ᤕᤛᤤᤕᤠ 38 - LIFOTNT

ᤜᤡᤈᤁᤡᤕᤠ ᤜᤠᤱᤅᤡᤴ ᤁᤢᤕᤠᤶᤍᤢᤰ

¹ ᤂᤧᤴ ᤕᤧᤶᤔᤥ ᤜᤡᤈᤁᤡᤕᤠ ᤜᤠᤱᤅᤡᤴ ᤋᤢᤃᤧᤀᤠᤱ ᤂᤠ ᤂᤵᤔᤧᤴ ᤛᤩᤧ॥ ᤜᤧᤰᤁᤣ᤺ᤸᤗᤧ ᤀᤠᤔᤥᤈᤖᤧ ᤁᤢᤛ᤻ᤛᤠ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤕᤛᤤᤕᤠᤴ ᤂᤢᤏᤧ᤹ ᤁᤢᤍᤢᤶᤛᤧ ᤐᤣᤀᤠᤱ ᤔᤧᤳᤋᤢ. “ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢ—ᤁᤧᤜᤡᤶᤛᤕᤱᤜᤠ᤹ ᤛᤢᤈᤠ ᤐᤡᤖᤧᤛᤧ᤹. ᤌᤣᤀᤠᤱᤓᤧᤸᤗᤧ ᤂᤧᤏᤧ᤹ ᤁᤧᤛᤡ᤹᤺. ᤂᤧᤏᤧ᤹ ᤁᤧᤴᤘᤣ᤺ᤳᤏᤧᤴ॥”

² ᤜᤧᤰᤁᤣ᤺ᤸᤗᤧ ᤜᤡᤈᤁᤡᤕᤠ᤺ᤸᤗᤧ ᤁᤢᤏᤠᤖᤠᤴ ᤗᤢᤱᤎᤠᤰ ᤗᤧᤵᤔᤠᤱ ᤜᤡᤛᤢ ᤜᤧᤰᤁᤩᤠᤱ ᤀᤰᤂᤣ ᤐᤠ᤺ᤳᤋᤢᤀᤠᤱ ᤕᤜᤘᤣ ᤍᤠᤱᤒᤠᤴ ᤐᤣᤗᤡ ᤑᤠᤰᤋᤢ.

³ “ᤕᤜᤘᤣ ᤍᤠᤱᤒᤠᤀᤣ. ᤂᤧᤏᤧ᤹ ᤁᤧᤍᤃᤡ ᤀᤠᤱᤃᤠ᤹ ᤀᤠᤰᤂᤧᤴ ᤏᤛᤠᤏᤡᤒᤠ ᤐᤥ᤺ᤰᤂᤠᤱᤅᤠᤱ ᤁᤧᤖᤧᤰ ᤀᤠᤏᤡᤱᤘᤠ᤺ᤸᤗᤧ ᤁᤧᤛᤧᤘᤠ ᤕᤠ᤺ᤶᤒᤰ ᤆᤥᤃᤢᤱᤗ ᤗᤠᤱᤄᤣᤃᤠᤱᤅᤠᤱ ᤘᤠ᤹ᤀᤠ. ᤜᤧᤰᤁᤩᤠᤱ ᤂᤧᤏᤧ᤹ ᤀᤥᤃᤧᤔᤧᤳᤋᤢᤸᤗᤧ ᤌᤣ᤺ᤴ ᤏᤢᤒᤠ ᤆᤥᤰ ᤀᤠᤱᤃᤠ᤹ ᤜᤠᤒᤠ ᤂᤧᤴ ᤆᤥᤃᤢᤱᤅᤠᤱ ᤘᤠ᤹ᤀᤠ. ᤂᤧᤴ ᤏᤡᤱᤘᤠ᤹ ᤀᤡ᤺ᤳᤋᤧ᤹ᤀᤥ॥” ᤜᤧᤰᤁᤩᤠᤱ ᤜᤡᤈᤁᤡᤕᤠᤴ ᤀᤢ᤺ᤰᤁᤠᤱ ᤀᤢ᤺ᤰ ᤜᤠᤒᤧ॥

⁴ ᤂᤧᤒᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤋᤱᤒᤠ ᤁᤢᤒᤠ᤺ᤴᤈᤠᤰᤁᤡᤴ ᤕᤛᤤᤕᤠᤀᤥ ᤁᤧᤖᤧ.

⁵ “ᤂᤧᤏᤧ᤹ ᤐᤣᤃᤧ᤹ᤀᤠᤱ ᤜᤡᤈᤁᤡᤕᤠᤴ ᤔᤧᤳᤋᤧ᤹. ‘ᤂᤧᤏᤧ᤹ ᤁᤧᤛᤢᤎᤧᤒᤠ ᤁᤧᤍᤠᤰᤌᤧᤒᤠ ᤍᤠᤀᤢᤍ ᤜᤠᤱᤅᤡᤸᤗᤧ ᤁᤢᤏᤡᤱᤘᤠ᤹ᤑᤢᤔᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢ᤹—ᤀᤠᤱᤃᤠ᤹ ᤂᤧᤏᤧ᤹ ᤐᤣᤗᤡ ᤁᤧᤓᤠᤰᤋᤠᤱᤒᤠᤴ ᤂᤧᤵᤛᤢᤱ ᤜᤧᤰᤁᤩᤠᤱ ᤀᤠᤱᤃᤠ᤹ ᤁᤧᤜᤠᤒᤧᤒᤠ ᤁᤧᤔᤡᤰᤘᤠᤴ ᤏᤡᤛᤢᤱ॥ ᤀᤠᤱᤃᤠ᤹ ᤀᤠᤸᤗᤛᤠᤱ ᤌᤡᤒᤥᤱᤅᤠᤱ ᤅᤠᤛᤡ ᤋᤱᤒᤣ (᥇᥋) ᤂᤧᤏᤧ᤹ ᤁᤧᤎᤠ᤺ᤰ ᤑᤥᤛᤢᤱ ᤐᤡᤏᤧ॥

⁶ ᤀᤠᤱᤃᤠ᤹ ᤁᤴ ᤐᤠᤱᤈᤢᤶᤔᤡᤴ ᤀᤛ᤻ᤛᤢᤖᤒᤠ ᤜᤠᤱᤅᤡᤸᤗᤧ ᤁᤢᤜᤢᤰᤁᤥᤗᤠᤶ ᤋᤠᤱᤛᤧ᤺ᤵᤋᤢᤱᤅᤠᤱ ᤂᤧᤏᤧ᤹ ᤛᤧ᤺ᤵᤏᤧ॥ ᤜᤧᤰᤁᤩᤠᤱ ᤀᤠᤱᤃᤠ᤹ ᤁᤴ ᤕᤧᤰᤕᤰᤁᤡᤴ ᤌᤣ᤺ᤰᤋᤢᤱ॥

⁷ “‘ᤕᤜᤘᤣ ᤍᤠᤱᤒᤧᤸᤗᤧ ᤔᤠᤱᤜᤢᤵ ᤆᤥᤃᤢᤒᤠᤴ ᤂᤢᤏᤧ᤹ ᤀᤠᤒᤠᤅᤣ ᤁᤧᤳᤋᤢ ᤁᤧᤗ᤹ᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤡᤰᤛᤣ᤺ᤴᤏᤡᤴ ᤂᤧᤏᤧ᤹ ᤁᤧᤗᤠᤃᤡ ᤁᤴ ᤐᤥᤱ—

⁸ ᤀᤠᤜᤠᤈ ᤜᤠᤱᤅᤡᤸᤗᤧ ᤁᤢᤏᤠᤜᤠᤱᤛᤣ᤺ᤰᤁᤥ ᤏᤠᤶᤀᤡ᤺ᤰᤂᤱᤅᤡᤴ ᤕᤥᤕᤥᤰ ᤐᤣᤀᤠᤱ ᤐᤳ. ᤀᤠᤱᤃᤠ᤹ ᤂᤧᤴ ᤌᤡᤒᤥᤱ ᤏᤠᤜᤠᤱᤛᤣᤰ ᤌᤠᤖᤡᤰ ᤕᤠᤱᤎᤥ ᤏᤢ᤺ᤰᤋᤢᤱ॥’” ᤁᤸᤗᤧᤆᤥᤃᤢᤸᤗᤧ ᤏᤠᤶᤀᤡ᤺ᤰᤂᤱᤅᤡᤴ ᤕᤥᤕᤥᤰ ᤌᤠᤖᤡᤰ ᤐᤣᤀᤠᤱ ᤐᤳᤇᤧᤛᤠᤱ ᤌᤡᤒᤥᤱ ᤏᤠᤜᤠᤱᤛᤣᤰ ᤌᤠᤖᤡᤰ ᤀᤣᤃᤠᤱ ᤏᤢ᤺ᤰᤂᤧ॥

⁹ ᤕᤜᤢᤍᤠ ᤗᤠᤈᤣ᤹ᤒᤠ ᤜᤠᤱ ᤜᤡᤈᤁᤡᤕᤠᤴ ᤋᤢᤃᤧᤀᤠᤱ ᤘᤣ᤺ᤳᤋᤧ ᤜᤧᤰᤁᤩᤠᤱ ᤂᤢᤏᤧ᤹ ᤛᤠᤵᤋᤢᤒᤠ ᤐᤠ᤺ᤴᤜᤠ᤹—

¹⁰ ᤀᤠᤱᤃᤠ᤹ᤃ ᤀᤰᤂᤣ ᤐᤠ᤺ᤳᤋᤢᤱᤗᤥ. “ᤌᤣ ᤀᤠᤱᤃᤠ᤹ ᤌᤠᤱᤒᤧᤴ ᤀᤠᤘᤧᤶᤔᤥᤀᤣ ᤛᤡᤔᤧᤸᤗᤧ ᤗᤠᤶᤎᤣᤳ ᤛᤡᤃᤠᤱ ᤗᤠ᤺ᤳᤋᤠᤒᤠᤒᤡ᥅ ᤜᤧᤰᤁᤩᤠᤱ ᤀᤠᤎᤠᤰ ᤛ᤹ᤀᤠᤱ ᤀᤠᤸᤗ ᤔᤧᤜᤡᤱᤅᤠᤴᤒᤠᤒᤡ᥅”

¹¹ ᤀᤠᤱᤃᤠ᤹ ᤀᤡ᤺ᤳᤋᤢᤱ. “ᤁᤴ ᤁᤢᤜᤡᤱᤘᤧᤳᤜᤠ᤹ᤖᤧ ᤂᤢᤴᤇᤡ᤹ ᤗᤠᤈᤣ᤹ᤀᤥ ᤕᤜᤘᤣ ᤍᤠᤱᤒᤠᤴ ᤀᤠᤱᤃᤠ᤹ ᤔᤧᤏᤡᤀᤠᤴᤗᤥ॥ ᤔᤧᤴᤇᤠᤶ ᤕᤠᤵᤔᤡᤜᤠ᤹ ᤀᤠᤱᤃᤠ᤹ ᤔᤧᤏᤡᤀᤠᤛᤡᤱᤅᤡᤴᤗᤥ. ᤜᤧᤰᤁᤩᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤁᤧᤕᤢᤱᤒᤠ ᤔᤏᤠᤜᤠ᤹ᤏᤢ ᤘᤠ᤹ᤔᤠ ᤔᤧᤄᤥᤀᤠᤴᤗᤥ॥

¹² ᤐᤡᤳ ᤔᤧ᤺ᤴᤍᤠ ᤆᤠᤃᤧᤖᤠᤶᤒᤠᤸᤗᤧ ᤁᤢᤛᤠ᤺ᤱᤃᤠᤜᤡᤶ ᤜᤧᤰᤁᤣ ᤀᤠᤱᤃᤠ᤹ ᤀᤠᤜᤡᤶᤔᤧᤴ ᤔᤧᤕᤛᤢᤀᤠᤱ ᤔᤧᤏᤠᤵᤋᤠᤱ ᤔᤧᤍᤣ᤹ᤖᤠᤱᤗᤥ॥ ᤌᤠᤰ ᤁᤧᤎᤠᤰᤐᤧᤸᤗᤧ ᤛᤡᤱᤅᤥ ᤆᤡᤖᤡᤰᤁᤧᤴ ᤁᤡᤳᤋᤢᤒᤠ ᤜᤧᤰᤁᤣ ᤀᤠᤱᤃᤠ᤹ ᤀᤠᤜᤡᤱᤔᤏᤧᤴ ᤁᤡᤳᤋᤢᤱᤅᤠᤱ ᤐᤳᤗᤥ॥ ᤜᤧᤰᤁᤩᤠᤱ ᤂᤢᤏᤧ᤹ ᤂᤧᤴ ᤌᤠᤰᤁᤥᤗᤠᤶ ᤀᤠᤱᤃᤠ᤹ ᤂᤰᤋᤠᤱᤍᤣᤛᤠᤱᤗᤥ. ᤗᤧᤴᤍᤡᤰ ᤏᤢ ᤛᤧᤴᤍᤡᤰ ᤁᤧᤖᤧᤰ ᤀᤠᤱᤃᤠ᤹ ᤀᤠᤎᤠ᤺ᤰᤁᤡᤴ ᤁᤧᤏᤢᤵᤛᤢᤖᤥ॥

¹³ ᤋᤠᤏᤠᤶ ᤌᤠᤖᤡᤰ ᤏᤠᤛᤡ ᤌ᤺ᤳᤋᤢᤱᤅᤠᤱ ᤜᤠᤱᤄᤢᤱᤅᤠᤱ ᤕᤢᤅᤠᤱᤗᤥ. ᤁᤖ ᤁᤣᤒᤠᤸᤗᤧ ᤁᤢᤀᤡᤛᤡᤰ ᤂᤢᤏᤧ᤹ ᤀᤠᤱᤃᤠ᤹ ᤀᤠᤗᤢᤱᤛᤡᤜᤠ᤹ ᤁᤧᤖᤧᤰ ᤕᤖᤵ ᤀᤧᤰᤂᤠᤱ ᤐᤡᤖᤠᤱᤗᤥ. ᤗᤧᤴᤍᤡᤰ ᤏᤢ ᤛᤧᤴᤍᤡᤰ ᤏᤠᤶᤍᤠ᤺ᤳᤋᤠᤳᤗᤧᤀᤣ ᤂᤧᤏᤧ᤹ ᤁᤧᤏᤢᤵᤛᤠᤱᤗᤥ॥

¹⁴ ᤀᤠᤱᤃᤠ᤹ᤃ ᤁᤠᤖᤠ᤺ᤱᤘᤠ ᤀᤡᤃᤪ ᤁ᤺ᤱᤎᤧᤱᤏᤠ ᤐᤢ ᤜᤧᤰᤁᤣ ᤐᤠᤖᤠᤱᤗᤥ. ᤛᤠᤵᤐᤧᤳᤋᤪᤢ᤺ᤰᤔᤠ-ᤐᤢᤳᤋᤢ᤺ᤰᤁᤣ ᤁᤢᤀᤡᤛᤡᤰ ᤔᤧᤖᤡᤱ ᤌᤰᤋᤠᤱᤗᤥ. ᤀᤠᤱᤃᤠ᤹ ᤌᤠ᤺ᤱ ᤀᤥᤔᤢᤔᤠᤖᤧ ᤀᤠᤔᤡᤰᤜᤠ᤹ ᤕᤠ᤹ᤖᤢᤖᤥ॥ ᤕᤜᤘᤣ ᤍᤠᤱᤒᤠᤀᤣ. ᤀᤠᤱᤃᤠ᤹ᤃ ᤋᤢᤰᤂᤣ ᤗᤠᤰᤂᤣ ᤋᤢᤔᤢᤱᤗᤥ. ᤂᤧᤏᤧ᤹ ᤀᤠᤱᤃᤠ᤹ ᤛᤧ᤺ᤵᤋᤠᤱᤅᤧ᤹ᤀᤥ॥”

¹⁵ ᤁᤖ ᤀᤠᤸᤗ ᤀᤠᤱᤃᤠ᤹ ᤌᤣ ᤐᤠ᤺ᤵᤔᤠ ᤛᤢᤰᤋᤢᤱᤅᤠᤱᤒᤣ᥅ ᤕᤜᤘᤣ ᤍᤠᤱᤒᤧᤴ ᤀᤠᤱᤃᤠ᤹ᤏᤢ ᤐᤠᤖᤧᤖᤥ॥ ᤁᤱᤃ ᤂᤢᤏᤧ᤹ᤀᤣ ᤆᤥᤃᤢᤒᤠᤖᤥ॥ ᤀᤠᤱᤃᤠ᤹ ᤀᤠᤜᤡᤱᤔᤴᤏᤡᤸᤗᤧ ᤏᤡᤱᤛᤠᤶᤔᤥ ᤌᤩᤠᤱᤒᤠᤸᤗᤧ ᤀᤠᤱᤃᤠ᤹ ᤀᤠᤜᤡᤱᤜᤡᤱ ᤏ᤺ᤶᤏ᤺ᤶᤒᤠ ᤐᤥᤱᤅᤠᤀᤠᤱ ᤗᤠᤱᤄᤣ᤺ᤰᤁᤠᤖᤥ॥

¹⁶ ᤕᤜᤘᤣ ᤍᤠᤱᤒᤠᤀᤣ. ᤁᤴ ᤁᤧᤖᤧᤰ ᤐᤠ᤺ᤴᤜᤠ᤹ᤗᤠᤶ ᤔᤏᤠᤜᤠ᤹ ᤔᤧᤜᤡᤱᤗᤥ. ᤜᤧᤰᤁᤩᤠᤱ ᤀᤠᤕᤠᤶᤛᤠᤶᤔᤡᤸᤗᤧᤀᤠᤱ ᤂᤧ᤹ᤕᤥᤀᤣ ᤜᤡᤱᤔᤴ ᤂᤥᤛᤢᤖᤥ॥ ᤀᤠᤱᤃᤠ᤹ ᤂᤧᤏᤧ᤹ ᤁᤧᤏᤢᤛᤠᤱ ᤁᤧᤘᤣ᤺ᤴᤍᤠᤱᤗᤥ. ᤂᤧᤒᤩᤠᤱ ᤀᤠᤱᤃᤠ᤹ ᤜᤡᤱᤔᤠ ᤁᤧᤓᤠ᤺ᤰᤋᤠᤱᤗᤥ॥

¹⁷ ᤛᤧᤰᤂᤠᤛᤠᤱ ᤀᤠᤱᤃᤠ᤹ ᤀᤠᤗᤠᤃᤡ ᤏᤢᤒᤠ ᤐᤥᤱᤗ ᤑᤠ᤹ᤀᤠᤱ ᤀᤰᤋᤱᤒᤠ ᤋᤢᤰᤂᤣ ᤌᤶᤔᤠ ᤁᤧᤒᤥᤱᤒᤠ ᤐᤥ᤺ᤰᤂᤧᤖᤥ॥ ᤂᤧᤏᤧ᤹ ᤀᤠᤱᤃᤠ᤹ ᤗᤢᤱᤔᤠ᤹ ᤁᤧᤍᤢᤰᤋᤠᤱᤅᤠᤱ ᤔᤧᤰᤔᤠᤛᤡᤔᤠ ᤗᤢᤶᤒᤠ᤺ᤳᤋᤥᤗᤠᤶ ᤁᤧᤛᤧ᤺ᤵᤋᤠᤱᤗᤥ. ᤀᤠᤱᤃᤠ᤹ ᤁᤧᤖᤧᤰ ᤀᤠᤗᤠᤕᤥᤜᤠ᤹ ᤂᤧᤏᤧ᤹ ᤁᤧᤀᤣᤃᤠᤱ ᤗᤧᤵᤔᤠᤱ ᤁᤧᤕᤢᤰᤂᤢᤖᤥ॥

¹⁸ ᤂᤧᤔᤠᤕᤱᤛᤱᤅᤡᤸᤗᤧ ᤂᤧᤏᤧ᤹ ᤁᤧᤏᤠᤖᤠ ᤑᤥᤔᤠ ᤔᤧᤛᤢᤰᤋᤢᤸᤗᤥ. ᤛᤡᤔᤧᤸᤗᤧ ᤂᤧᤏᤧ᤹ ᤔᤡᤱᤛᤥ ᤀᤡᤱᤎᤠᤱ ᤐᤡᤔᤠ ᤁᤧᤴᤇᤢᤰᤏᤧᤸᤗᤥ॥ ᤀᤡᤐᤢᤱᤅᤥ ᤁᤧᤒᤣ᤺ᤰᤐᤠᤜᤠ᤹ᤖᤧ ᤂᤧᤏᤧ᤹ ᤏᤛᤠ᤺ᤴᤛᤠᤒᤠ ᤁᤧᤈᤥ᤺ᤰᤐᤠ ᤐᤠ᤺ᤴᤏᤡᤴ ᤏᤡᤱᤛᤠᤱ ᤆᤥ᤺ᤰᤔᤠ ᤔᤧᤴᤇᤢᤰᤋᤢᤸᤗᤥ॥

¹⁹ ᤀᤠᤀᤡᤴ ᤀᤠᤱᤃᤠ᤹ ᤂᤧᤏᤧ᤹ ᤁᤧᤏᤠᤖᤠ ᤑᤥᤛᤢᤱᤒᤠ ᤜᤧᤰᤁᤣ ᤁᤢᤜᤡᤱᤘᤧᤳ. ᤁᤧᤜᤡᤱᤒᤠᤜᤠ᤹ᤖᤧᤖᤰ ᤂᤧᤏᤧ᤹ ᤁᤧᤏᤠᤖᤠ ᤔᤧᤓᤥᤛᤢᤖᤥ॥ ᤂᤧᤏᤧ᤹ ᤏᤛᤠ᤺ᤴᤛᤠᤒᤠ ᤁᤧᤈᤥᤰ ᤑᤠ᤹ᤀᤠᤱ ᤐᤠᤏᤢᤍᤡᤱ ᤐᤠᤜᤠ᤹ᤖᤧ ᤂᤢᤴᤇᤡ᤹ ᤛᤠᤜᤠ᤹ ᤔᤧᤈᤧᤰᤋᤢᤛᤡᤖᤥ॥

²⁰ ᤕᤜᤘᤣ ᤍᤠᤱᤒᤧᤸᤗᤧ ᤀᤠᤱᤃᤠ᤹ ᤛᤧ᤺ᤵᤐᤠᤖᤥ. ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤥ ᤀᤴᤔᤣ ᤂᤡᤱᤔᤏᤠᤒᤠ ᤔᤢᤰᤗᤠᤜᤠ᤹ ᤔᤢᤰᤂᤢᤶᤒᤧᤖᤥ. ᤜᤧᤰᤁᤩᤠᤱ ᤀᤠᤏᤡᤃᤣ ᤜᤡᤱᤜᤡᤱ ᤌᤠᤖᤡᤰᤁᤣ ᤀᤠᤏᤡᤃᤣ ᤛᤠᤶᤗᤥᤖᤡᤃᤧᤖᤥ॥

²¹ ᤕᤛᤤᤕᤠ᤺ᤸᤗᤧ ᤀᤰᤂᤣ ᤐᤠ᤺ᤳᤋᤢᤀᤠᤱ ᤘᤕᤧ. “ᤐ᤺ᤳᤇᤣᤸᤗᤧ ᤁᤢᤈᤠ᤹ᤀᤡᤴ ᤀᤡᤏᤠᤏᤠᤒᤠ ᤆᤥᤃᤧᤶᤔᤧ᤹ᤀᤠᤱ ᤜᤡᤈᤁᤡᤕᤠ᤺ᤸᤗᤧ ᤁᤢᤜᤥ᤹ᤀᤥ ᤜᤢ᤺ᤳᤋᤧᤶᤔᤧ᤹. ᤂᤧᤒᤩᤠᤱ ᤂᤢᤏᤧ᤹ ᤘᤣ᤺ᤳ॥”

²² ᤜᤡᤈᤁᤡᤕᤠ᤺ᤸᤗᤧ ᤀᤰᤂᤣ ᤐᤠ᤺ᤳᤋᤢᤀᤠᤱ ᤛᤣ᤺ᤴᤍᤥᤛᤢᤛᤡ. “ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤥ ᤐᤣ᤺ᤰᤁᤠ ᤁᤧᤗ᤹ᤒᤠ ᤔᤡᤰᤛᤣᤴ ᤌᤣ ᤘᤠ᤹॥”