ᤕᤛᤤᤕᤠ 29 - LIFOTNTᤕᤖᤢᤛᤗᤧᤔ ᤕᤧᤰᤕᤰᤁᤥ ᤐᤕᤶ ᤕᤶᤒᤠ ᤋᤢᤰᤂᤣ 1 ᤍᤠᤀᤢᤍᤧᤴ ᤕᤢᤅᤧᤒᤠ ᤀᤖᤡᤕᤗ ᤕᤧᤰᤕᤰᤁᤣ. ᤍᤠᤀᤢᤍᤧᤴ ᤕᤢᤅᤧᤒᤠ ᤀᤖᤡᤕᤗ ᤕᤧᤰᤕᤰᤁᤣ. ᤁᤧᤈᤡ᤺ᤳᤋᤧᤀᤠᤱ ᤁᤧᤛᤩᤧᤖᤥ᥄ ᤋᤱᤒᤣ᤹ ᤛᤶᤎᤠᤱ ᤋᤱᤒᤣ᤹ ᤕᤥ᤹ᤛᤡᤱᤗ ᤐᤣ᤺ᤰᤗᤥ. ᤜᤧᤰᤁᤩᤠᤱ ᤋᤱᤏᤠᤶᤜᤠ᤹ᤀᤠᤱ ᤋᤱᤒᤣ᤹. ᤋᤱᤒᤣᤎᤰᤔᤠ ᤀᤡᤍᤠᤖᤥ॥ 2 ᤜᤧᤰᤁᤣᤛᤠᤱ ᤀᤠᤱᤃᤠ᤹ ᤕᤧᤰᤕᤰ ᤛᤶᤎᤠᤱ ᤔᤧᤰᤔᤠᤛᤡᤔᤧᤴ ᤋᤠᤖᤢᤱᤗᤥ. ᤜᤧᤰᤁᤩᤠᤱ ᤂᤧ᤹ᤕᤥ ᤁᤧᤕᤢᤱᤒᤠᤜᤠ᤹ ᤔᤧᤜᤠ᤺ᤵ. ᤔᤧᤓᤡ᤺ᤰᤗᤥ ᤂᤧᤒᤩᤠᤱ ᤀᤖᤡᤕᤗ ᤕᤧᤰᤕᤰᤁᤡᤴ ᤔᤠᤰᤂᤡᤸᤗᤧ ᤗᤧ᤺ᤰᤋᤢᤒᤠ ᤗᤧᤳᤋᤡ ᤋᤥ᤺ᤶᤔᤠᤍᤧᤴ ᤐᤥᤱᤗᤥ॥ 3 ᤀᤠᤱᤃᤠ᤹ ᤂᤧᤴ ᤁᤒᤪᤡᤱ ᤋᤢᤖᤠᤕᤰ ᤗᤣ᤺ᤳᤋᤢᤱᤗᤥ. ᤜᤧᤰᤁᤩᤠᤱ ᤆᤱᤜᤡᤶ ᤆᤥᤃᤢᤱᤅᤠᤱ ᤁᤡᤷᤃᤵ ᤁᤒᤢᤱᤗᤥ. ᤂᤧᤶᤒᤩᤠᤱ ᤁᤢᤍᤰᤗᤧᤱᤘᤠᤀᤥ ᤁᤧᤖᤧᤰ ᤐᤡᤛᤠᤱ ᤌᤣ᤺ᤰᤔᤠ ᤕᤠ᤺ᤶᤒᤰ ᤆᤥᤃᤢᤱᤗᤥ॥ 4 ᤂᤧ᤹ᤕᤥᤒᤠ ᤔᤏᤠᤜᤠ᤹ ᤕᤥ ᤔᤰᤔᤧᤎᤠᤀᤠᤱ ᤂᤠᤶᤒᤠᤱᤗᤠᤶᤔᤣ ᤔᤧᤒᤠ᤺ᤳᤗᤥ. ᤜᤧᤰᤁᤩᤠᤱ ᤁᤢᤛᤡᤱ ᤏᤡ᤺ᤳᤔᤧᤴᤍᤧᤵᤔᤏᤠᤒᤠ ᤂᤢᤴᤇᤡ᤹ ᤀᤡᤰᤗᤠᤴ ᤂᤠᤶᤓᤢᤳᤇᤪᤢ᤺ᤶᤒᤠᤗᤠᤶ ᤗ᤺ᤴᤗᤥ. ᤂᤢᤴᤇᤡ᤹ ᤀᤡᤰᤗᤠᤴ ᤆᤩᤠ᤺ᤱᤔᤠᤱ ᤀᤡᤰᤗᤠ ᤁᤢᤀᤡᤛᤡᤰ ᤂᤠᤶᤒᤣᤰ ᤛᤡᤃᤠᤱᤗᤠᤶ ᤗ᤺ᤴᤗᤥ. ᤜᤧᤰᤁᤩᤠᤱ ᤂᤢᤴᤇᤡ᤹ ᤀᤡᤰᤗᤠᤴ ᤂᤠᤶᤜᤡ᤺ᤰ ᤛᤡᤃᤠᤱᤗᤠᤶ ᤂᤢᤛ᤻ᤂᤢᤛ᤻ ᤗ᤹ᤖᤡᤰ ᤐᤠ᤺ᤳᤗᤥ॥ 5 ᤁᤖ ᤕᤖᤢᤛᤗᤧᤔ ᤕᤧᤰᤕᤰᤁᤥ ᤁᤧᤕᤢᤱᤒᤠ ᤔᤏᤠᤛᤣ. ᤘᤣ᤹ ᤗᤠᤈᤣ᤹ᤗᤠᤶ ᤁᤧᤍᤠᤒᤠ ᤂᤧᤏᤡ᤹ ᤕᤖᤡᤰ ᤏᤡᤱᤔᤡᤜᤠ᤹ ᤂᤠᤶᤜᤡ᤺ᤰ ᤁᤢᤀᤡᤛᤡᤰ ᤔᤧᤒᤥᤱᤗᤥ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤌᤰᤛᤢᤒᤠᤜᤠ᤹ ᤕᤠ᤹ᤛᤡᤵ ᤜᤧᤰᤁᤣ ᤑᤢᤳᤗᤢᤶ ᤌᤩ᤺ᤱ ᤔᤧᤛᤧ ᤔᤧᤒᤣ᤺ᤰᤗᤥ. ᤜᤧᤰᤁᤩᤠᤱ ᤛᤵᤑᤠᤎᤡᤰᤗᤧᤛᤠ 6 ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤛᤠ᤹ᤖᤡᤰ ᤁᤡᤵᤔᤠᤄᤢᤖ ᤂᤧᤖᤧᤱᤄᤢᤖᤢᤱ ᤗ᤹ᤖᤡᤰ ᤗᤢᤵᤗᤡ ᤏᤢ ᤕᤶᤒᤠ ᤀᤡᤰᤗᤠᤀᤥ ᤋᤠᤱᤃᤧᤛᤧ᤺ᤵᤋᤡᤖᤥ॥ ᤜᤧᤰᤁᤩᤠᤱ ᤂᤢᤏᤧ᤹ ᤂᤀᤡᤰ ᤂᤀᤡᤰ ᤁᤧᤀᤡᤰᤛᤡᤱᤒᤠ ᤛᤢᤖᤡᤳ ᤁᤣᤈᤱ ᤂᤧᤒᤩᤠᤱ ᤕᤠᤵᤔᤡ ᤂᤠᤵᤐᤢᤌᤩ᤺ᤱ ᤁᤧᤈᤥ᤺ᤰᤐᤠ ᤔᤡᤎᤢᤱᤍᤡᤱ ᤔᤡᤖᤠ᤺ᤰᤏᤢ ᤋᤠᤖᤥ॥ 7 ᤜᤧᤰᤁᤩᤠᤱ ᤀᤖᤡᤀᤣᤗ ᤕᤧᤰᤕᤰᤁᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤁᤧᤖᤧᤰ ᤛᤢᤘᤠᤱᤒᤠ ᤀᤠᤳᤋᤠᤋᤠᤴᤏᤣ ᤕᤖᤡᤰ ᤔᤏᤠᤗᤢᤵᤜᤠ᤹ ᤂᤧ᤹ᤕᤥᤒᤠ ᤜᤠᤱᤕᤰᤁᤥ ᤌᤱ ᤔᤧᤈᤥᤰᤗᤥ. ᤂᤧᤒᤩᤠᤱ ᤂᤧᤴ ᤕᤧᤰᤕᤰᤁᤡᤴ ᤁᤡᤷᤃᤵ ᤔᤧᤃᤒᤢᤖᤥ. ᤁᤖ ᤂᤧᤱᤜᤠ᤹ ᤛᤧᤴᤍᤡᤰᤐᤠ ᤛᤢᤑᤥ ᤏᤢ ᤛᤧᤵᤔᤠᤱ ᤜᤧᤰᤁᤣᤀᤣ ᤔᤧᤔᤠ ᤔᤧᤒᤣ᤺ᤰᤗᤥ॥ 8 ᤁᤢᤛᤡᤰᤁᤧᤗᤠ᤺ᤰᤐᤠ ᤔᤏᤠ᤺ᤸᤗᤧ ᤛᤧᤵᤔᤠᤱᤔᤥ ᤁᤢᤈᤠ ᤆᤒᤠ ᤏᤡᤛᤢᤖᤥ. ᤁᤖ ᤁᤢᤔᤡᤰᤛᤥ᤺ᤸᤗᤧ ᤛᤠᤰᤔᤧᤴᤈᤠᤀᤣ ᤘᤠ᤹ᤖᤥ. ᤀᤡᤃᤪ ᤁᤢᤘᤠᤃᤧᤔᤡ᤺ᤰᤐᤠ ᤔᤏᤠ᤺ᤸᤗᤧ ᤛᤧᤵᤔᤠᤱᤔᤥ ᤆᤫᤠ᤺ᤳ ᤌᤢᤅᤢᤒᤠ ᤏᤡᤛᤢᤖᤥ. ᤁᤖ ᤁᤢᤔᤡᤰᤛᤥ᤺ᤸᤗᤧ ᤁᤢᤘᤠᤔᤡᤀᤠᤱ ᤁᤢᤈᤠᤒᤥ᤺ᤵᤔᤧᤴ ᤜᤣᤀᤠᤱ ᤐᤳᤗᤥ॥ ᤛᤡᤕᤥᤏ ᤁᤥ᤺ᤰᤔᤠᤸᤗᤧ ᤁᤢᤍᤰᤗᤧᤱᤘᤠᤀᤥ ᤌᤱ ᤁᤧᤈᤥ᤺ᤰᤐᤠ ᤔᤧᤴᤇᤠᤶ ᤛᤢᤘᤠᤱᤗᤢᤵᤜᤠ᤹ᤖᤧ ᤂᤢᤴᤇᤡ᤹ ᤔᤧᤰᤔᤠ ᤛᤡᤔᤧᤴᤏᤠᤱ ᤜᤠᤒᤠ ᤜᤧᤰᤋᤱᤒᤠᤀᤣ ᤐᤥᤱᤗᤥ॥ ᤔᤏᤠᤖᤧ ᤂᤧᤶᤄᤧᤶ ᤔᤧᤸᤗᤠᤵᤋᤢᤶᤒᤠ ᤛᤠᤶᤍᤡᤱᤜᤠ᤹ 9 ᤀᤠᤸᤗᤛᤠᤱ ᤀᤍᤱ ᤐᤥ᤺ᤰᤂᤧᤶᤔᤧ᤹ᤀᤥ᥄ ᤀᤠᤸᤗᤛᤠᤱ ᤔᤡᤰᤔᤧᤴᤏᤡᤔᤏᤠᤒᤠ ᤐᤥ᤺ᤰᤂᤧᤶᤔᤧ᤹ᤀᤥ᥄ ᤁᤢᤍᤧᤵᤐᤰᤘᤠ ᤌᤡ ᤌᤡᤰᤁᤠᤱ ᤔᤧᤴᤎᤢᤱᤅᤣ ᤔᤀᤠᤛᤡᤶᤔᤧ᤹ᤀᤥ᥄ ᤁᤢᤈᤰᤘᤠ ᤌᤡᤰᤁᤠᤱ ᤌᤡ ᤔᤧᤴᤎᤢᤱᤅᤣ ᤂᤧᤏᤡ᤹ ᤗᤠᤱᤜᤠ᤹ ᤀᤧᤳᤋᤢᤖᤥ॥ 10 ᤕᤜᤘᤣ ᤍᤠᤱᤒᤧᤸᤗᤧ ᤂᤧᤏᤡ᤹ ᤔᤢᤖᤢᤰ ᤂᤠᤖᤢᤰ ᤌᤣᤀᤠᤱ ᤔᤧᤴᤏᤡᤀᤣ ᤀᤡᤶᤔᤠ ᤗᤠ᤺ᤵᤔᤠ ᤁᤧᤈᤥᤃᤡᤖᤥ॥ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ᤃ ᤂᤧᤏᤡ᤹ ᤔᤡᤰᤜᤠ᤹ ᤏᤢ ᤌᤧᤃᤣ᤺ᤰᤛᤡᤖᤥ ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤢᤴᤇᤡ᤹ ᤔᤡᤰᤁᤡᤴ ᤛᤢᤒᤢ ᤐᤡᤖᤢᤛᤡᤀᤠᤱ ᤐᤳᤗᤥ ᤜᤧᤰᤁᤩᤠᤱ ᤂᤢᤴᤇᤡ᤹ ᤌᤧᤃᤣ᤺ᤰᤁᤡᤴ ᤋᤧᤵᤋᤢ ᤐᤡᤖᤢᤛᤡᤀᤠᤱ ᤐᤳᤗᤥ॥ 11 ᤂᤧᤏᤡ᤹ ᤗᤠᤃᤡ ᤁᤴ ᤁᤧᤖᤧᤰ ᤔᤡᤰ ᤏᤡᤔᤠ ᤛᤢᤑᤥᤜᤠ᤹ᤃ ᤀᤣ᤺ᤵᤛᤠᤵ ᤕᤢᤰᤔᤏᤠᤀᤠᤱ ᤛᤢᤵᤔᤏᤠᤒᤠ ᤛᤠᤵᤁᤡᤳᤋᤥ ᤁᤧᤒᤵᤐᤠ ᤐᤠ᤺ᤴᤇᤣ᤺ᤰᤘᤠ ᤜᤧᤰᤋᤱᤒᤠᤖᤰᤗᤥ॥ ᤜᤧᤰᤁᤩᤠᤱ ᤛᤠᤵᤁᤡᤳᤋᤡᤴ ᤏᤡ᤺ᤵᤔᤠ ᤁᤧᤛᤢᤰᤐᤠ ᤁᤢᤓᤠ ᤔᤏᤠᤎᤡᤰ “ᤏᤡᤖᤧ ᤀᤠᤒᤡᤖᤧ᤹” ᤑᤠ᤹ᤀᤠᤱ ᤂᤧᤏᤡ᤹ ᤁᤧᤔᤧᤳᤋᤢᤶᤏᤧᤓᤃᤪ ᤂᤧᤸᤗᤧ ᤂᤧᤏᤡ᤹ ᤀᤰᤂᤣᤗ᤹ᤖᤡᤰ ᤏᤢᤃᤵ ᤁᤧᤒᤡᤖᤡᤖᤥ. “ᤀᤠᤜᤠ᤹. ᤁᤴ ᤀᤣ᤺ᤵᤛᤠᤵ ᤔᤧᤕᤢᤰᤋᤢᤀᤠᤱ ᤔᤧᤛᤢᤒᤢᤒᤠ ᤛᤠᤵᤁᤡᤳᤋᤡᤴ ᤀᤠᤱᤃᤠ᤹ ᤏᤡ᤺ᤵᤔᤠ ᤔᤧᤛᤢᤰᤁᤠᤴᤗᤥ॥” 12 ᤀᤡᤃᤪ ᤁᤢᤓᤠ ᤛᤠᤵᤗᤠ ᤏᤡ᤺ᤵᤔᤠ ᤔᤧᤴᤇᤢᤰᤔᤏᤠᤒᤠᤎᤡᤰ “ᤁᤴ ᤛᤠᤵᤁᤡᤳᤋᤡᤴ ᤏᤡᤖᤧᤀᤠᤒᤡᤖᤧ᤹ᤀᤥ” ᤁᤧᤔᤧᤳᤋᤢᤶᤔᤠᤱ ᤁᤧᤒᤡᤖᤢᤶᤏᤧᤓᤃᤪ ᤂᤢᤏᤧ᤹ ᤀᤰᤂᤣ ᤁᤧᤔᤧᤳᤋᤡᤖᤥ. “ᤀᤠᤱᤃᤠ᤹ᤃ ᤏᤡ᤺ᤵᤔᤠᤀᤣ ᤔᤧᤗᤧᤀᤠᤴᤗᤥ॥” 13 ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤖᤥ. “ᤁᤴ ᤔᤏᤠᤜᤠ᤹ ᤂᤢᤴᤇᤡ᤹ ᤏᤠᤖᤠ ᤀᤥᤛᤣ᤺ᤴᤎᤠᤰᤛᤧ ᤀᤠᤱᤃᤠ᤹ ᤀᤠᤒᤣᤛᤠᤱ ᤔᤧᤍᤠᤖᤥ ᤜᤧᤰᤁᤩᤠᤱ ᤂᤢᤴᤇᤡ᤹ ᤔᤢᤖᤠ᤺ᤸᤗᤧᤖᤰ ᤀᤠᤱᤃᤠ᤹ ᤔᤡᤱᤛᤥ ᤀᤡᤱᤎᤠᤱ ᤔᤧᤒᤡᤀᤠᤖᤥ. ᤁᤖ ᤂᤢᤴᤇᤡ᤹ ᤏᤡᤱᤘᤠᤴ ᤀᤠᤱᤃᤠ᤹ᤗᤠᤶ ᤔᤠ᤺ᤱᤄᤠ ᤘᤠ᤹ᤖᤥ॥ ᤂᤧᤱᤜᤠ᤹ᤖᤧ ᤀᤠᤱᤃᤠ᤹ ᤛᤧᤘᤠ ᤔᤧᤔᤧᤳᤋᤠᤒᤠᤱᤃ ᤜᤏᤧ ᤔᤏᤠᤜᤠ᤹ᤖᤧ ᤔᤧᤜᤢ᤹ᤖᤢᤛᤡᤒᤠ ᤆᤥ᤺ᤰᤌᤡᤶᤗᤰᤗᤥ॥ 14 ᤁᤸᤗᤧᤆᤥᤃᤢᤸᤗᤧ ᤀᤠᤱᤃᤠ᤹ ᤕᤠᤶᤔᤥ ᤌᤡᤰᤗᤧᤱ ᤁᤴ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤏᤡᤱᤘᤠ᤹ ᤁᤧᤔᤠᤒᤠ ᤏᤢ ᤏᤡᤱᤘᤠ᤹ ᤁᤧᤗᤧᤱᤒᤠ ᤕᤠ᤺ᤶᤒᤰ ᤆᤥᤃᤢᤱᤅᤠᤱ ᤏᤡᤱᤘᤠ᤹ ᤏᤧᤜᤡ ᤔᤠᤖ ᤆᤥᤃᤢᤱᤗᤥ॥ ᤜᤧᤰᤁᤩᤠᤱ ᤛᤡᤰᤁᤢᤶᤛᤠᤒᤠᤜᤠ᤹ᤖᤧ ᤂᤢᤴᤇᤡ᤹ ᤛᤡᤰᤁᤢᤶᤏᤡᤱᤘᤠᤴ ᤔᤧᤰᤗᤥ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤁᤧᤖᤧᤰᤏᤢ᤺ᤸᤗᤧᤀᤠᤱ ᤆᤠ᤺ᤳᤆᤠ᤺ᤵᤐᤠ ᤔᤏᤠ᤺ᤸᤗᤧ ᤁᤢᤆᤠ᤺ᤳᤆᤠ᤺ᤳ ᤗ᤹ᤔᤠᤴ ᤔᤠᤒᤣ᤺ᤰᤗᤥ॥” ᤁᤧᤍᤠᤒᤠ ᤕᤧᤶᤗᤧ ᤗᤠᤃᤡ ᤗᤠᤶᤀᤥᤔᤧᤵᤔᤠ 15 ᤕᤜᤘᤣ ᤍᤠᤱᤒᤠᤗᤠᤶ ᤁᤧᤈᤡᤱᤛᤡᤱᤒᤠᤀᤠᤱ ᤛᤫᤠ᤺ᤳ ᤏᤡᤱᤛᤣᤰ ᤁᤧᤈᤥ᤺ᤰᤐᤠᤜᤠ᤹. ᤂᤠᤔᤠᤰᤔᤥ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤜᤠ᤹. ᤜᤧᤰᤁᤩᤠᤱ “ᤜᤠ᤺ᤳᤗᤧ ᤀᤠᤏᤡᤃᤣ ᤏᤡᤛᤡᤃᤧᤒᤣ᥅ ᤜᤠ᤺ᤳᤗᤧ ᤏᤡᤱᤘᤠ᤹ ᤂᤥᤛᤢᤒᤣ᥅” ᤑᤠ᤹ᤀᤠᤱ ᤏᤡᤱᤘᤠ᤹ ᤁᤧᤀᤡ᤺ᤵᤐᤠᤜᤠ᤹ ᤔᤧᤈᤡ᤺ᤳᤋᤧ ᤔᤧᤛᤩᤧᤖᤥ॥ 16 ᤂᤧᤱᤜᤠ᤹ᤖᤧ ᤁᤧᤖᤧᤰ ᤐᤠ᤺ᤴᤜᤠ᤹ ᤋᤠᤱᤃᤪᤠᤳᤆᤡ ᤘᤁᤪᤠᤳᤆᤡ ᤔᤧᤈᤥᤃᤢᤖᤥ. ᤂᤠᤶ ᤁᤧᤛ᤹ᤒᤠ ᤁᤥᤶᤓᤠᤗᤩᤠᤴ ᤕᤶᤒᤠᤒᤡ ᤂᤠᤶᤔᤡᤴ ᤕᤶᤒᤠᤒᤡ᥅ ᤆᤥ᤺ᤰᤔᤏᤠᤒᤠ ᤆᤡᤃᤰᤘᤠ᤺ᤸᤗᤧ “ᤀᤠᤱᤃᤠ᤹ ᤂᤧᤏᤧ᤹ ᤁᤧᤈᤥᤃᤠᤱᤒᤠ ᤔᤣ᤺ᤴᤗᤥ” ᤔᤧᤵᤔᤠ ᤛᤢᤰᤋᤢᤒᤡ᥅ ᤀᤡᤃᤪ “ᤂᤧᤏᤧ᤹ ᤆᤥ᤺ᤰᤔᤠ ᤌᤣᤀᤠᤱ ᤁᤧᤸᤗᤧᤛᤢᤴ” ᤔᤧᤳᤋᤢᤒᤡ᥅ 17 ᤜᤠᤖᤠᤀᤣ ᤗᤧᤒᤏᤠᤏᤒᤠ ᤋᤠᤶᤓᤢᤱ ᤕᤠᤰᤗᤠᤜᤠ᤹ ᤐᤩᤠᤱᤛᤡ ᤔᤧᤒᤥᤱᤏᤧᤶᤒᤡ᥅ ᤜᤧᤰᤁᤩᤠᤱ ᤐᤩᤠᤱᤛᤡᤴ ᤗᤡᤔᤧᤴᤍᤧᤵᤔᤏᤠᤒᤠ ᤋᤠᤶᤓᤢᤱ ᤕᤠᤰᤗᤠ ᤔᤧᤒᤥᤱᤏᤧᤶᤒᤡ᥅ 18 ᤂᤧᤸᤗᤧ ᤕᤠ᤺ᤴᤍᤡᤰ ᤛᤠᤵᤁᤡᤳᤋᤥ ᤛᤠᤵᤋᤧᤀᤠᤱ ᤁᤧᤒᤵᤐᤠ ᤐᤠ᤺ᤴᤈᤠ᤺ᤰᤁᤡᤴ ᤏᤠᤎᤠᤰᤐᤠᤸᤗᤧ ᤂᤧᤵᤛᤢᤖᤥ. ᤂᤧᤒᤩᤠᤱ ᤔᤠᤰᤛᤡ᤺ᤱᤃᤩᤠ᤺ᤵᤐᤠ ᤂᤠᤔᤠᤰᤔᤥᤗᤠᤶ ᤔᤡᤰᤑ᤺ᤶᤒᤠᤸᤗᤧ ᤁᤢᤔᤡᤰᤁᤡᤸᤗᤧ ᤏᤡᤛᤢᤖᤥ॥ 19 ᤏ᤺ᤶᤏ᤺ᤶᤒᤠᤜᤠ᤹ ᤕᤜᤘᤣ ᤍᤠᤱᤒᤠᤀᤥ ᤔᤧᤛ᤺ᤳᤗᤥ. ᤜᤧᤰᤁᤩᤠᤱ ᤕᤠᤱᤃᤧᤛᤠ᤹ᤒᤠᤜᤠ᤹ ᤀᤡᤛᤪᤠᤀᤡᤗᤒᤠ ᤛᤣᤛᤣᤒᤠ ᤏᤡᤱᤘᤠ᤹ᤑᤢᤔᤠᤱᤅᤥ ᤂᤢᤴᤇᤡ᤹ ᤏᤡᤱᤘᤠ᤹ ᤐᤍᤠᤍᤠᤖᤥ॥ 20 ᤁᤢᤀᤡᤃᤧᤓᤧᤶᤒᤠ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤔᤡᤱᤅᤣ ᤔᤠᤖᤥ. ᤜᤧᤰᤁᤩᤠᤱ ᤆᤧᤰᤕᤠ ᤀᤡᤱᤍᤥ ᤁᤧᤒᤠ᤺ᤵᤐᤠᤜᤠ᤹ ᤔᤧᤔᤧᤰᤗᤥ. ᤂᤧᤶᤒᤩᤠᤱ ᤋᤠᤵᤑᤧ᤺ᤶᤒᤠ ᤕᤠ᤺ᤶᤒᤰ ᤆᤥ᤺ᤰᤔᤠ ᤑᤠ᤹ᤀᤠᤱ ᤀᤥᤃᤧᤔᤒᤠ ᤔᤏᤠᤜᤠ᤹ ᤂᤠᤵᤐᤢᤌᤩ᤺ᤱ ᤔᤧᤒᤥᤱᤗᤥ॥ 21 ᤀᤠᤳᤋᤡᤴᤜᤠ᤹ᤖᤧ ᤔᤏᤠᤜᤠ᤹ ᤐᤠ᤺ᤴᤏᤥ ᤔᤧᤎᤠᤛᤢᤛᤡᤀᤠᤱ ᤀᤠᤵᤋᤡᤰᤛᤠᤒᤠ ᤔᤧᤈᤥᤃᤢᤛᤡᤖᤥ. ᤜᤧᤰᤁᤩᤠᤱ ᤂᤠᤛᤧᤴ ᤗᤥ᤺ᤶᤔᤠᤍᤧᤴᤏᤥ ᤋᤢ᤺ᤴᤍᤣ᤹ ᤔᤧᤃᤢ᤺ᤳᤋᤢᤛᤡᤀᤠᤱ ᤆᤧᤴᤏᤥ ᤔᤧᤎᤠᤛᤢᤛᤡᤖᤥ॥ ᤂᤧᤒᤩᤠᤱ ᤁᤢᤍᤥ᤺ᤵᤔᤠ ᤔᤏᤠᤜᤠ᤹ ᤔᤧᤴᤘᤠ᤹ᤔᤏᤠᤒᤠ ᤐᤠᤴ ᤔᤧᤎᤡᤰᤋᤢᤛᤡᤀᤠᤱ ᤂᤠᤛᤧᤴᤗᤥᤶᤔᤠ ᤔᤧᤱᤄᤥᤶᤏᤠᤒᤠ ᤔᤧᤈᤥᤃᤢᤛᤡᤖᤥ ᤜᤧᤰᤋᤱᤒᤠ ᤔᤏᤠᤜᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤔᤧᤰᤂᤢᤛᤡᤖᤥ॥ 22 ᤁᤸᤗᤧᤆᤥᤃᤢᤸᤗᤧ ᤀᤒᤪᤠᤜᤠᤶᤔᤧᤴ ᤁᤧᤎᤧ᤹ᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤕᤠᤁᤢᤒᤖᤧ ᤁᤢᤔᤢ᤹ᤀᤡᤍᤠᤱᤛᤠᤜᤠ᤹ ᤀᤰᤂᤣ ᤔᤧᤳᤋᤢᤛᤡᤖᤥ. “ᤕᤠᤁᤢᤒᤖᤧ ᤀᤠᤸᤗ ᤁᤢᤏᤠ ᤔᤧᤎᤠᤏᤧᤴᤗᤥ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤏᤠᤖᤠᤀᤠᤱ ᤛᤡᤖᤣ᤺ᤵ ᤔᤧᤗ᤹ᤏᤧᤴᤗᤥ॥ 23 ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤀᤠᤱᤃᤠ᤹ ᤐᤡᤖᤢᤱᤛᤡᤱᤒᤠ ᤀᤠᤒᤠᤅᤣ ᤂᤢᤴᤇᤡ᤹ ᤛᤠᤀᤣᤜᤠ᤹ ᤔᤧᤏᤡᤛᤢᤛᤡᤖᤥ॥ ᤜᤧᤰᤁᤩᤠᤱ ᤀᤠᤜᤢᤰᤁᤥᤒᤠ ᤕᤠ᤺ᤶᤒᤰᤜᤠ᤹ ᤔᤧᤏᤡᤛᤢᤖᤥ. ᤜᤧᤰᤁᤣ᤺ᤸᤗᤧ ᤂᤧᤱᤜᤠ᤹ᤖᤧ ᤀᤠᤱᤃᤠ᤹ ᤀᤠᤔᤡᤱᤅᤡᤴ ᤛᤣᤛᤣᤛᤠᤱᤛᤠᤱ ᤔᤧᤈᤥᤃᤢᤖᤥ॥ ᤂᤧᤱᤜᤠ᤹ᤖᤧ ᤕᤠᤁᤢᤒᤖᤧ ᤐᤕᤶ ᤕᤶᤒᤠ ᤁᤢᤛᤣᤛᤣ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤛᤣᤛᤣᤒᤠ ᤑᤠ᤹ᤀᤠᤱ ᤔᤧᤒᤠ᤺ᤳᤋᤢᤖᤥ. ᤜᤧᤰᤁᤩᤠᤱ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤔᤡᤱᤛᤥ ᤀᤡᤱᤎᤠᤱ ᤔᤧᤒᤡᤖᤢᤖᤥ॥ 24 ᤏᤡᤱᤘᤠ᤹ ᤋᤠᤰᤁᤧᤃᤶᤒᤠ ᤔᤏᤠᤜᤠ᤹ᤀᤠᤱ ᤂᤠᤛᤡᤱᤃᤧᤏᤡ᤺ᤵᤐᤠ ᤔᤧᤒᤥᤱᤗᤥ. ᤜᤧᤰᤁᤩᤠᤱ ᤔᤢᤏᤢᤰᤏᤢᤰ ᤗ᤹ᤖᤡᤰ ᤔᤏᤧᤃᤧᤎᤡᤰᤐᤠᤜᤠ᤹ᤖᤧᤀᤠᤱ ᤏᤡᤛᤠᤶ ᤜᤢ᤹ᤛᤡᤱᤔᤠ ᤏᤡᤱᤘᤠ᤹ ᤔᤧᤈᤥᤃᤢᤖᤥ॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.