ᤕᤛᤤᤕᤠ 35 - LIFOTNT

ᤛᤣᤛᤣᤒᤠ ᤔᤠᤖᤠᤶ

¹ ᤔᤢᤖᤧᤰ ᤂᤠᤖᤧᤰᤐᤠ ᤕᤧ᤺ᤱᤄᤠᤍᤧᤴᤏᤡᤴ ᤏᤢ ᤆᤡᤈᤡ ᤂᤰᤂᤰ ᤁᤧᤗ᤹ᤒᤠ ᤗᤠᤈᤣᤴ ᤛ᤺ᤳᤇᤡᤖᤥ॥ ᤌᤣᤀᤠᤱ ᤁᤧᤜᤥᤵᤐᤠ ᤀᤣ᤺ᤰᤛᤠᤍᤧᤴᤏᤡᤴ ᤕᤧᤕᤧ ᤗ᤹ᤀᤠᤱ ᤑᤢᤱ ᤁᤢᤀᤡᤛᤡᤰ ᤑᤧᤰᤗᤥ॥

² ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥᤵᤐᤠ ᤗᤠᤈᤣᤴ ᤛ᤺ᤳᤋᤠᤱ ᤛᤠᤶᤗᤥᤖᤥ. ᤂᤧᤴ ᤛᤠ᤹ᤖᤡᤰ ᤁᤢᤛᤡᤖᤠ᤹ᤎᤠᤱᤅᤠᤱ ᤀ᤺ᤰᤗᤥ॥ ᤂᤧᤸᤗᤧ ᤗᤧᤒᤏᤠᤏᤒᤠ ᤁᤢᤄᤧᤶᤛᤡᤱᤔᤧᤴ ᤂᤥᤛᤢᤖᤥ. ᤜᤧᤰᤁᤩᤠᤱ ᤂᤧᤸᤗᤧ ᤁᤷᤔᤣᤗ ᤁᤥ᤺ᤰᤔᤠᤴ ᤏᤢ ᤛᤠᤖᤥᤏᤒᤠ ᤋᤧᤸᤗᤰᤁᤡᤸᤗᤧ ᤁᤢᤜᤠᤱᤘᤠ ᤁᤢᤔᤠᤱᤘᤠᤴ ᤂᤥᤛᤢᤖᤥ॥ ᤂᤧᤱᤜᤠ᤹ᤖᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤡᤔᤡᤍᤡᤱ ᤏᤢ ᤀᤠᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤜᤠᤱᤘᤠ ᤁᤢᤔᤠᤱᤘᤠᤴ ᤔᤧᤏᤡᤛᤢᤖᤥ॥

³ ᤗᤧᤶᤈᤢᤈᤢᤒᤠ ᤜᤢᤰᤜᤠ᤹ ᤁᤧᤎᤢᤶᤒᤠ ᤆᤥᤃᤧᤶᤔᤧ᤹ᤀᤥ. ᤜᤧᤰᤁᤩᤠᤱ ᤔᤧᤴᤎᤢᤶᤔᤏᤠᤒᤠ ᤌᤢᤱᤒᤥ᤹ᤜᤠ᤹ ᤁᤧᤎᤢᤶᤒᤠ ᤆᤥᤃᤧᤶᤔᤧ᤹ᤀᤥ॥

⁴ ᤏᤡᤱᤘᤠ᤹ᤀᤥ ᤛᤠ᤹ᤖᤡᤰ ᤁᤧᤃᤡᤒᤠᤜᤠ᤹ ᤔᤧᤳᤋᤧᤶᤛᤡᤶᤔᤧ᤹ᤀᤥ. “ᤜᤠᤱᤜᤠᤱ ᤗ᤹ᤖᤧᤶᤔᤧ᤹. ᤔᤧᤃᤡᤛᤧᤶᤔᤡᤴᤏᤧ᤹ᤀᤥ॥ ᤂᤧᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤁᤢᤗᤧᤰᤘᤠ ᤜᤢᤱᤛᤧ ᤕᤢᤖᤥ. ᤛᤠᤶᤕᤥᤒᤠ ᤜᤠᤱᤛᤧᤶᤏᤢ ᤂᤧᤏᤡ᤹ ᤋᤠᤱᤛᤧ᤺ᤵᤛᤧ ᤕᤢᤖ ᤐᤳᤗᤥ॥

⁵ ᤂᤧᤒᤩᤠᤱ ᤔᤡᤰᤑ᤺ᤶᤒᤠᤜᤠ᤹ᤖᤧ ᤂᤠᤔᤧᤏᤡᤛᤢᤖᤥ. ᤜᤧᤰᤁᤩᤠᤱ ᤏᤠᤎᤠᤰᤐᤠᤜᤠ᤹ᤖᤧ ᤏᤠᤔᤧᤄᤧᤵᤛᤢᤖᤥ॥

⁶ ᤂᤶᤓᤩᤠᤱ ᤗᤠᤱᤛᤰᤐᤠᤜᤠ᤹ ᤐᤧ᤺ᤱᤘᤠ ᤁᤢᤀᤡᤛᤡᤰ ᤔᤧᤒᤡᤴᤗ ᤗᤠᤱᤔᤧᤄᤣ᤺ᤰᤗᤥ. ᤜᤧᤰᤁᤩᤠᤱ ᤁᤢᤒᤠᤴ ᤔᤧᤸᤗ᤺ᤶᤔᤏᤠᤒᤠ ᤁᤧᤒᤠᤜᤠ᤹ ᤔᤧᤛ᤺ᤳᤗ ᤛᤠᤶᤔᤧᤗᤥᤖᤥ॥ ᤌᤣᤀᤠᤱ ᤁᤧᤜᤥᤵᤐᤠ ᤀᤣ᤺ᤰᤛᤠᤍᤧᤴᤏᤥ ᤆᤫᤠ᤺ᤳ ᤗᤠᤰᤋᤢ ᤗ᤺ᤴᤗᤥ. ᤜᤧᤰᤁᤩᤠᤱ ᤕᤧ᤺ᤱᤄᤠᤍᤧᤴᤏᤥ ᤘᤜ᤺ᤱᤜᤠ᤹ ᤁᤢᤱᤗᤥ॥

⁷ ᤛᤠᤱᤕᤠᤰᤔᤠᤸᤗᤧ ᤔᤡᤃᤧᤖᤠᤰᤐᤠ ᤕᤧ᤺ᤱᤄᤠ᤺ᤴ ᤘᤖᤰ ᤐᤥᤱᤗᤥ. ᤜᤧᤰᤁᤩᤠᤱ ᤁᤧᤜᤣᤒᤠ ᤂᤠᤶᤔᤥ ᤘᤒᤢᤴᤍᤠᤰᤘᤠ ᤐᤢᤴᤗ᤺ᤴᤗᤥ. ᤛᤩᤠᤗᤠᤜᤠ᤹ ᤔᤧᤕᤠᤰᤐᤠᤍᤧᤴᤏᤥ. ᤛᤠᤖᤠ ᤏᤢ ᤑ᤺ᤱᤍᤢ ᤗᤡᤱᤎᤠᤱᤗᤥ॥

⁸ ᤂᤧ᤹ᤕᤥ ᤗᤳᤇᤠ ᤔᤠᤖᤠᤶ ᤐᤥᤱ. ᤂᤧᤴ ᤛᤣᤛᤣᤒᤠ ᤗᤠᤶ ᤔᤧᤔᤧᤳᤋᤢᤖᤥ. ᤀᤠᤛᤢᤳᤌᤥ ᤔᤏᤠ ᤀᤠᤳᤋᤡᤴᤏᤠᤱ ᤂᤧᤴ ᤗᤠᤶᤒᤠ ᤐᤥᤱᤅᤠᤱ ᤔᤧᤒᤣ᤺ᤰᤏᤧᤴᤗᤥ. ᤁᤖ ᤂᤧᤴ ᤔᤠᤖᤠᤶᤔᤥ ᤗᤠᤱᤃᤧᤄᤣ᤺ᤰᤐᤠᤜᤠ᤹ᤖᤧ ᤗᤠᤃᤡᤖᤰ ᤐᤥᤱᤗᤥ. ᤁᤢᤀᤡᤃᤧᤓᤧᤶᤒᤠ ᤀᤍᤱᤜᤠ᤹ ᤂᤧᤴ ᤗᤠᤶ ᤐᤥᤱᤔᤠᤀᤠᤱ ᤐᤣ᤺ᤰᤔᤠ ᤔᤧᤱᤄᤥᤏᤧᤴᤗᤥ॥

⁹ ᤂᤧ᤹ᤕᤥ ᤁᤣᤒᤠᤜᤠ᤹ ᤔᤧᤜᤥᤵᤗᤥ. ᤜᤧᤰᤁᤩᤠᤱ ᤂᤧ᤹ᤕᤥᤗᤠᤶ ᤀᤠᤈᤠᤈᤠᤒᤠ ᤌᤰᤛᤠ ᤌᤣᤀᤠᤱ ᤗᤠᤱᤔᤧᤱᤄᤣ᤺ᤰᤏᤧᤴ॥ ᤂᤧᤴ ᤌᤰᤛᤠᤜᤠ᤹ ᤂᤧ᤹ᤕᤥ ᤂᤥᤔᤧᤴᤍᤧᤳᤏᤧᤴᤗᤥ. ᤁᤖ ᤌᤧ᤹ᤔᤏᤠᤛᤡᤒᤠᤜᤠ᤹ᤖᤰ ᤂᤧ᤹ᤕᤥᤗᤠᤶᤒᤠ ᤗᤠᤱᤔᤧᤄᤣ᤺ᤰᤗᤥ॥

¹⁰ ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤧᤸᤗᤢᤱ ᤜᤢᤅᤢᤀᤠᤱ ᤌᤧ᤹ᤖᤢᤛᤡᤒᤠᤜᤠ᤹ ᤔᤧᤏᤢ᤺ᤱ ᤔᤧᤓᤧᤴᤗᤥ॥ ᤂᤧᤱᤜᤠ᤹ ᤛᤠᤶᤔᤧᤗᤥᤖ ᤕᤖᤢᤛᤗᤧᤔ ᤕᤧᤰᤕᤰᤁᤥ ᤔᤧᤗᤠ᤺ᤳᤗᤥ. ᤛᤍᤠᤍᤡᤱ ᤁᤧᤘᤠ᤹ᤒᤠ ᤛ᤺ᤵᤔᤠᤴ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤋᤡᤆ ᤐᤥᤱᤗᤥ॥ ᤂᤧᤱᤜᤠ᤹ ᤀᤠᤓᤧᤸᤗᤧᤛᤠᤱ ᤔᤧᤛ᤺ᤳ ᤔᤧᤕᤣ᤺ᤳᤗᤥ. ᤜᤧᤰᤁᤩᤠᤱ ᤏᤡᤱᤘᤠ᤹ ᤋᤢᤰᤔᤠ ᤔᤧᤖᤡᤱ ᤌᤰᤔᤠ ᤔᤧᤒᤥᤱᤏᤧᤸᤗᤥ॥”