ᤕᤛᤤᤕᤠ 3 - LIFOTNT

ᤕᤖᤢᤛᤗᤧᤔ ᤏᤢ ᤕᤜᤢᤍᤠᤀᤥ ᤂᤠᤛᤧᤴ

¹ ᤀᤠᤸᤗ ᤀᤥᤔᤧᤳᤋᤧᤶᤔᤧ᤹. ᤍᤠᤱᤒᤠ. ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤂᤢᤴᤇᤡ᤹ ᤂᤥᤔᤠ ᤁᤧᤒᤥᤱᤒᤠ ᤐᤠ᤺ᤴᤜᤠ᤹ ᤏᤢ ᤂᤥᤔᤠ ᤁᤧᤒᤥᤱᤒᤠ ᤁᤢᤓᤠ᤹ᤜᤠ᤹ ᤂᤧᤒᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤆᤠᤔᤠ ᤁᤢᤈᤠ ᤏᤢ ᤌᤢᤱᤔᤠ ᤆᤫᤠ᤺ᤳᤋᤡᤴᤏᤠᤱ ᤕᤖᤢᤛᤗᤧᤔ ᤏᤢ ᤕᤜᤢᤍᤠᤗᤠᤶ ᤂᤧᤳᤋᤢᤍᤣᤛᤢᤖᤥ॥

² ᤜᤧᤰᤁᤩᤠᤱ ᤁᤧᤎᤢᤶᤒᤠ ᤏᤢ ᤌᤱ ᤁᤧᤈᤥ᤺ᤰᤐᤠ. ᤂᤠᤛᤧᤴᤗᤥ᤺ᤶᤒᤠ ᤏᤢ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ. ᤂᤠᤃᤧᤗᤥ᤺ᤶᤒᤠ ᤜᤧᤰᤁᤩᤠᤱ ᤛᤠᤶᤕᤥᤛᤡᤰᤛᤠᤶᤒᤠ.

³ ᤌᤰᤛᤢᤒᤠᤜᤠ᤹ᤖᤧ ᤂᤢᤴᤇᤡ᤹ ᤌᤰᤋᤢᤶᤒᤠᤜᤠ᤹ ᤏᤢ ᤌᤥᤛᤢᤌᤡᤶᤒᤠ ᤔᤏᤠᤜᤠ᤹. ᤛᤢᤈᤠᤍᤠᤱᤒᤠᤜᤠ᤹. ᤁᤧᤗᤧᤒᤠ ᤁᤧᤏᤡᤒᤠ ᤆᤥᤒᤣᤃᤢᤜᤠ᤹ ᤜᤧᤰᤁᤩᤠᤱ ᤆᤠᤆᤠ᤺ᤵᤐᤠ ᤁᤡᤳᤆᤠᤰ ᤁᤧᤈᤥ᤺ᤰᤐᤠᤜᤠ᤹ᤀᤠᤱ ᤂᤢᤏᤧ᤹ ᤂᤧᤳᤋᤢ ᤍᤣᤛᤢᤛᤡᤖᤥ॥

⁴ ᤜᤧᤰᤁᤩᤠᤱ ᤂᤠᤖᤰ ᤌᤠᤱᤒᤧᤴ ᤆᤵᤐᤪᤰ ᤁᤧᤃᤧᤵᤐᤠ ᤔᤏᤠᤜᤠ᤹ ᤀᤠᤱᤃᤠ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤛᤶᤎᤠᤱ ᤕᤢᤰᤛᤠᤒᤠ ᤆᤥᤃᤢᤱᤛᤡᤱᤗᤥ. ᤂᤧᤒᤩᤠᤱ ᤜᤡᤴᤈᤠ᤹ᤒᤡᤳᤇᤠ᤹ᤜᤠ᤹ᤖᤧ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤛᤶᤎᤠᤱ ᤕᤢᤰ ᤔᤧᤈᤥᤃᤢᤖᤥ॥

⁵ ᤌᤡᤰ ᤔᤏᤠ᤺ᤸᤗᤧ ᤘᤣ᤹ᤛᤔᤠ ᤔᤏᤠᤴ ᤏᤡᤱᤄᤢᤶ ᤔᤧᤳᤋᤢᤖᤥ ᤌᤡᤰ ᤔᤏᤠᤴ ᤘᤣ᤹ᤛᤔᤠ ᤔᤏᤠ᤺ᤸᤗᤧ ᤁᤢᤍᤰᤗᤧᤱᤘᤠᤀᤥ ᤐᤥ᤺ᤰᤗᤥ॥ ᤌᤡᤰ ᤜᤡᤶᤒᤣᤛᤠᤱᤒᤧᤴ ᤘᤣ᤹ᤛᤔᤠ ᤜᤡᤶᤒᤣᤛᤠᤱᤒᤧᤸᤗᤧ ᤁᤢᤍᤰᤗᤧᤱᤘᤠᤀᤥ ᤐᤥ᤺ᤰᤗᤥ. ᤁᤠᤵᤐᤥ ᤋᤢᤶᤛᤠᤜᤠ᤹ᤖᤧ ᤂᤢᤴᤇᤡ᤹ ᤋᤰᤗᤧᤱᤘᤠᤀᤥ ᤆᤵᤐᤪᤰ ᤌᤠᤱᤒᤧᤴ ᤁᤧᤃᤧᤵᤐᤠᤜᤠ᤹ ᤔᤧᤒᤥᤰᤗᤥ ᤜᤧᤰᤁᤩᤠᤱ ᤔᤡᤱᤛᤥ ᤀᤡᤱᤎᤠ᤺ᤱᤛᤠᤒᤠᤜᤠ᤹ᤖᤧ ᤂᤢᤴᤇᤡ᤹ ᤋᤰᤗᤧᤱᤘᤠᤀᤥ ᤌᤣᤏᤠᤎᤣᤒᤠ ᤛᤢᤜᤡ ᤔᤏᤠᤜᤠ᤹ ᤔᤧᤒᤥᤰᤗᤥ॥

⁶ ᤁᤴ ᤕᤧᤶᤔᤥ ᤑᤢ᤹ᤏᤢᤛᤠ᤹ᤜᤠ᤹ᤀᤥ ᤗᤳᤇᤠ ᤔᤏᤠᤴ ᤀᤠᤒᤠᤅᤣ ᤁᤢᤶᤒᤠᤖᤧ ᤁᤢᤜᤡᤶᤔᤥᤀᤣ ᤔᤧᤍᤧᤶᤛᤢᤀᤠᤱ ᤔᤧᤔᤧᤳᤋᤢᤖᤥ. “ᤂᤧᤏᤧ᤹ᤃ ᤆᤠᤱᤔᤠ ᤋᤣᤳ ᤁᤧᤃᤳᤋᤢᤖᤥ. ᤂᤧᤏᤧ᤹ ᤁᤴ ᤁᤧᤛᤠᤰᤐᤠ ᤋᤢᤰᤂᤣᤒᤠ ᤕᤧᤶᤔᤥ ᤂᤧᤏᤧ᤹ ᤀᤠᤏᤡᤃᤣ ᤗᤠᤶᤗᤥᤒᤠ ᤐᤥ᤺ᤰᤂᤧ᤹ᤀᤥ᥄”

⁷ ᤁᤖ ᤂᤧᤴ ᤕᤧᤴᤏᤥ ᤂᤧᤴ ᤔᤏᤠ᤺ᤸᤗᤧ ᤕᤶᤒᤠ ᤀᤡᤰᤗᤠᤀᤥ ᤀ᤺ᤰᤗ ᤐᤠ᤺ᤳᤋᤢᤖᤥ. “ᤁᤴ ᤁᤧᤛᤠᤰᤐᤠ ᤋᤢᤰᤂᤣᤒᤠ ᤕᤧᤶᤔᤥ ᤂᤧᤏᤡ᤹ ᤗᤠᤶᤗᤥᤒᤠ ᤐᤥᤱᤔᤠ ᤔᤧᤛᤢᤰᤁᤠᤴᤗᤥ॥ ᤀᤠᤱᤃᤠ᤹ ᤀᤠᤜᤡᤶᤔᤥ ᤆᤠᤔᤠ ᤌᤢᤱᤔᤠ ᤏᤢ ᤆᤠᤱᤔᤠ ᤘᤠ᤺ᤵᤔᤠ ᤌᤣᤀᤠᤱ ᤜᤥᤵᤗᤥ. ᤀᤠᤱᤃᤠ᤹ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤗᤠᤶᤗᤥᤒᤠ ᤕᤠᤵᤔᤡ ᤀᤠᤴᤈᤥᤃᤧᤶᤔᤡᤴᤏᤧ᤹ᤀᤥ॥”

⁸ ᤕᤖᤢᤛᤗᤧ᤺ᤶᤔᤡᤴ ᤂᤠ ᤗᤢ᤺ᤶᤔᤠ ᤂᤧᤵᤔᤠ ᤆᤥᤰᤗᤥ. ᤜᤧᤰᤁᤩᤠᤱ ᤕᤜᤢᤍᤠ᤺ᤴᤏᤠᤱ ᤆᤥ᤺ᤴᤗ ᤐᤳᤗᤥ. ᤂᤧ᤹ᤕᤥ ᤁᤧᤕᤢᤱᤒᤠ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤐᤠ᤺ᤴᤈᤠ᤺ᤰᤁᤡᤴ ᤏᤢ ᤕᤠ᤺ᤶᤒᤰᤁᤡᤴ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤏᤡᤔᤠᤀᤥ ᤋᤠᤵᤑᤧ᤺ᤶᤒᤠ ᤆᤥᤰᤗᤥ ᤂᤢᤏᤧ᤹ ᤁᤢᤔᤡᤔᤡᤍᤡᤱᤃᤧᤴ ᤁᤢᤍᤠᤔᤠ ᤁᤢᤕᤢᤔᤧᤴ ᤂᤧᤱᤜᤠ᤹ᤖᤧ ᤏᤡᤏᤡᤒᤠ ᤔᤧᤀᤳᤋᤢᤖᤥ॥

⁹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤀᤠᤒᤠᤅᤣ ᤏᤠᤖᤠ᤺ᤸᤗᤧᤀᤣ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤋᤰᤗᤧᤱᤘᤠᤀᤥ ᤋᤥ᤺ᤴᤍᤡ ᤐᤡᤖᤢᤖᤥ॥ ᤛᤍᤥᤔ ᤕᤧᤰᤕᤰᤁᤥ ᤁᤧᤕᤢᤱᤒᤠ ᤔᤏᤠᤜᤠ᤹ ᤁᤢᤀᤡᤛᤡ᤺ᤰᤁᤣ ᤂᤧᤱᤜᤠ᤹ᤖᤧᤀᤠᤱ ᤀᤠᤒᤠᤅᤣ ᤂᤢᤴᤇᤡ᤹ ᤗᤠᤕᤥᤴ ᤀᤥᤛᤣ᤺ᤴᤎᤠᤱ ᤔᤧᤈᤥᤃᤢᤖᤥ॥ ᤂᤧᤱᤜᤠ᤹ᤖᤧ ᤂᤧᤴ ᤂᤢᤴᤇᤡ᤹ ᤗᤠᤕᤥᤴ ᤔᤧᤴᤈᤡᤰᤂᤢᤴᤗᤥ॥ ᤂᤧᤱᤜᤠ᤹ᤃ ᤔᤧᤈᤡ᤺ᤳᤋᤧ ᤔᤧᤛᤩᤧᤖᤥ᥄ ᤂᤧᤱᤜᤠ᤹ᤖᤧ ᤀᤠᤒᤠᤅᤣ ᤂᤢᤴᤇᤡ᤹ ᤛᤶᤍᤠᤱ ᤔᤧᤰᤔᤠᤛᤡᤔᤠᤴ ᤔᤧᤍᤠᤖᤢᤀᤠᤱ ᤘᤠ᤹ᤖᤥ॥

¹⁰ ᤛᤠᤶᤕᤥᤒᤠ ᤔᤏᤠᤜᤠ᤹ ᤔᤧᤳᤋᤧᤛᤧ᤹ᤀᤥ. ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡᤃ ᤏᤢᤒᤠᤀᤣ ᤐᤥᤱᤗᤥ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧᤃ ᤏᤢᤒᤠ ᤕᤠ᤺ᤶᤒᤰ ᤔᤧᤈᤥᤃᤢᤒᤠ ᤁᤢᤀᤡᤛᤡᤰ ᤏᤡᤱᤘᤠ᤹ ᤁᤧᤔᤠᤒᤠ ᤌᤢᤶᤄᤥ ᤔᤧᤄᤥᤛᤢᤖᤥ॥

¹¹ ᤁᤖ ᤋᤠᤵᤑᤧ᤺ᤶᤒᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤔᤏᤠᤜᤠ᤹ᤃ ᤔᤧᤈᤡ᤺ᤳᤋᤧ ᤔᤧᤛᤩᤧᤖᤥ᥄ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤔᤧᤰᤔᤠᤛᤡᤔᤠᤴ ᤀᤠᤒᤠᤅᤣ ᤂᤢᤴᤇᤡ᤹ ᤛᤶᤎᤠᤱ ᤌᤩᤧᤀᤠᤱ ᤘᤠ᤹ᤖᤥ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤜᤢᤰᤁᤡᤸᤗᤧ ᤔᤧᤈᤥᤃᤢᤒᤠ ᤕᤠ᤺ᤶᤒᤰ ᤁᤢᤀᤡᤛᤡᤰ ᤋᤢᤶᤄᤥ ᤔᤧᤄᤥᤛᤢᤖᤥ॥

¹² ᤜᤡᤴᤈᤠ᤹ᤒᤡᤳᤇᤠ᤹ᤜᤠ᤹ᤖᤧ ᤀᤠᤱᤃᤠ᤹ ᤀᤠᤔᤏᤠᤜᤠ᤹ ᤋᤢᤰᤂᤣ ᤔᤧᤈᤠ᤺ᤳᤋᤢᤛᤡᤖᤥ. ᤜᤧᤰᤁᤩᤠᤱ ᤔᤧᤴᤇᤢᤔᤠᤜᤠ᤹ᤖᤧ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤛᤶᤎᤠᤱ ᤕᤢᤰ ᤔᤧᤈᤥᤃᤢᤖᤥ॥ ᤀᤠᤔᤏᤠᤛᤣ. ᤂᤧᤏᤡ᤹ ᤗᤠᤶᤃᤧᤗᤥᤒᤠᤜᤠ᤹ᤖᤧ ᤂᤧᤏᤡ᤹ ᤁᤧᤶᤜᤶᤛᤡ ᤁᤧᤶᤍᤣ᤹ᤖᤡᤀᤠᤱ ᤔᤧᤘᤠ᤹ᤖᤥ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤧᤏᤡ᤹ ᤗᤠᤱᤄᤣ᤺ᤰᤔᤠ ᤗᤠᤶᤜᤠ᤹ᤀᤥ ᤗᤠᤶᤁᤧᤶᤓᤥ᤺ᤳᤋᤡᤖᤥ॥

ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤏᤠᤜᤠ᤹ ᤂᤠᤛᤧᤴ ᤆᤥᤃᤢᤛᤡ

¹³ ᤕᤜᤘᤣ ᤍᤠᤱᤒᤠᤴ ᤁᤢᤄᤠᤛᤧᤴᤗᤥ᤺ᤶᤔᤠ ᤜᤡᤶᤔᤥ ᤀᤠᤒᤠᤅᤣ ᤁᤢᤕᤢᤰᤏᤠᤀᤥ ᤕᤢᤱᤗᤥ. ᤂᤢᤏᤧ᤹ ᤀᤠᤒᤠᤅᤣ ᤁᤢᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤋᤰᤗᤧᤱᤘᤠᤀᤥ ᤂᤠᤛᤧᤴ ᤆᤥ᤺ᤰᤔᤠᤖᤧ ᤗᤠᤃᤡ ᤕᤧᤶᤛᤡᤱᤗᤥ॥

¹⁴ ᤀᤠᤒᤠᤅᤣ ᤁᤢᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤛᤠᤶᤕᤥᤛᤡᤰᤛᤠᤶᤒᤠᤜᤠ᤹ ᤏᤢ ᤕᤢᤰᤛᤠᤒᤠᤜᤠ᤹ᤖᤧ ᤂᤢᤴᤇᤡ᤹ ᤋᤰᤗᤧᤱᤘᤠᤀᤥ ᤕᤜᤘᤣ ᤍᤠᤱᤒᤧᤸᤗᤧ ᤂᤠᤛᤧᤴ ᤆᤥᤃᤢᤖᤥ॥ “ᤂᤡᤏᤡ᤹ᤀᤣ ᤀᤠᤱᤃᤠ᤹ ᤀᤠᤈᤧᤸᤗᤧᤰᤛᤣ᤹ᤀᤡᤰ ᤁᤧᤔᤧᤱᤒᤠᤏᤡᤱᤗᤥ॥ ᤕᤠᤱᤃᤧᤛᤠ᤹ᤒᤠᤜᤠ᤹ ᤁᤧᤏᤠᤵᤋᤢᤶᤛᤡᤶᤒᤠ ᤆᤡᤃᤰᤘᤠᤜᤠ᤹ ᤂᤧᤏᤡ᤹ ᤜᤡᤶᤜᤠ᤹ᤀᤥᤀᤣ ᤘᤠ᤹ᤖᤥ॥

¹⁵ ᤀᤠᤱᤃᤠ᤹ ᤀᤠᤔᤏᤠᤜᤠ᤹ ᤂᤧᤏᤡ᤹ ᤌᤣᤀᤠᤱ ᤁᤧᤕᤢᤰᤋᤢᤶᤛᤡᤶᤒᤠ ᤜᤧᤰᤁᤩᤠᤱ ᤌᤣᤀᤠᤱ ᤕᤠᤱᤃᤧᤛᤠ᤹ᤒᤠᤜᤠ᤹ ᤁᤧᤕᤢ᤺ᤳᤋᤢᤶᤛᤡᤶᤒᤠᤒᤣ᥅” ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤋᤱᤒᤠ ᤀᤢᤘᤠ ᤆᤥᤃᤢᤖᤥ॥

ᤕᤖᤢᤛᤗᤧ᤺ᤶᤔᤥᤒᤠ ᤔᤧᤴᤇᤢᤔᤠᤜᤠ᤹ᤖᤧ ᤗᤠᤃᤡ ᤛᤠᤶᤍᤡᤱ

¹⁶ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤖᤥ. “ᤛᤡᤕᤥᤏᤧᤸᤗᤧ ᤁᤢᤛ᤻ᤛᤠ ᤔᤧᤴᤇᤡᤴᤜᤠ᤹ ᤀᤠᤱᤍᤡᤱ ᤔᤧᤗ᤹ᤖᤥ. ᤜᤧᤰᤁᤩᤠᤱ ᤂᤢᤴᤇᤡ᤹ ᤛᤡᤳᤗᤠᤴ ᤅᤠ᤺ᤰᤗᤧ᤹ ᤔᤧᤔᤧᤳᤋᤢᤖᤥ ᤂᤢᤴᤇᤡ᤹ ᤔᤡᤰᤜᤠ᤹ ᤁᤠᤖᤡᤰ ᤁᤠᤖᤡᤰ ᤔᤧᤔᤧᤳᤋᤢᤖᤥ. ᤂᤧᤒᤩᤠᤱ ᤗᤠᤱᤒᤠ᤺ᤱᤃᤡᤜᤠ᤹ ᤔᤧᤘᤠ᤺ᤳᤇᤡᤱᤗᤥ ᤁᤡᤸᤗᤡᤱ ᤁᤡᤸᤗᤡᤱ ᤗ᤹ᤖᤡᤰ ᤕᤠ᤺ᤰᤕᤠ᤺ᤰᤁᤠᤱ ᤗᤠᤱᤃᤠᤱ ᤔᤧᤈᤳᤋᤢᤖ ᤗᤠᤱᤔᤧᤄᤣ᤺ᤰᤗᤥ॥

¹⁷ ᤁᤸᤗᤧᤆᤥᤃᤢᤸᤗᤧ ᤍᤠᤱᤒᤧᤸᤗᤧ ᤛᤡᤕᤥᤏᤧᤸᤗᤧ ᤁᤢᤛ᤻ᤛᤠ ᤔᤧᤴᤇᤡᤴᤜᤠ᤹ᤖᤧ ᤂᤢᤴᤇᤡ᤹ ᤌᤧᤃᤣ᤺ᤰᤁᤥ ᤕᤠᤱᤄᤣ᤺ᤰᤁᤣ— ᤕᤠᤱᤄᤣ᤺ᤰᤁᤡᤸᤗᤧ ᤌᤡᤶᤛᤢ ᤐᤡᤖᤢᤛᤡᤖᤥ॥ ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤐᤕᤶ ᤕᤶᤒᤠ ᤔᤠᤱᤍᤢᤰᤔᤠᤴ ᤐᤠᤱᤄᤢ ᤋᤠᤛᤢᤖᤥ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤌᤧᤃᤣ᤺ᤰᤔᤢᤖᤡᤰᤜᤠ᤹ ᤗᤡᤃᤥ᤹ ᤗᤢ᤺ᤰᤐᤣ᤺ᤰᤗ ᤕᤠ᤺ᤴᤍᤢᤛᤡᤖᤥ॥”

¹⁸ ᤂᤧᤴ ᤕᤧᤴᤏᤥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤆᤥ᤺ᤰᤛᤡᤱᤔᤠ ᤐᤠ᤺ᤳᤇᤡᤱᤔᤠ ᤘᤠ᤺ᤳᤋᤡᤜᤠ᤹. ᤜᤧᤰᤁᤩᤠᤱ ᤜᤢᤰᤐᤠ᤺ᤱᤃᤡ ᤏᤢ ᤋᤫᤠᤒᤥ ᤘᤠ᤺ᤵᤔᤏᤠ ᤐᤠ᤺ᤴᤍᤡ. ᤗᤠᤒᤠᤄᤧ᤺ᤰᤘᤠ.

¹⁹ ᤁᤢᤴᤍᤢᤸᤗᤥ. ᤜᤢᤰᤐᤠ᤺ᤱᤃᤡ. ᤐᤥᤖᤠ᤺ᤰᤘᤠ.

²⁰ ᤋᤡᤆ ᤐ᤺ᤳᤌᤠᤱ. ᤗᤠᤱᤒᤠ᤺ᤱᤃᤡ. ᤑ᤹ᤀᤡ ᤑᤢᤱᤏᤠᤶ ᤕᤠᤱᤔᤠ ᤏᤢ ᤔᤠᤰᤐᤧᤴᤇᤠᤵ ᤐᤠᤱᤍᤠ᤹.

²¹ ᤛᤫᤠᤃᤣᤵ ᤏᤢ ᤔᤢᤴᤍᤪᤡ

²² ᤏᤢ᤺ᤒ᤻ᤏᤢᤒᤠ ᤆᤠᤱᤍᤣ᤺ᤳ. ᤀᤠᤸᤑᤡ᤹ ᤛᤢᤱᤄᤣᤰᤘᤠ ᤜᤧᤰᤁᤩᤠᤱ ᤛᤠᤐᤪᤡ.

²³ ᤛᤧᤳᤗᤣᤱᤃᤥ ᤀᤤᤏᤠ ᤏᤢ ᤆᤢᤴᤈᤢᤶᤒᤠ ᤆᤡᤖᤡᤰ. ᤛᤠᤶᤔᤩᤠᤱᤓᤢᤱ ᤜᤧᤰᤁᤩᤠᤱ ᤏᤠᤶᤓᤧᤰᤘᤠᤜᤠ᤹ ᤂᤧᤳᤋᤢᤍᤣᤛᤢ ᤐᤡᤖᤢᤛᤡᤖᤥ॥

²⁴ ᤁᤢᤏᤠᤶᤃᤧᤏᤢ᤹ᤒᤠ ᤔᤠᤖᤢᤰᤁᤡᤸᤗᤧ ᤁᤢᤗᤧᤰᤘᤠ ᤁᤧᤃᤡᤒᤠ ᤏᤠᤶᤃᤧᤛᤢᤒᤠ ᤐᤥᤱᤗᤥ. ᤜᤧᤰᤁᤩᤠᤱ ᤑ᤹ᤀᤡ᤺ᤸᤗᤧ ᤁᤢᤗᤧᤰᤘᤠ ᤀᤡᤍᤠᤰ. ᤏᤢᤖᤡᤰ ᤑᤔᤏᤠᤒᤠ ᤌᤠ᤺ᤰᤑᤔᤠᤸᤗᤧ ᤁᤢᤗᤧᤰᤘᤠ ᤌᤧᤃᤣ᤺ᤰᤀᤡᤴᤏᤠᤱ ᤗᤡᤃᤥᤛᤠ ᤐᤥᤱᤗᤥ. ᤏᤢᤒᤠ ᤆᤠᤱᤔᤠ ᤋᤣ᤺ᤳᤋᤡᤸᤗᤧ ᤁᤢᤗᤧᤰᤘᤠ ᤛᤠᤃᤡ ᤋᤣᤳ ᤐᤥᤱᤗᤥ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤏᤢᤒᤠ ᤏᤠᤖᤢᤶᤓᤢᤱᤅᤡᤴ ᤏᤢ᤺ᤶᤔᤠᤛᤡᤔᤠᤀᤥ ᤗᤧᤱᤛᤡᤱᤗᤥ॥

²⁵ ᤂᤧᤏᤧ᤹ ᤁᤧᤔᤏᤠᤜᤠ᤹ ᤋᤠᤓᤣ᤺ᤸᤗᤧ ᤔᤧᤈᤩᤧᤵᤋᤢᤛᤡᤀᤠᤱ ᤔᤧᤛᤧᤖᤢᤛᤡᤖᤥ. ᤁᤧᤎᤢᤶᤒᤠ ᤁᤧᤔᤏᤠᤜᤠ᤹ ᤌᤱᤅᤥ ᤌᤩ᤺ᤱ ᤔᤧᤔᤧᤰᤗᤥ॥

²⁶ ᤛᤡᤕᤥᤏ ᤕᤧᤰᤕᤰᤁᤥᤒᤠ ᤐᤕᤶ ᤕᤶᤒᤠ ᤗᤠᤶᤎᤣ᤺ᤵᤐᤠᤜᤠ᤹ ᤔᤧᤖᤡᤱ ᤔᤧᤎᤰᤗ ᤔᤧᤜᤠ᤺ᤵᤗᤥ॥ ᤂᤠᤶᤒᤠᤱᤅᤥ ᤌᤣᤎᤡᤰᤁᤠᤱ ᤔᤣ᤺ᤴᤏᤣ ᤁᤧᤕᤢᤱᤔᤠ ᤔᤧᤴᤇᤢᤔᤠ ᤁᤢᤀᤡᤛᤡᤰ ᤂᤧᤴ ᤕᤧᤰᤕᤰᤁᤡᤴ ᤀᤥᤛᤣ᤺ᤴᤎᤠᤱ ᤐᤥᤱᤗᤥ॥