ᤕᤛᤤᤕᤠ 47 - LIFOTNT

ᤒᤣᤒᤡᤗᤥᤏ ᤗᤠᤈᤣ᤹ᤀᤥ ᤂᤢᤶᤍᤡᤱ

¹ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤖᤥ. “ᤒᤣᤒᤡᤗᤥᤏᤖᤧ ᤛᤡᤛᤠᤃᤧᤴ ᤁᤢᤛ᤻ᤛᤠ ᤔᤧᤴᤇ᤻ᤕᤠᤀᤣ. ᤂᤧᤏᤧ᤹ ᤁᤧᤜᤠᤱᤕᤢᤰᤏᤠᤀᤥᤗᤠᤶ ᤕᤥ ᤌᤩᤧ᤹ᤀᤠᤱ ᤂᤠᤶᤒᤠᤱᤅᤥᤒᤠ ᤂᤠᤶᤜᤡ᤺ᤰᤁᤥ ᤕᤢᤅᤧ᤹ᤀᤥ॥ ᤒᤣᤒᤡᤗᤥᤏᤖᤧ ᤁᤢᤛ᤻ᤛᤠᤀᤣ. ᤀᤠᤸᤗᤀᤠᤱᤎᤥ ᤂᤧᤏᤧ᤹ ᤜᤢᤰᤌᤢᤱᤔᤥ ᤁᤵᤏᤠᤔᤠ ᤏᤢ ᤏᤢᤔᤠᤛᤢᤰᤔᤠ ᤁᤧᤔᤧᤶᤔᤧᤳᤏᤧᤴᤗᤥ॥

² ᤗᤢᤱᤛᤢᤶᤔᤡᤴ ᤕᤠᤱᤛᤡᤱᤅᤧ᤹ᤀᤠᤱ ᤕᤠ᤹ᤕᤢ᤺ᤳᤋᤧ᤹ᤀᤥ. ᤁᤧᤒ᤺ᤳᤌᤠᤱᤅᤡᤴ ᤂᤧᤳᤋᤧ᤹ᤀᤥ. ᤁᤧᤛᤡᤶᤔᤧᤴ ᤌᤠᤱ ᤛᤡ᤺ᤰᤂᤧ᤹ᤀᤥ. ᤁᤧᤗᤠᤱ ᤌᤢᤱᤒᤥ᤹ᤀᤡᤴ ᤌᤠ᤺ᤵᤛᤧ᤹ᤀᤥ. ᤂᤧᤒᤩᤠᤱ ᤘᤜ᤺ᤱᤅᤡᤴ ᤁᤠ᤺ᤰᤋᤧ᤹ᤀᤥ॥

³ ᤂᤧᤏᤧ᤹ ᤗᤧᤰᤆᤠ᤹ᤒᤢᤎᤢᤰ ᤁᤧᤒᤥᤱᤒᤧᤴ ᤔᤏᤠᤜᤠ᤹ᤖᤧ ᤔᤧᤏᤡᤛᤢᤖᤥ. ᤂᤧᤏᤧ᤹ ᤁᤧᤏᤢ᤺ᤶᤔᤧᤴ ᤀᤥᤛᤣ᤺ᤴᤎᤠᤱ ᤐᤥᤱᤗᤥ॥ ᤀᤠᤱᤃᤠ᤹ ᤁᤢᤗᤧᤰᤘᤠ ᤜᤢᤅᤢᤱᤗᤥ. ᤀᤠᤱᤃᤠ᤹ ᤜᤠ᤺ᤳᤋᤠᤱ ᤔᤧᤗᤧᤳᤋᤠᤛᤡᤱᤅᤡᤸᤗᤥ॥”

⁴ ᤀᤡᤛᤪᤠᤀᤡᤗᤒᤠ ᤛᤣᤛᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤏᤡ᤹ ᤛᤧᤴᤗᤵ ᤀᤠᤒᤡᤖᤥ. ᤂᤢᤏᤧ᤹ ᤁᤢᤔᤡᤱ ᤛᤧᤴᤗᤵᤍᤠᤱᤒᤠ. ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤠᤖᤥ॥

⁵ “ᤏᤢᤔᤠᤛᤢᤰᤔᤠ ᤒᤣᤒᤡᤗᤥᤏᤣ. ᤂᤧᤏᤧ᤹ ᤛᤫᤠ᤺ᤳᤋᤠᤱ ᤂᤠᤔᤠᤰᤗᤢᤶᤒᤠ᤺ᤳᤋᤥ ᤐᤣᤃᤧ᤹ᤀᤠᤱ ᤕᤢᤅᤧ᤹ᤀᤥ. ᤀᤠᤸᤗᤀᤠᤱᤎᤥ ᤕᤠᤶᤔᤥ ᤂᤧᤏᤧ᤹ ᤜᤠᤱᤈᤢᤶ ᤜᤠᤱᤈᤢᤶᤒᤠ ᤜᤠᤱᤔᤠ ᤁᤧᤔᤧᤴᤔᤧᤳᤏᤧᤸᤗᤥ॥

⁶ ᤀᤠᤱᤃᤠ᤹ ᤛᤣᤃᤢᤱᤛᤡᤱᤒᤠ ᤀᤠᤔᤏᤠᤜᤠ᤹ᤏᤢ ᤀᤠᤕᤠᤰ ᤗᤧ᤹ᤖᤧᤀᤠᤱ ᤘᤕᤠᤱᤗᤥ. ᤜᤧᤰᤁᤩᤠᤱ ᤀᤠᤱᤃᤠ᤹ ᤂᤧᤱᤜᤠ᤹ ᤀᤠᤒᤠᤅᤣ ᤀᤠᤔᤏᤠ ᤜᤧᤰᤁᤣ ᤏᤢᤖᤡᤰ ᤔᤧᤶᤔᤧᤵᤐᤠᤛᤡᤖᤥ॥ ᤀᤠᤱᤃᤠ᤹ ᤂᤧᤱᤜᤠ᤹ ᤂᤧᤏᤧ᤹ ᤁᤧᤜᤢᤰᤁᤥ ᤌᤠᤛᤢᤱᤛᤡᤱᤗᤥ. ᤁᤖ ᤂᤧᤱᤜᤠ᤹ ᤂᤧᤏᤧ᤹ ᤗᤢᤱᤔᤠ᤹ ᤁᤧᤴᤍᤢᤰᤋᤢᤛᤡᤸᤗᤥ॥ ᤁᤠᤵᤐᤥᤒᤠ ᤁᤠᤵᤔᤢᤔᤠᤜᤠ᤹ᤀᤠᤱ ᤂᤧᤏᤧ᤹ ᤛᤠ᤹ᤖᤡᤰ ᤁᤧᤗᤡ᤺ᤵᤐᤠ ᤁᤧᤃᤰᤁᤡᤴ ᤁᤧᤃᤢ᤺ᤳᤋᤢᤛᤡᤖᤥ॥

⁷ ᤂᤧᤏᤧ᤹ ᤁᤧᤒᤠ᤺ᤳᤋᤢ. ‘ᤀᤠᤱᤃᤠ᤹ ᤛᤍᤠᤍᤡᤱ ᤛᤍᤠᤍᤡᤱᤗᤧ ᤗᤠᤃᤡ ᤀᤠᤓᤧᤸᤗᤧᤀᤠᤱ ᤔᤧᤴᤏᤢᤵᤔᤏᤠᤔᤠ ᤜᤠᤱᤔᤠ ᤐᤥᤱᤅᤠᤖᤥ᥄’ ᤁᤖ ᤋᤠ᤺ᤴᤍᤡ ᤌᤣ ᤐᤥᤱ ᤑᤠ᤹ᤀᤠᤱ ᤂᤧᤏᤧ᤹ ᤏᤡᤱᤘᤠ᤹ ᤁᤧᤴᤀᤡ᤺ᤳᤋᤢᤴᤗᤥ. ᤐᤡᤵᤔᤡᤖᤡ ᤁᤢᤛᤥ᤺ᤴᤍᤡᤀᤥ ᤌᤣ ᤐᤥᤱ ᤑᤠ᤹ᤀᤠᤱ ᤂᤧᤏᤧ᤹ ᤏᤡᤱᤘᤠ᤹ ᤁᤧᤴᤀᤡ᤺ᤳᤋᤢᤴᤗᤥ॥

⁸ “ᤂᤧᤸᤗᤧᤆᤥᤃᤢᤸᤗᤧ ᤏᤡᤱᤘᤠ᤹ ᤋᤠᤍᤠ ᤆᤥ᤺ᤰᤔᤠ ᤁᤢᤛᤡᤖᤠ᤹ ᤁᤧᤎᤠᤱᤔᤣ. ᤀᤠᤒᤠᤅᤣ ᤋᤠᤱᤛᤧ᤺ᤵᤛᤡᤱᤔᤠᤖᤧ ᤗᤠᤃᤡ ᤌᤣᤀᤠᤱ ᤔᤧᤴᤀᤡ᤺ᤳᤋᤣ ᤁᤧᤕᤢᤱᤔᤣ. ᤏᤡᤱᤘᤠ᤹ᤀᤥ ‘ᤀᤠᤱᤃᤠ᤹ᤀᤣ᤺ᤰ ᤁᤧᤗ᤹ᤔᤠ ᤜᤧᤰᤁᤩᤠᤱ ᤀᤠᤱᤃᤠ᤹ᤏᤢ᤺ᤸᤗᤧ ᤘᤣ᤹ ᤜᤠ᤺ᤳᤋᤠᤱ ᤜᤥᤵ ᤁᤧᤗ᤹ᤔᤠ ᤀᤠᤱᤃᤠ᤹ ᤀᤠᤓᤧᤸᤗᤧᤀᤠᤱ ᤔᤣᤔᤣᤍᤢᤔᤠ ᤔᤧᤒᤥᤱᤅᤠᤴ ᤀᤡᤃᤪ ᤀᤠᤛ᤻ᤛᤠ ᤀᤠᤀᤣᤜᤠ᤹ ᤔᤧᤛᤡᤒᤠ ᤔᤧᤏᤡᤀᤠᤴ’ ᤁᤧᤗ᤹ᤔᤣ ᤀᤠᤸᤗ ᤁᤴ ᤐᤠ᤺ᤴᤏᤡᤴ ᤛᤡᤱᤛᤡᤱ ᤕᤧᤰᤕᤧᤰᤁᤠᤱ ᤂᤧᤵᤛᤧ᤹ᤀᤥ॥

⁹ ᤁᤴ ᤏᤧᤳᤇᤡ ᤐᤠ᤺ᤴᤜᤠ᤹ ᤂᤧᤏᤧ᤹ ᤁᤧᤛᤶᤎᤠᤱ ᤛᤵᤔᤠᤎᤡᤰᤗᤧ. ᤌᤡᤰᤕᤠ᤺ᤴᤗᤧ ᤐᤥᤱᤍᤠᤖᤥ— ᤁᤧᤛ᤻ᤛᤠ ᤁᤧᤀᤣᤜᤠ᤹ ᤛᤡᤔᤠ ᤔᤠᤔᤠ ᤏᤢ ᤔᤣᤔᤣᤍᤢᤔᤠ ᤐᤥᤱᤔᤠᤴ ᤋᤠᤖᤥ॥ ᤂᤧᤏᤧ᤹ ᤕᤖᤡᤰ ᤁᤡᤳᤆᤠᤰ ᤆᤥ᤺ᤰᤔᤠ ᤏᤢ ᤔᤢᤰᤛᤠᤶᤛᤠᤒᤠ ᤛᤠᤶᤔᤢ᤺ᤵᤔᤠ ᤁᤧᤃᤳᤋᤢᤛᤠᤱ ᤂᤧᤴ ᤁᤧᤛᤠᤰᤐᤠ ᤐᤠ᤺ᤴᤜᤠ᤹ ᤂᤧᤏᤧ᤹ ᤁᤧᤛᤶᤎᤠᤱ ᤀᤡᤍᤠᤖᤥ॥

¹⁰ “ᤂᤧᤏᤧ᤹ ᤀᤠᤒᤠᤅᤣ ᤁᤧᤓᤧᤴᤕᤠ᤺ᤶᤒᤰᤁᤡᤸᤗᤧ ᤛᤧ᤺ᤵᤐᤠ ᤗ᤹ᤖᤡᤰ ᤏᤡ᤺ᤴᤎᤥ ᤁᤧᤈᤥᤃᤢᤀᤠᤱ ᤁᤧᤘᤠ᤹ᤖᤥ. ᤜᤧᤰᤁᤩᤠᤱ ‘ᤀᤠᤱᤃᤠ᤹ ᤜᤠ᤺ᤳᤗᤧᤀᤠᤱ ᤔᤧᤏᤡᤀᤠᤴ’ ᤁᤧᤗ᤹ᤖᤧᤀᤠᤱ ᤁᤧᤘᤠ᤹ᤖᤥ॥ ᤂᤧᤏᤧ᤹ ᤁᤧᤏᤧᤜᤡ ᤏᤢ ᤁᤧᤏᤡᤱᤘᤠ᤺ᤸᤗᤧ ᤗᤠᤶ ᤁᤧᤓᤥ᤺ᤳᤋᤧᤀᤠᤱ ᤁᤧᤘᤠ᤹ᤖᤥ. ᤂᤧᤏᤧ᤹ ᤁᤧᤏᤡᤱᤘᤠ᤹ᤀᤥ ᤀᤰᤂᤣ ᤁᤧᤗ᤹ᤖᤥ. ‘ᤀᤠᤱᤃᤠ᤹ᤀᤣᤖᤥ. ᤀᤠᤱᤃᤠ᤹ᤏᤢ᤺ᤸᤗᤧ ᤘᤣ᤹ ᤜᤠ᤺ᤳᤋᤠᤱ ᤜᤥᤵᤗᤥ॥’

¹¹ ᤁᤧᤛᤠᤰᤐᤠ ᤋᤢᤰᤂᤣ ᤗᤠᤰᤂᤣᤜᤠ᤹ ᤂᤧᤏᤧ᤹ ᤁᤧᤛᤶᤎᤠᤱ ᤀᤡᤍᤠᤖᤥ. ᤂᤧᤴ ᤋᤢᤰᤂᤣᤜᤠ᤹ ᤀᤠᤰᤋᤱᤒᤠ ᤁᤡᤳᤆᤠᤰᤁᤡᤸᤗᤧ ᤁᤧᤄᤧᤳᤋᤢᤒᤣ᥅ ᤜᤠᤴᤋᤡ ᤐᤥᤱᤔᤠ ᤐᤠ᤺ᤴᤜᤠ᤹ ᤂᤧᤏᤧ᤹ ᤁᤧᤍᤢᤔᤢᤖᤥ. ᤂᤧᤸᤗᤧ ᤁᤢᤔᤧᤴ ᤁᤧᤜᤢᤅᤢᤛᤠᤱ ᤂᤧᤴ ᤋᤢᤰᤂᤣᤴ ᤂᤧᤵᤔᤠ ᤁᤧᤴᤇᤢᤰᤋᤢᤴᤗᤥ॥ ᤂᤧᤏᤧ᤹ ᤋᤃᤡ ᤀᤠᤓᤧᤸᤗᤧᤀᤠᤱ ᤔᤧᤴᤍᤢᤶᤔᤣ ᤁᤧᤘᤕᤧᤒᤠ ᤔᤧᤰᤔᤠᤛᤡᤔᤧᤴ ᤀᤠᤸᤗᤥᤄᤥᤖᤥ ᤁᤧᤍᤢᤔᤢᤖᤥ॥

¹² ᤂᤧᤏᤧ᤹ ᤁᤧᤈᤢ᤺ᤰᤋᤧᤀᤠᤱᤎᤥᤀᤣ ᤛᤩᤠᤱᤔᤧᤴᤍᤠᤱ ᤁᤧᤈᤥᤃᤢ ᤁᤧᤎᤠᤰᤋᤢᤒᤠ ᤜᤧᤰᤁᤩᤠᤱ ᤂᤧᤏᤧ᤹ ᤁᤧᤃᤳᤋᤢᤒᤠ ᤁᤧᤖᤧᤰ ᤁᤡᤳᤆᤠᤰᤜᤠ᤹ ᤏᤢ ᤛᤠᤶᤔᤠᤱᤆᤩᤠ᤺ᤱ ᤔᤢᤖᤠᤔᤧᤵᤔᤠ ᤐᤠ᤺ᤴᤜᤠ᤹ ᤀᤠᤸᤗᤛᤠᤱ ᤜᤠᤒᤠ ᤆᤥᤃᤧ᤹ᤖ ᤘᤕᤧ᤹ᤀᤥ॥ ᤜᤧᤰᤁᤣ᤺ᤸᤗᤧ ᤂᤧᤏᤧ᤹ ᤁᤢᤗᤡᤱᤍᤥ ᤁᤧᤃᤧᤵᤐᤡ. ᤜᤧᤰᤁᤩᤠᤱ ᤁᤧᤏᤡᤱᤔᤡᤜᤠ᤹ ᤔᤧᤃᤡᤖ ᤁᤧᤕᤠ᤺ᤴᤍᤢᤛᤡᤒᤡ॥

¹³ ᤂᤧᤏᤧ᤹ ᤁᤧᤶᤒᤡᤒᤠ ᤛᤢᤈᤠᤜᤠ᤹ᤗᤠᤶ ᤂᤧᤏᤧ᤹ ᤁᤧᤏᤠᤛᤧᤀᤠᤱ ᤁᤧᤘᤠ᤹ᤖᤥ᥄ ᤂᤠᤃᤧᤀᤡᤰᤐᤠᤜᤠ᤹. ᤗᤠᤒᤠ. ᤏᤠᤶ ᤂᤣ᤺ᤶᤛᤡᤰᤐᤠ ᤀᤥᤃᤧᤔᤧᤵᤐᤠᤀᤠᤱ ᤗᤠᤎᤰᤔᤠ ᤋᤠ᤺ᤴᤍᤡ ᤁᤧᤍᤠᤒᤠ ᤐᤠᤴ ᤁᤧᤒᤠ᤺ᤵᤐᤠᤜᤠ᤹ ᤔᤧᤍᤠᤖᤖᤥ. ᤜᤧᤰᤁᤩᤠᤱ ᤂᤧᤏᤧ᤹ ᤁᤧᤛᤶᤎᤠᤱ ᤋᤠᤔᤠ ᤁᤧᤀᤡ᤺ᤵᤐᤠ ᤐᤠ᤺ᤴᤜᤠ᤹ᤗᤠᤶ ᤁᤧᤶᤛᤧ᤺ᤵᤗᤖᤥ॥

¹⁴ “ᤛᤧᤰᤂᤠᤛᤠᤱ ᤂᤧᤱᤜᤠ᤹ ᤁᤧᤜᤣᤒᤠ ᤕᤠ᤹ᤗᤠᤱ ᤁᤢᤛᤡᤱ ᤔᤧᤗ᤹ᤖᤥ. ᤔᤡ᤺ᤸᤗᤧ ᤂᤧᤱᤜᤠ᤹ ᤔᤡᤎᤡᤰᤂᤢᤛᤡᤖᤥ॥ ᤔᤡᤎᤢᤱᤍᤡᤱ ᤔᤡᤖᤠ᤺ᤰᤗᤧ ᤔᤡᤛᤠᤶᤗᤠᤶ ᤂᤧᤱᤜᤠ᤹ ᤀᤠᤒᤠᤅᤣ ᤛᤧ᤺ᤵᤛᤡᤱᤔᤠ ᤔᤧᤴᤇᤢᤰᤏᤧᤸᤗᤥ॥ ᤜᤠ᤺ᤳᤗᤧ ᤁᤢᤗᤠᤃᤡᤀᤠᤱ ᤁ᤹ᤕᤥ ᤔᤡᤈᤠ᤹ᤔᤠ ᤔᤡᤍᤳ ᤜᤥᤵᤗᤥ. ᤜᤧᤰᤁᤩᤠᤱ ᤁᤵᤔᤥ ᤕᤢᤱᤔᤠᤀᤠᤱ ᤔᤡᤈᤠ᤹ᤔᤠ ᤔᤡᤀᤠᤱ ᤜᤥᤵᤗᤥ॥

¹⁵ ᤂᤧᤱᤜᤠ᤹ᤖᤧ ᤂᤧᤏᤧ᤹ ᤁᤧᤗᤠᤃᤡ ᤂᤧᤶᤓᤖᤰ ᤆᤥ᤺ᤰᤔᤠ ᤔᤧᤛᤢᤰᤋᤢᤖᤥ— ᤂᤧᤱᤜᤠ᤹ᤏᤢ ᤁᤴ ᤂᤧᤏᤧ᤹ ᤛᤠᤰᤋᤧᤖ ᤕᤠ᤺ᤶᤒᤰ ᤁᤧᤈᤥᤃᤢᤀᤠᤱ ᤘᤕᤧᤖᤥ. ᤂᤧᤱᤜᤠ᤹ ᤁᤧᤖᤧᤰ ᤀᤠᤵᤑᤣᤰ ᤂᤢᤴᤇᤡ᤹ ᤔᤧᤓᤣ᤺ᤴᤍᤢᤒᤠ ᤕᤠ᤺ᤶᤒᤰ ᤗᤧᤵᤔᤠᤱ ᤔᤧᤒᤣ᤺ᤰᤗᤥ. ᤂᤧᤏᤧ᤹ ᤜᤠ᤺ᤳᤗᤧᤀᤠᤱ ᤛᤧ᤺ᤵᤔᤠ ᤁᤧᤔᤧᤴᤇᤢᤰᤏᤧᤸᤗᤥ॥”