ᤕᤛᤤᤕᤠ 32 - LIFOTNTᤛᤠᤶᤕᤥᤒᤠ ᤜᤠᤱ 1 ᤀᤥᤔᤧᤳᤋᤧᤶᤔᤧ᤹. ᤗᤳᤇᤠ ᤜᤠᤱᤎᤡᤰᤗᤧ ᤛᤠᤶᤕᤥᤒᤠ ᤕᤠ᤺ᤶᤒᤰ ᤆᤥᤃᤢᤀᤠᤱ ᤜᤠᤱᤕᤢᤰ ᤆᤥᤃᤢᤖᤥ. ᤜᤧᤰᤁᤩᤠᤱ ᤕᤢᤰᤛᤠᤒᤠᤜᤠ᤹ᤖᤧ ᤁᤢᤍᤥ᤺ᤵᤔᤠ ᤂᤠᤛᤧᤴ ᤔᤧᤈᤥᤃᤢᤖᤥ॥ 2 ᤂᤧᤱᤜᤠ᤹ ᤛᤢᤖᤡᤳ ᤁᤣᤈᤱᤗᤠᤶ ᤘᤀᤡ᤺ᤶᤛᤡᤱᤔᤠ ᤏᤢ ᤂᤀᤡᤰ ᤂᤀᤡᤰ ᤁᤧᤀᤡᤰᤛᤡᤱᤒᤠ ᤘᤜᤡᤳ ᤛᤠᤶᤔᤡ᤺ᤳᤗᤠᤶ ᤀᤡ᤺ᤶᤛᤡᤱᤔᤠᤍᤧᤴ ᤁᤢᤛᤡᤱᤒᤠ ᤔᤧᤒᤥᤱᤗᤥ॥ ᤂᤧᤶᤒᤩᤠᤱ ᤌᤣᤀᤠᤱ ᤁᤧᤜᤥᤵᤐᤠ ᤔᤢᤖᤧᤰ ᤂᤠᤖᤧᤰᤐᤠ ᤕᤧ᤺ᤱᤄᤠᤍᤧᤴᤏᤥ ᤆᤫᤠ᤺ᤳ ᤗᤠᤱᤃᤧᤄᤣ᤺ᤰᤐᤠ ᤘᤜ᤺ᤱ ᤜᤧᤰᤋᤱᤒᤠ ᤔᤧᤒᤥᤱᤗᤥ. ᤆᤫᤠ᤺ᤳ ᤁᤧᤜᤣᤒᤠ ᤂᤠᤶᤒᤠᤱᤅᤥ ᤕᤶᤒᤠ ᤕᤠᤰᤐᤣᤀᤥᤒᤠ ᤏᤠᤶᤀᤡ᤺ᤰᤂᤱ ᤜᤧᤰᤋᤱᤒᤠ ᤔᤧᤒᤥᤱᤗᤥ॥ 3 ᤂᤧᤴ ᤕᤧᤶᤔᤥ ᤀᤥᤃᤧᤔᤒᤠᤜᤠ᤹ᤖᤧ ᤂᤢᤴᤇᤡ᤹ ᤔᤡᤰᤁᤡᤴ ᤕᤠᤶᤔᤥ ᤀᤠᤓᤧᤸᤗᤧᤀᤠᤱ ᤋ᤺ᤶᤍ᤺ᤶᤒᤠ ᤔᤧᤒᤥᤱᤏᤧᤴᤗᤥ. ᤜᤧᤰᤁᤩᤠᤱ ᤁᤧᤄᤧᤶᤒᤠᤜᤠ᤹ᤖᤧ ᤂᤢᤴᤇᤡ᤹ ᤏᤧᤓᤠᤰᤁᤡᤸᤗᤧ ᤔᤧᤄᤧᤵᤛᤢᤖᤥ॥ 4 ᤀᤠᤸᤗᤀᤠᤱᤎᤥ ᤂᤧᤱᤜᤠ᤹ ᤏᤠᤛᤡᤔᤧᤴᤎ᤺ᤵᤔᤏᤠᤒᤠ ᤔᤧᤶᤒᤥᤱᤏᤧᤴᤗᤥ ᤜᤧᤰᤁᤩᤠᤱ ᤂᤧᤱᤜᤠ᤹ ᤂᤠᤛᤡᤱ ᤔᤧᤏᤡ᤺ᤳᤗᤥ. ᤜᤧᤰᤁᤩᤠᤱ ᤔᤢᤖᤠ ᤁᤧᤄ᤹ᤒᤠᤜᤠ᤹ ᤏᤢᤖᤡᤰᤁᤠᤱ ᤔᤧᤒᤠ᤺ᤳᤗᤥ॥ 5 ᤂᤠᤛᤡᤱ ᤔᤧᤴᤏᤡ᤺ᤵᤔᤏᤠᤒᤠ ᤀᤍᤱ ᤔᤏᤠᤴ ᤀᤠᤓᤧᤸᤗᤧᤀᤠᤱ ᤁᤧᤏᤢ᤹ᤒᤠ ᤔᤧᤵᤔᤠ ᤔᤧᤒᤥᤱᤏᤧᤴᤗᤥ. ᤜᤧᤰᤁᤩᤠᤱ ᤁᤢᤀᤡᤃᤧᤓᤧᤶᤒᤠ ᤔᤏᤠ᤺ᤴᤏᤠᤱ ᤀᤡᤱᤎᤠᤱ ᤐᤡᤔᤠ ᤔᤧᤒᤥᤱᤏᤧᤴᤗᤥ॥ 6 ᤌᤣᤀᤠᤱᤓᤧᤸᤗᤧ ᤀᤍᤱ ᤔᤏᤠ᤺ᤸᤗᤧ ᤀᤍᤱ ᤐᤠ᤺ᤴᤏᤣ ᤐᤠ᤺ᤳᤗᤥ. ᤜᤧᤰᤁᤩᤠᤱ ᤂᤧᤸᤗᤧ ᤁᤢᤏᤡᤱᤘᤠᤴ ᤋᤠᤵᤑᤧ᤺ᤶᤒᤠ ᤕᤠ᤺ᤶᤒᤰ ᤆᤥ᤺ᤰᤔᤠᤀᤥᤖᤰ ᤐᤳᤗᤥ. ᤂᤧᤸᤗᤧ ᤗᤠᤕᤥᤒᤠ ᤕᤠ᤺ᤶᤒᤰ ᤆᤥᤃᤢ᤹ ᤂᤧᤒᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤰᤗᤧᤱᤘᤠᤀᤥ ᤁᤧᤒᤣ᤺ᤶᤒᤠ ᤐᤠ᤺ᤴᤜᤠ᤹ ᤀᤡᤱᤄᤢ ᤏᤧᤛ᤻ᤛᤢᤖᤥ॥ ᤂᤧᤸᤗᤧ ᤁᤢᤛᤧᤰᤁᤧᤗᤠ᤺ᤰᤐᤠᤜᤠ᤹ ᤁᤢᤈᤠ ᤔᤧᤒᤡᤖᤢᤛᤡᤴᤗᤥ. ᤂᤶᤒᤩᤠᤱ ᤁᤢᤘᤠ ᤁᤧᤔᤡᤒᤠᤜᤠ᤹ ᤌᤢᤱᤔᤠ ᤆᤫᤠ᤺ᤳᤋᤠᤱ ᤔᤧᤒᤡᤖᤢᤛᤡᤴᤗᤥ॥ 7 ᤁᤢᤀᤡᤃᤧᤓᤧᤶᤒᤠ ᤔᤏᤠ᤺ᤸᤗᤧ ᤁᤢᤕᤠ᤺ᤶᤒᤰᤁᤡᤴ ᤋᤠᤵᤑᤧ᤺ᤶᤒᤠᤀᤣ ᤆᤥᤰᤗᤥ. ᤌᤣᤀᤠᤱ ᤁᤧᤜᤥ᤺ᤵᤐᤠᤜᤠ᤹ᤖᤧ ᤔᤧᤏᤠ᤺ᤰᤋᤢᤒᤠ ᤐᤠ᤺ᤴᤏᤡᤴ ᤁᤧᤘᤠ᤹ᤒᤠᤀᤣ ᤆᤥ᤺ᤰᤛᤠᤱ ᤕᤠᤱᤃᤧᤛᤠ᤹ᤒᤠᤜᤠ᤹ ᤀᤡᤱᤗᤧᤰ ᤐᤠ᤺ᤴᤏᤡᤸᤗᤧ ᤔᤧᤱᤔᤠᤛᤡ ᤑᤠ᤹ᤀᤠᤱ ᤂᤧᤸᤗᤧ ᤋᤠᤵᤑᤧ᤺ᤶᤒᤠ ᤆᤧᤶᤓᤴ ᤆᤥᤃᤢᤖᤥ॥ 8 ᤁᤖ ᤁᤧᤏᤢ᤹ᤒᤠ ᤔᤏᤠ᤺ᤸᤗᤧ ᤏᤢᤒᤠ ᤕᤠ᤺ᤶᤒᤰᤜᤠ᤹ ᤆᤥ᤺ᤰᤔᤠ ᤏᤡᤱᤘᤠ᤹ ᤆᤥᤃᤢᤖᤥ. ᤜᤧᤰᤁᤩᤠᤱ ᤂᤧᤸᤗᤧ ᤁᤢᤍᤥ᤺ᤵᤔᤠ ᤕᤠ᤺ᤶᤒᤰᤁᤣ ᤆᤰᤔᤧᤸᤗ᤹ᤀᤣ ᤆᤥᤃᤢᤀᤠᤱ ᤐᤳᤗᤥ॥ ᤔᤧᤴᤇᤢᤔᤠᤜᤠ᤹ ᤛᤡᤱᤛᤡᤱ ᤕᤧᤰᤕᤧᤰ ᤗ᤹ᤔᤠ 9 ᤋᤢᤰᤂᤣ ᤔᤧᤴᤈᤠᤀᤣ ᤁᤧᤕᤢᤱᤔᤠ ᤔᤧᤴᤇᤢᤔᤠᤛᤣ. ᤀᤠᤸᤗ ᤐᤥᤃᤧᤶᤔᤧ᤹ᤀᤠᤱ ᤀᤠᤱᤃᤠ᤹ ᤀᤠᤒᤠ᤺ᤴᤏᤡᤴ ᤏᤢᤖᤡᤰᤁᤠᤱ ᤂᤧᤵᤛᤧᤶᤔᤧ᤹ᤀᤥ॥ ᤏᤡᤱᤘᤠ᤹ ᤋᤢᤰᤂᤣ ᤔᤧᤴᤈᤠᤀᤣ ᤁᤧᤕᤢᤱᤔᤠ ᤔᤧᤴᤇᤢᤔᤠ ᤛᤠᤛᤣ. ᤀᤠᤱᤃᤠ᤹ ᤌᤣ ᤐᤠ᤺ᤳᤋᤢᤱ ᤂᤧᤴ ᤂᤧᤵᤛᤧᤶᤔᤧ᤹ᤀᤥ᥄ 10 ᤀᤠᤸᤗ ᤋᤱᤒᤣ᤹ ᤌᤡᤰᤏᤢ᤺ᤸᤗᤧ ᤀᤠᤈᤧ᤺ᤳᤇᤡᤰ ᤀᤣᤃᤠᤱ ᤂᤧᤏᤡ᤹ ᤏᤡᤱᤘᤠ᤹ ᤋᤢᤰᤂᤣ ᤔᤧᤴᤈᤠᤀᤣ ᤁᤧᤕᤢᤱᤔᤠᤜᤠ᤹ ᤁᤧᤕᤰᤂᤡᤖᤥ॥ ᤆᤧᤸᤗᤧᤰᤛᤣ᤹ ᤀᤡᤰᤋᤠᤵᤐᤡᤴ ᤛ᤹ᤀᤠᤱ ᤆᤧᤸᤗᤧᤰᤛᤣ᤹ᤀᤡᤸᤗᤧ ᤁᤢᤈᤠ᤹ᤀᤠᤱ ᤔᤧᤎᤥ᤺ᤰᤏᤧᤴᤗᤥ॥ 11 ᤁᤢᤏᤡᤱᤘᤠ᤹ ᤋᤢᤰᤂᤣ ᤔᤧᤴᤈᤠᤀᤣ ᤁᤧᤕᤢᤱᤔᤠ ᤔᤧᤴᤇᤢᤔᤠᤛᤣ. ᤕᤰᤂᤧᤶᤔᤧ᤹ᤀᤥ. ᤏᤡᤱᤘᤠ᤹ ᤏᤡ᤺ᤴᤎᤥᤀᤥ ᤁᤧᤕᤢᤱᤔᤠ ᤔᤧᤴᤇᤢᤔᤠ ᤛᤠᤛᤣ. ᤆᤡᤖᤡᤶᤗᤡᤶᤓ ᤕᤰᤛᤧᤶᤔᤧ᤹ᤀᤥ॥ ᤀᤠᤒᤠᤅᤣ ᤂᤡᤏᤡ᤹ ᤆᤠᤱᤜᤠ᤹ ᤑᤧᤴᤍᤧᤶᤔᤧ᤹ᤀᤥ. ᤜᤧᤰᤁᤩᤠᤱ ᤂᤧᤏᤡ᤹ ᤑ᤹ᤀᤡ ᤕᤢᤶᤔᤠᤍᤧᤴᤏᤥ ᤛᤠᤃᤡ ᤆᤠᤱ ᤆᤠᤰᤂᤠᤶᤔᤧ᤹ᤀᤥ॥ 12 ᤂᤡᤏᤡ᤹ ᤛᤱᤒᤵᤔᤧᤴ ᤜᤡᤵᤋᤧᤶᤔᤧ᤹ᤖ ᤜᤠᤒᤠᤶᤔᤧ᤹ᤀᤥ ᤌᤣᤀᤠᤱᤓᤧᤸᤗᤧ ᤛᤡᤖᤠ᤹ᤃᤧᤎᤠᤱᤒᤠ ᤀᤡᤰᤋᤠᤵᤜᤠ᤹ ᤏᤢ ᤁᤢᤈᤠ᤹ ᤁᤧᤒᤵᤐᤠ ᤆᤧᤸᤗᤧᤰᤛᤣᤸᤗᤧ ᤁᤢᤒᤢᤱᤜᤠ᤹ ᤂᤠᤵᤐᤢᤌᤩ᤺ᤱ ᤔᤧᤈᤥᤃᤢᤀᤠᤱ ᤏᤧᤖᤥ॥ 13 ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤋᤡᤱᤃᤪᤣᤰ ᤏᤢ ᤛᤣᤷᤍᤠ᤺ᤰᤔᤠ ᤁᤧᤗᤡᤱᤒᤠ ᤀᤡᤰᤋᤠᤵᤐᤡᤸᤗᤧ ᤗᤠᤃᤡ ᤜᤠᤒᤠᤶᤔᤧ᤹ᤀᤥ॥ ᤀᤥᤘᤠ. ᤛᤥᤛᤥᤳᤗᤖᤠᤱ ᤆᤥ᤺ᤰᤔᤠ ᤜᤡᤶᤜᤠ᤹ᤖᤧ ᤗᤠᤃᤡ ᤜᤧᤰᤁᤩᤠᤱ ᤏᤡᤱᤘᤠ᤹ ᤋᤠᤍᤠ ᤏᤡᤱᤘᤠ᤹ ᤐᤠ᤺ᤵᤐᤠ᤺ᤳ ᤆᤥ᤺ᤰᤔᤠ ᤐᤠᤱᤈᤢᤶᤔᤡᤸᤗᤧ ᤗᤠᤃᤡ ᤔᤧᤖᤡᤱ ᤌᤰᤋᤧᤶᤔᤧ᤹ᤀᤥ॥ 14 ᤜᤠᤱᤜᤡᤶᤔᤡᤴᤏᤠᤱ ᤔᤏᤠᤔᤧ᤺ᤴᤏᤣ ᤆᤡᤈᤡ ᤂᤰᤂᤰ ᤐᤥᤱᤗᤥ. ᤜᤕᤱ ᤁᤡᤸᤗᤡᤱ ᤁᤧᤒᤥᤱᤒᤠ ᤜᤠᤱᤐᤠᤱᤅᤥ ᤜᤠᤱᤕᤰ ᤏᤢ ᤆᤱᤜᤡᤶᤜᤠ᤹ᤀᤠᤱ ᤆᤡᤈᤡ ᤕᤧᤶᤕᤧᤶ ᤐᤥᤱᤗᤥ॥ ᤂᤧ᤹ᤕᤥ ᤋᤠᤶᤓᤢᤱᤒᤠ ᤌᤰᤛᤠ ᤀᤍᤱᤜᤠ᤹ ᤋᤠᤶᤍᤠᤶᤔᤠᤱ ᤋᤠᤰᤔᤧᤃᤴᤗᤥ. ᤂᤧᤒᤩᤠᤱ ᤔᤧᤸᤗᤢᤰᤜᤠ᤹ ᤆᤠᤔᤧᤖᤠᤶᤗᤥ॥ 15 ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤌᤠ᤺ᤱᤗᤠᤶ ᤀᤠᤏᤡ᤹ ᤛᤶᤎᤠᤱ ᤁᤢᤕᤠᤶᤛᤠᤶᤔᤡᤴ ᤐᤠᤱᤄᤢᤖᤥ॥ ᤜᤧᤰᤁᤩᤠᤱ ᤕᤧ᤺ᤱᤄᤠᤍᤧᤴᤏᤡᤴ ᤆᤠ ᤁᤧᤏᤢ᤹ᤒᤠ ᤐᤩᤠᤱᤛᤡ ᤐᤥᤱᤗᤥ ᤂᤧᤒᤩᤠᤱ ᤐᤩᤠᤱᤛᤡᤀᤥ ᤕᤖᤡᤰ ᤁᤢᤈᤠ ᤌᤥ᤺ᤰᤗᤥ॥ 16 ᤂᤧᤴ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥᤵᤐᤠ ᤕᤧ᤺ᤱᤄᤠᤍᤧᤴᤏᤥ ᤁᤢᤍᤥ᤺ᤵᤔᤠ ᤂᤠᤛᤧᤴ ᤐᤥᤱᤗᤥ. ᤜᤧᤰᤁᤩᤠᤱ ᤆᤠ ᤁᤧᤏᤢ᤹ᤒᤠ ᤀᤡᤰᤋᤠᤵ ᤐᤩᤠᤱᤛᤡᤀᤥ ᤛᤠᤶᤕᤥᤒᤠ ᤐᤠ᤺ᤴᤜᤠ᤹ ᤘᤠ᤹ᤖᤥ॥ 17 ᤛᤠᤶᤕᤥᤒᤠ ᤐᤠ᤺ᤴᤜᤠ᤹ᤖᤧ ᤏᤢ᤹ᤔᤠ ᤋᤠᤔᤠ ᤋᤠᤖᤢᤖᤥ. ᤜᤧᤰᤁᤩᤠᤱ ᤛᤠᤶᤕᤥᤒᤠ ᤐᤠ᤺ᤴᤜᤠ᤹ᤗᤠᤶ ᤂᤥᤃᤧᤍᤧᤵᤐᤠ ᤐᤠ᤺ᤴᤜᤠ᤹ ᤛᤍᤠᤍᤡᤱ ᤛᤏᤠᤖᤢᤱ ᤏᤢ ᤛᤧ᤺ᤵᤛᤡᤱᤔᤠ ᤐᤥᤱᤗᤥ॥ 18 ᤀᤠᤱᤃᤠ᤹ ᤀᤠᤔᤏᤠᤜᤠ᤹ ᤋᤢᤰᤂᤣ ᤔᤧᤴᤈᤠᤀᤣ ᤏᤡᤱᤘᤠ᤹ ᤏᤡ᤺ᤴᤎᤥᤀᤥ ᤔᤧᤘᤠ᤹ᤖᤥ. ᤀᤠᤛᤧ᤺ᤵᤛᤧ᤺ᤵᤐᤠ ᤜᤡᤶᤜᤠ᤹ᤀᤥ. ᤏᤢ ᤜᤕᤱ ᤁᤡᤸᤗᤡᤱ ᤔᤧᤶᤒᤥᤱᤔᤏᤠᤒᤠ ᤏᤠ᤺ᤶᤛᤡᤱᤔᤠᤍᤧᤴᤜᤠ᤹ᤀᤥ ᤔᤧᤕᤢᤱᤗᤥ॥ 19 ᤑ᤺ᤴ ᤌᤠᤛᤢᤀᤠᤱ ᤋᤠᤶᤓᤢᤱ ᤕᤠᤰᤗᤠ ᤗᤖᤧ᤺ᤱ ᤑᤖᤧ᤺ᤱ ᤛᤥ᤺ᤴᤍᤢᤖᤥ. ᤜᤧᤰᤁᤩᤠᤱ ᤁᤧᤖᤧᤰ ᤕᤧᤰᤕᤰᤁᤡᤴ ᤂᤠᤵᤐᤢᤌᤩ᤺ᤱ ᤆᤥᤃᤢᤖᤥ॥ 20 ᤜᤧᤰᤁᤣᤛᤠᤱ ᤁᤢᤈᤠ ᤜᤣ᤹ᤔᤠᤖᤧ ᤗᤠᤃᤡ ᤘᤧᤳᤋᤧᤛᤖᤧ ᤘᤜᤡᤳ ᤌᤠᤛᤢᤖᤥ. ᤀᤍᤱ ᤏᤢ ᤐᤡᤳᤜᤠ᤹ᤖᤧ ᤗᤠᤃᤡ ᤆᤠᤖᤠᤶᤔᤠᤍᤧᤴ ᤔᤧᤄᤥᤛᤢ ᤜᤧᤰᤁᤩᤠᤱ ᤁᤧᤖᤧᤰ ᤔᤧᤛ᤺ᤳᤗᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.