ᤕᤛᤤᤕᤠ 34 - LIFOTNT

ᤕᤜᤘᤣ ᤍᤠᤱᤒᤧᤸᤗᤧ ᤏᤡᤱᤔᤡᤜᤠ᤹ ᤂᤢᤶᤍᤡᤱ ᤐᤡᤖᤢᤛᤡ᤹

¹ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤁᤧᤖᤧᤰ ᤔᤧᤴᤇᤠᤶ ᤛᤢᤘᤠᤱᤛᤣ. ᤏᤡ᤺ᤳᤋᤠᤱ ᤋᤩᤧᤶᤔᤧ᤹ ᤜᤧᤰᤁᤩᤠᤱ ᤛᤡᤱᤛᤡᤱ ᤕᤧᤰᤕᤧᤰᤁᤠᤱ ᤂᤧᤵᤛᤠᤶᤔᤧ᤹ᤀᤥ॥ ᤔᤧᤴᤇᤠᤶ ᤕᤠᤵᤔᤡᤛᤣ. ᤏᤢᤖᤡᤰ ᤏᤡᤱᤘᤠ᤹ ᤐᤡᤖᤧᤶᤔᤧ᤹ᤀᤥ᥄ ᤀᤡᤰᤛᤠᤍᤡᤱ ᤂᤠᤶᤒᤣᤰ ᤏᤢ ᤂᤧᤵᤔᤥ ᤁᤧᤘᤠ᤹ᤒᤠ ᤁᤠᤰᤗᤧ ᤔᤧᤄᤧᤵᤛᤢᤖᤖᤥ. ᤕᤥ᤹ᤒᤠᤗᤠᤈᤣ᤹ ᤏᤢ ᤂᤧ᤹ᤕᤥ ᤏᤠᤘᤠᤃᤧᤴ ᤆᤀᤡ᤺ᤳ ᤁᤧᤒᤥᤱᤒᤠ ᤁᤧᤖᤧᤰᤗᤧ ᤏᤡᤱᤘᤠ᤹ ᤔᤧᤒᤡᤖᤢᤖᤖᤥ᥄

² ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤁᤧᤖᤧᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤛᤶᤎᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤡᤰ ᤐᤥᤃᤧᤀᤠᤱ ᤘᤠ᤹ᤖᤥ. ᤂᤢᤏᤧ᤹ ᤁᤢᤛᤠᤰᤁᤧᤴᤏᤡᤴ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤁᤧᤖᤧᤰ ᤌᤰᤛᤢᤒᤠᤜᤠ᤹ ᤛᤶᤎᤠᤱ ᤆᤢᤰᤋᤧᤀᤠᤱ ᤘᤠ᤹ᤖᤥ॥ ᤂᤢᤏᤧ᤹ ᤂᤧᤱᤜᤠ᤹ ᤌᤡᤰᤁᤠᤱ ᤔᤣ᤺ᤴᤏᤣ ᤁᤧᤖᤧᤰ ᤔᤧᤰᤂᤢᤛᤡᤖᤥ. ᤔᤏᤠ ᤁᤧᤛᤧᤵᤐᤠ ᤔᤏᤠ᤺ᤸᤗᤧ ᤁᤢᤜᤢᤰᤁᤥ ᤂᤧᤱᤜᤠ᤹ ᤜᤢᤰᤛᤢᤵᤋᤢᤛᤡᤖᤥ॥

³ ᤔᤧᤛᤧᤖᤢᤛᤡᤒᤠ ᤂᤢᤴᤇᤡ᤹ ᤔᤏᤠᤜᤠ᤹ ᤗᤠ᤺ᤰᤁᤠᤳ ᤗᤠᤵᤐᤢᤱ ᤔᤧᤍᤣᤛᤢᤛᤡᤖᤥ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤁᤢᤛᤡᤘᤧᤳ ᤌᤰᤜᤠ᤹ ᤁᤡᤀᤠᤱ ᤛᤠ᤹ᤖᤡᤰ ᤏᤠᤶᤃᤧᤛᤢᤒᤠ ᤁᤢᤏᤠᤶ ᤗ᤺ᤴᤗᤥ॥ ᤂᤧᤒᤩᤠᤱ ᤁᤥ᤺ᤰᤔᤠ ᤑᤠᤱᤈᤱ ᤌᤧᤃᤢᤔᤠᤱᤘᤠᤜᤠ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤔᤠᤰᤂᤡᤸᤗᤧ ᤘᤖᤰᤛᤢᤖᤥ॥

⁴ ᤋᤠᤱᤛᤠᤱᤒᤥ ᤁᤧᤒᤵᤐᤠ ᤁᤧᤖᤧᤰ ᤂᤣ᤺ᤶᤛᤡᤰᤐᤠᤜᤠ᤹ ᤔᤧᤔᤠ ᤔᤧᤒᤣ᤺ᤰᤗᤥ. ᤜᤧᤰᤁᤩᤠᤱ ᤋᤠᤱᤛᤠᤱᤒᤠᤴ ᤁᤡᤵᤏᤠᤒᤠ ᤛᤠᤵᤗᤠ ᤌᤱᤔᤠᤴ ᤜᤧᤰᤁᤣ ᤁᤡᤳᤇᤡᤱ ᤐᤣ᤺ᤰᤗᤥ॥ ᤆᤧᤸᤗᤧᤰᤛᤣᤸᤗᤧ ᤁᤢᤒᤢᤱᤅᤥᤏᤢ ᤀᤡᤃᤧᤗᤧᤶᤒᤠ ᤁᤢᤓᤧᤰᤘᤠᤜᤠ᤹ ᤔᤢᤳᤌᤠᤒᤠ ᤜᤧᤰᤁᤣ ᤂᤧᤶᤒᤩᤠᤱ ᤐᤀᤣᤵᤐᤠᤸᤗᤧ ᤁᤢᤒᤢᤱᤅᤥᤏᤢ ᤀᤡᤃᤧᤛᤢ᤹ᤒᤠ ᤁᤢᤈᤠ᤹ᤜᤠ᤹ ᤔᤢᤳᤌᤠᤒᤠ ᤜᤧᤰᤁᤣ ᤋᤠᤱᤛᤠᤱᤒᤥᤒᤠ ᤂᤣᤛᤣ-ᤂᤣ᤺ᤶᤛᤡᤰᤐᤠᤜᤠ᤹ ᤔᤰᤔᤧᤎᤠᤖᤥ॥

⁵ ᤛᤠᤱᤃᤪᤠᤶᤐᤣᤍᤠᤱᤅᤥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤠᤓᤣᤴ ᤕᤠᤖᤡᤵ ᤆᤥᤃᤢᤀᤠᤱ ᤘᤠ᤹ᤖᤥ. ᤀᤥᤔᤧᤳᤋᤧᤶᤔᤧ᤹. ᤂᤠᤛᤧᤴ ᤗᤥ᤺ᤶᤔᤠᤖᤧ ᤗᤠᤃᤡ ᤀᤣᤍᤥᤔᤒᤠ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤛᤶᤎᤠᤱ ᤂᤧᤴ ᤋᤠᤓᤣᤴ ᤌᤠᤖᤥ. ᤀᤠᤱᤃᤠ᤹ ᤔᤧᤱᤔᤠᤖᤧ ᤗᤠᤃᤡ ᤛᤧᤴᤍᤢᤱᤛᤡᤱᤒᤠ ᤂᤧᤴ ᤔᤧᤴᤇᤠᤶ ᤕᤠᤵᤔᤡᤜᤠ᤹ ᤛᤶᤎᤠᤱ ᤆᤢᤰᤗᤥ॥

⁶ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤠᤓᤣᤴ ᤔᤠᤰᤂᤡ᤹ᤀᤥ ᤜᤢᤔᤧᤀᤠᤱ ᤘᤠ᤹ᤖᤥ. ᤂᤧᤴ ᤛᤥ᤺ᤳᤋᤧᤸᤗᤧ ᤐᤴᤇᤢᤀᤠᤱ ᤐᤳᤗᤥ— ᤔᤧᤸᤗᤢᤰ ᤔᤧ᤺ᤴᤍᤠ ᤔᤠᤰᤂᤡᤸᤗᤧ ᤜᤧᤰᤁᤩᤠᤱ ᤔᤧᤸᤗᤢᤰ ᤔᤧ᤺ᤴᤍᤠ ᤗᤧᤶᤓᤣ᤺ᤵᤔᤥᤒᤠ ᤛᤥ᤺ᤳᤋᤧᤸᤗᤧ ᤂᤧᤴ ᤋᤠᤓᤣᤴ ᤏᤠ᤺ᤴᤍᤢᤀᤠᤱ ᤐᤳᤗᤥ॥ ᤌᤣᤀᤠᤱᤓᤧᤸᤗᤧ ᤒᤥᤈᤪᤠ ᤕᤧᤰᤕᤰᤁᤥ ᤕᤜᤘᤣ ᤍᤠᤱᤒᤧᤸᤗᤧ ᤘᤕᤠᤃᤧᤴ ᤛᤡᤍᤢᤱᤈᤓᤠ ᤆᤥᤃᤢᤀᤠᤱ ᤘᤠ᤹ᤖᤥ. ᤜᤧᤰᤁᤩᤠᤱ ᤀᤣᤍᤥᤶᤔᤥ ᤕᤖᤡᤰ ᤔᤠᤰᤂᤡ᤹ᤛᤡᤘᤠ ᤛᤧᤛᤢᤀᤠᤱ ᤘᤠ᤹ᤖᤥ॥

⁷ ᤂᤧᤱᤜᤠ᤹ ᤋᤠᤶᤓᤢᤱ ᤛᤠ᤺ᤱᤘᤠᤜᤠ᤹ᤏᤢ ᤛᤥᤖᤡᤰ ᤔᤧᤔᤧᤰᤗᤥ. ᤜᤧᤰᤁᤩᤠᤱ ᤐᤡᤳᤛᤠᤳᤜᤠ᤹. ᤕᤶᤒᤕᤶᤒᤠ ᤀᤠᤎᤥ᤺ᤱᤎᤥ᤺ᤱᤒᤠ ᤐᤡᤳᤜᤠ᤹ ᤗᤖᤧ᤺ᤱ ᤑᤖᤧ᤺ᤱ ᤔᤧᤛᤡᤖᤥ॥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤠᤈᤣᤴ ᤔᤠᤰᤂᤡᤸᤗᤧ ᤘᤈᤪ᤺ᤵᤔᤠ ᤐᤥᤱᤗᤥ ᤂᤧᤒᤩᤠᤱ ᤂᤠᤶᤔᤡᤴ ᤛᤥ᤺ᤳᤋᤧᤸᤗᤧ ᤐᤴᤇᤢ ᤏᤧᤛ᤻ᤛᤢᤖᤥ॥

⁸ ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤧᤰᤘᤠ ᤜᤢᤱᤔᤠ ᤕᤧᤴ. ᤀᤣᤍᤥᤔᤧᤴ ᤁᤢᤗᤧᤰᤘᤠ ᤏᤢ᤺ᤰᤔᤠᤀᤠᤱ ᤛᤡᤕᤥᤏᤧᤴ ᤛᤧ᤺ᤵᤔᤠ ᤕᤧᤶ ᤏᤡᤱᤛᤣᤰ ᤆᤥᤃᤢᤀᤠᤱ ᤘᤠ᤹ᤖᤥ॥

⁹ ᤀᤣᤍᤥᤔᤒᤠ ᤘᤜ᤺ᤱᤜᤠ᤹ ᤀᤠᤗᤠᤁᤠᤋᤪᤠ ᤐᤥᤱᤗᤥ. ᤂᤧ᤹ᤕᤥ ᤁᤧᤒᤥ᤺ᤰᤐᤠ ᤂᤠᤶᤓᤢᤳᤇᤪᤢᤶᤒᤠᤴ ᤔᤡᤃᤧᤍᤡ᤺ᤵᤐᤠ ᤁᤠᤴᤎᤠᤰ ᤐᤥᤱᤗᤥ. ᤁᤧᤖᤧᤰ ᤗᤠᤈᤣᤴ ᤔᤡᤎᤢᤱ ᤔᤡᤖᤠ᤺ᤰ ᤁᤧᤍᤡ᤺ᤵᤐᤠ ᤀᤠᤗᤠᤁᤠᤋᤪᤠ ᤐᤥᤱᤗᤥ॥

¹⁰ ᤂᤧᤴ ᤛᤧᤴᤍᤡᤰ ᤗᤧᤴᤍᤡᤰ ᤀᤠᤓᤧᤸᤗᤧᤀᤠᤱ ᤔᤧᤛᤡᤏᤧᤴᤗᤥ. ᤂᤧ᤹ᤕᤥ ᤁᤧᤗ᤺ᤶᤒᤠ ᤔᤡ᤺ᤰᤂᤢᤴ ᤆᤰᤔᤧᤸᤗ᤹ᤀᤣ ᤛᤢ᤺ᤱᤃᤢ ᤛᤢ᤺ᤱᤃᤢ ᤗ᤹ᤖᤡᤰ ᤌᤠ᤺ᤱ ᤐᤥ᤺ᤰᤁᤠᤱ ᤐᤳᤗᤥ॥ ᤌᤠ᤺ᤰᤌᤠ᤺ᤰ ᤌᤠᤖᤡᤰ ᤂᤧᤴ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥᤵᤐᤠ ᤗᤠᤈᤣ᤹ ᤐᤥᤱᤅᤠᤱ ᤏᤧᤖᤥ. ᤀᤠᤳᤋᤡᤴᤜᤠ᤹ᤀᤠᤱ ᤕᤠᤶᤔᤥ ᤂᤧᤴ ᤗᤠᤶᤒᤠ ᤔᤧᤒᤥᤱᤅᤠᤱ ᤔᤧᤶᤒᤣ᤺ᤰᤏᤧᤴᤗᤥ॥

¹¹ ᤁᤖ ᤔᤢᤖᤧ᤺ᤰ ᤂᤧᤖᤧ᤺ᤰ ᤌᤣᤀᤠᤱ ᤁᤧᤜᤥᤵᤐᤠ ᤕᤧ᤺ᤱᤄᤠᤍᤧᤴᤏᤥᤒᤠ ᤑᤰᤌᤡ᤺ᤶᤒᤧᤴ ᤏᤢ ᤁᤧᤀ᤺ᤰᤐᤠ ᤛᤥᤅᤠ᤺ᤰᤘᤠ᤺ᤸᤗᤧ ᤁᤢᤕᤠᤰᤔᤠᤍᤧᤴ ᤐᤥᤱᤗᤥ. ᤜᤶᤒᤢ᤺ᤶᤔᤠ ᤏᤢ ᤁᤠ᤺ᤰᤘᤠᤜᤠ᤹ᤖᤧ ᤂᤧᤵᤔᤥ ᤜᤠᤵ ᤔᤧᤈᤥᤃᤢᤖᤥ॥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤧᤍᤥᤔ ᤗᤠᤈᤣᤴ ᤔᤢᤛᤢᤴᤏᤣ ᤂᤧᤛᤢᤴᤏᤣ ᤏᤢ ᤔᤢᤜ᤺ᤱᤗᤡᤱ ᤂᤧᤜ᤺ᤱᤗᤡᤱᤅᤡᤸᤗᤧ ᤛᤡ᤺ᤰᤋᤢᤖᤥ॥

¹² ᤀᤰᤂᤣ ᤔᤧᤒᤠ᤺ᤳᤋᤢ᤹. “ᤀᤠᤸᤗᤀᤠᤱᤎᤥ ᤂᤧᤵᤔᤥᤃ ᤜᤠᤱᤈᤢᤶ ᤜᤥᤵᤗᤥ” ᤂᤧᤸᤗᤧ ᤁᤢᤛᤢᤜᤠᤱᤕᤢᤰᤐᤠ ᤏᤢ ᤁᤢᤜᤠᤱᤛᤠᤜᤠ᤹ ᤔᤧᤔᤕᤧ ᤔᤧᤒᤣᤖᤥ॥

¹³ ᤂᤧᤴ ᤗᤠᤈᤣ᤹ᤀᤥᤒᤠ ᤜᤠᤱᤕᤰ ᤆᤱᤜᤡᤶᤜᤠ᤹ᤀᤥ ᤋᤡᤱᤃᤪᤣᤰ. ᤏᤢ ᤂᤧ᤹ᤕᤥᤒᤠ ᤜᤠᤱᤕᤰᤜᤠ᤹ᤀᤥ ᤛᤃᤡ-ᤛᤡᤰᤘᤠ ᤏᤢ ᤛᤣᤷᤍᤠ᤺ᤰᤔᤠ ᤗᤡᤱᤗᤥ. ᤂᤧᤴ ᤛᤩᤠᤗᤠ ᤕᤠᤰᤔᤠ ᤂᤠ ᤏᤢ ᤑᤰᤌᤡ᤺ᤶᤒᤠᤸᤗᤧ ᤁᤢᤜᤠᤵ ᤐᤥᤱᤗᤥ॥

¹⁴ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥᤵᤐᤠ ᤕᤧ᤺ᤱᤄᤠᤍᤧᤴᤏᤥᤒᤠ ᤌᤰᤛᤠᤜᤠ᤹ ᤋᤠᤶᤓᤢᤱ ᤁᤥ᤺ᤳᤆᤥᤜᤠ᤹ᤏᤢ ᤛᤥᤖᤡᤰ ᤔᤧᤘᤠ᤹ᤖᤥ. ᤛᤠᤶᤔᤧ᤺ᤴᤍᤠᤜᤠ᤹ᤖᤧ ᤂᤢᤴᤇᤡ᤹ ᤋᤣ᤺ᤱᤈᤢᤶᤜᤠ᤹ ᤔᤧᤔᤧ᤺ᤰᤗ ᤔᤧᤀᤢ᤺ᤳᤋᤢᤛᤡᤖᤥ. ᤛᤧᤴᤍᤡᤰᤐᤠ ᤀᤠᤈᤠᤈᤠᤒᤠ ᤌᤰᤛᤠᤜᤠ᤹ ᤔᤧᤗ᤺ᤴᤏᤠᤱ ᤏᤧᤔᤠᤍᤧᤴ ᤔᤧᤃᤥ᤺ᤳᤋᤢᤖ ᤂᤧ᤹ᤕᤥ ᤔᤧᤏᤠ᤺ᤶᤛᤡᤱᤗᤥ॥

¹⁵ ᤂᤧ᤹ᤕᤥ ᤑᤰᤌᤡ᤺ᤶᤒᤧᤸᤗᤧ ᤜᤠᤵ ᤆᤥᤃᤢᤀᤠᤱ ᤌᤡ᤺ᤴᤍᤢᤖᤥ. ᤜᤧᤰᤁᤩᤠᤱ ᤁᤢᤛ᤻ᤛᤠ ᤗ᤺ᤳᤋᤢᤛᤡᤖᤥ. ᤂᤧᤒᤩᤠᤱ ᤁᤢᤗᤠᤵ ᤛᤡᤃᤠᤱ ᤁᤢᤛ᤻ᤛᤠᤜᤠ᤹ ᤁᤢᤵᤋᤢᤛᤡᤖᤥ. ᤂᤧᤵᤔᤥ ᤁᤢᤶᤔᤠᤔᤠ ᤁᤢᤶᤒᤠᤒᤠ ᤑᤡ᤺ᤳᤆᤥᤜᤠ᤹ ᤁᤢᤃᤠᤵ ᤁᤢᤃᤠᤵ ᤔᤧᤒᤥᤱᤅᤠᤱ ᤔᤧᤈᤢᤶᤗᤥ॥

¹⁶ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤒᤠ᤺ᤴᤈᤠᤰ ᤁᤧᤒᤵᤐᤠ ᤛᤠᤵᤁᤡᤳᤋᤥ ᤀᤥᤔᤧᤳᤋᤧᤶᤔᤧ᤹ᤀᤠᤱ ᤏᤡᤖᤧᤶᤔᤧ᤹ᤀᤥ॥ ᤁᤴ ᤌᤰᤛᤠ ᤐᤢᤛᤠᤜᤠ᤹ᤀᤥ ᤗᤳᤌᤡᤰᤁᤠᤱ ᤔᤧᤶᤔᤠᤏᤧᤴᤗᤥ. ᤁᤢᤃᤠᤵ ᤂᤥᤔᤠᤖᤧ ᤗᤠᤃᤡ ᤀᤠᤳᤋᤡᤸᤗᤧᤀᤠᤱ ᤁᤧᤛᤠᤰᤐᤠ ᤔᤧᤍᤢᤔᤢᤴᤗᤥ. ᤌᤣᤀᤠᤱᤓᤧᤸᤗᤧ ᤁᤱᤃ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤶᤒᤪᤠ᤺ᤸᤗᤧ ᤀᤡᤱᤈᤠᤱ ᤆᤥᤃᤢᤒᤠᤖᤥ. ᤂᤧᤒᤩᤠᤱ ᤂᤢᤏᤧ᤹ ᤁᤢᤕᤠᤶᤛᤠᤶᤔᤡᤸᤗᤧ ᤂᤧᤱᤜᤠ᤹ ᤌᤡᤰᤗᤧᤱᤗᤧ ᤛᤥᤖᤡᤰ ᤑᤢᤰᤂᤢᤛᤡᤖᤥ॥

¹⁷ ᤂᤢᤏᤧ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤂᤥᤔᤠ ᤗᤰ ᤛᤧᤴᤍᤢ ᤐᤡᤖᤢᤛᤡᤖᤥ. ᤂᤢᤏᤧ᤹ ᤀᤠᤒᤠᤅᤣ ᤁᤢᤜᤢᤰᤁᤡᤸᤗᤧ ᤛᤡ᤺ᤰᤋᤢᤀᤠᤱ ᤑ᤺ᤰᤂᤢ ᤐᤡᤖᤢᤛᤡᤀᤠᤱ ᤘᤠ᤹ᤖᤥ॥ ᤂᤧᤱᤃ ᤛᤍᤠᤍᤡᤱᤗᤧ ᤗᤠᤃᤡ ᤂᤢᤴᤇᤡ᤹ᤀᤡᤴ ᤐᤥᤱᤗᤥ. ᤂᤧᤒᤩᤠᤱ ᤌᤠ᤺ᤰᤌᤠ᤺ᤰ ᤌᤠᤖᤡᤰ ᤂᤧᤱᤜᤠ᤹ ᤂᤧ᤹ᤕᤥ ᤔᤧᤕᤢᤱᤗᤥ॥