ᤕᤛᤤᤕᤠ 43 - LIFOTNTᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤏᤠᤜᤠ᤹ ᤛᤧ᤺ᤵᤔᤠᤛᤡ ᤔᤠᤱᤜᤢᤵ 1 ᤁᤖ ᤀᤠᤸᤗ ᤕᤠᤁᤢᤒᤀᤣ. ᤂᤧᤏᤧ᤹ ᤏᤠᤘᤠᤃᤧᤴ ᤆᤀᤡᤳ ᤁᤧᤏᤧᤒᤠ. ᤀᤡᤛᤪᤠᤀᤡᤗᤀᤣ. ᤂᤧᤏᤧ᤹ ᤁᤧᤈᤥ᤺ᤰᤐᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤖᤥ— “ᤔᤧᤃᤡᤛᤧᤴᤏᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤂᤧᤏᤧ᤹ ᤁᤧᤔᤧᤸᤗᤢᤱ ᤜᤢᤅᤢᤱᤅᤠᤱ ᤌᤧ᤹ᤏᤧᤀᤠᤱ ᤘᤠ᤹ᤖᤥ॥ ᤀᤠᤱᤃᤠ᤹ ᤂᤧᤏᤧ᤹ ᤔᤡᤱᤗᤥ᤺ᤰᤏᤧᤀᤠᤱ ᤀᤢ᤺ᤳᤏᤧᤀᤠᤱ ᤘᤠ᤹ᤖᤥ. ᤂᤧᤏᤧ᤹ᤃ ᤀᤠᤱᤃᤠ᤹ᤀᤡᤴᤏᤣᤖᤥ॥ 2 ᤂᤧᤏᤧ᤹ ᤆᤫᤠ᤺ᤳᤗᤠᤶᤒᤠ ᤁᤧᤒᤥᤱᤅᤠᤱ ᤁᤧᤒᤣ᤺ᤰᤁᤡᤸᤗᤧ ᤀᤠᤱᤃᤠ᤹ ᤂᤧᤏᤧ᤹ᤏᤢ ᤘᤠ᤹ᤀᤠᤖᤥ॥ ᤂᤧᤏᤧ᤹ ᤕᤱᤄᤱ ᤘᤜ᤺ᤱᤗᤠᤶ ᤗᤠᤱᤃᤧᤄᤣ᤺ᤰᤁᤡᤸᤗᤧ ᤂᤧᤸᤗᤧ ᤂᤧᤏᤧ᤹ ᤁᤧᤴᤜᤢᤶᤏᤧᤸᤗᤥ॥ ᤔᤡᤗᤠᤶᤒᤠ ᤗᤠᤱᤃᤧᤄᤣ᤺ᤰᤁᤠᤱ ᤁᤧᤒᤣ᤺ᤰᤁᤡᤸᤗᤧ ᤂᤧᤏᤧ᤹ ᤔᤡᤃᤧᤴᤍᤡᤰᤏᤧᤸᤗᤥ॥ ᤂᤧᤴ ᤔᤡᤎᤢᤱᤍᤡᤱ ᤔᤡᤖᤠ᤺ᤰᤁᤡᤸᤗᤧ ᤂᤧᤏᤧ᤹ ᤂᤠᤵᤐᤢᤌᤩ᤺ᤱ ᤁᤧᤴᤈᤥ᤺ᤰᤏᤧᤸᤗᤥ॥ 3 ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤠ ᤁᤧᤏᤡᤱᤘᤠ᤹ᤑᤢᤔᤠᤱᤀᤠᤖᤥ. ᤀᤠᤱᤃᤠ᤹ ᤂᤧᤏᤧ᤹ ᤁᤧᤛᤧᤴᤗᤵᤍᤠᤱᤒᤠ ᤀᤡᤛᤪᤠᤀᤡᤗᤒᤠ ᤛᤣᤛᤣᤒᤠ ᤏᤡᤱᤘᤠ᤹ᤑᤢᤔᤠᤱᤀᤠᤖᤥ॥ ᤀᤠᤱᤃᤠ᤹ ᤔᤡᤛᤪ ᤗᤠᤈᤣᤴ ᤐᤡᤖᤢᤱᤛᤡᤱᤅᤠᤱ ᤂᤧᤏᤧ᤹ ᤌᤧ᤹ᤏᤧᤖᤥ. ᤜᤧᤰᤁᤩᤠᤱ ᤂᤧᤏᤧ᤹ ᤁᤧᤗᤧᤰᤘᤠᤀᤥ ᤁᤢᤛ ᤏᤢ ᤛᤣᤒᤠ ᤗᤠᤈᤣᤴ ᤐᤡᤖᤢᤱᤛᤡᤱᤗᤥ॥ 4 ᤂᤧᤏᤧ᤹ ᤋᤠᤱᤛᤧ᤺ᤵᤔᤠᤖᤧ ᤗᤠᤃᤡ ᤁᤧᤗᤧᤰᤘᤠᤀᤥ ᤁᤧᤖᤧᤰ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ ᤐᤡᤖᤢᤱᤛᤡᤱᤗᤥ ᤌᤣᤀᤠᤱᤓᤧᤸᤗᤧ ᤂᤧᤏᤧ᤹ ᤀᤠᤱᤃᤠ᤹ ᤀᤠᤗᤠᤃᤡ ᤛᤠ᤹ᤖᤡᤰ ᤀᤡᤔᤧᤸᤗᤢᤱᤒᤠ ᤁᤧᤈᤥ᤺ᤰᤗᤥ॥ ᤜᤧᤰᤁᤩᤠᤱ ᤀᤠᤱᤃᤠ᤹ ᤂᤧᤏᤧ᤹ ᤀᤡᤱᤎᤠᤱ ᤐᤡᤏᤧᤖᤥ. ᤂᤧᤒᤩᤠᤱ ᤗᤢᤱᤔᤠ᤹ ᤋᤢᤰᤏᤧᤖᤥ॥ 5 ᤔᤧᤃᤡᤛᤧᤴᤏᤧ᤹. ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤂᤧᤏᤧ᤹ᤏᤢ ᤘᤠ᤹ᤀᤠᤖᤥ॥ ᤀᤠᤱᤃᤠ᤹ ᤂᤧᤏᤧ᤹ ᤁᤧᤛ᤻ᤛᤠ ᤁᤧᤀᤣᤜᤠ᤹ ᤋᤀᤡᤏᤠᤱᤃᤧᤴ ᤐᤡᤛᤠᤱᤏᤢ ᤑᤧᤳᤋᤢᤱᤛᤡᤱᤗᤥ. ᤜᤧᤰᤁᤩᤠᤱ ᤏᤠᤶᤎᤠ ᤗᤧᤵᤛᤠᤱᤏᤢ ᤂᤧᤏᤡ᤹ ᤑᤢᤱᤏᤡᤱᤗᤥ॥ 6 ᤀᤠᤱᤃᤠ᤹ ᤌᤠᤱᤃᤧᤳ ᤗᤧᤵᤛᤠᤱᤅᤡᤴ ᤔᤧᤳᤋᤢᤱᤗᤥ. ‘ᤂᤧᤱᤜᤠ᤹ ᤐᤣ᤺ᤰᤔᤠ ᤑᤠ᤺ᤰᤋᤧᤛᤧ᤹ᤀᤥ॥’ ᤜᤧᤰᤁᤩᤠᤱ ᤗᤠᤱᤃᤧᤳ ᤗᤧᤵᤔᤠᤱᤅᤡᤴ ᤔᤧᤳᤋᤢᤱᤗᤥ. ‘ᤂᤧᤱᤜᤠ᤹ ᤔᤧᤛᤠᤰᤋᤧᤛᤧᤴᤏᤧ᤹ᤀᤥ॥’ ᤀᤠᤱᤃᤠ᤹ ᤀᤠᤛ᤻ᤛᤠ ᤕᤧᤶᤒᤡᤳᤇᤠᤜᤠ᤹ ᤔᤠ᤺ᤱᤄᤠᤗᤠᤶ ᤏᤢ᤺ᤰᤋᤧᤛᤧ᤹ᤀᤥ ᤂᤧᤒᤩᤠᤱ ᤀᤠᤛ᤻ᤛᤠ ᤔᤧᤴᤇᤢᤔᤠᤜᤠ᤹ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤸᤗᤧ ᤏᤠᤛᤔᤠ ᤁᤢᤕᤠᤀᤥᤏᤢ ᤑᤧᤳᤋᤧᤛᤧ᤹ᤀᤥ. 7 ᤀᤠᤱᤃᤠ᤹ ᤀᤠᤔᤡᤱᤅᤥ ᤔᤧᤀᤢ᤺ᤳᤋᤢᤛᤡᤒᤠᤜᤠ᤹ ᤁᤧᤖᤧᤰ. ᤀᤠᤱᤃᤠ᤹ ᤀᤠᤔᤡᤔᤡᤍᤡᤱᤗᤧ ᤗᤠᤃᤡ ᤏᤠᤘᤠᤃᤧᤴ ᤆᤀᤡ᤺ᤳ ᤆᤥᤃᤢᤱᤛᤡᤱᤅᤠᤱ ᤔᤧᤘᤠ᤹ᤖᤥ. ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤌᤰᤗᤠ ᤗᤡᤱᤃᤧᤴᤏᤡᤴ ᤀᤠᤱᤃᤠ᤹ᤀᤣ ᤆᤥᤃᤢᤱᤒᤠᤖᤥ॥” ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤥ᤺ᤴᤍᤡ ᤀᤡᤛᤪᤠᤀᤡᤗ 8 ᤀᤠᤱᤃᤠ᤹ ᤀᤠᤔᤏᤠᤜᤠ᤹ ᤋᤥ᤺ᤴᤍᤡ ᤐᤡᤛᤧ ᤋᤠᤖᤠᤶᤛᤧ᤹ᤀᤥ. ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤔᤡᤰ ᤐᤳᤇᤠᤱ ᤂᤠᤔᤧᤴᤏᤡᤏᤧᤸᤗᤥ. ᤏᤧᤰᤂᤥ᤹-ᤏᤧᤓᤠᤰᤁ ᤐᤳᤇᤠᤱ ᤏᤠᤔᤧᤱᤄᤧᤶᤏᤧᤸᤗᤥ॥ 9 ᤁᤧᤖᤧᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤔᤧᤓᤢᤱᤛᤡᤗᤖᤥ. ᤜᤧᤰᤁᤩᤠᤱ ᤔᤏᤠᤜᤠ᤹ ᤔᤧᤈᤢᤶᤗᤖᤥ॥ ᤂᤢᤴᤇᤡ᤹ ᤀᤠᤳᤋᤡᤴ ᤏᤠᤘᤠᤀᤡᤳᤗᤠ᤺ᤸᤗᤧ ᤁᤴ ᤐᤠ᤺ᤴᤜᤠ᤹ ᤀᤠᤏᤡ᤹ ᤀᤠᤔᤧᤳᤋᤧᤒᤣ. ᤂᤧᤒᤩᤠᤱ ᤋᤃᤡᤒᤠ ᤐᤠ᤺ᤴᤜᤠ᤹ ᤀᤢᤘᤠ ᤀᤠᤈᤥᤃᤢᤶᤒᤣ᥅ ᤂᤧᤱᤜᤠ᤹ ᤛᤧᤰᤂᤠᤒᤠ ᤏᤡᤔᤠᤛᤡᤖᤧ ᤗᤠᤃᤡ ᤀᤠᤒᤠᤅᤣ ᤀᤠᤒᤠᤅᤣ ᤁᤧᤏᤡᤒᤠ ᤋᤥ᤺ᤴᤍᤡ ᤔᤧᤍᤠᤖᤢᤛᤡᤖᤖᤥ. ᤂᤧᤶᤒᤩᤠᤱ ᤘᤣ᤹ᤜᤠ᤹ᤖᤧ ᤔᤧᤄᤧᤵᤛᤢᤀᤠᤱ ᤔᤧᤒᤠ᤺ᤳᤋᤢᤖ. “ᤁᤴ ᤐᤠ᤺ᤴᤏᤡᤱᤃ ᤛᤧᤰᤂᤠᤖᤥ॥” 10 ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤖᤥ. “ᤀᤡᤛᤪᤠᤀᤡᤗᤒᤠ ᤔᤏᤠᤛᤣ. ᤂᤧᤏᤡ᤹ᤃ ᤀᤠᤱᤃᤠ᤹ ᤀᤠᤍᤥ᤺ᤴᤍᤡᤏᤡᤱᤗᤥ ᤛᤣ᤺ᤰᤏᤡᤱᤒᤠ ᤀᤠᤛᤧᤘᤠᤖᤥᤒᤠᤏᤡᤱᤗᤥ. ᤂᤧᤸᤗᤧᤆᤥᤃᤢᤸᤗᤧ ᤂᤧᤏᤡ᤹ ᤀᤠᤱᤃᤠ᤹ ᤁᤢᤛᤡᤱ ᤕᤠᤵᤔᤡ ᤁᤧᤏᤡ᤺ᤳᤋᤡᤖᤥ ᤜᤧᤰᤁᤩᤠᤱ ᤏᤛᤠᤴ ᤕᤠᤵᤔᤡ ᤁᤧᤈᤥᤃᤡᤖᤥ. ᤂᤧᤶᤒᤩᤠᤱ ᤂᤧᤱᤃ ᤀᤠᤱᤃᤠ᤹ᤀᤣᤖᤥ ᤑᤠ᤹ᤀᤠᤱ ᤁᤢᤛᤡᤱ ᤁᤧᤏᤡ᤺ᤳᤋᤢᤶᤗᤥ॥ ᤀᤠᤱᤃᤠ᤹ᤏᤢ᤺ᤸᤗᤧ ᤋᤃᤡ ᤜᤠ᤺ᤳᤋᤠᤱ ᤔᤠᤱ ᤔᤧᤶᤒᤥᤱᤅᤣ ᤘᤕᤧᤖᤥ. ᤜᤧᤰᤁᤩᤠᤱ ᤋᤠ᤺ᤴᤍᤡᤀᤠᤱ ᤜᤠ᤺ᤳᤋᤠᤱ ᤔᤠᤱ ᤔᤧᤒᤥᤱᤏᤧᤸᤗᤥ॥ 11 ᤀᤠᤱᤃᤠ᤹. ᤀᤠᤱᤃᤠ᤹ᤖᤰ ᤗᤳᤇᤠ ᤕᤜᤘᤣ ᤍᤠᤱᤒᤠᤀᤠᤖᤥ. ᤀᤠᤱᤃᤠ᤹ᤖᤰ ᤛᤧᤴᤗᤵᤍᤠᤱᤒᤠᤀᤠ ᤘᤣ᤹ ᤜᤠ᤺ᤳᤋᤠᤱ ᤜᤥᤵᤗᤥ॥ 12 ᤋᤠ᤺ᤴᤍᤡ ᤁᤧᤒᤥᤱᤒᤠ ᤐᤠ᤺ᤴᤜᤠ᤹ ᤀᤥᤛᤣ᤺ᤴᤎᤠᤱ ᤆᤥᤃᤢᤱᤅᤠᤱ ᤘᤠ᤹ᤀᤠᤖᤥ. ᤋᤠᤱᤛᤧ᤺ᤵᤋᤢᤱᤅᤠᤱ ᤘᤠ᤹ ᤜᤧᤰᤁᤩᤠᤱ ᤀᤢᤘᤠ ᤆᤥᤃᤢᤱᤅᤠᤱ ᤘᤠ᤹ᤖᤥ— ᤂᤧᤏᤡ᤹ ᤗᤢᤶᤔᤥ ᤀᤠᤱᤃᤠ᤹ ᤁᤴ ᤆᤥᤃᤢᤱᤒᤠ. ᤘᤣ᤹ ᤔᤠᤱᤗᤧ ᤔᤧᤈᤥᤃᤢᤒᤠ ᤔᤣ᤺ᤴᤗᤥ॥ ᤂᤡᤏᤡ᤹ᤃ ᤀᤠᤱᤃᤠ᤹ᤀᤣ ᤏᤡᤱᤘᤠ᤹ᤑᤢᤔᤠᤱᤀᤠ ᤑᤠ᤹ᤀᤠᤱ ᤋᤥ᤺ᤴᤍᤡ ᤁᤧᤒᤡᤒᤠᤏᤡᤱᤗᤥ” ᤗ᤹ᤖᤡᤰ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤖᤥ॥ 13 “ᤀᤥᤖᤥ. ᤀᤢᤏᤠᤜᤢᤖᤡᤒᤠ ᤕᤧᤶᤔᤠᤱᤎᤥᤀᤣ ᤂᤢᤏᤧ᤹ᤃ ᤀᤠᤱᤃᤠ᤹ᤀᤣᤖᤥ. ᤀᤠᤱᤃᤠ᤹ ᤀᤠᤜᤢᤰᤁᤥᤗᤠᤶ ᤜᤠ᤺ᤳᤋᤠᤱ ᤑᤡ᤺ᤴᤇᤡᤱᤔᤠ ᤔᤧᤴᤇᤢᤰᤏᤧᤸᤗᤥ. ᤀᤠᤱᤃᤠ᤹ ᤆᤥᤃᤢᤱᤒᤠ ᤕᤠ᤺ᤶᤒᤰᤁᤡᤴ ᤜᤠ᤺ᤳᤗᤧᤀᤠᤱ ᤗᤧᤱᤔᤠ ᤔᤧᤛᤢᤰᤋᤢᤸᤗᤥ॥” ᤒᤣᤒᤡᤗᤥᤏᤗᤠᤶᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤡᤛᤪᤠᤀᤡᤗᤧᤴ ᤛᤧ᤺ᤵᤋᤢ᤹ 14 ᤀᤡᤛᤪᤠᤀᤡᤗᤒᤠ ᤛᤣᤛᤣᤒᤠ ᤏᤡᤱᤘᤠ᤹ᤑᤢᤔᤠᤱ. ᤂᤧᤏᤡ᤹ ᤋᤠᤱᤃᤧᤛᤧ᤺ᤵᤐᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤁᤣ ᤐᤠ᤺ᤳᤋᤢᤖᤥ. “ᤂᤧᤏᤡ᤹ ᤋᤠᤱᤛᤧ᤺ᤵᤔᤠᤖᤧ ᤗᤠᤃᤡ ᤒᤣᤒᤡᤗᤥᤏ ᤕᤧᤰᤕᤰᤁᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤌᤰᤛᤢᤒᤠᤜᤠ᤹ ᤐᤠᤱᤄᤢᤱᤛᤡᤱᤗᤥ. ᤀᤠᤱᤃᤠ᤹ ᤂᤧᤴ ᤛᤠ᤹ᤖᤡᤰ ᤀᤠᤱᤍᤡᤱ ᤁᤧᤗ᤹ᤒᤠ ᤒᤣᤒᤡᤗᤥᤏᤡᤜᤠ᤹ ᤘᤠᤗᤠᤎᤠᤜᤠ᤹ᤀᤥ ᤔᤧᤄᤧᤳᤇᤡᤱᤗ ᤕᤠ᤺ᤴᤍᤢᤱᤛᤡᤱᤗᤥ ᤜᤧᤰᤁᤩᤠᤱ ᤂᤧ᤹ᤕᤥᤒᤠ ᤔᤏᤠᤜᤠ᤹ ᤔᤧᤜᤠ᤺ᤵ ᤔᤧᤈᤡ᤺ᤱᤗᤥ॥ 15 ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤠᤀᤠᤖᤥ. ᤂᤧᤏᤡ᤹ ᤛᤣᤛᤣ ᤏᤡᤱᤘᤠ᤹ᤑᤢᤔᤠᤱᤀᤠᤖᤥ. ᤀᤡᤛᤪᤠᤀᤡᤗᤧᤴ ᤏᤠᤘᤠᤃᤧᤴ ᤆᤀᤡ᤺ᤳ ᤁᤧᤏᤧᤒᤠᤀᤠᤖᤥ. ᤜᤧᤰᤁᤩᤠᤱ ᤂᤧᤏᤡ᤹ ᤜᤠᤱᤀᤠᤖᤥ॥” 16 ᤕᤜᤘᤣ ᤍᤠᤱᤒᤧᤸᤗᤧ ᤋᤢᤱᤃᤥᤍᤡᤱ ᤘᤖ᤺ᤱᤛᤶᤎᤠᤱ ᤔᤠᤖᤠᤶ ᤆᤥᤃᤢᤖᤥ. ᤂᤀᤡᤰ ᤂᤀᤡᤰ ᤁᤧᤀᤡᤰᤛᤡᤱᤒᤠ ᤆᤫᤠ᤺ᤳᤗᤠᤶ ᤗᤠᤶ ᤆᤥᤃᤢᤖᤥ. 17 ᤀᤴᤗᤠᤎᤠᤜᤠ᤹. ᤀᤴᤜᤠ᤹ ᤏᤢ ᤌᤰᤛᤢᤒᤠᤜᤠ᤹ ᤂᤢᤏᤧ᤹ ᤔᤧᤰᤂᤢᤛᤡᤖᤥ. ᤂᤧᤱᤜᤠ᤹ ᤀᤠᤓᤧᤸᤗᤧᤀᤠᤱ ᤐᤥ᤺ᤰᤔᤠ ᤔᤧᤴᤇᤢᤰᤁᤣ ᤔᤧᤈᤥᤴᤗᤥ. ᤇᤰᤁᤱᤅᤥ ᤜᤠ᤺ᤶᤔᤏᤠᤒᤠ ᤛᤣᤔᤡᤴ ᤛᤡᤒᤠ ᤜᤧᤰᤁᤣᤀᤣ ᤂᤧᤱᤜᤠ᤹ ᤔᤧᤛᤡᤖᤥ॥ 18 ᤁᤖ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤁᤣ ᤐᤠ᤺ᤳᤋᤢᤖᤥ— ᤁᤧᤒᤣ᤺ᤰᤐᤠ ᤐᤠ᤺ᤴᤜᤠ᤹ ᤏᤡᤱᤘᤠ᤹ ᤑᤣ᤺ᤳᤇᤧᤶᤔᤧ᤹ᤀᤥ. ᤀᤢᤴᤇᤥ᤺ᤴᤒᤠ ᤐᤠ᤺ᤴᤜᤠ᤹ ᤏᤡᤱᤘᤠ᤹ ᤔᤧᤀᤡ᤺ᤳᤋᤧᤶᤔᤡᤴᤏᤧ᤹ᤀᤥ॥ 19 ᤀᤥᤔᤧᤳᤋᤧᤶᤔᤧ᤹. ᤀᤠᤱᤃᤠ᤹ ᤗᤳᤇᤠ ᤁᤢᤛᤱ ᤐᤠᤴ ᤆᤥᤃᤢᤱᤗ ᤐᤳᤋᤠᤖᤥ᥄ ᤜᤧᤰᤁᤩᤠᤱ ᤀᤠᤸᤗ ᤂᤧᤴ ᤐᤥᤱᤗᤥ॥ ᤌᤣ ᤂᤧᤴ ᤂᤧᤏᤡ᤹ ᤁᤧᤴᤏᤡᤛᤢᤶᤔᤡᤴᤒᤡ᥅ ᤀᤠᤱᤃᤠ᤹ ᤔᤢᤖᤧᤰ ᤂᤠᤖᤧᤰᤐᤠ ᤕᤧ᤺ᤱᤄᤠᤍᤧᤴᤏᤥ ᤗᤳᤇᤠ ᤗᤠᤶ ᤋᤕᤢᤱᤗᤥ. ᤂᤧᤶᤒᤩᤠᤱ ᤆᤠ ᤔᤧᤴᤏᤢ᤹ᤔᤏᤠᤒᤠ ᤗᤠᤈᤣ᤹ᤀᤥ ᤕᤱᤄᤱ ᤘᤜ᤺ᤱᤜᤠ᤹ ᤁᤢᤱ ᤕᤢᤖ ᤕᤠ᤺ᤴᤍᤢᤱᤗᤥ॥ 20 ᤋᤠᤶᤓᤢᤱ ᤌᤰᤛᤠᤜᤠ᤹ᤖᤧ. ᤁᤡᤎᤡᤜᤠ᤹ᤖᤧ ᤜᤧᤰᤁᤩᤠᤱ ᤑᤰᤌᤡ᤺ᤶᤒᤠᤜᤠ᤹ᤖᤧ ᤔᤡᤱᤛᤥ ᤀᤡᤱᤎᤠᤱ ᤔᤧᤒᤡᤀᤠᤖᤥ. ᤌᤣᤀᤠᤱᤓᤧᤸᤗᤧ ᤀᤣ᤺ᤰᤛᤠᤍᤧᤴᤏᤥ ᤆᤫᤠ᤺ᤳ ᤐᤡᤖᤢᤱᤛᤡᤱᤗᤥ. ᤀᤠᤱᤃᤠ᤹ ᤀᤠᤔᤏᤠ. ᤀᤠᤱᤃᤠ᤹ ᤛᤣᤃᤢᤱᤛᤡᤱᤒᤠᤜᤠ᤹ᤖᤧ ᤂᤢᤴᤇᤡ᤹ ᤌᤢᤱᤔᤠᤖᤧᤗᤠᤃᤡ ᤕᤧᤱᤄᤠᤍᤧᤴᤜᤠ᤹ᤀᤥ ᤘᤜ᤺ᤱᤜᤠ᤹ ᤁᤢᤱᤗ ᤆᤥᤃᤢᤱ ᤐᤡᤖᤢᤱᤛᤡᤱᤗᤥ. 21 ᤀᤠᤱᤃᤠ᤹ ᤀᤠᤏᤠᤖᤠ ᤔᤧᤓᤥᤛᤢᤖ ᤑᤠ᤹ᤀᤠᤱ ᤁᤴ ᤔᤏᤠᤜᤠ᤹ ᤀᤠᤱᤃᤠ᤹ ᤀᤠᤗᤠᤃᤡ ᤆᤥᤃᤢᤱᤛᤡᤱᤒᤠᤖᤥ॥ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤗᤠᤕᤥ 22 “ᤜᤧᤰᤁᤣᤛᤠᤱ ᤕᤠᤁᤢᤒᤣ. ᤂᤧᤏᤧ᤹ ᤀᤠᤱᤃᤠ᤹ ᤐᤣᤗᤡ ᤔᤧᤶᤓᤠᤰᤁᤣ ᤁᤧᤃᤳᤋᤠᤖᤥ. ᤀᤡᤛᤪᤠᤀᤡᤗᤀᤣ. ᤂᤧᤏᤧ᤹ ᤀᤠᤱᤃᤠ᤹ ᤀᤠᤗᤠᤃᤡ ᤔᤧᤴᤏᤠᤀᤣ ᤁᤧᤘᤠ᤹ᤖᤥ॥ 23 ᤂᤧᤏᤧ᤹ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤛᤡᤍᤢᤱᤈᤓᤠ ᤋᤥ᤺ᤶᤔᤠᤖᤧ ᤗᤠᤃᤡ ᤔᤧᤸᤗᤢᤰ ᤔᤧᤴᤍᤠ᤺ᤳᤋᤣ ᤁᤧᤘᤠ᤹ᤖᤥ. ᤜᤧᤰᤁᤩᤠᤱ ᤘᤕᤠᤃᤧᤴ ᤛᤡᤍᤢᤱᤈᤓᤠ᤺ᤸᤗᤧ ᤀᤠᤱᤃᤠ᤹ ᤔᤡᤱᤛᤥ ᤀᤡᤱᤎᤠᤱ ᤔᤧᤶᤒᤡᤀᤣ ᤁᤧᤃᤳᤋᤠᤖᤥ॥ ᤁᤢᤈᤠ ᤛᤡᤍᤢᤱᤈᤓᤠ ᤋᤥ᤺ᤶᤔᤠᤀᤠᤱ ᤔᤠᤱᤛᤧᤘᤠ ᤀᤠᤕᤠ᤺ᤶᤒᤰ ᤆᤥ᤺ᤰᤔᤠᤖᤧ ᤗᤠᤃᤡ ᤂᤧᤏᤧ᤹ ᤁᤧᤗᤡ᤺ᤵᤐᤠ ᤁᤰ ᤔᤧᤱᤃᤢ᤺ᤳᤋᤣ ᤁᤳᤏᤧᤖᤥ. ᤂᤧᤒᤩᤠᤱ ᤛᤢᤰᤐᤠ ᤛᤠᤱᤛᤡᤱᤅᤠᤱ ᤏᤠ᤺ᤰᤏᤧᤀᤠᤱ ᤁᤧᤏᤠᤛᤧᤖ ᤕᤠ᤺ᤴᤏᤧᤒᤠ ᤜᤥᤵᤗᤥ॥ 24 ᤂᤧᤏᤧ᤹ ᤀᤠᤱᤃᤠ᤹ ᤀᤠᤗᤠᤃᤡ ᤁᤢᤏᤠᤶ ᤁᤧᤛᤧᤒᤠ ᤗᤢᤵᤗᤠ᤺ᤰᤁᤧᤴ ᤁᤧᤴᤀᤡᤅᤢᤴᤗᤥ. ᤂᤧᤏᤧ᤹ ᤛᤠᤛᤥ᤺ᤳᤋᤡᤸᤗᤧ ᤛᤡᤍᤢᤱᤈᤓᤠ ᤁᤧᤴᤍᤥ᤺ᤴᤍᤢᤴᤏᤠᤱ ᤀᤠᤛᤡᤰ ᤔᤧᤀᤣ᤺ᤵᤋᤢᤴᤗᤥ॥ ᤁᤖ ᤂᤧᤏᤧ᤹ ᤁᤧᤗᤠᤕᤥᤸᤗᤧ ᤁᤰ ᤁᤧᤃᤢ᤺ᤳᤋᤠᤱᤅᤠᤱ ᤘᤠ᤹ᤖᤥ. ᤂᤧᤏᤧ᤹ ᤁᤧᤗᤠᤕᤥᤸᤗᤧ ᤆᤥᤃᤢᤸᤗᤧ ᤏᤠᤛᤠᤱᤗ ᤁᤧᤕᤠ᤺ᤴᤍᤠᤱᤅᤠᤱ ᤘᤠ᤹ᤖᤥ॥ 25 “ᤀᤠᤱᤃᤠ᤹ ᤜᤠᤒᤠ ᤂᤧᤴᤏᤣᤀᤠᤖᤥ. ᤀᤠᤱᤃᤠ᤹ ᤁᤧᤗᤠᤕᤥ ᤁᤧᤗᤠᤛᤥ᤺ᤳᤜᤠ᤹ ᤀᤠᤗᤠᤃᤡ ᤋᤢᤃᤢᤱ ᤐᤡᤏᤧᤖᤥ. ᤜᤧᤰᤁᤩᤠᤱ ᤋᤠᤵᤑᤧ᤺ᤶᤒᤠ ᤁᤧᤕᤠ᤺ᤶᤒᤰᤜᤠ᤹ ᤏᤡᤱᤘᤠ᤹ ᤔᤧᤀᤡ᤺ᤳᤋᤠᤸᤗᤥ॥ 26 ᤀᤠᤱᤃᤠ᤹ ᤀᤠᤗᤠᤃᤡ ᤋᤃᤡᤒᤠ ᤐᤠ᤺ᤴᤜᤠ᤹ ᤏᤡᤱᤘᤠ᤹ᤛᤥᤀᤥ ᤋᤠᤖᤠᤶᤔᤧ᤹ᤀᤥ. ᤁᤴ ᤐᤠ᤺ᤴᤜᤠ᤹ᤖᤧ ᤗᤠᤃᤡ ᤀᤠᤏᤡ᤹ ᤛᤥᤖᤡᤰ ᤐᤠᤴ ᤌᤰᤋᤡᤖᤥ. ᤂᤧᤏᤧ᤹ ᤀᤠᤵᤋᤡᤰ ᤔᤣ᤺ᤴᤏᤣᤒᤠ ᤁᤢᤍᤥ᤺ᤵᤔᤠ ᤏᤡᤎᤠ᤺ᤵᤔᤠᤖᤧ ᤗᤠᤃᤡ ᤁᤧᤒᤠ᤺ᤴᤜᤠ᤹ ᤕᤢᤰᤂᤧ᤹ᤀᤥ॥ 27 ᤌᤡᤰᤛᤡᤃᤣᤰᤐᤠ ᤁᤧᤎᤠ᤺ᤰ ᤌᤧᤒᤠ᤺ᤸᤗᤧ ᤗᤠᤕᤥ ᤆᤥᤃᤢᤖᤥ. ᤜᤧᤰᤁᤩᤠᤱ ᤁᤧᤗᤠᤶᤗᤥᤒᤠᤜᤠ᤹ ᤀᤠᤍᤰᤗᤧᤱᤘᤠᤀᤥ ᤐᤡᤑᤩᤢᤱᤒᤠ ᤔᤧᤒᤥ᤺ᤰᤂᤧᤖᤥ॥ 28 ᤁᤸᤗᤧᤆᤥᤃᤢᤸᤗᤧ ᤂᤧᤏᤧ᤹ ᤁᤧᤔᤠᤱᤜᤡᤶᤔᤥᤒᤠ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤛᤡᤖᤡᤱ ᤔᤧᤔᤖ ᤕᤠ᤺ᤴᤍᤢᤛᤡᤱᤗᤥ. ᤜᤧᤰᤁᤩᤠᤱ ᤕᤠᤁᤢᤒᤧᤴ ᤔᤧᤰᤔᤠᤖᤧ ᤗᤠᤃᤡ ᤏᤢ ᤀᤡᤛᤪᤠᤀᤡᤗᤧᤴ ᤀᤠᤵᤋᤡᤰᤁᤥ ᤌᤠᤔᤠᤖᤧ ᤗᤠᤃᤡ ᤔᤏᤠᤜᤠ᤹ ᤜᤢᤰᤛᤢᤵᤋᤢᤱᤛᤡᤱᤗᤥ॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.