ᤕᤛᤤᤕᤠ 27 - LIFOTNT

ᤀᤡᤛᤪᤠᤀᤡᤗᤡᤜᤠ᤹ᤖᤧ ᤆᤥ᤺ᤰᤕᤢᤶᤓᤥ ᤔᤧᤄᤥᤛᤢ

¹ ᤂᤧᤴ ᤕᤧᤴᤏᤥ ᤕᤜᤘᤣ ᤍᤠᤱᤒᤧᤸᤗᤧ ᤁᤡᤵᤔᤠ ᤁᤧᤄᤢᤒᤠ ᤜᤧᤰᤁᤩᤠᤱ ᤁᤢᤔᤢᤰ ᤁᤧᤕᤠᤰᤐᤠ ᤏᤢ ᤕᤶᤒᤠ ᤋᤠᤓᤣ᤺ᤸᤗᤧ ᤂᤧᤴ ᤂᤀᤡᤰ ᤂᤀᤡᤰ ᤁᤧᤀᤡᤰᤛᤡᤱᤒᤠ ᤁᤧᤀᤢ᤺ᤱᤛᤡᤱᤒᤠᤖ ᤗᤠᤱᤃᤧᤄᤣ᤺ᤰᤐᤠ. ᤘᤖ᤺ᤱᤅᤥ ᤁᤧᤕᤠᤰᤐᤠ ᤀᤠᤈᤠᤈᤠᤒᤠ ᤗᤡᤒᤩᤠᤋᤠᤏᤧᤴ ᤐᤠᤰᤗᤧ ᤐᤠᤰᤗᤧ ᤆᤩᤧᤵᤋᤢᤖᤥ. ᤂᤧᤒᤩᤠᤱ ᤘᤖ᤺ᤱᤅᤥ ᤂᤧᤴ ᤁᤧᤘᤧ᤺ᤱᤛᤡᤱᤒᤠᤀᤠᤱ ᤁᤧᤕᤢᤱᤒᤠ ᤀᤛᤣ᤺ᤰᤐᤧᤴ ᤂᤢᤶᤍᤡᤱ ᤐᤡᤖᤢᤀᤠᤱ ᤛᤩᤧᤖᤢᤖᤥ॥

² ᤂᤧᤴ ᤕᤧᤴᤏᤥ. “ᤁᤢᤈᤠ᤹ ᤁᤧᤎᤥ᤺ᤰᤐᤠ ᤗᤳᤇᤠ ᤏᤢᤒᤠ ᤆᤧᤸᤗᤧᤰᤛᤣ᤹ ᤀᤡᤰᤁᤧᤸᤗᤧ ᤁᤢᤕᤠ᤺ᤶᤒᤣᤀᤥ ᤂᤧᤏᤡ᤹ ᤛᤠᤶᤗᤥᤖᤠᤶᤔᤧ᤹ᤀᤥ॥

³ ᤀᤠᤱᤃᤠ᤹. ᤕᤜᤘᤣ ᤍᤠᤱᤒᤧᤸᤗᤧ ᤂᤧᤴ ᤆᤧᤸᤗᤧᤰᤛᤣ᤹ ᤀᤡᤰᤁᤡᤴ ᤛᤠ᤺ᤰᤋᤢᤱᤗᤥ. ᤀᤠᤱᤃᤠ᤹ ᤂᤧ᤹ᤕᤥ ᤌᤡᤰᤕᤠ᤺ᤴᤎᤰ ᤆᤫᤠ᤺ᤳ ᤁᤣ᤺ᤳᤋᤢᤱᤗᤥ॥ ᤀᤠᤱᤃᤠ᤹ ᤂᤧᤴ ᤆᤧᤸᤗᤧᤰᤛᤣ᤹ ᤀᤡᤰᤁᤧᤴ ᤛᤧᤴᤍᤡᤰ ᤗᤧᤴᤍᤡᤰ ᤁᤥᤛᤢᤱᤗᤥ. ᤔᤣ᤺ᤴᤏᤧᤓᤃᤪ ᤔᤏᤠᤜᤠ᤹ᤖᤧ ᤂᤧᤴ ᤀᤡᤰᤋᤠᤵᤐᤡᤴ ᤔᤧᤍᤥ᤹ᤖᤢ ᤔᤧᤗᤠ᤺ᤰᤋᤢᤖᤥ॥

⁴ ᤀᤠᤱᤃᤠ᤹ ᤀᤠᤸᤗ ᤀᤠᤕᤠᤰ ᤔᤧᤸᤗᤧ᤹ᤀᤣ ᤘᤠ᤹ᤀᤠᤖᤥ. ᤛᤣᤷᤍᤠ᤺ᤰᤔᤠᤜᤠ᤹ ᤏᤢ ᤋᤡᤱᤜᤠ᤹ ᤀᤠᤱᤃᤠ᤹ ᤀᤠᤎᤣ᤺ᤰᤛᤧ ᤗᤡᤅᤧᤒᤠᤏᤧᤓᤃᤪ ᤂᤧᤴ ᤋᤡᤱᤜᤠ᤹ ᤏᤢ ᤛᤣᤷᤍᤠ᤺ᤰᤔᤠᤜᤠ᤹ ᤗᤧ᤺ᤱᤔᤠ ᤛᤧᤵᤔᤠᤖᤧ ᤗᤠᤃᤡ ᤌᤱ ᤆᤥ᤺ᤰᤛᤧ ᤀᤠᤱᤃᤠ᤹ ᤐᤣ᤺ᤰᤁᤠᤔᤧᤴᤗᤥ. ᤜᤧᤰᤁᤩᤠᤱ ᤀᤠᤱᤃᤠ᤹ ᤋᤡᤱᤜᤠ᤹ ᤏᤢ ᤛᤣᤷᤍᤠ᤺ᤰᤜᤠ᤹ ᤔᤡᤎᤡᤰᤂᤢᤱ ᤛᤧᤖᤢᤱᤔᤧᤴᤗᤥ॥

⁵ ᤂᤧᤱᤜᤠ᤹ ᤀᤠᤱᤃᤠ᤹ᤀᤥ ᤛᤧ᤺ᤵᤛᤡᤱᤛᤧ ᤔᤧᤍᤠᤀᤠᤱ ᤏᤠᤍᤱ ᤔᤧᤈᤥ᤺ᤰᤗᤖᤥ. ᤀᤥᤘᤠ. ᤜᤧᤰᤁᤣᤗ᤹ᤖᤡᤰ ᤂᤧᤱᤜᤠ᤹ ᤀᤠᤱᤃᤠ᤹ᤏᤢ ᤔᤧᤍᤱᤗᤖᤥ॥”

⁶ ᤁᤧᤍᤠᤒᤠ ᤕᤧᤴᤜᤠ᤹ᤀᤥ ᤕᤠᤁᤢᤒᤖᤧ ᤁᤢᤛ᤻ᤛᤠᤜᤠ᤹ ᤀᤡᤛᤪᤠᤀᤡᤗᤒᤠ ᤔᤏᤠᤜᤠ᤹ ᤛᤡᤱᤒᤢᤱ ᤁᤢᤀᤡᤛᤡᤰ ᤁᤢᤛᤠ᤺ᤵ ᤔᤧᤗᤣ᤺ᤳᤇᤡᤱᤗᤥ. ᤜᤧᤰᤁᤩᤠᤱ ᤛᤡᤱᤒᤢᤱᤅᤡᤴ ᤑᤧᤰᤁᤠᤱ ᤁᤢᤈᤠ᤹ᤀᤡᤸᤗᤧ ᤌᤡᤶᤛᤢᤒᤠ ᤜᤧᤰᤁᤣ ᤂᤧᤱᤜᤠ᤹ ᤔᤧᤒᤥᤴ ᤔᤧᤎᤧ᤹ᤖᤥ. ᤂᤧᤒᤩᤠᤱ ᤁᤠᤰ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤁᤡᤴ ᤔᤧᤎᤡᤶᤛᤢᤖᤥ॥

⁷ ᤕᤜᤘᤣ ᤍᤠᤱᤒᤧᤸᤗᤧ ᤀᤡᤛᤪᤠᤀᤡᤗᤧᤴ ᤂᤢᤏᤧ᤹ ᤁᤢᤏᤡᤱᤔᤡᤜᤠ᤹ ᤜᤧᤰᤁᤣ ᤁᤧᤛᤠᤰᤐᤠ ᤂᤢᤶᤍᤡᤱ ᤐᤡᤖᤢᤒᤠ ᤜᤥᤵᤗᤥ ᤜᤧᤰᤁᤩᤠᤱ ᤂᤧᤶᤓᤩᤠᤖᤡᤰ ᤕᤖᤡᤰ ᤁᤢᤔᤏᤠᤜᤠ᤹ᤀᤠᤱ ᤛᤩᤧᤖᤢᤛᤡᤒᤠ ᤜᤥᤵᤗᤥ॥

⁸ ᤂᤢᤏᤧ᤹ ᤁᤢᤔᤏᤠᤜᤠ᤹ ᤂᤢᤶᤍᤡᤱ ᤐᤡᤔᤠᤛᤡ ᤑᤠ᤹ᤀᤠᤱ ᤘᤣ᤹ ᤗᤠᤈᤣ᤹ᤀᤥ ᤔᤧᤍᤧᤶᤛᤢ ᤔᤧᤍᤣ᤹ᤖᤢᤛᤡᤖ ᤕᤠ᤺ᤴᤍᤢᤛᤡᤖᤥ॥ ᤏᤠᤱᤃᤧᤴ ᤐᤡᤛᤠᤱᤒᤠ ᤁᤡᤵᤔᤠ ᤁᤧᤄᤢᤒᤠ ᤛᤠᤶᤔᤡ᤺ᤳ ᤁᤣᤈᤱᤅᤡᤸᤗᤧ ᤜᤧᤰᤁᤣ ᤂᤧᤴᤜᤠ᤹ ᤔᤢ᤺ᤳᤋᤢᤍᤣᤛᤢᤛᤡᤖᤥ॥

⁹ ᤀᤠᤶᤓᤠ ᤁᤸᤗᤧᤀᤣ ᤀᤡᤛᤪᤠᤀᤡᤗᤒᤠ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤗᤠᤕᤥᤴ ᤗᤧᤵᤔᤡ ᤆᤥᤃᤢᤖᤥ. ᤜᤧᤰᤁᤩᤠᤱ ᤂᤧᤸᤗᤧ ᤁᤢᤗᤠᤕᤥᤴ ᤔᤠ᤺ᤱᤄᤠ ᤐᤥᤱᤒᤠ ᤔᤡᤰᤛᤣ᤺ᤴᤏᤡᤱᤃ ᤂᤧᤸᤗᤧ ᤗᤧᤳᤋᤡ ᤋᤥ᤺ᤶᤔᤠ ᤋᤧᤴᤜᤠ᤹ᤀᤥᤒᤠ ᤁᤧᤖᤧᤰ ᤗᤢᤱᤜᤠ᤹ ᤂᤖᤡ-ᤗᤢᤱ ᤁᤢᤀᤡᤛᤡᤰ ᤑᤕ᤹ᤑᤕ᤹ ᤕ᤺ᤵᤛᤢᤍᤣᤛᤢᤖᤥ. ᤂᤧᤒᤩᤠᤱ ᤀᤛᤣᤖᤠ ᤔᤠᤱᤅᤡᤸᤗᤧ ᤁᤢᤛᤡᤳᤗᤠᤱᤜᤠ᤹ ᤏᤢ ᤛᤠᤱᤛᤡᤱ ᤛᤢᤰᤐᤠ ᤜᤠ᤺ᤶᤔᤠ ᤋᤧᤖᤧ᤺ᤱᤜᤠ᤹ ᤗᤳᤇᤠᤀᤠᤱ ᤋᤰᤐᤧᤳ ᤔᤧᤕᤢᤰᤂᤢᤸᤗᤥ॥

¹⁰ ᤁᤶᤒᤪᤠᤱ ᤔᤧᤔᤧᤳᤋᤢᤛᤡᤒᤠ ᤕᤧᤰᤕᤰᤜᤠ᤹ ᤔᤢᤖᤧᤰ ᤂᤠᤖᤧᤰ ᤏᤢ ᤆᤡᤈᤡ ᤂᤰᤂᤰ ᤐᤥ᤺ᤰᤂᤧᤖᤥ. ᤜᤧᤰᤁᤩᤠᤱ ᤔᤏᤠᤜᤠ᤹ᤖᤧ ᤔᤧᤗᤧᤖᤢᤒᤠ ᤏᤢ ᤕᤠᤱᤎᤥ᤺ᤰᤔᤠ ᤔᤧᤏᤠ᤹ᤖᤢᤒᤠ ᤀᤣ᤺ᤰᤛᤠᤍᤧᤴ ᤁᤢᤀᤡᤛᤡᤰ ᤐᤥ᤺ᤰᤂᤧᤖᤥ॥ ᤂᤧ᤹ᤕᤥ ᤐᤡᤳᤛᤠ᤺ᤳᤜᤠ᤹ ᤆᤠᤔᤧᤖᤠᤶᤗᤥ. ᤂᤧᤴ ᤐᤡᤳᤜᤠ᤹ ᤂᤧ᤹ᤕᤥ ᤔᤧᤏᤠ᤺ᤶᤛᤡᤱᤗᤥ ᤜᤧᤰᤁᤩᤠᤱ ᤂᤧᤴ ᤐᤡᤳᤜᤠ᤹ᤖᤧ ᤂᤧ᤹ᤕᤥ ᤁᤧᤕᤢᤱᤒᤠ ᤛᤡᤱᤅᤡᤸᤗᤧ ᤁᤢᤒᤥᤖᤠ᤺ᤰᤜᤠ᤹ ᤔᤧᤗᤧᤴᤍᤢᤖᤥ. ᤂᤧᤒᤩᤠᤱ ᤁᤢᤓᤧᤰᤘᤠᤴ ᤔᤧᤈᤀᤠᤱ ᤔᤢᤖᤧᤰ ᤂᤠᤖᤧᤰ ᤔᤧᤈᤥᤃᤢᤖᤥ॥

¹¹ ᤜᤧᤰᤁᤣᤗ᤹ᤖᤡᤰ ᤂᤧ᤹ᤕᤥᤒᤠ ᤆᤢᤈᤢᤰᤛᤠ ᤛᤡᤱᤒᤥᤖᤠ᤺ᤰᤜᤠ᤹ ᤜᤣᤀᤠᤱ ᤔᤧᤀᤧᤰᤂᤢᤖᤥ. ᤂᤧᤒᤩᤠᤱ ᤔᤧᤴᤇᤢᤔᤠᤜᤠ᤹ ᤔᤧᤍᤠᤀᤠᤱ ᤔᤡᤀᤥ ᤛᤡᤱ ᤔᤧᤜᤠ᤺ᤴᤍᤢᤖᤥ॥ ᤌᤣᤀᤠᤱᤓᤧᤸᤗᤧ ᤁᤱᤜᤠ᤹ᤃ ᤛᤡᤰᤁᤢᤶ ᤏᤡᤱᤘᤠ᤹ ᤁᤧᤜᤥᤵᤐᤠ ᤗᤳᤇᤠ ᤛᤢᤘᤠᤱᤛᤡᤖᤥ ᤂᤧᤸᤗᤧᤆᤥᤃᤢᤸᤗᤧ ᤂᤢᤴᤇᤡ᤹ ᤁᤧᤈᤥ᤺ᤰᤐᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤱᤜᤠ᤹ ᤗᤢᤱᤔᤠ᤹ ᤔᤧᤍᤢᤰᤋᤢᤛᤡᤴᤗᤥ ᤂᤧᤒᤩᤠᤱ ᤂᤢᤴᤇᤡ᤹ ᤏᤠᤘᤠᤃᤧᤴ ᤆᤀᤡ᤺ᤳ ᤁᤧᤈᤥᤰᤐᤧᤴ ᤂᤧᤱᤜᤠ᤹ᤀᤥ ᤁᤢᤗᤢᤱᤔᤠᤛᤩᤠ᤺ᤳ ᤔᤧᤗ᤹ᤏᤧᤴᤗᤥ॥

¹² ᤂᤧᤴ ᤕᤧᤴᤏᤥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤏᤠᤜᤠ᤹ ᤕᤢᤑᤪᤣᤋᤡᤛ ᤘᤜ᤺ᤱᤅᤠᤱ ᤁᤳᤏᤠ ᤔᤡᤛᤪ ᤗᤠᤈᤣ᤹ᤒᤠ ᤘᤜ᤺ᤱ ᤌᤠᤖᤡᤰ ᤁᤢᤓᤠ ᤔᤏᤠᤜᤠ᤹ ᤑᤢᤰᤂᤢᤛᤡ. ᤜᤧᤰᤁᤩᤠᤱ ᤀᤡᤛᤪᤠᤀᤡᤗᤒᤠ ᤔᤏᤠᤛᤣ. ᤂᤧᤏᤡ᤹ᤃ ᤁᤢᤓᤠ ᤔᤏᤠᤜᤠ᤹ᤖᤧ ᤛᤡᤴ ᤁᤢᤛᤡᤵᤐᤥᤗᤠᤶ ᤁᤢᤈᤠ᤹ᤜᤠ᤹ ᤗᤳᤇᤠ ᤗᤳᤇᤠ ᤔᤧᤛᤣᤃᤢ ᤔᤧᤗ᤺ᤳᤋᤢᤒᤠ ᤜᤧᤰᤁᤣ ᤁᤧᤶᤓᤢᤰᤂᤡ᤹॥

¹³ ᤜᤧᤰᤁᤣᤗ᤹ᤖᤡᤰ ᤂᤧᤴ ᤕᤧᤴᤏᤡᤴ ᤋᤠ᤺ᤸᤗᤧ ᤀᤡᤛᤪᤠᤀᤡᤗᤡᤜᤠ᤹ ᤀᤢ᤺ᤵᤔᤠᤛᤡᤖᤧ ᤗᤠᤃᤡ ᤗᤳᤇᤠ ᤕᤶᤒᤠ ᤌᤢᤳᤌᤢᤖᤡ᤺ᤵᤐᤠᤴ ᤗᤠᤀᤡᤰ॥ ᤜᤧᤰᤁᤩᤠᤱ ᤀᤛ᤻ᤛᤢᤖ ᤏᤢ ᤔᤡᤛᤪ ᤗᤠᤈᤣ᤹ᤀᤥ ᤔᤧᤗ᤺ᤳᤋᤢᤛᤡᤀᤠᤱ ᤁᤧᤘᤠ᤹ᤒᤠ ᤀᤡᤛᤪᤠᤀᤡᤗᤡ ᤛᤢᤘᤠᤱᤜᤠ᤹ ᤔᤧᤍᤠᤀᤠᤱ ᤕᤖᤢᤛᤗᤧ᤺ᤶᤒᤠ ᤛᤣᤛᤣ ᤛᤡᤕᤥᤏ ᤁᤥ᤺ᤰᤔᤠᤀᤥ ᤕᤜᤘᤣ ᤍᤠᤱᤒᤠᤴ ᤛᤧᤘᤠ ᤔᤧᤔᤧᤳᤋᤢᤖᤥ॥