ᤕᤛᤤᤕᤠ 30 - LIFOTNTᤔᤡᤛᤪ ᤗᤠᤈᤣ᤺ᤴᤏᤢ ᤆᤥ᤺ᤰᤔᤏᤠᤒᤠ ᤜᤏᤧᤒᤠ ᤏᤠᤍᤱ 1 ᤕᤜᤘᤣ ᤍᤠᤱᤒᤧᤸᤗᤧ ᤀᤢᤘᤠ ᤆᤥᤃᤢ. “ᤆᤡ᤺ᤳᤋᤠᤱᤗᤰ ᤛᤩᤧᤖᤥ᥄ ᤂᤧᤴ ᤐᤠᤴ ᤔᤧᤱᤄᤧᤶᤔᤏᤠᤒᤠ ᤛᤠᤀᤣᤜᤠ᤹ᤃ. ᤂᤧᤱᤜᤠ᤹ᤖᤧ ᤕᤠ᤺ᤶᤒᤰᤜᤠ᤹ ᤆᤥ᤺ᤰᤔᤠ ᤔᤧᤃᤥ᤺ᤳᤋᤢᤖᤥ ᤂᤧᤴ ᤀᤠᤱᤃᤠ᤹ᤀᤡᤴ ᤔᤣ᤺ᤴ. ᤏᤠᤍᤱ ᤔᤧᤈᤥᤃᤢᤖᤥ. ᤁᤖ ᤀᤠᤕᤠᤶᤛᤠᤶ ᤁᤢᤀᤡᤛᤡᤰ ᤔᤧᤴᤈᤥᤃᤢᤴᤗᤥ. ᤗᤠᤕᤥ ᤛᤶᤎᤠᤱ ᤗᤠᤕᤥ ᤔᤧᤈᤥᤃᤢᤖᤥ॥ 2 ᤀᤠᤱᤃᤠ᤹ ᤛᤣ᤺ᤴᤔᤧᤴᤍᤥᤀᤣ ᤂᤧᤱᤜᤠ᤹ ᤔᤡᤛᤪ ᤗᤠᤈᤣ᤹ ᤔᤧᤒᤣ᤺ᤰᤗᤥ. ᤑᤠᤖᤥ ᤜᤠᤱᤅᤡᤸᤗᤧ ᤏᤠᤅᤡᤃᤧᤖ ᤑᤠ᤹ᤀᤠᤱ ᤂᤧ᤹ᤕᤥ ᤔᤧᤗᤥ᤺ᤰᤗᤥ. ᤔᤡᤛᤪ ᤗᤠᤈᤣ᤹ᤀᤥ ᤛᤧ᤺ᤵᤛᤡᤱᤛᤧ ᤔᤧᤎᤠᤛᤡᤱᤗᤥ॥ 3 ᤁᤖ ᤑᤠᤖᤥᤸᤗᤧ ᤂᤧᤏᤡ᤹ ᤏᤠᤱᤔᤠ ᤌᤣ᤺ᤰᤔᤠ ᤁᤧᤴᤇᤢᤰᤋᤡᤴᤏᤠᤱ ᤂᤡᤏᤡ᤹ ᤏᤠᤎᤠᤖᤥ. ᤜᤧᤰᤁᤩᤠᤱ ᤔᤡᤛᤪ ᤗᤠᤈᤣ᤹ᤒᤠ ᤛᤧ᤺ᤵᤛᤡᤱᤔᤠᤴ ᤔᤧᤰᤁᤠᤱ ᤂᤡᤏᤡ᤹ ᤛᤡᤰᤑᤧᤰᤗᤥ॥ 4 ᤜᤧᤰᤁᤣᤛᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤛᤢᤜᤠᤱᤕᤢᤰᤐᤠᤜᤠ᤹ ᤔᤡᤛᤪᤒᤠ ᤕᤧᤰᤕᤰ ᤛᤥᤀᤏᤀᤥ ᤔᤧᤘᤠ᤹ᤖᤥ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤜᤠᤱᤗᤠᤀᤡᤱᤗᤠᤒᤠᤜᤠ᤹ ᤜᤠᤏᤣᤛᤀᤥ ᤔᤧᤍᤩᤧᤀᤠᤱ ᤔᤧᤘᤠ᤹ᤖᤥ. 5 ᤀᤰᤋᤱᤒᤠ ᤕᤠᤵᤔᤡ ᤑᤠ᤹ᤔᤠ ᤔᤧᤴᤇᤢᤰᤔᤏᤠᤒᤠ ᤛᤢᤘᤠᤱᤜᤠ᤹ᤖᤧ ᤔᤧᤈᤥᤃᤢᤸᤗᤧ ᤂᤧᤱᤜᤠ᤹ ᤁᤧᤖᤧᤰ ᤏᤠᤎᤠᤔᤥ ᤔᤧᤎᤠᤖᤥ. ᤂᤧᤱᤜᤠ᤹ᤖᤧ ᤀᤡᤴᤎᤠ᤺ᤰ ᤏᤢ ᤁᤢᤓᤠ᤹ ᤁᤧᤒᤥᤱᤒᤠ ᤌᤣᤀᤠᤱ ᤋᤠ᤺ᤵᤔᤠ ᤔᤧᤴᤇᤢᤰᤋᤢᤴᤗᤥ. ᤁᤖ ᤛᤠᤶᤎᤠᤔᤠ ᤏᤢ ᤆᤠ᤺ᤳᤌᤡ ᤐᤣ᤺ᤰᤔᤠ ᤐᤠ᤺ᤴᤗᤰ ᤔᤧᤍᤠᤖᤢᤖᤥ॥” 6 ᤏᤣᤃᤣᤒ ᤗᤠᤈᤣ᤹ᤒᤠ ᤌᤰᤛᤠᤜᤠ᤹ᤖᤧ ᤕᤠ᤺ᤶᤒᤣᤀᤥ ᤔᤠᤱᤏᤡᤱᤘᤠ᤹ᤐᤠᤴ— ᤁᤣᤒᤠᤸᤗᤧ ᤁᤢᤄᤠ ᤁᤧᤏᤧᤒᤠ. ᤀᤛᤣ᤺ᤰ ᤏᤢ ᤁᤢᤏᤡᤱ ᤁᤧᤕᤠᤰᤐᤠ ᤁᤧᤒᤧᤒᤠ ᤀᤛᤣ᤺ᤰ ᤁᤧᤗ᤺ᤶᤒᤠ. ᤋᤢᤰᤔᤠ ᤏᤢ ᤛᤡᤔᤠ ᤁᤧᤘᤠ᤹ᤒᤠ ᤗᤠᤈᤣ᤹ᤗᤠᤶ ᤐᤥᤱᤔᤠᤖ ᤜᤠᤱᤗᤠᤀᤡᤱᤒᤠᤜᤠ᤹ ᤗᤠᤱᤄᤣ᤺ᤰᤔᤠ ᤁᤧᤒᤥᤱᤒᤠ ᤘᤠ᤹ᤖᤥ॥ ᤕᤠᤵᤔᤡ ᤑᤠ᤹ᤔᤠ ᤔᤧᤴᤇᤢᤰᤔᤏᤠᤒᤠ ᤛᤢᤘᤠᤱᤜᤠ᤹ ᤂᤢ᤹ᤔᤠᤛᤡᤖᤧ ᤗᤠᤃᤡ ᤀᤠᤒᤠᤅᤣ ᤂᤢᤴᤇᤡ᤹ ᤀᤍᤱ ᤏᤢ ᤀᤢᤔᤣᤜᤠ᤹ ᤀᤡᤔᤧᤸᤗᤢᤱᤒᤠ ᤛᤢᤱᤜᤠ᤹ ᤔᤧᤃᤢ᤺ᤳᤋᤢ ᤔᤧᤍᤣ᤹ᤖᤢᤛᤡᤖᤥ॥ 7 ᤔᤡᤛᤪ ᤗᤠᤈᤣ᤺ᤸᤗᤧ ᤁᤢᤓᤠ᤹ᤀᤡᤱᤃ ᤁᤢᤛᤢᤶ ᤔᤧᤴᤍᤶᤔᤏᤠᤒᤠ ᤆᤥᤰᤗᤥ. ᤂᤧᤸᤗᤧᤆᤥᤃᤢᤸᤗᤧ ᤀᤠᤱᤃᤠ᤹ ᤂᤧᤴ ᤖᤠᤜᤠᤒ— ᤌᤣᤀᤠᤱ ᤀᤠᤶᤔᤧᤳᤏᤧᤶᤒᤠ ᤕᤶᤒᤠ ᤀᤛᤣ᤺ᤰ ᤔᤧᤳᤋᤢᤱᤅᤠᤱ ᤘᤠ᤹ᤖᤥ॥ ᤐᤠᤴ ᤔᤧᤱᤄᤧᤶᤏᤠᤒᤠ ᤔᤏᤠᤜᤠ᤹ 8 ᤀᤠᤸᤗ ᤁᤴ ᤐᤠ᤺ᤴᤜᤠ᤹ ᤛᤍᤠᤍᤡᤱᤗᤧ ᤗᤠᤃᤡ ᤛᤠᤂᤡ ᤐᤥᤱᤗ ᤑᤠ᤹ᤀᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤀᤠᤱᤃᤠ᤹ ᤗᤳᤇᤠ ᤗᤢᤱᤛᤠᤵᤐᤥ ᤗᤰᤋᤧ᤹ᤀᤥ. ᤛᤠᤵᤁᤡᤳᤋᤥ ᤂᤧᤴ ᤛᤠᤵᤋᤧ᤹ ᤔᤧᤳᤋᤠᤱᤗᤥ॥ 9 ᤁᤴᤜᤠ᤹ᤃ ᤐᤡᤑᤩᤢᤱᤒᤠ ᤏᤢ ᤀᤡᤱᤗᤧᤰ ᤁᤧᤒᤠ᤺ᤵᤐᤠ ᤔᤏᤠᤛᤡᤖᤥ. ᤀᤡᤃᤪ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤏᤡᤛᤠᤶ ᤔᤧᤱᤄᤧᤶᤔᤏᤠᤒᤠ ᤕᤠᤵᤔᤡᤛᤡᤖᤥ॥ 10 ᤛᤢᤑᤥ ᤁᤧᤏᤡᤒᤠᤜᤠ᤹ ᤂᤧᤱᤜᤠ᤹ᤖᤧ ᤔᤧᤔᤧᤳᤋᤢᤛᤡᤖᤥ. “ᤀᤠᤸᤗᤀᤠᤱᤎᤥ ᤛᤢᤑᤥ ᤔᤧᤏᤡᤛᤧᤶᤔᤡᤴᤏᤧ᤹ᤀᤥ᥄” ᤂᤧᤱᤜᤠ᤹ᤖᤧ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ ᤔᤧᤔᤧᤳᤋᤢᤛᤡᤖᤥ. “ᤁᤢᤍᤥ᤺ᤵᤔᤠ ᤐᤠ᤺ᤴᤜᤠ᤹ ᤛᤢᤑᤥᤗᤠᤶ ᤀᤠᤏᤡᤃᤣ ᤀᤠᤶᤔᤧᤳᤋᤧᤴᤏᤧ᤹ᤀᤥ᥄ ᤀᤠᤏᤡᤃᤣ ᤛᤡᤖᤠ᤹ᤃᤧᤎᤠᤱᤒᤠ ᤐᤠ᤺ᤴᤜᤠ᤹ ᤀᤠᤈᤧᤰᤋᤧ᤹ᤀᤥ. ᤔᤡᤰᤗᤧ᤺ᤱᤔᤠ ᤐᤠ᤺ᤴᤜᤠ᤹ ᤐᤠᤳᤋᤠᤶᤔᤧ᤹ᤀᤥ॥ 11 ᤁᤴ ᤗᤠᤶᤔᤡᤴ ᤗᤧᤖᤧᤶᤔᤧ᤹. ᤁᤴ ᤔᤠᤖᤠᤶᤔᤡᤴ ᤔᤧᤏᤠ᤺ᤳᤋᤧᤶᤔᤡᤴᤏᤧ᤹ᤀᤥ. ᤜᤧᤰᤁᤩᤠᤱ ᤀᤡᤛᤪᤠᤀᤡᤗᤒᤠ ᤛᤣᤛᤣᤒᤠ ᤏᤡᤱᤘᤠ᤹ᤑᤢᤔᤠᤱᤗᤠᤶ ᤁᤧᤛᤠᤰᤐᤠ ᤐᤠᤴ ᤀᤠᤏᤡᤃᤣ ᤌᤣᤀᤠᤱ ᤂᤧᤶᤔᤠ ᤔᤧᤏᤠ᤺ᤰᤋᤢᤶᤒᤧᤴᤗᤥ॥” 12 ᤁᤸᤗᤧᤆᤥᤃᤢᤸᤗᤧ ᤀᤡᤛᤪᤠᤀᤡᤗᤒᤠ ᤛᤣᤛᤣᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤠ᤺ᤳᤋᤢᤖᤥ. “ᤂᤧᤏᤡ᤹ ᤁᤴ ᤀᤡᤱᤄᤱᤅᤡᤴ ᤂᤧᤶᤔᤠ ᤁᤧᤏᤠ᤹ᤖᤢᤶᤔᤠᤱ ᤁᤧᤘᤕᤡᤖᤥ. ᤜᤧᤰᤁᤩᤠᤱ ᤔᤏᤠ ᤜᤡᤵᤔᤠ ᤏᤢ ᤀᤡᤱᤗᤧᤰ ᤐᤠ᤺ᤴᤏᤥ ᤋᤠ᤺ᤰᤐᤥ ᤁᤧᤈᤥᤃᤢᤶᤔᤠᤱ ᤁᤧᤘᤕᤡᤖᤥ॥ 13 ᤁᤸᤗᤧᤆᤥᤃᤢᤸᤗᤧ ᤁᤴ ᤗᤠᤕᤥᤴ ᤂᤧᤏᤡ᤹ ᤗᤠᤃᤡ ᤏᤠ ᤆᤶᤒᤧᤳ ᤁᤧᤗ᤺ᤶᤒᤠᤀᤠᤱ ᤔᤰᤌᤠᤔᤠ ᤐᤣ᤺ᤰᤔᤠ ᤁᤧᤈᤥ᤺ᤰᤐᤠ ᤗᤳᤇᤠ ᤁᤣ᤺ᤶᤒᤠ ᤗᤢᤱᤎᤠᤰ ᤜᤧᤰᤋᤱᤒᤠ ᤆᤥᤰᤗᤥ. ᤂᤧᤴ ᤛᤵᤑᤠᤎᤡᤰᤗᤧᤛᤠ ᤌᤡᤰᤗᤧᤱᤗᤧ ᤜᤷᤈᤢ᤹ ᤆᤥ᤺ᤴᤗᤥ॥ 14 ᤑᤢᤈᤡᤰᤁᤧᤴ ᤑᤕ᤺ᤵᤑᤕ᤺ᤵ ᤕ᤺ᤶᤔᤏᤠᤒᤠ ᤜᤧᤰᤁᤣᤀᤣ. ᤂᤧᤴ ᤁᤢᤄᤧᤸᤗᤧᤰ ᤁᤢᤄᤧᤸᤗᤧᤰ ᤐᤥᤱᤅᤠᤱ ᤕ᤺ᤵᤗᤥ. ᤂᤧᤱᤃ ᤔᤡᤜᤠ᤺ᤳᤗᤢᤱᤅᤥ ᤔᤡ ᤗ᤺ᤵᤔᤠ ᤀᤡᤃᤪ ᤘᤃᤧᤱᤅᤥ ᤆᤫᤠ᤺ᤳ ᤐᤠ᤺ᤰᤔᤠ ᤁᤢᤄᤧᤸᤗᤧᤰ ᤌᤡᤰᤁᤠᤱ ᤔᤧᤕᤠ᤺ᤰᤏᤧᤸᤗᤥ॥” 15 ᤕᤜᤘᤣ ᤍᤠᤱᤒᤠ. ᤀᤡᤛᤪᤠᤀᤡᤗᤒᤠ ᤛᤣᤛᤣᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤰᤂᤣ ᤐᤠ᤺ᤳᤋᤢᤖᤥ— “ᤜᤡᤶᤔᤠ ᤏᤢ ᤏᤠ᤺ᤶᤛᤡᤱᤔᤥ ᤂᤧᤏᤡ᤹ ᤛᤧᤴᤗᤵ ᤁᤧᤄᤥᤛᤢᤶᤗᤥ॥ ᤆᤡᤈᤡ ᤕᤧᤶᤕᤧᤶ ᤏᤢ ᤏᤡᤱᤘᤠ᤹ᤑᤢᤔᤠᤱᤅᤥ ᤏᤡᤱᤘᤠ᤹ ᤁᤧᤕᤢᤰᤂᤢᤶᤔᤡᤸᤗᤧ ᤔᤢᤰᤛᤠᤶ ᤁᤧᤄᤥᤛᤢᤶᤗᤥ. ᤁᤖ ᤂᤧᤏᤡ᤹ᤃ ᤜᤧᤰᤁᤣ ᤆᤥ᤺ᤰᤔᤠ ᤁᤧᤴᤍᤧᤴᤍᤡᤴᤗᤥ॥ 16 ᤂᤧᤏᤡ᤹ ᤁᤧᤒᤠ᤺ᤳᤋᤢᤶ. ‘ᤔᤣ᤺ᤴᤏᤠ. ᤀᤠᤏᤡᤃᤧᤃ ᤀᤴᤜᤠ᤹ ᤕᤢᤰᤋᤢᤶᤛᤡᤶᤒᤧᤀᤠᤱ ᤂᤧᤳᤋᤠᤛᤡᤃᤧᤖᤥ॥’ ᤁᤸᤗᤧᤆᤥᤃᤢᤸᤗᤧ ᤂᤧᤏᤡ᤹ ᤁᤧᤄᤧᤳᤋᤠᤛᤡᤖᤀᤣ ᤐᤥᤱᤗᤥ᥄ ᤂᤡᤏᤡ᤹ ᤁᤧᤒᤠ᤺ᤳᤋᤢᤶ. ‘ᤀᤠᤏᤡᤃᤣ ᤜᤠᤖᤠ ᤁᤧᤗᤥ᤺ᤰᤐᤠ ᤀᤴᤜᤠ᤹ ᤕᤢᤰᤋᤢᤶᤛᤡᤶᤒᤧᤀᤠᤱ ᤂᤧᤳᤋᤠᤛᤡᤃᤧᤖᤥ॥’ ᤁᤸᤗᤧᤆᤥᤃᤢᤸᤗᤧ ᤂᤧᤏᤡ᤹ ᤁᤧᤏᤠ᤺ᤵᤐᤠᤜᤠ᤹ ᤂᤡᤏᤡ᤹ᤏᤢ᤺ᤸᤗᤧ ᤔᤧᤈᤠ᤺ᤳᤗᤥ॥ 17 ᤗᤳᤇᤠ ᤔᤏᤠᤎᤡᤰᤗᤧ ᤁᤧᤓᤧ᤺ᤰᤋᤡᤸᤗᤧ ᤜᤧᤴᤇᤡᤱ ᤌᤡᤰ ᤁᤧᤄᤧᤳᤋᤠᤛᤡᤖᤥ. ᤅᤠᤛᤡ ᤔᤏᤠᤖᤧ ᤁᤧᤶᤓᤧ᤺ᤰᤋᤡᤸᤗᤧ ᤂᤧᤏᤡ᤹ ᤁᤧᤖᤧᤰ ᤁᤧᤄᤧᤳᤋᤠᤛᤡ ᤁᤧᤒᤣᤃᤡᤖᤥ॥ ᤜᤧᤰᤁᤩᤠᤱ ᤂᤧᤏᤡ᤹ᤃ ᤌᤧᤃᤢ ᤆᤱᤎᤥ ᤏᤡᤛᤠ᤺ᤸᤗᤧ ᤁᤢᤗᤠ᤺ᤴᤏᤠᤱᤎᤥ ᤂᤧᤏᤡ᤹ ᤌᤰᤛᤢᤒᤠᤜᤠ᤹ᤖᤧ ᤂᤢᤴᤇᤡ᤹ ᤌᤣᤀᤠᤱ ᤔᤧᤕᤠ᤺ᤰᤏᤧᤴᤗᤥ॥” 18 ᤜᤧᤰᤁᤣᤛᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤂᤧᤏᤡ᤹ ᤗᤢᤱᤔᤠ᤹ ᤋᤢᤰᤔᤠ ᤁᤢᤏᤡᤱᤘᤠ᤹ ᤘᤠ᤹ᤖᤥ. ᤂᤧᤏᤡ᤹ ᤏᤢᤖᤡᤰ ᤔᤧᤳᤇᤧ ᤂᤢᤏᤧ᤹ ᤔᤢᤳᤌᤪᤡᤰ ᤐᤥ᤺ᤰᤗᤥ॥ ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤠᤱᤃ ᤁᤢᤍᤥ᤺ᤵᤔᤠ ᤂᤠᤛᤧᤴᤗᤥ᤺ᤶᤒᤠ ᤏᤡᤱᤘᤠ᤹ᤑᤢᤔᤠᤱᤗᤥ ᤂᤢᤏᤧ᤹ ᤁᤢᤗᤠᤶ ᤀᤥᤃᤧᤔᤧᤵᤐᤠ ᤁᤧᤖᤧᤰ ᤔᤢ᤹ᤀᤡᤛᤠᤒᤠᤛᤡᤖᤥ॥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤏᤠᤜᤠ᤹ ᤜᤠᤱᤘᤠᤃᤧᤴ ᤔᤢ᤹ᤀᤡᤛᤠᤶ ᤐᤡᤖᤢᤛᤡ᤹ 19 ᤕᤖᤢᤛᤗᤧᤔ ᤁᤧᤕᤢᤱᤒᤠ ᤛᤡᤕᤥᤏᤒᤠ ᤔᤏᤠᤛᤣ. ᤀᤠᤸᤗ ᤂᤧᤏᤡ᤹ ᤕᤠᤶᤔᤥ ᤁᤧᤴᤜᤠᤒᤡᤴ॥ ᤂᤧᤏᤡ᤹ ᤀᤠᤓᤠ᤹ᤖᤧ ᤑᤠ᤹ᤀᤠᤱ ᤁᤧᤜᤠᤒᤡᤒᤠᤴ ᤂᤧᤵᤛᤢᤀᤠᤱ ᤂᤢᤏᤧ᤹ ᤀᤠᤰᤂᤩᤠᤖᤡᤰ ᤛᤠ᤹ᤖᤡᤰ ᤗᤢᤱᤔᤠ᤹ ᤀᤠᤍᤢᤰᤋᤢᤰᤐᤠ ᤆᤥᤰ᥄ ᤂᤧᤏᤡ᤹ ᤁᤧᤓᤠᤰᤋᤢᤶᤒᤠ ᤐᤣᤗᤡᤴ ᤂᤢᤏᤧ᤹ ᤂᤧᤵᤛᤢᤏᤢᤔᤧ᤺ᤴᤏᤣ ᤂᤢᤏᤧ᤹ ᤏᤢᤃᤵ ᤁᤧᤒᤡᤖᤡ᤹॥ 20 ᤍᤠᤱᤒᤧᤸᤗᤧ ᤋᤢᤰᤂᤣ ᤗᤠᤰᤂᤣᤖᤧ ᤕᤧᤶᤜᤠ᤹ ᤋᤢᤶᤔᤠ ᤁᤧᤒᤠᤱᤄᤡᤛᤠᤱ ᤂᤧᤏᤡ᤹ ᤏᤡᤛᤠᤶ ᤜᤢ᤹ᤛᤧ ᤂᤧᤏᤡ᤹ᤏᤢᤀᤣ ᤘᤠ᤹॥ ᤜᤧᤰᤁᤩᤠᤱ ᤀᤠᤸᤗᤀᤠᤱᤎᤥ ᤂᤧᤏᤡ᤹ ᤂᤢᤏᤧ᤹ ᤁᤥ᤺ᤵᤔᤠ ᤐᤖᤔᤧᤈᤥ᤺ᤰᤏᤧᤴ॥ 21 ᤂᤧᤏᤡ᤹ ᤆᤢᤰᤘᤠ ᤗᤧᤵᤛᤠᤱ ᤀᤡᤃᤪ ᤑᤧᤱᤘᤠ ᤗᤧᤵᤛᤠᤱ ᤁᤧᤎᤠᤀᤠᤛᤡᤸᤗᤧ ᤂᤧᤏᤡ᤹ ᤏᤧᤰᤂᤥ᤹-ᤏᤧᤓᤠᤰᤁᤡᤸᤗᤧ ᤀᤣᤃᤠᤱ ᤗᤧᤵᤔᤠᤱᤗᤠᤶᤒᤠ ᤀᤰᤂᤣ ᤁᤧᤗ᤹ᤒᤠ ᤀᤡᤰᤗᤠ ᤁᤧᤄᤧᤵᤛᤢᤶ. “ᤗᤠᤶ ᤜᤠᤒᤠ ᤁᤴᤗᤥ. ᤀᤠᤶᤓᤠ ᤁᤴ ᤗᤠᤶ ᤗᤠᤱᤄᤣᤃᤡᤴᤏᤧ᤹॥” 22 ᤂᤧᤒᤩᤠᤱ ᤁᤧᤗᤰᤋᤢᤶᤔᤠᤱ ᤕᤢᤵᤐᤠ᤺ᤸᤗᤧ ᤁᤧᤛᤢ᤺ᤵᤋᤢᤶᤒᤠ ᤂᤧᤏᤡ᤹ ᤔᤠᤱᤜᤠ᤹ ᤏᤢ ᤂᤧᤏᤡ᤹ ᤛᤠᤶᤔᤩᤠᤱ ᤏᤠᤘᤠᤀᤡᤳᤗᤠᤜᤠ᤹ ᤀᤠᤛᤢᤳᤌᤥ ᤁᤧᤈᤥᤃᤢᤶᤛᤡᤶ॥ ᤂᤧᤱᤜᤠ᤹ ᤂᤧᤏᤡ᤹ ᤛᤡᤶ ᤘᤠᤜᤵᤔᤠ ᤀᤠᤛᤢᤳᤌᤥ ᤆᤡᤖᤡᤰ ᤁᤢᤛᤡᤱ ᤗᤠᤵᤁᤧᤍᤣᤛᤢᤶ. ᤜᤧᤰᤁᤩᤠᤱ ᤂᤧᤱᤜᤠ᤹ ᤂᤧᤏᤡ᤹ ᤀᤰᤂᤣ ᤁᤧᤔᤧᤳᤋᤢᤶᤛᤡᤶ. “ᤏᤠᤏᤠᤰ ᤐᤣᤃᤧᤶᤔᤧ᤹᥄” 23 ᤂᤠᤶᤒᤠᤱᤅᤥ ᤂᤧᤏᤡ᤹ ᤁᤧᤜᤣ᤹ᤖᤢᤶᤒᤠ ᤕᤠ᤹ᤖᤡ᤺ᤶᤒᤠᤸᤗᤧ ᤗᤠᤃᤡ ᤂᤢᤏᤧ᤹ ᤘᤜᤡᤳ ᤌᤠᤛᤢ ᤁᤧᤒᤡᤖᤡ॥ ᤂᤠᤶᤒᤣ᤺ᤰᤁᤥ ᤁᤧᤗᤡᤱᤒᤠ ᤁᤢᤈᤠᤴ ᤐᤈᤠ᤹ᤆᤠ᤹ᤀᤠᤱ ᤕᤖᤡᤰ ᤁᤢᤈᤠ᤹ ᤌᤥᤰ॥ ᤂᤧᤴ ᤕᤧᤴᤏᤥ ᤂᤧᤏᤡ᤹ ᤐᤡᤳᤜᤠ᤹ ᤋᤠᤶᤍᤠᤶᤒᤠ ᤆᤠᤖᤠᤶᤔᤠᤍᤧᤴᤏᤥ ᤆᤠᤔᤧᤖᤠᤶ॥ 24 ᤂᤧᤏᤡ᤹ ᤐᤩᤠᤱᤛᤡᤀᤥ ᤁᤧᤰᤆᤢ ᤁᤧᤀᤢ᤺ᤱᤒᤠ ᤐᤡᤳᤜᤠ᤹ ᤏᤢ ᤀᤍᤱᤜᤠ᤹ᤖᤧ ᤁᤢᤜᤰ ᤗᤠᤵᤑᤣ᤺ᤶᤏᤠᤒᤠ ᤁᤧᤖᤧᤰᤏᤢ᤺ᤸᤗᤧ ᤏᤢᤒᤠ ᤆᤠ᤺ᤴ ᤔᤧᤈᤖᤥ॥ 25 ᤂᤧᤴ ᤔᤏᤠᤛᤧᤵᤔᤠ ᤐᤕᤶ ᤕᤶᤒᤠ ᤕᤧᤴᤏᤥ ᤆᤱᤜᤡᤶᤜᤠ᤹ ᤌᤢᤵ. ᤂᤧᤒᤩᤠᤱ ᤁᤧᤖᤧᤰ ᤁᤣ᤺ᤶᤒ ᤁᤣ᤺ᤶᤒᤠ ᤏᤠᤱᤈᤱᤗᤢᤱᤜᤠ᤹ ᤏᤢ ᤁᤧᤖᤧᤰ ᤌᤧᤃᤢᤜᤠ᤹ᤀᤥ ᤆᤫᤠ᤺ᤳ ᤘᤜ᤺ᤱᤜᤠ᤹ ᤁᤢᤱ॥ 26 ᤂᤧᤴᤏᤢ᤺ᤸᤗᤧ ᤘᤣ᤹ ᤕᤜᤘᤣ ᤍᤠᤱᤒᤧᤸᤗᤧ ᤀᤠᤒᤠᤅᤣ ᤁᤢᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤕᤠᤱᤄᤣ᤺ᤰᤜᤠ᤹ ᤀᤡᤓᤢᤳᤋᤢ ᤐᤡᤖᤢᤛᤡ. ᤜᤧᤰᤁᤩᤠᤱ ᤂᤢᤏᤧ᤹ ᤂᤠ᤺ᤴᤍᤢᤛᤡᤒᤠ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤕᤠᤱᤄᤣ᤺ᤰᤜᤠ᤹ ᤘᤣ᤺ᤳᤗ ᤕᤠ᤺ᤴᤍᤢ ᤂᤧᤴ ᤕᤧᤴᤏᤥ ᤗᤠᤒᤧᤴ ᤏᤠᤶ ᤁᤢᤛᤡᤱ ᤀᤥ᤺ᤳ ᤜᤧᤰᤁᤩᤠᤱ ᤏᤠᤶᤔᤡᤴ ᤘᤣ᤹ ᤕᤧᤴᤏᤢ᤺ᤸᤗᤧ ᤏᤢᤛᤡᤗᤧᤱ ᤕᤠᤖᤡᤰ ᤛᤠ᤹ᤖᤡᤰ ᤀᤥ᤺ᤳᤗᤥ॥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤛ᤻ᤛᤢᤖᤒᤠ ᤔᤏᤠᤜᤠ᤹ ᤂᤢᤶᤍᤡᤱ ᤐᤡᤖᤢᤛᤡ 27 ᤀᤥᤔᤧᤳᤋᤧᤶᤔᤧ᤹. ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤢᤰᤛᤠᤶᤔᤡᤴ ᤏᤢ ᤁᤢᤜᤠᤱᤘᤠ ᤁᤢᤔᤠᤱᤘᤠᤴ ᤗᤠ᤺ᤳᤗᤠ᤺ᤳᤏᤢᤀᤣ ᤏᤡᤍᤧᤳᤗ ᤐᤳᤗᤥ॥ ᤔᤡᤖᤠ᤺ᤰ ᤏᤢ ᤔᤡ᤺ᤰᤂᤢᤸᤗᤧ ᤂᤢᤏᤧ᤹ ᤁᤢᤛᤡᤰ ᤐᤥᤃᤧᤒᤠᤴ ᤀᤥᤛᤣ᤺ᤴ ᤀᤠᤎᤠᤰᤗᤥ. ᤂᤢᤏᤧ᤹ ᤐᤠ᤺ᤳᤋᤧᤸᤗᤧ ᤂᤢᤏᤧ᤹ ᤁᤢᤀᤡᤰᤗᤠᤴ ᤔᤡ ᤁᤢᤀᤡᤛᤡᤰ ᤋᤡ᤺ᤳᤗᤥ॥ 28 ᤂᤢᤏᤧ᤹ ᤁᤢᤛᤰᤔᤠᤴ ᤁᤧᤖᤧᤰ ᤐᤠ᤺ᤴᤜᤠ᤹ ᤁᤧᤒᤱᤒᤠ ᤁᤧᤍᤣ᤹ᤒᤠ ᤁᤧᤃᤢᤱᤒᤠ ᤆᤫᤠ᤺ᤳ ᤜᤧᤰᤁᤣ ᤗ᤹ᤖᤥ॥ ᤂᤧᤴ ᤁᤢᤛᤰᤔᤠ᤺ᤸᤗᤧ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤁᤥᤒᤠ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤔᤧᤰᤔᤠ ᤛᤡᤔᤠᤍᤧᤴᤏᤥ ᤁᤧᤳᤋᤢᤛᤡᤖᤥ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤔᤢᤖᤠᤀᤥ ᤁᤖᤣᤗᤡ ᤑᤳᤇᤢᤖᤥ ᤐᤡᤖᤢᤛᤡᤀᤠᤱ ᤔᤧᤰᤔᤠᤛᤡᤔᤠ ᤗᤠᤶᤔᤥ ᤋᤣ᤹ᤖᤢᤛᤡᤖᤥ॥ 29 ᤁᤖ ᤂᤧᤏᤡ᤹ ᤁᤢᤔᤏᤠᤜᤠ᤹ᤃ ᤁᤧᤛ᤺ᤳᤋᤡᤖᤥ ᤜᤧᤰᤁᤩᤠᤱ ᤛᤣᤛᤣ ᤋᤱᤏᤠᤶᤔᤥᤒᤠ ᤛᤧᤴᤍᤡᤰ ᤜᤧᤰᤁᤣ ᤏᤡᤱᤘᤠ᤹ ᤋᤠᤀᤠᤱ ᤛᤠᤶᤃᤧᤗᤥᤖᤡᤖᤥ. ᤀᤡᤛᤪᤠᤀᤡᤗᤒᤠ ᤕᤠᤰᤐᤣ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤃᤥ᤺ᤰᤔᤠᤀᤥ ᤁᤧᤒᤣᤃᤡᤸᤗᤧ ᤔᤢᤑᤪᤠᤔᤠ ᤔᤢ᤺ᤳᤏᤢ ᤂᤧᤴ ᤗᤠᤀᤡᤰᤐᤠ ᤁᤢᤀᤡᤛᤡᤰ ᤗᤠᤱᤃᤧᤄᤣ᤺ᤰᤐᤠ ᤔᤏᤠᤜᤠ᤹ ᤜᤧᤰᤁᤣ ᤂᤧᤏᤡ᤹ ᤏᤡᤱᤘᤠ᤹ ᤐᤍᤠᤍᤠᤖᤥ॥ 30 ᤕᤜᤘᤣ ᤍᤠᤱᤒᤧᤸᤗᤧ ᤁᤧᤖᤧᤰ ᤔᤏᤠᤜᤠ᤹ ᤂᤢᤏᤧ᤹ ᤁᤢᤔᤡᤔᤡᤍᤡᤱᤃᤧᤴ ᤁᤢᤀᤡᤰᤗᤠᤴ ᤔᤧᤄᤧᤵᤛᤢᤖ ᤕᤠ᤺ᤴᤍᤢᤛᤡᤖᤥ. ᤜᤧᤰᤁᤩᤠᤱ ᤋᤡᤱᤍᤡᤱᤃᤧᤴ ᤁᤢᤕᤠ᤺ᤰᤗᤧ᤹ᤔᤠᤴ ᤏᤡᤱᤘᤠ᤹ ᤔᤧᤄᤥᤛᤢᤖ ᤆᤥᤃᤢᤛᤡᤖᤥ॥ ᤂᤧ᤹ᤕᤥ ᤛᤠ᤺ᤶᤓᤣ ᤗᤧᤰᤗ ᤂᤧᤖᤧᤱᤄᤢᤖᤢᤱ ᤗ᤹ᤀᤠᤱ ᤔᤡᤎᤢᤱ ᤔᤡᤖᤠ᤺ᤰ ᤐᤥ᤺ᤰᤗᤥ. ᤑ᤺ᤴ ᤌᤠᤀᤠᤱ ᤘᤜᤡᤳ ᤛᤠᤶᤔᤡ᤺ᤳ ᤂᤀᤡᤰ ᤂᤀᤡᤰ ᤀᤡᤰᤛᤡᤱᤗᤥ. ᤂᤧᤒᤩᤠᤱ ᤘᤎᤥ᤺ᤰᤁᤥ ᤆᤫᤠ᤺ᤳ ᤜᤢᤱᤔᤏᤠ ᤌᤣᤛᤡᤱ ᤁᤧᤗ᤹ᤒᤠ ᤀᤠᤒᤱᤒᤱᤒᤠ ᤘᤜᤡᤳ ᤌᤠᤛᤢᤖᤥ॥ 31 ᤀᤛ᤻ᤛᤢᤖᤒᤠ ᤔᤏᤠᤜᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤀᤡᤰᤗᤠᤴ ᤔᤧᤄᤧᤵᤛᤢᤀᤠᤱ ᤌᤧᤃᤰᤁᤰᤏᤠ ᤔᤧᤕᤱᤗᤥ. ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤜᤠᤱ ᤋᤰᤁᤠ᤺ᤳᤋᤡᤸᤗᤧ ᤂᤧᤱᤜᤠ᤹ ᤂᤠᤰᤂᤢᤛᤡᤀᤠᤱ ᤔᤧᤈᤥᤴᤗᤥ॥ 32 ᤕᤜᤘᤣ ᤍᤠᤱᤒᤧᤸᤗᤧ ᤂᤧᤱᤜᤠ᤹ ᤆᤰᤔᤧᤸᤗ᤹ᤀᤣ ᤂᤢᤶᤍᤡᤱ ᤐᤡᤖᤢᤛᤡᤖ ᤗ᤺ᤵᤛᤢᤛᤡᤖᤥ ᤜᤧᤰᤁᤣ᤺ᤸᤗᤧ ᤂᤢᤏᤧ᤹ ᤁᤢᤔᤏᤠᤜᤠ᤹ᤖᤧ ᤋᤢᤱᤏᤠ ᤏᤢ ᤁᤣ ᤔᤧᤜᤡᤵᤋᤢᤀᤠᤱ ᤂᤧᤴ ᤛᤠᤶᤗᤥᤔᤠ ᤔᤢᤰᤗᤠᤏᤢ ᤔᤧᤍᤱᤄᤢᤖᤥ ᤕᤜᤘᤣ ᤍᤠᤱᤒᤠᤴ ᤀᤠᤒᤠᤅᤣ ᤀᤛ᤻ᤛᤢᤖᤡᤜᤠ᤹ᤏᤢ ᤋᤧᤴᤎᤱ ᤆᤥᤰᤗᤥ॥ 33 ᤌᤣᤀᤠᤱᤓᤧᤸᤗᤧ ᤕᤖᤡᤰ ᤕᤧᤴ ᤋᤃᤡ ᤀᤛ᤻ᤛᤢᤖᤒᤠ ᤕᤶᤒᤠ ᤜᤠᤱᤅᤡᤴ ᤔᤡᤎᤡᤱᤔᤠᤖᤧ ᤗᤠᤃᤡ ᤕᤶᤒᤠ ᤔᤡ ᤋᤢᤶᤔᤠᤍᤧᤴᤎᤡᤰ ᤔᤧᤈᤥᤃᤢᤀᤠᤱ ᤘᤕᤧᤖᤥ॥ ᤂᤧᤴ ᤋᤧᤴᤏᤡᤴ ᤋᤠᤶᤍᤠᤶᤒᤠ ᤏᤢ ᤁᤣ᤺ᤶᤒᤠ ᤗᤢᤶᤒᤠᤳ ᤆᤥᤰᤗᤥ ᤜᤧᤰᤁᤩᤠᤱ ᤂᤧᤵᤔᤥ ᤕᤖᤡᤰ ᤛᤡᤱ ᤔᤧᤗᤢᤵᤛᤢᤀᤠᤱ ᤏᤧᤖᤥ॥ ᤕᤜᤘᤣ ᤍᤠᤱᤒᤠᤴ ᤛᤰᤔᤠ ᤛᤥ᤺ᤴᤇᤡᤱᤅᤡᤸᤗᤧ ᤔᤡᤎᤢᤱᤍᤡᤱ ᤔᤡᤖᤠ᤺ᤰ ᤗ᤺ᤴᤏᤠᤱ ᤂᤧᤵᤔᤥ ᤔᤡ ᤜᤠ᤺ᤴᤍᤢᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.