ᤕᤛᤤᤕᤠ 44 - LIFOTNTᤕᤜᤘᤣ ᤍᤠᤱᤒᤧᤸᤗᤧ ᤀᤡᤛᤪᤠᤀᤡᤗᤧᤴ ᤛᤣᤃᤢ᤹ 1 ᤕᤜᤘᤣ ᤍᤠᤱᤒᤧᤸᤗᤧ ᤀᤰᤁᤣ ᤐᤠ᤺ᤳᤋᤢᤖᤥ. “ᤁᤖ ᤀᤠᤸᤗ ᤀᤠᤛᤧᤘᤠᤖᤥᤒᤠ ᤕᤠᤁᤢᤒᤣ. ᤀᤠᤱᤃᤠ᤹ ᤛᤣ᤺ᤰᤏᤧᤒᤠ ᤀᤡᤛᤪᤠᤀᤡᤗᤀᤣ. ᤛᤡᤱᤛᤡᤱ ᤕᤧᤰᤕᤧᤰᤁᤠᤱ ᤂᤧᤵᤛᤧ᤹ᤀᤥ. 2 ᤂᤧᤏᤧ᤹ ᤁᤧᤈᤥ᤺ᤰᤐᤠ. ᤂᤧᤏᤧ᤹ ᤁᤧᤶᤔᤠᤖᤧ ᤁᤢᤛᤠᤵᤐᤥ᤺ᤰᤁᤥ ᤁᤧᤈᤥ᤺ᤰᤐᤠ ᤜᤧᤰᤁᤩᤠᤱ ᤂᤧᤏᤧ᤹ ᤁᤧᤓᤠ᤹ᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤁᤣ ᤐᤠ᤺ᤳᤋᤢᤖᤥ— ᤀᤠᤛᤧᤘᤠᤖᤥᤒᤠ ᤕᤠᤁᤢᤒᤣ. ᤀᤠᤱᤃᤠ᤹ ᤛᤣ᤺ᤰᤏᤧᤒᤠ ᤕᤛᤢᤖᤢᤴᤏᤣ. ᤂᤧᤏᤧ᤹ ᤔᤧᤃᤡᤛᤧᤴᤏᤧ᤹ᤀᤥ॥ 3 ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤁᤧᤜᤣᤒᤠ ᤂᤠᤶᤒᤠᤱᤅᤥ ᤆᤫᤠ᤺ᤳ ᤏᤢ ᤁᤢᤜᤣᤍᤩᤠ᤹ ᤂᤠᤶᤒᤣ᤺ᤰᤁᤥ ᤘᤜ᤺ᤱᤜᤠ᤹ ᤁᤢᤱ ᤕᤢᤖ ᤕᤠ᤺ᤴᤍᤢᤱᤗᤥ॥ ᤀᤠᤱᤃᤠ᤹ ᤂᤧᤏᤧ᤹ ᤁᤧᤎᤠ᤺ᤰ ᤛᤶᤎᤠᤱ ᤀᤠᤕᤠᤶᤛᤠᤶᤔᤡᤴ ᤐᤠᤱᤄᤢᤱᤗᤥ. ᤜᤧᤰᤁᤩᤠᤱ ᤁᤧᤛᤠᤕᤥᤒᤥᤖᤠᤜᤠ᤹ ᤜᤠᤱᤘᤠᤃᤧᤴ ᤔᤢ᤹ᤀᤡᤛᤠᤶ ᤐᤡᤖᤢᤱᤛᤡᤱᤗᤥ॥ 4 ᤂᤧᤱᤜᤠ᤹ ᤏᤧᤏᤧᤒᤠᤍᤧᤴᤏᤥ ᤁᤧᤗᤡᤱᤒᤠ ᤕᤠᤴ ᤜᤧᤰᤁᤣ ᤔᤧᤗ᤹ᤖᤥ. ᤆᤫᤠ᤺ᤳ ᤗᤠᤱᤃᤧᤄᤣ᤺ᤰᤐᤠ ᤘᤜ᤺ᤱ ᤐᤣᤛᤠᤱ ᤁᤧᤗᤡᤱᤒᤠ ᤐᤥᤖᤥ᤺ᤰᤛᤡᤱ ᤜᤧᤰᤋᤱᤒᤠ ᤔᤧᤒᤥᤱᤗᤥ॥ 5 ᤁᤢᤓᤠᤖᤧ ᤔᤧᤒᤠ᤺ᤳᤋᤢᤖᤥ. ‘ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤏᤠᤀᤠᤖᤥ॥’ ᤘᤣ᤹ᤀᤡᤸᤗᤧ ᤐᤠ᤺ᤳᤋᤢᤖᤥ. ‘ᤀᤠᤱᤃᤠ᤹ ᤕᤠᤁᤢᤒᤖᤧ ᤁᤢᤎᤠ᤺ᤰᤛᤠᤀᤠᤖᤥ॥’ ᤁᤢᤓᤠᤖᤧ ᤂᤢᤴᤇᤡ᤹ ᤜᤢᤰᤁᤥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤡᤱ ᤔᤧᤛᤠᤵᤋᤢᤖᤥ. ᤜᤧᤰᤁᤩᤠᤱ ᤀᤡᤛᤪᤠᤀᤡᤗᤖᤧ ᤁᤢᤔᤡᤱᤅᤡᤴ ᤀᤠᤒᤠᤅᤣ ᤂᤢᤴᤇᤡ᤹ᤀᤡᤴ ᤜᤧᤰᤁᤣ ᤔᤡᤱ ᤔᤧᤗᤥ᤺ᤰᤂᤢᤖᤥ॥” ᤘᤣ᤹ ᤏᤡᤱᤘᤠ᤹ᤑᤢᤔᤠᤱ ᤜᤥᤵ 6 “ᤀᤡᤛᤪᤠᤀᤡᤗᤒᤠ ᤐᤕᤶ ᤕᤶᤒᤠ ᤜᤠᤱ ᤛᤧᤴᤗᤵᤍᤠᤱᤒᤠ ᤜᤧᤰᤁᤩᤠᤱ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤁᤣ ᤐᤠ᤺ᤳᤋᤢᤖᤥ— ᤀᤠᤱᤃᤠ᤹ ᤋᤃᤡᤒᤠ ᤏᤢ ᤀᤣᤃᤠᤱᤒᤠ ᤗᤳᤇᤠᤖᤰ ᤏᤡᤱᤘᤠ᤹ᤑᤢᤔᤠᤱᤀᤠᤖᤥ. ᤀᤠᤱᤃᤠ᤹ᤏᤢ᤺ᤸᤗᤧ ᤘᤣ᤹ ᤏᤡᤱᤘᤠ᤹ᤑᤢᤔᤠᤱ ᤜᤠ᤺ᤳᤋᤠᤱ ᤜᤥᤵᤗᤥ॥ 7 ᤀᤠᤱᤃᤠ᤹ ᤆᤥᤃᤢᤱᤒᤠ ᤜᤧᤰᤁᤣ ᤜᤠ᤺ᤳᤗᤧ ᤆᤥ᤺ᤰᤔᤠ ᤛᤢᤰᤋᤢᤒᤣ᥅ ᤁᤢᤜᤣ᤺ᤰᤛᤡᤱᤔᤠ ᤕᤧᤶᤔᤠᤱᤎᤥ ᤁᤢᤏᤢᤵᤔᤠ ᤕᤧᤶᤎᤠᤖᤡᤰᤗᤧ ᤌᤣᤎᤣ ᤐᤥᤱ. ᤂᤧᤴ ᤁᤧᤖᤧᤰ ᤋᤃᤡᤛᤠ ᤜᤠ᤺ᤳᤗᤧ ᤐᤠ᤺ᤵᤔᤠ ᤛᤢᤰᤋᤢᤒᤣ᥅ 8 ᤂᤧᤏᤡ᤹ ᤔᤧᤃᤡᤛᤧᤶᤔᤡᤴᤏᤧ᤹. ᤔᤧᤕᤰᤂᤧᤶᤔᤡᤴᤏᤧ᤹ᤀᤠᤱᤗᤥ. ᤌᤣ ᤁᤴ ᤕᤖᤡᤰ ᤕᤧᤶ ᤋᤃᤡᤀᤣ ᤂᤧᤏᤡ᤹ ᤔᤧᤳᤏᤡᤱᤅᤠᤱ ᤔᤧᤘᤕᤧᤶᤒᤡ᥅ ᤂᤧᤏᤡ᤹ᤃ ᤀᤠᤱᤃᤠ᤹ ᤀᤠᤍᤥ᤺ᤴᤍᤡᤏᤡᤱᤗᤥ॥ ᤌᤣ ᤀᤠᤱᤃᤠ᤹ᤏᤢ᤺ᤸᤗᤧ ᤘᤣ᤹ ᤏᤡᤱᤘᤠ᤹ᤑᤢᤔᤠᤱ ᤘᤠ᤹ᤒᤡ᥅ ᤀᤠᤜᤠ᤹. ᤀᤠᤱᤃᤠ᤹ ᤔᤧᤏᤡᤛᤢᤱᤅᤡᤶᤒᤠ ᤘᤣ᤹ ᤕᤠᤰᤐᤣ᤹ ᤜᤥᤵᤗᤥ॥” ᤏᤠᤘᤠᤀᤡᤳᤗᤠ ᤛᤧᤘᤠ ᤁᤧᤔᤧᤵᤐᤠᤜᤠ᤹ ᤗᤠᤛᤠᤰ ᤔᤧᤔᤧᤳᤋᤢᤛᤡ 9 ᤏᤠᤘᤠᤀᤡᤳᤗᤠ ᤁᤧᤈᤥ᤺ᤰᤐᤠᤜᤠ᤹ ᤁᤧᤖᤧᤰ ᤌᤣᤏᤠᤎᤣᤒᤠᤛᤡᤖᤥ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤁᤢᤔᤧᤴ ᤁᤧᤄᤡ᤺ᤰᤐᤠ ᤔᤧᤗᤣ᤺ᤳᤋᤢᤛᤡᤒᤠ ᤆᤡᤃᤰᤘᤠᤜᤠ᤹ ᤜᤏᤧᤒᤠ ᤆᤥᤰᤗᤥ॥ ᤂᤧᤴ ᤆᤡᤃᤰᤘᤠᤜᤠ᤹ ᤁᤧᤛᤠᤶᤒᤠᤜᤠ᤹ ᤔᤡᤰᤑ᤺ᤶᤒᤠᤛᤡᤖᤥ. ᤂᤧᤒᤩᤠᤱ ᤂᤧᤱᤜᤠ᤹ ᤌᤣᤀᤠᤱ ᤁᤢᤛᤡᤱ ᤔᤧᤴᤏᤡ᤺ᤵᤔᤏᤠᤒᤠ ᤔᤧᤒᤥ᤺ᤰᤂᤧᤀᤠᤱ ᤛᤡᤖᤡᤱᤔᤔᤥ ᤔᤧᤎᤩᤧᤀᤠᤱ ᤔᤧᤘᤠ᤹ᤖᤥ॥ 10 ᤜᤠ᤺ᤳᤗᤧ ᤔᤠᤱ ᤆᤥᤃᤢ᤹. ᤀᤡᤃᤪ ᤂᤥ᤺ᤶᤔᤏᤠ ᤐᤧᤵᤔᤏᤠᤒᤠ ᤏᤠᤘᤠᤀᤡᤳᤗᤠᤴ ᤛᤥ᤺ᤴᤍᤢᤀᤠᤱ ᤜᤠ᤺ᤳᤗᤧ ᤆᤥᤃᤢ᤹. ᤂᤧᤸᤗᤧ ᤂᤢᤏᤧ᤹ ᤌᤣᤀᤠᤱ ᤔᤧᤈᤰᤋᤢᤴᤗᤥ॥ 11 ᤂᤧᤱᤜᤠ᤹ ᤁᤧᤖᤧᤰᤗᤧ ᤂᤢᤴᤇᤡ᤹ ᤏᤠᤎᤠᤖᤥ. ᤂᤧᤴ ᤆᤒᤣᤃᤢᤜᤠ᤹ᤃ ᤔᤏᤠᤛᤡᤖᤰᤗᤥ॥ ᤂᤧᤱᤜᤠ᤹ ᤁᤧᤖᤧᤰ ᤔᤧᤈᤢᤶᤔᤠᤱ ᤛᤥᤖᤡᤰ ᤔᤧᤕᤧᤵᤗᤥ. ᤂᤧᤱᤜᤠ᤹ ᤛᤥᤖᤡᤰ ᤕᤱᤔᤠ ᤔᤧᤛᤡᤖᤥ ᤂᤧᤒᤩᤠᤱ ᤌᤡᤰᤗᤧᤱᤗᤧ ᤛᤡᤖᤡᤱᤔᤔᤥ ᤔᤧᤎᤠᤖᤥ॥ 12 ᤑᤧᤴᤈᤣ᤹ ᤁᤧᤎᤰᤐᤧᤸᤗᤧ ᤗᤳᤇᤠ ᤛᤠᤷᤍᤠᤶᤎᤡᤰ ᤕᤠᤱᤛᤡᤱᤗᤥ ᤜᤧᤰᤁᤩᤠᤱ ᤔᤡᤍ᤺ᤳᤋᤥ ᤕᤠ᤺ᤶᤒᤰ ᤆᤥᤰᤗᤥ. ᤂᤢᤏᤧ᤹ ᤌᤘᤠ᤺ᤸᤗᤧ ᤌᤃᤢᤀᤠᤱ ᤏᤠᤘᤠᤀᤡᤳᤗᤠ᤺ᤸᤗᤧ ᤁᤢᤈᤀᤡ᤺ᤳ ᤗ᤺ᤳᤋᤢᤖᤥ॥ ᤂᤢᤏᤧ᤹ ᤁᤧᤎᤢᤶᤒᤠ ᤁᤢᤜᤢᤰᤁᤡᤸᤗᤧ ᤂᤧᤴ ᤕᤠ᤺ᤶᤒᤰᤁᤡᤴ ᤆᤥᤃᤢᤖᤥ. ᤂᤢᤏᤧ᤹ ᤁᤢᤛᤡᤰᤗᤠ᤺ᤰ. ᤜᤧᤰᤁᤩᤠᤱ ᤂᤢᤏᤧ᤹ ᤔᤧᤴᤎᤢᤶᤔᤏᤠᤒᤠ ᤐᤥᤱᤗᤥ ᤂᤧᤸᤗᤧ ᤆᤫᤠ᤺ᤳ ᤔᤧᤎᤢᤅᤢᤴ ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤎᤏᤠ ᤗᤧᤱᤗᤥ॥ 13 ᤛᤡᤱᤃᤧᤃᤠᤶᤒᤧᤸᤗᤧ ᤂᤡᤍᤥᤖᤠ᤺ᤴ ᤂᤡᤱᤛᤢᤀᤠᤱ ᤔᤡᤰᤛᤣᤴ ᤑᤳᤇᤢᤖᤥ. ᤂᤢᤏᤧ᤹ ᤆ᤺ᤱᤅᤡᤸᤗᤧ ᤘᤖᤧᤱᤗᤧᤱᤒᤠ ᤐᤧᤳᤋᤢᤖᤥ. ᤂᤧᤒᤩᤠᤱ ᤂᤧᤸᤗᤧ ᤁᤢᤈᤀᤡ᤺ᤳ ᤗ᤺ᤳᤋᤢᤖᤥ॥ ᤜᤧᤰᤁᤩᤠᤱ ᤁᤢᤴᤈᤥ᤺ᤸᤗᤧ ᤂᤧ᤹ᤕᤥ ᤀᤃᤢᤀᤠᤱ ᤔᤠᤱᤎᤠ᤺ᤴᤏᤥ ᤕᤢᤱᤔᤠᤖᤧ ᤗᤠᤃᤡ ᤔᤧᤴᤇᤠᤶ ᤕᤠᤵᤔᤡᤖᤧ ᤁᤧᤖᤧᤰ ᤂᤧᤶᤛᤡᤱᤔᤠᤸᤗᤧ ᤏᤠᤖᤢᤶᤓᤢᤱᤅᤥ ᤂᤧᤸᤗᤧ ᤁᤢᤈᤀᤡ᤺ᤳ ᤗ᤺ᤳᤋᤢᤖᤥ॥ 14 ᤂᤧᤸᤗᤧ ᤛᤠᤶᤔᤠᤱᤛᤡᤱ ᤀᤡᤃᤪ ᤀᤠ᤺ᤱᤛᤡᤱ ᤀᤡᤃᤪ ᤕᤜᤡᤒᤠ ᤛᤡᤱᤒᤢᤱᤅᤧᤴ ᤛᤣᤃᤢᤖᤥ. ᤜᤧᤰᤁᤩᤠᤱ ᤋᤠᤱᤓᤢᤱᤅᤥᤒᤠ ᤘᤣ᤹ ᤛᤡᤱᤒᤢᤱᤜᤠ᤹ᤏᤢ ᤂᤧᤴ ᤐᤥᤖᤧᤖ ᤕᤠ᤺ᤴᤍᤢᤖᤥ॥ ᤀᤡᤃᤪ ᤂᤧᤸᤗᤧ ᤀᤠ᤺ᤱᤅᤡᤴ ᤗᤣ᤺ᤳᤋᤢᤖᤥ ᤂᤧᤒᤩᤠᤱ ᤜᤠᤱᤘᤠᤔᤠ ᤕᤧᤶᤔᤥᤒᤠ ᤘᤜᤡᤳᤋᤧᤸᤗᤧ ᤂᤧᤴ ᤐᤥᤖᤧᤖ ᤕᤠ᤺ᤴᤍᤢᤖᤥ॥ 15 ᤂᤧᤒᤩᤠᤱ ᤂᤧᤴ ᤔᤏᤠ᤺ᤸᤗᤧ ᤁᤢᤗᤠᤃᤡ ᤜᤠ᤺ᤶᤔᤠ ᤛᤡᤱ ᤐᤥᤱᤗᤥ. ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤓᤠ ᤛᤡᤱᤈᤡ᤹ ᤕᤠᤱᤛᤡᤱᤅᤠᤱ ᤀᤠᤒᤠᤅᤣ ᤔᤡ ᤆᤠ᤹ᤖᤢᤖᤥ॥ ᤂᤢᤏᤧ᤹ ᤂᤧᤴ ᤜᤠ᤺ᤴᤍᤢᤀᤠᤱ ᤂᤖᤧ᤺ᤱ ᤗᤧ᤺ᤱᤛᤢᤖᤥ. ᤜᤧᤰᤁᤩᤠᤱ ᤒᤠᤂᤧᤴ ᤛᤡᤱᤗᤠᤶᤒᤠ ᤂᤢᤏᤧ᤹ ᤗᤳᤇᤠ ᤔᤠᤱᤎᤡᤰᤁᤠᤱ ᤆᤥᤃᤢᤀᤠᤱ ᤂᤧᤴ ᤛᤧᤘᤠ ᤔᤧᤳᤋᤢᤖᤥ॥ ᤂᤢᤏᤧ᤹ ᤂᤧᤴ ᤛᤡᤱᤗᤠᤶᤒᤠ ᤏᤠᤘᤠᤀᤡᤳᤗᤠᤎᤡᤰ ᤆᤥᤃᤢᤖᤥ. ᤂᤶᤓᤩᤠᤱ ᤂᤧᤸᤗᤧ ᤁᤢᤍᤃᤡ ᤛᤠᤶᤒᤥᤴ ᤜᤒᤳ ᤑᤴᤇᤡᤱᤗᤥ॥ 16 ᤂᤧᤴ ᤛᤡᤱᤅᤧᤸᤗᤧ ᤁᤢᤓᤪᤧ᤺ᤰ ᤗᤰᤁᤡᤴ ᤂᤢᤏᤧ᤹ ᤔᤡᤀᤥ ᤛᤡᤱ ᤜᤠ᤺ᤴᤍᤢᤖᤥ. ᤂᤧᤸᤗᤧ ᤁᤢᤛᤶᤎᤠᤱ ᤋ᤺ᤰ ᤌᤥ᤺ᤰᤋᤢᤖᤥ. ᤜᤠᤒᤠ ᤂᤧ᤹ᤕᤥ ᤂᤢᤏᤧ᤹ ᤛᤠ ᤏᤕᤢᤀᤠᤱ ᤆᤖᤥ॥ ᤂᤧᤸᤗᤧ ᤔᤡᤀᤠᤱ ᤆᤠ᤹ᤖᤢᤀᤠᤱ ᤐᤠ᤺ᤳᤋᤢᤖᤥ. “ᤀᤠ᥄ ᤀᤠᤱᤃᤠ᤹ ᤁᤥᤛᤠᤱᤗᤥ. ᤀᤠᤱᤃᤠ᤹ ᤔᤡ ᤏᤡᤔᤠ ᤂᤥᤛᤢᤱᤗᤥ॥” 17 ᤂᤧᤴ ᤁᤧᤏᤶᤒᤠ ᤁᤢᤄᤧᤸᤗᤧᤰᤁᤡᤴ ᤂᤧᤸᤗᤧ ᤗᤳᤇᤠ ᤏᤠᤘᤠᤀᤡᤳᤗᤠ. ᤔᤠᤱᤎᤡᤰ ᤆᤥᤃᤢᤖᤥ॥ ᤂᤧᤸᤗᤧ ᤁᤢᤍᤃᤡ ᤛᤠᤒᤴ ᤜᤵᤐᤧᤳ ᤐᤳᤋᤠᤱ ᤂᤧᤴ ᤛᤧᤘᤠ ᤔᤧᤳᤋᤢᤖᤥ. ᤜᤧᤰᤁᤩᤠᤱ ᤐᤣᤗᤡ ᤑᤠᤰᤋᤢᤀᤠᤱ ᤂᤧᤴ ᤀᤰᤂᤣ ᤔᤧᤳᤋᤢᤖᤥ. “ᤀᤠᤱᤃᤠ᤹ ᤛᤧ᤺ᤵᤋᤠᤱᤅᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤂᤧᤏᤧ᤹ ᤀᤠᤱᤃᤠ᤹ ᤀᤠᤔᤠᤱᤏᤧᤖᤥ॥” 18 ᤂᤧᤱᤜᤠ᤹ᤖᤧ ᤌᤣᤀᤠᤱ ᤔᤧᤸᤗᤧᤛᤢᤴᤗᤥ. ᤂᤧᤱᤜᤠ᤹ᤖᤧ ᤌᤣᤀᤠᤱ ᤁᤢᤛᤡᤱ ᤔᤧᤴᤏᤡ᤺ᤳᤋᤢᤴᤗᤥ॥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤔᤡᤰᤜᤠ᤹ ᤀᤡᤶ ᤔᤧᤔᤧᤳᤋᤢᤀᤠᤱ ᤐᤳᤗᤥ. ᤂᤧᤸᤗᤧᤆᤥᤃᤢᤸᤗᤧ ᤂᤧᤱᤜᤠ᤹ᤖᤧ ᤏᤡᤔᤠ ᤔᤧᤴᤇᤢᤰᤋᤢᤴᤗᤥ. ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤏᤡᤱᤘᤠᤴ ᤔᤧᤛᤠᤰᤋᤢᤀᤠᤱ ᤘᤠ᤹ᤖᤥ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤁᤢᤛᤡᤱ ᤏᤡ᤺ᤵᤔᤠ ᤔᤧᤴᤇᤢᤰᤋᤢᤴᤗᤥ॥ 19 ᤜᤠ᤺ᤳᤋᤠᤱ ᤕᤢᤱᤅᤠᤱ ᤏᤡᤱᤘᤠ᤹ ᤔᤧᤀᤡ᤺ᤳᤇᤡᤱᤅᤧᤴᤗᤥ. ᤁᤶᤓᤣ ᤐᤠ᤺ᤵᤔᤠᤖᤧ ᤗᤠᤃᤡ ᤀᤠᤳᤋᤡᤸᤗᤧᤀᤠᤱ ᤛᤡᤰᤁᤢᤶ ᤏᤡᤱᤘᤠ᤹ ᤔᤧᤃᤳᤋᤢᤴᤗᤥ. ᤀᤡᤃᤪ ᤂᤠᤛᤡᤱ ᤔᤧᤏᤡ᤺ᤳᤏᤧᤴᤗᤥ. “ᤀᤠᤱᤃᤠ᤹ ᤂᤧᤸᤗᤧ ᤁᤢᤓᤪᤧ᤺ᤱ ᤛᤡᤱ ᤜᤠ᤺ᤴᤍᤢᤱᤗᤥ॥ ᤜᤠᤒᤠ ᤂᤧᤴ ᤛᤡᤱᤅᤡᤸᤗᤧ ᤂᤖᤧ᤺ᤱ ᤗᤧ᤺ᤰᤂᤢᤱᤗᤥ. ᤀᤠᤱᤃᤠ᤹ ᤛᤠ ᤏᤕᤢᤱᤅᤠᤱ ᤆᤠᤱᤗᤥ॥ ᤌᤣ ᤀᤠᤸᤗ ᤂᤧᤴ ᤁᤧᤏᤶᤒᤠ ᤛᤡᤱᤅᤡᤴ ᤕᤠᤶᤃᤧᤛᤡᤱᤒᤠ ᤛᤠᤔᤠ ᤆᤥᤃᤢᤱᤒᤠᤒᤡ᥅ ᤌᤣ ᤀᤠᤱᤃᤠ᤹ ᤛᤡᤱᤔᤢ᤺ᤳᤋᤧᤸᤗᤧ ᤁᤢᤍᤃᤠᤱ ᤛᤠᤶᤒᤥᤴ ᤜᤒᤳ ᤐᤵᤔᤠ ᤐᤥᤱᤒᤠᤒᤡ᥅” 20 ᤂᤧᤸᤗᤧ ᤂᤠᤵᤐᤢ᤺ᤴ ᤆᤖᤥ. ᤀᤡᤱᤗᤧᤰᤁᤣ ᤏᤡᤱᤘᤠ᤺ᤸᤗᤧ ᤂᤧᤴ ᤔᤢᤕ᤺ᤰ ᤆᤥᤃᤢᤖᤥ॥ ᤂᤧᤸᤗᤧ ᤁᤢᤛᤰᤔᤠ ᤛᤠᤶᤔᤡᤴ ᤛᤧ᤺ᤵᤔᤠ ᤔᤧᤛᤢᤰᤋᤢᤴᤗᤥ. ᤀᤰᤂᤣ ᤐᤠ᤺ᤵᤔᤠᤀᤠᤱ ᤔᤧᤛᤢᤰᤋᤢᤴᤗᤥ. “ᤌᤣ ᤀᤠᤱᤃᤠ᤹ ᤀᤠᤈᤢᤰᤘᤠ ᤜᤢᤰᤁᤥ ᤁᤧᤘᤠ᤹ᤒᤠ ᤐᤠ᤺ᤴᤏᤡᤴ ᤀᤡᤱᤗᤧᤰᤁᤣᤃ ᤔᤣ᤺ᤶᤒᤡ᥅” ᤕᤜᤘᤣ ᤍᤠᤱᤒᤠᤴ ᤆᤀᤡ᤺ᤳᤍᤠᤱᤒᤠ ᤏᤢ ᤁᤧᤎᤧ᤹ᤒᤠ 21 “ᤕᤠᤁᤢᤒᤣ. ᤁᤴ ᤐᤠ᤺ᤴᤜᤠ᤹ ᤏᤡᤱᤘᤠ᤹ ᤀᤡ᤺ᤳᤋᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤀᤡᤛᤪᤠᤀᤡᤗᤀᤣ. ᤂᤧᤏᤧ᤹ ᤀᤠᤱᤃᤠ᤹ ᤀᤠᤛᤧᤘᤠᤖᤥᤒᤠᤏᤧᤖᤥ॥ ᤀᤠᤱᤃᤠ᤹ ᤂᤧᤏᤧ᤹ ᤆᤥ᤺ᤰᤏᤧᤒᤠᤖᤥ. ᤂᤧᤏᤧ᤹ ᤀᤠᤱᤃᤠ᤹ ᤀᤠᤛᤧᤘᤠᤖᤥᤒᤠᤏᤧᤖᤥ. ᤀᤡᤛᤪᤠᤀᤡᤗᤀᤣ. ᤀᤠᤱᤃᤠ᤹ ᤂᤧᤏᤧ᤹ ᤏᤡᤱᤘᤠ᤹ ᤔᤧᤔᤢ᤺ᤴᤏᤧᤸᤗᤥ॥ 22 ᤀᤠᤱᤃᤠ᤹ ᤂᤧᤏᤧ᤹ ᤋᤠᤵᤑᤧ᤺ᤶᤒᤠ ᤁᤧᤕᤠ᤺ᤶᤒᤰᤜᤠ᤹ ᤂᤠ᤹ᤔᤡᤳ ᤜᤧᤰᤁᤣ ᤜᤧᤰᤁᤩᤠᤱ ᤂᤧᤏᤧ᤹ ᤁᤧᤗᤠᤕᤥᤜᤠ᤹ ᤋᤠᤏᤠᤶᤒᤠ ᤋᤢᤱᤜᤡ᤺ᤰ ᤜᤧᤰᤁᤣ ᤂᤧᤳᤋᤢᤱᤍᤣᤛᤢᤱ ᤐᤡᤏᤧᤖᤥ ᤏᤢ᤺ᤰᤂᤧ᤹ᤀᤠᤱ ᤋᤩᤧ᤹ᤀᤥ ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤂᤧᤏᤧ᤹ ᤁᤧᤔᤧᤸᤗᤢᤱ ᤜᤢᤅᤢᤱᤅᤠᤱ ᤌᤧ᤹ᤏᤧᤀᤠᤱ ᤘᤠ᤹ᤖᤥ॥” 23 ᤋᤠᤱᤛᤠᤱᤒᤣ. ᤛ᤺ᤳᤋᤧ᤹ᤀᤠᤱ ᤛᤠᤶᤗᤥᤖᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤜᤧᤰᤁᤣ ᤆᤥᤃᤢᤀᤠᤱ ᤘᤠ᤹ᤖᤥ॥ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤀᤣ. ᤕᤶᤒᤠ ᤀᤡᤰᤗᤠᤀᤥ ᤀ᤺ᤰᤋᤧ᤹ᤀᤥ. ᤌᤧᤃᤢᤛᤣ. ᤋᤠᤶᤓᤢᤱ ᤏᤢ ᤂᤧ᤹ᤕᤥᤒᤠ ᤁᤧᤖᤧᤰ ᤛᤡᤱᤒᤢᤱᤛᤣ. ᤂᤧᤶᤃᤧᤍᤧᤵᤐᤠ ᤀᤡᤰᤗᤠᤀᤥ ᤛᤠᤶᤗᤥᤖᤧᤶᤔᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤧᤸᤗᤢᤱ ᤜᤢᤅᤢᤀᤠᤱ ᤕᤠᤁᤢᤒᤧᤴ ᤌᤧ᤹ᤖᤢᤀᤠᤱ ᤘᤠ᤹ᤖᤥ. ᤂᤢᤏᤧ᤹ ᤀᤠᤒᤠᤅᤣ ᤀᤡᤛᤪᤠᤀᤡᤗᤀᤥ ᤁᤢᤔᤡᤔᤡᤍᤡᤱᤅᤡᤴ ᤀᤥ᤺ᤴᤎᤠᤰᤋᤢᤛᤡ᤹ᤖᤥ॥ 24 ᤂᤧᤏᤧ᤹ ᤁᤧᤎᤧ᤹ᤒᤠ. ᤛᤠᤵᤐᤥ᤺ᤰᤁᤥ ᤂᤧᤏᤧ᤹ ᤁᤧᤈᤥ᤺ᤰᤐᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤖᤥ— “ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤠᤀᤠ. ᤀᤠᤱᤃᤠ᤹ ᤁᤧᤖᤧᤰ ᤐᤠ᤺ᤴᤜᤠ᤹ ᤆᤥᤃᤢᤱᤒᤠᤖᤥ. ᤀᤠᤱᤃᤠ᤹ᤀᤣ ᤋᤠᤱᤛᤠᤱᤒᤠᤴ ᤂᤡᤱᤛᤢᤱᤒᤠᤖᤥ. ᤀᤠᤱᤃᤠ᤹ ᤀᤠᤒᤠᤅᤣ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤑᤧᤛᤢᤱᤒᤠᤖᤥ॥ 25 ᤀᤠᤱᤃᤠ᤹ ᤀᤡᤱᤗᤧᤰ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ᤖᤧ ᤂᤢᤏᤡ᤹ ᤔᤡᤰᤛᤣ᤺ᤴᤏᤡᤴ ᤁᤢᤛᤢᤶ ᤔᤧᤴᤍᤶᤔᤏᤠᤒᤠ ᤆᤥᤃᤢᤱᤗᤥ. ᤜᤧᤰᤁᤩᤠᤱ ᤌᤢᤶᤔᤩᤠ ᤁᤧᤀᤡᤒᤠᤜᤠ᤹ ᤀᤍᤱ ᤆᤥᤃᤢᤛᤡᤱᤗᤥ॥ ᤀᤠᤱᤃᤠ᤹ ᤛᤡᤰᤁᤢᤶᤛᤠᤒᤠ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤏᤧᤜᤡᤏᤡᤱᤘᤠᤴ ᤂᤠᤍᤠ᤺ᤰᤐᤠ ᤆᤥᤃᤢᤱᤗᤥ. ᤂᤧᤒᤩᤠᤱ ᤂᤧᤱᤜᤠ᤹ ᤂᤠᤛᤡᤱ ᤔᤧᤴᤏᤡ᤺ᤵᤔᤏᤠ ᤔᤧᤒᤥᤱᤗ ᤆᤥᤃᤢᤱᤛᤡᤱᤗᤥ॥ 26 ᤀᤠᤱᤃᤠ᤹ ᤀᤠᤛᤧᤘᤠᤖᤥᤒᤠᤜᤠ᤹ᤖᤧ ᤂᤢᤴᤇᤡ᤹ ᤐᤠ᤺ᤴᤏᤡᤴ ᤏᤡ᤺ᤴᤎᤥ ᤆᤥᤃᤢᤱᤗᤥ. ᤜᤧᤰᤁᤩᤠᤱ ᤀᤠᤀᤡᤱᤄᤱ ᤁᤧᤛᤠᤒᤠᤜᤠ᤹ᤖᤧ ᤂᤢᤴᤇᤡ᤹ ᤔᤠᤱᤏᤡᤱᤘᤠ᤹ᤐᤠᤴᤏᤡᤴ ᤁᤢᤗᤡᤱᤍᤥ ᤁᤧᤳᤋᤢᤱᤗᤥ॥ ᤀᤠᤱᤃᤠ᤹ ᤕᤖᤢᤛᤗᤧᤔ ᤕᤧᤰᤕᤰᤁᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤀᤰᤂᤣ ᤐᤠ᤺ᤳᤋᤢᤱᤗᤥ. ‘ᤂᤧᤴ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤕᤢᤱᤔᤠᤍᤧᤴ ᤐᤥᤱᤗᤥ.’ ᤀᤠᤱᤃᤠ᤹ ᤕᤜᤢᤍᤠᤒᤠ ᤕᤧᤰᤕᤰᤜᤠ᤹ᤖᤧ ᤁᤢᤕᤠ᤺ᤶᤒᤣᤀᤥ ᤁᤶᤓ ᤐᤠ᤺ᤳᤋᤢᤱᤗᤥ. ‘ᤂᤧᤱᤜᤠ᤹ ᤕᤠᤶᤔᤥ ᤆᤥ᤺ᤰᤔᤠ ᤐᤥᤱᤗᤥ.’ ᤀᤠᤱᤃᤠ᤹ ᤂᤧᤴ ᤔᤧᤎᤢᤵᤛᤢ ᤔᤧᤕᤛᤢᤒᤠᤍᤧᤴᤜᤠ᤹ᤖᤧ ᤁᤢᤕᤠ᤺ᤶᤒᤣᤀᤥ ᤀᤰᤂᤣ ᤐᤠ᤺ᤳᤋᤢᤱᤗᤥ. ‘ᤀᤠᤱᤃᤠ᤹ ᤕᤠᤶᤔᤥ ᤛᤧᤳᤋᤢᤱ ᤆᤥᤃᤢᤱᤗᤥ॥’ 27 ᤀᤠᤱᤃᤠ᤹ ᤁᤢᤍᤡ᤺ᤶᤒᤣ ᤁᤣ᤺ᤶᤒᤠ ᤁᤧᤏᤧᤒᤠ ᤆᤫᤠ᤺ᤳᤋᤡᤴ ᤀᤰᤂᤣ ᤔᤧᤳᤋᤢᤱᤗᤥ. ‘ᤆᤵᤐᤪᤧᤰ ᤆᤒᤧ᤹. ᤀᤠᤱᤃᤠ᤹ ᤁᤧᤘᤜ᤺ᤱᤜᤠ᤹ ᤆᤵᤗ ᤕᤠ᤺ᤴᤍᤢᤱᤗᤥ॥’ 28 ᤀᤠᤱᤃᤠ᤹ ᤁᤥᤖᤣᤛᤖᤧ ᤁᤢᤕᤠ᤺ᤶᤒᤣᤀᤥ ᤐᤠ᤺ᤳᤋᤢᤱᤗᤥ. ‘ᤂᤧᤴ ᤀᤠᤱᤃᤠ᤹ ᤀᤠᤔᤧᤸᤗᤢᤰ ᤁᤧᤃᤶᤒᤠᤖᤥ’ ᤜᤧᤰᤁᤩᤠᤱ ᤂᤧᤸᤗᤧ ᤀᤠᤱᤃᤠ᤹ ᤆᤥ᤺ᤰᤔᤠ ᤀᤡ᤺ᤳᤋᤢᤱᤒᤠ ᤁᤧᤖᤧᤰ ᤁᤧᤳᤋᤢ ᤐᤡᤀᤠᤖᤥ॥ ᤕᤖᤢᤛᤗᤧᤔ ᤕᤧᤰᤕᤰᤁᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤂᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤖᤥ. ‘ᤂᤧᤴ ᤕᤠᤶᤔᤥ ᤔᤧᤈᤥᤃᤢᤖᤖᤥ.’ ᤂᤧᤒᤩᤠᤱ ᤔᤠᤱᤜᤡᤶᤔᤧᤸᤗᤧ ᤁᤢᤕᤠ᤺ᤶᤒᤣᤀᤥᤃ. ‘ᤁᤸᤗᤧ ᤁᤢᤕᤢᤰᤏᤠ ᤐᤠᤱᤕᤰᤁᤡᤴ ᤔᤧᤕᤢᤰᤂᤢᤖᤖᤥ॥’” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.