ᤕᤛᤤᤕᤠ 39 - LIFOTNT

ᤒᤣᤒᤡᤗᤥᤏᤡᤕᤠ ᤗᤠᤶᤒᤠ ᤀᤡᤱᤄᤱ ᤁᤧᤛᤠᤒᤠᤜᤠ᤹ ᤔᤧᤓᤧᤴ

¹ ᤂᤧᤴ ᤕᤧᤶᤔᤥ ᤒᤧᤒᤡᤗᤥᤏᤡᤕᤠᤒᤠ ᤜᤠᤱ ᤒᤗᤍᤠᤏᤧᤸᤗᤧ ᤁᤢᤛ᤻ᤛᤠ ᤔᤖᤥᤍᤁ-ᤒᤗᤍᤠᤏᤖᤧ ᤜᤡᤈᤁᤡᤕᤠᤴ ᤛᤰᤀᤡᤱᤄᤱ ᤜᤧᤰᤁᤩᤠᤱ ᤆᤠᤛᤢᤱᤏᤢ ᤜᤠᤱᤗᤠᤀᤡᤱᤒᤠᤜᤠ᤹ ᤐᤠᤱᤄᤢᤍᤣᤛᤢᤛᤡ॥ ᤂᤢᤏᤧ᤹ ᤂᤧᤴ ᤋᤢᤃᤧᤀᤠᤱ ᤕᤠᤶᤔᤥ ᤘᤣ᤺ᤳᤋᤧᤀᤠᤱ ᤘᤠ᤹ ᤁᤧᤗ᤹ᤒᤠ ᤀᤡᤱᤄᤱ ᤂᤧᤵᤛᤢᤀᤠᤱ ᤘᤕᤧ॥

² ᤜᤡᤈᤁᤡᤕᤠ᤺ᤸᤗᤧ ᤂᤧᤴ ᤜᤠᤱᤗᤠᤀᤡᤱᤒᤠᤜᤠ᤹ ᤗᤢᤱᤔᤧᤴᤍᤡᤱ ᤗᤠᤱᤍᤠ᤺ᤰ ᤔᤧᤳᤋᤢᤛᤡ. ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤜᤡᤶᤔᤥᤒᤠ ᤛᤠᤶᤔᤩᤠᤱ. ᤕᤢᤵᤐᤠ. ᤔᤠᤖᤢᤰᤜᤠ᤹. ᤁᤢᤏᤠᤶᤃᤧᤏᤢ᤹ᤒᤠ ᤏᤡ᤺ᤱᤃᤣ᤹ᤜᤠ᤹. ᤂᤢᤏᤧ᤹ ᤁᤧᤖᤧᤰ ᤁᤢᤓᤧᤈᤠ ᤁᤢᤓᤧᤕᤢᤶ ᤕᤢᤱᤔᤠ ᤜᤡᤶᤔᤡᤴ ᤏᤢ ᤁᤢᤛᤠᤔᤠ ᤁᤢᤒᤢᤔᤠ ᤕᤢᤱᤔᤠᤍᤧᤴᤏᤥ ᤁᤧᤕᤢᤱᤒᤠ ᤁᤧᤖᤧᤰ ᤆᤡᤃᤰᤘᤠᤜᤠ᤹ ᤀᤥ᤺ᤴᤎᤠᤰᤋᤢᤛᤡ॥ ᤂᤢᤏᤧ᤹ ᤁᤢᤜᤡᤶ ᤏᤢ ᤂᤢᤏᤧ᤹ ᤁᤢᤜᤠᤱᤈᤢᤶᤔᤥ ᤀᤥᤛᤣ᤺ᤴᤔᤧᤎᤠᤰᤋᤢᤴᤇᤡᤴᤒᤠ ᤆᤡᤃᤰᤘᤠ ᤌᤣᤀᤠᤱ ᤔᤧᤕᤠ᤺ᤰᤋᤧᤴ॥

³ ᤂᤧᤒᤩᤠᤱ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤕᤛᤤᤕᤠᤴ ᤜᤡᤈᤁᤡᤕᤠ ᤜᤠᤱᤅᤧ᤹ᤀᤥ ᤐᤣᤀᤠᤱ ᤔᤧᤳᤋᤢ. “ᤂᤧᤴ ᤔᤏᤠᤜᤠ᤹ᤖᤧ ᤌᤧᤔᤠ ᤔᤧᤒᤠ᤺ᤳᤋᤢ. ᤜᤧᤰᤁᤩᤠᤱ ᤂᤧᤱᤜᤠ᤹ ᤀᤠᤳᤋᤡᤗᤠᤶ ᤔᤧᤍᤩᤧᤀᤠᤱ ᤔᤧᤘᤕᤧ᥅” ᤜᤡᤈᤁᤡᤕᤠ᤺ᤸᤗᤧ ᤐᤠ᤺ᤳᤋᤢ. “ᤂᤢᤴᤇᤡ᤹ᤃ ᤔᤠ᤺ᤱᤄᤠᤒᤠ ᤗᤠᤈᤣ᤹ ᤒᤣᤒᤡᤗᤥᤏᤗᤠᤶ ᤀᤠᤱᤃᤠ᤹ᤀᤥ ᤔᤧᤍᤩᤧᤀᤠᤱ ᤔᤧᤘᤕᤧ॥”

⁴ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤧᤸᤗᤧ ᤛᤣ᤺ᤴᤍᤥᤛᤢ. “ᤂᤧᤱᤜᤠ᤹ᤖᤧ ᤂᤧᤏᤧ᤹ ᤁᤧᤜᤠᤱᤜᤡᤶᤔᤥ ᤌᤣᤎᤣᤜᤠ᤹ ᤔᤧᤏᤡᤛᤢ᥅” ᤜᤡᤈᤁᤡᤕᤠ᤺ᤸᤗᤧ ᤔᤧᤳᤋᤢ. “ᤂᤧᤱᤜᤠ᤹ᤖᤧ ᤀᤠᤱᤃᤠ᤹ ᤀᤠᤜᤡᤶᤔᤥ ᤁᤧᤕᤢᤱᤒᤠ ᤁᤧᤖᤧᤰ ᤆᤡᤃᤰᤘᤠᤜᤠ᤹ ᤔᤧᤏᤡᤛᤢ॥ ᤂᤧᤱᤜᤠ᤹ ᤀᤥᤛᤣ᤺ᤴᤔᤧᤴᤎᤠᤰᤛᤣᤒᤠ ᤆᤡᤃᤰᤘᤠ ᤀᤠᤱᤃᤠ᤹ ᤀᤠᤎᤠ᤺ᤱᤅᤥ ᤌᤣᤀᤠᤱ ᤜᤥᤵ॥”

⁵ ᤂᤧᤒᤩᤠᤱ ᤕᤛᤤᤕᤠ᤺ᤸᤗᤧ ᤜᤡᤈᤁᤡᤕᤠᤴ ᤔᤧᤳᤋᤢ. “ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤒᤠ᤺ᤴᤈᤠᤰᤁᤡᤴ ᤂᤧᤵᤛᤧ᤹—

⁶ ᤂᤧᤴ ᤕᤧᤶᤔᤡᤴ ᤛᤧᤰᤂᤠᤛᤠᤱ ᤁᤧᤍᤠᤒᤠ ᤘᤠ᤹. ᤂᤧᤏᤧ᤹ ᤁᤧᤜᤠᤱᤜᤡᤶᤔᤥ ᤁᤧᤎᤠ᤺ᤰᤌᤧᤒᤠᤜᤠ᤹ᤖᤧ ᤀᤠᤀᤡᤴ ᤌᤠᤖᤡᤰ ᤔᤧᤓᤢᤰᤂᤢ ᤔᤧᤕᤢᤰᤂᤢᤒᤠ ᤁᤧᤖᤧᤰ ᤆᤡᤃᤰᤘᤠᤜᤠ᤹ ᤒᤣᤒᤡᤗᤥᤏ ᤗᤠᤈᤣ᤹ᤀᤥ ᤔᤧᤍᤣ᤹ᤖᤢ. ᤌᤣᤎᤡᤰᤁᤠᤱ ᤔᤧᤕᤠ᤺ᤰᤏᤧᤴ. ᤗ᤹ᤖᤡᤰ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢ᤹॥

⁷ ᤜᤧᤰᤁᤩᤠᤱ ᤂᤧᤏᤧ᤹ ᤁᤢᤓᤠ ᤁᤧᤔᤢ᤹ᤀᤡᤍᤠᤱᤛᤠ. ᤂᤧᤏᤧ᤹ ᤁᤧᤔᤠᤰᤂᤡ᤹ ᤏᤢ ᤁᤧᤏᤧᤰᤛᤠᤗᤠᤶ ᤛᤠᤘᤠᤃᤧᤘᤠ᤺ᤴᤇᤡᤱᤒᤠᤜᤠ᤹ ᤂᤧᤴ ᤋᤧᤴᤏᤥ ᤔᤧᤍᤣ᤹ᤖᤢᤛᤡ᤹. ᤜᤧᤰᤁᤩᤠᤱ ᤂᤧᤱᤜᤠ᤹ ᤒᤣᤒᤡᤗᤥᤏᤒᤠ ᤜᤠᤱᤜᤡᤶᤔᤥ ᤛᤡᤱᤃᤠᤖᤢ ᤔᤧᤈᤥᤃᤢᤛᤡ᤹॥”

⁸ ᤜᤡᤈᤁᤡᤕᤠ᤺ᤸᤗᤧ ᤏᤢᤃᤵ ᤐᤡᤖᤢ. “ᤂᤧᤏᤧ᤹ ᤁᤧᤒᤠ᤺ᤳᤋᤢᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤒᤠ᤺ᤴᤈᤠᤰᤁᤡᤴ ᤏᤢᤒᤠᤀᤣ ᤆᤥᤰ॥” ᤌᤣᤀᤠᤱᤓᤧᤸᤗᤧ ᤂᤧᤸᤗᤧ ᤁᤢᤏᤡᤱᤘᤠ᤹ᤀᤥ ᤀᤡ᤺ᤳᤋᤢ. “ᤀᤠᤱᤃᤠ᤹ ᤀᤠᤜᤡᤱᤜᤡᤱᤃ ᤕᤜᤘᤣ ᤍᤠᤱᤒᤧᤸᤗᤧ ᤏᤢ᤹ᤔᤠ ᤋᤠᤔᤠ ᤏᤢ ᤁᤶᤒᤪᤠᤱᤅᤥ ᤁᤳᤋᤠᤖᤥ॥”