ᤕᤛᤤᤕᤠ 48 - LIFOTNTᤏᤡᤱᤘᤠ᤹ᤑᤢᤔᤠᤱᤅᤡᤴ ᤋᤠᤕᤧᤶᤗᤧᤴ ᤕᤜᤘᤣ ᤍᤠᤱᤒᤠ 1 “ᤕᤠᤁᤢᤒᤖᤧ ᤁᤢᤔᤢ᤹ᤀᤡᤍᤠᤱᤛᤠᤛᤣ. ᤂᤧᤏᤡ᤹ᤃ ᤀᤡᤛᤪᤠᤀᤡᤗ ᤔᤡᤱᤗᤠᤶ ᤁᤧᤶᤀᤢ᤺ᤳᤋᤡᤀᤠᤱ ᤁᤧᤘᤕᤡᤖᤥ. ᤜᤧᤰᤁᤩᤠᤱ ᤕᤜᤢᤍᤠᤖᤧ ᤁᤢᤎᤠ᤺ᤰᤗᤠᤶ ᤁᤧᤍᤩᤧ᤹ᤀᤡᤒᤠᤖᤥ॥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤡᤱᤅᤥ ᤂᤧᤏᤡ᤹ ᤔᤠᤱᤃᤧᤜᤧᤰᤁᤠᤛᤡᤖᤥ ᤜᤧᤰᤁᤩᤠᤱ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤡᤱᤅᤥ ᤐᤣᤗᤡᤃᤧᤴ ᤋᤢᤘᤠ ᤁᤧᤈᤥᤃᤡᤖᤥ. ᤁᤖ ᤛᤧᤰᤂᤠ ᤏᤢ ᤛᤠᤶᤕᤥᤏᤡᤔᤥ ᤁᤧᤴᤈᤥᤃᤢᤶᤔᤡᤸᤗᤥ॥ 2 ᤂᤧᤏᤡ᤹ᤃ ᤛᤣᤛᤣ ᤕᤧᤰᤕᤰᤁᤥᤒᤠ ᤕᤰᤕᤢᤱᤒᤠᤍᤡᤃᤧ ᤁᤧᤗ᤹ᤖᤡᤖᤥ ᤜᤧᤰᤁᤩᤠᤱ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤥ ᤏᤡᤱᤘᤠ᤹ ᤁᤧᤕᤢᤰᤂᤢᤶᤗᤥ. ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤠᤴ ᤂᤢᤏᤧ᤹ ᤁᤢᤔᤡᤱᤗᤥ. ᤁᤴ ᤐᤠ᤺ᤴᤏᤡᤴ ᤂᤧᤵᤛᤧᤶᤔᤧ᤹ᤀᤥ— 3 “ᤀᤠᤛᤣ᤺ᤴᤇᤠ ᤌᤣ ᤐᤥᤱᤔᤠ ᤁᤧᤒᤥᤱᤒᤠ ᤘᤕᤧ ᤂᤧᤴ ᤀᤠᤱᤃᤠ᤹ ᤔᤧᤳᤏᤡᤱᤅᤠᤱ ᤘᤕᤧᤖᤥ॥ ᤜᤧᤰᤁᤩᤠᤱ ᤀᤠᤱᤃᤠ᤹ ᤂᤧᤴ ᤀᤥ᤺ᤴᤎᤠᤰᤏᤡᤱᤗᤥ. ᤂᤧᤴ ᤀᤠᤱᤃᤠ᤹ ᤂᤡᤔᤥ ᤆᤥᤃᤢᤱ. ᤂᤶᤒᤩᤠᤱ ᤂᤧᤴ ᤐᤠ᤺ᤴᤜᤠ᤹ ᤐᤥ᤺ᤰᤂᤧᤖᤥ॥ 4 ᤌᤣᤀᤠᤱᤓᤧᤸᤗᤧ ᤂᤧᤏᤡ᤹ ᤐᤠ᤺ᤴᤔᤧᤱᤄᤧᤶᤔᤏᤠᤒᤠ ᤁᤧᤘᤕᤡᤖᤥ. ᤂᤧᤴ ᤀᤠᤱᤃᤠ᤹ ᤁᤢᤛᤡᤱ ᤏᤡ᤺ᤳᤋᤢᤱᤅᤠᤱ ᤘᤕᤠᤱᤗᤥ. ᤜᤧᤰᤁᤩᤠᤱ ᤂᤧᤏᤡ᤹ ᤏᤡᤃᤡ᤺ᤱᤔᤠᤜᤠ᤹ᤃ ᤔᤧᤴᤍᤢ᤺ᤱᤔᤏᤠᤒᤠ ᤑᤧᤴᤈᤣ᤹ ᤁᤢᤛᤡᤱ ᤆᤥᤃᤧᤖᤥ. ᤂᤧᤏᤡ᤹ ᤋᤫᤠᤒᤧᤱᤃ ᤁᤠᤛᤠ ᤜᤧᤰᤋᤱᤒᤠ ᤆᤥᤃᤧᤖᤥ॥ 5 ᤁᤸᤗᤧᤆᤥᤃᤢᤸᤗᤧ ᤁᤴ ᤐᤠ᤺ᤴᤜᤠ᤹ ᤀᤠᤱᤃᤠ᤹ ᤋᤃᤡᤀᤣ ᤂᤧᤏᤧ᤹ ᤔᤧᤳᤏᤧᤒᤠᤖᤥ. ᤁᤴᤜᤠ᤹ ᤐᤥᤱᤔᤠᤏᤢ᤺ᤸᤗᤧ ᤋᤃᤡᤀᤣ ᤀᤠᤱᤃᤠ᤹ ᤂᤧᤏᤧ᤹ ᤆᤧᤰᤏᤧᤖᤥ॥ ᤜᤧᤰᤁᤣᤗ᤹ᤖᤡᤰ ᤂᤧᤏᤧ᤹ ᤁᤶᤓ ᤐᤠ᤺ᤵᤔᤠ ᤁᤧᤱᤄᤥᤛᤢᤸᤗᤖᤥ. ‘ᤀᤠᤱᤃᤠ᤹ ᤀᤠᤏᤠᤘᤠᤀᤡᤳᤗᤠᤜᤠ᤹ᤖᤧ ᤁᤴ ᤔᤧᤈᤥᤃᤢᤒᤠᤖᤥ. ᤀᤠᤱᤃᤠ᤹ ᤀᤠᤛᤡᤱ ᤆᤀᤡ᤺ᤳᤋᤡᤸᤗᤧ ᤏᤢ ᤛᤠᤶᤔᤩᤠᤱ ᤕᤢᤵᤐᤠ ᤔᤠᤱᤅᤡᤸᤗᤧ ᤁᤴᤜᤠ᤹ ᤀᤡᤱᤈᤠᤱ ᤆᤥᤃᤢᤒᤠᤖᤥ॥’ 6 “ᤂᤧᤏᤧ᤹ ᤁᤴ ᤐᤠ᤺ᤴᤏᤡᤴ ᤁᤧᤄᤧᤵᤛᤢᤀᤠᤱ ᤁᤧᤘᤠ᤹ᤖᤥ. ᤂᤧᤏᤧ᤹ ᤁᤴ ᤁᤧᤖᤧᤰ ᤐᤠ᤺ᤴᤜᤠ᤹ ᤀᤥᤔᤧᤳᤋᤧ᤹ᤀᤥ॥ ᤌᤣ ᤂᤧᤏᤧ᤹ ᤁᤴᤜᤠ᤹ ᤏᤛᤠᤴ ᤁᤧᤴᤈᤥᤃᤢᤶᤒᤡ᥅ ᤀᤠᤸᤗᤀᤠᤱᤎᤥ ᤀᤠᤱᤃᤠ᤹ ᤂᤧᤏᤧ᤹ ᤁᤢᤛᤱ ᤐᤠ᤺ᤴᤜᤠ᤹ ᤔᤧᤳᤏᤧᤖᤥ. ᤂᤧᤏᤧ᤹ ᤁᤧᤸᤗᤧᤛᤢᤶᤒᤠ ᤛᤡᤒᤡ᤹ ᤐᤠ᤺ᤴᤜᤠ᤹ ᤆᤧᤰᤏᤧᤖᤥ॥ 7 ᤂᤧᤱᤜᤠ᤹ ᤀᤠᤸᤗᤥ ᤏᤠᤘᤠᤃᤧᤴ ᤆᤀᤡ᤺ᤳ ᤆᤥᤃᤧᤒᤠᤖᤥ. ᤋᤃᤡ ᤂᤧᤱᤜᤠ᤹ ᤜᤥ᤺ᤵᤋᤧᤖᤥ. ᤂᤧᤸᤗᤧ ᤁᤢᤕᤠ᤺ᤶᤒᤣᤀᤥ ᤀᤠᤀᤡᤴᤏᤢ᤺ᤸᤗᤧ ᤋᤃᤡ ᤔᤧᤱᤄᤧᤶᤔᤣ ᤁᤧᤘᤕᤧᤖᤥ॥ ᤁᤸᤗᤧᤆᤥᤃᤢᤸᤗᤧ ᤂᤧᤏᤧ᤹ ᤐᤠ᤺ᤵᤔᤠ ᤁᤧᤴᤇᤢᤰᤋᤢᤴᤗᤥ. ‘ᤀᤥᤘᤠ. ᤀᤠᤱᤃᤠ᤹ ᤂᤧᤴ ᤏᤡᤛᤢᤱ ᤗᤧᤛᤢᤱᤅᤠᤱ ᤘᤕᤠᤱᤗᤥ॥’ 8 ᤂᤧᤏᤧ᤹ ᤔᤧᤱᤄᤧᤶᤔᤣ ᤁᤧᤘᤕᤧᤖᤥ. ᤜᤧᤰᤁᤩᤠᤱ ᤔᤧᤸᤗᤧᤀᤣᤀᤠᤱ ᤁᤧᤘᤕᤧᤖᤥ॥ ᤀᤢᤏᤠᤜᤢᤖᤡᤀᤠᤱᤎᤥ ᤂᤧᤏᤧ᤹ ᤁᤧᤏᤧᤰᤂᤥ᤹ᤒᤠᤴ ᤔᤧᤴᤜᤴᤏᤣ ᤘᤕᤧᤖᤥ. ᤂᤧᤏᤧ᤹ ᤀᤠᤰᤋᤱᤒᤠ ᤀᤡᤱᤗᤧᤰᤛᤫᤠᤒᤠ ᤁᤧᤈᤥ᤺ᤰᤗᤥ ᤑᤠ᤹ᤀᤠᤱ ᤀᤠᤱᤃᤠ᤹ ᤁᤢᤛᤡᤱ ᤏᤡ᤺ᤳᤋᤢᤱᤗᤥ. ᤛᤠᤃᤧᤘᤠ᤺ᤴᤇᤡᤱᤒᤠ ᤕᤧᤴᤏᤠᤱᤎᤥᤀᤣ ᤐᤡᤑᤩᤢᤱᤒᤠ ᤁᤧᤶᤔᤧᤳᤋᤧᤀᤠᤱ ᤁᤧᤘᤕᤧᤖᤥ॥ 9 “ᤀᤠᤒᤠᤅᤣ ᤀᤠᤔᤡᤱ ᤏᤢ ᤀᤠᤔᤡᤔᤡᤍᤡᤱᤗᤧ ᤗᤠᤃᤡ ᤀᤠᤱᤃᤠ᤹ ᤀᤠᤛᤠᤰᤁᤧᤴ ᤌᤖᤢᤱᤗᤥ. ᤜᤧᤰᤁᤩᤠᤱ ᤂᤧᤏᤧ᤹ ᤔᤧᤴᤏᤠ᤹ᤔᤠ ᤑᤠ᤹ᤀᤠᤱ ᤀᤠᤱᤃᤠ᤹ᤀᤣ ᤂᤧᤴ ᤛᤠᤰᤋᤢᤱ ᤁᤳᤋᤢᤱᤗᤥ॥ 10 ᤀᤥᤔᤧᤳᤋᤧ᤹. ᤀᤠᤱᤃᤠ᤹ ᤂᤧᤏᤧ᤹ ᤁᤧᤏᤡᤱᤘᤠ᤹ ᤛᤠ᤹ᤖᤢᤱᤅᤠᤱ ᤘᤠ᤹ᤀᤠᤖᤥ. ᤁᤖ ᤕᤢᤵᤐᤠ ᤕᤥ᤺ᤶᤔᤠᤀᤠᤱ ᤛᤠ᤹ᤔᤏᤠᤒᤠ ᤜᤧᤰᤁᤣᤃ ᤔᤣ᤺ᤸᤗᤥ॥ ᤀᤠᤱᤃᤠ᤹ ᤂᤧᤏᤧ᤹ ᤀᤠᤀᤥ᤹ᤀᤥ᤹ᤒᤠ ᤔᤡᤖᤠ᤺ᤰᤗᤧᤴ ᤋᤢᤰᤂᤣᤀᤥ ᤜᤧᤰᤁᤣ ᤁᤧᤏᤡᤱᤘᤠ᤹ ᤛᤠ᤹ᤖᤢᤱᤅᤠᤱ ᤘᤠ᤹ᤖᤥ॥ 11 ᤀᤠᤱᤃᤠ᤹ ᤀᤠᤒᤠᤅᤣ ᤀᤠᤗᤠᤃᤡ. ᤀᤠᤱᤃᤠ᤹ ᤀᤠᤒᤠᤅᤣ ᤑᤠ᤹ᤀᤠᤱ ᤂᤧᤴ ᤆᤥᤃᤢᤱᤗᤥ॥ ᤀᤠᤰᤂᤣᤗ᤹ᤖᤡᤰ ᤀᤠᤱᤃᤠ᤹ ᤀᤠᤒᤠᤅᤣ ᤀᤠᤈᤠ᤺ᤳᤌᤡ ᤁᤧᤒᤣ᤺ᤰᤐᤠ ᤐᤥᤱᤅᤠᤒᤠᤒᤣ᥅ ᤀᤠᤱᤃᤠ᤹ ᤀᤠᤔᤡᤔᤡᤍᤡᤱᤅᤡᤴ ᤏᤠᤘᤠᤀᤡᤳᤗᤠᤜᤠ᤹ᤏᤢ ᤔᤧᤜᤠᤀᤠᤸᤗᤥ॥” ᤕᤜᤘᤣ ᤍᤠᤱᤒᤧᤸᤗᤧ ᤛᤤᤖᤛᤧᤴ ᤗᤠᤶᤗᤥᤒᤠ ᤛᤣᤃᤢ 12 “ᤕᤠᤁᤢᤒᤣ. ᤀᤠᤱᤃᤠ᤹ ᤀᤢ᤺ᤳᤏᤧᤒᤠ ᤀᤡᤛᤪᤠᤀᤡᤗᤀᤣ. ᤀᤠᤱᤃᤠ᤹ ᤀᤠᤒᤠ᤺ᤴᤏᤧᤴ ᤂᤧᤵᤛᤧ᤹ᤀᤥ. ᤂᤢᤏᤧ᤹ᤃ ᤀᤠᤱᤃᤠ᤹ᤀᤣᤖᤥ॥ ᤁᤧᤖᤧᤰ ᤐᤠ᤺ᤴᤜᤠ᤹ᤏᤢ᤺ᤸᤗᤧ ᤋᤃᤡ ᤀᤠᤱᤃᤠ᤹ᤀᤣ ᤘᤕᤠᤱᤗᤥ. ᤜᤧᤰᤁᤩᤠᤱ ᤁᤧᤖᤧᤰ ᤐᤠ᤺ᤴᤜᤠ᤹ᤏᤢ᤺ᤸᤗᤧ ᤀᤣᤃᤠᤱᤅᤠᤱ ᤀᤠᤱᤃᤠ᤹ᤀᤣ ᤘᤠ᤹ᤀᤠᤖᤥ॥ 13 ᤀᤠᤱᤃᤠ᤹ ᤀᤠᤒᤠᤅᤣ ᤀᤠᤜᤢᤰᤁᤡᤸᤗᤧ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤸᤗᤧ ᤁᤢᤒᤢᤱᤜᤠ᤹ ᤕᤢᤰᤂᤢᤱᤒᤠᤖᤥ. ᤜᤧᤰᤁᤩᤠᤱ ᤀᤠᤈᤢᤰᤘᤠ ᤜᤢᤰᤁᤡᤸᤗᤧ ᤋᤠᤱᤛᤠᤱᤒᤧᤴ ᤂᤡᤱᤛᤢᤱᤒᤠᤖᤥ॥ ᤀᤠᤱᤃᤠ᤹ ᤂᤧᤱᤜᤠ᤹ ᤐᤠ᤺ᤴᤇᤠ᤺ᤳᤋᤢᤱᤛᤡᤱᤅᤧᤸᤗᤧ ᤂᤧᤱᤜᤠ᤹ ᤌᤡᤰᤗᤧᤱᤗᤧ ᤔᤢᤳᤌᤪᤡᤰ ᤔᤧᤒᤥᤰᤗᤥ॥ 14 ᤂᤧᤏᤡ᤹ ᤁᤧᤖᤧᤰ ᤆᤢᤵᤛᤠᤶᤔᤧ᤹ᤀᤠᤱ ᤂᤧᤵᤛᤠᤶᤔᤧ᤹ᤀᤥ. ᤔᤠᤱᤜᤠ᤹ᤀᤥ ᤜᤠ᤺ᤳᤗᤧ ᤋᤃᤡᤀᤣ ᤁᤴ ᤐᤠ᤺ᤴᤜᤠ᤹ ᤐᤠ᤺ᤳᤋᤢᤒᤣ᥅ ᤕᤜᤘᤣ ᤍᤠᤱᤒᤧᤸᤗᤧ ᤛᤣᤃᤢᤒᤠ ᤛᤤᤖᤛᤧ᤺ᤸᤗᤧ ᤒᤣᤒᤡᤗᤥᤏ ᤗᤠᤈᤣ᤹ᤀᤥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤆᤥ᤺ᤰᤔᤠ ᤏᤡᤱᤘᤠ᤹ ᤆᤥᤃᤢᤒᤠᤴ ᤁᤧᤳᤋᤢᤖᤥ. ᤂᤢᤏᤧ᤹ ᤁᤢᤔᤢᤰᤛᤠᤶᤔᤡᤴ ᤒᤣᤒᤡᤗᤥᤏᤒᤠ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤋᤰᤗᤧᤱᤘᤠᤀᤥ ᤐᤥ᤺ᤰᤗᤥ॥ 15 ᤀᤠᤱᤃᤠ᤹ᤀᤣ ᤁᤴ ᤐᤠ᤺ᤴᤏᤡᤴ ᤐᤠ᤺ᤳᤋᤢᤱᤅᤠᤱ ᤘᤠ᤹ᤖᤥ. ᤀᤥ᤺ᤛ᤻ᤒᤠ. ᤀᤠᤱᤃᤠ᤹ ᤛᤤᤖᤛᤧᤴ ᤀᤢ᤺ᤳᤋᤢᤱᤅᤠᤱ ᤘᤠ᤹ᤖᤥ॥ ᤀᤠᤱᤃᤠ᤹ ᤂᤧᤴ ᤋᤠᤖᤢᤱᤗᤥ. ᤜᤧᤰᤁᤩᤠᤱ ᤂᤧᤸᤗᤧ ᤆᤥᤃᤢᤱ ᤑᤠ᤹ᤀᤠᤱ ᤛᤥ᤺ᤰᤋᤢᤒᤠ ᤕᤠ᤺ᤶᤒᤰᤁᤡᤴ ᤁᤢᤗᤡᤱᤍᤥ ᤁᤧᤳᤗᤥ॥ 16 ᤀᤠᤱᤃᤠ᤹ ᤀᤠᤒᤣᤛᤠᤱ ᤋᤩᤧᤶᤔᤧ᤹ᤀᤥ. ᤜᤧᤰᤁᤩᤠᤱ ᤂᤧᤏᤡ᤹ ᤁᤴ ᤂᤧᤵᤛᤧᤶᤔᤧ᤹ᤀᤥ— ᤌᤡᤰᤛᤡᤃᤣᤰᤐᤠ ᤀᤢᤘᤠ ᤐᤥ᤺ᤰᤂᤧᤀᤠᤱᤎᤥᤀᤣ ᤀᤠᤱᤃᤠ᤹ ᤛᤫᤠ᤺ᤳᤋᤠᤱ ᤐᤠ᤺ᤳᤋᤢᤱᤒᤠ ᤜᤥᤵᤗᤥ. ᤂᤧᤴ ᤜᤡᤴᤎᤥ᤺ᤰᤁᤡᤴ ᤁᤧᤵᤐᤠ ᤕᤧᤶᤔᤥ ᤀᤠᤱᤃᤠ᤹ ᤂᤧ᤹ᤕᤥ ᤘᤠ᤹ᤀᤠᤖᤥ॥” ᤂᤧᤒᤩᤠᤱ ᤀᤠᤸᤗ ᤕᤜᤘᤣ ᤍᤠᤱᤒᤧᤸᤗᤧ ᤀᤠᤱᤃᤠ᤹ ᤂᤢᤏᤧ᤹ ᤁᤢᤕᤠᤶᤛᤠᤶᤔᤡᤴᤏᤢ ᤐᤠᤱᤄᤠᤱᤅᤠᤱ ᤘᤠ᤹ᤀᤠᤖᤥ॥ 17 ᤕᤜᤘᤣ ᤍᤠᤱᤒᤠ. ᤂᤧᤏᤧ᤹ ᤁᤧᤎᤧ᤹ᤒᤠ ᤏᤢ ᤀᤡᤛᤪᤠᤀᤡᤗᤒᤠ ᤛᤣᤛᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤰᤂᤣ ᤐᤠ᤺ᤳᤋᤢᤖᤥ— “ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤠ ᤂᤧᤏᤧ᤹ ᤁᤧᤏᤡᤱᤘᤠ᤹ᤑᤢᤔᤠᤱᤀᤠᤖᤥ. ᤀᤠᤱᤃᤠ᤹ ᤂᤧᤏᤧ᤹ ᤁᤧᤏᤢ᤹ ᤁᤧᤍᤠᤖ ᤑᤠ᤹ᤀᤠᤱ ᤜᤢ᤹ᤏᤧᤖᤥ. ᤀᤠᤱᤃᤠ᤹ ᤂᤧᤏᤧ᤹ ᤐᤣ᤺ᤰᤔᤠ ᤁᤧᤒᤥᤱᤒᤠ ᤗᤠᤶᤔᤥ ᤗᤠᤱᤄᤣ᤺ᤱᤏᤧᤖᤥ॥ 18 ᤀᤠᤱᤃᤠ᤹ ᤀᤠᤀᤡᤱᤈᤠᤱᤜᤠ᤹ ᤛᤡᤱᤛᤡᤱ ᤕᤧᤰᤕᤧᤰᤁᤠᤱ ᤁᤧᤄᤧᤵᤛᤢᤒᤠ ᤁᤢᤛᤡᤰᤁᤡᤸᤗᤧ ᤛᤏᤠᤖᤢᤱᤅᤡᤱᤃ ᤔᤧᤴᤈᤵᤔᤏᤠᤒᤠ ᤘᤜ᤺ᤱ ᤁᤢᤀᤡᤛᤡᤰ ᤁᤧᤄᤥᤛᤢᤒᤠᤔᤧᤴᤗᤥ॥ ᤜᤧᤰᤁᤩᤠᤱ ᤛᤠᤶᤕᤥᤏᤡᤔᤠᤴ ᤘᤖ᤺ᤱᤅᤥᤒᤠ ᤘᤠᤓᤧᤸᤗᤧᤱ ᤁᤢᤀᤡᤛᤡᤰ ᤁᤧᤛᤶᤎᤠᤱ ᤋᤩᤧᤒᤠᤔᤧᤴᤗᤥ॥ 19 ᤂᤧᤏᤧ᤹ ᤁᤧᤛᤠᤕᤥᤒᤥᤖᤠᤜᤠ᤹ ᤕᤧ᤺ᤱᤄᤠ ᤕᤠᤖᤡᤰ ᤕᤖᤡᤰ ᤔᤧᤘᤕᤧᤒᤠᤔᤧᤴᤗᤥ. ᤜᤧᤰᤁᤩᤠᤱ ᤂᤧᤏᤧ᤹ ᤁᤧᤛ᤻ᤛᤠ ᤕᤧᤶᤒᤡᤳᤇᤠ ᤔᤧᤴᤇᤢᤔᤠᤜᤠ᤹ ᤂᤧᤴ ᤕᤧ᤺ᤱᤄᤠ᤺ᤸᤗᤧ ᤁᤢᤜᤡᤰ ᤕᤠᤖᤡᤰ ᤕᤖᤡᤰ ᤔᤧᤒᤥ᤺ᤰᤂᤧᤔᤧᤴᤗᤥ॥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤔᤡᤱᤜᤠ᤹ ᤀᤠᤓᤧᤸᤗᤧᤀᤠᤱ ᤔᤧᤔᤕᤧᤶᤒᤠᤔᤧᤴᤗᤥ. ᤂᤧᤒᤩᤠᤱ ᤂᤧᤱᤜᤠ᤹ ᤀᤠᤱᤃᤠ᤹ ᤀᤠᤍᤃᤠᤱ ᤔᤧᤶᤔᤧᤃᤧᤶᤒᤠᤔᤧᤴᤗᤥ॥” 20 ᤒᤣᤒᤡᤗᤥᤏᤗᤠᤶᤒᤠ ᤗ᤺ᤴᤍᤧᤶᤔᤧ᤹ᤀᤠᤱ ᤐᤣᤃᤧᤶᤔᤧ᤹ᤀᤥ. ᤒᤣᤒᤡᤗᤥᤏᤒᤠ ᤔᤏᤠᤜᤠ᤹ᤗᤠᤶ ᤂᤧᤳᤋᤠᤛᤡᤶᤔᤧ᤹ᤀᤥ॥ ᤁᤧᤛ᤺ᤵᤐᤠ ᤀᤡᤰᤗᤠ᤺ᤸᤗᤧ ᤀ᤺ᤰᤋᤠᤶᤔᤧ᤹ᤖ ᤁᤴ ᤐᤠ᤺ᤴᤏᤡᤴ ᤀᤢᤘᤠ ᤆᤥᤃᤧᤶᤔᤧ᤹ᤀᤥ॥ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤸᤗᤧ ᤏᤠᤛᤔᤠ ᤁᤢᤕᤠᤀᤥ ᤌᤠᤖᤡᤰ ᤁᤴ ᤐᤠ᤺ᤴᤏᤡᤴ ᤆᤧᤰᤋᤠᤶᤛᤡᤶᤔᤧ᤹ᤀᤥ॥ “ᤕᤜᤘᤣ ᤍᤠᤱᤒᤧᤸᤗᤧ ᤀᤠᤒᤠᤅᤣ ᤁᤢᤛᤧᤘᤠᤖᤥᤒᤠ ᤕᤠᤁᤢᤒᤧᤴ ᤆᤥ᤺ᤰᤕᤢᤶᤓᤥ ᤐᤡᤖᤢᤀᤠᤱ ᤘᤠ᤹” ᤐᤠ᤺ᤳᤋᤠᤶᤔᤧ᤹ᤀᤥ॥ 21 ᤂᤢᤏᤧ᤹ ᤂᤧᤱᤜᤠ᤹ ᤔᤢᤖᤧᤰ ᤂᤠᤖᤧᤰᤐᤠ ᤕᤧ᤺ᤱᤄᤠᤍᤧᤴᤗᤠᤶ ᤋᤣ᤹ᤖᤢᤛᤡᤸᤗᤧ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤘᤠᤔᤧᤔᤡ᤺ᤰᤋᤧᤸᤗᤥ॥ ᤂᤢᤏᤧ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤕᤠᤰᤐᤣ᤹ᤀᤥᤏᤢ ᤆᤫᤠ᤺ᤳ ᤗ᤺ᤳᤋᤢ ᤐᤡᤖᤢᤛᤡᤖᤥ॥ ᤂᤢᤏᤧ᤹ ᤕᤠᤰᤐᤣ᤹ᤀᤡᤴ ᤁᤢᤗᤢᤶᤔᤥ ᤐᤰᤁᤪᤧ᤹ ᤑ᤺ᤰᤂᤢᤖᤥ. ᤜᤧᤰᤁᤩᤠᤱ ᤆᤫᤠ᤺ᤳ ᤁᤢᤰᤛᤧ ᤗ᤺ᤴᤍᤧᤖᤥ॥ 22 ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤖᤥ. “ᤁᤢᤏᤡᤱᤘᤠ᤹ ᤁᤧᤈᤡ᤺ᤵᤐᤠᤜᤠ᤹ ᤔᤧᤴᤏᤢ᤹ᤏᤧᤴ ᤔᤧᤴᤍᤠᤏᤧᤸᤗᤥ॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.