ᤕᤛᤤᤕᤠ 40 - LIFOTNTᤜᤠᤱᤜᤠᤱ ᤗ᤹ᤔᤠ ᤐᤠ᤺ᤴᤈᤠ᤺ᤰ 1 ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤠ᤺ᤳᤋᤢᤖᤥ. “ᤀᤠᤱᤃᤠ᤹ ᤀᤠᤔᤏᤠᤜᤠ᤹ ᤜᤠᤱᤜᤠᤱ ᤔᤧᤳᤋᤠᤶᤛᤡᤶᤔᤧ᤹ᤀᤥ᥄ ᤂᤧᤱᤜᤠ᤹ ᤜᤠᤱᤜᤠᤱ ᤔᤧᤳᤋᤠᤶᤛᤡᤶᤔᤧ᤹ᤀᤥ᥄ 2 ᤏ᤺ᤶᤏ᤺ᤶᤔᤠᤱ ᤕᤖᤢᤛᤗᤧᤔ ᤕᤧᤰᤕᤰᤁᤥ ᤁᤧᤕᤢᤱᤒᤠ ᤔᤏᤠᤜᤠ᤹ ᤔᤧᤳᤋᤧᤛᤧ᤹ᤀᤥ. ᤂᤧ᤹ᤕᤥᤒᤠ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤋᤢᤰᤂᤣᤴ ᤐᤣᤀᤠᤱ ᤘᤠ᤹ᤖᤥ॥ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤠᤕᤥᤜᤠ᤹ ᤗᤧᤵᤔᤡ ᤐᤥ᤺ᤰᤂᤧᤀᤠᤱ ᤘᤠ᤹ᤖᤥ. ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤠᤕᤥᤜᤠ᤹ᤖᤧ ᤗᤠᤃᤡ ᤏᤡᤗᤧᤱᤒᤠ ᤂᤢᤶᤍᤡᤱ ᤔᤧᤄᤥᤛᤢᤀᤠᤱ ᤘᤠ᤹ᤖᤥ॥ 3 “ᤗᤳᤇᤠ ᤀᤡᤰᤗᤠᤎᤡᤰ ᤂᤧᤶᤍᤧᤳᤗᤥ— ‘ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥᤵᤐᤠᤍᤧᤴᤏᤥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤃᤡ ᤗᤠᤶᤎᤡᤰ ᤕᤠᤖᤡᤵ ᤆᤥᤃᤧ᤹ᤀᤥ॥ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥᤵᤐᤠ ᤕᤧ᤺ᤱᤄᤠᤍᤧᤴᤏᤥ ᤀᤠᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤠᤃᤡ ᤔᤠᤖᤠᤶᤎᤡᤰ ᤋᤥ᤹ᤍᤥᤴ ᤆᤥᤃᤧ᤹ᤀᤥ॥ 4 ᤁᤧᤖᤧᤰ ᤐᤠᤰᤗᤢᤶᤗᤢᤶᤒᤠ ᤏᤧᤏᤧᤒᤠᤍᤧᤴᤜᤠ᤹ ᤆᤠᤱᤈᤠᤱᤒᤠ ᤔᤧᤈᤥᤃᤢᤖᤥ. ᤁᤠᤰ ᤏᤠᤱᤈᤱᤗᤢᤱ ᤏᤢ ᤁᤥ᤺ᤰᤔᤠ ᤑᤠᤱᤈᤱᤜᤠ᤹ ᤋᤠᤱᤒᤠ ᤔᤧᤈᤥᤃᤢᤖᤥ॥ ᤔᤧᤴᤍᤱᤔᤏᤠᤒᤠ ᤁᤡᤰᤁᤫᤧ᤺ᤱ ᤁᤡᤁᤫᤧ᤺ᤱᤒᤠ ᤗᤠᤈᤣ᤹ᤜᤠ᤹ ᤋᤥ᤹ᤍᤥ᤺ᤶᤒᤠ ᤔᤧᤈᤥᤃᤢᤖᤥ. ᤜᤧᤰᤁᤩᤠᤱ ᤐᤠᤰᤗᤢᤶᤗᤢᤶᤒᤠ ᤗᤠᤈᤣ᤹ᤜᤠ᤹ ᤗᤧᤵᤐᤧᤵᤐᤠ ᤔᤧᤈᤥᤃᤢᤖᤥ॥ 5 ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤡᤔᤡᤍᤡᤱ ᤀᤥᤛᤣ᤺ᤴᤎᤠᤱ ᤔᤧᤈᤥᤃᤢᤖᤥ. ᤂᤧᤒᤩᤠᤱ ᤁᤧᤖᤧᤰ ᤔᤧᤴᤇᤠᤶ ᤕᤠᤵᤔᤡᤜᤠ᤹ᤖᤧ ᤂᤧᤴ ᤌᤡᤰᤗᤧᤱᤗᤧ ᤛᤥᤖᤡᤰ ᤔᤧᤏᤡᤛᤢᤖᤥ. ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤧᤸᤗᤧᤀᤣ ᤐᤠ᤺ᤴᤏᤡᤴ ᤐᤠ᤺ᤳᤋᤢᤀᤠᤱ ᤘᤠ᤹ᤖᤥ॥’” 6 ᤗᤳᤇᤠ ᤀᤡᤰᤗᤠᤎᤡᤰᤗᤧ ᤐᤠ᤺ᤳᤋᤢ. “ᤀ᤺ᤰᤋᤧ᤹ᤀᤥ” ᤜᤧᤰᤁᤩᤠᤱ ᤀᤠᤱᤃᤠ᤹ ᤐᤠ᤺ᤳᤋᤢᤱᤗᤥ. “ᤀᤠᤱᤃᤠ᤹ ᤌᤣ ᤐᤠ᤺ᤳᤋᤢᤱᤅᤠᤱ ᤀ᤺ᤰᤁᤠᤒᤠᤒᤣ᥅” “ᤁᤧᤖᤧᤰ ᤔᤧᤴᤇᤠᤶ ᤕᤠᤵᤔᤡᤜᤠ᤹ ᤕᤠ᤺ᤴᤛᤢᤱᤜᤠ᤹ ᤜᤧᤰᤋᤱᤒᤠ ᤔᤧᤈᤥᤰᤗᤥ. ᤂᤧᤒᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤂᤧᤶᤛᤡᤱᤔᤧᤴ ᤛᤢᤱᤕᤠ᤺ᤴᤗᤧ ᤁᤢᤓᤢᤱ ᤁᤢᤛᤡᤰᤋᤠᤱᤒᤠ ᤆᤥᤰᤗᤥ॥ 7 ᤕᤠ᤺ᤴᤏᤡᤴ ᤀᤡᤗᤧᤶ. ᤑᤢᤱᤅᤡᤴ ᤔᤢᤳᤌᤠᤒᤣ᤺ᤰᤗᤥ. ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤂᤧᤴ ᤔᤢ᤺ᤳᤋᤢᤖᤥ. ᤛᤧᤰᤂᤠᤛᤠᤱ ᤔᤏᤠᤜᤠ᤹ᤃ ᤕᤠᤴ ᤜᤧᤰᤋᤱᤒᤠ ᤔᤧᤈᤥᤰᤗᤥ॥ 8 ᤕᤠ᤺ᤴᤏᤡᤴ ᤀᤡᤖᤧᤶ. ᤑᤢᤱᤜᤠ᤹ ᤔᤢᤳᤌᤠᤖᤥ. ᤁᤖ ᤀᤠᤏᤡ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤒᤠ᤺ᤴᤈᤠᤰᤁᤡᤴ ᤛᤍᤠᤍᤡᤱ ᤀᤠᤓᤧᤸᤗᤧᤛᤠᤱ ᤔᤧᤔᤠᤏᤧᤸᤗᤥ॥ 9 “ᤛᤡᤕᤥᤏᤒᤠ ᤔᤏᤠᤜᤠ᤹ᤀᤥ ᤛᤢᤏᤠᤀᤡᤱ ᤁᤧᤛᤧᤒᤠᤛᤣ. ᤂᤧᤏᤡ᤹ ᤁᤣ᤺ᤶᤒᤠ ᤏᤠᤱᤈᤱᤗᤢᤱᤅᤥ ᤐᤣᤃᤧᤶᤔᤧ᤹ᤀᤥ॥ ᤕᤖᤢᤛᤗᤧᤔ ᤕᤧᤰᤕᤰᤐᤠ ᤔᤏᤠᤜᤠ᤹ ᤛᤢᤏᤠᤀᤡᤱ ᤀᤡᤱᤓᤴ ᤁᤧᤜᤠᤒᤠᤛᤣ. ᤛᤠ᤹ᤖᤡᤰ ᤀ᤺ᤰᤋᤧᤶᤔᤧ᤹ᤀᤥ. ᤀ᤺ᤰᤋᤧᤶᤔᤧ᤹ᤀᤥ. ᤔᤧᤃᤡᤛᤧᤶᤔᤡᤴᤏᤧ᤹ᤀᤥ॥ ᤕᤜᤢᤍᤠ ᤐᤠᤱᤈᤢᤶᤔᤥᤒᤠ ᤔᤏᤠᤜᤠ᤹ ᤔᤧᤳᤋᤧᤶᤛᤡᤶᤔᤧ᤹ᤀᤥ. ‘ᤀᤥᤔᤧᤳᤋᤧᤶᤔᤧ᤹. ᤂᤧᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤜᤠᤒᤠ ᤁ᤹ᤕᤥ ᤘᤠ᤹ᤖᤥ᥄’ 10 “ᤀᤥᤔᤧᤳᤋᤧᤶᤔᤧ᤹. ᤕᤜᤘᤣ ᤍᤠᤱᤒᤠᤴ ᤐᤕᤶ ᤕᤶᤒᤠ ᤔᤢᤰᤛᤠᤶᤏᤢ ᤕᤢᤰ ᤆᤥ᤺ᤰᤛᤧ ᤕᤢᤖ ᤐᤳᤗᤥ. ᤀᤥᤔᤧᤳᤋᤧᤶᤔᤧ᤹. ᤂᤢᤏᤧ᤹ ᤁᤢᤎᤢᤶᤄᤥᤴ ᤂᤢᤏᤧ᤹ ᤁᤢᤜᤢᤰᤁᤥᤀᤣ ᤘᤠ᤹ᤖᤥ. ᤂᤧᤒᤩᤠᤱ ᤂᤢᤏᤧ᤹ ᤂᤥᤔᤠ ᤁᤧᤒᤥᤱᤒᤠᤴ ᤂᤢᤏᤧ᤹ᤏᤢ ᤘᤠ᤹ᤖᤥ॥ 11 ᤂᤢᤏᤧ᤹ ᤁᤢᤔᤧᤸᤗᤢᤰ ᤗᤢᤵᤜᤠ᤹ ᤐᤡᤳ ᤔᤧ᤺ᤴᤍᤠ ᤀᤥᤃᤧᤔᤧᤵᤐᤧᤸᤗᤧ ᤁᤢᤀᤡᤛᤡᤰ ᤆᤠᤖᤠᤶᤛᤢᤛᤡᤖᤥ॥ ᤂᤢᤏᤧ᤹ ᤁᤢᤎᤢ᤺ᤶᤒᤠᤜᤠ᤹ ᤀᤠᤒᤠᤅᤣ ᤁᤢᤓᤰᤋᤠᤱᤅᤥ ᤁᤳᤋᤢᤛᤡᤖᤥ. ᤜᤧᤰᤁᤩᤠᤱ ᤂᤧᤱᤜᤠ᤹ ᤀᤠᤒᤠᤅᤣ ᤂᤢᤏᤧ᤹ ᤁᤢᤏᤡᤱᤘᤠ᤹ ᤛᤡᤃᤠᤱ ᤐᤰᤂᤢᤛᤡᤖᤥ॥ ᤆᤢᤈᤢᤰᤛᤠ ᤁᤢᤛ᤻ᤛᤠ ᤁᤧᤘᤠ᤹ᤒᤠᤜᤠ᤹ᤃ ᤂᤢᤏᤧ᤹ ᤕᤠ᤺ᤰᤕᤠ᤺ᤰᤁᤠᤱ ᤗᤠᤶᤗᤥᤛᤢᤛᤡᤖᤥ॥” ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱ 12 ᤜᤠ᤺ᤳᤗᤧ ᤆᤫᤠ᤺ᤳᤋᤡᤴ ᤁᤢᤒᤧ᤺ᤱᤃᤥᤀᤥ ᤛᤡ᤺ᤰᤋᤢᤀᤠᤱ ᤘᤠ᤹ᤒᤣ ᤀᤡᤃᤪ ᤁᤢᤒᤡᤳᤋᤠ᤺ᤸᤗᤧ ᤋᤠᤱᤛᤠᤱᤒᤧᤴ ᤛᤡ᤺ᤰᤋᤢᤀᤠᤱ ᤘᤠ᤹ᤒᤣ᥅ ᤜᤠ᤺ᤳᤗᤧ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤁᤥᤒᤠ ᤂᤠᤶᤔᤡᤴ ᤐᤰᤁᤠᤀᤥ ᤛᤡ᤺ᤰᤋᤢᤀᤠᤱ ᤘᤠ᤹ᤒᤣ᥅ ᤀᤡᤃᤪ ᤜᤠ᤺ᤳᤗᤧ ᤏᤠᤱᤈᤱᤗᤢᤱᤜᤠ᤹ ᤏᤢ ᤁᤥ᤺ᤰᤔᤠ ᤑᤠᤱᤈᤱ ᤌᤧᤃᤢ ᤔᤠᤱᤘᤠᤜᤠ᤹ ᤋᤧᤶᤍᤢᤖᤡᤀᤥ ᤌᤠᤱᤛᤢᤀᤠᤱ ᤘᤠ᤹ᤒᤣ᥅ 13 ᤜᤠ᤺ᤳᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤏᤡᤱᤘᤠᤴ ᤏᤡᤛᤢᤀᤠᤱ ᤘᤠ᤹ᤒᤣ. ᤀᤡᤃᤪ ᤜᤠᤳ ᤂᤢᤏᤧ᤹ ᤁᤢᤛᤢᤈᤠᤍᤠᤱᤒᤠ ᤐᤥ᤺ᤰᤂᤧᤀᤠᤱ ᤂᤢᤏᤧ᤹ ᤜᤢ᤹ᤖᤢᤀᤠᤱ ᤘᤠ᤹ᤒᤣ᥅ 14 ᤏᤧᤜᤡᤏᤡᤱᤘᤠ᤹ᤖᤧ ᤗᤠᤃᤡ ᤕᤜᤘᤣ ᤍᤠᤱᤒᤧᤸᤗᤧ ᤜᤠᤳ ᤛᤢᤈᤠ ᤏᤠ᤺ᤰᤋᤢᤀᤠᤱ ᤘᤠ᤹ᤒᤣ ᤜᤧᤰᤁᤩᤠᤱ ᤜᤠ᤺ᤳᤗᤧ ᤂᤢᤏᤧ᤹ ᤁᤢᤍᤥ᤺ᤵᤔᤠ ᤗᤠᤶ ᤜᤢ᤹ᤖᤢᤒᤣ᥅ ᤜᤠ᤺ᤳᤗᤧ ᤂᤢᤏᤧ᤹ ᤏᤧᤜᤡᤏᤡᤱᤘᤠ᤹ ᤜᤢ᤹ᤖᤢᤒᤣ. ᤀᤡᤃᤪ ᤂᤠᤛᤡᤱᤏᤡ᤺ᤵᤔᤠ ᤗᤠᤶ ᤜᤢ᤹ᤖᤢᤒᤣ᥅ 15 ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤁᤥᤒᤠ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤃ ᤆᤫᤠ᤺ᤳ ᤋᤧᤵᤐᤰᤘᤠ ᤜᤧᤰᤁᤣ ᤔᤧᤗ᤹ᤖᤥ॥ ᤂᤧᤱᤜᤠ᤹ᤃ ᤌᤠᤱᤍᤢᤖᤡᤀᤥ ᤁᤧᤄᤡᤵᤐᤠ ᤂᤠᤶᤜᤡ᤺ᤰ ᤁᤢᤛᤡᤱ ᤔᤧᤗ᤹ᤖᤥ. ᤂᤢᤏᤧ᤹ᤃ ᤘᤠᤃᤵᤂᤣ᤺ᤱᤜᤠ᤹ ᤁᤢᤶᤈᤡᤰ ᤂᤠᤶᤒᤢᤳᤋᤪᤠ ᤜᤧᤰᤁᤣ ᤌᤠᤱᤄᤢᤖᤥ॥ 16 ᤘᤕᤠᤃᤧᤴ ᤛᤡᤍᤢᤱᤈᤓᤠᤖᤧ ᤗᤠᤃᤡ ᤗᤧᤒᤏᤠᤏᤒᤠ ᤛᤡᤱᤜᤠ᤹ᤖᤧ ᤔᤧᤕᤥᤖᤢᤴᤗᤥ. ᤂᤧᤵᤔᤥ ᤁᤧᤕᤠᤰᤐᤠ ᤌᤰᤛᤠᤜᤠ᤹ᤖᤧᤀᤠᤱ ᤘᤕᤠᤃᤧᤴ ᤛᤡᤍᤢᤱᤈᤓᤠ ᤆᤥ᤺ᤰᤔᤠ ᤔᤧᤕᤥᤖᤢᤴᤗᤥ॥ 17 ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤁᤥᤒᤠ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤂᤢᤏᤧ᤹ ᤁᤢᤍᤃᤡ ᤌᤣᤛᤡᤀᤠᤱ ᤔᤣ᤺ᤸᤗᤥ॥ ᤂᤢᤏᤧ᤹ᤃ ᤂᤧᤱᤜᤠ᤹ ᤌᤣᤏᤠᤎᤣᤒᤠ ᤏᤢ ᤜᤏᤧᤒᤠ ᤗᤣ᤺ᤳᤋᤢᤛᤡᤖᤥ॥ 18 ᤜᤧᤰᤁᤣ᤺ᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤂᤧᤏᤡ᤹ ᤜᤠ᤺ᤳᤏᤢ ᤁᤧᤍᤱᤄᤢᤶᤒᤣ᥅ ᤀᤡᤃᤪ ᤀᤠᤰᤋᤱᤒᤠ ᤆᤀᤡᤳᤋᤡᤴᤏᤢ ᤁᤧᤍᤱᤄᤢᤶᤒᤣ᥅ 19 ᤏᤠᤘᤠᤀᤡᤳᤗᤠ᤺ᤱᤃ ᤛᤡᤱᤃᤧᤃᤠᤶᤒᤧᤸᤗᤧ ᤛᤥ᤺ᤴᤍᤢᤀᤠᤱ ᤆᤥᤃᤢᤖᤥ. ᤛᤠᤶᤔᤩᤠᤱ ᤁᤧᤎᤰᤐᤠᤸᤗᤧ ᤂᤧᤴᤏᤡᤴ ᤛᤠᤶᤔᤩᤠᤱᤅᤡᤸᤗᤧ ᤛᤢ᤺ᤵᤋᤢᤖᤥ. ᤜᤧᤰᤁᤩᤠᤱ ᤂᤧᤸᤗᤧ ᤗᤠᤃᤡ ᤕᤢᤵᤐᤠ ᤛᤡᤰᤁᤪᤡᤜᤠ᤹ ᤆᤥᤃᤢᤖᤥ॥ 20 ᤀᤰᤋᤱᤒᤠ ᤛᤡᤍᤢᤱᤈᤓᤠ ᤋᤥ᤺ᤶᤔᤠ ᤔᤧᤴᤇᤢᤰᤔᤏᤠᤒᤠ ᤛᤠ᤹ᤖᤡᤰ ᤕᤠᤱᤃᤧᤛᤠ᤹ᤒᤧᤸᤗᤧ ᤔᤧᤴᤕ᤺ᤵᤔᤏᤠᤒᤠ ᤛᤡᤱᤅᤡᤴ ᤛᤣᤃᤢᤖᤥ॥ ᤂᤢᤏᤧ᤹ ᤁᤢᤗᤠᤃᤡ ᤂᤥ᤺ᤴᤍᤢ ᤗᤰᤋᤢᤒᤠ ᤏᤠᤘᤠᤀᤡᤳᤗᤠᤴ ᤔᤧᤶᤔᤢᤴᤏᤣ ᤕᤢᤱᤔᤠᤖᤧ ᤗᤠᤃᤡ ᤁᤢᤓᤠ ᤁᤢᤜᤢᤰᤆᤥ ᤁᤧᤏᤢ᤹ᤒᤠ ᤗᤳᤇᤠ ᤛᤡᤱᤃᤧᤃᤠᤶᤒᤠ ᤛᤣᤃᤢᤖᤥ॥ 21 ᤌᤣ ᤂᤧᤏᤡ᤹ ᤏᤡᤱᤘᤠ᤹ ᤔᤧᤱᤄᤥᤀᤣ ᤁᤧᤘᤕᤡᤒᤡ᥅ ᤌᤣ ᤂᤧᤏᤡ᤹ ᤔᤧᤱᤄᤧᤶᤔᤣ ᤁᤧᤘᤕᤡᤒᤡ᥅ ᤌᤣ ᤁᤴ ᤐᤠ᤺ᤴᤏᤡᤴ ᤁᤢᤜᤣ᤺ᤰᤛᤡᤱᤔᤠᤀᤠᤱᤎᤥᤀᤣ ᤂᤧᤏᤡ᤹ ᤔᤧᤶᤔᤧᤳᤋᤣ ᤁᤧᤶᤃᤳᤋᤡᤒᤡ᥅ ᤌᤣ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤸᤗᤧ ᤏᤠᤘᤠᤃᤧᤴ ᤆᤀᤡ᤺ᤳ ᤐᤥ᤺ᤰᤂᤧᤀᤠᤱᤎᤥᤀᤣ ᤂᤧᤏᤡ᤹ ᤁᤢᤛᤡᤱ ᤔᤧᤴᤏᤡ᤺ᤳᤋᤣ ᤁᤧᤘᤕᤡᤒᤡ᥅ 22 ᤂᤢᤏᤧ᤹ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤸᤗᤧ ᤁᤢᤄᤡᤖᤡᤏᤢ᤺ᤸᤗᤧ ᤌᤠ᤺ᤱᤎᤠᤰ ᤜᤠᤱᤕᤢᤰ ᤆᤥ᤺ᤰᤁᤠᤱ ᤕᤢᤱᤗᤥ. ᤜᤧᤰᤁᤩᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤃ ᤑᤣ᤹ᤒᤠᤳ ᤜᤧᤰᤁᤣ ᤔᤧᤗ᤹ᤖᤥ॥ ᤂᤢᤏᤧ᤹ ᤋᤠᤱᤛᤠᤱᤒᤧᤴ ᤐ᤺ᤳᤌᤠᤱ ᤁᤢᤀᤡᤛᤡᤰ ᤂᤡᤱᤄᤢᤖᤥ. ᤂᤧᤒᤩᤠᤱ ᤂᤧ᤹ᤕᤥ ᤕᤠᤱᤎᤥ᤺ᤰᤔᤠᤖᤧ ᤗᤠᤃᤡ ᤂᤧᤴ ᤛᤠ᤺ᤱᤃᤠ ᤜᤧᤰᤁᤣ ᤑᤥᤛᤢᤖᤥ॥ 23 ᤂᤢᤏᤧ᤹ ᤜᤠᤱᤛᤠᤜᤠ᤹ ᤌᤣᤏᤠᤎᤣᤒᤠ ᤆᤥᤃᤢᤛᤡᤖᤥ. ᤜᤧᤰᤁᤩᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤁᤥᤒᤠ ᤕᤢᤰᤛᤠᤒᤠᤜᤠ᤹ ᤁᤢᤛᤢᤶ ᤔᤧᤴᤍᤶᤔᤏᤠᤒᤠ ᤆᤥᤃᤢᤛᤡᤖᤥ॥ 24 ᤕᤠ᤹ᤖᤡ᤺ᤶᤒᤠ ᤜᤧᤰᤁᤣ ᤂᤧᤱᤜᤠ᤹ ᤂᤠᤶᤒᤠᤱᤅᤥ ᤔᤧᤎᤠᤏᤢᤔᤧ᤺ᤴᤏᤣ. ᤔᤧᤈᤢᤰᤏᤢᤔᤧ᤺ᤴᤏᤣ. ᤂᤠᤶᤒᤠᤱᤅᤥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤛᤠ᤺ᤵ ᤗᤣ᤺ᤳᤇᤡᤱᤅᤡᤸᤗᤧᤛᤠ. ᤂᤢᤏᤧ᤹ ᤂᤧᤱᤜᤠ᤹ ᤔᤢ᤺ᤳᤋᤢᤍᤣᤛᤢᤛᤡᤖᤥ ᤜᤧᤰᤁᤩᤠᤱ ᤂᤧᤱᤜᤠ᤹ ᤀᤡᤔᤧᤗᤧᤶᤗᤥ. ᤂᤧᤒᤩᤠᤱ ᤛᤢᤖᤡᤳ ᤁᤣᤈᤱᤅᤡᤸᤗᤧ ᤂᤧᤱᤜᤠ᤹ ᤕᤠ᤹ᤛᤡᤵ ᤜᤧᤰᤁᤣ ᤑᤧᤛᤢ ᤋᤣ᤹ᤖᤢᤛᤡᤖᤥ॥ 25 “ᤂᤧᤏᤡ᤹ ᤀᤠᤱᤃᤠ᤹ ᤜᤠ᤺ᤳᤏᤢ ᤕᤠᤵᤔᤡ ᤁᤧᤍᤱᤄᤡᤒᤣ᥅ ᤀᤡᤃᤪ ᤀᤠᤱᤃᤠ᤹ ᤜᤧᤰᤋᤱᤒᤠ ᤜᤠᤳ ᤘᤠ᤹ᤒᤣ᥅” ᤐᤕᤶ ᤕᤶᤒᤠ ᤛᤣᤛᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤠ᤺ᤳᤋᤢᤖᤥ॥ 26 ᤂᤧᤏᤡ᤹ ᤔᤡᤰᤁᤡᤴ ᤌᤠ᤺ᤱ ᤑᤥ᤺ᤰᤂᤠᤶᤔᤧ᤹ᤀᤠᤱ ᤋᤠᤱᤛᤠᤱᤒᤧᤴ ᤀᤥᤔᤧᤳᤋᤧᤶᤔᤧ᤹ᤀᤥ. ᤁᤱᤜᤠ᤹ ᤁᤧᤖᤧᤰ ᤜᤠ᤺ᤳᤗᤧ ᤆᤥᤃᤢᤒᤠᤒᤣ᥅ ᤌᤣ ᤂᤢᤏᤧ᤹ᤀᤣ ᤔᤣ᤺ᤶᤒᤡ. ᤂᤢᤏᤧ᤹ ᤂᤣ᤺ᤶᤛᤡᤰᤐᤠᤸᤗᤧ ᤁᤢᤒᤴᤈᤩᤠᤱᤔᤠᤜᤠ᤹ ᤌᤡᤰᤌᤡᤰ ᤆᤥᤃᤢ ᤋᤠᤖᤢᤛᤡᤖᤥ ᤜᤧᤰᤁᤩᤠᤱ ᤁᤧᤖᤧᤰ ᤌᤡᤰᤌᤡᤰ ᤗ᤹ᤖᤡᤰ ᤔᤡᤱ ᤗᤥ᤺ᤰᤋᤢᤛᤡᤀᤠᤱ ᤀᤢ᤺ᤳᤋᤢᤛᤡᤖᤥ॥ ᤂᤢᤏᤧ᤹ ᤐᤕᤶ ᤕᤶᤒᤠ ᤁᤢᤔᤢᤰᤛᤠᤶ ᤏᤢ ᤔᤢᤰᤛᤠᤶᤛᤠᤒᤠ ᤁᤢᤔᤢᤰᤁᤡᤸᤗᤧ ᤆᤥᤃᤢᤸᤗᤧ ᤂᤧᤱᤜᤠ᤹ᤀᤥ ᤗᤳᤇᤠᤀᤠᤱ ᤔᤧᤶᤔᤠᤏᤧᤸᤗᤥ॥ 27 ᤕᤠᤁᤢᤒᤣ. ᤂᤧᤏᤧ᤹ ᤌᤣᤀᤠᤱ ᤀᤰᤂᤣ ᤁᤧᤒᤠ᤺ᤳᤋᤢᤒᤠᤒᤣ᥅ ᤀᤡᤛᤪᤠᤀᤡᤗᤀᤣ. ᤂᤧᤏᤧ᤹ ᤌᤣᤀᤠᤱ ᤏᤡᤱᤘᤠ᤹ᤋᤢᤰᤔᤠ ᤐᤠᤴ ᤁᤧᤒᤠ᤺ᤵᤐᤠᤒᤣ᥅ “ᤀᤠᤱᤃᤠ᤹ ᤀᤠᤗᤠᤶᤔᤡᤴ ᤕᤜᤘᤣ ᤍᤠᤱᤒᤠᤗᤠᤶ ᤔᤕᤧᤀᤠᤱ ᤘᤠ᤹ᤖᤥ. ᤕᤜᤘᤣ ᤍᤠᤱᤒᤧᤸᤗᤧ ᤀᤠᤱᤃᤠ᤹ ᤏᤡᤏᤡ ᤔᤧᤗᤠᤵᤐᤠᤴᤗᤥ॥” 28 ᤌᤣ ᤂᤧᤏᤧ᤹ ᤏᤡᤱᤘᤠ᤹ ᤔᤧᤱᤄᤥᤀᤣ ᤁᤧᤘᤠ᤹ᤒᤡ᥅ ᤌᤣ ᤂᤧᤏᤧ᤹ ᤔᤧᤱᤄᤧᤶᤔᤣ ᤁᤧᤘᤠ᤹ᤒᤡ᥅ ᤕᤜᤘᤣ ᤍᤠᤱᤒᤧᤱᤃ ᤀᤠᤓᤧᤸᤗᤧᤛᤠᤱ ᤛᤍᤠᤍᤡᤱ ᤁᤧᤘᤠ᤹ᤒᤠ ᤏᤡᤱᤘᤠ᤹ᤑᤢᤔᤠᤱᤗᤥ. ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤧᤸᤗᤧ ᤁᤢᤏᤢᤵᤔᤥ ᤌᤠᤖᤡᤰ ᤏᤠᤘᤠᤃᤧᤴ ᤆᤀᤡ᤺ᤳ ᤁᤧᤏᤧᤒᤠᤖᤥ॥ ᤂᤢᤏᤧ᤹ ᤔᤧᤏᤠᤏᤧᤴᤏᤠᤱ ᤁᤢᤛᤰᤔᤠᤀᤠᤱ ᤔᤧᤒᤢ᤹ᤏᤧᤸᤗᤥ. ᤜᤧᤰᤁᤩᤠᤱ ᤜᤠ᤺ᤳᤗᤧᤀᤠᤱ ᤂᤢᤏᤧ᤹ ᤁᤢᤛᤡᤰᤁᤢᤶ ᤏᤡᤱᤘᤠᤴ ᤁᤢᤛᤡᤱ ᤏᤡ᤺ᤵᤔᤠ ᤔᤧᤛᤢᤰᤋᤢᤸᤗᤥ॥ 29 ᤁᤧᤏᤠᤒᤠᤜᤠ᤹ ᤂᤢᤏᤧ᤹ ᤌᤢᤶ ᤐᤡᤖᤢᤛᤡᤖᤥ. ᤜᤧᤰᤁᤩᤠᤱ ᤕᤥ᤺ᤴᤈᤥ᤹ᤈᤥ᤹ᤒᤠᤜᤠ᤹ ᤔᤢᤰᤛᤠᤶ ᤐᤡᤖᤢᤛᤡᤖᤥ॥ 30 ᤌᤠᤱᤒᤧᤴ ᤔᤏᤠ᤺ᤴᤏᤠᤱ ᤔᤧᤴᤎᤢᤶᤔᤏᤠᤒᤠ ᤐᤥᤱᤗᤥ. ᤜᤧᤰᤁᤩᤠᤱ ᤐᤏᤠᤏᤠᤛᤡᤖᤥ. ᤂᤧᤒᤩᤠᤱ ᤏᤠᤗᤡᤃᤧᤴ ᤁᤢᤎᤠᤱᤛᤠᤜᤠ᤹ᤀᤠᤱ ᤂᤢᤴᤇᤡ᤹ ᤛᤰᤔᤠ ᤐᤢ᤹ᤀᤠᤱ ᤔᤧᤈᤥᤴᤗᤥ॥ 31 ᤁᤖ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤶ ᤀᤥᤃᤧᤵᤐᤠᤜᤠ᤹ ᤕᤠᤶᤔᤥ ᤁᤧᤎᤢᤶᤒᤠ ᤔᤧᤒᤥᤱᤗᤥ. ᤂᤧᤱᤜᤠ᤹ ᤁᤰᤁᤑᤡ᤺ᤰᤔᤠ ᤜᤧᤰᤁᤣ ᤌᤠ᤺ᤱᤎᤠ᤺ᤱ ᤔᤧᤒᤧᤖᤥ॥ ᤜᤧᤰᤁᤩᤠᤱ ᤔᤧᤗᤥ᤺ᤰᤛᤠᤱ ᤔᤧᤴᤏᤠᤏᤧᤸᤗᤥ. ᤂᤧᤱᤜᤠ᤹ ᤗᤠᤱᤔᤧᤄᤣ᤺ᤰ ᤜᤧᤰᤁᤣᤛᤠᤱ ᤂᤢᤴᤇᤡ᤹ ᤌᤏᤠ ᤔᤧᤗᤧᤱᤏᤧᤸᤗᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.