ᤕᤛᤤᤕᤠ 36 - LIFOTNT

ᤛᤏᤜᤣᤖᤡᤒᤖᤧ ᤕᤖᤢᤛᤗᤧᤶᤔᤡᤴ ᤔᤧᤱᤔᤠ ᤁᤥ᤺ᤳᤋᤢᤒᤠ

¹ ᤜᤡᤈᤁᤡᤕᤠ ᤜᤠᤱᤅᤡᤸᤗᤧ ᤕᤢᤰ ᤆᤥᤃᤢᤒᤠ ᤌᤡᤒᤥᤱᤅᤠᤱ ᤗᤡᤛᤡ ᤋᤱᤒᤣ᤹ ᤁᤧᤖᤧᤸᤗᤧ ᤀᤛ᤻ᤛᤢᤖᤒᤠ ᤜᤠᤱ ᤛᤏᤜᤣᤖᤡᤒᤧᤸᤗᤧ ᤕᤜᤢᤍᤠ ᤗᤠᤈᤣ᤹ᤀᤥ ᤗᤢᤱᤎᤠᤰ ᤔᤧᤛᤧᤳᤋᤢᤒᤠ ᤕᤧᤰᤕᤰᤜᤠ᤹ᤀᤥ ᤋᤧᤴᤎᤱ ᤆᤥᤃᤢᤀᤠᤱ ᤁᤧᤖᤧᤰ ᤜᤢᤰᤁᤠᤵ ᤔᤧᤳᤇᤡᤱ॥

² ᤜᤧᤰᤁᤩᤠᤱ ᤀᤛ᤻ᤛᤢᤖᤒᤠ ᤜᤠᤱᤅᤡᤸᤗᤧ ᤁᤢᤎᤰᤔᤥᤒᤠᤎᤡᤰ ᤕᤖᤡᤰ ᤌᤰᤛᤢᤒᤠᤜᤠ᤹ᤏᤢ ᤗᤠᤁᤡᤛᤗᤠᤶ ᤕᤖᤢᤛᤗᤧᤔ ᤕᤧᤰᤕᤰᤁᤥᤒᤠ ᤜᤡᤈᤁᤡᤕᤠ ᤜᤠᤱᤅᤡᤸᤗᤧᤀᤥ ᤐᤠᤱᤄᤢᤛᤡ॥ ᤂᤧᤒᤩᤠᤱ ᤌᤰᤔᤥᤒᤠᤴ ᤆᤠᤱ ᤘᤠᤃᤧᤜᤵᤐᤠᤸᤗᤧ ᤁᤢᤒᤩᤠᤱᤛᤡ᤺ᤸᤗᤧ ᤔᤠᤖᤠᤶᤔᤥ ᤁᤧᤏᤧᤒᤠ ᤌᤥᤛᤔᤠ ᤘᤖᤰᤁᤥᤗᤠᤶ ᤆᤫᤠ᤺ᤳ ᤁᤧᤗ᤺ᤶᤒᤠ ᤁᤧᤕᤢᤒᤠ ᤘᤠᤗᤠᤶᤔᤥ ᤁᤧᤖᤧᤀᤠᤱ ᤕᤧᤶᤛᤡᤱ॥

³ ᤂᤧᤶᤒᤩᤠᤱ ᤜᤡᤸᤗᤡᤁᤡᤕᤠᤖᤧ ᤁᤢᤛ᤻ᤛᤠ ᤀᤣᤗᤩᤠᤁᤡᤔ ᤜᤠᤱᤜᤡᤶᤔᤥᤒᤠ ᤕᤢᤰᤛᤠᤒᤧᤴ. ᤛᤢᤜᤠᤱᤔᤡᤒᤠ ᤛᤣᤒ᤻ᤏᤠ. ᤜᤧᤰᤁᤩᤠᤱ ᤂᤠᤖᤠᤳ ᤁᤧᤕᤢᤱᤒᤠ ᤀᤠᤛᤠᤐᤖᤧ ᤁᤢᤛ᤻ᤛᤠ ᤕᤥᤀᤠ᤺ᤴ ᤗᤠ᤺ᤰᤁᤠᤳ ᤔᤧᤗ᤺ᤴᤍᤧᤀᤠᤱ ᤌᤰᤔᤥᤒᤠᤴ ᤔᤧᤍᤢᤔᤢ॥

⁴ ᤌᤱ ᤁᤧᤎᤰᤐᤠ ᤌᤰᤔᤥᤒᤠᤸᤗᤧ ᤂᤧᤱᤜᤠ᤹ ᤜᤡᤈᤁᤡᤕᤠᤴ ᤀᤰᤂᤣ ᤔᤧᤳᤋᤧᤶᤔᤧ᤹ ᤔᤧᤳᤋᤢᤛᤡ. “ᤀᤛ᤻ᤛᤢᤖᤒᤠ ᤐᤕᤶ ᤜᤠᤱᤅᤡᤸᤗᤧ ᤀᤰᤂᤣ ᤐᤠ᤺ᤳᤋᤢ᤹—ᤂᤧᤏᤧ᤹ ᤀᤠᤳᤋᤡᤴᤏᤢ ᤁᤧᤄᤧ᤺ᤶᤛᤡᤱᤅᤠᤱ ᤏᤡᤱᤘᤠ᤹ ᤏᤡ᤺ᤴᤎᤥᤀᤥ ᤁᤧᤘᤠ᤹᥅

⁵ ᤂᤧᤏᤧ᤹ ᤌᤱ ᤆᤥ᤺ᤰᤔᤠ ᤏᤡᤱᤘᤠ᤹ ᤁᤧᤈᤥᤃᤢᤀᤠᤱ ᤘᤠ᤹ ᤜᤧᤰᤁᤩᤠᤱ ᤕᤖᤡᤰ ᤌᤰᤛᤢᤒᤠᤜᤠ᤹ ᤁᤳᤋᤢᤱᤛᤡᤱ ᤑᤠ᤹ᤀᤠᤱ ᤁᤧᤒᤠ᤺ᤳᤋᤢ᤹. ᤁᤖ ᤂᤧᤏᤧ᤹ᤃ ᤌᤣᤏᤠᤎᤣᤒᤠ ᤁᤢᤛᤢᤶ ᤔᤧᤴᤍᤶᤔᤏᤠᤒᤠ ᤐᤠ᤺ᤴᤗᤰ ᤁᤧᤒᤠ᤺ᤳ॥ ᤂᤧᤏᤧ᤹ ᤜᤠ᤺ᤳᤏᤢ ᤁᤧᤄᤧ᤺ᤶᤛᤡᤱᤅᤠᤱ ᤁᤧᤘᤠ᤹ ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤍᤰᤗᤧᤱᤘᤠᤀᤥ ᤐᤡᤑᤩᤢᤱᤒᤠ ᤁᤧᤒᤥᤰᤂᤧᤀᤠᤱ ᤁᤧᤘᤠ᤹ᤒᤣ᥅

⁶ ᤀᤥᤔᤧᤳᤋᤧ᤹. ᤀᤠᤸᤗᤥ ᤂᤧᤏᤧ᤹ ᤔᤡᤛᤪᤀᤥ ᤁᤧᤄᤧ᤺ᤶᤛᤡᤱᤗ ᤁᤧᤘᤠ᤹. ᤂᤧᤱᤃ ᤗᤳᤇᤠ ᤁᤧᤀᤧᤰᤐᤠ ᤔᤡᤰᤗᤠ ᤋᤰᤁᤠᤳ ᤜᤧᤰᤋᤱᤒᤠ ᤆᤥᤰ. ᤁᤢᤓᤠ ᤔᤏᤠᤜᤠ᤹ ᤂᤧᤵᤔᤥ ᤔᤧᤍᤰᤛᤡᤱᤏᤧᤓᤃᤪ ᤂᤧᤸᤗᤧ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤜᤢᤰᤜᤠ᤹ ᤗᤰᤋᤢᤀᤠᤱ ᤔᤧᤃᤠ᤺ᤴ॥ ᤔᤡᤛᤪ ᤗᤠᤈᤣ᤹ᤒᤠ ᤑᤠᤖᤥ ᤜᤠᤱᤅᤥ ᤁᤧᤄᤧ᤺ᤶᤛᤡᤱᤒᤠᤜᤠ᤹ᤀᤠᤱ ᤁᤧᤖᤧᤰ ᤜᤧᤰᤋᤱᤒᤠᤀᤣ ᤔᤧᤒᤥᤱ॥

⁷ “ᤜᤧᤰᤁᤩᤠᤱ ᤀᤠᤏᤡᤃᤣ ᤀᤠᤒᤠᤅᤣ ᤕᤜᤘᤣ ᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤥ ᤏᤡᤱᤘᤠ᤹ ᤕᤢᤰᤂᤢᤶᤒᤧ ᤑᤠ᤹ᤀᤠᤱ ᤂᤧᤏᤡ᤹ ᤕᤠᤵᤔᤡ ᤁᤧᤔᤧᤳᤋᤡᤒᤡᤗᤠ. ᤁᤖ ᤜᤡᤈᤁᤡᤕᤠ᤺ᤸᤗᤧᤀᤣ ᤆᤴᤈᤶᤒᤠ ᤋᤧᤴᤜᤠ᤹. ᤗᤧᤳᤋᤡ ᤋᤥ᤺ᤶᤔᤠᤍᤧᤴᤜᤠ᤹ ᤂᤧᤳᤋᤢᤍᤣᤛᤢᤀᤠᤱ ᤕᤜᤢᤍᤠ ᤏᤢ ᤕᤖᤢᤛᤗᤧᤔᤒᤠ ᤔᤏᤠᤜᤠ᤹ ᤔᤧᤳᤋᤢᤛᤡ. ‘ᤂᤧᤏᤡ᤹ ᤁᤵᤔᤥ ᤛᤠᤒᤴ ᤜᤒᤳ ᤐᤵᤔᤠᤀᤠᤱ ᤁᤴ ᤗᤳᤇᤠ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤥᤖᤰ ᤛᤧᤘᤠ ᤆᤥ᤺ᤰᤔᤠ ᤐᤥᤱ॥’

⁸ “ᤁᤸᤗᤧᤆᤥᤃᤢᤸᤗᤧ ᤀᤠᤸᤗ ᤂᤡᤏᤡ᤹ ᤋᤩᤧᤶᤔᤧ᤹. ᤀᤠᤱᤃᤠ᤹ ᤀᤠᤴᤍᤠᤱᤒᤠ ᤀᤛ᤻ᤛᤢᤖᤒᤠ ᤜᤠᤱᤅᤡᤴᤏᤢ ᤋᤠ᤹ᤈᤧᤰᤂᤧᤶᤔᤧ᤹॥ ᤀᤠᤱᤃᤠ᤹ ᤜᤧᤴᤇᤡᤱ ᤏᤧᤳᤇᤡ ᤀᤴᤜᤠ᤹ ᤐᤡᤏᤧᤏᤡᤱ॥ ᤀᤥᤔᤧᤳᤋᤢᤶ ᤛᤠ᤹ᤖᤢᤶ. ᤂᤧᤱᤜᤠ᤹ ᤗᤥ᤺ᤱᤔᤠ ᤁᤧᤛᤢᤰᤐᤠ ᤔᤏᤠ ᤂᤧᤏᤡ᤹ ᤗ᤺ᤵᤔᤠ ᤁᤧᤛᤢᤰᤋᤢᤶᤛᤡᤶᤒᤡ ᤔᤣ᤺ᤶᤒᤡ᥅

⁹ ᤀᤛ᤻ᤛᤢᤖᤒᤠ ᤁᤧᤖᤧᤰᤏᤢ᤺ᤸᤗᤧ ᤆᤢᤰᤐᤠ ᤕᤢᤰᤛᤠᤒᤠ ᤕᤠ᤺ᤵᤐᤠᤀᤠᤱ ᤁᤧᤴᤈᤥ᤺ᤰᤏᤧᤴ ᤜᤧᤰᤁᤣ᤺ᤸᤗᤧ ᤔᤡᤛᤪᤒᤠ ᤀᤴᤗᤠᤎᤠᤜᤠ᤹ ᤏᤢ ᤀᤴᤃᤧᤕᤢᤰᤐᤠᤜᤠ᤹ᤖᤧ ᤁᤧᤶᤓᤠ᤹ᤛᤠᤱ ᤀᤠᤱᤃᤠ᤹ ᤀᤠᤴᤍᤠᤱᤒᤠᤸᤗᤧ ᤁᤢᤎᤰᤛᤢᤒᤠᤜᤠ᤹ᤏᤢ ᤌᤰᤔᤠ ᤁᤧᤴᤇᤢᤰᤏᤧᤴ॥

¹⁰ ᤁᤴᤏᤢ᤺ᤸᤗᤧ ᤘᤣ᤹ ᤌᤣ ᤁᤴ ᤗᤠᤈᤣᤴ ᤑᤵᤔᤠ ᤏᤢ ᤔᤧᤱᤔᤠᤖᤧ ᤗᤠᤃᤡ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤠᤴ ᤔᤣ᤺ᤴᤏᤣ ᤑᤧᤖᤠᤱᤒᤠ ᤑᤠ᤹ᤀᤠᤱ ᤁᤧᤀᤡ᤺ᤳᤋᤢᤒᤡ᥅ ᤕᤜᤘᤣ ᤍᤠᤱᤒᤧᤸᤗᤧᤀᤣ ᤀᤠᤱᤃᤠ᤹ ‘ᤂᤧᤴ ᤗᤠᤈᤣ᤹ᤀᤥ ᤐᤣᤃᤧ᤹ᤀᤠᤱ ᤂᤧᤴ ᤂᤠᤵᤐᤢᤌᤩ᤺ᤱ ᤆᤥᤃᤧ᤹’” ᤔᤧᤳᤋᤠᤱᤅᤠᤱ ᤘᤠ᤹॥

¹¹ ᤂᤧᤒᤩᤠᤱ ᤀᤣᤗᤩᤠᤁᤡᤔ. ᤛᤣᤒ᤻ᤏᤠ ᤏᤢ ᤕᤥᤀᤠ᤺ᤸᤗᤧ ᤌᤱ ᤁᤧᤈᤥ᤺ᤰᤐᤠ ᤌᤰᤔᤥᤒᤠᤴ ᤔᤧᤔᤧᤳᤋᤢ. “ᤀᤠᤍᤠᤱᤒᤣ ᤐᤣᤗᤡ ᤑᤠᤰᤁᤠᤛᤡᤃᤧ. ᤀᤠᤏᤡᤃᤣ ᤁᤧᤛᤧᤘᤠᤖᤥᤒᤠᤜᤠ᤹ᤏᤢ ᤀᤠᤖᤔᤣᤀᤡᤁ ᤐᤠ᤺ᤴᤍᤠᤱᤅᤥ ᤐᤠᤖᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤀᤠᤏᤡᤃᤣ ᤂᤧᤴ ᤐᤠ᤺ᤴᤍᤠᤱᤅᤡᤴ ᤁᤢᤛᤡᤱ ᤏᤡ᤺ᤳᤋᤢᤶᤒᤧ॥ ᤗᤢᤱᤎᤠᤰᤁᤥ ᤁᤧᤕᤧᤵᤐᤠ ᤔᤏᤠᤜᤠ᤹ᤖᤧ ᤔᤧᤄᤧᤵᤛᤢᤖ ᤀᤠᤏᤡᤃᤧᤏᤢ ᤜᤡᤒᤪᤢ ᤐᤠ᤺ᤴᤍᤠᤱᤅᤥ ᤔᤧᤒᤠᤖᤧᤴᤏᤧ᤹ᤀᤥ॥”

¹² ᤁᤖ ᤌᤰᤔᤥᤒᤠᤸᤗᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤌᤣ ᤀᤠᤱᤃᤠ᤹ ᤀᤠᤴᤍᤠᤱᤒᤠᤸᤗᤧ ᤂᤧᤏᤡ᤹ ᤏᤢ ᤂᤧᤏᤡ᤹ ᤍᤠᤱᤒᤠᤸᤗᤥᤖᤰ ᤁᤴ ᤐᤠ᤺ᤴᤏᤡᤴ ᤐᤠ᤺ᤵᤔᤠᤖᤧ ᤗᤠᤃᤡ ᤐᤠᤱᤄᤠᤱᤒᤠᤒᤡ᥅ ᤌᤣ ᤂᤢᤏᤧ᤹ ᤗᤢᤱᤎᤠᤰᤁᤥ ᤁᤧᤕᤧᤵᤐᤠ ᤔᤏᤠᤜᤠ᤹ᤀᤥᤀᤠᤱ ᤐᤠᤱᤄᤠᤱᤒᤠ ᤔᤣ᤺ᤶᤒᤡ᥅ ᤂᤡᤏᤡ᤹ ᤁᤢᤛᤡᤰᤁᤣ ᤂᤧᤱᤜᤠ᤹ᤖᤧᤀᤠᤱ ᤂᤢᤴᤇᤡ᤹ ᤀᤠᤵᤑᤣᤰ ᤜᤡ ᤛᤣ᤹ᤔᤠ᤺ᤳᤜᤠ᤹ ᤆᤠᤔᤠ ᤁᤧᤒᤥᤱᤒᤠ ᤘᤠ᤹॥”

¹³ ᤂᤧᤒᤩᤠᤱ ᤌᤱᤅᤥᤒᤠ ᤌᤰᤔᤥᤒᤠᤴ ᤋᤰᤐᤧᤳ ᤕᤧᤶᤛᤡᤱ. ᤜᤧᤰᤁᤩᤠᤱ ᤕᤶᤒᤠ ᤀᤡᤰᤗᤠᤀᤥ ᤜᤡᤒᤪᤢ ᤐᤠ᤺ᤴᤍᤠᤱᤅᤥ ᤀᤰᤂᤣ ᤐᤠ᤺ᤳᤋᤢ. “ᤐᤕᤶ ᤜᤠᤱ. ᤀᤛ᤻ᤛᤢᤖᤒᤠ ᤜᤠᤱᤅᤡᤸᤗᤧ ᤁᤢᤒᤠ᤺ᤴᤏᤡᤴ ᤂᤧᤵᤛᤧᤶᤔᤧ᤹᥄

¹⁴ ᤐᤕᤶ ᤜᤠᤱᤅᤡᤸᤗᤧ ᤀᤰᤂᤣ ᤐᤠ᤺ᤳᤋᤢ᤹. ᤜᤡᤈᤁᤡᤕᤠ᤺ᤸᤗᤧ ᤂᤧᤏᤡ᤹ ᤀᤡᤱᤃᤧᤸᤗᤧᤰᤋᤡᤴᤗ. ᤌᤣᤀᤠᤱᤓᤧᤸᤗᤧ ᤂᤧᤸᤗᤧ ᤂᤧᤏᤡ᤹ ᤋᤠᤱᤛᤧ᤺ᤵᤔᤠ ᤁᤧᤴᤇᤢᤰᤋᤡᤴ᥄

¹⁵ ᤜᤡᤈᤁᤡᤕᤠ᤺ᤸᤗᤧ ᤂᤧᤏᤡ᤹ ᤀᤰᤂᤣ ᤁᤧᤔᤧᤳᤋᤡᤀᤠᤱ ᤕᤜᤘᤣ ᤍᤠᤱᤒᤠᤀᤥ ᤏᤡᤱᤘᤠ᤹ ᤁᤧᤕᤢᤱᤒᤠ ᤁᤧᤴᤈᤥᤃᤡᤸᤗ ‘ᤕᤜᤘᤣ ᤍᤠᤱᤒᤧᤸᤗᤧ ᤛᤧᤰᤂᤠᤛᤠᤱ ᤀᤠᤏᤡᤃᤣ ᤛᤧ᤺ᤵᤋᤡᤃᤧ॥ ᤂᤢᤏᤧ᤹ ᤁᤴ ᤐᤠᤱᤈᤢᤶᤔᤡᤴ ᤀᤛ᤻ᤛᤢᤖᤒᤠ ᤜᤠᤱᤅᤡᤸᤗᤧ ᤁᤢᤜᤢᤰᤁᤥ ᤌᤠᤖ ᤔᤧᤕᤠ᤺ᤴᤍᤢᤴ॥’

¹⁶ “ᤜᤡᤈᤁᤡᤕᤠ᤺ᤸᤗᤧ ᤁᤢᤒᤠ᤺ᤴᤏᤡᤴ ᤔᤧᤄᤧᤵᤛᤧᤵᤔᤡᤴᤏᤧ᤹॥ ᤀᤛ᤻ᤛᤢᤖᤒᤠ ᤐᤕᤶ ᤜᤠᤱᤅᤡᤸᤗᤧ ᤀᤰᤂᤣ ᤐᤠ᤺ᤳᤋᤢ᤹—ᤂᤧᤏᤡ᤹ ᤀᤠᤱᤃᤠ᤹ᤏᤢ ᤋᤅᤧᤶᤔᤧ᤹. ᤜᤧᤰᤁᤩᤠᤱ ᤗ᤺ᤴᤍᤠᤶᤔᤧ᤹ᤀᤠᤱ ᤀᤠᤱᤃᤠ᤹ᤀᤥ ᤋᤩᤧᤶᤔᤧ᤹॥ ᤜᤧᤰᤁᤣ᤺ᤸᤗᤧ ᤂᤧᤏᤡ᤹ ᤁᤧᤖᤧᤰᤗᤧ ᤀᤠᤒᤠᤅᤣ ᤆᤧᤸᤗᤧᤰᤛᤣᤸᤗᤧ ᤁᤢᤈᤠ᤹ ᤏᤢ ᤐᤕᤧᤵᤐᤠᤸᤗᤧ ᤁᤢᤈᤠ᤹ᤜᤠ᤹ ᤆᤠᤔᤠ ᤁᤧᤄᤥᤛᤢᤶ. ᤂᤧᤒᤩᤠᤱ ᤂᤧᤏᤡ᤹ ᤀᤠᤒᤠᤅᤣ ᤘᤒᤠᤰᤁᤥ ᤆᤫᤠ᤺ᤳ ᤌᤢᤱᤔᤠ ᤁᤧᤄᤥᤛᤢᤶ॥

¹⁷ ᤁᤖ ᤂᤡᤏᤡ᤹ ᤀᤠᤒᤠᤅᤣ ᤗᤠᤈᤣ᤹ ᤁᤢᤛᤡᤱᤒᤠ ᤆᤠ ᤜᤧᤰᤁᤩᤠᤱ ᤁᤢᤒᤥᤰ ᤆᤧᤸᤗᤧᤰᤛᤣ᤹ ᤌᤡ. ᤂᤖᤧ᤺ᤱ ᤏᤢ ᤆᤧᤸᤗᤧᤰᤛᤣ᤹ ᤀᤡᤰᤋᤠᤵᤗᤧ ᤌᤡᤶᤛᤢᤒᤠ ᤗᤠᤈᤣ᤹ᤀᤥ ᤂᤡᤏᤡ᤹ ᤋᤣ᤹ᤏᤡᤱ॥

¹⁸ “ᤜᤡᤈᤁᤡᤕᤠ᤺ᤸᤗᤧ ᤂᤧᤏᤡ᤹ ᤀᤰᤂᤣ ᤁᤧᤔᤧᤳᤋᤡᤀᤠᤱ ᤀᤡᤱᤗᤧᤰᤁᤥ ᤁᤧᤴᤎᤠᤛᤡᤸᤗ. ‘ᤕᤜᤘᤣ ᤍᤠᤱᤒᤧᤸᤗᤧ ᤀᤠᤏᤡᤃᤣ ᤛᤧ᤺ᤵᤋᤡᤃᤧ॥’ ᤌᤣ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤁᤥᤒᤠ ᤔᤧᤴᤇᤠᤶ ᤕᤠᤵᤔᤡᤜᤠ᤹ᤖᤧ ᤂᤢᤴᤇᤡ᤹ ᤔᤠᤱᤅᤡᤸᤗᤧ ᤂᤢᤴᤇᤡ᤹ ᤗᤠᤈᤣᤴ ᤀᤛ᤻ᤛᤢᤖᤒᤠ ᤜᤠᤱᤅᤡᤸᤗᤧ ᤁᤢᤜᤢᤰᤁᤥ ᤌᤠᤔᤠᤗᤠᤶ ᤁᤶᤓ ᤌᤠᤖᤡᤰ ᤛᤧ᤺ᤵᤔᤠ ᤛᤢᤰᤋᤢᤀᤠᤱ ᤘᤠ᤹ᤒᤡ᥅

¹⁹ ᤜᤔᤠᤋ ᤏᤢ ᤀᤷᤐᤠᤍᤖᤧ ᤂᤢᤴᤇᤡ᤹ ᤔᤠᤱᤜᤠ᤹ ᤀᤠᤳᤋᤡ ᤔᤧᤘᤠ᤹᥅ ᤛᤐᤷᤒᤣᤔ ᤔᤠᤱᤜᤠ᤹ ᤀᤠᤳᤋᤥ ᤔᤧᤘᤠ᤹᥅ ᤌᤣ ᤂᤧᤱᤜᤠ᤹ᤖᤧ ᤛᤠᤔᤖᤡᤕᤠᤴ ᤀᤠᤱᤃᤠ᤹ ᤀᤠᤜᤢᤰᤁᤥ ᤌᤠᤔᤠᤗᤠᤶ ᤛᤧ᤺ᤵᤔᤠ ᤔᤧᤛᤢᤰᤋᤢᤀᤠᤱ ᤘᤠ᤹ᤒᤡ᥅

²⁰ ᤁᤴ ᤗᤠᤈᤣ᤹ᤜᤠ᤹ᤀᤥᤒᤠ ᤀᤠᤳᤋᤡᤴ ᤔᤠᤱᤜᤠ᤹ᤖᤧ ᤂᤢᤴᤇᤡ᤹ ᤗᤠᤈᤣᤴ ᤀᤠᤱᤃᤠ᤹ ᤀᤠᤜᤢᤰᤁᤥ ᤌᤠᤔᤠᤗᤠᤶ ᤛᤧ᤺ᤵᤔᤠ ᤔᤧᤛᤢᤰᤋᤢᤒᤠ ᤘᤠ᤹ᤒᤡ᥅ ᤜᤧᤰᤁᤣ᤺ᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤕᤖᤢᤛᤗᤧᤔ ᤕᤧᤰᤕᤰᤁᤡᤴ ᤀᤠᤱᤃᤠ᤹ ᤀᤠᤜᤢᤰᤁᤥ ᤌᤠᤔᤠᤗᤠᤶ ᤀᤠᤓᤣᤗ᤹ᤖᤡᤰ ᤛᤧ᤺ᤵᤔᤠ ᤛᤢᤰᤋᤢᤀᤡ᥅”

²¹ ᤁᤖ ᤂᤧᤱᤜᤠ᤹ ᤛᤫᤠ᤺ᤳ ᤔᤧᤶᤒᤠ᤺ᤳᤋᤣ ᤔᤧᤕᤢᤅᤧ. ᤜᤧᤰᤁᤩᤠᤱ ᤂᤢᤏᤧ᤹ ᤐᤠ᤺ᤳᤋᤢᤒᤠ ᤐᤠ᤺ᤴᤏᤡᤴ ᤗᤳᤇᤠᤀᤠᤱ ᤔᤧᤴᤏᤢ᤺ᤰᤋᤢᤴ॥ ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤐᤠ᤺ᤳᤋᤢᤒᤠ ᤐᤠ᤺ᤴᤏᤡᤴ ᤗᤳᤇᤠᤀᤠᤱ ᤏᤢ᤺ᤰᤔᤠ ᤔᤣ᤺ᤴ ᤁᤧᤗ᤹ᤒᤠ ᤜᤠᤱᤅᤡᤸᤗᤧ ᤁᤢᤀᤡᤱᤈᤠᤱ ᤘᤕᤧ॥

²² ᤜᤧᤰᤁᤣ᤺ᤸᤗᤧ ᤜᤠᤱᤜᤡᤶᤔᤥᤒᤠ ᤕᤢᤰᤛᤠᤒᤠ ᤜᤡᤸᤗᤡᤁᤡᤕᤠᤜᤖᤧ ᤁᤢᤛ᤻ᤛᤠ ᤀᤣᤗᤩᤠᤁᤡᤔ. ᤛᤢᤜᤠᤱᤔᤡᤒᤠ ᤛᤣᤒ᤻ᤏᤠ ᤏᤢ ᤀᤠᤛᤠᤐᤧᤸᤗᤧ ᤁᤢᤛ᤻ᤛᤠ ᤂᤠᤖᤠᤳ ᤁᤧᤕᤢᤱᤒᤠ ᤕᤥᤀᤠ. ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤆᤠᤱᤜᤠ᤹ ᤔᤧᤎᤧ᤺ᤰᤂᤢ. ᤜᤧᤰᤁᤩᤠᤱ ᤌᤱᤅᤥᤒᤠ ᤌᤰᤔᤥᤒᤠᤸᤗᤧ ᤐᤠ᤺ᤳᤋᤢᤒᤠ ᤐᤠ᤺ᤴᤏᤡᤴ ᤔᤧᤒᤣᤀᤠᤱ ᤜᤡᤈᤁᤡᤕᤠᤴ ᤔᤧᤈᤧᤰᤋᤢᤖᤥ॥