ᤕᤛᤤᤕᤠ 33 - LIFOTNTᤀᤠᤓᤠ᤹ᤖᤧ ᤑᤠ᤹ᤀᤠᤱ ᤕᤜᤘᤣ ᤍᤠᤱᤒᤠᤴ ᤐᤣᤗᤡ ᤑᤠᤰᤔᤠ 1 ᤔᤏᤠ ᤁᤧᤛᤧᤵᤐᤠ ᤂᤡᤏᤡ᤹ ᤀᤛ᤻ᤛᤣᤖᤡᤕᤠᤜᤠ᤹. ᤁᤧᤈᤡ᤺ᤳᤋᤡ ᤁᤧᤛᤩᤧ᤹ᤀᤡᤖᤥ᥄ ᤁᤖ ᤂᤧᤏᤡ᤹ᤃ ᤜᤠ᤺ᤳᤗᤧᤀᤠᤱ ᤔᤧᤴᤇᤧᤳᤋᤣ ᤁᤧᤘᤕᤡ᤹᥄ ᤆᤡ᤺ᤳᤋᤧᤛᤩᤧᤖᤥ. ᤂᤡᤏᤡ᤹ ᤀᤡᤱᤗᤧᤰᤛᤫᤠᤒᤠᤜᤠ᤹. ᤂᤡᤏᤡ᤹ᤃ ᤜᤠ᤺ᤳᤗᤧᤀᤠᤱ ᤀᤡᤱᤔᤧᤸᤗᤧᤰᤁᤣ ᤁᤧᤘᤕᤡᤖᤥ᥄ ᤔᤏᤠᤜᤠ᤹ ᤂᤧᤏᤡ᤹ ᤔᤧᤱᤔᤠ ᤁᤧᤗᤧᤖᤢᤶᤛᤡᤶᤔᤡᤸᤗᤧ. ᤂᤧᤏᤡ᤹ᤀᤠᤱ ᤁᤧᤶᤔᤧᤰᤂᤡᤖᤥ॥ ᤔᤏᤠᤜᤠ᤹ ᤂᤧᤏᤡ᤹ ᤀᤡᤱᤗᤧᤰᤔᤠ ᤁᤧᤗᤧᤖᤢᤶᤛᤡᤶ᤹. ᤂᤡᤏᤡ᤹ᤀᤠᤱ ᤀᤡᤱᤗᤧᤰᤁᤥ ᤁᤧᤎᤩᤧ᤹ᤀᤡᤖᤥ॥ 2 ᤕᤜᤘᤣ ᤍᤠᤱᤒᤠᤀᤣ. ᤀᤠᤏᤡᤃᤣ ᤗᤢᤱᤔᤠ᤹ ᤀᤠᤍᤢᤰᤋᤧ᤹ᤀᤥ. ᤀᤠᤏᤡᤃᤣ ᤂᤧᤏᤧ᤹ ᤁᤧᤗᤠᤶ ᤀᤥᤔᤧᤳᤋᤢᤶᤒᤧᤖᤥ॥ ᤋᤠᤏᤠᤶ ᤌᤰᤔᤠ ᤂᤧᤏᤧ᤹ ᤀᤠᤏᤡᤃᤣ ᤔᤢᤰᤛᤠᤶ ᤐᤥ᤺ᤰᤂᤧ᤹ᤀᤠᤱ ᤋᤢᤰᤂᤣ ᤗᤠᤰᤂᤣ ᤋᤢᤔᤡᤃᤧᤸᤗᤧ ᤀᤠᤛᤧ᤺ᤵᤋᤧ᤹ᤀᤥ॥ 3 ᤂᤧᤏᤧ᤹ ᤕᤶᤒᤠ ᤁᤧᤀᤡᤰᤗᤠᤴ ᤔᤧᤄᤧᤵᤛᤢᤀᤠᤱ ᤔᤏᤠᤜᤠ᤹ ᤔᤧᤄᤧᤳᤇᤡᤱ ᤔᤧᤒᤣ᤺ᤰᤗᤥ. ᤂᤧᤏᤧ᤹ ᤌᤱ ᤆᤥ᤺ᤰᤛᤧ ᤁᤧᤒᤥ᤺ᤰᤁᤡᤸᤗᤧ ᤁᤧᤖᤧᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤑᤢᤳᤇᤡᤱᤇᤠ᤺ᤱ ᤔᤧᤛᤧ ᤔᤧᤄᤧᤳᤗᤥ॥ 4 ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤁᤥᤒᤠ ᤁᤧᤖᤧᤰ ᤔᤧᤴᤇᤠᤶ ᤕᤠᤵᤔᤡᤛᤣ. ᤂᤧᤏᤡ᤹ ᤁᤧᤏᤠᤵᤋᤢᤶ ᤁᤧᤍᤠᤖᤢᤶᤛᤡᤶᤒᤠ ᤁᤢᤈᤠᤜᤠ᤹ ᤁᤧᤄᤠᤒᤠ ᤕᤠᤰᤗᤠᤐᤢᤛᤠ᤺ᤳᤜᤠ᤹ᤖᤧ ᤔᤧᤈᤒᤠ ᤌᤣᤛᤡᤱᤒᤠ ᤐᤥᤱᤗᤥ. ᤏᤡ᤺ᤱᤄᤢᤰᤘᤠᤜᤠ᤹ᤖᤧ ᤔᤧᤒᤴᤇᤢᤒᤠ ᤁᤢᤛᤡᤱ ᤔᤏᤠᤜᤠ᤹ᤖᤧ ᤂᤧᤴ ᤔᤧᤛᤢᤶᤍᤢᤖᤥ॥ 5 ᤕᤜᤘᤣ ᤍᤠᤱᤒᤠᤴ ᤁᤧᤖᤧᤰᤏᤢ᤺ᤸᤗᤧ ᤐᤕᤶ ᤕᤶᤒᤠ ᤆᤥᤰᤗᤥ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤁᤧᤖᤧᤰᤏᤢ᤺ᤸᤗᤧᤀᤠᤱ ᤌᤠ᤺ᤱᤎᤠ᤺ᤱ ᤕᤢᤱᤗᤥ॥ ᤂᤢᤏᤧ᤹ ᤛᤡᤕᤥᤏᤧᤴ ᤁᤧᤘᤠ᤹ᤒᤠ ᤂᤠᤛᤧᤴ ᤏᤢ ᤛᤠᤶᤕᤥᤒᤠ ᤐᤠ᤺ᤴᤜᤠ᤹ᤖᤧ ᤁᤧᤰᤁᤢᤱᤗ ᤆᤥᤃᤢᤖᤥ॥ 6 ᤜᤧᤰᤁᤩᤠᤱ ᤂᤠᤶᤄᤢ ᤗᤠᤈᤣᤴ ᤌᤎᤵ ᤔᤧᤸᤗ᤹ᤔᤏᤠᤒᤠ ᤆᤥᤃᤢᤖᤥ. ᤂᤢᤏᤧ᤹ ᤁᤢᤔᤏᤠᤜᤠ᤹ ᤀᤠᤓᤧᤸᤗᤧᤛᤠᤱ ᤋᤠᤱᤛᤧ᤺ᤵᤋᤢᤛᤡᤖᤥ॥ ᤜᤧᤰᤁᤩᤠᤱ ᤂᤧᤱᤜᤠ᤹ ᤛᤡᤰᤁᤢᤶᤍᤡᤱ ᤏᤡᤱᤘᤠ᤹ ᤏᤢ ᤏᤧᤜᤡᤏᤡᤱᤘᤠ᤹ ᤐᤡᤖᤢᤛᤡ᤹॥ ᤕᤜᤘᤣ ᤍᤠᤱᤒᤠᤴᤏᤢ ᤁᤡᤔᤠᤱᤃ ᤁᤴ ᤐᤠ᤺ᤴᤜᤠ᤹ᤖᤧ ᤁᤢᤓᤢ ᤜᤶᤔᤠ ᤋᤡᤔᤡᤰᤗᤥ॥ 7 ᤀᤥᤔᤧᤳᤋᤧᤶᤔᤧ᤹. ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤛᤠ᤹ᤖᤡᤰ ᤁᤧᤎᤢᤶᤒᤠ ᤔᤏᤠᤜᤠ᤹ ᤀᤠᤓᤠ᤹ᤖᤧ ᤑᤠ᤹ᤀᤠᤱ ᤗᤠᤶᤔᤥ ᤀᤢ᤺ᤰᤁᤠᤱ ᤀᤢ᤺ᤰ ᤔᤧᤜᤠ᤺ᤵᤗᤥ. ᤐᤠᤴ ᤁᤧᤍᤱᤒᤠ ᤜᤠᤱᤗᤠᤀᤡᤱᤒᤠᤜᤠ᤹ ᤘᤧ᤺ᤱᤅᤠᤱ ᤘᤧ᤺ᤱ ᤔᤧᤜᤠ᤺ᤵᤗᤥ॥ 8 ᤔᤠᤖᤠᤶᤜᤠ᤹ ᤆᤡᤈᤡ ᤂᤰᤂᤰ ᤐᤥ᤺ᤰᤂᤧᤀᤠᤱ ᤏᤧᤖᤥ. ᤗᤠᤶᤔᤥ ᤗᤠᤱᤃᤧᤄᤣ᤺ᤰᤐᤠ ᤗᤠᤶᤍᤡ᤺ᤵᤐᤠᤱᤜᤠ᤹ ᤔᤧᤜᤥᤵᤗᤥ॥ ᤁᤧᤍᤱᤒᤠ ᤐᤠ᤺ᤴᤏᤡᤴ ᤕᤠᤶᤔᤥ ᤗᤅᤧᤀᤠᤱ ᤘᤠ᤹ᤖᤥ. ᤁᤧᤏᤡᤒᤠᤜᤠ᤹ᤖᤧ ᤔᤧᤒᤡᤖᤢᤒᤠ ᤋᤥ᤺ᤴᤍᤡ ᤐᤠ᤺ᤴᤜᤠ᤹ ᤁᤢᤏᤠᤔᤧᤴᤇᤠ᤹ ᤐᤥ᤺ᤰᤂᤧᤀᤠᤱ ᤘᤠ᤹ᤖᤥ. ᤀᤠᤴᤋᤡᤴ ᤔᤏᤠᤜᤠ᤹ᤖᤧᤴᤏᤠᤱ ᤂᤢᤴᤇᤡ᤹ ᤔᤡᤱᤛᤥ ᤀᤡᤱᤎᤠᤱ ᤜᤥᤵᤗᤥ॥ 9 ᤂᤠᤶᤄᤢ ᤗᤠᤈᤣᤴ ᤔᤧᤖᤡᤱ ᤌᤰ ᤜᤧᤰᤁᤩᤠᤱ ᤔᤢᤖᤧᤰ ᤂᤠᤖᤧᤰ ᤐᤥᤱᤗᤥ. ᤗᤧᤒᤏᤠᤏᤒᤠ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤏᤠᤛᤠᤶ ᤌᤠ᤹᤺ ᤂᤧᤶᤒᤩᤠᤱ ᤀᤡᤔᤧᤛᤢ᤹ᤖᤥ॥ ᤛᤠᤖᤥᤏ ᤗᤠᤈᤣ᤹ᤀᤥ ᤆᤠᤃᤧᤏᤢ᤹ᤒᤠ ᤏᤧᤏᤧᤒᤠᤍᤧᤴᤜᤠ᤹ ᤀᤖᤠᤒᤠ ᤗᤠᤈᤣ᤹ᤀᤥ ᤁᤧᤏᤧᤒᤠ ᤕᤧ᤺ᤱᤄᤠᤍᤧᤴ ᤜᤧᤰᤋᤱᤒᤠ ᤐᤥᤱᤗᤥ. ᤂᤧᤒᤩᤠᤱ ᤒᤠᤛᤠᤏ ᤗᤠᤈᤣ᤹ᤀᤥ ᤏᤢ ᤁᤷᤔᤣᤗ ᤁᤥ᤺ᤰᤔᤠᤀᤥᤒᤠ ᤛᤡᤱᤒᤢᤱᤜᤠ᤹ᤀᤥᤏᤢ ᤋᤧᤳᤗᤧᤑᤧᤰᤘᤠᤜᤠ᤹ ᤗᤢ᤺ᤰᤌᤠᤖᤥ॥ ᤕᤜᤘᤣ ᤍᤠᤱᤒᤧᤸᤗᤧ ᤏᤡᤱᤔᤡᤜᤠ᤹ ᤂᤢᤶᤏᤧᤏᤡᤱ ᤔᤧᤳᤋᤢᤛᤡ 10 ᤕᤜᤘᤣ ᤍᤠᤱᤒᤧᤸᤗᤧ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤔᤧᤳᤋᤢᤛᤡ. “ᤀᤠᤸᤗ ᤀᤠᤱᤃᤠ᤹ ᤐᤥ᤺ᤰᤁᤠᤖᤥ॥ ᤀᤠᤸᤗ ᤀᤠᤱᤃᤠ᤹ ᤀᤠᤒᤠᤅᤣ ᤌᤠ᤺ᤱᤎᤠ᤺ᤱ ᤐᤥ᤺ᤰᤁᤠᤖᤥ. ᤀᤠᤱᤃᤠ᤹ ᤀᤠᤔᤢᤰᤛᤠᤶᤔᤡᤴ ᤀᤥᤛᤣ᤺ᤴᤎᤠᤱ ᤆᤥᤃᤢᤱᤗᤥ॥ 11 ᤂᤧᤏᤡ᤹ ᤀᤛ᤻ᤛᤣᤖᤡᤕᤠᤒᤠ ᤔᤏᤠᤜᤠ᤹ᤖᤧ ᤁᤢᤜᤣᤍᤩᤠ᤹ ᤕᤠ᤹ᤗᤠᤱᤜᤠ᤹ ᤛᤢᤶᤔᤏᤠᤒᤠ ᤜᤧᤰᤁᤣ ᤁᤢᤛᤢᤶ ᤔᤧᤴᤍᤶᤏᤠᤒᤠ ᤕᤠ᤺ᤶᤒᤰ ᤆᤥ᤺ᤰᤔᤠ ᤁᤧᤃᤥ᤺ᤳᤋᤢᤶᤗᤥ॥ ᤂᤧᤏᤡ᤹ ᤛᤰᤔᤠ᤺ᤱᤃ ᤂᤧᤏᤡ᤹ ᤀᤠᤒᤠᤅᤣ ᤂᤠᤵᤐᤢᤌᤩ᤺ᤱ ᤁᤧᤈᤥ᤺ᤰᤐᤠ ᤔᤡᤎᤢᤱ ᤔᤡᤖᤠ᤺ᤰᤗᤥ॥ 12 ᤔᤏᤠᤜᤠ᤹ ᤆᤢᤏᤡ ᤗᤢᤱ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤁᤢᤀᤡᤛᤡᤰ ᤔᤡᤔᤧᤍᤡᤰᤗᤥ. ᤜᤧᤰᤔᤏᤠ ᤏᤧᤔᤏᤠᤒᤠ ᤋᤡᤱᤃᤪᤣᤰ ᤗᤠ᤺ᤴ ᤗᤠᤵᤔᤏᤠᤒᤠ ᤜᤧᤰᤁᤣ ᤂᤧᤱᤜᤠ᤹ ᤔᤧᤗᤠᤒᤢᤛᤡᤖᤥ॥ 13 “ᤔᤠ᤺ᤱᤄᤠ ᤁᤧᤘᤠ᤹ᤒᤠ ᤔᤏᤠᤛᤣ. ᤀᤠᤱᤃᤠ᤹ ᤆᤥᤃᤢᤱᤅᤠᤱ ᤁᤧᤘᤠ᤹ᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤂᤧᤵᤛᤧᤵᤔᤧ᤹ᤀᤥ. ᤏᤡ᤺ᤳᤋᤠᤱᤒᤠ ᤔᤏᤠᤛᤣ. ᤀᤠᤱᤃᤠ᤹ ᤀᤠᤔᤢᤰᤛᤠᤶᤔᤡᤴ ᤁᤢᤛᤡᤱ ᤏᤡ᤺ᤳᤋᤧᤶᤔᤧ᤹ᤀᤥ॥ 14 ᤛᤡᤕᤥᤏᤀᤥ ᤁᤧᤘᤠ᤹ᤒᤠ ᤗᤠᤕᤥᤒᤠᤜᤠ᤹ ᤔᤧᤃᤡᤛᤧᤀᤠᤱ ᤔᤧᤘᤠ᤹ᤖᤥ. ᤏᤡᤱᤘᤠ᤹ᤑᤢᤔᤠᤱ ᤘᤠ᤹ ᤑᤠ᤹ᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤁᤢᤛᤡᤱ ᤔᤧᤴᤏᤡᤵᤏᤠᤒᤠ ᤔᤏᤠᤜᤠ᤹ ᤁᤡᤔᤠ ᤕᤱᤔᤠᤖᤧ ᤋᤧᤶᤛᤢᤛᤡᤀᤠᤱ ᤔᤧᤘᤠ᤹ᤖᤥ. ᤂᤠᤵᤐᤢᤌᤩ᤺ᤱ ᤀᤠᤈᤥ᤺ᤰᤆᤥ᤺ᤰᤐᤠ ᤔᤡᤀᤥ ᤕᤢᤱᤔᤠ ᤁᤧᤛᤢᤰᤐᤠ ᤀᤠᤏᤡ᤹ᤀᤥ ᤜᤠᤳ ᤘᤠ᤹ᤒᤣ᥅ ᤀᤠᤓᤧᤸᤗᤧᤛᤠᤱ ᤔᤡᤎᤢᤱᤍᤡᤱ ᤔᤡᤖᤠ᤺ᤰ ᤁᤧᤒᤥ᤺ᤰᤐᤠᤍᤧᤴᤏᤥ ᤕᤢᤱᤔᤠ ᤁᤧᤛᤢᤰᤐᤠ ᤀᤠᤏᤡ᤹ᤀᤥ ᤀᤠᤳᤋᤡᤴ ᤘᤠ᤹ᤃ᥅ 15 ᤜᤠᤳ ᤁᤢᤍᤥ᤺ᤵᤔᤠ ᤗᤠᤶᤔᤥ ᤗᤠᤱᤄᤣ᤺ᤰ. ᤜᤧᤰᤁᤩᤠᤱ ᤁᤧᤘᤠ᤹ᤒᤠ ᤐᤠᤴ ᤐᤠ᤺ᤳ. ᤜᤠᤳ ᤕᤠᤱᤅᤡᤸᤗᤧ ᤁᤢᤛ᤻ᤛᤠ ᤆᤠᤔᤠ ᤔᤧᤍᤧᤴᤏᤧᤴ. ᤀᤠᤳᤋᤡᤸᤗᤧ ᤛᤫᤠ᤺ᤳᤋᤠᤱ ᤛᤢᤖᤢᤋᤩᤠᤱ ᤋᤠ᤺ᤰᤔᤠᤖᤧ ᤗᤠᤃᤡ ᤁᤢᤜᤢᤰᤁᤧᤴ ᤔᤧᤛᤴᤇᤢᤴ. ᤜᤠᤳ ᤔᤏᤠᤛᤧᤵᤔᤠ ᤆᤧᤶᤓᤴ ᤐᤠᤴ ᤂᤧᤶᤔᤠ ᤔᤧᤍᤧᤴᤏᤧᤴ. ᤋᤠᤵᤑᤧ᤺ᤶᤒᤠ ᤐᤠ᤺ᤴᤏᤡᤴ ᤏᤡᤱᤘᤠ᤹ ᤀᤡ᤺ᤵᤔᤠᤏᤢ᤺ᤸᤗᤧ ᤐᤖᤢ ᤁᤢᤔᤡᤰᤁᤧᤴ ᤀᤡᤶ ᤔᤧᤳᤋᤢ᤹॥ 16 ᤜᤠᤒᤠ ᤂᤧᤴ ᤔᤏᤠᤴ ᤌᤥᤎᤥᤰᤐᤠ ᤋᤧᤴᤏᤥ ᤕᤢᤱᤗᤥ. ᤂᤧᤸᤗᤧ ᤁᤢᤀᤡ᤺ᤶᤛᤡᤱᤔᤠ ᤋᤧᤴᤏᤡᤱᤃ ᤁᤥ᤺ᤰᤔᤠᤀᤥ ᤁᤧᤏᤧᤒᤠ ᤜᤠᤱᤕᤰᤁᤥ ᤐᤥᤱᤗᤥ॥ ᤂᤧᤴ ᤆᤠᤔᤠ ᤁᤢᤈᤠ ᤔᤧᤒᤡᤖᤢᤖᤥ ᤜᤧᤰᤁᤩᤠᤱ ᤆᤫᤠ᤺ᤳᤋᤡᤸᤗᤧ ᤋᤢᤰᤂᤣ ᤔᤧᤒᤥᤱᤏᤧᤸᤗᤥ॥” ᤜᤠᤱᤘᤠ ᤔᤠᤱᤘᤠ ᤁᤧᤕᤠᤰᤐᤠ ᤋᤠᤕᤧᤶ 17 ᤜᤠᤱᤅᤡᤸᤗᤧ ᤁᤢᤄᤧᤶᤛᤡᤶᤔᤧᤴ ᤂᤧᤏᤡ᤹ ᤔᤡᤰᤁᤡᤸᤗᤧ ᤏᤡᤛᤢᤖᤥ. ᤜᤧᤰᤁᤩᤠᤱ ᤔᤠ᤺ᤱᤄᤠ ᤌᤠᤖᤡᤰ ᤁᤧᤒᤥᤒᤠᤀᤠᤱ ᤁᤧᤏᤧᤒᤠ ᤗᤠᤈᤣᤴ ᤂᤧᤏᤡ᤹ ᤔᤡᤰᤁᤧᤸᤗᤧ ᤋᤠᤛᤢᤖᤥ॥ 18 ᤂᤧᤏᤡ᤹ ᤏᤡᤱᤘᤠ᤹ᤀᤥ ᤋᤃᤡᤒᤠ ᤁᤡᤔᤠ ᤕᤱᤔᤠᤜᤠ᤹ ᤏᤡᤱᤘᤠ᤹ ᤁᤧᤀᤡ᤺ᤳᤋᤢᤶᤗᤥ. “ᤋᤢᤶ ᤛᤢᤜᤠᤱᤕᤢᤰᤐᤠᤴ ᤀᤠᤳᤋᤡ ᤘᤠ᤹᥅ ᤀᤣ᤺ᤱᤕᤠᤱ ᤁᤧᤓᤥᤱᤒᤠᤴ ᤀᤠᤳᤋᤥ ᤐᤣᤒᤣ᥅ ᤆᤱᤜᤡᤶᤜᤠ᤹ ᤀᤥᤃᤧᤔᤧᤵᤐᤠ ᤗᤰᤐᤧᤴ ᤁᤧᤄᤥᤒᤠ ᤛᤢᤜᤠᤱᤕᤢᤰᤐᤠᤴ ᤀᤠᤳᤋᤡ ᤘᤠ᤹᥅” 19 ᤂᤧᤏᤡ᤹ ᤁᤢᤛᤡᤱ ᤁᤧᤴᤏᤡᤳᤋᤢᤶᤔᤡᤶᤒᤠ ᤐᤠ᤺ᤴᤍᤠᤱ ᤁᤧᤒᤠ᤺ᤵᤐᤠ ᤁᤧᤜᤧᤴᤇᤡᤱᤒᤠ ᤘᤣ᤹ ᤗᤠᤈᤣ᤹ᤒᤠ ᤔᤏᤠᤜᤠ᤹ ᤕᤠᤶᤔᤥ ᤁᤧᤴᤏᤡᤛᤢᤶᤛᤡᤶᤔᤧᤴᤗᤥ॥ 20 ᤀᤠᤏᤡ᤹ ᤏᤡ᤺ᤴᤎᤥ ᤀᤠᤈᤥᤃᤢᤶᤒᤠ ᤋᤱᤏᤠᤶᤜᤠ᤹ᤖᤧᤴ ᤐᤠᤱᤈᤢᤶ ᤛᤡᤕᤥᤏᤧᤴ ᤀᤥᤔᤧᤳᤋᤧᤶᤔᤧ᤹ᤀᤥ. ᤂᤧᤏᤡ᤹ ᤔᤡᤰᤁᤧᤸᤗᤧ ᤕᤖᤢᤛᤗᤧᤔ ᤕᤧᤰᤕᤰᤁᤡᤴ ᤏᤡᤛᤢᤖᤥ. ᤆᤡᤈᤡ ᤕᤧᤶᤕᤧᤶ ᤁᤧᤗ᤹ᤒᤠ ᤗᤳᤇᤠ ᤕᤢᤱᤔᤠᤍᤧᤴ. ᤗᤳᤇᤠ ᤛᤠ᤺ᤱᤃᤠᤜᤡᤶᤔᤧᤴ ᤀᤠᤓᤧᤸᤗᤧᤀᤠᤱ ᤔᤧᤴᤈᤳᤇᤡᤱ ᤔᤧᤶᤒᤣ᤺ᤰᤔᤏᤠᤒᤠ ᤆᤥᤰᤗᤥ. ᤂᤧ᤹ᤕᤥᤒᤠ ᤁᤡᤸᤗᤠᤜᤠ᤹ ᤀᤠᤵᤑᤠᤸᤗᤧᤀᤠᤱ ᤔᤧᤴᤀᤠ᤺ᤰᤂᤢᤴᤗᤥ. ᤜᤧᤰᤁᤩᤠᤱ ᤌᤠᤰᤐᤠᤜᤠ᤹ ᤔᤧᤶᤓᤢ᤹ᤖᤢᤴᤗᤥ॥ 21 ᤂᤧᤵᤔᤥᤃ ᤕᤜᤘᤣ ᤍᤠᤱᤒᤠ ᤀᤠᤏᤡ᤹ ᤔᤢᤰᤛᤠᤶᤍᤠᤱᤒᤠᤴ ᤘᤠ᤹ᤖᤥ. ᤁᤴ ᤕᤶᤒᤕᤶᤒᤠ ᤘᤜ᤺ᤱ ᤏᤢ ᤕᤱᤄᤱᤗᤧ ᤁᤢᤃᤢᤱᤔᤠᤍᤧᤴ ᤜᤧᤰᤋᤱᤒᤠ ᤐᤥᤱᤗᤥ॥ ᤗᤱᤄᤳᤜᤠ᤹ᤖᤧ ᤗᤥ᤺ᤱᤔᤏᤠᤒᤠ ᤂ᤺ᤱᤒᤣ᤹ᤜᤠ᤹ ᤂᤧ᤹ᤕᤥ ᤔᤧᤸᤗᤥ᤺ᤰᤏᤧᤴᤗᤥ. ᤕᤶᤒᤠ ᤘᤠᤗᤠᤎᤠᤜᤠ᤹ᤀᤠᤱ ᤂᤧ᤹ᤕᤥ ᤗᤠᤱᤔᤧᤱᤄᤣ᤺ᤰᤏᤧᤴᤗᤥ॥ 22 ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤠᤴ ᤀᤠᤏᤡ᤹ ᤗᤧᤵᤔᤠᤱ ᤂᤠᤛᤧᤴ ᤁᤧᤗᤥ᤺ᤶᤒᤠ ᤁᤧᤒᤡᤒᤠ ᤆᤥᤰᤗᤥ. ᤕᤜᤘᤣ ᤍᤠᤱᤒᤠᤴ ᤀᤠᤏᤡ᤹ ᤛᤠᤶᤕᤥᤌᤡᤶ ᤀᤠᤒᤡᤒᤡᤒᤠ ᤆᤥᤰᤗᤥ॥ ᤕᤜᤘᤣ ᤍᤠᤱᤒᤠᤴ ᤀᤠᤏᤡ᤹ ᤜᤠᤱᤗᤥ. ᤜᤧᤰᤁᤩᤠᤱ ᤂᤢᤏᤧ᤹ᤀᤣ ᤀᤠᤏᤡ᤹ ᤋᤠᤱᤀᤠᤛᤧ᤺ᤵᤗᤥ॥ 23 ᤂᤧᤏᤡ᤹ ᤘᤠᤗᤠᤎᤠᤜᤠ᤹ ᤀᤡᤄᤣ᤺ᤱᤔᤠ ᤌᤠᤰᤐᤠᤜᤠ᤹ ᤘᤠ᤺ᤱᤛ᤺ᤰᤛ᤺ᤰᤐᤠ ᤐᤥ᤺ᤰᤂᤧᤀᤠᤱ ᤐᤳᤗᤥ. ᤔᤏᤠᤜᤠ᤹ᤖᤧ ᤂᤧᤸᤗᤧ ᤁᤢᤍᤰᤔᤠ ᤛᤡᤳᤗᤠᤱᤜᤠ᤹ ᤔᤧᤶᤔᤢᤴᤏᤣ ᤕᤢᤱᤔᤠ ᤔᤧᤴᤇᤢᤰᤋᤢᤴᤗᤥ॥ ᤂᤧᤱᤜᤠ᤹ᤖᤧ ᤛᤢᤖᤡᤳ ᤆᤧᤵᤔᤠ ᤆᤡᤖᤡᤰᤁᤡᤴ ᤂᤡᤱᤔᤠ ᤔᤧᤴᤇᤢᤰᤋᤢᤴᤗᤥ. ᤂᤧᤒᤩᤠᤱ ᤔᤧᤏᤠᤵᤋᤢ ᤔᤧᤍᤠᤖᤢᤛᤡᤒᤠ ᤕᤖᤡᤰ ᤆᤡᤃᤰᤘᤠᤜᤠ᤹ ᤔᤧᤓ᤺ᤰᤂᤢᤖᤥ॥ ᤗᤠᤱᤛᤰᤐᤠᤜᤠ᤹ᤖᤧᤀᤠᤱ ᤂᤧᤴ ᤔᤧᤏᤠᤵᤋᤢ ᤔᤧᤍᤠᤖᤢᤛᤡᤒᤠ ᤆᤡᤃᤰᤘᤠᤜᤠ᤹ᤖᤧ ᤁᤢᤗᤰ ᤔᤧᤍᤠ᤺ᤰᤋᤢ ᤔᤧᤍᤣ᤹ᤖᤢᤖᤥ॥ 24 ᤛᤡᤕᤥᤏ ᤁᤥ᤺ᤰᤔᤠᤀᤥ ᤁᤧᤕᤢᤱᤒᤠ ᤀᤠᤳᤋᤡᤴᤏᤠᤱ “ᤀᤠᤱᤃᤠ᤹ ᤀᤠᤕᤠᤶᤍᤢᤰ” ᤔᤧᤗ᤹ᤏᤧᤴᤗᤥ. ᤜᤧᤰᤁᤩᤠᤱ ᤂᤧ᤹ᤕᤥ ᤁᤧᤕᤢᤱᤒᤠ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤗᤠᤕᤥᤗᤠᤶ ᤗᤧᤵᤔᤡ ᤔᤧᤄᤥᤛᤢᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.