ᤕᤛᤤᤕᤠ 37 - LIFOTNTᤕᤛᤤᤕᤠ᤺ᤸᤗᤧ ᤔᤧᤳᤋᤢᤒᤠ ᤐᤠ᤺ᤴᤏᤡᤴ ᤜᤠᤱᤅᤡᤸᤗᤧ ᤂᤧᤵᤛᤢ ( ᥈ ᤜᤠᤱ ᥇᥏:᥇-᥍ ) 1 ᤁᤴ ᤐᤠ᤺ᤴᤏᤡᤴ ᤜᤡᤈᤁᤡᤕᤠ ᤜᤠᤱᤅᤡᤸᤗᤧ ᤂᤧᤵᤛᤢ. ᤜᤧᤰᤁᤩᤠᤱ ᤂᤢᤏᤧ᤹ ᤆᤠᤰᤂᤢᤒᤠ ᤁᤢᤈᤠᤱᤜᤠ᤹ ᤌᤧ᤺ᤰᤂᤢ. ᤂᤧᤶᤒᤩᤠᤱ ᤔᤧᤖᤡᤱ ᤌᤰᤔᤠ ᤛᤠᤃᤡ ᤋᤣᤳ ᤆᤠᤰᤛᤡᤱᤅᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤥ ᤗᤠᤛᤧ॥ 2 ᤂᤢᤏᤧ᤹ ᤜᤠᤱᤜᤡᤶᤔᤥᤒᤠ ᤕᤢᤰᤛᤠᤒᤠ ᤀᤣᤗᤩᤠᤁᤡᤔ. ᤛᤢᤜᤠᤱᤔᤡᤒᤠ ᤛᤣᤒ᤻ᤏᤠ᤺ᤴ ᤏᤢ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤀᤥ ᤛᤢᤶᤒᤪᤠᤱ ᤗᤠᤶᤗᤥᤒᤠᤜᤠ᤹ ᤛᤠᤃᤡ ᤋᤣᤳ ᤆᤠᤰᤋᤢᤛᤡᤀᤠᤱ ᤀᤠᤔᤥᤈᤖᤧ ᤁᤢᤛ᤻ᤛᤠ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤕᤛᤤᤕᤠᤀᤥ ᤐᤠᤱᤄᤢᤛᤡ॥ 3 ᤂᤧᤱᤜᤠ᤹ᤖᤧ ᤂᤢᤏᤧ᤹ ᤔᤧᤔᤧᤳᤋᤢ. “ᤜᤡᤈᤁᤡᤕᤠ ᤜᤠᤱᤅᤡᤸᤗᤧ ᤀᤰᤂᤣ ᤐᤠ᤺ᤳᤋᤢ᤹—ᤀᤠᤀᤡᤴᤒᤠ ᤕᤧᤴᤏᤡᤴ ᤋᤢᤰᤂᤣ ᤆᤠᤔᤠ. ᤐᤠ᤺ᤴᤈᤠᤔᤠ ᤜᤧᤰᤁᤩᤠᤱ ᤁᤢᤏᤠᤔᤧᤴᤇᤠ᤹ ᤐᤥᤱᤔᤠ ᤕᤧᤶ ᤘᤠ᤹. ᤀᤅᤧ᤺ᤰᤘᤠᤜᤠ᤹ ᤛᤠᤘᤠ᤺ᤴᤇᤡᤱᤔᤠ ᤔᤧᤈᤥ᤺ᤰᤁᤡᤸᤗᤧ ᤛᤠᤘᤠ᤺ᤶᤔᤠ ᤛᤠ᤹ᤀᤡᤔᤧᤴᤕᤠᤰᤔᤏᤠ ᤜᤧᤰᤋᤱᤒᤠ ᤐᤥ᤺ᤰᤂᤧᤀᤠᤱ ᤘᤠ᤹॥ 4 ᤕᤜᤘᤣ ᤍᤠᤱᤒᤠ ᤁᤧᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤌᤱᤅᤥᤒᤠ ᤌᤰᤔᤥᤒᤠᤸᤗᤧ ᤁᤢᤒᤠ᤺ᤴᤏᤡᤴ ᤂᤧᤵᤛᤢᤒᤡ. ᤂᤧᤴ ᤂᤢᤏᤧ᤹ ᤁᤢᤴᤍᤠᤱᤒᤠ ᤀᤛ᤻ᤛᤢᤖᤒᤠ ᤜᤠᤱᤅᤡᤸᤗᤧ ᤛᤍᤠᤍᤡᤱ ᤁᤢᤜᤡᤱᤘᤧᤳ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤔᤠᤱᤆᤧ᤹ᤕᤠ ᤔᤧᤳᤇᤧ ᤐᤠᤱᤄᤢᤀᤠᤱ ᤘᤠ᤹. ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤠ ᤁᤧᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤴ ᤐᤠ᤺ᤴᤏᤡᤴ ᤂᤧᤵᤛᤢᤀᤠᤱ ᤂᤢᤏᤧ᤹ ᤂᤧᤴ ᤌᤰᤔᤥᤒᤠᤴ ᤂᤢᤶᤍᤡᤱ ᤐᤡᤖᤢ॥ ᤁᤸᤗᤧᤆᤥᤃᤢᤸᤗᤧ ᤁᤧᤍᤠᤱᤒᤠ ᤁᤧᤕᤠ᤺ᤰᤐᤠᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤂᤧᤏᤧ᤹ ᤐᤣᤗᤡᤃᤧᤴ ᤋᤢᤘᤠ ᤆᤥᤃᤧ ᤐᤡᤖᤧᤛᤧ᤹॥” 5 ᤜᤡᤈᤁᤡᤕᤠ᤺ᤸᤗᤧ ᤐᤠᤱᤄᤢᤛᤡᤒᤠ ᤛᤢᤜᤠᤱᤕᤢᤰᤐᤠᤜᤠ᤹ ᤕᤛᤤᤕᤠᤀᤥ ᤔᤧᤍᤩᤧ॥ 6 ᤂᤢᤏᤧ᤹ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤂᤧᤏᤡ᤹ ᤍᤠᤱᤒᤠᤴ ᤁᤶᤓ ᤔᤧᤳᤋᤠᤶᤔᤧ᤹. ‘ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢ᤹—ᤀᤛ᤻ᤛᤢᤖᤒᤠ ᤜᤠᤱᤅᤡᤸᤗᤧ ᤁᤢᤛᤧᤘᤠᤖᤥᤒᤠᤜᤠ᤹ᤖᤧ ᤀᤠᤱᤃᤠ᤹ ᤔᤠᤱᤆᤧ᤹ᤕᤠ ᤔᤧᤔᤧᤳᤋᤠᤱᤒᤠ ᤁᤧᤄᤧᤵᤛᤢᤒᤠ ᤐᤠ᤺ᤴᤜᤠ᤹ᤗᤠᤶ ᤂᤧᤏᤧ᤹ ᤔᤧᤃᤡᤛᤧᤴᤏᤧ᤹॥ 7 ᤂᤧᤵᤛᤧᤶᤔᤧ᤹. ᤂᤧᤴ ᤀᤛ᤻ᤛᤢᤖᤒᤠ ᤜᤠᤱᤅᤡᤸᤗᤧ ᤁᤢᤏᤡᤱᤘᤠ᤹ᤀᤥ ᤀᤠᤱᤃᤠ᤹ ᤀᤰᤋᤱᤒᤠ ᤛᤠᤶᤎᤡᤰ ᤕᤠᤰᤋᤢᤱ ᤐᤡᤖᤢᤱ᤹. ᤂᤧᤸᤗᤧ ᤗᤳᤇᤠ ᤜᤕᤱ ᤁᤡᤸᤗᤡᤱ ᤐᤠᤴ ᤂᤧᤵᤛᤢᤀᤠᤱ ᤂᤢᤏᤧ᤹ ᤀᤠᤒᤠᤅᤣ ᤁᤢᤗᤠᤈᤣ᤹ᤀᤥ ᤏᤢ᤺ᤱᤅᤠᤱ ᤐᤣᤰ ᤜᤧᤰᤁᤩᤠᤱ ᤂᤧ᤹ᤕᤥ ᤀᤠᤱᤃᤠ᤹ ᤂᤢᤏᤧ᤹ ᤀᤠᤵᤑᤣᤰ ᤁᤢᤗᤠᤈᤣ᤹ᤀᤥ ᤋᤠᤓᤣ᤺ᤸᤗᤧ ᤔᤧᤈᤩᤧᤵᤋᤢ ᤔᤧᤛᤩᤧᤖᤢᤖ ᤕᤠ᤺ᤴᤍᤢᤱᤛᤡᤱᤗᤥ॥’” ᤀᤛ᤻ᤛᤢᤖᤒᤠ ᤔᤏᤠᤜᤠ᤹ᤖᤧ ᤕᤠᤶᤔᤥ ᤛᤧᤳᤋᤠᤛᤡᤃᤧ ᤔᤧᤔᤧᤳᤋᤢᤛᤡ ( ᥈ ᤜᤠᤱ ᥇᥏:᥎-᥇᥏ ) 8 ᤀᤛ᤻ᤛᤢᤖᤒᤠ ᤜᤠᤱᤅᤡᤸᤗᤧ ᤗᤠᤁᤡᤛ ᤐᤠᤱᤈᤢᤶᤔᤡᤴ ᤗᤧᤖᤢᤀᤠᤱ ᤐᤣ ᤁᤧᤗ᤹ᤒᤠ ᤀᤡᤱᤄᤱᤅᤡᤴ ᤌᤱᤅᤥᤒᤠ ᤌᤰᤔᤥᤒᤠᤸᤗᤧ ᤂᤧᤵᤛᤢ. ᤜᤧᤰᤁᤩᤠᤱ ᤂᤢᤏᤧ᤹ ᤕᤖᤢᤛᤗᤧᤔᤗᤠᤶ ᤏᤢ᤺ᤰᤂᤧᤀᤠᤱ ᤐᤣ᤺ᤸᤗᤧ ᤜᤠᤱᤅᤡᤴ ᤗᤡᤒ᤻ᤏᤠ᤺ᤴᤏᤢ ᤌᤱ ᤆᤥᤃᤧᤖ ᤕᤠᤃᤧᤒᤠ ᤋᤢᤔᤢ॥ 9 ᤀᤠᤸᤗ ᤁᤢᤛ ᤗᤠᤈᤣ᤹ᤒᤠ ᤜᤠᤱ ᤋᤡᤷᤜᤠᤁᤠᤜᤴ ᤌᤰᤛᤢᤒᤠᤜᤠ᤹ ᤑᤧᤳᤋᤢᤛᤡᤀᤠᤱ ᤌᤱ ᤆᤥ᤺ᤰᤛᤧ ᤑᤧᤸᤗ ᤐᤳ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤛᤏᤜᤣᤖᤡᤒᤖᤧ ᤂᤧᤵᤛᤢ॥ ᤜᤧᤰᤁᤣᤗ᤹ᤖᤡᤰ ᤂᤢᤏᤧ᤹ ᤁᤴ ᤐᤠ᤺ᤴᤏᤡᤴ ᤂᤧᤵᤛᤢᤀᤠᤱ ᤀᤡᤱᤄᤱ ᤁᤧᤛᤠᤒᤠᤜᤠ᤹ ᤜᤡᤈᤁᤡᤕᤠᤀᤥ ᤐᤠᤱᤄᤢᤛᤡ— 10 “ᤕᤜᤢᤍᤠᤒᤠ ᤜᤠᤱ ᤜᤡᤈᤁᤡᤕᤠᤴ ᤀᤰᤂᤣ ᤔᤧᤳᤋᤧᤶᤔᤧ᤹. ᤂᤧᤏᤧ᤹ ᤏᤠᤃᤧᤛᤠ᤹ᤖᤢᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ‘ᤕᤖᤢᤛᤗᤧᤔ ᤕᤧᤰᤕᤰᤁᤡᤴ ᤀᤛ᤻ᤛᤢᤖᤒᤠ ᤜᤠᤱᤅᤡᤸᤗᤧ ᤁᤢᤜᤢᤰᤁᤥ ᤌᤠᤔᤠ ᤔᤧᤓᤠ᤺ᤰᤁᤠᤴ’ ᤁᤧᤔᤧᤳᤋᤠᤱ ᤂᤧᤏᤧ᤹ ᤀᤡᤱᤗᤧᤰᤁᤥ ᤁᤧᤴᤎᤠᤏᤧᤸᤗ॥ 11 ᤀᤥᤔᤧᤳᤋᤧ᤹. ᤀᤛ᤻ᤛᤢᤖᤒᤠ ᤜᤠᤱᤜᤠ᤹ᤖᤧ ᤁᤧᤖᤧᤰ ᤂᤠᤶᤄᤢ ᤗᤠᤈᤣ᤹ᤜᤠ᤹ ᤂᤠᤵᤐᤢᤌᤩ᤺ᤱ ᤔᤧᤈᤥᤃᤢᤛᤡᤒᤠᤴ ᤂᤧᤏᤧ᤹ ᤀᤠᤒᤠᤅᤣ ᤁᤧᤄᤧᤵᤛᤢᤀᤠᤱ ᤁᤧᤘᤠ᤹॥ ᤜᤧᤰᤁᤣ᤺ᤸᤗᤧ ᤂᤧᤏᤧ᤹ ᤁᤧᤍᤠᤱᤒᤡ᥅ 12 ᤀᤠᤱᤃᤠ᤹ ᤀᤠᤛᤢᤎᤧᤒᤠ ᤀᤠᤍᤠᤰᤌᤧᤒᤠᤜᤠ᤹ᤖᤧ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤔᤧᤔᤧᤰᤂᤢᤛᤡᤸᤗᤧ ᤌᤣ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤔᤠᤱᤜᤠ᤹ᤖᤧ ᤋᤠᤱᤛᤧ᤺ᤵᤔᤠ ᤔᤧᤛᤢᤰᤋᤢᤛᤡᤒᤡ—ᤀᤡᤃᤪ ᤃᤥᤈᤠᤏ. ᤜᤠᤖᤠᤏ. ᤖᤣᤛᤣᤐ ᤏᤢ ᤋᤣᤗ-ᤀᤛ᤻ᤛᤠᤖᤀᤥ ᤁᤧᤕᤢᤱᤒᤠ ᤀᤍᤏᤒᤠ ᤔᤠᤱᤜᤠ᤹ᤖᤧ ᤂᤧᤱᤜᤠ᤹ ᤔᤧᤛᤧ᤺ᤵᤋᤢᤛᤡᤒᤡ᥅ 13 ᤜᤔᤠᤋᤒᤠ ᤜᤠᤱᤅᤡᤴ ᤏᤢ ᤀᤷᤐᤠᤍᤒᤠ ᤜᤠᤱᤅᤡᤴ. ᤛᤐᤷᤒᤣᤔ ᤐᤠᤱᤈᤢᤶᤔᤥᤒᤠ ᤜᤠᤱ ᤌᤣ ᤔᤧᤒᤥ᤺ᤰᤂᤧ᥅ ᤜᤣᤏᤠᤒᤠ ᤏᤢ ᤀᤡᤒ᤻ᤒᤠᤒᤠ ᤜᤠᤱᤜᤠ᤹ ᤀᤠᤳᤋᤡ ᤔᤧᤒᤣ᥅” ᤜᤡᤈᤁᤡᤕᤠᤖᤧ ᤁᤢᤍᤢᤘᤠᤴ 14 ᤜᤡᤈᤁᤡᤕᤠ᤺ᤸᤗᤧ ᤀᤡᤱᤄᤱ ᤁᤧᤛᤠᤒᤠᤜᤠ᤹ᤖᤧ ᤂᤢᤴᤇᤡ᤹ ᤜᤢᤰᤁᤥᤗᤠᤶ ᤛᤰᤀᤡᤱᤄᤱᤅᤡᤴ ᤋᤠ᤺ᤰᤋᤢᤀᤠᤱ ᤏᤡᤖᤢ॥ ᤂᤶᤓᤩᤠᤱ ᤜᤡᤈᤁᤡᤕᤠᤴ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤥ ᤐᤣᤀᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤂᤧᤴ ᤑᤠ᤺ᤰᤂᤢᤀᤠᤱ ᤏᤧᤛ᤻ᤛᤢ॥ 15 ᤜᤧᤰᤁᤩᤠᤱ ᤜᤡᤈᤁᤡᤕᤠ᤺ᤸᤗᤧ ᤕᤜᤘᤣ ᤍᤠᤱᤒᤠᤴ ᤁᤶᤓᤗ᤹ᤖᤡᤰ ᤐᤣᤗᤡ ᤑᤠᤰᤋᤢ. 16 “ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤠᤀᤣ. ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤣ. ᤁᤢᤗᤠᤵ ᤁᤧᤒᤵᤐᤠ ᤔᤠᤱᤗᤠᤀᤡᤱᤒᤠ ᤁᤖᤢᤒᤜᤠ᤹ᤖᤧ ᤁᤢᤗᤢᤶᤔᤥ ᤜᤠᤱᤕᤢᤰ ᤁᤧᤈᤥ᤺ᤰᤐᤠᤀᤠᤱ ᤁᤧᤕᤢᤱᤒᤠᤀᤣ. ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤁᤧᤖᤧᤰ ᤂᤠᤶᤄᤢ ᤗᤠᤈᤣ᤹ᤜᤠ᤹ᤀᤥ ᤏᤡᤱᤘᤠ᤹ᤑᤢᤔᤠᤱᤃ ᤂᤧᤏᤧ᤹ᤖᤰ ᤁᤧᤘᤠ᤹ᤖᤥ॥ ᤛᤠᤱᤃᤪᤠᤶᤐᤣᤍᤠᤱ ᤏᤢ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤂᤧᤏᤧ᤹ᤀᤣ ᤏᤠᤘᤠᤃᤧᤴ ᤆᤀᤡ᤺ᤳ ᤁᤧᤈᤥᤃᤢᤒᤠᤖᤥ॥ 17 ᤕᤜᤘᤣ ᤍᤠᤱᤒᤠᤀᤣ ᤏᤢᤖᤡᤰ ᤏᤡᤱᤘᤠ᤹ ᤐᤡᤖᤧ᤹ᤀᤠᤱ ᤂᤧᤵᤛᤧ᤹ᤀᤥ॥ ᤕᤜᤘᤣ ᤍᤠᤱᤒᤠᤀᤣ. ᤁᤧᤔᤡᤰᤁᤡᤴ ᤆᤠᤱᤈᤠᤱ ᤔᤧᤳᤋᤧ᤹ᤀᤠᤱ ᤀᤥᤔᤕᤧ᤹ᤀᤥ॥ ᤁᤢᤜᤡᤱᤘᤧᤳ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤔᤠᤱᤆᤧ᤹ᤕᤠ ᤔᤧᤵᤔᤠᤖᤧ ᤗᤠᤃᤡ ᤛᤏᤜᤣᤖᤡᤒᤧᤸᤗᤧ ᤐᤠ᤺ᤳᤋᤢ ᤑᤧᤴᤇᤢᤒᤠ ᤐᤠ᤺ᤴᤜᤠ᤹ ᤂᤧᤵᤛᤧ᤹ᤀᤥ॥ 18 “ᤕᤜᤘᤣ ᤍᤠᤱᤒᤠᤀᤣ. ᤁᤱᤃ ᤁᤢᤈᤧᤰᤐᤠ ᤛᤧᤰᤂᤠᤀᤣᤖᤥ. ᤀᤛ᤻ᤛᤢᤖᤒᤠ ᤜᤠᤱᤜᤠ᤹ᤖᤧ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤁᤧᤖᤧᤰ ᤔᤧᤴᤇᤠᤶ ᤕᤠᤵᤔᤡᤜᤠ᤹ ᤔᤧᤔᤧᤰᤂᤢᤛᤡᤀᤠᤱ ᤘᤠ᤹ᤖᤥ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤂᤠᤶᤄᤢ ᤗᤠᤈᤣ᤹ᤜᤠ᤹ᤀᤠᤱ ᤔᤢᤖᤧᤰ ᤂᤠᤖᤧᤰ ᤔᤧᤈᤥᤃᤢᤀᤠᤱ ᤏᤧᤖᤥ॥ 19 ᤂᤧᤱᤜᤠ᤹ᤖᤧ ᤔᤧᤴᤇᤠᤶ ᤕᤠᤵᤔᤡᤜᤠ᤹ᤖᤧ ᤂᤢᤴᤇᤡ᤹ ᤔᤠᤱᤛᤠᤶᤔᤠᤱᤜᤠ᤹ ᤔᤡᤀᤥ ᤗᤠᤶᤔᤧᤓᤣᤛᤢᤛᤡᤀᤠᤱ ᤘᤠ᤹ ᤜᤴᤏᤠᤱ ᤂᤠᤵᤐᤢᤌᤩ᤺ᤱ ᤔᤧᤈᤥᤃᤢᤛᤡ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤃ ᤏᤡᤱᤘᤠ᤹ᤑᤢᤔᤠᤱᤛᤡ ᤔᤣ᤺ᤴ. ᤁᤖ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤜᤢᤰᤁᤡᤸᤗᤧ ᤔᤧᤈᤥᤃᤢᤛᤡᤒᤠ ᤛᤡᤱ ᤏᤢ ᤗᤢᤱᤛᤡᤖᤰᤗᤥ॥ 20 ᤀᤠᤸᤗ. ᤕᤜᤘᤣ ᤍᤠᤱᤒᤠ ᤀᤠᤏᤡᤃᤣ ᤏᤡᤱᤘᤠ᤹ᤑᤢᤔᤠᤱᤅᤣ. ᤂᤧᤸᤗᤧ ᤁᤢᤜᤢᤰᤁᤥᤗᤠᤶ ᤀᤠᤏᤡᤃᤣ ᤆᤥ᤺ᤰᤕᤢᤶᤓᤥ ᤀᤠᤒᤡᤖᤧ᤹ᤀᤥ. ᤜᤧᤰᤁᤩᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤁᤥᤒᤠ ᤁᤧᤖᤧᤰ ᤂᤠᤶᤄᤢ ᤗᤠᤈᤣ᤹ᤜᤠ᤹ᤖᤧ ᤂᤧᤏᤧ᤹ᤖᤰ ᤕᤜᤘᤣ ᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱ ᤁᤧᤘᤠ᤹ ᤑᤠ᤹ᤀᤠᤱ ᤁᤢᤛᤡᤱ ᤔᤧᤏᤡ᤺ᤳᤋᤢᤖᤖᤥ॥” ᤕᤛᤤᤕᤠ᤺ᤸᤗᤧ ᤜᤠᤱᤅᤡᤴ ᤀᤡᤱᤄᤱ ᤜᤠᤰᤋᤢ ( ᥈ ᤜᤠᤱ ᥇᥏:᥈᥆-᥉᥍ ) 21 ᤂᤧᤒᤩᤠᤱ ᤀᤠᤔᤥᤈᤖᤧ ᤁᤢᤛ᤻ᤛᤠ ᤕᤛᤤᤕᤠ᤺ᤸᤗᤧ ᤜᤡᤈᤁᤡᤕᤠᤴ ᤀᤰᤋᤱᤒᤠ ᤀᤡᤱᤄᤱ ᤜᤠᤰᤋᤢ. “ᤕᤜᤘᤣ ᤍᤠᤱᤒᤠ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤰᤂᤣ ᤐᤠ᤺ᤳᤋᤢ᤹—ᤂᤧᤏᤧ᤹ ᤀᤛ᤻ᤛᤢᤖᤒᤠ ᤜᤠᤱ ᤛᤏᤜᤣᤖᤡᤒᤖᤧ ᤁᤢᤕᤠ᤺ᤶᤒᤣ᤹ᤀᤥ ᤀᤠᤱᤃᤠ᤹ ᤐᤣᤗᤡ ᤁᤧᤓᤠᤰᤋᤠᤱ. 22 ᤁᤸᤗᤧᤆᤥᤃᤢᤸᤗᤧ ᤂᤢᤏᤧ᤹ ᤁᤢᤍᤰᤗᤧᤱᤘᤠᤀᤥ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤒᤠ ᤐᤠ᤺ᤴᤏᤡᤴ ᤜᤠᤒᤠ ᤁᤴᤗᤥ. “ᤛᤡᤕᤥᤏᤧᤸᤗᤧ ᤛᤡᤛᤠᤃᤧᤴ ᤁᤢᤛ᤻ᤛᤠ ᤔᤧᤴᤇᤢᤔᤠ᤺ᤸᤗᤧ ᤂᤧᤏᤧ᤹ ᤁᤢᤏᤠᤔᤧᤴᤇᤠ᤹ ᤁᤧᤶᤔᤧᤳᤋᤠᤱ ᤀᤣ᤺ᤳᤗᤥ॥ ᤕᤖᤢᤛᤗᤧᤔ ᤕᤧᤰᤕᤰᤁᤡᤸᤗᤧ ᤁᤢᤛ᤻ᤛᤠ ᤔᤧᤴᤇᤢᤔᤠ᤺ᤸᤗᤧ ᤁᤢᤎᤧᤃᤣ᤺ᤰᤁᤡᤴ ᤋᤄᤢᤶᤋᤄᤢᤶ ᤔᤧᤳᤋᤢᤖ ᤗᤠᤛᤠᤰ ᤁᤧᤔᤧᤳᤗᤥ॥ 23 ᤂᤧᤏᤧ᤹ ᤜᤠᤳ ᤁᤡᤏᤠ᤺ᤴᤍᤡ ᤁᤧᤒᤡᤖᤢᤖ ᤆᤧ᤹ᤕᤠ ᤀᤡᤱᤍᤥ ᤁᤧᤔᤧᤳᤋᤢᤀᤠᤱ ᤘᤠ᤹᥅ ᤜᤠ᤺ᤳᤗᤧ ᤁᤢᤍᤰᤗᤧᤱᤘᤠᤀᤥ ᤂᤧᤏᤧ᤹ ᤕᤶᤒᤠ ᤀᤡᤰᤗᤠᤀᤥ ᤁᤧᤀ᤺ᤰᤋᤧᤀᤠᤱ ᤘᤠ᤹᥅ ᤜᤧᤰᤁᤩᤠᤱ ᤁᤧᤜᤧᤴᤇᤡᤱᤅᤠᤱ ᤀᤥᤃᤧᤔ᤹᤺. ᤌᤣ ᤀᤡᤛᤪᤠᤀᤡᤗᤖᤧ ᤁᤢᤛᤣᤛᤣᤒᤠᤸᤗᤧ ᤁᤢᤍᤰᤗᤧᤱᤘᤠᤀᤥ ᤁᤢᤏᤠᤔᤧᤴᤇᤠ᤹ ᤏᤢ ᤔᤠᤱᤆᤧ᤹ᤕᤠ ᤔᤣ᤺ᤶᤒᤡ᥅ 24 ᤂᤧᤏᤧ᤹ ᤁᤧᤀᤡᤱᤄᤱ ᤁᤧᤛᤠᤒᤠᤜᤠ᤹ᤗᤠᤶ ᤂᤧᤏᤧ᤹ ᤕᤜᤘᤣ ᤍᤠᤱᤒᤠᤴ ᤕᤖᤡᤰ ᤁᤡᤏᤠ᤺ᤴᤍᤡ ᤁᤧᤒᤡᤖᤢᤀᤠᤱ ᤘᤠ᤹ᤖᤥ॥ ᤜᤧᤰᤁᤩᤠᤱ ᤂᤧᤏᤧ᤹ ᤀᤰᤂᤣ ᤁᤧᤒᤠ᤺ᤳᤋᤢᤀᤠᤱ ᤘᤠ᤹ᤖᤥ. ‘ᤀᤠᤱᤃᤠ᤹ ᤁᤳᤋᤢᤱᤛᤡᤱᤒᤠ ᤕᤖᤡᤰ ᤀᤴᤗᤠᤎᤠᤜᤠ᤹ᤏᤢ ᤛᤥᤖᤡᤰ ᤀᤠᤱᤃᤠ᤹ ᤌᤧᤃᤢ ᤛᤶᤎᤠᤱ ᤗᤡᤅᤢᤱᤗᤥ. ᤗᤧᤒᤏᤠᤏᤒᤠ ᤁᤥ᤺ᤰᤔᤠ ᤑᤠᤱᤈᤱᤜᤠ᤹ᤀᤠᤱ ᤗᤡᤅᤢᤱᤗᤥ॥ ᤂᤧ᤹ᤕᤥ ᤁᤧᤕᤢᤱᤒᤠ ᤁᤣ᤺ᤶᤒ ᤁᤣ᤺ᤶᤒᤠ ᤛᤠᤶᤔᤠᤱᤛᤡᤱᤜᤠ᤹ ᤏᤢ ᤏᤢ᤺ᤒ᤻ᤏᤢᤒᤠ ᤀᤠ᤺ᤱᤜᤠ᤹ ᤛᤥ᤺ᤴᤍᤢᤱᤛᤡᤱᤅᤠᤱ ᤏᤧᤖᤥ॥ ᤂᤧ᤹ᤕᤥᤒᤠ ᤁᤠᤰᤏᤢ᤺ᤸᤗᤧ ᤔᤠ᤺ᤱᤄᤠᤒᤠ ᤏᤠᤱᤈᤱᤗᤢᤱᤅᤥ ᤏᤢ ᤛᤡᤖᤠ᤹ᤃᤧᤎᤠᤱᤒᤠ ᤋᤠᤶᤓᤢᤱᤅᤥ ᤌᤠᤖᤡᤰᤁᤣ ᤁᤧᤖᤠᤱᤅᤠᤱ ᤘᤠ᤹ᤖᤥ॥ 25 ᤀᤠᤱᤃᤠ᤹ ᤘᤣ᤹ ᤗᤠᤈᤣ᤹ᤜᤠ᤹ᤀᤥ ᤘᤒᤠᤰ ᤋᤕᤢᤱᤅᤠᤱ ᤏᤧᤖᤥ ᤜᤧᤰᤁᤩᤠᤱ ᤀᤠᤱᤃᤠ᤹ ᤂᤧ᤹ᤕᤥ ᤆᤫᤠ᤺ᤳ ᤌᤢᤅᤢᤱᤅᤠᤱ ᤘᤠ᤹ᤖᤥ॥ ᤀᤠᤱᤃᤠ᤹ ᤀᤠᤗᤠᤱᤋᤠᤵᤐᤣ᤹ᤀᤡᤸᤗᤧ ᤋᤥ᤹ᤖᤢᤱᤅᤠᤱ ᤔᤡᤛᤪ ᤗᤠᤈᤣ᤹ᤒᤠ ᤁᤧᤖᤧᤰ ᤘᤜ᤺ᤱᤜᤠ᤹ ᤆᤵᤛᤢᤱᤅᤠᤱ ᤏᤧᤖᤥ॥’ 26 “ᤌᤣ ᤂᤧᤏᤧ᤹ ᤁᤧᤄᤧᤵᤛᤢᤒᤠ ᤜᤥ᤺ᤵᤐᤡ᥅ ᤀᤠᤱᤃᤠ᤹ ᤁᤴ ᤀᤢᤴᤇᤥ᤺ᤴᤏᤣ ᤏᤡ᤺ᤴᤎᤥ ᤆᤥᤃᤢᤱᤅᤠᤱ ᤘᤕᤧᤖᤥ. ᤀᤢᤏᤠᤜᤢᤖᤡᤒᤠ ᤕᤧᤶᤔᤥᤀᤣ ᤁᤴ ᤆᤥ᤺ᤰᤔᤠ ᤏᤡᤱᤘᤠ᤹ ᤆᤥᤃᤢᤱᤅᤠᤱ ᤘᤕᤧᤖᤥ. ᤀᤠᤸᤗᤥ ᤀᤠᤱᤃᤠ᤹ ᤂᤧᤴ ᤁᤧᤳᤋᤢᤱᤅᤠᤱ ᤘᤠ᤹ᤖᤥ. ᤂᤧᤏᤧ᤹ ᤂᤧᤴ ᤁᤒᤪᤡᤱ ᤑᤠᤱᤔᤏᤠᤒᤠ ᤕᤧᤰᤕᤰᤜᤠ᤹ ᤜᤰᤋᤰ ᤁᤧᤈᤥᤃᤢᤖᤥ॥ 27 ᤂᤧ᤹ᤕᤥ ᤁᤧᤕᤢᤱᤒᤠ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤛᤠᤶᤔᤡᤰ ᤔᤧᤕᤧᤒᤠᤸᤗᤧ ᤆᤥᤃᤢᤸᤗᤧ ᤂᤧᤱᤜᤠ᤹ ᤔᤧᤃᤡᤛᤧᤀᤠᤱ ᤔᤧᤏᤢ᤺ᤴᤍᤧᤖᤥ. ᤂᤧᤱᤜᤠ᤹ ᤂᤠᤶᤒᤠᤱᤅᤥᤒᤠ ᤕᤠᤴ ᤜᤧᤰᤁᤣ. ᤗᤧᤰᤘᤠ ᤑᤢᤱ ᤏᤢ ᤂᤠᤖᤰ ᤁᤧᤗᤡᤱᤒᤠ ᤁᤢᤏ᤺ᤰ ᤁᤢᤀᤡᤛᤡᤰ. ᤗᤡᤱᤄᤠᤶᤒᤢᤀᤥ ᤁᤧᤗᤡᤱᤒᤠ ᤜᤧᤰᤁᤩᤠᤱ ᤐᤥᤔᤠᤏᤢ᤺ᤸᤗᤧ ᤋᤃᤡ ᤁᤧᤜᤣᤒᤠ ᤁᤧᤒᤣ᤺ᤰᤐᤠ ᤕᤠᤴ ᤜᤧᤰᤋᤱᤒᤠ ᤔᤧᤒᤥ᤺ᤰᤂᤧᤖᤥ॥ 28 “ᤁᤖ ᤂᤧᤏᤧ᤹ ᤀᤠᤳᤋᤡ ᤁᤧᤕᤢᤱ ᤜᤧᤰᤁᤩᤠᤱ ᤂᤧᤏᤧ᤹ ᤀᤠᤓᤧᤸᤗᤧ ᤁᤧᤍᤠ ᤁᤧᤒᤣ᤺ᤰ ᤂᤧᤴ ᤀᤠᤱᤃᤠ᤹ ᤏᤡᤛᤢᤱᤅᤠᤱ ᤘᤠ᤹ᤖᤥ. ᤂᤧᤒᤩᤠᤱ ᤀᤠᤱᤃᤠ᤹ᤏᤢ ᤂᤧᤏᤧ᤹ ᤁᤧᤕᤠ᤺ᤰᤗᤧ᤹ᤖᤧᤀᤠᤱ ᤘᤠ᤹ᤒᤠᤴ ᤀᤠᤱᤃᤠ᤹ ᤁᤢᤛᤡᤱ ᤏᤡ᤺ᤳᤋᤢᤱᤅᤠᤱ ᤘᤠ᤹ᤖᤥ॥ 29 ᤂᤧᤏᤧ᤹ ᤁᤧᤜᤧᤴᤇᤡᤱᤔᤧᤴ ᤀᤠᤴᤓᤠᤰᤁᤥ ᤁᤧᤖᤧᤒᤠᤸᤗᤧ ᤆᤥᤃᤢᤸᤗᤧ. ᤀᤠᤱᤃᤠ᤹ ᤂᤧᤏᤧ᤹ ᤁᤧᤴᤒᤥᤀᤥ ᤂᤣ᤺ᤱᤅᤡᤸᤗᤧ ᤘᤣ᤹ᤏᤧᤖᤥ ᤂᤧᤏᤧ᤹ ᤁᤧᤶᤒᤪᤠᤀᤥ ᤁᤖᤧᤗᤡᤴ ᤑᤳᤇᤢᤱᤗᤥ. ᤂᤧᤒᤩᤠᤱ ᤂᤧᤏᤧ᤹ ᤁᤧᤍᤩᤧᤒᤠ ᤗᤠᤶᤔᤥ ᤗᤠᤶᤒᤠᤀᤣ ᤀᤠᤱᤃᤠ᤹ ᤁᤧᤏᤢ᤺ᤱ ᤁᤧᤒᤣ᤺ᤰᤗ ᤕᤠ᤺ᤴᤏᤧᤖᤥ॥” 30 ᤂᤧᤴ ᤀᤣᤃᤠᤱ ᤜᤡᤈᤁᤡᤕᤠ᤺ᤸᤗᤧ ᤜᤠᤱᤅᤡᤴ ᤔᤧᤳᤋᤢᤖᤥ. “ᤂᤧᤏᤧ᤹ ᤁᤧᤗᤠᤃᤡ ᤔᤡᤰᤛᤣᤴ ᤜᤠᤒᤠ ᤁᤴ ᤐᤥᤱᤗᤥ. ᤁᤴ ᤋᤱᤒᤣ᤹ ᤀᤠᤒᤠᤅᤣ ᤁᤧᤗᤡᤱᤒᤠ ᤁᤢᤈᤠᤜᤠ᤹ ᤂᤧᤏᤡ᤹ ᤁᤧᤈᤠᤶᤗᤥ. ᤜᤧᤰᤁᤩᤠᤱ ᤁᤧᤍᤠᤒᤠ ᤋᤱᤒᤣᤀᤥ ᤀᤠᤶᤓᤠ ᤂᤧ᤹ᤕᤥ ᤁᤧᤎᤥ᤺ᤰᤐᤠᤜᤠ᤹ ᤁᤧᤈᤠᤶᤗᤥ. ᤁᤖ ᤋᤱᤒᤣ᤹ ᤛᤢᤶᤛᤡ ᤀᤣᤃᤠᤱᤃ ᤕᤠ᤹ᤖᤡ᤺ᤶᤒᤠ ᤜᤣ᤹ᤖᤠᤶᤔᤧ᤹ᤀᤥ. ᤁᤢᤈᤠ ᤑᤢᤰᤂᤠᤶᤔᤧ᤹. ᤆᤧᤸᤗᤧᤰᤛᤣ᤹ ᤗᤣ᤺ᤳᤋᤠᤶᤔᤧ᤹ᤀᤠᤱ ᤁᤢᤈᤠ᤹ᤀᤡᤴ ᤆᤠᤶᤔᤧ᤹ᤀᤥ॥ 31 ᤛᤡᤱᤒᤢᤱᤅᤡᤴ ᤁᤢᤛᤠ᤺ᤵ ᤗᤣ᤺ᤳᤇᤡᤱᤅᤠᤱ ᤁᤢᤈᤠ᤹ ᤌᤥ᤺ᤰᤐᤠ ᤜᤧᤰᤁᤣ ᤕᤜᤢᤍᤠᤖᤧ ᤁᤢᤜᤡᤶᤛᤕᤱᤗᤠᤶ ᤁᤧᤍᤠᤱᤒᤠ ᤁᤧᤕᤠ᤺ᤰᤐᤠ ᤔᤏᤠᤜᤠ᤹ ᤕᤠᤶᤔᤥ ᤔᤧᤒᤥᤴ ᤔᤧᤎᤧ᤹ᤖᤥ॥ 32 ᤌᤣᤀᤠᤱᤓᤧᤸᤗᤧ ᤕᤖᤢᤛᤗᤧᤔᤗᤠᤶ ᤁᤧᤍᤠᤱᤒᤠ ᤁᤧᤕᤠ᤺ᤰᤐᤠ ᤗᤳᤇᤠ ᤔᤏᤠᤗᤢᤵ ᤏᤢ ᤛᤡᤕᤥᤏ ᤁᤥ᤺ᤰᤔᤠᤗᤠᤶ ᤁᤢᤜᤡᤱᤘᤧᤳ ᤔᤏᤠᤗᤢᤵᤜᤠ᤹ ᤔᤧᤗ᤺ᤴᤗᤥ. ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤡᤰᤛᤶᤔᤠᤸᤗᤧ ᤁᤴ ᤆᤥᤃᤢᤖᤥ॥ 33 “ᤁᤸᤗᤧᤆᤥᤃᤢᤸᤗᤧ ᤀᤛ᤻ᤛᤢᤖᤒᤠ ᤜᤠᤱᤅᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤖᤥ— “ᤂᤢᤏᤧ᤹ ᤁᤴ ᤕᤧᤰᤕᤰᤁᤥ ᤔᤧᤍᤠᤏᤧᤴ ᤀᤡᤃᤪ ᤗᤳᤇᤠ ᤋᤥ᤺ᤱᤎᤡᤰᤁᤠᤱ ᤔᤧᤀᤠᤒᤢᤴᤗᤥ. ᤂᤧᤴ ᤁᤸᤗᤧ ᤁᤢᤒᤣᤛᤠᤱ ᤂᤥ᤺ᤴ ᤑᤧᤳᤋᤢᤀᤠᤱ ᤔᤧᤓᤧᤴᤏᤧᤴᤗᤥ. ᤁᤴ ᤑᤵᤔᤠᤖᤧ ᤗᤠᤃᤡ ᤆᤴᤇᤡᤱᤔᤠ ᤗᤢᤱᤎᤠᤰᤁᤠᤱ ᤔᤧᤛᤧᤳᤋᤢᤴᤗᤥ॥ 34 ᤀᤠᤳᤋᤡ ᤗᤠᤶᤒᤠ ᤂᤧᤴ ᤑᤧᤖᤧ ᤜᤠᤒᤠ ᤂᤧᤴ ᤗᤠᤶᤔᤣ ᤐᤥᤱᤅᤠᤱ ᤏᤢ᤺ᤱᤒᤣ᤺ᤰᤗᤥ. ᤁᤴ ᤕᤧᤰᤕᤰᤁᤥ ᤂᤢᤏᤧ᤹ ᤔᤧᤗᤠ᤺ᤳᤏᤧᤴᤗᤥ” ᤕᤜᤘᤣ ᤍᤠᤱᤒᤧᤸᤗᤧ ᤜᤠᤒᤠ ᤁᤴ ᤀᤢᤘᤠ ᤆᤥᤃᤢᤖᤥ॥ 35 “ᤀᤠᤱᤃᤠ᤹ ᤀᤠᤗᤠᤃᤡ ᤏᤢ ᤀᤠᤛᤧᤘᤠᤖᤥᤒᤠ ᤍᤠᤀᤢᤍᤖᤧ ᤁᤢᤗᤠᤃᤡ ᤀᤠᤱᤃᤠ᤹ ᤁᤴ ᤕᤧᤰᤕᤰᤁᤡᤴ ᤏᤠᤅᤢᤱ᤹ ᤜᤧᤰᤁᤩᤠᤱ ᤛᤧ᤺ᤵᤋᤢᤱᤗᤥ᥄” 36 ᤂᤧᤒᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤠᤱᤗᤠᤀᤡᤱᤒᤠᤴ ᤀᤛ᤻ᤛᤢᤖᤡᤜᤠ᤹ᤖᤧ ᤂᤢᤴᤇᤡ᤹ ᤋᤢᤖᤠᤜᤡᤶᤔᤥ ᤐᤣᤀᤠᤱ ᤗᤠᤅᤧᤴᤇᤡᤱ ᤌᤡᤰ ᤏᤢ ᤕᤧᤵᤐᤥᤱᤅᤠᤱ ᤜᤧᤴᤇᤡᤱ ᤅᤠᤛᤡ (᥇.᥎᥋.᥆᥆᥆) ᤔᤏᤠᤜᤠ᤹ ᤜᤍ᤹ ᤛᤩᤧᤖᤢᤛᤡ॥ ᤔᤏᤠᤜᤠ᤹ ᤋᤠᤏᤠᤶ ᤔᤧᤒᤥᤃᤧᤸᤗᤧ ᤂᤧᤱᤜᤠ᤹ᤖᤧ ᤂᤧᤴ ᤁᤧᤛᤡᤒᤠ ᤔᤏᤠᤜᤠ᤹ ᤔᤧᤏᤡᤛᤢᤛᤡ॥ 37 ᤁᤸᤗᤧᤆᤥᤃᤢᤸᤗᤧ ᤀᤛ᤻ᤛᤢᤖᤡᤜᤠ᤹ᤖᤧ ᤂᤢᤴᤇᤡ᤹ ᤜᤠᤱ ᤛᤏᤜᤣᤖᤡᤒᤧᤸᤗᤧ ᤋᤢᤖᤠᤜᤡᤶᤜᤠ᤹ ᤕᤛ᤻ᤛᤢᤀᤠᤱ ᤏᤢ᤺ᤰᤋᤢ ᤋᤣ᤹ᤖᤢᤛᤡ॥ ᤂᤢᤏᤧ᤹ ᤏᤡᤏᤒᤣ ᤐᤣᤀᤠᤱ ᤂᤧᤵᤔᤥ ᤕᤢᤱᤔᤠ ᤜᤣ᤺ᤰᤋᤧ॥ 38 ᤌᤡᤰᤕᤠᤴ ᤂᤢᤏᤧ᤹ ᤁᤢᤔᤠᤱ ᤏᤡᤛᤪᤥᤁᤡᤸᤗᤧ ᤁᤢᤔᤠᤱᤜᤡᤶᤔᤥ ᤛᤡᤍᤢᤱᤈᤓᤠ ᤋᤥ᤺ᤴᤍᤢᤖ ᤕᤠᤃᤧᤸᤗᤧ ᤂᤢᤏᤧ᤹ ᤁᤢᤛ᤻ᤛᤠ ᤀᤍᤪᤶᤔᤗᤣᤁ ᤏᤢ ᤛᤖᤣᤛᤣᤖᤧᤸᤗᤧ ᤋᤠᤓᤣ᤺ᤸᤗᤧ ᤆᤩᤧᤵᤋᤢ ᤛᤩᤧᤖᤢᤛᤡ. ᤂᤧᤒᤩᤠᤱ ᤂᤧᤳᤏᤧᤇᤡᤀᤠᤱ ᤀᤠᤖᤠᤖᤠᤋ ᤗᤠᤈᤣ᤹ᤀᤥ ᤐᤣᤛᤡ॥ ᤂᤧᤴ ᤀᤣᤃᤠᤱ ᤂᤢᤏᤧ᤹ ᤁᤢᤗᤧᤰᤘᤠ ᤁᤢᤛ᤻ᤛᤠ ᤀᤣᤛᤖᤜᤍᤥᤏᤧᤴ ᤜᤠᤱ ᤐᤥ᤺ᤰᤂᤧᤀᤠᤱ ᤕᤢᤰ ᤆᤥ᤺ᤰᤔᤠ ᤜᤣ᤺ᤰᤋᤢᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.