ᤕᤛᤤᤕᤠ 26 - LIFOTNTᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤏᤠᤜᤠ᤹ ᤌᤱ ᤁᤧᤏᤠ᤺ᤶᤒᤠ ᤆᤥᤃᤢᤛᤡ᤹ 1 ᤕᤜᤢᤍᤠ ᤗᤠᤈᤣ᤹ᤀᤥ ᤔᤏᤠᤜᤠ᤹ᤖᤧ ᤁᤴ ᤛᤠᤶᤗᤥᤴ ᤛᤠᤶᤔᤧᤵᤔᤠ ᤕᤧᤴᤏᤡᤴ ᤋᤠᤖ ᤐᤳᤗᤥ— ᤀᤠᤏᤡ᤹ ᤕᤧᤰᤕᤰᤁᤡᤴ ᤗᤢᤱᤎᤠᤰᤁᤡᤸᤗᤧ ᤁᤒᤪᤡᤱ ᤁᤒᤢᤒᤠ ᤗᤡᤔᤠ ᤛᤢᤰᤔᤧᤴᤍᤧᤵᤔᤏᤠᤒᤠ ᤆᤥᤰᤗᤥ॥ ᤀᤠᤏᤡ᤹ᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤧᤴᤗᤵᤐᤡᤸᤗᤧ ᤁᤢᤗᤢᤱᤎᤠᤰᤜᤠ᤹ᤖᤧ ᤁᤒᤪᤡᤱ ᤀᤠᤃᤒᤧᤀᤠᤱ ᤘᤠ᤹ᤖᤥ॥ 2 ᤕᤧᤰᤕᤰᤁᤥᤒᤠ ᤕᤶᤒᤠ ᤗᤠᤶᤎᤣ᤺ᤳᤜᤠ᤹ ᤜᤴᤍᤧ᤹ᤀᤥ ᤜᤧᤰᤁᤩᤠᤱ ᤛᤠᤶᤕᤥᤒᤠ ᤔᤧᤴᤇᤠᤶ ᤛᤢᤘᤠᤱ. ᤀᤡᤃᤪ ᤏᤛᤠ᤺ᤴᤛᤠᤒᤠᤜᤠ᤹ ᤗᤠ᤺ᤵᤔᤠ ᤔᤧᤛᤢᤰᤗᤖᤥ॥ 3 ᤀᤠᤳᤋᤡᤸᤗᤧ ᤁᤢᤏᤡᤱᤘᤠᤴ ᤂᤧᤏᤧ᤹ᤀᤥ ᤀᤡᤃᤣ᤺ᤰ ᤗ᤹ᤀᤠᤱ ᤐᤳ. ᤂᤧᤴ ᤔᤏᤠᤴ ᤏᤢᤖᤡᤰᤁᤠᤱ ᤛᤏᤠᤖᤢᤱᤅᤥ ᤁᤧᤃᤳᤋᤢᤖᤥ. ᤌᤣᤀᤠᤱᤓᤧᤸᤗᤧ ᤂᤧᤴ ᤔᤏᤠ᤺ᤸᤗᤧ ᤁᤢᤏᤡᤱᤘᤠᤴ ᤂᤧᤏᤧ᤹ᤀᤥ ᤕᤢᤰᤂᤢᤀᤠᤱ ᤘᤠ᤹ᤖᤥ॥ 4 ᤀᤠᤑᤠᤸᤗᤧᤛᤠᤱ ᤕᤜᤘᤣ ᤍᤠᤱᤒᤠᤀᤥ ᤂᤧᤏᤧ᤹ ᤁᤧᤏᤡᤱᤘᤠᤴ ᤕᤢᤰᤂᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤠ. ᤕᤜᤘᤣ ᤍᤠᤱᤒᤧᤴᤏᤣ ᤀᤢᤏᤠᤜᤢᤖᤡ ᤀᤢᤏᤠᤜᤢᤖᤡᤀᤠᤱᤎᤥᤒᤠ ᤗᤢᤱᤕᤠᤰᤐᤣ᤹ᤖᤥ॥ 5 ᤕᤜᤘᤣ ᤍᤠᤱᤒᤧᤸᤗᤧ ᤀᤠᤱᤍᤡᤱ ᤁᤧᤗ᤹ᤒᤠᤀᤠᤱ ᤕᤶᤒᤠ ᤁᤧᤗᤧᤱᤛᤡᤱᤒᤠᤜᤠ᤹ ᤔᤧᤏ᤺ᤶᤛᤡᤱᤗ ᤕᤠ᤺ᤴᤍᤢᤛᤡᤖᤥ॥ ᤆᤴᤈᤶᤒᤠᤍᤧᤴᤏᤥ ᤁᤧᤏᤧᤒᤠ ᤕᤧᤰᤕᤰᤜᤠ᤹ ᤂᤢᤏᤧ᤹ ᤕᤥ ᤔᤧᤎᤠᤖ ᤕᤠ᤺ᤴᤍᤢᤛᤡᤖᤥ. ᤁᤥ᤺ᤰᤔᤠᤀᤥ ᤁᤧᤏᤧᤒᤠ ᤂᤧᤴ ᤕᤧᤰᤕᤰᤜᤠ᤹ ᤂᤢᤏᤧ᤹ ᤕᤥ ᤂᤠᤶᤒᤣ᤺ᤰᤁᤡᤴᤏᤢ ᤋᤱᤅᤠᤱ ᤏᤧᤖ ᤔᤰᤌᤠ᤺ᤴᤍᤢᤛᤡᤖᤥ ᤜᤧᤰᤁᤩᤠᤱ ᤂᤢᤏᤧ᤹ ᤂᤧᤱᤜᤠ᤹ ᤂᤠᤶᤜᤡ᤺ᤰᤁᤥ ᤗᤠᤵᤑᤢᤛᤢᤛᤡᤖᤥ॥ 6 ᤀᤠᤸᤗᤥ ᤋᤢᤰᤂᤣ ᤔᤧᤈᤠ᤺ᤳᤋᤢᤛᤡᤒᤠᤜᤠ᤹ᤖᤧ ᤂᤧᤵᤔᤥ ᤔᤧᤍᤥ᤹ᤖᤢᤖᤥ. ᤜᤧᤰᤁᤩᤠᤱ ᤕᤠᤱᤃᤧᤛᤠ᤹ᤒᤠ ᤔᤏᤠᤜᤠ᤹ᤖᤧ ᤗᤠᤱᤅᤡᤸᤗᤧ ᤂᤧᤴ ᤔᤧᤗᤠ᤺ᤰᤋᤢᤖᤥ॥ 7 ᤛᤠᤶᤕᤥᤒᤠᤜᤠ᤹ᤖᤧ ᤂᤢᤴᤇᤡ᤹ ᤗᤠᤶᤔᤡᤴ ᤋᤥ᤺ᤴᤍᤥᤶᤒᤠ ᤆᤥᤰᤗᤥ. ᤋᤥ᤺ᤴᤍᤥᤶᤒᤠ ᤂᤠᤛᤧᤴᤗᤥ᤺ᤶᤒᤠᤀᤣ. ᤂᤧᤏᤧ᤹ᤀᤣ ᤛᤠᤶᤕᤥᤒᤠᤸᤗᤧ ᤁᤢᤗᤠᤶᤔᤡᤴ ᤗᤧᤵᤐᤧᤳ ᤁᤧᤍᤱᤒᤠ ᤁᤧᤈᤥᤃᤢᤖᤥ॥ 8 ᤕᤜᤘᤣ ᤍᤠᤱᤒᤠᤀᤣ. ᤂᤧᤏᤧ᤹ ᤁᤢᤍᤥ᤺ᤵᤔᤠ ᤁᤧᤄᤠᤛᤧᤴ ᤗᤥ᤺ᤶᤔᤠ ᤗᤠᤶᤔᤥ. ᤀᤠᤏᤡᤃᤣ ᤜᤠᤱᤅᤠᤛᤡᤃᤧᤖᤥ॥ ᤜᤧᤰᤁᤩᤠᤱ ᤀᤠᤏᤡᤃᤣ ᤁᤧᤔᤡᤱᤅᤡᤴ ᤔᤡᤔᤡᤍᤡᤱ ᤆᤥ᤺ᤰᤔᤠ ᤏᤡᤱᤘᤠ᤹ ᤁᤳᤋᤢᤶᤒᤧᤖᤥ॥ 9 ᤛᤧᤴᤍᤡᤰ ᤀᤠᤱᤃᤠ᤹ ᤀᤠᤛᤰᤔᤠ ᤛᤠᤶᤔᤡᤸᤗᤧ ᤂᤧᤏᤧ᤹ ᤁᤧᤜᤱᤗᤥ. ᤋᤠᤏᤠᤶ ᤀᤠᤱᤃᤠ᤹ ᤀᤠᤕᤠᤶᤛᤠᤶᤔᤡᤸᤗᤧ ᤂᤧᤏᤧ᤹ ᤆᤠᤜᤠᤒ᤻ ᤁᤧᤈᤥ᤺ᤰᤗᤥ॥ ᤜᤧᤰᤁᤩᤠᤱ ᤂᤧᤏᤧ᤹ ᤁᤧᤄᤠᤛᤧᤴᤏᤡᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤁᤥ ᤀᤥᤛᤣ᤺ᤴᤎᤠᤱ ᤐᤥᤱᤗᤥ. ᤂᤧᤒᤩᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤁᤥᤒᤠ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤛᤠᤶᤕᤥᤒᤠ ᤐᤠ᤺ᤴᤜᤠ᤹ ᤔᤧᤜᤢ᤹ᤛᤡᤱᤗᤥ॥ 10 ᤁᤢᤀᤡᤃᤧᤓᤧᤶᤒᤠᤜᤠ᤹ ᤗᤢᤱᤔᤠ᤹ ᤔᤧᤍᤢᤰᤋᤢᤛᤡᤛᤠᤱ ᤂᤧᤱᤜᤠ᤹ᤖᤧ ᤛᤠᤶᤕᤥᤒᤠ ᤕᤠ᤺ᤶᤒᤰᤜᤠ᤹ ᤆᤥ᤺ᤰᤔᤠ ᤔᤧᤴᤜᤢ᤹ᤛᤡᤱᤅᤡᤸᤗᤥ॥ ᤁᤢᤍᤥ᤺ᤵᤔᤠ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤗᤠᤈᤣ᤹ᤀᤥᤀᤠᤱ ᤂᤧᤱᤜᤠ᤹ᤖᤧ ᤆᤰᤔᤧᤴᤗ᤹ᤀᤣ ᤑᤧᤴᤕᤠ᤺ᤶᤒᤰ ᤔᤧᤈᤥᤃᤢᤖᤥ. ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤔᤡᤔᤡᤍᤡᤱᤅᤡᤴ ᤂᤧᤱᤜᤠ᤹ᤖᤧ ᤏᤡᤏᤡ ᤂᤧᤶᤄᤧᤶ ᤔᤧᤸᤗᤠᤵᤋᤢᤴᤗᤥ॥ 11 ᤕᤜᤘᤣ ᤍᤠᤱᤒᤠᤀᤣ. ᤂᤧᤱᤜᤠ᤹ ᤂᤢᤶᤍᤡᤱ ᤐᤡᤔᤠᤛᤡᤖᤧ ᤗᤠᤃᤡ ᤁᤧᤜᤢᤰᤁᤡᤸᤗᤧ ᤌᤠ᤺ᤱ ᤁᤧᤛᤠ᤺ᤵᤛᤢᤛᤡᤀᤠᤱ ᤐᤳᤗᤥ. ᤁᤖ ᤂᤧᤏᤧ᤹ ᤁᤧᤜᤢᤰᤁᤡᤸᤗᤧ ᤁᤧᤛᤠ᤺ᤵᤛᤢᤛᤡᤛᤠᤱ ᤂᤧᤱᤜᤠ᤹ᤖᤧ ᤏᤡᤏᤡᤀᤠᤱ ᤔᤧᤸᤗᤠᤵᤋᤢᤴᤗᤥ॥ ᤀᤠᤒᤠᤅᤣ ᤁᤧᤔᤏᤠᤜᤠ᤹ᤖᤧ ᤂᤢᤏᤡ᤹ ᤗᤠᤃᤡ ᤂᤧᤏᤧ᤹ ᤁᤧᤛᤡᤰᤛᤶᤔᤠᤴ ᤂᤧᤱᤜᤠ᤹ᤖᤧ ᤔᤧᤏᤡᤛᤢᤀᤠᤱ ᤂᤧᤱᤜᤠ᤹ ᤛᤡᤖᤡᤱᤔᤔᤥ ᤔᤧᤎᤠᤖᤖᤥ॥ ᤂᤧᤏᤧ᤹ ᤁᤧᤍᤰᤗᤧᤱᤘᤠᤀᤥ ᤁᤧᤒᤥ᤺ᤰᤐᤠᤜᤠ᤹ᤖᤧ ᤗᤠᤃᤡ ᤗᤠ᤺ᤳᤗᤠ᤺ᤳ ᤁᤧᤕᤢᤰᤛᤢᤒᤠ ᤔᤡ᤺ᤸᤗᤧ ᤂᤧᤱᤜᤠ᤹ ᤂᤠᤵᤐᤢᤌᤩ᤺ᤱ ᤆᤥᤃᤢᤛᤡᤖᤖᤥ॥ 12 ᤕᤜᤘᤣ ᤍᤠᤱᤒᤠᤀᤣ. ᤂᤧᤏᤧ᤹ ᤀᤠᤏᤡᤃᤣ ᤗᤠᤃᤡ ᤛᤏᤠᤖᤢᤱ ᤕᤠᤵᤔᤡ ᤁᤧᤒᤡᤖᤥ. ᤂᤧᤴ ᤀᤠᤏᤡᤃᤣ ᤁᤢᤗᤡᤱᤍᤥ ᤁᤧᤖᤧᤖ ᤂᤥᤛᤢᤶᤒᤧᤀᤠᤱ ᤘᤕᤡᤃᤧᤖᤥ. ᤀᤠᤏᤡᤃᤣ ᤗᤠᤃᤡ ᤂᤧᤱᤜᤠ᤹ ᤁᤧᤖᤧᤰ ᤂᤧᤏᤧ᤹ᤀᤣ ᤁᤧᤈᤥᤃᤢᤒᤠᤖᤥ॥ 13 ᤕᤜᤘᤣ ᤍᤠᤱᤒᤠᤀᤣ. ᤀᤠᤏᤡᤃᤣ ᤏᤡᤱᤘᤠ᤹ᤑᤢᤔᤠᤱᤅᤣ. ᤂᤧᤏᤧ᤹ᤏᤢ᤺ᤸᤗᤧ ᤘᤣ᤹ ᤕᤠᤵᤔᤡ ᤍᤠᤱᤒᤠᤜᤠ᤹ᤖᤧ ᤀᤠᤏᤡᤃᤣ ᤕᤢᤰ ᤔᤧᤈᤥᤃᤡᤃᤧᤖᤥ. ᤁᤖ ᤀᤠᤏᤡᤃᤧᤃ ᤂᤧᤏᤧ᤹ ᤁᤧᤔᤡᤱᤅᤧᤴᤗᤰ ᤔᤡᤱᤛᤥ ᤀᤡᤱᤎᤠᤱ ᤐᤡᤖᤢᤶᤒᤧᤖᤥ॥ 14 ᤀᤠᤛᤣ᤺ᤴ ᤀᤠᤏᤡᤃᤣ ᤛᤧᤘᤠ ᤔᤧᤳᤋᤢᤶᤛᤡᤶᤒᤧᤒᤠᤜᤠ᤹ ᤔᤧᤛᤩᤧ ᤔᤧᤄᤧᤖᤧᤀᤠᤱ ᤔᤧᤜᤥᤵᤗᤥ. ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤕᤠᤶᤛᤠᤶᤔᤡᤴ ᤀᤠᤑᤠᤸᤗᤧᤀᤠᤱ ᤕᤠᤶᤔᤥ ᤔᤧᤴᤏᤢ᤺ᤱᤏᤧᤴ ᤔᤧᤴᤍᤠᤏᤧᤴᤗᤥ॥ ᤂᤧᤏᤧ᤹ ᤂᤧᤱᤜᤠ᤹ ᤂᤢᤶᤍᤡᤱ ᤁᤧᤒᤡᤖᤢᤛᤡᤀᤠᤱ ᤁᤧᤔᤧᤰᤂᤢᤛᤡᤖᤥ ᤂᤧᤒᤩᤠᤱ ᤂᤧᤱᤜᤠ᤹ ᤁᤧᤖᤧᤰ ᤕᤠᤶᤔᤥ ᤏᤡᤱᤘᤠ᤹ᤛᤢᤶ ᤔᤧᤸᤗ᤹ᤔᤏᤠᤒᤠ ᤁᤧᤈᤥᤃᤢᤛᤡᤖᤥ॥ 15 ᤂᤧᤏᤧ᤹ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤁᤧᤓᤥᤛᤢᤛᤡᤀᤠᤱ ᤔᤧᤘᤠ᤹ᤖᤥ. ᤕᤜᤘᤣ ᤍᤠᤱᤒᤠᤀᤣ. ᤀᤠᤏᤡᤃᤣ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤁᤧᤓᤥᤛᤢᤛᤡᤀᤠᤱ ᤔᤧᤘᤠ᤹ᤖᤥ॥ ᤜᤧᤰᤁᤩᤠᤱ ᤀᤠᤏᤡᤃᤣ ᤗᤠᤈᤣ᤺ᤸᤗᤧᤴ ᤀᤡ᤺ᤴᤍᤥᤜᤠ᤹ ᤁᤧᤓᤥᤛᤢᤀᤠᤱ ᤏᤧᤖᤥ. ᤂᤧᤏᤧ᤹ ᤀᤠᤒᤠᤅᤣᤀᤣ ᤔᤡᤔᤡᤍᤡᤱ ᤁᤧᤄᤥᤛᤢᤀᤠᤱ ᤁᤧᤘᤠ᤹ᤖᤥ. ᤂᤧᤏᤧ᤹ ᤗᤠᤈᤣ᤹ᤀᤥᤒᤠ ᤁᤧᤖᤧᤰ ᤀᤡ᤺ᤴᤍᤥᤜᤠ᤹ ᤁᤧᤓᤥᤛᤢᤀᤠᤱ ᤏᤧᤖᤥ॥ ᤕᤜᤘᤣ ᤍᤠᤱᤒᤧᤸᤗᤧ ᤁᤧᤛᤡᤒᤠᤜᤠ᤹ ᤜᤡᤱᤔᤴ ᤐᤡᤖᤢᤛᤡ᤹ 16 ᤕᤜᤘᤣ ᤍᤠᤱᤒᤠᤀᤣ. ᤂᤧᤱᤜᤠ᤹ ᤋᤢᤰᤂᤣ ᤗᤠᤰᤂᤣ ᤔᤧᤍᤢᤔᤧᤸᤗᤧ ᤂᤧᤏᤧ᤹ᤀᤥ ᤔᤧᤍᤩᤧᤖᤥ॥ ᤂᤧᤒᤩᤠᤱ ᤂᤧᤏᤧ᤹ ᤂᤧᤱᤜᤠ᤹ ᤁᤧᤄᤢᤶᤛᤢᤛᤡᤀᤠᤱ ᤛᤢᤰᤔᤧᤴᤇᤢᤰ ᤐᤣᤗᤡ ᤑᤠᤰᤔᤠ ᤁᤧᤛᤢᤰᤐᤠ ᤔᤧᤒᤥ᤺ᤰᤂᤧᤖᤥ॥ 17 ᤔᤧᤴᤇᤢᤔᤠ᤺ᤴ ᤛᤠᤃᤵᤔᤠ ᤋᤢᤱᤅᤡᤸᤗᤧ ᤋᤖᤢᤸᤗᤧ ᤛᤠ᤹ᤖᤡᤰ ᤋᤢᤰᤗᤥ. ᤜᤧᤰᤁᤩᤠᤱ ᤁᤢᤍᤢᤰᤔᤠᤸᤗᤧ ᤋᤖᤢᤀᤠᤱ ᤀ᤺ᤰ ᤜᤠ᤺ᤵᤗᤥ. ᤜᤧᤰᤁᤣᤗ᤹ᤖᤡᤰᤁᤣ ᤕᤜᤘᤣ ᤍᤠᤱᤒᤠᤀᤣ. ᤀᤠᤏᤡᤃᤧᤀᤠᤱ ᤂᤧᤏᤧ᤹ ᤁᤧᤒᤣᤛᤠᤱ ᤜᤧᤰᤁᤣᤀᤣ ᤐᤥ᤺ᤰᤂᤡᤃᤧᤀᤠᤱ ᤘᤕᤡᤃᤧᤖᤥ॥ 18 ᤀᤠᤏᤡᤃᤣ ᤋᤢᤰᤂᤣ ᤆᤩᤧ᤹ᤀᤡᤃᤧ ᤜᤧᤰᤁᤩᤠᤱ ᤋᤢᤃᤡᤃᤧ ᤗᤠ᤺ᤰᤋᤡᤃᤧᤖᤥ. ᤁᤖ ᤀᤠᤏᤡᤃᤣ ᤌᤧᤔᤠ᤺ᤴᤏᤠᤱ ᤛᤠᤔᤧᤴᤘᤠ᤺ᤶᤔᤏᤠᤖᤥ॥ ᤀᤠᤏᤡᤃᤣ ᤗᤠᤈᤣ᤺ᤸᤗᤧ ᤗᤠᤃᤡ ᤌᤱᤅᤠᤱ ᤔᤧᤴᤏᤠ᤺ᤴᤏᤣ ᤘᤕᤡᤃᤧᤖᤥ. ᤜᤧᤰᤁᤩᤠᤱ ᤀᤠᤏᤡᤃᤣ ᤌᤣ᤺ᤴᤏᤠᤱ ᤁᤢᤗᤡᤱᤍᤥ ᤔᤧᤱᤃᤧᤳᤋᤣ ᤘᤕᤡᤃᤧᤖᤥ॥ 19 ᤁᤖ ᤁᤧᤛᤡᤒᤠᤀᤠᤱ ᤁᤧᤒᤣ᤺ᤰᤐᤠ ᤀᤠᤍᤠᤱᤒᤠᤖᤧ ᤁᤧᤔᤏᤠᤜᤠ᤹ ᤕᤠᤶᤔᤥ ᤔᤧᤜᤡᤱᤗᤥ. ᤂᤧᤱᤜᤠ᤹ ᤏᤠᤛᤡᤱᤃᤧᤴ ᤌᤰᤗᤠᤀᤥ ᤕᤠᤶᤔᤥ ᤔᤧᤜᤡᤱᤗᤥ॥ ᤂᤠᤶᤒᤠᤱᤅᤥ ᤁᤧᤏᤧᤒᤠᤛᤣ. ᤐᤥᤃᤠᤶᤔᤧ᤹ᤀᤥ ᤜᤧᤰᤁᤩᤠᤱ ᤛ᤺ᤳᤋᤠᤶᤔᤧ᤹ᤖ ᤀ᤺ᤰᤋᤠᤶᤔᤧ᤹ᤀᤥ॥ ᤌᤣᤀᤠᤱᤓᤧᤸᤗᤧ ᤋᤠᤏᤠᤶᤒᤠ ᤛᤣ᤺ᤰᤘᤠ᤺ᤸᤗᤧ ᤂᤠᤶᤒᤣ᤺ᤰᤔᤠᤴ ᤘᤠᤖᤰᤂᤢᤒᤠ ᤁᤢᤀᤡᤛᤡᤰ. ᤕᤜᤘᤣ ᤍᤠᤱᤒᤠᤸᤗᤧ ᤋᤃᤡ ᤁᤧᤛᤡᤒᤠᤜᤠ᤹ ᤕᤠᤶᤔᤥ ᤁᤢᤜᤡᤱᤘᤧᤳ ᤆᤥᤃᤢᤛᤡᤖᤥ॥ ᤂᤠᤛᤧᤴ ᤏᤢ ᤕᤠᤶᤔᤥ ᤏᤢ᤹ᤔᤠᤍᤠᤔᤠ 20 ᤀᤠᤱᤃᤠ᤹ ᤀᤠᤔᤏᤠᤛᤣ. ᤂᤧᤏᤡ᤹ ᤐᤣᤃᤠᤶᤔᤧ᤹ᤀᤥ ᤜᤧᤰᤁᤩᤠᤱ ᤂᤧᤏᤡ᤹ ᤗᤰᤛᤡᤱᤜᤠ᤹ᤀᤥ ᤗᤠᤛᤠᤶᤔᤧ᤹ᤀᤠᤱ ᤗᤠᤶᤎᤣ᤺ᤳᤜᤠ᤹ ᤛᤢᤒᤠᤶᤔᤧ᤹ᤀᤥ॥ ᤂᤢᤏᤧ᤹ ᤁᤢᤛᤠᤰᤁᤧᤴᤏᤡᤴ ᤔᤧᤴᤈᤡ᤺ᤰᤁᤣ ᤌᤠᤖᤡᤰ ᤛᤵᤔᤠᤖᤧ ᤗᤠᤃᤡ ᤆᤡᤱᤅᤠᤛᤡᤶᤔᤧ᤹ᤀᤠᤱ ᤕᤢᤅᤠᤶᤔᤧ᤹ᤀᤥ॥ 21 ᤀᤥᤔᤧᤳᤋᤠᤶᤔᤧ᤹᥄ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤁᤥᤒᤠ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤗᤠᤕᤥᤸᤗᤧ ᤆᤥᤃᤢᤸᤗᤧ ᤂᤧᤱᤜᤠ᤹ ᤂᤢᤶᤍᤡᤱ ᤐᤡᤔᤠᤛᤡᤖᤧ ᤗᤠᤃᤡ ᤕᤜᤘᤣ ᤍᤠᤱᤒᤠᤴ ᤛᤠᤱᤃᤪᤠᤶᤐᤣᤍᤠᤱᤗᤠᤶ ᤕᤢᤖ ᤐᤳᤗᤥ॥ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤔᤏᤠᤜᤠ᤹ᤖᤧ ᤔᤧᤛᤧᤛᤢᤒᤠ ᤔᤠᤰᤂᤡᤴ ᤀᤥᤛᤣ᤺ᤴᤎᤠᤱ ᤔᤧᤈᤥᤃᤢᤖᤥ. ᤜᤧᤰᤁᤩᤠᤱ ᤔᤧᤛᤩᤧᤖᤢᤛᤡᤒᤠᤜᤠ᤹ ᤀᤠᤸᤗ ᤕᤠᤶᤔᤥ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤸᤗᤧ ᤆᤡᤱᤔᤠ ᤔᤧᤛᤢᤰᤋᤢᤛᤡᤴᤗᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.