ᤕᤛᤤᤕᤠ 45 - LIFOTNTᤕᤜᤘᤣ ᤍᤠᤱᤒᤧᤸᤗᤧ ᤁᤥᤖᤣᤛᤧᤴ ᤔᤠᤱᤌᤥ᤺ᤰᤏᤠ ᤆᤥᤃᤢ 1 ᤕᤜᤘᤣ ᤍᤠᤱᤒᤧᤸᤗᤧ ᤁᤥᤖᤣᤛᤧᤴ ᤜᤠᤱ ᤐᤥᤱᤔᤠᤖᤧ ᤗᤠᤃᤡ ᤔᤠᤱᤌᤥ᤺ᤰᤏᤠ ᤆᤥᤃᤢᤀᤠᤱ ᤘᤠ᤹ᤖᤥ॥ ᤂᤢᤏᤧ᤹ ᤂᤧᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤏᤠ᤺ᤶᤔᤠᤛᤡᤖᤧ ᤗᤠᤃᤡ ᤕᤢᤰᤋᤡᤱ ᤆᤥᤃᤢᤀᤠᤱ ᤘᤠ᤹ᤖᤥ॥ ᤂᤢᤏᤧ᤹ ᤂᤧᤴ ᤜᤠᤱᤜᤠ᤹ᤖᤧ ᤂᤢᤴᤇᤡ᤹ ᤜᤢᤰᤁᤥᤗᤠᤶ ᤕᤢᤰ ᤏᤠᤵᤔᤠᤛᤡᤖᤧ ᤗᤠᤃᤡ ᤐᤠᤱᤄᤢᤖᤥ. ᤕᤜᤘᤣ ᤍᤠᤱᤒᤧᤸᤗᤧ ᤂᤧᤸᤗᤧ ᤁᤢᤗᤠᤃᤡ ᤕᤧᤰᤕᤰ ᤐᤠᤱᤈᤢᤶᤒᤠ ᤔᤠᤗᤠᤶᤎᤣ᤺ᤳᤜᤠ᤹ ᤔᤧᤛᤢᤒᤢᤴᤗᤥ॥ ᤕᤜᤘᤣ ᤍᤠᤱᤒᤧᤸᤗᤧ ᤁᤥᤖᤣᤛᤧᤴ ᤀᤰᤂᤣ ᤔᤧᤳᤋᤢᤖᤥ— 2 “ᤀᤠᤱᤃᤠ᤹ ᤂᤧᤏᤧ᤹ ᤁᤧᤍᤃᤠᤱ ᤁᤧᤍᤃᤠᤱ ᤐᤣ᤺ᤰᤁᤠᤖᤥ. ᤜᤧᤰᤁᤩᤠᤱ ᤌᤧᤃᤢᤜᤠ᤹ ᤗᤧᤵᤐᤧᤳ ᤋᤱᤄᤢᤱᤗᤥ॥ ᤕᤧᤰᤕᤰᤁᤥᤒᤠ ᤕᤶᤒᤠ ᤁᤠᤛᤠ ᤗᤠᤶᤎᤣ᤺ᤳᤜᤠ᤹ ᤀᤠᤱᤃᤠ᤹ ᤑᤕ᤺ᤵᤑᤕ᤺ᤵ ᤕ᤺ᤵᤛᤢᤱᤗᤥ. ᤂᤶᤒᤩᤠᤱ ᤑᤠᤱᤔᤏᤠᤒᤠ ᤑᤧᤴᤈᤣ᤹ᤜᤠ᤹ ᤆᤠᤰᤂᤰ ᤆᤠᤰᤂᤰ ᤂᤰᤋᤢᤱᤗᤥ॥ 3 ᤂᤠᤔᤠᤰᤔᤠᤍᤧᤴᤏᤥ ᤁᤧᤕᤢᤱᤒᤠ ᤏᤢ ᤜᤠ᤺ᤳᤗᤧᤀᤠᤱ ᤔᤧᤴᤏᤡᤛᤢᤶᤒᤠ ᤋᤧᤴᤏᤥ ᤁᤧᤘᤠ᤹ᤒᤠ ᤕᤠᤱᤛᤠᤁᤢᤴᤎᤣᤴ ᤂᤧᤏᤧ᤹ ᤐᤡᤏᤧᤖᤥ. ᤂᤧᤸᤗᤧᤆᤥᤃᤢᤸᤗᤧ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤠᤀᤠᤖᤥ. ᤀᤠᤱᤃᤠ᤹ᤀᤣ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤀᤠᤖᤥ. ᤜᤧᤰᤁᤩᤠᤱ ᤀᤠᤱᤃᤠ᤹ᤀᤣ ᤂᤧᤏᤧ᤹ ᤔᤡᤱᤗᤥ᤺ᤰᤏᤧᤀᤠᤱ ᤀᤢ᤺ᤳᤏᤧᤒᤠᤖᤥ ᤑᤠ᤹ᤀᤠᤱ ᤂᤧᤏᤧ᤹ ᤁᤢᤛᤡᤱ ᤁᤧᤏᤡ᤺ᤳᤋᤢᤖᤥ॥ 4 ᤀᤠᤱᤃᤠ᤹ ᤀᤠᤛᤧᤘᤠᤖᤥᤒᤠ ᤕᤠᤁᤢᤒ. ᤛᤣᤃᤢᤱᤒᤠ ᤀᤡᤛᤪᤠᤀᤡᤗᤖᤧ ᤁᤢᤗᤠᤃᤡ. ᤀᤠᤱᤃᤠ᤹ ᤔᤡᤱᤗᤥ᤺ᤰᤏᤧᤀᤠᤱ ᤀᤢ᤺ᤳᤏᤧᤒᤠᤖᤥ॥ ᤂᤧᤏᤧ᤹ ᤁᤢᤛᤡᤱ ᤁᤧᤴᤏᤡ᤺ᤳᤋᤠᤴᤇᤠᤱ ᤔᤡᤱᤛᤥ ᤀᤡᤱᤎᤠᤱ ᤐᤡᤏᤧᤀᤠᤱ ᤘᤠ᤹ᤖᤥ॥ 5 “ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤠᤀᤠᤖᤥ. ᤀᤠᤱᤃᤠ᤹ᤏᤢ᤺ᤸᤗᤧ ᤘᤣ᤹ ᤏᤡᤱᤘᤠ᤹ᤑᤢᤔᤠᤱ ᤀᤣ᤺ᤴᤏᤠᤱ ᤜᤥᤵᤗᤥ. ᤂᤧᤏᤧ᤹ ᤀᤠᤱᤃᤠ᤹ ᤁᤧᤴᤍᤠ᤺ᤰᤋᤠᤱᤅᤡᤴᤇᤠᤱ ᤁᤧᤎᤢᤶᤒᤠ ᤆᤥ᤺ᤰᤏᤧᤀᤠᤱ ᤘᤠ᤹ᤖᤥ॥ 6 ᤜᤧᤰᤁᤣ᤺ᤸᤗᤧ ᤏᤠᤱᤃᤧᤴ ᤐᤡᤛᤠᤱᤅᤠᤱᤎᤥ ᤏᤠᤶᤎᤠ ᤌᤠᤖᤡᤰ ᤔᤏᤠᤜᤠ᤹ᤖᤧ ᤀᤠᤱᤃᤠ᤹ᤖᤰ ᤏᤡᤱᤘᤠ᤹ᤑᤢᤔᤠᤱᤀᤠ ᤘᤣ᤹ ᤜᤠ᤺ᤳᤋᤠᤱ ᤜᤥᤵ ᤑᤠ᤹ᤀᤠᤱ ᤁᤢᤛᤡᤱ ᤔᤧᤏᤡ᤺ᤳᤋᤢᤖᤖᤥ. ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤠᤀᤠ. ᤀᤠᤱᤃᤠ᤹ᤏᤢ᤺ᤸᤗᤧ ᤘᤣ᤹ ᤜᤠ᤺ᤳᤋᤠᤱ ᤜᤥᤵᤗᤥ॥ 7 ᤀᤠᤱᤃᤠ᤹ ᤀᤥ᤺ᤳᤋᤡ᤺ᤴ ᤆᤥᤃᤢᤱᤗᤥ. ᤜᤧᤰᤁᤩᤠᤱ ᤂᤠᤔᤠᤰᤔᤧᤴ ᤏᤠᤘᤠᤃᤧᤴ ᤆᤀᤡ᤺ᤳ ᤏᤧᤛ᤻ᤛᤢᤱᤗᤥ॥ ᤀᤠᤱᤃᤠ᤹ ᤏᤢ᤹ᤔᤠᤍᤠᤔᤠ ᤏᤢ ᤔᤧᤰᤔᤠᤛᤡᤔᤠᤴ ᤏᤧᤵᤔᤠᤱ ᤋᤠᤖᤢᤱᤗᤥ. ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤧᤸᤗᤧᤀᤣ ᤁᤴ ᤁᤧᤖᤧᤰ ᤕᤠ᤺ᤶᤒᤰᤜᤠ᤹ ᤆᤥᤃᤢᤱᤗᤥ॥ 8 ᤋᤠᤱᤛᤠᤱᤒᤠᤀᤣ. ᤛᤠᤶᤕᤥᤏᤡᤔᤠᤴ ᤘᤜᤡᤳ ᤁᤢᤀᤡᤛᤡᤰ ᤌᤠᤛᤧ᤹ᤀᤥ. ᤂᤧᤴ ᤋᤠ᤺ᤰᤔᤠᤖᤧ ᤗᤠᤃᤡ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤸᤗᤧ ᤁᤢᤶᤒᤪᤠ᤺ᤴ ᤜᤶᤒᤠ᤺ᤱ ᤑᤠ᤺ᤰᤂᤢᤖᤖᤥ॥ ᤜᤧᤰᤁᤩᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤛᤧᤴᤗᤵ ᤏᤢ ᤛᤠᤶᤕᤥᤒᤠ ᤕᤠ᤺ᤶᤒᤰᤁᤡᤴ ᤐᤥᤖᤖᤥ. ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤴ ᤕᤠ᤺ᤶᤒᤰᤁᤡᤴ ᤆᤥᤃᤢᤱᤒᤠᤖᤥ॥” ᤏᤠᤘᤠᤃᤧᤴ ᤆᤀᤡ᤺ᤳ ᤏᤢ ᤛᤠᤵᤔᤢ᤺ᤴᤎᤢᤶᤗᤧ ᤏᤡᤱᤘᤠ᤹ᤑᤢᤔᤠᤱ 9 “ᤀᤠᤒᤠᤅᤣ ᤁᤢᤏᤠᤘᤠᤃᤧᤴ ᤆᤀᤡ᤺ᤳ ᤁᤧᤈᤥ᤺ᤰᤐᤧᤴᤏᤢ ᤂᤧᤔᤠ᤹ ᤁᤧᤈᤥ᤺ᤰᤐᤧᤱᤃ ᤆᤡ᤺ᤳᤋᤧᤛᤩᤧᤖᤥ. ᤂᤧᤱᤃ ᤂᤠᤶᤒᤠᤱᤅᤥ ᤁᤧᤏᤧᤒᤠ ᤑᤢᤈᤡᤰ ᤂᤧᤸᤗᤧᤰᤜᤠ᤹ᤀᤥ ᤗᤳᤇᤠ ᤁᤢᤄᤧᤂᤧᤸᤗᤧᤰ ᤖᤰᤗᤥ॥ ᤛ᤹ᤔᤏᤠᤒᤠ ᤂᤠᤶᤔᤡᤸᤗᤧ ᤁᤥᤶᤓᤠᤗᤩᤠᤴ ‘ᤂᤧᤏᤧ᤹ ᤌᤧᤔᤠ ᤁᤧᤈᤥᤃᤢᤖ ᤁᤧᤒᤳ᥅’ ᤑᤠ᤹ᤀᤠᤱ ᤛᤣ᤺ᤴᤍᤥᤛᤢᤒᤡ᥅ ᤑᤢᤈᤡᤰᤁᤡᤸᤗᤧ ᤀᤠᤱᤃᤠ᤹ ᤁᤧᤈᤥ᤺ᤰᤐᤧᤸᤗᤧ ᤁᤢᤜᤢᤰᤆᤥ ᤑᤧ᤹ ᤑᤠ᤹ᤀᤠᤱ ᤐᤠ᤺ᤳᤋᤢᤒᤡ᥅ 10 ᤀᤰᤂᤣ ᤁᤧᤒᤠ᤺ᤵᤐᤧᤱᤃ ᤆᤡ᤺ᤳᤋᤧᤛᤩᤧᤖᤥ. ᤂᤧᤸᤗᤧ ᤁᤢᤶᤒᤠ ᤔᤧᤳᤋᤢᤖᤥ. ‘ᤂᤧᤏᤧ᤹ ᤜᤠᤳ ᤛᤠᤃᤧᤘᤠ᤺ᤴᤍᤢᤒᤣ᥅’ ᤀᤡᤃᤪ ᤁᤢᤶᤔᤠ ᤔᤧᤳᤋᤢ. ‘ᤂᤧᤏᤧ᤹ ᤌᤣ ᤛᤠᤃᤧᤃᤳᤋᤢᤒᤣ᥅’ 11 “ᤀᤡᤛᤪᤠᤀᤡᤗᤒᤠ ᤛᤣᤛᤣᤒᤠ ᤏᤡᤱᤘᤠ᤹ᤑᤢᤔᤠᤱ. ᤂᤧᤱᤜᤠ᤹ ᤏᤠᤘᤠᤃᤧᤴ ᤆᤀᤡ᤺ᤳ ᤁᤧᤈᤥ᤺ᤰᤐᤠ ᤏᤡᤱᤘᤠ᤹ᤑᤢᤔᤠᤱ. ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤖᤥ— ‘ᤂᤧᤏᤧ᤹ ᤋᤠ᤺ᤴᤍᤡ ᤐᤥᤱᤔᤠ ᤁᤧᤀᤡ᤺ᤵᤐᤠ ᤐᤠ᤺ᤴᤏᤡᤸᤗᤧ ᤁᤢᤕᤠ᤺ᤶᤒᤣ᤹ᤀᤥ ᤛᤣ᤺ᤴᤃᤧᤍᤥᤀᤠᤒᤡ᥅ ᤀᤠᤱᤃᤠ᤹ ᤀᤠᤛ᤻ᤛᤠᤜᤠ᤹ ᤏᤢ ᤀᤠᤜᤢᤰᤁᤡᤸᤗᤧ ᤆᤥᤃᤢᤒᤠ ᤀᤠᤕᤠ᤺ᤶᤒᤰᤁᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤔᤢᤖᤠ ᤁᤧᤔᤧᤳᤋᤠᤒᤠᤒᤡ᥅ ᤂᤧᤴ ᤛᤣ᤺ᤴᤗᤠᤵᤔᤠ ᤁᤧᤕᤢᤰ ᤜᤥᤵᤗᤥ᥄ 12 ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤀᤠᤱᤃᤠ᤹ᤀᤣ ᤆᤥᤃᤢᤱᤒᤠᤖᤥ. ᤜᤧᤰᤁᤩᤠᤱ ᤂᤧ᤹ᤕᤥ ᤔᤏᤠᤜᤠ᤹ ᤀᤠᤱᤃᤠ᤹ ᤏᤠᤘᤠᤃᤧᤴ ᤆᤀᤡ᤺ᤳ ᤆᤥᤃᤢᤱᤛᤡᤱᤒᤠᤖᤥ॥ ᤀᤠᤱᤃᤠ᤹ ᤀᤠᤜᤢᤰᤁᤡᤸᤗᤧᤀᤣ ᤋᤠᤱᤛᤠᤱᤒᤧᤴ ᤂᤡᤱᤄᤢᤱᤒᤠᤖᤥ. ᤂᤧᤒᤩᤠᤱ ᤂᤧᤳᤌᤥ ᤁᤧᤒᤵᤐᤠ ᤁᤧᤖᤧᤰ ᤂᤣ᤺ᤶᤛᤡᤰᤐᤠᤜᤠ᤹ ᤀᤠᤱᤃᤠ᤹ᤀᤣ ᤀᤠᤒᤠᤅᤣ ᤀᤠᤒᤠᤅᤣ ᤋᤧᤴᤏᤥ ᤋᤱᤄᤢᤱ ᤑᤳᤇᤢᤱᤛᤡᤱᤒᤠᤖᤥ॥ 13 ᤁᤥᤖᤣᤛᤧᤴ ᤀᤠᤱᤃᤠ᤹ ᤀᤠᤛᤠᤶᤕᤥᤒᤠ ᤕᤠ᤺ᤶᤒᤰᤁᤡᤴ ᤁᤧᤳᤗ ᤑᤠ᤹ᤀᤠᤱ ᤑᤥ᤺ᤰᤂᤢᤱᤗᤥ. ᤀᤠᤱᤃᤠ᤹ ᤂᤧᤸᤗᤧ ᤁᤧᤖᤧᤰ ᤁᤢᤗᤠᤶᤜᤠ᤹ ᤋᤥ᤺ᤴᤍᤥᤶᤒᤠ ᤆᤥᤃᤢᤱᤗᤥ॥ ᤂᤧᤸᤗᤧ ᤀᤠᤱᤃᤠ᤹ ᤀᤠᤕᤧᤰᤕᤰᤁᤡᤴ ᤕᤠᤶᤔᤥ ᤆᤥᤃᤢᤖᤥ. ᤜᤧᤰᤁᤩᤠᤱ ᤔᤧᤍᤧᤶᤛᤢ ᤔᤧᤍᤣ᤹ᤖᤢᤛᤡᤒᤠ ᤁᤧᤖᤧᤰ ᤀᤠᤔᤠᤏᤠᤜᤠ᤹ ᤂᤧᤸᤗᤧ ᤗᤧᤖᤢᤛᤡᤖᤥ. ᤁᤖ ᤁᤢᤔᤧᤸᤗᤢᤱ ᤜᤢᤅᤢᤀᤠᤱᤃ ᤔᤣ᤺ᤸᤗᤥ. ᤁᤢᤈᤧᤴᤏᤠᤱ ᤔᤧᤍᤠ᤺ᤰᤋᤢᤸᤗᤥ.’” ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤖᤥ॥ 14 ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤖᤥ— “ᤔᤡᤛᤪ ᤗᤠᤈᤣ᤹ᤀᤥ ᤁᤧᤒᤥ᤺ᤰᤐᤠ ᤁᤢᤈᤠᤴ ᤏᤢ ᤁᤢᤛ ᤗᤠᤈᤣ᤹ᤒᤠ ᤕᤠᤱᤛᤠᤁᤢᤴᤎᤣᤴ ᤂᤧᤏᤧ᤹ ᤁᤧᤕᤠᤱᤛᤠᤁᤢᤴᤎᤣ ᤐᤥᤱᤗᤥ॥ ᤜᤧᤰᤁᤩᤠᤱ ᤛᤣᤒᤠᤒᤠ ᤁᤢᤗᤡᤱᤃᤧᤴ ᤁᤣ᤺ᤶᤒ ᤁᤣ᤺ᤶᤒᤠ ᤔᤏᤠᤜᤠ᤹ ᤂᤧᤏᤧ᤹ ᤁᤧᤕᤥ᤺ᤃ᤻ᤒᤠ ᤔᤧᤒᤥᤱᤗᤥ॥ ᤑᤧᤴᤈᤣ᤹ ᤌᤰᤁᤪᤱᤅᤡᤸᤗᤧ ᤀᤡᤔᤧᤄᤣ᤺ᤰᤂᤢᤛᤡᤀᤠᤱ ᤂᤧᤱᤜᤠ᤹ ᤁᤧᤀᤣᤃᤠᤱ ᤔᤧᤓᤧᤴᤗᤥ. ᤂᤧᤱᤜᤠ᤹ᤖᤧ ᤂᤧᤏᤧ᤹ ᤛᤧᤘᤠ ᤁᤧᤶᤔᤧᤳ ᤜᤧᤰᤁᤩᤠᤱ ᤀᤰᤂᤣ ᤐᤠ᤺ᤵᤔᤠ ᤔᤧᤍᤧᤸᤗᤥ॥ ‘ᤏᤡᤱᤘᤠ᤹ᤑᤢᤔᤠᤱᤅᤡᤴ ᤂᤧᤏᤧ᤹ᤏᤢ ᤘᤠ᤹ᤖᤥ. ᤂᤢᤏᤧ᤹ᤖᤰ ᤏᤡᤱᤘᤠ᤹ᤑᤢᤔᤠᤱᤗᤥ॥’” 15 ᤛᤧᤰᤂᤠᤀᤣ ᤂᤧᤏᤧ᤹ ᤏᤡᤱᤘᤠ᤹ᤑᤢᤔᤠᤱᤏᤧᤖᤥ. ᤂᤧᤏᤧ᤹ ᤏᤡᤔᤧᤴᤎᤠ᤺ᤵᤔᤏᤠᤒᤠ ᤋᤧᤴᤏᤥ ᤁᤧᤕᤢᤱᤗᤥ. ᤂᤧᤏᤧ᤹ᤃ ᤀᤡᤛᤪᤠᤀᤡᤗᤒᤠ ᤛᤧᤴᤗᤵᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤏᤧᤖᤥ॥ 16 ᤏᤠᤘᤠᤀᤡᤳᤗᤠ ᤁᤧᤈᤥ᤺ᤰᤐᤠ ᤁᤧᤖᤧᤰᤗᤧ ᤂᤢᤴᤇᤡ᤹ ᤏᤠᤖᤠ ᤛᤡᤷᤔ᤺ᤱ ᤗ᤹ᤖᤥ ᤜᤧᤰᤁᤩᤠᤱ ᤂᤧᤱᤜᤠ᤹ ᤛᤡᤖᤡᤱᤔᤔᤥ ᤔᤧᤎᤠᤖᤥ. ᤂᤧᤱᤜᤠ᤹ ᤁᤧᤖᤧᤰ ᤛᤥᤖᤡᤰ ᤁᤢᤏᤠᤔᤧᤴᤇᤠ᤹ ᤔᤧᤒᤥᤱᤗᤥ॥ 17 ᤁᤖ ᤕᤜᤘᤣ ᤍᤠᤱᤒᤧᤸᤗᤧ ᤀᤡᤛᤪᤠᤀᤡᤗᤧᤴ ᤛᤍᤠᤍᤡᤱ ᤛᤧᤴᤗᤵᤗᤠᤶᤒᤠ ᤋᤠᤱᤛᤧ᤺ᤵᤋᤢᤀᤠᤱ ᤘᤠ᤹ᤖᤥ. ᤂᤧᤵᤔᤥ ᤁᤧᤕᤢᤱᤒᤠᤜᤠ᤹ ᤀᤠᤓᤧᤸᤗᤧᤀᤠᤱ ᤛᤡᤖᤡᤱᤔᤔᤠ ᤔᤧᤒᤥᤱᤏᤧᤸᤗᤥ॥ 18 ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤛᤠᤱᤃᤪᤠᤶᤐᤣᤍᤠᤱᤅᤡᤴ ᤆᤥᤃᤢᤖᤥ. ᤂᤢᤏᤧ᤹ᤀᤣ ᤏᤡᤱᤘᤠ᤹ᤑᤢᤔᤠᤱᤗᤥ᥄ ᤂᤢᤏᤧ᤹ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤏᤠᤘᤠᤃᤧᤴ ᤆᤀᤡ᤺ᤳ ᤏᤧᤛ᤻ᤛᤢᤀᤠᤱ ᤆᤥᤃᤢᤖᤥ. ᤂᤢᤏᤧ᤹ ᤂᤧᤴ ᤛᤍᤠᤍᤡᤱ ᤁᤧᤒᤵᤐᤠ ᤏᤢ ᤀᤠᤓᤧᤸᤗᤧᤛᤠᤱ ᤁᤧᤘᤠ᤹ᤒᤠ ᤆᤥᤃᤢᤖᤥ॥ ᤂᤢᤏᤧ᤹ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤔᤢᤖᤧᤰ ᤂᤠᤖᤧᤰᤐᤠ ᤌᤣᤀᤠᤱ ᤁᤧᤜᤥᤵᤐᤠ ᤔᤣ᤺ᤴᤗᤥ ᤁᤖ ᤔᤧᤴᤇᤠᤶ ᤕᤠᤵᤔᤡᤖᤧ ᤕᤢᤱᤔᤠ ᤘᤠ᤹ᤔᤠᤍᤧᤴ ᤆᤥᤃᤢᤖᤥ॥ ᤂᤢᤏᤧ᤹ ᤀᤠᤒᤠᤅᤣᤀᤣ ᤀᤰᤁᤣ ᤐᤠ᤺ᤳᤋᤢᤖᤥ— “ᤕᤜᤘᤣ ᤍᤠᤱᤒᤠ ᤀᤠᤱᤃᤠ᤹ᤀᤣᤖᤥ ᤘᤣ᤹ ᤜᤠ᤺ᤳᤋᤠᤱ ᤏᤡᤱᤘᤠ᤹ᤑᤢᤔᤠᤱ ᤜᤥᤵᤗᤥ॥ 19 ᤂᤠᤔᤠᤰᤔᤠ ᤗᤠᤈᤣ᤹ᤀᤥ ᤀᤠᤳᤋᤡᤗᤠᤶᤔᤠᤱ ᤛᤫᤠ᤺ᤳ ᤐᤠᤖᤠᤱᤒᤠ ᤜᤥᤵᤗᤥ. ‘ᤀᤠᤱᤃᤠ᤹ ᤌᤣᤏᤠᤎᤣ ᤀᤠᤃᤥ᤺ᤳᤋᤧᤶᤔᤧ᤹’ ᤑᤠ᤹ᤀᤠᤱ ᤕᤠᤁᤢᤒᤖᤧ ᤁᤢᤔᤢ᤹ᤀᤡᤍᤠᤱᤛᤠᤜᤠ᤹ ᤔᤧᤔᤧᤳᤋᤢᤱᤛᤡᤱᤅᤡᤸᤗᤥ॥ ᤀᤠᤱᤃᤠ᤹. ᤕᤜᤘᤣ ᤍᤠᤱᤒᤠᤴ ᤛᤧᤰᤂᤠ ᤐᤠ᤺ᤳᤋᤠᤖᤥ. ᤀᤠᤱᤃᤠ᤹ ᤁᤧᤘᤠ᤹ᤒᤠ ᤐᤠ᤺ᤴᤜᤠ᤹ ᤀᤢᤘᤠ ᤆᤥᤃᤢᤱᤗᤥ॥” ᤕᤜᤘᤣ ᤍᤠᤱᤒᤧᤴ ᤏᤢ ᤒᤣᤒᤡᤗᤥᤏᤒᤠ ᤏᤠᤘᤠᤀᤡᤳᤗᤠᤜᤠ᤹ 20 “ᤂᤧᤏᤡ᤹ ᤁᤧᤖᤧᤰ ᤆᤢᤵᤛᤠᤶᤔᤧ᤹ᤀᤠᤱ ᤋᤩᤧᤶᤔᤧ᤹ᤀᤥ. ᤛᤥᤛᤥᤖᤡᤰ ᤏᤡ᤺ᤳᤋᤠᤱ ᤋᤩᤧᤶᤔᤧ᤹ᤀᤥ. ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤁᤧᤍᤠᤱᤒᤠ ᤁᤧᤕᤠ᤺ᤰᤐᤠ ᤛᤢᤘᤠᤱᤛᤣ᥄ ᤛᤡᤱᤔᤢ᤺ᤳ ᤏᤠᤘᤠᤀᤡᤳᤗᤠᤜᤠ᤹ ᤁᤧᤒᤱᤒᤠᤀᤠᤱ ᤁᤧᤘᤠ᤹ᤒᤠᤜᤠ᤹. ᤜᤧᤰᤁᤩᤠᤱ ᤕᤠᤵᤔᤡ ᤋᤠᤱᤛᤧ᤺ᤵᤔᤠ ᤔᤧᤴᤇᤢᤰᤔᤏᤠᤒᤠ ᤔᤠᤱᤜᤠ᤹ ᤐᤣᤗᤡ ᤁᤧᤓᤠᤰᤐᤠᤜᤠ᤹ ᤌᤣᤀᤠᤱ ᤔᤧᤴᤏᤡᤶᤏᤠᤒᤠ ᤔᤧᤈᤥᤰᤗᤥ॥ 21 ᤐᤥᤱᤔᤠ ᤁᤧᤀᤡ᤺ᤵᤐᤠ ᤐᤠ᤺ᤴᤜᤠ᤹ ᤐᤠ᤺ᤳᤋᤧᤶᤔᤧ᤹ᤀᤥ. ᤂᤧᤴ ᤀᤥᤛᤣ᤺ᤴᤎᤠᤱ ᤆᤥᤃᤧᤶᤔᤧ᤹ᤀᤥ॥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤀᤠᤒᤠᤅᤣ ᤐᤠᤴ ᤔᤧᤍᤱᤄᤢᤖᤖᤥ. ᤕᤖᤡᤰ ᤋᤱᤒᤣ ᤋᤃᤡ ᤁᤴ ᤐᤠ᤺ᤴᤏᤡᤴ ᤜᤠ᤺ᤳᤗᤧ ᤐᤠ᤺ᤳᤋᤢᤀᤠᤱ ᤘᤕᤧᤒᤣ᥅ ᤌᤣ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤧᤸᤗᤧᤀᤣ ᤔᤣ᤺ᤶᤒᤡ᥅ ᤀᤠᤱᤃᤠ᤹ᤏᤢ᤺ᤸᤗᤧ ᤘᤣ᤹ ᤜᤠ᤺ᤳᤋᤠᤱ ᤏᤡᤱᤘᤠ᤹ᤑᤢᤔᤠᤱ ᤜᤥᤵᤗᤥ॥ ᤛᤠᤶᤕᤥᤒᤠ ᤏᤡᤱᤘᤠ᤹ᤑᤢᤔᤠᤱ ᤏᤢ ᤛᤧᤴᤗᤵᤍᤠᤱᤒᤠ. ᤀᤠᤱᤃᤠ᤹ᤏᤢ᤺ᤸᤗᤧ ᤘᤣ᤹ ᤜᤠ᤺ᤳᤋᤠᤱ ᤜᤥᤵᤗᤥ॥ 22 “ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤸᤗᤧ ᤁᤢᤕᤠᤀᤥ ᤁᤧᤕᤢᤱᤒᤠᤛᤣ. ᤀᤠᤱᤃᤠ᤹ ᤗᤧᤵᤔᤠᤱ ᤜᤡᤀᤠᤛᤡᤶᤔᤧ᤹ᤀᤥ. ᤜᤧᤰᤁᤩᤠᤱ ᤛᤧᤴᤗᤵ ᤂᤥᤛᤧᤶᤔᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤏᤡᤱᤘᤠ᤹ᤑᤢᤔᤠᤱᤀᤠᤖᤥ ᤂᤧᤒᤩᤠᤱ ᤘᤣ᤹ ᤜᤠ᤺ᤳᤋᤠᤱ ᤜᤥᤵᤗᤥ॥ 23 ᤀᤠᤱᤃᤠ᤹ ᤀᤠᤒᤠᤅᤣ ᤔᤠᤱᤜᤧᤰ ᤆᤥᤃᤢᤱᤅᤠᤱ ᤘᤠ᤹ᤀᤠᤖᤥ. ᤁᤧᤖᤧᤰ ᤐᤠ᤺ᤴᤜᤠ᤹ ᤁᤢᤍᤥ᤺ᤵᤔᤠᤀᤠᤱ ᤀᤠᤱᤃᤠ᤹ ᤐᤠ᤺ᤳᤋᤢᤱᤅᤠᤱ ᤘᤠ᤹ᤀᤠᤖᤥ. ᤂᤧᤴ ᤐᤠ᤺ᤴᤜᤠ᤹ ᤕᤠᤶᤔᤥ ᤜᤏᤧ ᤔᤧᤏᤢ᤺ᤰᤁᤠᤸᤗᤥ॥ ᤁᤧᤖᤧᤰ ᤔᤧᤴᤇᤠᤶ ᤕᤠᤵᤔᤡ ᤔᤧᤍᤠᤀᤠᤱ ᤀᤠᤍᤃᤡ ᤌᤢᤱᤒᤥᤜᤈ᤹ ᤔᤧᤕᤢᤱᤗᤥ॥ ᤁᤧᤖᤧᤰᤗᤧ ᤀᤠᤱᤃᤠ᤹ ᤀᤠᤔᤡᤱᤅᤥ ᤔᤠᤱᤜᤧᤰ ᤔᤧᤈᤥᤃᤢᤖᤥ॥ 24 “ᤀᤠᤱᤃᤠ᤹ ᤀᤠᤕᤠ᤺ᤶᤒᤣᤀᤥ ᤂᤧᤱᤜᤠ᤹ᤖᤧ ᤔᤧᤒᤠ᤺ᤳᤋᤢᤖᤥ. ‘ᤕᤜᤘᤣ ᤍᤠᤱᤒᤠᤀᤥᤖᤰ ᤛᤠᤶᤕᤥᤒᤠ ᤏᤢ ᤔᤢᤰᤛᤠᤶ ᤘᤠ᤹ᤖᤥ॥’” ᤂᤢᤏᤧ᤹ ᤁᤢᤍᤰᤗᤧᤱᤘᤠᤀᤥ ᤁᤢᤛᤠᤰᤁᤧᤴ ᤁᤧᤒᤥᤰᤐᤠᤜᤠ᤹ ᤁᤧᤖᤧᤰ ᤂᤢᤏᤧ᤹ᤀᤥᤀᤣ ᤔᤧᤍᤠᤖᤥ. ᤜᤧᤰᤁᤩᤠᤱ ᤛᤡᤖᤡᤱᤔᤔᤥ ᤔᤧᤎᤠᤖᤥ॥ 25 ᤁᤖ ᤕᤜᤘᤣ ᤍᤠᤱᤒᤠᤀᤥᤀᤣ ᤀᤡᤛᤪᤠᤀᤡᤗᤒᤠ ᤁᤧᤖᤧᤰ ᤌᤠ᤺ᤰᤜᤠ᤹ ᤛᤠᤶᤕᤥᤒᤠ ᤂᤥᤔᤧᤍᤧᤳᤗᤥ. ᤜᤧᤰᤁᤩᤠᤱ ᤂᤧᤱᤜᤠ᤹ ᤔᤧᤛ᤺ᤳᤋᤠᤱ ᤔᤡᤔᤡᤍᤡᤱ ᤔᤧᤒᤡᤀᤠᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.