ᤕᤛᤤᤕᤠ 46 - LIFOTNT

¹ ᤒᤣᤒᤡᤗᤥᤏᤒᤠ ᤔᤠᤱᤜᤠ᤹ᤖᤧ ᤂᤢᤴᤇᤡ᤹ ᤏᤢᤵᤔᤧᤴ ᤀᤠᤶᤓᤠ ᤁᤴᤗᤥ᥄ ᤌᤡᤰ ᤕᤧᤶᤔᤥ ᤒᤣᤗ ᤔᤧᤵᤔᤏᤠᤒᤠ ᤏᤢ ᤏᤣᤒᤥ ᤔᤧᤵᤔᤏᤠᤒᤠ ᤔᤠᤱᤜᤠ᤹ ᤛᤧᤘᤠ ᤔᤧᤔᤧᤳᤋᤢᤛᤡᤖᤥ. ᤁᤖ ᤀᤠᤸᤗᤥ ᤂᤧᤱᤜᤠ᤹ ᤐᤗᤡ᤺ᤵ ᤐᤗᤡ᤺ᤵ ᤗᤡ᤺ᤵᤗ ᤀᤍᤱᤜᤠ᤹ ᤔᤧᤃᤢ᤺ᤳᤋᤢᤛᤡᤀᤠᤱ ᤘᤠ᤹ᤖᤥ. ᤁᤧᤏᤠᤒᤠ ᤌᤰᤛᤠᤜᤠ᤹ᤖᤧ ᤂᤢᤴᤇᤡ᤹ ᤀᤣ᤺ᤰᤌᤠ᤺ᤰᤔᤥ ᤂᤧᤱᤜᤠ᤹ ᤛᤠ᤹ᤖᤡᤰ ᤁᤧᤗᤡ᤺ᤵᤐᤠ ᤁᤰ ᤔᤧᤒᤥ᤺ᤰᤂᤧᤀᤠᤱ ᤔᤧᤘᤠ᤹ᤖᤥ॥

² ᤏᤠᤘᤠᤀᤡᤳᤗᤠᤜᤠ᤹ ᤀᤠᤒᤠᤅᤣ ᤛᤧ᤺ᤵᤛᤡᤱᤔᤠ ᤔᤧᤴᤇᤢᤰᤏᤧᤸᤗᤥ. ᤔᤏᤠᤜᤠ᤹ ᤜᤢᤰᤁᤠᤵ ᤔᤧᤔᤧᤳᤇᤡᤱᤗᤥ॥ ᤜᤧᤰᤁᤩᤠᤱ ᤂᤧᤱᤜᤠ᤹ ᤔᤧᤍᤣ᤹ᤖᤢᤛᤡᤖ ᤔᤧᤒᤳᤗᤥ. ᤒᤣᤒᤡᤗᤥᤏᤒᤠ ᤔᤠᤱᤜᤠ᤹ᤖᤧ ᤂᤢᤴᤇᤡ᤹ ᤏᤢᤵᤔᤧᤴ ᤜᤠᤒᤠ ᤁᤴᤗᤥ᥄

³ “ᤕᤠᤁᤢᤒᤖᤧ ᤁᤢᤔᤢ᤹ᤀᤡᤍᤠᤱᤛᤠᤛᤣ. ᤏᤢᤖᤡᤰᤁᤠᤱ ᤂᤧᤵᤛᤧᤶᤔᤧ᤹ᤀᤥ. ᤀᤠᤱᤃᤠ᤹ ᤀᤠᤔᤏᤠ ᤀᤡᤛᤪᤠᤀᤡᤗᤗᤠᤶ ᤁᤧᤕᤠ᤺ᤰᤐᤠ ᤁᤧᤖᤧᤰᤗᤧ ᤂᤧᤵᤛᤠᤶᤔᤧ᤹ᤀᤥ॥ ᤂᤧᤏᤡ᤹ ᤛᤠᤃᤧᤘᤠ᤺ᤴᤏᤠᤛᤡᤒᤠᤏᤢ᤺ᤸᤗᤧ ᤋᤃᤡᤀᤠᤱᤎᤥ ᤀᤠᤱᤃᤠ᤹ ᤂᤧᤏᤡ᤹ ᤀᤥᤔᤧᤳᤏᤡᤱᤅᤠᤱ ᤘᤠ᤹ᤀᤠᤖᤥ॥

⁴ ᤂᤍᤠᤰᤔᤡ ᤁᤧᤍᤢᤶᤛᤡᤀᤠᤱ ᤂᤧᤏᤡ᤹ ᤌᤧᤃᤣᤰ ᤑᤢ᤺ᤳᤗᤎᤠᤖᤡᤰᤛᤠᤱ ᤂᤧᤱᤃ ᤀᤠᤱᤃᤠ᤹ᤀᤣᤖᤥ॥ ᤀᤠᤱᤃᤠ᤹ ᤂᤧᤏᤡ᤹ ᤏᤠᤘᤠᤃᤧᤴ ᤆᤀᤡ᤺ᤳ ᤆᤥ᤺ᤰᤏᤡᤱᤗᤥ ᤜᤧᤰᤁᤩᤠᤱ ᤁᤶᤒᤪᤠᤱ ᤔᤧᤳᤏᤡᤱᤗᤥ. ᤀᤠᤱᤃᤠ᤹ ᤂᤧᤏᤡ᤹ ᤑᤠ᤹ᤏᤡᤱ ᤂᤧᤒᤩᤠᤱ ᤆᤥ᤺ᤰᤕᤢᤶᤓᤥ ᤐᤡᤏᤡᤱᤗᤥ॥

⁵ “ᤂᤧᤏᤡ᤹ ᤀᤠᤱᤃᤠ᤹ ᤜᤠ᤺ᤳᤏᤢ ᤕᤠᤵᤔᤡ ᤁᤧᤍᤱᤄᤡᤒᤣ᥅” ᤕᤜᤘᤣ ᤍᤠᤱᤒᤧᤸᤗᤧ ᤔᤏᤠᤜᤠ᤹ ᤐᤠᤴ ᤛᤣ᤺ᤴᤍᤥᤛᤢᤛᤡᤖᤥ. “ᤀᤠᤱᤃᤠ᤹ ᤜᤧᤰᤋᤱᤒᤠ ᤘᤣ᤹ ᤀᤠᤳᤋᤡᤴ ᤘᤠ᤹ᤒᤣ᥅

⁶ ᤁᤢᤓᤠ ᤔᤏᤠᤖᤧ ᤛᤢᤰᤘᤠᤀᤥᤏᤢ ᤛᤠᤶᤔᤩᤠᤱᤅᤡᤴ ᤔᤧᤗ᤺ᤳᤋᤢᤖᤥ. ᤜᤧᤰᤁᤩᤠᤱ ᤕᤢᤵᤐᤠᤴ ᤌᤠᤱᤍᤢᤖᤡᤀᤥ ᤔᤧᤎᤠᤱᤛᤢᤖᤥ. ᤂᤧᤱᤜᤠ᤹ᤖᤧ ᤛᤠᤶᤔᤩᤠᤱ ᤁᤧᤎᤰᤐᤠᤴ ᤁᤢᤏᤠᤶᤕᤠᤰ ᤔᤧᤒᤡᤖᤢᤀᤠᤱ ᤂᤧᤴ ᤏᤠᤘᤠᤀᤡᤳᤗᤠ ᤌᤰᤔᤠ ᤔᤧᤒᤠᤱᤄᤢᤖᤥ ᤂᤧᤒᤩᤠᤱ ᤛᤠᤶᤒᤥᤴ ᤔᤧᤓᤴᤇᤡᤱᤅᤠᤱ ᤂᤧᤴ ᤛᤧᤘᤠ ᤔᤧᤔᤧᤳᤋᤢᤖᤥ॥

⁷ ᤂᤧᤱᤜᤠ᤹ᤖᤧ ᤂᤧᤴ ᤂᤢᤴᤇᤡ᤹ ᤑᤰᤋᤠᤱᤅᤥ ᤔᤧᤒᤰᤂᤢᤀᤠᤱ ᤔᤧᤍᤣ᤹ᤖᤢᤖᤥ. ᤜᤧᤰᤁᤩᤠᤱ ᤂᤧᤴ ᤁᤢᤕᤢᤰᤏᤠᤀᤥ ᤔᤧᤕᤢᤰᤂᤢᤖᤥ. ᤂᤧᤒᤩᤠᤱ ᤂᤧᤴ ᤂᤧ᤹ᤕᤥ ᤋᤰᤐᤧᤳ ᤕᤧᤵᤗᤥ॥ ᤂᤧ᤹ᤕᤥᤏᤢ ᤂᤧᤴ ᤀᤠᤒᤠᤅᤣ ᤆᤳᤇᤡᤱᤔᤠ ᤐᤣ᤺ᤰᤔᤠ ᤔᤧᤛᤢᤰᤏᤧᤸᤗᤥ. ᤁᤢᤓᤠᤖᤧ ᤂᤧᤴ ᤐᤣᤗᤡ ᤑᤠᤰᤋᤢᤛᤠᤱ ᤂᤧᤸᤗᤧ ᤏᤢᤃᤵ ᤔᤧᤒᤡᤖᤢᤸᤗᤥ. ᤜᤧᤰᤁᤩᤠᤱ ᤁᤢᤍᤢᤰᤂᤣ ᤁᤢᤗᤠᤰᤂᤣᤗᤠᤶ ᤂᤧᤸᤗᤧ ᤛᤧ᤺ᤵᤔᤠᤀᤠᤱ ᤔᤧᤛᤢᤰᤋᤢᤸᤗᤥ॥

⁸ “ᤐᤡᤑᤩᤢᤱ ᤁᤧᤈᤥ᤺ᤰᤐᤠᤛᤣ. ᤁᤴ ᤐᤠ᤺ᤴᤏᤡᤴ ᤏᤡᤱᤘᤠ᤹ ᤀᤡ᤺ᤳᤋᤠᤶᤔᤧ᤹ᤀᤥ. ᤜᤧᤰᤁᤩᤠᤱ ᤕᤥᤎᤥ ᤔᤧᤸᤗ᤹ᤀᤣ ᤏᤡᤱᤘᤠ᤹ᤀᤥ ᤕᤢᤰᤂᤠᤶᤔᤧ᤹ᤀᤠᤱ ᤕᤠᤶᤛᤠᤶᤔᤥ ᤁᤳᤋᤠᤶᤔᤧ᤹ᤀᤥ॥

⁹ ᤀᤢᤴᤇᤥᤴ ᤀᤢᤴᤇᤥ᤺ᤴᤒᤠ ᤐᤠ᤺ᤴᤜᤠ᤹ ᤏᤡᤱᤘᤠ᤹ ᤗᤡᤱᤛᤠᤶᤔᤧ᤹ᤀᤥ. ᤀᤠᤱᤃᤠ᤹ ᤏᤡᤱᤘᤠ᤹ᤑᤢᤔᤠᤱᤀᤠ. ᤜᤧᤰᤁᤩᤠᤱ ᤘᤣ᤹ ᤀᤠᤳᤋᤡᤴᤏᤠᤱ ᤜᤥᤵᤗᤥ॥ ᤀᤠᤱᤃᤠ᤹ ᤏᤡᤱᤘᤠ᤹ᤑᤢᤔᤠᤱᤀᤠᤖᤥ. ᤀᤠᤱᤃᤠ᤹ ᤜᤧᤰᤋᤱᤒᤠ ᤘᤣ᤹ ᤜᤠ᤺ᤳᤋᤠᤱ ᤜᤥᤵᤗᤥ॥

¹⁰ ᤁᤢᤜᤣ᤺ᤰᤛᤡᤱᤔᤠᤀᤠᤱᤎᤥ ᤁᤢᤏᤢᤵᤔᤠ ᤌᤠᤖᤡᤰᤐᤠ. ᤂᤧᤶᤒᤩᤠᤱ ᤀᤢᤏᤠᤜᤢᤖᤡᤒᤠ ᤕᤧᤶᤔᤠᤱᤎᤥ ᤋᤠᤔᤠ ᤁᤧᤒᤥᤱᤒᤠ ᤕᤧᤶ ᤌᤠᤖᤡᤰᤐᤠ ᤐᤠ᤺ᤴᤜᤠ᤹ ᤂᤧᤏᤡ᤹ ᤔᤧᤵᤔᤠ ᤛᤢᤰᤏᤡᤱᤗᤥ॥ ᤀᤠᤱᤃᤠ᤹ ᤐᤠ᤺ᤳᤋᤢᤱ—ᤆᤥ᤺ᤰᤔᤠ ᤏᤡᤱᤘᤠ᤹ ᤆᤥᤃᤢᤱᤒᤠ ᤐᤠ᤺ᤴᤜᤠ᤹ ᤁᤧᤳᤗᤥ. ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤏᤡᤱᤘᤠ᤹ ᤁᤢᤀᤡᤛᤡᤰ ᤁᤧᤖᤧᤰ ᤆᤥᤃᤢᤱᤗᤥ॥

¹¹ ᤋ᤹ᤀᤡ ᤏᤠᤱᤃᤧᤴ ᤗᤧᤵᤛᤠᤱᤗᤠᤶ ᤀᤠᤱᤃᤠ᤹ ᤔᤏᤠᤎᤡᤰ ᤀᤢ᤺ᤳᤋᤢᤱᤗᤥ. ᤂᤧᤴ ᤛᤠᤘᤠᤃᤧᤶᤒᤠ ᤔᤢᤕᤠᤴ ᤁᤢᤀᤡᤛᤡᤰ ᤛᤢ᤺ᤰᤁᤠᤱ ᤕᤢᤖᤥ. ᤜᤧᤰᤁᤩᤠᤱ ᤀᤠᤱᤃᤠ᤹ ᤆᤥ᤺ᤰᤔᤠ ᤏᤡᤱᤘᤠ᤹ ᤆᤥᤃᤢᤱᤒᤠ ᤐᤠ᤺ᤴᤜᤠ᤹ ᤁᤧᤳᤋᤢᤖᤥ॥ ᤀᤠᤱᤃᤠ᤹ ᤌᤣ ᤆᤥ᤺ᤰᤔᤠ ᤏᤡᤱᤛᤣᤰ ᤆᤥᤃᤢᤱᤅᤠᤱ ᤘᤠ᤹. ᤀᤠᤱᤃᤠ᤹ ᤂᤧᤴ ᤁᤧᤖᤧᤰ ᤁᤧᤳᤋᤢᤱᤅᤣᤖᤥ॥

¹² “ᤜᤠᤍᤡᤱ ᤌᤰᤔᤠ ᤏᤡᤱᤘᤠ᤹ ᤁᤧᤃᤵᤐᤠᤛᤣ ᤜᤧᤰᤁᤩᤠᤱ ᤛᤠᤶᤕᤥᤏᤡᤔᤠᤗᤠᤶ ᤔᤠ᤺ᤱᤄᤠ ᤁᤧᤘᤠ᤹ᤒᤠ ᤔᤏᤠᤛᤣ. ᤀᤠᤱᤃᤠ᤹ ᤀᤠᤒᤠ᤺ᤴᤏᤡᤴ ᤏᤢᤖᤡᤰᤁᤠᤱ ᤂᤧᤵᤛᤧᤶᤔᤧ᤹ᤀᤥ॥

¹³ ᤀᤠᤱᤃᤠ᤹ ᤋᤥ᤺ᤴᤍᤥᤶᤒᤠ ᤕᤠ᤺ᤶᤒᤰ ᤆᤥ᤺ᤰᤔᤠ ᤕᤠᤖᤡᤵ ᤘᤠ᤹ᤀᤠᤖᤥ. ᤀᤠᤱᤃᤠ᤹ ᤀᤠᤛᤧᤴᤗᤵᤐᤡᤴ ᤔᤧᤛᤢᤏᤧᤸᤗᤥ॥ ᤀᤠᤱᤃᤠ᤹ ᤕᤖᤢᤛᤗᤧᤔ ᤕᤧᤰᤕᤰᤐᤠ ᤔᤏᤠᤜᤠ᤹ ᤛᤧ᤺ᤵᤋᤢᤱᤛᤡᤱᤗᤥ. ᤜᤧᤰᤁᤩᤠᤱ ᤀᤡᤛᤪᤠᤀᤡᤗᤧᤴ ᤔᤡᤱᤛᤥ ᤀᤡᤱᤎᤠᤱ ᤐᤡᤖᤢᤱᤗᤥ॥”