ᤕᤛᤤᤕᤠ 28 - LIFOTNTᤌᤠᤱᤃᤧᤳ ᤗᤧᤵᤛᤠᤱᤒᤠ ᤀᤡᤛᤪᤠᤀᤡᤗ ᤜᤠᤱᤈᤢᤶᤔᤡᤴ ᤛᤠᤶᤍᤡᤱ 1 ᤆᤡ᤺ᤳᤋᤧᤀᤠᤱᤗᤰ ᤛᤩᤧᤖᤥ. ᤛᤠᤔᤖᤡᤕᤠ ᤕᤧᤰᤕᤰᤐᤠ ᤀᤠᤱᤍᤡᤱ ᤁᤧᤗ᤹ᤒᤠᤜᤠ᤹ᤖᤧ ᤀᤠᤰᤋᤱᤒᤠ ᤋᤢᤰᤂᤣᤴ ᤔᤧᤍᤢᤔᤢᤀᤡᤖᤥ— ᤀᤡᤛᤪᤠᤀᤡᤗᤒᤠ ᤌᤡᤔᤛᤠᤱᤜᤠ᤹ᤖᤧ ᤂᤢᤴᤇᤡ᤹ ᤜᤠᤱᤘᤠ ᤔᤠᤱᤘᤠ ᤋᤡᤆ᤺ᤴ॥ ᤁᤱᤃ ᤆᤠ ᤁᤧᤏᤢ᤹ᤒᤠ ᤏᤧᤏᤧᤒᤠ ᤋᤧᤴᤏᤡᤸᤗᤧ ᤁᤢᤈᤱᤀᤥ ᤏᤧᤖᤥ. ᤁᤖ ᤂᤧᤸᤗᤧ ᤏᤢᤔᤠ ᤁᤢᤄᤧᤶᤛᤡᤱᤔᤧᤴ ᤑᤢᤱ ᤜᤧᤰᤁᤣ ᤀᤡᤖᤧᤶᤒᤣ᤺ᤰᤗᤥ. ᤁᤱᤃ ᤛᤣᤈᤱᤘᤠ᤺ᤸᤗᤧ ᤑᤧᤳᤗᤠ᤺ᤴᤍᤢᤒᤠ ᤔᤏᤠ᤺ᤸᤗᤧ ᤁᤢᤀᤠᤱᤍᤡᤱ ᤗ᤹ᤔᤠᤖᤥ॥ 2 ᤀᤥᤔᤧᤳᤋᤠᤶᤔᤧ᤹. ᤕᤜᤘᤣ ᤍᤠᤱᤒᤧᤸᤗᤧ ᤗᤳᤇᤠ ᤔᤢᤰᤛᤠᤶᤛᤠᤒᤠ ᤏᤢ ᤋᤸᤗᤡᤰ ᤁᤧᤎᤢᤶᤒᤠᤎᤡᤰ ᤐᤠᤱᤄᤢᤖᤥ॥ ᤑ᤺ᤴ ᤏᤢ ᤀᤠᤔᤧᤱᤔᤧᤱᤒᤠ ᤛᤢᤖᤡᤳ ᤁᤣᤈᤱ ᤔᤢᤰᤐᤠ ᤜᤧᤰᤁᤣ. ᤘᤎᤥ᤺ᤰᤁᤥᤗᤠᤶ ᤆᤫᤠ᤺ᤳ ᤜᤢᤱᤔᤏᤠᤒᤠ ᤜᤧᤰᤁᤣ ᤜᤧᤰᤁᤩᤠᤱ ᤕᤶᤒᤠ ᤛᤢᤖᤡᤳ ᤁᤣᤈᤱ ᤜᤢ᤺ᤰᤐᤠ ᤜᤧᤰᤁᤣ ᤂᤢᤏᤧ᤹ ᤂᤧᤴ ᤛᤠ᤹ᤖᤡᤰᤁᤠᤱ ᤂᤠᤶᤒᤠᤱᤅᤥ ᤗᤠᤵᤑᤢᤛᤢᤖᤥ॥ 3 ᤀᤣᤑᤪᤠᤀᤡᤔ ᤕᤧᤰᤕᤰᤁᤥ ᤌᤡ᤺ᤸᤗᤧ ᤁᤧᤔᤒᤠ ᤔᤏᤠᤜᤠ᤹ᤖᤧ ᤔᤧᤍᤡ᤺ᤰᤛᤢᤀᤠᤱ ᤂᤢᤴᤇᤡ᤹ ᤛᤡᤳᤗᤠᤀᤥ ᤔᤧᤘᤠᤖᤢᤒᤠ ᤀᤠᤱᤍᤡᤱ ᤗ᤹ᤔᤠ ᤑᤢᤱᤅᤡᤴ ᤔᤏᤠᤜᤠ᤹ᤖᤧ ᤗᤠᤱᤅᤧᤸᤗᤧ ᤆᤡᤍᤥ᤹ ᤆᤡᤍᤥ᤹ ᤔᤧᤍᤥ᤹ᤖᤢᤖᤥ॥ 4 ᤁᤱᤃ ᤆᤠ ᤁᤧᤏᤢ᤹ᤒᤠ ᤏᤧᤏᤧᤒᤠ ᤋᤧᤴᤏᤡᤸᤗᤧ ᤁᤢᤈᤱᤀᤥ ᤏᤧᤖᤥ. ᤂᤧᤸᤗᤧ ᤏᤢᤔᤠ ᤁᤢᤄᤧᤶᤛᤡᤱᤔᤧᤴ ᤑᤢᤱᤅᤡᤴ ᤁᤢᤀᤡᤛᤡᤰ ᤀᤡᤖᤧᤶᤗᤥ॥ ᤂᤧᤴ ᤆᤠᤛᤢᤶᤔᤠ ᤕᤧᤶᤔᤡᤴᤏᤢ᤺ᤸᤗᤧ ᤋᤃᤡ ᤁᤧᤍᤢᤶᤒᤠ ᤐ᤺ᤳᤇᤣ᤹ ᤁᤢᤀᤡᤛᤡᤰ ᤜᤠᤖᤠᤀᤣ ᤔᤧᤍᤢᤒᤢᤀᤠᤱ ᤔᤧᤈᤔᤧᤍᤣᤛᤢᤖᤥ॥ 5 ᤂᤧᤴ ᤕᤧᤴᤏᤥ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤴᤏᤣ ᤀᤡᤛᤪᤠᤀᤡᤗᤖᤧ ᤁᤢᤄᤧᤶᤛᤡᤱᤔᤠ ᤋᤡᤆ ᤐᤥᤱᤗᤥ॥ ᤂᤢᤏᤧ᤹ᤀᤣ ᤁᤧᤜᤡᤱᤒᤠ ᤁᤧᤕᤠ᤺ᤰᤐᤠ ᤁᤢᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤔᤡᤔᤡᤍᤡᤱᤃᤧᤴ ᤐᤥᤱᤗᤥ॥ 6 ᤂᤢᤏᤧ᤹ ᤂᤠᤛᤧᤴᤗᤥᤶᤔᤠ ᤑᤠ᤹ᤀᤠᤱ ᤁᤧᤕᤢᤱᤒᤠᤜᤠ᤹ ᤂᤢᤏᤧ᤹ ᤂᤠᤛᤧᤴᤗᤥᤶᤔᤠ ᤕᤠᤶᤛᤠᤶ ᤐᤡᤖᤢᤛᤡᤖᤥ. ᤜᤧᤰᤁᤩᤠᤱ ᤕᤧᤰᤕᤰᤁᤥᤒᤠ ᤐᤕᤶ ᤕᤶᤒᤠ ᤗᤠᤶᤎᤣ᤺ᤵᤐᤥ ᤌᤱ ᤁᤧᤈᤥ᤺ᤰᤐᤠᤜᤠ᤹ᤖᤧ ᤗᤠᤃᤡ ᤂᤢᤏᤧ᤹ ᤔᤢᤰᤛᤠᤶᤗᤧ ᤁᤢᤒᤢᤱ ᤐᤥᤱᤗᤥ॥ ᤌᤡ᤺ᤸᤗᤧ ᤁᤧᤔᤒᤠ ᤕᤜᤢᤍᤠᤒᤠ ᤗᤠᤶᤗᤥᤒᤠᤜᤠ᤹ ᤏᤢ ᤕᤛᤤᤕᤠᤴ 7 ᤁᤴ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ ᤏᤢ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤆᤧᤸᤗᤧᤰᤛᤣ᤹ ᤌᤡ᤺ᤸᤗᤧ ᤆᤥᤃᤢᤸᤗᤧ ᤜᤥ᤹ᤍᤥᤴ ᤜᤥ᤹ᤍᤥᤴ ᤔᤧᤗ᤹ᤖᤥ॥ ᤌᤡ᤺ᤸᤗᤧ ᤆᤥᤃᤢᤸᤗᤧ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤧᤛᤥᤳ ᤔᤧᤗᤧᤱᤏᤧᤴᤗᤥ. ᤂᤧᤱᤜᤠ᤹ ᤌᤡ᤺ᤸᤗᤧ ᤆᤥᤃᤢᤸᤗᤧ ᤀᤡᤈᤥ ᤀᤡᤈᤥ ᤔᤧᤗ᤹ᤖᤥ॥ ᤆᤧᤸᤗᤧᤰᤛᤣ᤹ ᤌᤡ᤺ᤸᤗᤧ ᤂᤧᤱᤜᤠ᤹ ᤌ᤺ᤳᤌᤠ ᤔᤧᤒᤥ᤺ᤰᤂᤧᤀᤠᤱ ᤔᤧᤘᤠ᤹ᤖᤥ. ᤂᤧᤱᤜᤠ᤹ ᤌᤡ᤺ᤸᤗᤧ ᤔᤕᤢᤛᤡᤀᤠᤱ ᤀᤡᤈᤥ ᤀᤡᤈᤥ ᤐᤧ᤺ᤱᤃᤰ ᤐᤧ᤺ᤱᤃᤰ ᤔᤧᤗ᤹ᤖᤥ॥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤡᤖᤢᤛᤡᤒᤠ ᤛᤢᤑᤥᤴ ᤔᤧᤏᤡᤛᤢᤸᤗᤧ ᤂᤢᤴᤇᤡ᤹ ᤌᤏᤠ ᤗᤧᤱᤗᤥ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤆᤥ᤺ᤰᤔᤠ ᤔᤧᤃᤥ᤺ᤳᤋᤢᤒᤠ ᤐᤠ᤺ᤴᤏᤡᤴ ᤏᤡ᤺ᤴᤎᤥ ᤆᤥ᤺ᤰᤔᤠ ᤔᤧᤴᤇᤢᤰᤋᤢᤴᤗᤥ॥ 8 ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤁᤧᤖᤧᤰ ᤆᤠᤈᤠᤔᤠᤍᤧᤴ ᤛᤠᤵᤏᤧᤳᤜᤠ᤹ ᤏᤠᤶᤃᤧᤛᤢᤒᤠ ᤐᤧ᤹ᤔᤠ᤺ᤳᤋᤧᤸᤗᤧ ᤋᤡᤶᤛᤧᤀᤠᤱ ᤏᤧᤖᤥ. ᤆᤡ᤺ᤴᤈᤡ᤺ᤴ ᤔᤧᤱᤄᤢ᤺ᤶᤏᤠᤍᤧᤴ ᤗᤳᤌᤡᤰᤁᤠᤱ ᤜᤥᤵᤗᤥ॥ 9 ᤜᤧᤰᤁᤩᤠᤱ ᤀᤰᤂᤣ ᤔᤧᤗ᤹. “ᤂᤧᤸᤗᤧ ᤜᤠᤳ ᤜᤢ᤹ᤔᤠ ᤁᤥ᤺ᤳᤋᤢᤒᤠᤒᤣ᥅ ᤀᤡᤱᤄᤱᤅᤡᤸᤗᤧ ᤁᤢᤒᤣᤴ ᤂᤧᤸᤗᤧ ᤜᤠᤳ ᤐᤥᤎᤰ ᤆᤥᤃᤢ ᤐᤡᤖᤢᤖ ᤐᤵᤐᤠᤒᤣ᥅ ᤌᤣ ᤂᤠᤖᤰ ᤏᤢᤎᤢᤱᤔᤠ ᤁᤧᤗᤧᤵᤐᤠ ᤀᤅᤧ᤺ᤰᤘᤠᤜᤠ᤹ ᤜᤢ᤹ᤖᤢᤛᤡᤒᤠᤒᤡ᥅ ᤀᤡ ᤂᤠᤖᤰ ᤏᤢᤎᤢᤱᤔᤠ ᤗᤧᤵᤔᤠ ᤔᤧᤒᤠᤱᤄᤢᤛᤡᤒᤠ ᤀᤅᤧ᤺ᤰᤘᤠᤜᤠ᤹ ᤜᤢ᤹ᤖᤢᤛᤡᤒᤠᤒᤡ᥅ 10 ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤀᤠᤏᤡ᤹ ᤀᤠᤔᤧᤳᤗᤥ— ᤆᤥᤃᤧᤶᤔᤧ᤹ᤀᤠᤱ ᤕᤢᤅᤧᤶᤔᤧ᤹. ᤆᤥᤃᤧᤶᤔᤧ᤹ᤀᤠᤱ ᤕᤢᤅᤧᤶᤔᤧ᤹ᤀᤥ. ᤜᤧᤰᤁᤩᤠᤱ ᤁ᤹ᤕᤥ ᤆᤒᤧ᤺ᤳᤇᤡᤰ. ᤂᤧ᤹ᤕᤥ ᤆᤒᤧ᤺ᤳᤇᤡᤰ ᤂᤠᤛᤧᤴ ᤗᤥ᤺ᤴᤍᤠᤶᤔᤧ᤹. ᤂᤠᤛᤧᤴ ᤗᤥ᤺ᤴᤍᤠᤶᤔᤧ᤹ᤀᤥ᥄” 11 ᤂᤧᤸᤗᤧᤆᤥᤃᤢᤸᤗᤧ ᤀᤠᤸᤗ ᤘᤣ᤹ ᤐᤠ᤺ᤴᤍᤠᤱᤗᤠᤶᤒᤠ ᤏᤢ ᤘᤣ᤹ ᤁᤢᤛᤡᤱ ᤏᤡ᤺ᤳᤔᤧᤴᤍᤧᤵᤔᤏᤠᤒᤠ ᤐᤠ᤺ᤴᤇᤣᤰᤘᤠᤗᤠᤶᤒᤠ ᤕᤜᤘᤣ ᤍᤠᤱᤒᤠᤴ ᤁᤴ ᤔᤏᤠᤜᤠ᤹ᤏᤢ ᤐᤠ᤺ᤳᤗᤥ॥ 12 ᤋᤃᤡ ᤕᤜᤘᤣ ᤍᤠᤱᤒᤧᤸᤗᤧ ᤁᤴ ᤗᤠᤈᤣ᤹ᤀᤥᤒᤠ ᤔᤏᤠᤜᤠ᤹ ᤔᤧᤳᤋᤢᤛᤡᤖᤥ. “ᤏᤠ᤺ᤶᤛᤡᤱᤔᤠ ᤋᤧᤴᤏᤡᤱᤃ ᤀᤠᤶᤓᤠ ᤁᤴᤗᤥ. ᤁᤧᤏᤠᤒᤠ ᤁᤧᤄᤡ᤺ᤶᤒᤠᤜᤠ᤹ ᤜᤠᤒᤠ ᤁ᤹ᤕᤥ ᤔᤧᤏᤠ᤺ᤶᤛᤡᤱᤗᤖᤥ. ᤌᤣᤀᤠᤱᤓᤧᤸᤗᤧ ᤛᤵᤑᤠᤎᤡᤰ ᤏᤠ᤺ᤶᤛᤡᤱᤔᤠ ᤋᤧᤴᤏᤡᤱᤃ ᤐᤠ ᤁᤴᤗᤥ” ᤜᤧᤰᤁᤣᤛᤠᤱ ᤂᤧᤱᤜᤠ᤹ᤖᤧ ᤂᤧᤶᤔᤠ ᤏᤡᤱᤘᤠ᤹ ᤔᤧᤴᤈᤥᤃᤢᤴᤗᤥ॥ 13 ᤂᤧᤸᤗᤧᤆᤥᤃᤢᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤒᤠ᤺ᤴᤈᤠ᤺ᤰᤁᤡᤴ ᤀᤡᤛᤪᤠᤀᤡᤗ ᤗᤠᤈᤣ᤹ᤀᤥᤒᤠ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤀᤰᤂᤣ ᤁᤧᤒᤥᤱᤒᤠ ᤘᤠ᤹ᤖᤥ— ᤆᤥᤃᤠᤶᤔᤧ᤹ᤀᤠᤱ ᤕᤢᤅᤧᤶᤔᤧ᤹. ᤆᤥᤃᤠᤶᤔᤧ᤹ᤀᤠᤱ ᤕᤢᤅᤧᤶᤔᤧ᤹ᤀᤥ. ᤂᤠᤛᤧᤴ ᤗᤥ᤺ᤴᤍᤠᤶᤔᤧ᤹. ᤂᤠᤛᤧᤴ ᤗᤥ᤺ᤴᤍᤠᤶᤔᤧ᤹ᤀᤥ. ᤀᤠᤈᤧ᤺ᤳᤇᤡᤰ ᤂᤧ᤹ᤕᤥ. ᤀᤠᤈᤧ᤺ᤳᤇᤡᤰ ᤁ᤹ᤕᤥ॥ ᤀᤰᤂᤣᤗ᤹ᤖᤡᤰ ᤂᤧᤱᤜᤠ᤹ ᤋᤃᤡ ᤗᤠᤶᤔᤧᤗᤥᤖᤖᤥ ᤜᤧᤰᤁᤩᤠᤱ ᤔᤧᤃᤧᤱᤅᤠᤱ ᤔᤧᤓᤳᤇᤡᤱᤗᤖᤥ. ᤔᤧᤃᤠ᤺ᤴᤏᤠᤱ ᤆᤧᤴᤏᤥ ᤔᤧᤎᤠᤖ ᤂᤧᤒᤩᤠᤱ ᤔᤧᤍᤧᤶᤛᤢ ᤔᤧᤍᤣ᤹ᤖᤢᤛᤡᤖᤖᤥ॥ ᤛᤡᤕᤥᤏᤖᤧ ᤁᤢᤗᤠᤃᤡ ᤔᤠᤗᤢᤱ 14 ᤂᤧᤸᤗᤧᤆᤥᤃᤢᤸᤗᤧ ᤔᤏᤠᤜᤠ᤹ ᤜᤡᤏᤠ᤺ᤶ ᤁᤧᤔᤧᤵᤐᤠᤛᤣ. ᤂᤧᤏᤡ᤹ ᤕᤖᤢᤛᤗᤧᤔ ᤕᤧᤰᤕᤰᤁᤥ ᤁᤧᤕᤢᤱᤒᤠ ᤔᤏᤠᤜᤠ᤹ ᤕᤢᤰ ᤁᤧᤈᤥᤃᤢᤶᤛᤡᤶᤗᤥ. ᤕᤜᤘᤣ ᤍᤠᤱᤒᤧᤸᤗᤧ ᤁᤢᤒᤠ᤺ᤴᤈᤠ᤺ᤰᤁᤧᤴ ᤂᤧᤵᤛᤠᤶᤔᤧ᤹ᤀᤥ॥ 15 ᤂᤧᤏᤡ᤹ ᤀᤰᤂᤣ ᤁᤧᤒᤠ᤺ᤳᤋᤢᤶᤔᤠᤱ ᤀᤠᤱᤍᤡᤱ ᤁᤧᤗ᤹ᤖᤡᤖᤥ. “ᤛᤡᤔᤧᤴᤏᤢ ᤀᤠᤏᤡᤃᤣ ᤔᤠᤱᤜᤧᤰ ᤆᤥᤃᤢᤶᤒᤧᤀᤠᤱ ᤘᤕᤡᤃᤧᤖᤥ. ᤂᤧᤒᤩᤠᤱ ᤂᤧᤔᤠ ᤕᤱᤛᤱᤅᤡᤴᤏᤢ ᤔᤠᤱᤜᤧᤰ ᤆᤥᤃᤢᤶᤒᤧᤀᤠᤱ ᤘᤕᤡᤃᤧᤖᤥ॥ ᤛᤠ᤹ᤖᤡᤰ ᤕᤶᤒᤠ ᤋᤢᤰᤂᤣᤗᤠᤰᤂᤣ ᤏᤢ ᤛᤡᤔᤧᤴ ᤀᤠᤏᤡᤃᤣ ᤛᤶᤎᤠᤱ ᤋᤠᤛᤠᤱ ᤂᤧᤴ ᤋᤢᤰᤂᤣ ᤗᤠᤰᤂᤣ᤺ᤸᤗᤧ ᤀᤠᤏᤡᤃᤣ ᤔᤧᤛᤢᤛᤡᤃᤧᤴᤗᤥ॥ ᤌᤣᤀᤠᤱᤓᤧᤸᤗᤧ ᤀᤠᤏᤡᤃᤣ ᤀᤡᤱᤗᤧᤰᤁᤣ ᤛᤧ᤺ᤵᤛᤡᤱᤔᤠᤍᤧᤴᤏᤡᤴ ᤀᤡ᤺ᤶᤛᤡᤱᤔᤠᤍᤧᤴ ᤆᤥᤃᤢᤶᤒᤧᤀᤠᤱ ᤘᤕᤡᤃᤧᤖᤥ ᤜᤧᤰᤁᤩᤠᤱ ᤛᤧᤰᤂᤠ ᤔᤣ᤺ᤶᤒᤧᤴ ᤀᤠᤏᤡᤃᤣ ᤆᤡᤱᤛᤡᤱᤔᤠᤍᤧᤴ ᤆᤥᤃᤢᤶᤒᤧᤀᤠᤱ ᤘᤕᤡᤃᤧᤖᤥ॥” 16 ᤂᤧᤸᤗᤧᤆᤥᤃᤢᤸᤗᤧ ᤁᤧᤖᤧᤰᤏᤢ᤺ᤸᤗᤧ ᤕᤶᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤖᤥ. “ᤀᤥᤔᤧᤳᤋᤧᤶᤔᤧ᤹. ᤀᤠᤱᤃᤠ᤹ ᤕᤖᤢᤛᤗᤧᤔ ᤕᤧᤰᤕᤰᤁᤥ ᤗᤳᤇᤠ ᤗᤢᤱᤎᤡᤰ ᤕᤢᤰᤂᤢᤱᤗᤥ॥ ᤜᤧᤰᤁᤩᤠᤱ ᤂᤧᤱᤃ ᤛᤧᤰᤂᤠ ᤆᤥ᤺ᤰᤔᤏᤠᤒᤠ ᤗᤢᤱ ᤌᤎᤵ ᤔᤧᤸᤗ᤹ᤔᤏᤠᤒᤠ ᤜᤡᤶᤐᤠᤱᤕᤰᤗᤧ ᤗᤠᤃᤡ ᤗᤳᤇᤠ ᤁᤢᤛᤢᤰᤐᤥᤒᤠ ᤀᤡᤔᤧᤸᤗᤢᤱᤒᤠ ᤔᤠᤗᤢᤱᤗᤥ॥ ᤂᤧ᤹ᤕᤥ ᤏᤛᤠᤴ ᤁᤧᤈᤥ᤺ᤰᤐᤠ ᤏᤢ ᤏᤡᤱᤘᤠ᤹ ᤁᤧᤕᤢᤱᤒᤠᤜᤠ᤹ ᤀᤠᤵᤑᤠᤸᤗᤧᤀᤠᤱ ᤏᤡᤱᤛᤠᤱ ᤐᤢᤰᤔᤠᤀᤥ ᤔᤧᤴᤎᤠᤏᤧᤴᤗᤥ॥ 17 ᤀᤠᤱᤃᤠ᤹ ᤂᤠᤛᤧᤴᤏᤡᤴ ᤁᤢᤛᤡ᤺ᤰᤔᤠ ᤌᤠᤰᤐᤠ ᤆᤥᤃᤢᤱᤗᤥ. ᤜᤧᤰᤁᤩᤠᤱ ᤛᤠᤶᤕᤥᤏᤡᤔᤠᤴ ᤋᤥ᤺ᤴᤍᤥᤶᤒᤠ ᤁᤢᤛᤡ᤺ᤰᤔᤠ ᤆᤥᤃᤢᤱᤗᤥ॥ ᤑ᤺ᤴᤏᤡᤸᤗᤧ ᤂᤠ ᤂᤧᤏᤡ᤹ ᤀᤡᤱᤗᤧᤰᤁᤣ ᤛᤧ᤺ᤵᤛᤡᤱᤔᤠ ᤋᤧᤴᤏᤡᤴ ᤐᤰᤂᤢ ᤋᤣ᤹ᤖᤢ ᤁᤧᤒᤡᤖᤡᤖᤥ. ᤜᤧᤰᤁᤩᤠᤱ ᤂᤧᤏᤡ᤹ ᤆᤡᤱᤛᤡᤱᤔᤠ ᤋᤧᤴᤏᤡᤴ ᤆᤫᤠ᤺ᤳᤋᤡᤸᤗᤧ ᤜᤢᤶᤛᤢ ᤁᤧᤒᤡᤖᤡᤖᤥ॥ 18 ᤂᤧᤏᤡ᤹ ᤛᤡᤔᤧᤴᤏᤢ ᤁᤧᤈᤥᤃᤢᤶᤒᤠ ᤔᤠᤱᤜᤧᤰᤁᤡᤴ ᤌᤣᤏᤠᤎᤣᤒᤠ ᤐᤥᤱᤗᤥ. ᤜᤧᤰᤁᤩᤠᤱ ᤂᤧᤔᤠ ᤕᤱᤛᤱᤅᤡᤴᤏᤢ ᤁᤧᤈᤥᤃᤢᤶᤒᤠ ᤔᤠᤱᤜᤧᤰᤁᤡᤸᤗᤧᤀᤠᤱ ᤕᤖᤡᤰ ᤀᤡᤍᤡᤰ ᤔᤧᤎᤖᤢᤴᤗᤥ॥ ᤕᤶᤒᤠ ᤋᤢᤰᤂᤣᤗᤠᤰᤂᤣ ᤏᤢ ᤔᤧᤰᤔᤠᤛᤡᤔᤠ ᤁᤧᤍᤠ᤺ᤵᤐᤠ ᤆᤫᤠ᤺ᤳᤋᤡᤴ ᤁᤳᤏᤠᤗᤠᤶᤒᤠ ᤁᤢᤱᤓᤧᤴᤏᤠᤱ ᤂᤧᤸᤗᤧ ᤂᤧᤏᤡ᤹ ᤁᤧᤜᤢᤶᤛᤡᤖᤥ॥ 19 ᤀᤠᤵᤑᤠᤸᤗᤧᤛᤠᤱ ᤂᤧᤴ ᤆᤫᤠ᤺ᤳᤋᤡᤴ ᤁᤢᤱᤓᤧᤴᤏᤧᤸᤗᤧ ᤂᤧᤴ ᤆᤫᤠ᤺ᤳᤋᤡᤸᤗᤧ ᤂᤧᤏᤡ᤹ ᤁᤧᤒᤰᤂᤡ ᤁᤧᤍᤣ᤹ᤖᤡᤖᤥ॥ ᤋᤠᤏᤠᤶ ᤌᤰᤔᤠ ᤜᤧᤰᤁᤩᤠᤱ ᤛᤧᤴᤍᤡᤰ ᤗᤧᤴᤍᤡᤰ ᤂᤧᤴ ᤆᤫᤠ᤺ᤳᤋᤡᤴ ᤂᤧᤏᤡ᤹ᤏᤠ ᤁᤢᤱᤓᤧᤴᤗᤥ॥” ᤁᤴ ᤀᤡᤱᤄᤱᤅᤡᤸᤗᤧ ᤌᤧᤔᤠ ᤐᤠ᤺ᤵᤔᤠ ᤁᤥ᤺ᤳᤋᤢᤒᤠ᥅ ᤂᤧᤸᤗᤧ ᤁᤢᤒᤣᤴ ᤁᤢᤛᤡᤱ ᤏᤡ᤺ᤵᤔᤠᤸᤗᤧᤃ ᤛᤠ᤹ᤖᤡᤰ ᤁᤡᤔᤠ ᤕᤱᤔᤠ ᤐᤥᤱᤗᤥ॥ 20 ᤛᤸᤗᤡᤰ ᤛᤴᤇᤡᤱᤔᤠᤖ ᤏᤧᤔᤠᤖᤧ ᤗᤠᤃᤡ ᤏᤧᤳᤏᤠᤍᤧᤴᤏᤡᤴ ᤛᤠ᤹ᤖᤡᤰ ᤋᤠᤱᤒᤠ ᤐᤥᤱᤗᤥ. ᤀᤠᤒᤠᤅᤣ ᤗᤠᤃᤡ ᤂᤠᤶᤔᤠ ᤂᤠᤶᤍᤣ᤺ᤳᤋᤡᤴ ᤛᤠ᤹ᤖᤡᤰ ᤆᤢ᤺ᤰᤐᤠ ᤐᤥᤱᤗᤥ॥ 21 ᤕᤜᤘᤣ ᤍᤠᤱᤒᤠᤴ ᤐᤖᤠᤈᤡᤔ ᤁᤥ᤺ᤰᤔᤠᤀᤥ ᤐᤗᤡᤛ᤻ᤋᤡᤜᤠ᤹ᤖᤧ ᤂᤢᤴᤇᤡ᤹ ᤋᤰᤗᤧᤱᤘᤠᤀᤥ ᤌᤰᤋᤧᤒᤠ ᤁᤢᤀᤡᤛᤡᤰ ᤜᤧᤰᤁᤩᤠᤱ ᤃᤡᤒᤥᤏᤒᤠ ᤋᤧᤶᤒᤣ᤹ᤀᤥ ᤀᤣᤔᤥᤖᤡᤜᤠ᤹ᤖᤧ ᤂᤢᤴᤇᤡ᤹ ᤋᤰᤗᤧᤱᤘᤠᤀᤥ ᤌᤰᤋᤧᤒᤠ ᤁᤢᤀᤡᤛᤡᤰ ᤋᤠᤖᤥ॥ ᤂᤢᤏᤧ᤹ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰ ᤆᤥ᤺ᤰᤔᤠᤖᤧ ᤗᤠᤃᤡ. ᤘᤣ᤹ ᤐᤖᤡᤰᤗᤧ ᤕᤠ᤺ᤶᤒᤰ ᤆᤥ᤺ᤰᤔᤠᤖᤧ ᤗᤠᤃᤡ ᤋᤠᤖᤥ॥ 22 ᤀᤠᤸᤗ ᤂᤧᤏᤡ᤹ ᤁᤢᤏᤠᤔᤧᤴᤇᤠ᤹ ᤐᤠ᤺ᤵᤔᤠ ᤗᤧᤖᤠᤶᤔᤧ᤹ᤀᤥ. ᤔᤣ᤺ᤴᤏᤧᤓᤃᤪ ᤂᤧᤏᤡ᤹ ᤁᤧᤶᤄᤣ᤺ᤰᤂᤡᤒᤠ ᤑᤧᤴᤌᤰᤁᤪᤱᤅᤡᤴ ᤀᤠᤸᤗᤛᤠᤱ ᤛᤠ᤹ᤖᤡᤰ ᤁᤧᤗᤡ᤺ᤵᤐᤠ ᤐᤥᤱᤗᤥ॥ ᤕᤜᤘᤣ ᤍᤠᤱᤒᤠ. ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤁᤧᤖᤧᤰ ᤗᤠᤈᤣᤴ ᤔᤧᤰ ᤑᤠ᤹ᤀᤠᤱ ᤀᤠᤱᤃᤠ᤹ ᤔᤧᤳᤋᤠᤱᤅᤠᤱ ᤘᤠ᤹ᤖᤥ॥ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤛᤡᤰᤁᤢᤶᤛᤠᤒᤠ ᤆᤥᤰ 23 ᤀᤠᤱᤃᤠ᤹ ᤐᤠ᤺ᤳᤋᤢᤱᤒᤠ ᤐᤠ᤺ᤴᤏᤡᤴ ᤏᤢ ᤀᤠᤀᤡᤰᤗᤠᤴ ᤂᤧᤵᤛᤠᤶᤔᤧ᤹ᤀᤥ. ᤛᤡᤱᤛᤡᤱ ᤗ᤹ᤖᤡᤰ ᤏᤢᤖᤡᤰᤁᤠᤱ ᤀᤠᤱᤃᤠ᤹ ᤀᤠᤒᤠ᤺ᤴᤏᤡᤴ ᤂᤧᤵᤛᤠᤶᤔᤧ᤹ᤀᤥ॥ 24 ᤜᤧᤰᤁᤩᤠᤱ ᤀᤡᤰᤔᤛᤠᤒᤠ ᤔᤏᤠᤜᤠ᤹ᤖᤧ ᤁᤢᤈᤠ ᤗᤣ᤺ᤵᤔᤠ ᤀᤡᤃᤪ ᤜᤣ᤹ᤔᤠᤖᤧ ᤗᤠᤃᤡ ᤂᤠᤶᤒᤣ᤺ᤰᤁᤡᤴ ᤔᤧᤍᤥ᤺ᤰᤂᤢᤸᤗᤧ ᤌᤣ ᤂᤧᤱᤜᤠ᤹ᤖᤧ ᤀᤠᤓᤧᤸᤗᤧᤛᤠᤱ ᤜᤠᤒᤠ ᤔᤧᤍᤥ᤺ᤰᤂᤢᤀᤠᤱᤗᤰ ᤔᤧᤕᤠᤰᤐᤡ᥅ ᤂᤧᤒᤩᤠᤱ ᤂᤧᤱᤜᤠ᤹ᤖᤧ ᤆᤰᤔᤧᤸᤗ᤹ᤀᤣ ᤂᤠᤶᤔᤡᤴ ᤔᤧᤀᤃᤢᤀᤠᤱ ᤂᤠᤶᤒᤰᤏᤠᤴ ᤔᤧᤜᤡᤵᤋᤢᤀᤠᤱᤗᤰ ᤔᤧᤕᤠᤰᤐᤡ᥅ 25 ᤂᤧᤱᤜᤠ᤹ᤖᤧ ᤂᤠᤶᤔᤧᤴ ᤗᤧᤵᤐᤧᤵᤐᤠ ᤔᤧᤈᤥᤃᤢᤖᤥ ᤜᤧᤰᤁᤩᤠᤱ ᤌᤣ ᤂᤧᤱᤜᤠ᤹ᤖᤧ ᤁᤢᤏᤠᤶ ᤁᤧᤏᤢ᤹ᤒᤠ ᤔᤠᤖᤢᤰᤁᤧᤴ ᤏᤢ ᤛ᤺ᤵᤑᤠᤴ ᤔᤧᤴᤜᤣ᤹ᤖᤢᤴᤒᤡ᥅ ᤂᤧᤱᤜᤠ᤹ᤖᤧ ᤛᤡᤴ ᤜᤠᤒᤠ ᤂᤧ᤹ᤕᤥ ᤔᤧᤴᤜᤣ᤹ᤖᤢᤴᤒᤡ᥅ ᤂᤧᤒᤩᤠᤱ ᤜ᤺ᤰᤛᤡᤴ ᤀᤠᤶᤓᤠ ᤂᤧᤴ ᤔᤠᤛᤡ᤺ᤸᤗᤧ ᤁᤢᤕᤢᤰᤏᤠᤀᤥ ᤔᤧᤸᤗᤣ᤺ᤳᤋᤢᤶᤒᤡ᥅ ᤂᤧᤒᤩᤠᤱ ᤘᤖᤧᤱᤗᤧᤱᤒᤠ ᤔᤠᤛᤡᤴ ᤐᤩᤠᤱᤛᤡᤀᤥ ᤔᤧᤴᤜᤣ᤹ᤖᤢᤴᤒᤡ᥅ 26 ᤀᤠᤒᤠᤅᤣ ᤁᤢᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤢᤏᤧ᤹ ᤁᤢᤍᤥ᤺ᤵᤔᤠ ᤏᤡᤛᤠᤶ ᤜᤢ᤹ᤖᤢᤖᤥ ᤜᤧᤰᤁᤩᤠᤱ ᤁᤧᤘᤠ᤹ᤒᤠ ᤛᤡᤰᤁᤢᤶ ᤏᤡᤱᤘᤠ᤹ ᤐᤡᤖᤢᤀᤠᤱ ᤕᤠ᤺ᤶᤒᤰ ᤆᤥ᤺ᤰᤔᤠ ᤜᤢ᤹ᤖᤢᤖᤥ॥ 27 ᤀᤠᤳᤋᤡᤸᤗᤧᤀᤠᤱ ᤁᤢᤏᤠᤶ ᤁᤧᤏᤢ᤹ᤒᤠ ᤛ᤺ᤵᤑᤠᤴ ᤛᤢᤵᤛᤢᤸᤗᤧ ᤕᤶᤒᤠ ᤔᤖ᤺ᤱᤃᤩᤠ᤺ᤸᤗᤧ ᤔᤧᤜᤡᤵᤋᤢᤴᤗᤥ. ᤜᤧᤰᤁᤩᤠᤱ ᤐᤡᤳᤗᤠᤎᤠ᤺ᤸᤗᤧ ᤁᤢᤃᤠᤵᤗᤥ᤺ᤰᤁᤧᤸᤗᤧ ᤛ᤺ᤵᤑᤠᤴ ᤔᤧᤏᤢᤃᤢᤴᤗᤥ॥ ᤁᤖ ᤁᤢᤏᤠᤶ ᤁᤧᤏᤢ᤹ᤒᤠ ᤛ᤺ᤵᤑᤠᤴ ᤋᤰᤁᤠ᤺ᤳᤋᤡᤸᤗᤧ ᤂᤧᤒᤩᤠᤱ ᤛ᤺ᤵᤑᤠ᤺ᤱᤃ ᤗᤳᤇᤠ ᤆᤢᤰᤛᤠ ᤋᤰᤁᤠ᤺ᤳᤋᤡᤸᤗᤧ ᤜᤡᤵᤋᤢᤖᤥ॥ 28 ᤂᤖᤧ᤺ᤱ ᤗᤧ᤺ᤱᤔᤠ ᤆᤠ᤺ᤴ ᤗᤢᤱᤛᤢᤶᤔᤥ ᤕᤢ᤺ᤵᤔᤠᤀᤣ ᤐᤥᤱᤗᤥ. ᤜᤧᤰᤁᤩᤠᤱ ᤔᤏᤠᤜᤠ᤹ᤖᤧ ᤆᤠᤏᤢᤰᤔᤠᤖᤧ ᤗᤠᤃᤡ ᤐᤡᤳᤗᤠᤎᤠ᤺ᤸᤗᤧ ᤁᤢᤃᤠᤵᤗᤥ᤺ᤰᤜᤠ᤹ ᤂᤢᤴᤇᤡ᤹ ᤀᤴᤜᤠ᤹ ᤂᤧᤴ ᤆᤠ᤺ᤴ ᤛᤶᤎᤠᤱ ᤀᤢ᤺ᤱᤔᤠ ᤔᤧᤒᤠᤱᤄᤢᤛᤡᤛᤠᤱ ᤂᤧᤴ ᤑᤣ᤹ᤖᤢᤶ ᤔᤧᤒᤥᤱᤏᤧᤴᤗᤥ॥ 29 ᤋᤠᤕᤧᤶᤔᤥ ᤁᤴ ᤁᤧᤖᤧᤰ ᤐᤠ᤺ᤴᤜᤠ᤹ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤠᤴ ᤗᤠᤶᤔᤣ ᤐᤥᤱᤗᤥ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ᤀᤣ ᤛᤢᤈᤠ ᤐᤡᤔᤠᤀᤥ ᤏᤡᤱᤘᤠ᤹ ᤁᤧᤔᤠᤒᤠ ᤏᤢ ᤛᤡᤰᤁᤢᤶᤛᤠᤒᤠ ᤆᤥᤰᤗᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.