ᤕᤛᤤᤕᤠ 49 - LIFOTNTᤀᤡᤛᤪᤠᤀᤡᤗᤧᤴ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤂᤢᤴᤇᤡ᤹ ᤀᤥ᤺ᤳᤋᤡ 1 ᤘᤠᤃᤵᤂᤠᤶ ᤗᤠᤈᤣ᤹ᤜᤠ᤹ᤀᤥ ᤁᤧᤕᤢᤱᤒᤠᤛᤣ. ᤀᤠᤱᤃᤠ᤹ ᤀᤠᤒᤠ᤺ᤴᤏᤡᤴ ᤂᤧᤵᤛᤠᤶᤔᤧ᤹ᤀᤥ॥ ᤔᤠ᤺ᤱᤄᤠ ᤁᤧᤕᤢᤱᤒᤠ ᤛᤢᤘᤠᤱᤛᤣ. ᤁᤴ ᤐᤠ᤺ᤴᤏᤡᤴ ᤂᤧᤵᤛᤠᤶᤔᤧ᤹ᤀᤥ॥ ᤛᤠᤘᤠ᤺ᤴᤇᤡᤱᤔᤠᤏᤢ᤺ᤸᤗᤧ ᤋᤃᤡ ᤕᤜᤘᤣ ᤍᤠᤱᤒᤧᤸᤗᤧ ᤀᤠᤱᤃᤠ᤹ ᤀᤢ᤺ᤳᤋᤠᤱᤗᤥ॥ ᤀᤠᤱᤃᤠ᤹ ᤛᤠᤘᤠ᤺ᤴᤇᤡᤱᤅᤠᤱᤅᤠᤱᤎᤥᤀᤣ ᤂᤢᤏᤧ᤹ ᤀᤠᤔᤡᤱᤅᤡᤸᤗᤧᤴ ᤐᤠᤴ ᤐᤠ᤺ᤳᤋᤢᤀᤠᤱ ᤘᤠ᤹ᤖᤥ॥ 2 ᤂᤢᤏᤧ᤹ ᤀᤠᤱᤃᤠ᤹ ᤀᤠᤶᤒᤪᤠᤴ ᤜᤠᤃᤧᤛᤢᤰᤐᤠ ᤋᤠᤓᤣ ᤜᤧᤰᤋᤱᤒᤠ ᤆᤥᤃᤢᤖᤥ. ᤂᤢᤏᤧ᤹ ᤀᤠᤱᤃᤠ᤹ ᤁᤢᤜᤢᤰ ᤛᤡᤃᤠᤱᤒᤠ ᤏᤠᤶᤈᤡ᤺ᤰᤂᤥ᤹ᤀᤥ ᤆᤡᤰᤂᤠᤱᤗᤥ॥ ᤂᤢᤏᤧ᤹ ᤀᤠᤱᤃᤠ᤹ ᤘᤖᤧᤱᤗᤧᤱᤒᤠ ᤏᤢ ᤛᤧᤸᤗᤧᤱ ᤛᤧᤸᤗᤧᤱ ᤁᤧᤗ᤹ᤒᤠ ᤋᤥᤱ ᤆᤥᤃᤠᤱᤗᤥ. ᤂᤶᤒᤩᤠᤱ ᤂᤢᤏᤧ᤹ ᤁᤢᤍᤥ᤺ᤱ ᤕᤠᤱᤔᤠ ᤁᤠᤴᤍᤩᤠᤀᤥ ᤆᤡᤰᤂᤠᤱᤗᤥ॥ 3 ᤂᤢᤏᤧ᤹ ᤀᤠᤱᤃᤠ᤹ ᤀᤰᤂᤣ ᤔᤧᤳᤋᤠᤱᤗᤥ. “ᤂᤧᤏᤧ᤹ ᤀᤠᤱᤃᤠ᤹ ᤀᤠᤛᤧᤘᤠᤖᤥᤒᤠ ᤀᤡᤛᤪᤠᤀᤡᤗᤏᤧᤖᤥ॥ ᤂᤧᤏᤧ᤹ ᤗᤠᤶᤒᤠᤀᤣ ᤔᤏᤠᤜᤠ᤹ᤖᤧ ᤀᤠᤔᤡᤱᤛᤥ ᤀᤠᤎᤠ᤺ᤱᤛᤥ ᤔᤧᤈᤥᤃᤢᤖᤥ॥” 4 ᤀᤠᤱᤃᤠ᤹ ᤐᤠ᤺ᤳᤋᤢᤱ. “ᤀᤠᤱᤃᤠ᤹ ᤛᤠ᤹ᤖᤡᤰ ᤕᤠ᤺ᤶᤒᤰᤁ ᤆᤥᤃᤢᤱᤗᤥ. ᤁᤖ ᤂᤧᤴ ᤜᤏᤧ ᤐᤥ᤺ᤰᤂᤧᤖᤥ॥ ᤀᤠᤱᤃᤠ᤹ ᤌᤣᤏᤠᤎᤣ ᤏᤢ ᤜᤏᤧ ᤕᤠ᤺ᤶᤒᤢᤎᤡᤰ ᤆᤥᤃᤢᤱᤗᤥ. ᤜᤧᤰᤁᤣᤛᤠᤱ ᤀᤠᤱᤃᤠ᤹ ᤌᤣ ᤂᤥᤔᤠ ᤁᤧᤒᤥᤱᤒᤠ ᤘᤠ᤹. ᤂᤧᤴ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤜᤢᤰᤁᤥ ᤘᤠ᤹ᤖᤥ. ᤂᤧᤒᤩᤠᤱ ᤀᤠᤱᤃᤠ᤹ ᤀᤠᤄᤥᤔᤠ ᤀᤠᤜᤠᤱᤛᤧᤶᤔᤡᤴ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤳᤋᤢᤖᤥ॥” 5 ᤕᤜᤘᤣ ᤍᤠᤱᤒᤧᤸᤗᤧᤀᤣ ᤁᤢᤛᤧᤘᤠᤖᤥᤒᤠ ᤐᤥᤱᤔᤠᤖᤧ ᤗᤠᤃᤡ ᤀᤠᤶᤔᤠᤖᤧ ᤁᤢᤛᤠᤵᤐᤥ᤺ᤰᤁᤥ ᤏᤠᤘᤠᤃᤧᤴ ᤆᤀᤡ᤺ᤳ ᤆᤥᤃᤠᤱᤗᤥ॥ ᤀᤠᤒᤠᤅᤣ ᤁᤢᤔᤏᤠᤜᤠ᤹ ᤜᤧᤰᤁᤩᤠᤱ ᤀᤡᤛᤪᤠᤀᤡᤗᤒᤠ ᤑᤢᤳᤇᤡᤱᤇᤠᤱ ᤁᤧᤛᤧᤒᤠ ᤔᤏᤠᤜᤠ᤹ ᤏᤢ᤺ᤰᤔᤠ ᤋᤠ᤺ᤵᤔᤠᤛᤡᤖᤧ ᤗᤠᤃᤡ ᤕᤢᤰᤋᤡᤱ ᤆᤥᤃᤠᤱᤗᤥ॥ ᤂᤢᤏᤧ᤹ᤀᤣ ᤀᤠᤱᤃᤠ᤹ ᤔᤡᤱᤛᤥ ᤀᤡᤱᤎᤠᤱ ᤐᤡᤀᤠᤖᤥ. ᤂᤢᤏᤧ᤹ᤃ ᤀᤠᤱᤃᤠ᤹ ᤀᤠᤔᤢᤰᤛᤠᤶᤔᤡᤸᤗᤧ ᤁᤢᤒᤢᤴᤗᤥ॥ 6 ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢ᤹. “ᤀᤠᤛᤧᤘᤠᤖᤥᤒᤠᤀᤣ. ᤀᤠᤸᤗᤛᤠᤱ ᤂᤧᤏᤧ᤹ ᤆᤥ᤺ᤰᤔᤠ ᤁᤧᤒᤥᤱᤒᤠ ᤕᤶᤒᤠ ᤕᤠ᤺ᤶᤒᤰ ᤁᤧᤃᤳᤋᤢᤖᤥ॥ ᤂᤧᤏᤧ᤹ ᤀᤡᤛᤪᤠᤀᤡᤗᤒᤠ ᤁᤧᤍᤠᤱᤒᤠ ᤁᤧᤕᤠ᤺ᤰᤐᤠᤜᤠ᤹ ᤕᤠᤶᤔᤥ ᤀᤠᤱᤃᤠ᤹ᤀᤥ ᤁᤧᤏᤢ᤺ᤰᤋᤢ ᤁᤧᤍᤠᤖᤢᤛᤡᤖᤥ. ᤂᤧᤶᤔᤩᤠᤰᤗᤰ ᤔᤣ᤺ᤴ. ᤔᤧᤴᤇᤠᤶ ᤛᤢᤘᤠᤱᤗᤢᤶᤔᤥ ᤕᤶᤒᤠ ᤀᤥ᤺ᤳᤋᤡ ᤆᤥ᤺ᤰᤏᤧᤖᤥ॥ ᤜᤧᤰᤁᤩᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤁᤡᤸᤗᤧ ᤁᤢᤏᤢᤵᤔᤠᤎᤠᤖᤡᤰ ᤀᤠᤱᤃᤠ᤹ ᤀᤠᤛᤧᤴᤗᤵᤐᤡᤴ ᤂᤧᤏᤧ᤹ ᤁᤧᤃᤧᤳᤋᤢᤖᤥ॥” 7 ᤕᤢᤰᤛᤠᤒᤠᤜᤠ᤹ᤖᤧ ᤂᤢᤴᤇᤡ᤹ ᤛᤧᤘᤠᤖᤥᤒᤠ. ᤛᤢᤘᤠᤱᤜᤠ᤹ᤖᤧ ᤛᤠ᤹ᤖᤡᤰ ᤁᤢᤏᤠᤔᤧᤴᤇᤠ᤹ᤖᤢᤶᤒᤠ ᤏᤢ ᤔᤧᤈᤡ᤺ᤳᤋᤢᤒᤠᤴ. ᤕᤜᤘᤣ ᤍᤠᤱᤒᤠ. ᤁᤧᤎᤧ᤹ᤒᤠ ᤏᤢ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤴ ᤔᤧᤳᤋᤢᤖᤥ. “ᤜᤠᤱᤜᤠ᤹ᤖᤧ ᤂᤧᤏᤧ᤹ ᤁᤧᤶᤏᤡ ᤜᤧᤰᤁᤩᤠᤱ ᤔᤧᤒᤥ᤺ᤰᤁᤠᤱ ᤔᤧᤕᤧᤵᤗᤥ॥ ᤜᤠᤱᤛᤠᤜᤠ᤹ᤖᤧ ᤂᤧᤏᤧ᤹ ᤁᤧᤶᤏᤡᤖᤥ ᤂᤧᤒᤩᤠᤱ ᤁᤧᤍᤃᤡ ᤛᤠᤶᤒᤥᤴ ᤜᤒᤳ ᤔᤧᤓᤴᤇᤡᤱᤗᤥ॥ ᤌᤣᤀᤠᤱᤓᤧᤸᤗᤧ ᤏᤛᤠ᤺ᤴᤛᤠᤒᤠ ᤕᤜᤘᤣ ᤍᤠᤱᤒᤠ. ᤀᤡᤛᤪᤠᤀᤡᤗᤒᤠ ᤛᤣᤛᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤏᤧ᤹ ᤁᤧᤛᤣᤃᤧᤀᤠᤱ ᤘᤠ᤹ᤖᤥ॥” ᤕᤖᤢᤛᤗᤧᤔ ᤕᤧᤰᤕᤰᤁᤡᤴ ᤕᤠᤶᤔᤥ ᤔᤧᤈᤥᤃᤢ 8 ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤖᤥ— “ᤛᤢᤕᤧᤶᤔᤥ ᤀᤠᤱᤃᤠ᤹ ᤂᤧᤏᤧ᤹ ᤏᤢᤃᤵ ᤐᤡᤏᤧᤖᤥ. ᤜᤧᤰᤁᤩᤠᤱ ᤛᤧᤴᤗᤵ ᤐᤡᤔᤠ ᤕᤧᤴᤏᤥ ᤀᤠᤱᤃᤠ᤹ ᤂᤧᤏᤧ᤹ ᤑᤠ᤹ᤏᤧᤖᤥ॥ ᤆᤡᤈᤡ ᤂᤰᤂᤰ ᤁᤧᤒᤥᤱᤒᤠ ᤀᤡᤛᤪᤠᤀᤡᤗᤒᤠ ᤗᤠᤈᤣᤴ ᤕᤠᤶᤔᤥ ᤑᤥᤱᤔᤠᤖᤧ ᤗᤠᤃᤡ ᤜᤧᤰᤁᤩᤠᤱ ᤂᤧᤴ ᤗᤠᤈᤣ᤺ᤸᤗᤧ ᤀᤠᤒᤠᤅᤣ ᤁᤢᤴᤍᤠᤱᤒᤠᤜᤠ᤹ ᤕᤠᤶᤔᤥ ᤏᤢ᤺ᤰᤔᤠ ᤐᤡᤔᤠᤛᤡᤖᤧ ᤗᤠᤃᤡ ᤀᤠᤱᤃᤠ᤹ ᤂᤧᤏᤧ᤹ ᤛᤧ᤺ᤵᤏᤧ ᤁᤳᤏᤧᤖᤥ ᤂᤧᤒᤩᤠᤱ ᤔᤏᤠᤖᤧ ᤗᤠᤃᤡ ᤀᤠᤱᤃᤠ᤹ ᤂᤧᤏᤧ᤹ ᤔᤠᤱᤜᤢᤵ ᤆᤥ᤺ᤰᤏᤧᤖᤥ. 9 ᤔᤧᤍᤧᤶᤛᤢ ᤔᤧᤍᤣ᤹ᤖᤢᤛᤡᤒᤠᤜᤠ᤹ ᤔᤧᤳᤋᤧᤛᤧ᤹ ‘ᤗ᤺ᤴᤍᤧᤶᤐᤣᤃᤧᤶᤔᤧ᤹ᤀᤥ’ ᤜᤧᤰᤁᤩᤠᤱ ᤂᤠᤔᤠᤰᤔᤠᤀᤥ ᤁᤧᤘᤠ᤹ᤒᤠᤜᤠ᤹ ‘ᤀᤥ᤺ᤳᤋᤡᤀᤥ ᤗᤴᤍᤧᤶᤔᤧ᤹ᤀᤥ॥’ ᤂᤧᤱᤜᤠ᤹ ᤗᤠᤶᤔᤡᤸᤗᤧ ᤁᤢᤒᤣᤛᤠᤱ ᤆᤠᤃᤧᤖᤠᤶᤒᤠ ᤔᤧᤸᤗᤢᤰ ᤜᤧᤰᤁᤣ ᤔᤧᤗ᤹ᤖᤥ. ᤂᤧᤒᤩᤠᤱ ᤔᤢᤖᤧᤰ ᤂᤠᤖᤧᤰᤐᤠ ᤁᤧᤖᤧᤰ ᤁᤥ᤺ᤰᤔᤠ ᤑᤠᤱᤈᤱ ᤌᤧᤃᤢ ᤔᤠᤱᤘᤠᤜᤠ᤹ᤀᤥ ᤂᤧᤱᤜᤠ᤹ᤖᤧ ᤆᤠᤖᤠᤶᤔᤠᤍᤧᤴ ᤔᤧᤄᤥᤛᤢᤖᤥ॥ 10 ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤛᤡᤰᤔᤧᤗᤠ᤺ᤰᤏᤧᤴ ᤘᤠᤀᤠᤱ ᤔᤧᤔᤡ᤺ᤰᤏᤧᤸᤗᤥ. ᤔᤢᤖᤧᤰ ᤂᤠᤖᤧᤰᤐᤠ ᤕᤧ᤺ᤱᤄᤠᤍᤧᤴ ᤀᤡᤃᤪ ᤏᤠᤶᤛᤧ᤺ᤰᤔᤧᤸᤗᤧ ᤂᤧᤱᤜᤠ᤹ ᤔᤧᤀᤥ᤹ᤖᤢᤛᤡᤴᤗᤥ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ ᤗᤢᤱᤔᤠ᤹ ᤁᤧᤍᤢᤰᤐᤧᤸᤗᤧ ᤂᤢᤴᤇᤡ᤹ ᤗᤠᤶᤗᤥᤛᤢᤛᤡᤖᤥ ᤂᤧᤒᤩᤠᤱ ᤆᤫᤠ᤺ᤳ ᤁᤧᤒᤢᤶᤒᤠᤍᤧᤴᤏᤥ ᤂᤧᤱᤜᤠ᤹ ᤗᤠᤶᤗᤥᤛᤢᤛᤡᤖᤥ॥ 11 ᤀᤠᤱᤃᤠ᤹ ᤀᤠᤃᤥ᤺ᤰᤔᤠ ᤑᤠᤱᤈᤱᤜᤠ᤹ ᤏᤧᤏᤧᤒᤠ ᤗᤠᤶ ᤆᤥᤃᤢᤱᤗᤥ. ᤜᤧᤰᤁᤩᤠᤱ ᤀᤠᤔᤠᤖᤠᤶᤜᤠ᤹ ᤆᤠᤱᤈᤠᤱᤒᤠ ᤁᤣ᤺ᤶᤒᤠ ᤆᤥᤃᤢᤱᤗᤥ॥ 12 ᤀᤥᤔᤧᤳᤋᤧᤶᤔᤧ᤹. ᤂᤧᤱᤜᤠ᤹ ᤔᤠ᤺ᤱᤄᤠᤗᤠᤶ ᤔᤧᤍᤠᤖᤥ— ᤁᤢᤓᤠ ᤌᤠᤱᤃᤧᤳ ᤐᤡᤛᤠᤱᤏᤢ. ᤁᤢᤓᤠ ᤏᤠᤶᤎᤠ ᤐᤡᤛᤠᤱᤏᤢ ᤂᤧᤒᤩᤠᤱ ᤁᤢᤓᤠ ᤗᤠᤱᤃᤧᤳ ᤐᤡᤛᤠᤱ ᤀᤠᤛᤫᤠᤏ ᤗᤠᤈᤣ᤹ᤗᤠᤶ ᤔᤧᤍᤠᤖᤥ॥” 13 ᤋᤠᤱᤛᤠᤱᤒᤣ. ᤛ᤺ᤳᤋᤧ᤹ᤀᤠᤱ ᤕᤶᤒᤠ ᤀᤡᤰᤗᤠᤀᤥ ᤛᤠᤶᤗᤥᤖᤧ᤹ᤀᤥ. ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤁᤣ. ᤕᤧᤕᤧ ᤗ᤹ᤖᤧ᤹ᤀᤥ॥ ᤁᤥ᤺ᤰᤔᤠ ᤑᤠᤱᤈᤱᤛᤣ. ᤂᤧᤏᤡ᤹ ᤀᤡᤰᤗᤠᤴ ᤗ᤺ᤳᤋᤧᤶᤔᤧ᤹ᤀᤠᤱ ᤛᤠᤶᤗᤥᤖᤧᤶᤔᤧ᤹ᤀᤥ᥄ ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤀᤠᤒᤠᤅᤣ ᤁᤢᤔᤏᤠ ᤀᤡᤛᤪᤠᤀᤡᤗᤡᤜᤠ᤹ ᤀᤠ᤺ᤴᤇᤡᤱᤔᤠ ᤐᤡᤖᤢᤛᤡᤀᤠᤱ ᤘᤠ᤹ᤖᤥ. ᤜᤧᤰᤁᤩᤠᤱ ᤋᤢᤰᤂᤣ ᤁᤧᤍᤢᤶᤒᤠ ᤂᤢᤏᤧ᤹ ᤁᤢᤔᤏᤠᤜᤠ᤹ ᤗᤢᤱᤔᤠ᤹ ᤋᤢᤰᤋᤢᤛᤡᤀᤠᤱ ᤔᤧᤘᤠ᤹ᤖᤥ॥ 14 ᤁᤖ ᤕᤖᤢᤛᤗᤧᤔ ᤕᤧᤰᤕᤰ ᤁᤧᤕᤢᤱᤒᤠ ᤔᤏᤠᤜᤠ᤹ᤖᤧ ᤔᤧᤒᤠ᤺ᤳᤋᤢᤖᤥ. “ᤕᤜᤘᤣ ᤍᤠᤱᤒᤧᤸᤗᤧ ᤀᤠᤏᤡᤃᤣ ᤗᤠᤵᤑᤢᤛᤡᤃᤧᤀᤠᤱ ᤘᤕᤡᤃᤧᤖᤥ. ᤕᤜᤘᤣ ᤍᤠᤱᤒᤧᤸᤗᤧ ᤀᤠᤏᤡᤃᤣ ᤏᤡᤱᤘᤠ᤹ ᤔᤢ᤺ᤳᤇᤡᤃᤧᤀᤠᤱ ᤘᤕᤡᤃᤧᤖᤥ॥” 15 ᤁᤸᤗᤧᤆᤥᤃᤢᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤋᤱᤒᤠ ᤏᤢᤃᤵ ᤐᤡᤖᤢᤛᤡᤖᤥ. “ᤌᤣ ᤀᤠᤶᤒᤪᤧ᤺ᤱᤘᤠ ᤀᤅᤧ᤺ᤰᤘᤠᤴ ᤁᤢᤶᤔᤠᤖᤧ ᤏᤡᤱᤘᤠ᤹ᤑᤣ᤺ᤶᤔᤠ ᤛᤢᤰᤋᤢᤒᤡ᥅ ᤂᤢᤏᤧ᤹ ᤁᤳᤋᤢᤒᤠ ᤀᤅᤧ᤺ᤰᤘᤠᤴ ᤂᤧᤸᤗᤧ ᤌᤣ ᤗᤢᤱᤔᤠ᤹ ᤔᤧᤍᤢᤰᤋᤢᤴᤒᤡ᥅ ᤂᤧᤸᤗᤧ ᤏᤡᤱᤘᤠ᤹ ᤔᤢ᤺ᤶᤔᤠᤀᤠᤱ ᤛᤢᤰᤋᤢᤖᤥ. ᤁᤖ ᤀᤠᤱᤃᤠ᤹ ᤂᤧᤏᤧ᤹ ᤀᤠᤓᤧᤸᤗᤧᤀᤠᤱ ᤏᤡᤱᤘᤠ᤹ᤑᤣ᤺ᤶᤔᤠ ᤔᤧᤛᤢᤰᤏᤧᤸᤗᤥ॥ 16 ᤀᤥᤔᤧᤳᤋᤧᤶᤔᤧ᤹ᤀᤥ. ᤕᤖᤢᤛᤗᤧ᤺ᤶᤒᤠ ᤔᤏᤠᤛᤣ. ᤀᤠᤱᤃᤠ᤹ ᤀᤠᤜᤢᤰᤋᤠᤵᤐᤣ᤹ᤀᤥ ᤂᤧᤏᤡ᤹ ᤔᤡᤱᤅᤡᤴ ᤛᤠᤵᤋᤢᤱᤅᤠᤱ ᤐᤳᤗᤥ. ᤂᤧᤏᤡ᤹ ᤁᤧᤗᤢ᤺ᤶᤒᤠ ᤗᤢᤱᤎᤠᤰᤜᤠ᤹ ᤀᤠᤓᤧᤸᤗᤧᤛᤠᤱ ᤀᤠᤍᤃᤡᤀᤣ ᤕᤧᤵᤗᤥ॥ 17 “ᤂᤧᤏᤡ᤹ ᤛᤠᤜᤠ᤹ ᤜᤠᤖᤠᤘᤖᤠ᤹ ᤔᤧᤏᤢ᤺ᤱ ᤔᤧᤍᤠᤖᤥ. ᤜᤧᤰᤁᤩᤠᤱ ᤂᤧᤏᤡ᤹ ᤔᤧᤱᤔᤠ ᤁᤧᤃᤥ᤺ᤵᤐᤠᤜᤠ᤹ ᤂᤧᤏᤡ᤹ ᤋᤃᤡᤗᤠᤶᤒᤠ ᤔᤧᤗ᤺ᤴᤏᤠᤱ ᤔᤧᤒᤣ᤺ᤰᤗᤥ॥ 18 ᤂᤧᤏᤡ᤹ ᤔᤡᤰᤁᤧᤸᤗᤧ ᤁᤧᤖᤧᤰ ᤐᤡᤛᤠᤱ ᤌᤣ ᤐᤥᤱᤗ ᤐᤳ ᤂᤧᤴ ᤀᤥᤔᤧᤳᤋᤧᤶᤔᤧ᤹ᤀᤥ. ᤂᤧᤏᤡ᤹ ᤔᤏᤠᤜᤠ᤹ ᤔᤧᤈᤢᤶᤗ ᤔᤧᤒᤳ ᤂᤧᤱᤜᤠ᤹ ᤜᤡᤶᤔᤥ ᤔᤧᤍᤠᤖ ᤔᤧᤒᤳᤗᤥ॥ ᤀᤠᤱᤃᤠ᤹ ᤛᤍᤠᤍᤡᤱ ᤁᤢᤜᤡᤱᤘᤧᤳ ᤘᤠ᤹ᤀᤠᤒᤠ ᤁᤢᤀᤡᤛᤡᤰ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤖᤥ. ‘ᤛᤡᤛᤠᤔᤣ᤺ᤳᤋᤡᤴ ᤘᤠ᤺ᤳᤋᤡ ᤛᤠᤔᤠᤐᤢᤔᤠᤜᤠ᤹ ᤏᤢ ᤜᤠᤱᤜᤠᤱ ᤗ᤹ᤒᤠ ᤁᤢᤛᤡᤱ ᤂᤧᤏᤧ᤹ ᤁᤧᤔᤏᤠᤜᤠ᤹ᤏᤢ ᤜᤠᤱᤜᤠᤱ ᤁᤧᤗ᤹ᤖᤥ॥’ 19 “ᤂᤧᤏᤧ᤹ ᤁᤧᤗᤠᤈᤣᤴ ᤂᤠᤵᤐᤢᤎᤩ᤺ᤱ ᤏᤢ ᤆᤠ ᤔᤧᤴᤏᤢ᤹ᤔᤏᤠᤒᤠ ᤐᤥ᤺ᤰᤂᤧᤀᤠᤱ ᤏᤧᤖᤥ. ᤀᤠᤸᤗ ᤁᤧᤍᤠᤒᤠᤀᤠᤱ ᤂᤧᤵᤔᤥ ᤁᤧᤕᤢᤱᤒᤠᤜᤠ᤹ᤖᤧ ᤗᤠᤃᤡ ᤛᤠ᤹ᤖᤡᤰ ᤆᤢ᤺ᤰᤛᤠ ᤐᤥᤱᤗᤥ. ᤂᤧᤒᤩᤠᤱ ᤀᤠᤳᤋᤡᤸᤗᤧ ᤂᤠᤵᤐᤢᤌᤩ᤺ᤱ ᤁᤧᤈᤥᤃᤧ ᤂᤧᤴ ᤂᤧᤏᤧ᤹ᤗᤠᤶᤒᤠ ᤕᤖᤡᤰ ᤔᤠ᤺ᤱᤄᤠ ᤐᤥᤱᤗ ᤔᤧᤕᤠ᤺ᤴᤍᤢᤖᤥ॥ 20 ᤁᤧᤶᤍᤧᤶᤛᤧ ᤁᤧᤶᤍᤣ᤹ᤖᤧᤀᤠᤱ ᤁᤧᤘᤕᤧᤒᤠ ᤕᤧᤶᤔᤥ ᤛᤠᤔᤧᤘᤠ᤺ᤴᤇᤡᤱᤒᤠ ᤁᤧᤛ᤻ᤛᤠ ᤁᤧᤀᤣᤜᤠ᤹ᤖᤧ ᤌᤡᤰᤕᤠᤴ ᤀᤰᤂᤣ ᤁᤧᤶᤔᤧᤳᤗᤥ. ‘ᤁᤴ ᤋᤧᤴᤏᤡᤴ ᤀᤠᤏᤡᤃᤣ ᤗᤠᤃᤡ ᤛᤠ᤹ᤖᤡᤰ ᤆᤡᤜᤢ᤹ᤜᤢ᤹ ᤗ᤹ᤖᤥ॥ ᤕᤢᤱᤔᤠᤖᤧ ᤗᤠᤃᤡ ᤀᤠᤏᤡᤃᤣ ᤀᤠᤸᤗᤛᤠᤱ ᤕᤢᤱᤔᤠᤍᤧᤴ ᤀᤠᤒᤡᤖᤧ᤹ᤀᤥ॥’ 21 ᤂᤧᤒᤩᤠᤱ ᤂᤧᤏᤧ᤹ ᤁᤧᤏᤡᤱᤘᤠ᤹ᤀᤥ ᤀᤰᤂᤣ ᤁᤧᤒᤠ᤺ᤳᤋᤢᤖᤥ. ‘ᤁᤴᤜᤠ᤹ ᤀᤠᤱᤃᤠ᤹ ᤀᤠᤗᤠᤃᤡ ᤜᤠ᤺ᤳᤗᤧ ᤛᤠᤘᤠ᤺ᤴᤍᤢᤛᤡᤒᤣ᥅ ᤀᤠᤱᤃᤠ᤹ᤃ ᤁᤧᤛᤧᤔᤠ. ᤁᤢᤛ᤻ᤛᤠ ᤁᤧᤜᤥ᤺ᤵᤔᤠ. ᤘᤣ᤹ ᤗᤠᤈᤣ᤹ᤀᤥ ᤔᤧᤗ᤺ᤳᤋᤠᤱ ᤔᤧᤍᤣᤛᤠᤱ ᤜᤧᤰᤁᤩᤠᤱ ᤔᤧᤏᤠ᤹ᤖᤠᤱᤅᤠᤱ ᤘᤕᤠᤱᤗᤥ॥ ᤁᤴᤜᤠ᤹ ᤀᤠᤱᤃᤠ᤹ ᤀᤠᤗᤠᤃᤡ ᤜᤠ᤺ᤳᤗᤧ ᤜᤡᤱᤄᤢᤛᤡ ᤐᤡᤖᤠᤱᤒᤣ᥅ ᤀᤠᤱᤃᤠ᤹ᤃ ᤀᤧᤰᤗᤣ᤺ᤰ ᤔᤧᤗᤧᤖᤠᤱ ᤔᤧᤍᤣᤛᤠᤱᤅᤠᤱ ᤘᤕᤠᤱᤗᤥ. ᤁᤖ ᤁᤴᤜᤠ᤹ ᤀᤠᤳᤋᤡᤗᤠᤶ ᤔᤧᤍᤩᤧᤒᤣ᥅’” 22 ᤕᤜᤘᤣ ᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤰᤂᤣ ᤐᤠ᤺ᤳᤋᤢ᤹— “ᤀᤥᤔᤧᤳᤋᤧ᤹ᤀᤥ. ᤀᤠᤱᤃᤠ᤹ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤜᤢᤰᤆᤠ᤺ᤸᤁᤡ᤺ᤸᤗᤧ ᤀᤢ᤺ᤳᤋᤢᤱᤛᤡᤱᤗᤥ. ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤏᤡᤛᤠᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤂᤢᤴᤇᤡ᤹ ᤋᤃᤡ ᤗᤣ᤺ᤳᤋᤢᤱᤗᤥ॥ ᤂᤧᤱᤜᤠ᤹ᤖᤧ ᤂᤧᤏᤧ᤹ ᤁᤧᤛ᤻ᤛᤠ ᤕᤧᤶᤒᤡᤳᤇᤠᤜᤠ᤹ ᤂᤢᤴᤇᤡ᤹ ᤜᤢᤰᤁᤥ ᤔᤧᤒᤰᤂᤢᤛᤡᤀᤠᤱ ᤔᤧᤍᤠᤖᤢᤛᤡ ᤁᤧᤶᤒᤡᤖᤥ. ᤂᤧᤒᤩᤠᤱ ᤁᤧᤛ᤻ᤛᤠ ᤔᤧᤴᤇᤢᤔᤠᤜᤠ᤹ᤃ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤑᤰᤋᤠᤱᤅᤥ ᤔᤧᤒᤰᤂᤢᤛᤡᤀᤠᤱ ᤔᤧᤍᤠᤖᤢᤛᤡᤖᤥ॥ 23 ᤂᤧᤏᤧ᤹ ᤁᤧᤗᤠᤃᤡ ᤜᤠᤱᤜᤠ᤹ ᤐᤠᤏᤢᤍᤡᤱ ᤐᤠ ᤜᤧᤰᤁᤣ ᤜᤧᤰᤁᤩᤠᤱ ᤜᤠᤱᤔᤠᤜᤠ᤹ ᤔᤠ ᤜᤧᤰᤁᤣ ᤁᤶᤒᤪᤠᤱ ᤁᤧᤔᤧᤵᤐᤠ ᤔᤧᤒᤥᤱᤗᤥ॥ ᤂᤧᤱᤜᤠ᤹ᤖᤧ ᤂᤧᤏᤧ᤹ ᤂᤠᤶᤒᤠᤱᤅᤥ ᤌᤠᤖᤡᤰ ᤀ᤺ᤰᤂᤢᤶ ᤔᤧᤓᤴᤇᤡᤱᤅᤠᤱ ᤛᤧᤘᤠ ᤁᤧᤶᤔᤧᤳᤗᤥ. ᤜᤴᤏᤠᤱ ᤏ᤺ᤶᤏ᤺ᤶᤒᤠ ᤔᤧᤒᤥᤱᤅᤠᤱ ᤔᤡᤱᤛᤥ ᤀᤡᤱᤎᤠᤱ ᤁᤧᤶᤒᤡᤖᤥ॥ ᤜᤧᤰᤁᤣᤗ᤹ᤖᤡᤰ ᤕᤜᤘᤣ ᤍᤠᤱᤒᤠᤀᤠ ᤑᤠ᤹ᤀᤠᤱ ᤂᤧᤏᤧ᤹ ᤏᤡᤱᤘᤠ᤹ ᤁᤧᤄᤥᤛᤢᤖᤥ. ᤀᤠᤱᤃᤠ᤹ ᤀᤠᤗᤠᤶ ᤀᤥᤃᤧᤔᤧᤵᤐᤠᤜᤠ᤹ ᤏᤡᤱᤘᤠ᤹ ᤋᤢᤰᤔᤥ ᤔᤧᤴᤎᤠᤏᤧᤸᤗᤥ॥” 24 “ᤌᤣ ᤌᤱ ᤁᤧᤈᤥ᤺ᤰᤐᤠ ᤌᤰᤛᤢᤒᤠᤜᤠ᤹ᤗᤠᤶ ᤔᤧᤏᤠᤵᤋᤢᤛᤡᤒᤠ ᤆᤡᤃᤰᤘᤠᤜᤠ᤹ ᤏᤠᤵᤔᤠ ᤛᤢᤰᤔᤧᤍᤧᤵᤐᤡ᥅ ᤀᤡᤃᤪ ᤁᤢ᤹ᤀᤡᤃᤧᤓᤧᤶᤒᤠᤜᤠ᤹ᤖᤧ ᤂᤢᤴᤇᤡ᤹ ᤜᤢᤰᤁᤥᤗᤠᤶ ᤐᤢᤱᤗᤠᤜᤡᤶᤔᤥ ᤛᤠᤰᤐᤠ ᤁᤧᤎᤠᤒᤠᤜᤠ᤹ ᤗ᤺ᤵᤔᤠ ᤛᤢᤰᤔᤧᤍᤧᤵᤐᤡ᥅” 25 ᤁᤖ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤖᤥ— “ᤀᤥᤖᤥ. ᤌᤰᤛᤢᤒᤠᤜᤠ᤹ᤗᤠᤶ ᤐᤢᤱᤗᤠᤜᤡᤶᤔᤥ ᤛᤠᤰᤐᤠ ᤁᤧᤎᤠᤒᤠᤜᤠ᤹ ᤜᤧᤰᤁᤩᤠᤱ ᤁᤢ᤹ᤀᤡᤃᤧᤓᤧᤶᤒᤠᤜᤠ᤹ᤗᤠᤶ ᤔᤧᤏᤠᤵᤋᤢᤛᤡᤒᤠ ᤆᤡᤃᤰᤘᤠᤜᤠ᤹ ᤏᤠᤵᤔᤠ ᤛᤢᤰᤔᤧᤍᤧᤳᤗᤥ॥ ᤀᤠᤳᤋᤡᤴᤜᤠ᤹ ᤂᤧᤏᤡ᤹ᤏᤢ ᤂᤧᤔᤠ᤹ ᤔᤧᤈᤥᤰ ᤀᤠᤱᤃᤠ᤹ ᤂᤧᤱᤜᤠ᤹ᤏᤢ ᤂᤧᤔᤠ᤹ ᤆᤥ᤺ᤰᤁᤠᤖᤥ. ᤂᤧᤒᤩᤠᤱ ᤀᤠᤱᤃᤠ᤹ ᤀᤠᤛ᤻ᤛᤠ ᤀᤠᤀᤣᤜᤠ᤹ ᤛᤧ᤺ᤵᤋᤢᤱᤛᤡᤱᤗᤥ॥ 26 ᤂᤧᤏᤡ᤹ ᤋᤢᤰᤂᤣ ᤁᤧᤈᤠ᤺ᤵᤐᤠᤜᤠ᤹ ᤀᤠᤱᤃᤠ᤹ ᤂᤢᤴᤇᤡ᤹ ᤀᤠᤒᤠᤅᤣ ᤏᤧᤰᤛᤠᤴ ᤆᤠᤔᤠ ᤐᤠᤱᤄᤢᤱᤛᤡᤱᤗᤥ॥ ᤆᤧᤸᤗᤧᤰᤛᤣ᤹ ᤌᤡ᤺ᤸᤗᤧ ᤔᤕᤢᤛᤡᤒᤠ ᤜᤧᤰᤁᤣ ᤂᤧᤱᤜᤠ᤹ ᤀᤠᤒᤠᤅᤣ ᤂᤢᤴᤇᤡ᤹ ᤔᤠᤰᤂᤡᤸᤗᤧ ᤔᤕᤢᤛᤡᤖᤥ॥ ᤜᤧᤰᤁᤣᤗ᤹ᤖᤡᤰ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤁᤧᤖᤧᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤀᤠᤱᤃᤠ᤹ᤀᤣ ᤂᤧᤏᤧ᤹ ᤁᤧᤕᤜᤘᤣ ᤍᤠᤱᤒᤠ ᤁᤧᤛᤧᤴᤗᤵᤍᤠᤱᤒᤠᤀᤠ. ᤁᤧᤔᤧᤸᤗᤢᤱ ᤁᤧᤜᤢᤱᤒᤠᤀᤠᤱ ᤁᤧᤎᤧ᤹ᤒᤠ ᤕᤠᤁᤢᤒᤖᤧ ᤁᤢᤔᤢᤰᤛᤠᤶᤍᤠᤱᤒᤠ ᤁᤢᤏᤡᤱᤘᤠ᤹ᤑᤢᤔᤠᤱᤀᤠ ᤑᤠ᤹ᤀᤠᤱ ᤏᤡᤱᤘᤠ᤹ ᤔᤧᤄᤥᤛᤢᤖᤥ॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.