ᤕᤛᤤᤕᤠ 31 - LIFOTNT

ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤕᤖᤢᤛᤗᤧᤔ ᤕᤧᤰᤕᤰᤁᤡᤴ ᤛᤧ᤺ᤵᤋᤢ

¹ ᤀᤠᤓᤠ᤹ᤖᤧ ᤑᤠ᤹ᤀᤠᤱ ᤔᤡᤛᤪ ᤗᤠᤈᤣ᤹ᤀᤥ ᤁᤧᤒᤣ᤺ᤰᤐᤠᤜᤠ᤹ᤃ ᤔᤧᤈᤡ᤺ᤳᤋᤧ ᤔᤧᤛᤩᤧᤖᤥ᥄ ᤂᤧᤱᤜᤠ᤹ᤖᤧ ᤔᤡᤛᤪ ᤗᤠᤈᤣ᤹ᤀᤥᤒᤠ ᤕᤖᤡᤰ ᤀᤴᤜᤠ᤹. ᤀᤴᤗᤠᤎᤠᤜᤠ᤹ ᤜᤧᤰᤁᤩᤠᤱ ᤌᤰᤛᤢᤒᤠᤜᤠ᤹ᤖᤧ ᤋᤠᤱᤔᤧᤛᤧ᤺ᤵᤋᤡᤃᤧ ᤑᤠ᤹ᤀᤠᤱ ᤔᤧᤀᤡ᤺ᤳᤋᤢᤖᤥ॥ ᤁᤖ ᤀᤡᤛᤪᤠᤀᤡᤗᤒᤠ ᤛᤣᤛᤣᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤥ ᤏᤡᤱᤘᤠ᤹ ᤔᤧᤴᤕᤢᤰᤂᤢᤴᤗᤥ. ᤜᤧᤰᤁᤩᤠᤱ ᤂᤢᤏᤧ᤹ᤀᤥ ᤁᤢᤓᤠ᤹ᤀᤠᤱ ᤔᤧᤱᤃᤥ᤺ᤳᤋᤢᤴᤗᤥ॥

² ᤜᤧᤰᤁᤣᤛᤠᤱ ᤂᤢᤏᤧ᤹ᤃ ᤛᤡᤰᤁᤢᤶᤛᤠᤒᤠ ᤆᤥᤰᤗᤥ. ᤜᤧᤰᤁᤩᤠᤱ ᤂᤢᤏᤧ᤹ ᤔᤧᤰᤔᤠᤛᤡᤔᤠ ᤋᤠ᤺ᤵᤔᤠ ᤛᤢᤰᤋᤢᤖᤥ. ᤜᤶᤓᤩᤠᤱ ᤐᤠ᤺ᤳᤋᤢᤒᤠ ᤐᤠ᤺ᤴᤏᤡᤴ ᤕᤠᤱᤏᤠ ᤔᤧᤏᤢ᤺ᤰᤋᤢᤴ ᤔᤧᤍᤣ᤹ᤖᤢᤴᤗᤥ॥ ᤋᤠᤵᤑᤧ᤺ᤶᤒᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤜᤠ᤹ᤖᤧ ᤂᤢᤴᤇᤡ᤹ ᤜᤡᤶᤛᤕᤱ ᤏᤢ ᤗᤠᤕᤥ ᤗᤠᤛᤥᤳ ᤁᤧᤈᤥ᤺ᤰᤐᤠᤜᤠ᤹ ᤁᤢᤓᤠ᤹ ᤁᤧᤒᤡᤒᤠᤜᤠ᤹ ᤂᤢᤏᤧ᤹ ᤂᤢᤶᤍᤡᤱ ᤐᤡᤖᤢᤛᤡᤖᤥ॥

³ ᤁᤖ ᤔᤡᤛᤪᤡᤜᤠ᤹ᤃ ᤔᤏᤠᤛᤡᤖᤰ ᤏᤡᤱᤘᤠ᤹ᤑᤢᤔᤠᤱᤛᤡ ᤔᤣ᤺ᤴᤗᤥ. ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤀᤴᤜᤠ᤹ ᤏᤠᤛᤡᤃᤧᤴ ᤌᤰᤗᤠᤛᤡ. ᤕᤠᤶᤛᤠᤶᤛᤡ ᤔᤣ᤺ᤴᤗᤥ. ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤜᤢᤰᤁᤡᤴ ᤛᤴᤇᤢᤸᤗᤧ ᤂᤧᤱᤜᤠ᤹ ᤁᤢᤓᤠ᤹ ᤁᤧᤒᤡᤒᤧᤴ ᤁᤧᤱᤗᤥ. ᤜᤧᤰᤁᤩᤠᤱ ᤔᤧᤓᤠ᤹ᤖᤢᤒᤠᤴᤏᤠᤱ ᤜᤷᤈᤢ᤹ ᤆᤥ᤺ᤴᤗᤥ ᤂᤧᤒᤩᤠᤱ ᤏᤧᤵᤔᤠᤱ ᤌᤡᤰᤗᤧᤱᤗᤧ ᤔᤧᤰᤛᤡᤖᤥ॥

⁴ ᤍᤠᤱᤒᤧᤸᤗᤧ ᤀᤠᤱᤃᤠ᤹ ᤀᤰᤂᤣ ᤔᤧᤳᤋᤠᤱᤗᤥ. “ᤕᤶᤒᤠ ᤁᤣᤒᤠᤴ ᤛᤧᤖᤢᤒᤠ ᤛᤠᤀᤥ ᤜᤢ᤺ᤰᤗᤥ. ᤜᤧᤰᤁᤩᤠᤱ ᤐᤡᤳ ᤔᤧ᤺ᤴᤍᤠ ᤁᤧᤃᤵᤐᤠ ᤕᤶᤒᤠ ᤗᤢᤵᤜᤠ᤹ ᤀᤠᤰᤂᤩᤠᤖᤡᤰ ᤛᤠ᤹ᤖᤡᤰ ᤔᤧᤀ᤺ᤰ ᤔᤧᤓᤡ᤺ᤰᤛᤠᤱ ᤂᤧᤱᤜᤠ᤹ᤖᤧ ᤕᤱᤔᤠ ᤔᤧᤛᤧᤖᤢᤒᤠᤗᤠᤶ ᤁᤣᤒᤠᤴ ᤕᤱᤔᤠ ᤔᤧᤛᤡᤏᤧᤸᤗᤥ— ᤜᤧᤰᤁᤣᤗ᤹ᤖᤡᤰᤁᤣ ᤛᤡᤕᤥᤏ ᤁᤥ᤺ᤰᤔᤠᤴ ᤏᤢ ᤂᤧᤸᤗᤧ ᤁᤢᤓᤠᤱᤈᤱᤜᤠ᤹ᤀᤥ ᤌᤱ ᤆᤥ᤺ᤰᤛᤧ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤠᤴ ᤕᤢᤖᤥ॥

⁵ ᤐᤢᤜᤠ᤹ᤖᤧ ᤂᤢᤴᤇᤡ᤹ ᤜᤠᤵᤐᤡᤴ ᤛᤧ᤺ᤵᤔᤠᤖᤧ ᤗᤠᤃᤡ ᤁᤒᤪᤡᤱ ᤔᤧᤒᤧᤀᤠᤱ ᤔᤧᤘᤠ᤹ᤒᤠ ᤜᤧᤰᤁᤣᤀᤣ ᤀᤠᤱᤃᤠ᤹ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤕᤖᤢᤛᤗᤧᤔ ᤕᤧᤰᤕᤰᤁᤡᤴ ᤁᤶᤒᤪᤠᤱ ᤔᤧᤳᤋᤢᤱᤗᤥ॥ ᤂᤧᤴ ᤋᤠᤱᤛᤧ᤺ᤵᤋᤢᤱ. ᤜᤧᤰᤁᤩᤠᤱ ᤂᤧᤴ ᤏᤠᤅᤢᤱ ᤌᤣ᤺ᤰᤋᤢᤱᤗᤥ. ᤂᤧᤴ ᤗᤠᤶ ᤐᤥᤱᤅᤠᤖ ᤐᤣ᤺ᤰᤁᤠ ᤂᤧᤒᤩᤠᤱ ᤂᤧᤴ ᤆᤥ᤺ᤰᤕᤢᤶᤓᤥ ᤐᤡᤖᤢᤱᤗᤥ॥”

⁶ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢ. “ᤀᤡᤛᤪᤠᤀᤡᤗᤒᤠ ᤔᤏᤠᤛᤣ. ᤀᤠᤱᤃᤠ᤹ ᤀᤠᤍᤰᤗᤧᤱᤘᤠᤀᤥ ᤂᤧᤏᤡ᤹ ᤕᤶᤒᤠ ᤗᤠᤕᤥ ᤁᤧᤈᤥᤃᤢᤶᤔᤠᤱ ᤘᤠ᤹. ᤀᤠᤸᤗ ᤀᤠᤱᤃᤠ᤹ ᤗᤧᤵᤔᤠᤱ ᤜᤡᤀᤠᤛᤡᤶᤔᤧ᤹॥

⁷ ᤌᤣᤀᤠᤱᤓᤧᤸᤗᤧ ᤀᤠᤸᤗ ᤁᤶᤓᤍᤠᤱᤒᤠ ᤕᤧᤴ ᤋᤠᤖ ᤐᤳ. ᤂᤧᤏᤡ᤹ ᤁᤧᤖᤧᤰᤗᤧ ᤀᤠᤒᤠᤅᤣ ᤗᤠᤕᤥᤒᤠ ᤜᤢᤰᤁᤡᤸᤗᤧ ᤁᤧᤈᤥᤃᤢᤶᤛᤡᤶᤒᤠ ᤛᤠᤶᤔᤩᤠᤱ ᤕᤢᤵᤐᤠ ᤏᤠᤘᤠᤀᤡᤳᤗᤠᤜᤠ᤹ ᤗᤠᤵᤐᤢᤱ ᤁᤧᤍᤣᤛᤢᤶᤛᤡᤶ. ᤂᤧᤱᤜᤠ᤹ ᤁᤧᤏᤠ᤹ᤖᤢᤶᤛᤡᤶ॥

⁸ “ᤀᤛ᤻ᤛᤢᤖᤒᤠ ᤔᤏᤠᤜᤠ᤹ ᤋᤠᤓᤣ᤺ᤸᤗᤧ ᤔᤧᤈᤩᤧᤵᤋᤢ ᤔᤧᤛᤩᤧᤖᤢᤛᤡᤖᤥ. ᤁᤖ ᤔᤏᤠᤖᤧ ᤔᤧᤕᤠᤅᤢᤒᤠ ᤋᤠᤓᤣᤗᤠᤶᤒᤠ ᤔᤣ᤺ᤴᤗᤥ॥ ᤜᤠᤒᤠ ᤋᤠᤓᤣ᤺ᤸᤗᤧ ᤂᤧᤱᤜᤠ᤹ ᤔᤧᤔᤧᤰᤗᤥ. ᤁᤖ ᤔᤧᤴᤇᤠᤶ ᤕᤠᤵᤔᤡ ᤏᤠᤛᤡᤃᤧᤴ ᤌᤰᤗᤠᤀᤥ ᤔᤣ᤺ᤴᤗᤥ॥ ᤂᤧᤴ ᤋᤠᤓᤣᤴ ᤔᤧᤏᤡᤛᤢᤀᤠᤱ ᤂᤧᤱᤜᤠ᤹ ᤔᤧᤄᤧᤳᤇᤡᤱ ᤔᤧᤒᤣ᤺ᤰᤗᤥ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤌᤠᤱᤒᤧᤴ ᤔᤧᤴᤇ᤻ᤕᤠ ᤛᤠᤜᤠ᤹ ᤕᤥᤃ᤻ᤒᤠ ᤕᤥ᤺ᤃ᤻ᤔᤠ ᤔᤧᤈᤥᤃᤢᤛᤡᤖᤥ॥

⁹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤜᤠᤱᤕᤰᤁᤡᤴ ᤁᤡᤔᤠ ᤕᤱᤔᤠᤖᤧ ᤆᤥᤃᤢᤸᤗᤧ ᤗᤢ᤺ᤴᤗᤥ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤌᤰᤔᤥᤒᤠᤜᤠ᤹ᤖᤧ ᤌᤱᤅᤡᤸᤗᤧ ᤏᤡᤛᤠᤏ ᤔᤧᤏᤡᤛᤢᤀᤠᤱ ᤀᤠᤸᤗ ᤀᤠᤰᤂᤣᤏᤣ ᤆᤥ᤺ᤰᤔᤠ ᤐᤠ᤺ᤵᤔᤠ ᤔᤧᤗ᤹ᤖᤥ॥” ᤂᤧᤴ ᤔᤡᤴ ᤛᤡᤕᤥᤏ ᤁᤥ᤺ᤰᤔᤠᤀᤥ ᤏᤢ ᤔᤡᤎᤢᤱᤍᤡᤱ ᤔᤡᤖᤠ᤺ᤰᤁᤡᤴ ᤕᤖᤢᤛᤗᤧᤔ ᤕᤧᤰᤕᤰᤁᤥ ᤕᤢᤱ ᤑᤠ᤹ᤀᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤖᤥ॥