ᤕᤛᤤᤕᤠ 41 - LIFOTNTᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤡᤛᤪᤠᤀᤡᤗᤡᤜᤠ᤹ ᤏᤡᤱᤘᤠ᤹ ᤏᤡ᤺ᤴᤎᤥ ᤐᤡᤖᤢᤛᤡ 1 “ᤘᤜ᤺ᤱ ᤏᤠᤜᤠᤱᤒᤠ ᤗᤠᤈᤣ᤹ᤀᤥ ᤁᤧᤕᤢᤱᤒᤠ ᤔᤏᤠᤛᤣ. ᤀᤠᤱᤃᤠ᤹ ᤀᤠᤒᤣᤛᤠᤱ ᤛᤫᤠ᤺ᤳ ᤕᤢᤅᤧᤶᤔᤧ᤹ᤀᤥ॥ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤁᤢᤛᤱ ᤗ᤹ᤖᤡᤰ ᤁᤧᤎᤢᤶᤒᤠ ᤔᤧᤒᤥᤱᤗᤖᤥ᥄ ᤂᤧᤱᤜᤠ᤹ ᤏᤡ᤺ᤳᤋᤠᤱ ᤔᤧᤍᤠᤀᤠᤱ ᤔᤧᤒᤠ᤺ᤳᤗᤖᤥ. ᤀᤠᤏᤡ᤹ ᤛᤥᤖᤡᤰ ᤂᤠᤛᤧᤴᤍᤧᤴᤏᤥ ᤆᤢᤵᤛᤡᤖᤥ॥ 2 “ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤠᤶᤕᤥᤏᤡᤔᤥ ᤁᤢᤛᤧᤘᤠ ᤕᤠ᤺ᤶᤒᤰ ᤆᤥ᤺ᤰᤔᤠᤖᤧ ᤗᤠᤃᤡ ᤜᤠᤳ ᤀᤢ᤺ᤳᤋᤢᤀᤠᤱ ᤘᤠ᤹ᤒᤣ᥅ ᤋ᤹ᤀᤡ ᤏᤠᤱᤃᤧᤴ ᤐᤡᤛᤠᤱᤏᤢ ᤜᤠᤱᤅᤡᤴ ᤜᤠ᤺ᤳᤗᤧ ᤁᤢᤛᤡᤰᤛᤔᤧᤖ ᤕᤠ᤺ᤴᤍᤢᤀᤠᤱ ᤘᤠ᤹ᤒᤣ᥅ ᤂᤢᤏᤧ᤹ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤁᤢᤕᤢᤰᤁᤥ ᤔᤧᤍᤠᤖ ᤕᤠ᤺ᤴᤍᤢᤛᤡᤖᤥ. ᤜᤧᤰᤁᤩᤠᤱ ᤜᤠᤱᤜᤠ᤹ ᤂᤧᤸᤗᤧ ᤁᤢᤒᤣᤛᤠᤱ ᤁᤢᤕᤢᤰᤁᤥ ᤋᤠᤖᤢᤛᤡᤖᤥ॥ ᤂᤢᤏᤧ᤹ ᤂᤧᤱᤜᤠ᤹ ᤁᤢᤍᤠᤓᤣ᤺ᤸᤗᤧ ᤂᤠᤶᤐᤢ ᤌᤩ᤺ᤱ ᤆᤥᤃᤢᤛᤡᤖᤥ. ᤜᤧᤰᤁᤩᤠᤱ ᤁᤢᤗᤡ᤺ᤸᤗᤧ ᤛᤢᤖᤡ᤺ᤳᤋᤡᤸᤗᤧ ᤑᤧᤛᤢᤒᤠ ᤕᤠ᤹ᤛᤡᤵ ᤜᤧᤰᤁᤣ ᤆᤥᤃᤢᤛᤡᤖᤥ॥ 3 ᤂᤢᤏᤧ᤹ ᤂᤧᤱᤜᤠ᤹ ᤏᤠ᤺ᤳᤋᤢᤛᤡᤖᤥ. ᤜᤧᤰᤁᤩᤠᤱ ᤁᤢᤛᤡᤱ ᤔᤧᤏᤡ᤺ᤳᤋᤢᤶᤒᤠ ᤗᤠᤶᤜᤠ᤹ᤀᤥ ᤗᤠᤱᤄᤣ᤺ᤰᤛᤠᤱ ᤂᤢᤏᤧ᤹ ᤌᤣᤀᤠᤱ ᤔᤧᤸᤗ᤹ᤀᤣ ᤋᤃᤡ ᤐᤣ᤺ᤰᤗᤥ॥ 4 ᤁᤢᤜᤣ᤺ᤰᤛᤡᤱᤔᤠᤀᤠᤱᤎᤥ ᤌᤠ᤺ᤰᤌᤠ᤺ᤰ ᤌᤠᤖᤡᤰ ᤁᤧᤀᤢ᤺ᤵᤐᤠ ᤜᤧᤰᤁᤩᤠᤱ ᤁᤴ ᤕᤠ᤺ᤶᤒᤰᤁᤡᤴ ᤁᤢᤗᤡᤱᤍᤥ ᤁᤧᤃᤧᤵᤐᤠᤴ ᤜᤠ᤺ᤵᤐᤣ᥅ ᤂᤧᤱᤃ ᤀᤠᤱᤃᤠ᤹ᤀᤣᤖᤥ. ᤁᤢᤜᤣ᤺ᤰᤛᤡᤱᤔᤠᤀᤠᤱᤎᤥ ᤁᤧᤘᤠ᤹ᤒᤠ ᤏᤢ ᤕᤠᤱᤛᤡᤀᤠᤱ ᤁᤧᤘᤠ᤹ᤒᤠ ᤕᤜᤘᤣ ᤍᤠᤱᤒᤠᤴ ᤀᤠᤱᤃᤠ᤹ᤀᤣᤖᤥ॥” 5 ᤘᤠᤃᤵᤂᤣ᤺ᤱᤅᤥ ᤁᤧᤕᤢᤱᤒᤠᤜᤠ᤹ᤖᤧ ᤁᤴ ᤔᤧᤏᤡᤛᤢᤀᤠᤱ ᤔᤧᤃᤡᤛᤧᤖᤥ. ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤁᤡᤸᤗᤧ ᤏᤠ ᤁᤢᤕᤠᤀᤥ ᤌᤠᤖᤡᤰᤐᤠᤜᤠ᤹ ᤔᤧᤕᤰᤂᤧᤖᤥ. ᤂᤧᤱᤜᤠ᤹ ᤏᤡ᤺ᤳᤋᤠᤱ ᤔᤧᤒᤣ᤺ᤰ ᤜᤧᤰᤁᤩᤠᤱ ᤔᤧᤍᤠᤖᤥ॥ 6 ᤌᤡᤰᤗᤧ ᤘᤣ᤹ᤀᤡᤴ ᤑᤠ᤹ᤖᤢᤖᤥ. ᤜᤧᤰᤁᤩᤠᤱ ᤁᤢᤴᤛᤠ᤹ ᤔᤧᤳᤋᤢ᤹. “ᤜᤠᤱᤜᤠᤱ ᤗ᤹ᤖᤧ᤹ᤀᤥ॥” 7 ᤁᤢᤜᤢᤰᤆᤥ ᤁᤧᤏᤢ᤹ᤒᤠ ᤆᤥᤒᤣᤃᤢ᤺ᤸᤗᤧ ᤛᤠᤶᤔᤩᤠᤱ ᤁᤧᤎᤰᤐᤧᤴ ᤀᤠ᤺ᤴᤇᤡᤱᤔᤠ ᤐᤡᤖᤢᤖᤥ. ᤜᤧᤰᤁᤩᤠᤱ ᤂᤧᤸᤗᤧ ᤛᤠᤶᤔᤩᤠᤱᤅᤡᤴ ᤌᤘᤠ᤺ᤸᤗᤧ ᤜᤡᤵᤋᤢ ᤋᤱᤄᤢᤖᤥ. ᤂᤧᤸᤗᤧ ᤁᤢᤎᤢᤶᤔᤠ ᤛᤡᤍᤠ᤹ᤀᤡᤸᤗᤧ ᤋᤢᤶᤛᤢᤖᤥ. ᤜᤧᤰᤁᤩᤠᤱ ᤐᤠ᤺ᤳᤋᤢ᤹. “ᤁᤴ ᤏᤢᤒᤠ ᤆᤥᤰᤗᤥ.” ᤜᤧᤰᤁᤩᤠᤱ ᤂᤧᤴ ᤔᤢᤰᤔᤧᤎᤠᤏᤧᤴᤗ ᤑᤠ᤹ᤀᤠᤱ ᤑᤧᤴᤋᤡᤱ ᤔᤧᤎᤧᤵᤋᤢᤀᤠᤱ ᤔᤧᤓᤥ᤺ᤴᤍᤢᤖᤥ॥ 8 “ᤁᤖ ᤂᤧᤏᤧ᤹. ᤀᤠᤱᤃᤠ᤹ ᤀᤠᤛᤧᤘᤠᤖᤥᤒᤠ ᤀᤡᤛᤪᤠᤀᤡᤗᤀᤣ. ᤀᤠᤱᤃᤠ᤹ ᤛᤣ᤺ᤰᤏᤧᤒᤠ ᤕᤠᤁᤢᤒᤀᤣ. ᤀᤠᤱᤃᤠ᤹ ᤀᤠᤴᤍᤣᤱᤒᤠ ᤀᤒᤪᤠᤜᤠᤶᤔᤡᤸᤗᤧ ᤁᤢᤔᤢ᤹ᤀᤡᤍᤠᤱᤛᤠ. 9 ᤀᤠᤱᤃᤠ᤹ ᤂᤧᤏᤧ᤹ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤸᤗᤧ ᤁᤢᤏᤢᤵᤔᤥᤏᤢ ᤋᤧᤶᤏᤧᤀᤠᤱ ᤑᤧᤳᤏᤧᤖᤥ. ᤜᤧᤰᤁᤩᤠᤱ ᤀᤡᤰᤛᤠ᤺ᤸᤗᤧ ᤁᤢᤛᤢᤰᤐᤥᤏᤢ ᤂᤧᤏᤧ᤹ ᤀᤢ᤺ᤳᤏᤧᤖᤥ॥ ᤀᤠᤱᤃᤠ᤹ ᤔᤧᤳᤏᤧ. ‘ᤂᤧᤏᤧ᤹ᤃ ᤀᤠᤱᤃᤠ᤹ ᤀᤠᤛᤧᤘᤠᤖᤥᤒᤠᤏᤧᤖᤥ’ ᤂᤧᤏᤧ᤹ ᤀᤠᤱᤃᤠ᤹ ᤛᤣ᤺ᤰᤏᤧᤀᤠᤱ ᤘᤠ᤹ᤖᤥ. ᤜᤧᤰᤁᤩᤠᤱ ᤀᤠᤱᤃᤠ᤹ ᤂᤧᤏᤧ᤹ ᤔᤧᤴᤏᤠ᤹ᤀᤣ ᤁᤳᤏᤧᤖᤥ॥ 10 ᤁᤸᤗᤧᤆᤥᤃᤢᤸᤗᤧ ᤂᤧᤏᤧ᤹ ᤔᤧᤃᤡᤛᤧᤴᤏᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤂᤧᤏᤧ᤹ᤏᤢ ᤘᤠ᤹ᤀᤠᤖᤥ॥ ᤁᤧᤏᤡᤱᤛᤠᤱ ᤔᤧᤒᤢᤃᤧᤴᤏᤧ᤹. ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤁᤧᤏᤡᤱᤘᤠ᤹ᤑᤢᤔᤠᤱᤀᤠᤖᤥ. ᤀᤠᤱᤃᤠ᤹ ᤂᤧᤏᤧ᤹ ᤁᤧᤎᤢᤶᤒᤠ ᤆᤥ᤺ᤰᤏᤧᤖᤥ॥ ᤀᤠᤱᤃᤠ᤹ ᤂᤧᤏᤧ᤹ ᤑᤠ᤹ᤏᤧᤖᤥ. ᤛᤠᤶᤕᤥᤒᤠ ᤀᤠᤈᤢᤰᤘᤠ ᤀᤠᤜᤢᤰᤁᤡᤸᤗᤧ ᤀᤠᤱᤃᤠ᤹ ᤂᤧᤏᤧ᤹ ᤑᤠ᤹ᤏᤧ ᤆᤥ᤺ᤰᤏᤧᤖᤥ॥ 11 “ᤂᤧᤏᤧ᤹ᤏᤢ ᤁᤢᤕᤠ᤺ᤰ ᤁᤧᤗᤧ᤹ᤒᤠᤜᤠ᤹ ᤁᤧᤖᤧᤰ ᤛᤧᤰᤂᤠᤛᤠᤱ ᤛᤡᤖᤡᤱᤔᤔᤥ ᤔᤧᤎᤠᤖᤥ. ᤜᤧᤰᤁᤩᤠᤱ ᤏᤠᤔᤧᤴᤇᤠ᤹ ᤔᤧᤒᤥᤱᤗᤥ. ᤂᤧᤏᤧ᤹ ᤁᤧᤀᤵᤐᤠᤜᤠ᤹ ᤌᤣᤏᤠᤎᤣᤒᤠ ᤔᤧᤒᤥᤱ ᤂᤧᤒᤩᤠᤱ ᤔᤧᤔᤧᤰᤗᤥ॥ 12 ᤂᤧᤏᤧ᤹ ᤁᤧᤏᤡᤱᤔᤡᤜᤠ᤹ ᤁᤧᤃᤥ᤺ᤳᤋᤢᤛᤡᤛᤠᤱ ᤂᤧᤱᤜᤠ᤹ ᤁᤧᤱᤄᤥᤛᤢᤛᤡᤸᤗᤥ. ᤂᤧᤏᤧ᤹ ᤁᤧᤍᤰᤗᤧᤱᤘᤠᤀᤥ ᤌᤱ ᤁᤧᤈᤥ᤺ᤰᤐᤠᤜᤠ᤹ᤀᤠᤱ ᤜᤏᤧᤒᤠ ᤔᤧᤒᤥᤱᤗᤥ. ᤂᤧᤶᤒᤩᤠᤱ ᤔᤧᤔᤧᤰ ᤔᤧᤛᤡᤖᤥ॥ 13 ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤠ ᤁᤧᤏᤡᤱᤘᤠ᤹ᤑᤢᤔᤠᤱᤀᤠᤖᤥ. ᤀᤠᤱᤃᤠ᤹ ᤂᤧᤏᤧ᤹ ᤁᤧᤈᤢᤰᤘᤠ ᤜᤢᤰᤁᤡᤴ ᤋᤧᤶᤛᤢᤱᤗᤥ. ᤜᤧᤰᤁᤩᤠᤱ ᤂᤧᤏᤧ᤹ ᤀᤰᤂᤣ ᤔᤧᤳᤏᤧᤖᤥ. ‘ᤔᤧᤃᤡᤛᤧᤴᤏᤧ᤹. ᤀᤠᤱᤃᤠ᤹ ᤂᤧᤏᤧ᤹ ᤑᤠ᤹ᤏᤧᤖᤥ॥’” 14 ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤖᤥ. “ᤑᤣ᤹ᤒᤠᤳ ᤕᤠᤁᤢᤒᤀᤣ. ᤆᤢ᤺ᤰᤛᤠ ᤀᤡᤛᤪᤠᤀᤡᤗᤀᤣ. ᤔᤧᤃᤡᤛᤧᤏᤧ᤹ᤀᤥ᥄ ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ᤀᤣ ᤑᤠ᤹ᤏᤧᤖᤥ. ᤂᤧᤏᤧ᤹ ᤁᤧᤎᤧ᤹ᤒᤠ. ᤀᤡᤛᤪᤠᤀᤡᤗᤒᤠ ᤛᤣᤛᤣ ᤏᤡᤱᤘᤠ᤹ᤑᤢᤔᤠᤱ ᤀᤠᤱᤃᤠ᤹ᤀᤣᤖᤥ॥ 15 ᤀᤥᤔᤧᤳᤋᤧ᤹. ᤀᤠᤱᤃᤠ᤹ ᤂᤧᤏᤧ᤹ ᤁᤢᤛᤱ ᤏᤢ ᤜᤠᤛᤶᤛᤶᤒᤠ ᤁᤢᤜᤠᤒᤥ᤹ ᤁᤧᤕᤢᤱᤒᤠ ᤆᤠ ᤜᤡᤵᤔᤠ ᤂᤈᤢᤶ ᤂᤕᤠ ᤆᤥ᤺ᤰᤏᤧᤖᤥ॥ ᤂᤧᤏᤧ᤹ ᤏᤠᤱᤈᤱᤗᤢᤱᤜᤠ᤹ ᤁᤧᤛᤠ᤺ᤰᤋᤢᤖᤥ. ᤜᤧᤰᤁᤩᤠᤱ ᤆᤡᤎᤰ ᤆᤡᤎᤰ ᤁᤧᤎᤃᤢᤀᤠᤱ ᤂᤠᤵᤐᤢᤌᤩ᤺ᤱ ᤁᤧᤈᤥᤃᤢᤖᤥ. ᤂᤧᤒᤩᤠᤱ ᤌᤧᤃᤢᤜᤠ᤹ ᤆᤠᤛᤡᤵ ᤜᤧᤰᤋᤱᤒᤠ ᤁᤧᤈᤥᤃᤢᤖᤥ॥ 16 ᤂᤧᤏᤧ᤹ ᤂᤧᤱᤜᤠ᤹ ᤁᤧᤀᤠ᤺ᤵᤛᤢᤛᤡᤖᤥ. ᤜᤧᤰᤁᤩᤠᤱ ᤛᤢᤖᤡ᤺ᤳᤋᤡᤸᤗᤧ ᤂᤧᤴ ᤐᤰᤂᤢ ᤋᤣ᤹ᤖᤢᤖᤥ. ᤂᤧᤒᤩᤠᤱ ᤛᤢᤖᤡᤳ ᤁᤣᤈᤱᤅᤡᤸᤗᤧ ᤑᤧᤛᤢ ᤋᤣ᤹ᤖᤢᤛᤡᤖᤥ॥ ᤁᤖ ᤂᤧᤏᤧ᤹ᤃ ᤕᤜᤘᤣ ᤍᤠᤱᤒᤠᤀᤥ ᤁᤧᤛ᤺ᤳᤗᤥ. ᤂᤧᤏᤧ᤹ ᤀᤡᤛᤪᤠᤀᤡᤗᤒᤠ ᤛᤣᤛᤣ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤔᤡᤔᤡᤍᤡᤱ ᤁᤧᤒᤡᤖᤢᤖᤥ॥ 17 “ᤕᤠᤱᤃᤧᤛᤠ᤹ᤒᤠ ᤏᤢ ᤌᤣᤀᤠᤱ ᤔᤧᤱᤃᤵᤔᤏᤠᤒᤠᤜᤠ᤹ᤖᤧ ᤆᤫᤠ᤺ᤳ ᤔᤧᤃᤥ᤺ᤳᤋᤢᤖᤥ. ᤁᤖ ᤆᤫᤠ᤺ᤳ ᤔᤧᤱᤄᤥᤛᤢᤸᤗᤥ. ᤘᤠᤔᤡ᤺ᤰᤔᤠᤸᤗᤧ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤔᤢᤖᤠᤴ ᤜᤣᤖᤥ॥ ᤁᤖ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤂᤧᤱᤜᤠ᤹ ᤏᤢᤃᤵ ᤐᤡᤖᤢᤱᤛᤡᤱᤗᤥ. ᤀᤠᤱᤃᤠ᤹ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤱᤜᤠ᤹ ᤔᤧᤗᤧᤳᤋᤠᤛᤡᤱᤅᤡᤸᤗᤥ॥ 18 ᤔᤢᤖᤧᤰ ᤂᤠᤖᤧᤰᤐᤠ ᤁᤥ᤺ᤰᤔᤠ ᤑᤠᤱᤈᤱ ᤌᤧᤃᤢ ᤔᤠᤱᤘᤠᤜᤠ᤹ᤀᤥᤏᤢ ᤘᤜ᤺ᤱ ᤁᤢᤱᤗ ᤕᤠ᤺ᤴᤍᤢᤱᤗᤥ. ᤜᤧᤰᤁᤩᤠᤱ ᤋᤧᤶᤓᤥᤀᤥ ᤘᤠᤒᤢᤴᤍᤠᤰᤘᤠᤜᤠ᤹ ᤗ᤺ᤴᤗ ᤆᤥᤃᤢᤱᤗᤥ॥ ᤔᤢᤖᤧᤰ ᤂᤠᤖᤧᤰᤐᤠ ᤕᤧ᤺ᤱᤄᤠᤍᤧᤴᤏᤡᤴ ᤘᤖᤰ ᤐᤥᤱᤗ ᤆᤥᤃᤢᤱᤗᤥ. ᤜᤧᤰᤁᤩᤠᤱ ᤁᤧᤜᤣᤒᤠ ᤂᤠᤶᤒᤣ᤺ᤰᤔᤠᤴ ᤆᤫᤠ᤺ᤳ ᤐᤢᤴᤍᤠᤰᤘᤠ ᤆᤥᤃᤢᤱᤗᤥ॥ 19 ᤔᤢᤖᤧᤰ ᤂᤠᤖᤧᤰᤐᤠ ᤕᤧ᤺ᤱᤄᤠᤍᤧᤴᤏᤥ ᤀᤠᤱᤃᤠ᤹ ᤛᤠᤶᤔᤠᤱᤛᤡᤱ. ᤁᤢᤍᤡᤱ ᤁᤧᤕᤢᤱᤒᤠ. ᤀᤱᤃᤶ ᤑᤢᤱ ᤏᤢ ᤐᤧ᤺ᤱᤘᤠ ᤗᤡ᤺ᤳᤇᤣ ᤛᤡᤱᤒᤢᤱᤜᤠ᤹ ᤗᤡᤱᤗ ᤕᤠ᤺ᤴᤍᤢᤱᤗᤥ॥ ᤀᤠᤱᤃᤠ᤹ ᤆᤠ ᤔᤧᤴᤏᤢ᤹ᤔᤏᤠᤒᤠ ᤂᤠᤶᤒᤣ᤺ᤰᤁᤥ ᤀᤠ᤺ᤱᤜᤠ᤹ ᤜᤧᤰᤁᤩᤠᤱ ᤛᤢᤰᤐᤠ ᤛᤡᤱᤜᤠ᤹ ᤌᤡᤰᤗᤧᤱᤗᤧ ᤗᤡᤱᤗ ᤆᤥᤃᤢᤱᤗᤥ. 20 ᤜᤧᤰᤁᤣᤗ᤹ᤖᤡᤰ ᤔᤏᤠᤜᤠ᤹ᤖᤧ ᤔᤧᤏᤡᤛᤢᤀᤠᤱ ᤏᤡᤱᤘᤠ᤹ ᤔᤧᤀᤡ᤺ᤳᤋᤢᤖᤖᤥ. ᤜᤧᤰᤁᤩᤠᤱ ᤁᤱᤃ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤢᤰᤁᤡᤸᤗᤧ ᤆᤥᤃᤢᤒᤠ ᤕᤠ᤺ᤶᤒᤰ ᤀᤡᤃᤪ ᤀᤡᤛᤪᤠᤀᤡᤗᤒᤠ ᤛᤣᤛᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤆᤥᤃᤢᤒᤠ ᤑᤠ᤹ᤀᤠᤱ ᤏᤢᤖᤡᤰᤁᤠᤱ ᤁᤢᤛᤡᤱ ᤔᤧᤏᤡ᤺ᤳᤋᤢᤖᤖᤥ॥” ᤕᤜᤘᤣ ᤍᤠᤱᤒᤧᤸᤗᤧ ᤔᤠᤱᤛᤠᤶᤔᤠᤱᤜᤠ᤹ ᤜᤏᤧᤒᤠ ᤗᤣ᤺ᤳᤋᤢᤛᤡ 21 ᤕᤜᤘᤣ ᤍᤠᤱᤒᤠ. ᤕᤠᤁᤢᤒᤖᤧ ᤁᤢᤜᤠᤱᤅᤡᤸᤗᤧ ᤀᤰᤂᤣ ᤐᤠ᤺ᤳᤋᤢᤖᤥ. “ᤀᤠᤒᤠᤅᤣ ᤂᤡᤏᤡ᤹ ᤋᤢ᤺ᤴᤍᤣ ᤐᤠ᤺ᤴᤜᤠ᤹ ᤕᤢᤰᤂᤧᤶᤔᤧ᤹ᤀᤥ. ᤂᤧᤏᤡ᤹ ᤐᤠ᤺ᤵᤔᤠ ᤕᤢᤱᤔᤠ ᤁᤧᤒᤥᤱᤒᤠ ᤐᤠ᤺ᤴᤜᤠ᤹ ᤋᤠᤖᤠᤶᤔᤧ᤹ᤀᤥ॥ 22 ᤌᤣ ᤁᤧᤒᤥᤱᤒᤠ ᤘᤠ᤹ ᤂᤧᤴ ᤐᤠ᤺ᤵᤔᤠᤖᤧ ᤗᤠᤃᤡ ᤂᤧᤏᤡ᤹ ᤏᤠᤘᤠᤀᤡᤳᤗᤠᤜᤠ᤹ ᤋᤠᤖᤠᤶᤛᤧ᤹ᤀᤥ॥ ᤁᤶᤓᤗ᤹ᤖᤡᤰ ᤁᤧᤒᤥᤱᤒᤠ ᤁᤧᤈᤢ᤺ᤵᤐᤠ ᤐᤠ᤺ᤴᤜᤠ᤹ ᤀᤠᤏᤡᤃᤣ ᤀᤠᤔᤧᤳᤋᤧ᤹ᤀᤥ. ᤜᤧᤰᤁᤩᤠᤱ ᤀᤠᤏᤡᤃᤣ ᤂᤧᤴ ᤐᤠ᤺ᤴᤏᤥ ᤏᤡᤱᤘᤠ᤹ ᤜᤧᤳᤋᤠᤛᤡᤃᤧᤖᤥ॥ ᤂᤧᤒᤩᤠᤱ ᤏᤡᤴᤎᤠᤛᤣ᤺ᤰᤀᤥ ᤂᤧᤴ ᤌᤧᤔᤠ ᤐᤥᤱᤗᤳᤇ ᤑᤠ᤹ᤀᤠᤱ ᤀᤠᤏᤡᤃᤣ ᤁᤢᤛᤡᤱ ᤏᤡ᤺ᤵᤔᤠ ᤛᤢᤰᤋᤢᤶᤒᤧᤖᤖᤥ. ᤀᤡᤃᤪ ᤐᤥᤱᤔᤠ ᤁᤧᤀᤡ᤺ᤵᤐᤠ ᤐᤠ᤺ᤴᤏᤡᤴ ᤀᤠᤏᤡᤃᤣ ᤀᤠᤈᤧᤰᤋᤧ᤹ᤀᤥ॥ 23 ᤀᤠᤸᤗ ᤁᤧᤍᤠᤒᤠ ᤐᤠ᤺ᤴᤜᤠ᤹ ᤀᤠᤏᤡᤃᤣ ᤀᤥᤛᤣᤴ ᤀᤠᤎᤠᤰᤋᤧ᤹ᤀᤥ. ᤜᤧᤰᤁᤩᤠᤱ ᤂᤧᤏᤡ᤹ ᤔᤠᤱᤏᤡᤱ ᤑᤠ᤹ᤀᤠᤱ ᤁᤢᤛᤡᤱ ᤏᤡ᤺ᤵᤔᤠ ᤛᤢᤰᤋᤢᤶᤒᤧᤖᤥ॥ ᤏᤢᤒᤠ ᤀᤡᤃᤪ ᤋᤠᤵᤑᤧ᤺ᤶᤒᤠ ᤌᤧᤔᤠᤀᤡ ᤆᤥᤃᤧᤶᤔᤧ᤹ᤀᤥ. ᤜᤧᤰᤁᤣᤗ᤹ᤖᤡᤰ ᤀᤠᤏᤡᤃᤣ ᤛᤠᤘᤣ᤺ᤳ ᤕᤱᤅᤠᤱ ᤁᤡᤛᤡᤃᤧᤖᤥ॥ 24 ᤁᤖ ᤂᤧᤏᤡ᤹ᤃ ᤁᤢᤛᤢᤶ ᤔᤧᤴᤍᤶᤔᤏᤠᤒᤠᤏᤡᤱᤗᤥ. ᤜᤧᤰᤁᤩᤠᤱ ᤂᤧᤏᤡ᤹ ᤕᤠ᤺ᤶᤒᤰᤁᤡᤴ ᤛᤠ᤹ᤖᤡᤰᤁᤣ ᤌᤣᤏᤠᤎᤣᤒᤠ ᤆᤥᤰᤗᤥ. ᤜᤠ᤺ᤳᤗᤧ ᤂᤧᤏᤡ᤹ ᤛᤧᤘᤠ ᤁᤧᤔᤧᤳᤋᤡ᤹ ᤂᤧᤴ ᤛᤡᤰᤁᤧᤗᤧ᤺ᤱᤒᤠ ᤐᤥᤱᤗᤥ॥ 25 “ᤁᤢᤓᤠ ᤔᤏᤠᤎᤡᤰ ᤌᤠᤱᤃᤧᤳ ᤗᤧᤵᤔᤠᤱᤗᤠᤶ ᤜᤢᤛᤢᤱᤅᤠᤱ ᤘᤠ᤹ᤖᤥ. ᤜᤧᤰᤁᤩᤠᤱ ᤂᤧᤴ ᤕᤥ ᤕᤢᤖᤥ॥ ᤏᤠᤱᤃᤧᤴ ᤗᤧᤵᤛᤠᤱᤏᤢ ᤑᤧᤴᤏᤠᤱ ᤂᤧᤸᤗᤧ ᤀᤠᤱᤃᤠ᤹ ᤀᤠᤔᤡᤱᤅᤡᤴ ᤐᤠ᤺ᤳᤋᤢᤖᤥ. ᤁᤥ᤺ᤶᤓᤠᤗᤩᤠ᤺ᤸᤗᤧ ᤂᤠᤶᤔᤡᤴ ᤗᤠ᤺ᤰᤋᤢᤒᤠ ᤜᤧᤰᤁᤣ ᤕᤢᤰᤛᤠᤒᤠᤜᤠ᤹ ᤋᤥ᤹ᤖᤢᤛᤡᤖᤥ॥ 26 ᤁᤢᤜᤣ᤺ᤰᤛᤡᤱᤔᤠᤀᤠᤱᤎᤥ ᤜᤠ᤺ᤳᤗᤧ ᤀᤥᤛᤣ᤺ᤴᤎᤠᤱ ᤆᤥᤃᤢᤀᤠᤱ ᤀᤠᤏᤡᤃᤣ ᤁᤢᤛᤡᤱ ᤏᤡ᤺ᤵᤔᤠ ᤛᤢᤰᤋᤢᤶᤒᤧᤒᤣ᥅ ᤀᤡᤃᤪ ᤋᤃᤡᤀᤠᤱᤎᤥ ᤀᤠᤳᤋᤡᤸᤗᤧ ᤁᤴ ᤕᤠᤵᤔᤡ ᤀᤥ᤺ᤴᤎᤠᤰᤋᤧᤀᤠᤱ ᤂᤢᤏᤧ᤹ ᤁᤢᤍᤥ᤺ᤵᤔᤠ ᤘᤕᤧ ᤑᤠ᤹ᤀᤠᤱ ᤀᤠᤏᤡᤃᤣ ᤐᤠ᤺ᤵᤔᤠ ᤛᤢᤰᤋᤢᤶᤒᤧᤀᤠᤱᤒᤣ᥅ ᤁᤴ ᤐᤠ᤺ᤴᤏᤡᤴ ᤜᤠ᤺ᤳᤗᤧᤀᤠᤱ ᤀᤠᤏᤡᤃᤣ ᤔᤧᤔᤧᤳᤋᤡᤃᤧᤴᤗᤥ. ᤋᤃᤡ ᤀᤣ᤺ᤸᤗᤧᤀᤠᤱ ᤗᤳᤇᤠ ᤐᤠ᤺ᤴᤛᤢᤳᤗᤠᤎᤡᤰᤁᤠᤱ ᤔᤧᤒᤠ᤺ᤳᤋᤢᤸᤗᤥ. ᤂᤡᤏᤡ᤹ ᤐᤠᤴ ᤁᤧᤄᤧᤶᤒᤠ ᤀᤠᤛᤠ᤺ᤳᤋᤠᤱ ᤔᤧᤘᤕᤧᤏᤧᤸᤗᤥ॥ 27 ᤁᤧᤖᤧᤰᤏᤢ᤺ᤸᤗᤧ ᤋᤃᤡ ᤛᤡᤕᤥᤏ ᤁᤥ᤺ᤰᤔᤠᤴ ‘ᤀᤥᤔᤧᤳᤋᤧᤶᤔᤧ᤹ᤀᤥ. ᤂᤧᤱᤜᤠ᤹ᤃ ᤁ᤹ᤕᤥ ᤔᤧᤘᤠ᤹’ ᤁᤧᤔᤧᤵᤐᤠᤱᤃ ᤀᤠᤱᤃᤠ᤹ᤀᤣ ᤘᤕᤠᤱᤗᤥ॥ ᤕᤖᤢᤛᤗᤧᤔ ᤕᤧᤰᤕᤰᤁᤥ ᤁᤧᤕᤢᤱᤒᤠᤜᤠ᤹ ᤛᤢᤏᤠᤀᤡᤱ ᤐᤡᤔᤠᤛᤡᤖᤧ ᤗᤠᤃᤡ ᤗᤳᤇᤠ ᤀᤡᤱᤄᤱᤛᤠᤒᤠ ᤁᤧᤒᤠᤱᤒᤧᤴᤏᤠᤱ ᤀᤠᤱᤃᤠ᤹ᤀᤣ ᤘᤕᤠᤱᤗᤥ॥ 28 ᤀᤠᤱᤃᤠ᤹ ᤜᤰᤛᤢᤱᤛᤡᤱ ᤁᤖ ᤂᤧ᤹ᤕᤥ ᤜᤠ᤺ᤳᤋᤠᤱ ᤔᤧᤜᤥᤵᤗᤥ. ᤛᤢᤈᤠ ᤐᤡᤔᤠᤖᤧ ᤗᤠᤃᤡ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤀᤣ᤺ᤴᤏᤠᤱ ᤔᤧᤘᤠ᤹ᤏᤧᤸᤗᤥ. ᤂᤧᤱᤜᤠ᤹ ᤛᤣ᤺ᤴᤍᤥᤔᤠᤛᤡᤸᤗᤧ ᤀᤠᤳᤋᤡᤸᤗᤧᤀᤠᤱ ᤏᤢᤃᤵ ᤀᤠᤔᤧᤶᤒᤡᤏᤧᤸᤗᤥ॥ 29 ᤀᤥᤔᤧᤳᤋᤧᤶᤔᤧ᤹. ᤂᤧᤱᤜᤠ᤹ ᤁᤧᤖᤧᤰ ᤀᤡᤱᤗᤧᤰᤁᤣᤛᤡᤖᤥ᥄ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤕᤠ᤺ᤶᤒᤰᤁᤡᤸᤗᤧ ᤌᤣᤀᤠᤱ ᤔᤧᤕᤠᤖᤢᤸᤗᤥ. ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤏᤠᤘᤠᤀᤡᤳᤗᤠᤜᤠ᤹ᤃ ᤌᤣᤀᤠᤱ ᤔᤣ᤺ᤶᤒᤠ ᤛᤢᤖᤡᤳ ᤜᤧᤰᤋᤱᤒᤠᤖᤰᤗᤥ॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.