤴᤗᤥ॥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤔᤧᤕᤢᤵᤛᤢᤒᤠ ᤑ᤹ᤀᤡ᤺ᤴ ᤘᤠ᤺ᤱᤛ᤺ᤰᤛ᤺ᤰᤐᤠ ᤔᤧᤒᤥᤱᤏᤧᤴᤗᤥ. ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤠᤱᤛᤢ᤺ᤵᤐᤡᤸᤗᤧ ᤁᤢᤄᤣ᤺ᤱᤔᤧᤴ ᤔᤧᤒᤢ᤹ᤏᤧᤴᤗᤥ॥ 28 ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤋᤥ᤺ᤱᤜᤠ᤹ ᤜᤠᤛᤶᤛᤶᤒᤠ ᤆᤥᤰᤗᤥ. ᤜᤧᤰᤁᤩᤠᤱ ᤌᤱ ᤆᤥ᤺ᤰᤔᤠᤖᤧ ᤗᤠᤃᤡ ᤗᤡᤀᤥ ᤔᤧᤄᤡᤱᤄᤢᤀᤠᤱ ᤐᤳᤗᤥ॥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤀᤴᤜᤠ᤹ᤖᤧ ᤗᤠᤱᤛᤢ᤺ᤵᤐᤡᤴ ᤗᤢᤱᤛᤧᤖᤢᤱᤒᤠ ᤁᤢᤀᤡᤛᤡᤰ ᤆᤥᤰᤗᤥ. ᤂᤧᤶᤒᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤀᤴᤗᤠᤜᤠ᤹ᤖᤧ ᤁᤠᤵᤗᤥ᤺ᤰᤁᤡᤱᤃ ᤛᤢᤖᤡᤳ ᤁᤣᤈᤱ ᤜᤧᤰᤁᤣ ᤁᤧᤛᤢᤰᤐᤠ ᤆᤥᤰᤗᤥ॥ 29 ᤂᤧᤱᤜᤠ᤹ ᤔᤧᤀ᤺ᤰᤁᤧᤸᤗᤧ ᤁᤣᤒᤧᤴ ᤜᤢ᤺ᤰᤐᤠ ᤁᤢᤀᤡᤛᤡᤰ ᤗ᤹ᤖᤥ. ᤜᤧᤰᤁᤩᤠᤱ ᤂᤧᤱᤜᤠ᤹ ᤁᤧᤘᤧᤶᤒᤠ ᤁᤣᤒᤧᤴ ᤜᤧᤰᤁᤣ ᤔᤧᤜᤢ᤺ᤰᤗᤥ॥ ᤂᤧᤱᤜᤠ᤹ᤖᤧ ᤛᤠᤴ ᤔᤧᤍᤧᤶᤛᤢᤸᤗᤧ ᤜᤠᤃᤠ᤺ᤰ ᤜᤠᤃᤠ᤺ᤰ ᤔᤧᤗ᤹ᤖᤥ. ᤂᤧᤒᤩᤠᤱ ᤂᤧᤴ ᤛᤠᤴ ᤂᤧᤱᤜᤠ᤹ᤗᤠᤶ ᤁᤧᤏᤠᤵᤐᤠ ᤜᤠ᤺ᤳᤋᤠᤱ ᤜᤥᤵᤗᤥ॥ 30 ᤂᤧᤴ ᤕᤧᤴᤏᤥ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤋᤰᤗᤧᤱᤘᤠᤀᤥ ᤘᤠᤜ᤺ᤱᤅᤡᤴ ᤛ᤺ᤰᤐᤠ ᤜᤧᤰᤁᤣ ᤂᤧᤱᤜᤠ᤹ ᤔᤧᤀ᤺ᤰᤗᤥ॥ ᤜᤧᤰᤁᤩᤠᤱ ᤔᤏᤠᤜᤠ᤹ᤖᤧ ᤗᤠᤈᤣᤴ ᤀᤥᤔᤧᤔᤧᤳᤋᤢᤸᤗᤧ. ᤂᤧ᤹ᤕᤥ ᤔᤠᤰᤆᤡᤃᤧᤴ ᤂᤠᤔᤠᤰᤔᤠ ᤏᤢ ᤋᤢᤰᤂᤣ ᤗᤠᤰᤂᤣᤖᤰ ᤂᤧᤱᤜᤠ᤹ᤖᤧ ᤔᤧᤏᤡᤛᤢᤖᤥ. ᤂᤧᤒᤩᤠᤱ ᤂᤠᤀᤥ᤺ᤵᤔᤠᤴᤏᤠᤱ ᤂᤠ᤹ᤔᤡ᤺ᤵᤐᤠᤸᤗᤧ ᤔᤠᤰᤋᤠᤱᤒᤠ ᤆᤥᤃᤢᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.