ᤕᤛᤤᤕᤠ 42 - LIFOTNTᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤧᤘᤠᤖᤥᤒᤠ 1 ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤖᤥ. “ᤁᤴ ᤀᤠᤱᤃᤠ᤹ ᤀᤠᤛᤧᤘᤠᤖᤥᤒᤠᤖᤥ. ᤂᤧᤴ ᤀᤠᤱᤃᤠ᤹ ᤁᤧᤎᤢᤶᤒᤠ ᤆᤥᤃᤢᤱᤗᤥ. ᤂᤧᤴ ᤛᤣᤃᤢᤱᤅᤠᤱ ᤘᤠ᤹ᤖᤥ ᤂᤢᤏᤧ᤹ᤏᤢ ᤀᤠᤱᤃᤠ᤹ ᤛ᤺ᤳᤋᤠᤱᤅᤠᤱ ᤘᤠ᤹ᤀᤠᤖᤥ॥ ᤀᤠᤱᤃᤠ᤹ ᤂᤧᤴ ᤀᤠᤕᤠᤶᤛᤠᤶᤔᤡᤸᤗᤧ ᤌᤢᤰᤋᤢᤖ ᤕᤠ᤺ᤴᤍᤢᤱᤅᤠᤱ ᤘᤠ᤹ᤖᤥ ᤜᤧᤰᤁᤩᤠᤱ ᤂᤧᤸᤗᤧ ᤁᤧᤖᤧᤰ ᤛᤢᤘᤠᤱᤜᤠ᤹ᤀᤥ ᤁᤢᤍᤥ᤺ᤵᤔᤠ ᤂᤠᤛᤧᤴ ᤋᤠᤖᤢᤖᤥ॥ 2 ᤂᤧᤴ ᤔᤧᤀ᤺ᤰᤏᤧᤴ. ᤜᤧᤰᤁᤩᤠᤱ ᤔᤧᤓᤡ᤺ᤰᤏᤧᤴᤏᤠᤱᤗᤥ ᤀᤡᤃᤪ ᤂᤧᤸᤗᤧ ᤁᤢᤀᤡᤰᤗᤠᤴ ᤔᤠᤖᤠᤶᤔᤥ ᤔᤏᤠᤜᤠ᤹ᤖᤧ ᤔᤧᤄᤧᤵᤛᤢᤖ ᤔᤧᤈᤥᤃᤢᤴᤗᤥ॥ 3 ᤂᤧᤸᤗᤧ ᤁᤧᤕ᤺ᤵᤐᤠ ᤔᤡᤰᤗᤠᤎᤡᤰᤁᤠᤱ ᤔᤧᤀᤧᤰᤂᤢᤴᤗᤥ. ᤜᤧᤰᤁᤩᤠᤱ ᤛᤡᤍᤥ᤹ᤍᤥ᤹ᤒᤠ ᤛᤣᤔᤡ᤺ᤴᤏᤠᤱ ᤂᤧᤸᤗᤧ ᤔᤧᤛᤧᤖᤢᤸᤗᤥ. ᤂᤧᤸᤗᤧ ᤏᤛᤠ᤺ᤴᤏᤥ ᤁᤢᤍᤥ᤺ᤵᤔᤠ ᤂᤠᤛᤧᤴ ᤗᤥ᤺ᤴᤍᤢᤖᤥ॥ 4 ᤂᤧᤸᤗᤧ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤁᤥ ᤂᤠᤛᤧᤴ ᤆᤥ᤺ᤰᤔᤠ ᤕᤠ᤺ᤶᤒᤰᤁᤡᤴ ᤌᤎᤵ ᤔᤧᤸᤗ᤹ᤔᤏᤠᤒᤠ ᤔᤧᤴᤈᤥ᤺ᤰᤁᤣ ᤌᤠᤖᤡᤰ ᤂᤢᤏᤧ᤹ ᤕᤥ᤺ᤴᤈᤥ᤹ᤈᤥ᤹ᤒᤠ ᤔᤧᤴᤎᤢᤶᤔᤏᤠᤒᤠ ᤔᤧᤒᤥᤱᤏᤧᤸᤗᤥ॥ ᤜᤧᤰᤁᤩᤠᤱ ᤁᤢᤛᤡᤰᤁᤠᤱ ᤔᤧᤓᤧᤰᤏᤧᤸᤗᤥ. ᤂᤧᤸᤗᤧ ᤁᤢᤏᤡᤛᤠᤶᤔᤥ ᤘᤠᤃᤵᤂᤠᤶᤔᤥ ᤁᤧᤕᤢᤱᤒᤠᤜᤠ᤹ᤖᤧ ᤗᤠᤶ ᤀᤥᤔᤧᤔᤧᤳᤋᤢᤖᤥ॥” 5 ᤏᤡᤱᤘᤠ᤹ᤑᤢᤔᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤖᤥ— ᤋᤠᤱᤛᤠᤱᤒᤧᤴ ᤁᤧᤈᤥ᤺ᤰᤐᤠᤀᤠᤱ ᤂᤧᤴ ᤁᤧᤄᤡᤱᤒᤧᤴ. ᤜᤧᤰᤁᤩᤠᤱ ᤀᤡᤰᤛᤠᤍᤡᤱ ᤂᤠᤶᤒᤣᤰ ᤏᤢ ᤂᤧᤵᤔᤥᤗᤠᤶ ᤁᤧᤗ᤺ᤶᤒᤠ ᤁᤧᤖᤧᤰ ᤔᤧᤒᤥ᤺ᤴᤗ ᤔᤧᤎᤧ᤹ᤖ ᤁᤧᤕᤠ᤺ᤶᤒᤠ. ᤂᤧᤒᤩᤠᤱ ᤂᤧᤵᤔᤥ ᤁᤧᤘᤠ᤹ᤒᤠ ᤔᤏᤠᤜᤠ᤹ ᤛᤠ᤺ᤱᤃᤢ ᤛᤰᤔᤠ ᤁᤧᤒᤡᤒᤠ ᤂᤧᤶᤒᤩᤠᤱ ᤂᤧ᤹ᤕᤥ ᤗᤠᤱᤃᤧᤄᤣ᤺ᤰᤐᤠᤜᤠ᤹ ᤕᤠᤶᤛᤠᤶ ᤁᤧᤒᤡᤒᤠ— 6 “ᤀᤠᤱᤃᤠ᤹. ᤕᤜᤘᤣ ᤍᤠᤱᤒᤧᤸᤗᤧ ᤀᤠᤛᤠᤶᤕᤥᤒᤠ ᤀᤠᤕᤠ᤺ᤶᤒᤰ ᤁᤢᤀᤡᤛᤡᤰ ᤂᤧᤏᤡ᤹ ᤀᤢ᤺ᤳᤏᤡᤱᤅᤠᤱ ᤘᤠ᤹ᤖᤥ॥ ᤀᤠᤱᤃᤠ᤹ ᤂᤧᤏᤧ᤹ ᤁᤧᤜᤢᤰᤁᤡᤴ ᤋᤧᤶᤛᤢᤱ. ᤜᤧᤰᤁᤩᤠᤱ ᤛᤧ᤺ᤵᤏᤧᤖᤥ. ᤂᤧᤏᤧ᤹ᤀᤣ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤁᤥᤒᤠ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤗᤠᤃᤡ ᤔᤠᤱᤜᤧᤰ ᤆᤥ᤺ᤰᤏᤧᤖᤥ ᤂᤶᤒᤩᤠᤱ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤖᤧ ᤂᤢᤏᤡ᤹ ᤗᤠᤃᤡ ᤀᤥ᤺ᤳᤋᤡ ᤆᤥ᤺ᤰᤏᤧᤖᤥ॥ 7 ᤂᤧᤏᤧ᤹ ᤔᤡᤰᤑ᤺ᤶᤒᤠᤜᤠ᤹ᤖᤧ ᤂᤢᤴᤇᤡ᤹ ᤔᤡᤰᤁᤡᤴ ᤁᤧᤜᤴᤍᤢ ᤁᤧᤒᤡᤖᤢᤛᤡᤖᤥ. ᤐᤢᤱᤗᤠᤜᤡᤶᤔᤥ ᤛᤠᤰᤐᤠ ᤁᤧᤎᤠᤒᤠᤀᤠᤱ ᤁᤧᤕᤢᤱᤒᤠᤜᤠ᤹ ᤁᤧᤗᤧᤖᤢᤛᤡᤖᤥ ᤂᤠᤃᤧᤔᤠᤰᤐᤠ ᤗᤢᤶᤒᤠ᤺ᤳᤋᤥᤗᤠᤶ ᤗᤠ᤺ᤰᤁᤠᤳ ᤁᤧᤗ᤺ᤳᤋᤢᤛᤡᤖᤥ॥ 8 “ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤠᤀᤠᤖᤥ. ᤀᤠᤱᤃᤠ᤹ ᤀᤠᤔᤡᤱ ᤜᤠᤒᤠ ᤂᤧᤴᤏᤣᤖᤥ᥄ ᤀᤠᤱᤃᤠ᤹ ᤀᤠᤔᤡᤔᤡᤍᤡᤱᤅᤡᤴ ᤘᤣ᤹ᤜᤠ᤹ ᤔᤧᤒᤡᤀᤠᤛᤡᤱᤅᤡᤸᤗᤥ. ᤀᤡᤃᤪ ᤀᤠᤱᤃᤠ᤹ ᤀᤠᤏᤠᤖᤠ ᤑᤥᤔᤠᤴ ᤏᤠᤘᤠᤀᤡᤳᤗᤠᤜᤠ᤹ ᤔᤧᤒᤡᤖᤢᤱᤛᤡᤱᤅᤡᤸᤗᤥ॥ 9 ᤀᤥᤔᤧᤳᤋᤧ᤹. ᤋᤃᤡᤒᤠ ᤐᤠ᤺ᤴᤜᤠ᤹ ᤐᤥ᤺ᤰᤂᤧ ᤆᤢᤖᤧᤖᤥ. ᤀᤠᤱᤃᤠ᤹ ᤁᤢᤛᤱ ᤐᤠ᤺ᤴᤜᤠ᤹ ᤆᤧᤰᤂᤢᤱ ᤐᤠ᤺ᤳᤋᤢᤱᤗᤥ॥ ᤂᤧᤱᤜᤠ᤹ ᤐᤥᤱᤔᤠᤏᤢ᤺ᤸᤗᤧ ᤋᤃᤡᤀᤣ ᤀᤠᤱᤃᤠ᤹ ᤂᤧᤴ ᤐᤠ᤺ᤴᤜᤠ᤹ᤖᤧ ᤁᤢᤕᤠ᤺ᤶᤒᤣᤀᤥ ᤔᤧᤳᤏᤡᤱᤗᤥ॥” ᤕᤜᤘᤣ ᤍᤠᤱᤒᤧᤸᤗᤧ ᤁᤢᤏᤠᤖᤠ ᤑᤥᤔᤠ ᤛᤠᤶᤗᤥ 10 ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤃᤡ ᤁᤢᤛᤱ ᤛᤠᤶᤗᤥᤎᤡᤰ ᤛᤠᤶᤔᤧᤳᤋᤠᤶᤔᤧ᤹ᤀᤥ. ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤸᤗᤧ ᤏᤠᤛᤔᤠ ᤁᤢᤕᤠᤀᤥᤏᤢ ᤂᤢᤏᤧ᤹ ᤁᤢᤏᤠᤖᤠ ᤑᤥᤛᤧᤶᤔᤧ᤹ᤀᤥ. ᤋᤢᤱᤃᤥᤍᤡᤱ ᤘᤖ᤺ᤱᤅᤥ ᤗᤠᤶᤍᤡᤰ ᤁᤧᤈᤥ᤺ᤰᤐᤠᤛᤣ. ᤜᤧᤰᤁᤩᤠᤱ ᤂᤧ᤹ᤕᤥ ᤁᤧᤕᤠᤰᤐᤠ ᤁᤧᤖᤧᤰ ᤐᤖᤡᤰᤐᤠ ᤐᤠᤎᤢᤱ ᤗᤧ᤺ᤰᤅᤠᤛᤣ. ᤘᤠᤃᤵᤂᤠᤶᤜᤠ᤹ ᤏᤢ ᤂᤧ᤹ᤕᤥ ᤁᤧᤕᤢᤱᤒᤠᤛᤣ ᤛᤠᤶᤗᤥᤖᤧᤶᤔᤧ᤹ᤀᤥ᥄ 11 ᤔᤢᤖᤧᤰ ᤂᤠᤖᤧᤰᤐᤠ ᤕᤧ᤺ᤱᤄᤠᤍᤧᤴ ᤏᤢ ᤂᤧᤵᤔᤥᤒᤠ ᤐᤠᤱᤈᤢᤶᤜᤠ᤹ᤀᤥ ᤁᤧᤕᤢᤱᤒᤠᤜᤠ᤹ ᤔᤧᤀ᤺ᤰᤗᤖᤥ॥ ᤁᤣᤍᤠᤖ ᤁᤧᤕᤢᤱᤒᤠ ᤐᤠᤱᤓᤣ᤹ᤀᤥᤒᤠ ᤔᤏᤠᤜᤠ᤹ ᤛᤠᤶᤔᤧᤗᤥᤖᤖᤥ. ᤛᤣᤗᤠᤒᤠ ᤔᤏᤠᤜᤠ᤹ ᤔᤧᤛ᤺ᤳᤋᤠᤱ ᤛᤠᤶᤔᤧᤗᤥᤖᤖᤥ. ᤂᤧᤱᤜᤠ᤹ ᤌᤧᤃᤢ ᤛᤶᤎᤠᤱᤗᤠᤶ ᤔᤧᤀ᤺ᤰᤗᤖᤥ॥ 12 ᤂᤧᤱᤜᤠ᤹ᤖᤧ ᤕᤜᤘᤣ ᤍᤠᤱᤒᤠᤴ ᤔᤡᤔᤡᤍᤡᤱ ᤔᤧᤒᤡᤖᤢᤖᤖᤥ. ᤘᤠᤃᤵᤂᤠᤶᤜᤠ᤹ᤀᤥ ᤂᤢᤏᤧ᤹ ᤁᤢᤏᤠᤖᤠ ᤑᤥᤔᤠ ᤀᤢᤘᤠ ᤔᤧᤈᤥᤃᤢᤖᤖᤥ॥ 13 ᤕᤜᤘᤣ ᤍᤠᤱᤒᤠᤴ ᤔᤢᤰᤁᤧᤃᤢᤒᤠ ᤕᤧᤶᤒᤡᤳᤇᤠ ᤁᤢᤀᤡᤛᤡᤰ ᤗ᤺ᤴᤗᤥ. ᤗᤳᤇᤠ ᤌᤰᤛᤢᤒᤠ ᤁᤢᤀᤡᤛᤡᤰ ᤂᤢᤏᤧ᤹ ᤁᤢᤛᤡᤰ ᤛᤶᤔᤧᤴ ᤀᤥᤛᤣ᤺ᤴᤎᤠᤱ ᤆᤥᤃᤢ᤹ᤖᤥ॥ ᤂᤢᤏᤧ᤹ ᤀ᤺ᤰ. ᤜᤧᤰᤁᤩᤠᤱ ᤌᤱ ᤆᤥ᤺ᤰᤔᤠ ᤕᤶᤒᤠ ᤀᤡᤰᤗᤠᤀᤥ ᤀ᤺ᤰᤗᤥ. ᤂᤢᤏᤧ᤹ ᤁᤢᤏᤡᤱᤔᤡᤜᤠ᤹ ᤏᤠ᤺ᤴᤍᤢᤛᤡᤖᤥ॥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤏᤠᤜᤠ᤹ ᤑᤠ᤹ᤔᤠᤛᤡ ᤔᤠᤱᤜᤢᤵ ᤆᤥᤃᤢ 14 “ᤕᤖᤡᤰ ᤕᤧᤶ ᤌᤠᤖᤡᤰ ᤀᤠᤱᤃᤠ᤹ ᤛᤫᤠ᤺ᤳ ᤕᤢᤅᤠᤱᤗᤥ. ᤀᤠᤱᤃᤠ᤹ ᤔᤧᤶᤒᤠ᤺ᤳᤋᤣ ᤕᤢᤅᤠᤱᤗᤥ. ᤜᤧᤰᤁᤩᤠᤱ ᤀᤠᤒᤠᤅᤣ ᤌᤣ᤺ᤰᤛᤡᤱᤅᤠᤖᤥ॥ ᤁᤖ ᤀᤅᤧ᤺ᤰᤘᤠ ᤛᤠᤃᤧᤘᤠ᤺ᤶᤔᤠ ᤔᤧᤴᤇᤢᤔᤠ ᤁᤢᤛᤡᤱ ᤀᤠᤸᤗ ᤀ᤺ᤰᤁᤠᤖᤥ. ᤀᤠᤱᤃᤠ᤹ ᤜᤧᤱᤃᤧ᤺ᤰ ᤜᤧᤱᤃᤧ᤺ᤰ ᤗ᤹ᤀᤠᤖᤥ ᤂᤧᤒᤩᤠᤱ ᤛᤰᤔᤠ ᤛᤥ᤺ᤴᤇᤡᤱᤅᤠᤖᤥ॥ 15 ᤀᤠᤱᤃᤠ᤹ ᤁᤥ᤺ᤰᤔᤠ ᤑᤠᤱᤈᤱ ᤏᤢ ᤌᤧᤃᤢ ᤔᤠᤱᤘᤠᤜᤠ᤹ ᤔᤢᤖᤧᤰ ᤂᤠᤖᤧᤰ ᤆᤥᤃᤢᤱᤗᤥ. ᤜᤧᤰᤁᤩᤠᤱ ᤂᤧᤵᤔᤥ ᤁᤧᤕᤢᤱᤒᤠ ᤁᤧᤖᤧᤰ ᤛᤡᤱᤒᤢᤱᤜᤠ᤹ ᤛᤷᤃᤧᤱ ᤜᤣᤛᤢᤱᤗᤥ॥ ᤘᤜ᤺ᤱᤜᤠ᤹ ᤘᤠᤃᤵᤂᤠᤶ ᤐᤥᤱᤗ ᤗᤧᤰᤂᤢᤱᤗᤥ. ᤂᤧᤒᤩᤠᤱ ᤘᤖᤰᤜᤠ᤹ ᤆᤵᤐᤪᤧᤰ ᤆᤵᤛᤢᤱᤗᤥ॥ 16 ᤀᤠᤱᤃᤠ᤹ ᤔᤡᤰᤑ᤺ᤶᤒᤠᤜᤠ᤹ ᤂᤧᤱᤜᤠ᤹ᤖᤧ ᤔᤧᤴᤏᤡᤛᤢᤶᤒᤠ ᤗᤠᤶᤔᤥ ᤗᤠᤶᤗᤥᤛᤢᤱᤛᤡᤱᤗᤥ॥ ᤂᤧᤱᤜᤠ᤹ᤖᤧ ᤁᤢᤛᤡᤱ ᤔᤧᤴᤏᤡ᤺ᤳᤋᤢᤶᤒᤠ ᤗᤠᤶᤔᤡᤴ ᤂᤧᤱᤜᤠ᤹ ᤀᤥᤛᤣ᤺ᤴᤎᤠᤰᤋᤢᤱᤛᤡᤱᤗᤥ॥ ᤀᤠᤱᤃᤠ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤋᤃᤡ ᤂᤠᤃᤧᤔᤠᤰᤐᤧᤴ ᤂᤠᤃᤧᤀᤥ᤺ᤵᤐᤠ ᤆᤥᤃᤢᤱᤗᤥ ᤜᤧᤰᤁᤩᤠᤱ ᤐᤠᤰᤗᤢᤶ ᤀᤢ᤺ᤰᤆᤶ ᤁᤧᤗ᤹ᤒᤠ ᤋᤧᤴᤜᤠ᤹ ᤗᤧᤵᤐᤧᤵᤐᤠ ᤋᤱᤛᤢᤱᤗᤥ॥ ᤀᤠᤱᤃᤠ᤹ ᤁᤴ ᤕᤠ᤺ᤶᤒᤰᤜᤠ᤹ ᤆᤥᤃᤢᤱᤗᤥ. ᤀᤠᤱᤃᤠ᤹ ᤂᤧᤏᤡ᤹ ᤔᤧᤗᤧᤳᤏᤧᤴᤏᤡᤱᤗᤥ॥ 17 ᤁᤖ ᤔᤠᤱᤛᤠᤶᤔᤠᤱᤜᤠ᤹ ᤏᤠᤃᤧᤛᤠ᤹ᤒᤠᤜᤠ᤹. ᤜᤧᤰᤁᤩᤠᤱ ᤏᤠᤘᤠᤀᤡᤳᤗᤠᤜᤠ᤹ ‘ᤂᤧᤏᤡ᤹ᤀᤣ ᤀᤠᤏᤡᤃᤣ ᤔᤠᤱᤏᤡᤱᤗᤥ’ ᤁᤧᤔᤧᤵᤐᤠᤜᤠ᤹ ᤏᤠᤎᤠᤔᤥ ᤔᤧᤎᤠᤖᤥ॥” ᤀᤡᤛᤪᤠᤀᤡᤗᤒᤠ ᤔᤏᤠᤜᤠ᤹ ᤔᤧᤴᤜᤢ᤹ᤛᤡᤱᤅᤧᤴ 18 ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤖᤥ. “ᤏᤠᤎᤠᤰᤐᤠᤛᤣ. ᤏᤧᤰᤂᤥ᤹ᤒᤠᤸᤗᤧ ᤂᤧᤵᤛᤠᤶᤔᤧ᤹ᤀᤥ. ᤔᤡᤰᤑ᤺ᤶᤒᤠᤛᤣ. ᤏᤢᤖᤡᤰᤁᤠᤱ ᤀᤥᤔᤧᤳᤋᤧᤶᤔᤧ᤹ᤀᤥ॥ 19 ᤀᤠᤱᤃᤠ᤹ ᤀᤠᤛᤧᤘᤠᤖᤥᤒᤠᤴᤏᤢ᤺ᤸᤗᤧ ᤘᤣ᤹ ᤔᤡᤰᤑ᤺ᤶᤒᤠ ᤜᤠᤳ ᤘᤠ᤹ᤒᤣ᥅ ᤀᤡᤃᤪ ᤀᤠᤱᤃᤠ᤹ ᤐᤠᤱᤄᤢᤱᤒᤠ ᤀᤡᤱᤄᤱᤛᤠᤒᤠᤴ ᤜᤧᤰᤋᤱᤒᤠ ᤏᤠᤎᤠᤰᤐᤠ ᤘᤣ᤹ ᤜᤠᤳ ᤘᤠ᤹ᤒᤣ᥅ ᤀᤠᤱᤃᤠ᤹ᤀᤥ ᤜᤢᤰᤁᤧᤛᤢᤵᤛᤡᤱᤒᤠ ᤜᤧᤰᤋᤱᤒᤠ ᤔᤡᤰᤑ᤺ᤶᤒᤠ ᤀᤣ᤺ᤴ ᤘᤠ᤹ᤒᤣ᥅ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤧᤘᤠᤖᤥᤒᤠ ᤜᤧᤰᤋᤱᤒᤠ ᤀᤠᤛᤠ᤺ᤳ ᤘᤠ᤹ᤒᤣ᥅ 20 ᤂᤧᤏᤧ᤹ ᤕᤖᤡᤰ ᤐᤠ᤺ᤴᤜᤠ᤹ ᤁᤧᤏᤡᤛᤢᤀᤠᤱ ᤁᤧᤘᤠ᤹ᤖᤥ. ᤁᤖ ᤛᤡᤱᤛᤡᤱ ᤕᤧᤰᤕᤧᤰᤁᤠᤱ ᤏᤡᤱᤘᤠ᤹ᤀᤥ ᤔᤧᤴᤕᤢᤱᤅᤣ ᤁᤧᤃᤳᤋᤢᤖᤥ॥ ᤂᤧᤏᤡ᤹ ᤁᤧᤏᤧᤓᤠᤰᤜᤠ᤹ᤃ ᤜᤱ ᤗ᤹ᤖᤡᤰᤁᤣ ᤐᤳᤗᤥ. ᤁᤖ ᤂᤧᤏᤧ᤹ ᤌᤣᤀᤠᤱ ᤁᤧᤱᤄᤧᤵᤛᤢᤸᤗᤥ॥ 21 ᤀᤠᤒᤠᤅᤣ ᤁᤢᤛᤠᤶᤕᤥᤏᤡᤔᤠᤸᤗᤧ ᤗᤠᤃᤡ ᤀᤠᤒᤠᤅᤣ ᤁᤢᤛᤠᤶᤕᤥᤌᤡᤶ ᤀᤡᤱᤈᤠᤱᤅᤡᤴ ᤕᤶᤒᤠ ᤆᤥ᤺ᤰᤔᤠ ᤏᤢ ᤔᤡᤔᤡᤍᤡᤱ ᤐᤡᤔᤠ ᤕᤜᤘᤣ ᤍᤠᤱᤒᤧᤴ ᤁᤢᤛᤡᤖᤠ᤹ ᤌᤠᤅᤧᤖᤥ॥ 22 ᤁᤖ ᤁᤴᤜᤠ᤹ᤃ ᤗᤳᤇᤠ ᤀᤰᤋᤱᤒᤠ ᤛᤢᤘᤠᤱᤛᤡᤖᤥ. ᤂᤧᤱᤜᤠ᤹ ᤀᤡᤱᤗᤧᤰᤁᤥ ᤔᤧᤎᤩᤧᤀᤠᤱ ᤔᤧᤏᤠᤵᤋᤢᤛᤡᤀᤠᤱ ᤔᤧᤘᤠ᤹ᤖᤥ॥ ᤂᤧᤱᤜᤠ᤹ ᤁᤧᤖᤧᤰ ᤗᤢᤶᤒᤠ᤺ᤳᤋᤥ ᤔᤧᤎᤩᤧᤀᤠᤱ ᤔᤧᤕᤠᤰᤗᤥ ᤀᤡᤃᤪ ᤐᤢᤱᤗᤠᤜᤡᤶᤔᤥ ᤛᤠᤰᤐᤠ ᤔᤧᤎᤩᤧᤀᤠᤱ ᤔᤧᤕᤠᤰᤗᤥ॥ ᤂᤧᤱᤜᤠ᤹ ᤔᤧᤏᤠᤵᤋᤢᤛᤡᤀᤠᤱ ᤁᤧᤏᤠᤱᤒᤠ ᤁᤧᤎᤣ᤺ᤰᤐᤠ ᤜᤠ᤺ᤳᤋᤠᤱ ᤜᤥᤵᤗᤥ. ᤂᤧᤱᤜᤠ᤹ ᤔᤧᤏᤠᤵᤋᤢ ᤔᤧᤍᤣ᤹ᤖᤢᤛᤡᤒᤠ ᤕᤠᤱᤛᤠᤁᤢᤴᤎᤣᤜᤠ᤹ ᤏᤢ᤺ᤰᤋᤠᤶ ᤐᤡᤖᤠᤶᤛᤡᤶᤔᤧ᤹ ᤁᤧᤗ᤹ᤒᤠ ᤜᤠ᤺ᤳᤋᤠᤱ ᤜᤥᤵᤗᤥ॥ 23 “ᤂᤧᤏᤡ᤹ ᤗᤢᤶᤔᤥ ᤁᤴ ᤐᤠ᤺ᤴᤏᤡᤴ ᤁᤧᤄᤧᤶᤒᤠ ᤜᤠᤳ ᤘᤠ᤹ᤒᤣ᥅ ᤀᤡᤃᤪ ᤁᤧᤍᤠᤒᤠ ᤕᤧᤶᤔᤡᤴ ᤏᤢᤖᤡᤰ ᤁᤧᤄᤧᤶᤒᤠ ᤀᤣ᤺ᤴ ᤘᤠ᤹ᤒᤣ᥅ 24 ᤆᤡᤃᤰᤘᤠ ᤕᤠᤱᤛᤠᤁᤢᤴᤎᤣ ᤁᤧᤏᤠᤵᤐᤠᤜᤠ᤹ᤖᤧ ᤂᤢᤴᤇᤡ᤹ ᤜᤢᤰᤁᤥ ᤕᤠᤁᤢᤒᤧᤴ ᤜᤠ᤺ᤳᤗᤧ ᤜᤢᤰᤛᤢᤵᤋᤢᤒᤣ. ᤜᤧᤰᤁᤩᤠᤱ ᤀᤡᤛᤪᤠᤀᤡᤗᤧᤴ ᤑᤠ᤺ᤴᤍᤠᤜᤠ᤹ᤖᤧ ᤂᤢᤴᤇᤡ᤹ ᤜᤢᤰᤁᤥ ᤜᤠ᤺ᤳᤗᤧ ᤌᤠᤛᤢᤒᤣ᥅ ᤌᤣ ᤀᤠᤏᤡ᤹ ᤂᤢᤏᤧ᤹ ᤁᤢᤍᤰᤗᤧᤱᤘᤠᤀᤥ ᤗᤠᤕᤥ ᤀᤠᤈᤥᤃᤢᤶᤒᤠ ᤕᤜᤘᤣ ᤍᤠᤱᤒᤧᤸᤗᤧᤀᤣ ᤌᤠᤛᤢᤛᤡᤒᤠ ᤔᤣ᤺ᤶᤒᤡ᥅ ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ ᤂᤢᤏᤧ᤹ ᤁᤢᤗᤠᤶᤔᤥ ᤗᤠᤱᤔᤧᤱᤄᤣᤃᤧᤸᤗᤥ. ᤂᤧᤱᤜᤠ᤹ᤖᤧ ᤂᤢᤏᤧ᤹ ᤁᤢᤀᤡᤱᤈᤠᤱᤅᤡᤴ ᤔᤧᤴᤀᤡ᤺ᤳᤋᤢᤴ ᤔᤧᤴᤏᤠ᤺ᤳᤋᤢᤸᤗᤥ॥ 25 ᤂᤧᤸᤗᤧᤆᤥᤃᤢᤸᤗᤧ. ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤛᤶᤎᤠᤱ ᤔᤡ ᤜᤧᤰᤋᤱᤒᤠ ᤂᤢᤏᤧ᤹ ᤁᤢᤛᤡᤰᤁᤧᤴ ᤌᤠᤛᤢᤖᤥ ᤜᤧᤰᤁᤩᤠᤱ ᤋᤧᤴᤎᤱᤅᤥ ᤂᤧᤱᤜᤠ᤹ ᤔᤧᤰᤂᤢᤛᤡᤖᤥ॥ ᤂᤧᤸᤗᤧᤆᤥᤃᤢᤸᤗᤧ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤁᤧᤖᤧᤰ ᤐᤡᤛᤠᤱ ᤔᤡ ᤋᤡᤖᤧᤖᤥ. ᤜᤶᤓᤛᤠᤱ ᤂᤧᤱᤜᤠ᤹ᤖᤧ ᤁᤢᤛᤡᤱ ᤔᤧᤴᤏᤡ᤺ᤳᤋᤢᤸᤗᤥ॥ ᤂᤧᤴ ᤔᤡ᤺ᤸᤗᤧ ᤂᤧᤱᤜᤠ᤹ ᤔᤧᤰᤂᤢᤛᤡᤖᤥ. ᤜᤧᤰᤁᤣᤛᤠᤱ ᤂᤧᤴ ᤐᤠ᤺ᤴᤏᤡᤴ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤏᤡᤱᤘᤠ᤹ᤀᤥ ᤔᤧᤴᤕᤢᤰᤂᤢᤸᤗᤥ॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.