ᤕᤛᤤᤕᤠ 4 - LIFOTNT

¹ ᤂᤧᤴ ᤕᤧᤶᤔᤡᤴ ᤋᤠ᤺ᤸᤗᤧ ᤏᤢᤛᤡ ᤔᤧᤴᤇᤢᤔᤠᤜᤠ᤹ᤖᤧ ᤗᤰᤌᤡᤰ ᤕᤧᤶᤒᤡᤳᤇᤠᤴ ᤔᤧᤍᤧᤶᤛᤢᤀᤠᤱ ᤀᤰᤂᤣ ᤔᤧᤔᤧᤳᤋᤢᤖᤥ. “ᤀᤠᤏᤡᤃᤣ ᤆᤠᤔᤠ ᤌᤢᤱᤔᤠ ᤏᤢ ᤆᤠᤱᤔᤠ ᤘᤠ᤺ᤵᤔᤠᤴ ᤀᤠᤒᤠᤅᤣ ᤕᤠᤖᤡᤵ ᤆᤥᤃᤢᤶᤒᤧᤀᤠᤱ ᤆᤠᤶᤒᤧ ᤌᤢᤅᤢᤶᤒᤧᤖᤥ. ᤜᤧᤰᤁᤩᤠᤱ ᤘᤠᤖᤢᤶᤒᤧ ᤆᤠᤰᤂᤢᤶᤒᤧᤖᤥ. ᤂᤧᤏᤧ᤹ ᤜᤠᤒᤠ ᤀᤠᤏᤡᤃᤣ ᤋᤧᤴᤎᤠᤶ ᤔᤣ᤺ᤰᤂᤡᤶᤗᤰ ᤀᤠᤔᤧᤳᤋᤧᤀᤠᤱ ᤀᤠᤏᤡᤃᤣ ᤕᤧᤶᤒᤠ ᤐᤥ᤺ᤰᤂᤧ᤹ᤀᤥ॥ ᤔᤏᤠᤜᤠ᤹ᤖᤧ ᤀᤠᤏᤡᤃᤣ ᤁᤢᤏᤠᤔᤧᤴᤇᤠ᤹ ᤔᤧᤔᤧᤳᤋᤡᤃᤧᤸᤗᤧ ᤂᤧᤏᤧ᤹ ᤀᤠᤎᤣ᤺ᤰᤋᤧ᤹ᤀᤥ॥”

ᤕᤖᤢᤛᤗᤧ᤺ᤶᤔᤡᤴ ᤕᤠᤶᤔᤥ ᤔᤧᤈᤥᤃᤢ᤹

² ᤁᤖ ᤋᤠ᤺ᤴᤍᤡ ᤁᤧᤍᤠᤒᤠ ᤕᤧᤶᤔᤥᤃ ᤁᤧᤜᤡᤱᤒᤠᤀᤠᤱ ᤁᤧᤕᤠ᤺ᤰᤐᤠ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤗᤠᤃᤡ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤒᤥᤖᤠᤰᤁᤡᤴ ᤁᤢᤈᤠ᤹ ᤁᤧᤎᤥ᤺ᤰᤐᤠ ᤏᤢ ᤜᤠᤱᤘᤠ ᤔᤠᤱᤘᤠ ᤁᤧᤕᤠᤰᤐᤠ ᤐᤥᤱ᤹. ᤜᤧᤰᤁᤩᤠᤱ ᤂᤠᤶᤒᤠᤱᤅᤥ ᤁᤧᤎᤥ᤺ᤰᤐᤠ ᤆᤠ᤺ᤸᤗᤧ ᤆᤥᤃᤢᤸᤗᤧ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤛ᤺ᤵᤔᤠᤴ ᤔᤡᤔᤡᤍᤡᤱ ᤏᤢ ᤏᤧᤒᤥ ᤐᤥᤔᤠ ᤐᤠᤴ ᤐᤥᤱ᤹॥

³ ᤛᤡᤕᤥ᤺ᤴᤏᤥ ᤁᤧᤍᤠᤱᤒᤠ ᤁᤧᤕᤠ᤺ᤰᤐᤠ ᤁᤧᤖᤧᤰ ᤛᤣᤛᤣᤒᤠ ᤔᤏᤠ ᤔᤧᤒᤥᤱ᤹—ᤕᤖᤢᤛᤗᤧ᤺ᤶᤔᤥ ᤔᤧᤰᤔᤠᤗᤠᤶ ᤁᤧᤜᤡᤱᤒᤠ ᤁᤧᤕᤠ᤺ᤰᤐᤠ ᤜᤧᤰᤁᤩᤠᤱ ᤁᤢᤜᤡᤱᤘᤧᤳ ᤁᤧᤘᤠ᤹ᤒᤠᤛᤡᤖᤥ ᤑᤠ᤹ᤀᤠᤱ ᤂᤢᤴᤇᤡ᤹ ᤔᤡᤱ ᤔᤧᤛᤠᤵᤋᤢᤒᤠ ᤔᤏᤠᤜᤠ᤹ ᤛᤣᤛᤣᤒᤠ ᤔᤧᤔᤧᤳᤋᤢᤛᤡ᤹॥

⁴ ᤛᤡᤕᤥᤏᤧᤸᤗᤧ ᤁᤢᤛ᤻ᤛᤠ ᤔᤧᤴᤇᤡᤴᤜᤠ᤹ᤖᤧ ᤂᤢᤴᤇᤡ᤹ ᤆᤧᤸᤗᤧᤰᤗᤧᤰ ᤗ᤹ᤔᤠ ᤁᤢᤄ᤺ᤰᤁᤡᤴ ᤍᤠᤱᤒᤧᤸᤗᤧ ᤘᤠᤜᤵᤋᤢ ᤐᤡᤖᤢᤛᤡ᤹. ᤜᤧᤰᤁᤩᤠᤱ ᤂᤢᤏᤧ᤹ ᤂᤠᤛᤧᤴᤗᤧ ᤕᤠᤶᤛᤠᤶ ᤏᤢ ᤔᤡᤖᤧ ᤕᤠᤶᤛᤠᤶᤔᤡᤸᤗᤧ ᤕᤖᤢᤛᤗᤧ᤺ᤶᤗᤠᤶ ᤔᤠᤰᤂᤡᤸᤗᤧ ᤏᤧ᤺ᤰᤋᤢᤒᤠ ᤁᤢᤕᤥ᤺ᤰᤜᤠ᤹ ᤘᤠᤜᤵᤋᤢ᤹॥

⁵ ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤛᤡᤕᤥᤏ ᤁᤥ᤺ᤰᤔᤠᤀᤥ ᤏᤢ ᤂᤧᤵᤔᤥ ᤁᤧᤈᤢᤶᤒᤠ ᤁᤧᤖᤧᤰ ᤛᤶᤎᤠᤱ ᤗᤧᤴᤍᤡᤰ ᤂᤠ᤹ᤔᤡ᤺ᤵᤐᤠᤴ ᤜᤧᤰᤁᤩᤠᤱ ᤛᤧᤴᤍᤡᤰ ᤔᤡ ᤛᤡᤳᤗᤠᤱᤅᤡᤴ. ᤂᤧᤴ ᤁᤧᤖᤧᤰᤗᤧ ᤗᤠᤃᤡ ᤔᤡᤔᤡᤍᤡᤱᤃᤧᤴ ᤀᤡ᤺ᤶᤛᤡᤱᤔᤠ ᤌᤣ᤺ᤰᤛᤡᤱᤔᤠᤍᤧᤴ ᤐᤥᤱ॥

⁶ ᤗᤧᤴᤍᤡᤰ ᤏᤠᤶᤛᤧ᤺ᤰᤁᤠᤱ ᤜᤠᤱᤘᤠ ᤛᤧ᤺ᤰᤁᤡᤸᤗᤧ ᤘᤀᤡ᤺ᤵᤛᤡᤱᤔᤠ ᤏᤠᤶᤈᤡ᤺ᤰᤂᤥ᤹ ᤐᤥᤱ. ᤜᤧᤰᤁᤩᤠᤱ ᤘᤜᤡᤳ ᤛᤠᤶᤔᤡ᤺ᤳ ᤏᤢ ᤛᤢᤖᤡᤳ ᤁᤣᤈᤱ ᤔᤢᤰᤁᤡᤸᤗᤧ ᤘᤀᤡ᤺ᤵᤛᤡᤱᤔᤠ ᤏᤢ ᤆᤡᤱᤛᤡᤱᤔᤠᤍᤧᤴ ᤐᤥᤱᤗᤥ॥