ᤕᤛᤤᤕᤠ 25 - LIFOTNT

ᤕᤜᤘᤣ ᤍᤠᤱᤒᤠᤸᤗᤧ ᤁᤢᤔᤡᤔᤡᤍᤡᤱ

¹ ᤕᤜᤘᤣ ᤍᤠᤱᤒᤠᤀᤣ. ᤂᤧᤏᤧ᤹ᤃ ᤀᤠᤱᤃᤠ᤹ ᤀᤠᤏᤡᤱᤘᤠ᤹ᤑᤢᤔᤠᤱᤏᤧᤖᤥ. ᤀᤠᤱᤃᤠ᤹ ᤂᤧᤏᤧ᤹ ᤔᤡᤱᤛᤥ ᤀᤡᤱᤎᤠᤱ ᤐᤡᤏᤧᤖᤥ ᤜᤧᤰᤁᤩᤠᤱ ᤁᤧᤔᤡᤱᤅᤥ ᤁᤧᤏᤠᤖᤠ ᤑᤥᤛᤢᤱᤗᤥ॥ ᤌᤣᤀᤠᤱᤓᤧᤸᤗᤧ ᤂᤧᤏᤧ᤹ ᤁᤧᤖᤧᤰ ᤁᤧᤏᤛᤠ᤺ᤴᤛᤠᤔᤠᤀᤥ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰᤜᤠ᤹ ᤁᤧᤈᤥᤃᤢᤖᤥ. ᤂᤧᤴ ᤕᤠ᤺ᤶᤒᤰᤜᤠ᤹ ᤀᤢᤴᤇᤥᤴ ᤀᤢᤏᤠᤜᤢᤖᤡᤀᤥ ᤏᤡᤱᤛᤣᤰ ᤐᤥ᤺ᤰᤂᤧᤀᤠᤱ ᤘᤕᤧᤖᤥ॥

² ᤕᤧᤰᤕᤰᤁᤡᤴ ᤀᤠᤍᤠᤱᤒᤠᤖᤧ ᤗᤢᤱ ᤁᤧᤗᤢᤶᤛᤡᤱᤒᤠᤱ ᤁᤧᤏᤧᤒᤠ ᤁᤧᤈᤥᤃᤢᤖᤥ॥ ᤛᤧ᤺ᤵᤛᤡᤱᤔᤠᤍᤧᤴ ᤕᤧᤰᤕᤰᤁᤡᤴ ᤂᤠᤵᤐᤢᤌᤩ᤺ᤱ ᤁᤧᤈᤥᤃᤢᤖᤥ॥ ᤘᤣ᤹ ᤗᤠᤈᤣ᤹ᤒᤠ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤜᤠᤱᤕᤰᤁᤡᤸᤗᤧ ᤁᤢᤎᤡᤶ ᤁᤧᤒᤥᤱᤒᤠ ᤕᤧᤰᤕᤰᤁᤡᤴ ᤀᤠᤸᤗ ᤕᤧᤰᤕᤰ ᤔᤧᤏᤧᤏᤧᤸᤗᤥ. ᤂᤧᤴ ᤕᤠᤶᤔᤥ ᤀᤠᤓᤧᤸᤗᤧᤀᤠᤱ ᤕᤧᤰᤕᤰ ᤔᤧᤴᤈᤥᤃᤢᤴᤗᤥ॥

³ ᤂᤧᤸᤗᤧᤆᤥᤃᤢᤸᤗᤧ ᤁᤧᤎᤢᤶᤒᤠ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤂᤧᤏᤧ᤹ ᤀᤡᤱᤎᤠᤱ ᤁᤧᤶᤒᤡᤖᤥ. ᤜᤧᤰᤁᤩᤠᤱ ᤁᤢᤏᤡᤱᤘᤠ᤹ ᤁᤧᤈᤡ᤺ᤵᤐᤠ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤂᤢᤴᤇᤡ᤹ ᤕᤧᤰᤕᤰᤁᤥ ᤁᤧᤕᤢᤱᤒᤠ ᤔᤏᤠᤜᤠ᤹ᤖᤧ ᤂᤧᤏᤧ᤹ ᤁᤧᤏᤠᤖᤠ ᤔᤧᤓᤥᤛᤢᤖᤥ॥

⁴ ᤕᤠᤱᤃᤧᤛᤠ᤹ᤒᤠ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤜᤧᤰᤁᤩᤠᤱ ᤕᤧᤳᤋᤢᤰᤂᤣ ᤁᤧᤍᤢᤶᤒᤠ ᤁᤢᤎᤣᤀᤠᤱ ᤁᤧᤜᤥ᤺ᤵᤐᤠᤜᤠ᤹ᤖᤧ ᤗᤠᤃᤡ ᤂᤧᤏᤧ᤹ ᤛᤧ᤺ᤵᤛᤡᤱᤔᤠᤍᤧᤴ ᤁᤧᤒᤥᤰᤂᤧᤀᤠᤱ ᤁᤧᤘᤠ᤹ᤖᤥ. ᤛᤢᤖᤡᤳ ᤁᤣᤈᤱ ᤜᤢ᤺ᤸᤗᤧ ᤘᤠᤀᤡ᤺ᤵᤛᤡᤱᤔᤠᤍᤧᤴ ᤜᤧᤰᤁᤩᤠᤱ ᤏᤠᤶᤛᤧ᤺ᤰᤁᤡᤸᤗᤧ ᤀᤡ᤺ᤶᤛᤡᤱᤔᤠᤍᤧᤴ ᤏᤠᤶᤈᤡ᤺ᤰᤂᤥ᤹ ᤁᤧᤒᤥᤰᤂᤧᤀᤠᤱ ᤁᤧᤘᤠ᤹ᤖᤥ॥ ᤌᤣᤀᤠᤱᤓᤧᤸᤗᤧ ᤁᤢᤏᤡᤱᤘᤠ᤹ ᤁᤧᤈᤡ᤺ᤵᤐᤠᤜᤠ᤹ᤖᤧ ᤂᤢᤴᤇᤡ᤹ ᤛᤰᤔᤠ᤺ᤱᤃ ᤗᤢᤱᤎᤠᤰᤁᤥ ᤁᤧᤍᤥ᤺ᤰᤐᤠ ᤛᤢᤖᤡᤳ ᤁᤣᤈᤱ ᤁᤢᤀᤡᤛᤡ᤺ᤰᤗᤰ ᤗ᤹ᤖᤥ.

⁵ ᤜᤧᤰᤁᤩᤠᤱ ᤔᤢᤖᤧᤰ ᤂᤠᤖᤧᤰᤐᤠ ᤕᤧ᤺ᤱᤄᤠᤍᤧᤴᤏᤥ ᤜᤠᤱᤘᤠᤛᤧ᤺ᤰᤐᤠ ᤁᤢᤀᤡᤛᤡᤰ ᤗ᤹ᤖᤥ॥ ᤘᤣ᤹ ᤗᤠᤈᤣ᤹ ᤁᤧᤕᤢᤱᤒᤠ ᤔᤏᤠᤜᤠ᤹ᤖᤧ ᤔᤧᤈᤥᤃᤢᤒᤠ ᤜᤕᤱ ᤁᤡᤸᤗᤡᤱᤅᤡᤴ ᤂᤧᤏᤧ᤹ ᤆᤡᤈᤡ ᤂᤰᤂᤰ ᤐᤥᤱᤗ ᤁᤧᤈᤥᤃᤢᤖᤥ॥ ᤂᤠ᤹ᤔᤡ᤺ᤳᤋᤧᤸᤗᤧ ᤏᤠᤶᤔᤧᤴ ᤀᤡ᤺ᤵᤋᤢᤀᤠᤱ ᤏᤠᤶᤀᤡ᤺ᤰᤂᤱ ᤆᤥᤃᤢᤒᤠ ᤁᤢᤀᤡᤛᤡᤰ ᤁᤢᤏᤡᤱᤘᤠ᤹ ᤁᤧᤈᤡ᤺ᤵᤐᤠᤜᤠ᤹ᤖᤧ ᤂᤢᤴᤇᤡ᤹ ᤛᤠᤶᤗᤥᤴ ᤂᤧᤏᤧ᤹ ᤁᤧᤛᤠᤰᤋᤢ ᤁᤧᤒᤡᤖᤢᤛᤡᤖᤥ॥

ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤗᤳᤇᤠ ᤛᤠᤓ᤺ᤱᤈᤠᤎᤡᤰ ᤕᤠᤖᤡᤵ ᤆᤥᤃᤢ

⁶ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤠᤶᤓᤠ ᤁᤴ ᤛᤡᤕᤥᤏ ᤁᤥ᤺ᤰᤔᤠᤀᤥ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤁᤧᤖᤧᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤁᤢᤈᤠ ᤁᤧᤏᤢ᤹ᤒᤠ ᤛᤠᤓ᤺ᤱᤈᤠᤎᤡᤰ ᤕᤠᤖᤡᤵ ᤆᤥᤃᤢᤖᤥ॥ ᤂᤢᤏᤧ᤹ ᤂᤧᤴ ᤛᤠᤓ᤺ᤱᤈᤠᤀᤥ ᤁᤧᤍᤢᤶᤒᤠ ᤆᤧᤸᤗᤧᤰᤛᤣ᤹ ᤌᤡ ᤏᤢ ᤁᤢᤈᤠ ᤁᤧᤏᤢ᤹ᤒᤠ ᤛᤠ. ᤋ᤺ᤰᤜᤠ᤹ ᤘᤧᤳᤋᤧᤛᤖᤧ ᤐᤡᤖᤢᤛᤡᤖᤥ॥

⁷ ᤂᤢᤏᤧ᤹ ᤜᤠᤒᤠ ᤁᤴ ᤁᤥ᤺ᤰᤔᤠᤀᤥ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤁᤥ ᤔᤏᤠᤜᤠ᤹ ᤁᤧᤍᤧᤵᤐᤠᤀᤠᤱ ᤁᤧᤒᤵᤐᤠ ᤆᤠᤱ ᤜᤧᤰᤋᤱᤒᤠ ᤂᤧᤴ ᤛᤡᤔᤧᤸᤗᤧ ᤛᤠᤶᤔᤪᤡ᤺ᤵᤐᤠᤴ ᤏᤢ ᤁᤧᤖᤧᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤁᤧᤎᤣ᤺ᤰᤐᤠ ᤐ᤺ᤳᤌᤠᤱ ᤜᤧᤰᤋᤱᤒᤠ ᤏᤡᤱᤛᤠᤶᤗᤧᤴ ᤂᤠ᤹ᤔᤡ᤺ᤵᤐᤠᤴ ᤂᤧᤳᤋᤢᤍᤣᤛᤢᤖᤥ॥

⁸ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤍᤠᤍᤡᤱᤗᤧ ᤗᤠᤃᤡ ᤛᤡᤔᤧᤴ ᤌᤱᤅᤥ ᤜᤠᤖᤡᤍᤠᤛᤢᤀᤠᤱ ᤘᤠ᤹ᤖᤥ॥ ᤂᤢᤏᤧ᤹ ᤁᤧᤖᤧᤰᤗᤧ ᤂᤢᤴᤇᤡ᤹ ᤔᤡᤰᤁᤥᤗᤠᤶ ᤔᤡᤰᤘᤠᤴ ᤋᤢᤃᤢ ᤐᤡᤖᤢᤛᤡᤖᤥ. ᤂᤧᤒᤩᤠᤱ ᤁᤠᤰ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤁᤥ ᤁᤢᤔᤏᤠᤜᤠ᤹ ᤁᤢᤏᤠᤔᤧᤴᤇᤠ᤹ ᤔᤧᤔᤧᤳᤋᤢᤛᤡᤒᤠᤴ ᤂᤢᤏᤧ᤹ ᤂᤧᤳᤋᤢᤍᤣᤛᤢ ᤐᤡᤖᤢᤛᤡᤖᤥ. ᤁᤴ ᤐᤠ᤺ᤴᤏᤡᤴ ᤕᤜᤘᤣ ᤍᤠᤱᤒᤧᤸᤗᤧ ᤀᤠᤒᤠᤅᤣ ᤐᤠ᤺ᤳᤋᤢᤀᤠᤱ ᤘᤠ᤹ᤖᤥ॥

⁹ ᤁᤴ ᤜᤡᤴᤍᤥ᤺ᤰᤁᤧᤴ ᤐᤥᤱᤅᤧᤸᤗᤧ ᤁᤧᤖᤧᤰ ᤔᤏᤠᤜᤠ᤹ᤖᤧ ᤔᤧᤒᤠ᤺ᤳᤋᤢᤖᤥ. “ᤛᤧᤰᤂᤠᤛᤠᤱ ᤂᤢᤏᤧ᤹ᤀᤣ ᤀᤠᤏᤡ᤹ ᤏᤡᤱᤘᤠ᤹ᤑᤢᤔᤠᤱᤗᤥ᥄ ᤀᤠᤏᤡ᤹ ᤂᤢᤏᤧ᤹ ᤁᤢᤗᤠᤶ ᤀᤥᤀᤠᤔᤧᤳᤋᤢᤶᤗᤥ ᤜᤧᤰᤁᤩᤠᤱ ᤂᤢᤏᤧ᤹ᤀᤣ ᤀᤠᤏᤡ᤹ ᤋᤠᤱᤀᤠᤛᤧ᤺ᤵᤋᤧᤀᤠᤱ ᤀᤠᤘᤠ᤹ᤖᤥ॥ ᤂᤢᤏᤧ᤹ᤀᤣ ᤕᤜᤘᤣ ᤍᤠᤱᤒᤠᤖᤥ᥄ ᤂᤢᤏᤧ᤹ᤀᤥ ᤀᤠᤏᤡ᤹ ᤏᤡᤱᤘᤠ᤹ ᤀᤠᤕᤢᤰᤂᤢᤶᤗᤥ ᤂᤢᤏᤧ᤹ ᤀᤠᤏᤡ᤹ ᤋᤠᤱᤀᤠᤛᤧ᤺ᤵᤋᤧᤀᤠᤱ ᤀᤠᤘᤠ᤹ᤖᤥ. ᤀᤠᤏᤡ᤹ ᤛ᤺ᤳᤋᤡᤀᤠᤱ ᤕᤧᤕᤧ ᤗ᤹ᤖᤡᤖᤥ॥”

ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤔᤥᤀᤠᤒᤡᤜᤠ᤹ ᤂᤢᤶᤍᤡᤱ ᤐᤡᤖᤢᤛᤡ᤹

¹⁰ ᤁᤴ ᤛᤡᤕᤥᤏ ᤁᤥ᤺ᤰᤔᤠᤴ ᤕᤜᤘᤣ ᤍᤠᤱᤒᤧᤸᤗᤧ ᤋᤠᤱᤛᤧ᤺ᤵᤋᤢᤖᤥ ᤁᤖ ᤕᤠ᤹ᤗᤠᤱᤅᤡᤴ ᤐᤡ᤹ᤜᤡᤀᤥ ᤆᤡᤖᤠᤰ ᤆᤡᤖᤠᤰ ᤗᤠ᤺ᤰᤔᤏᤠᤒᤠ ᤁᤢᤀᤡᤛᤡᤰ ᤔᤥᤀᤠᤒ ᤗᤠᤈᤣᤴ ᤂᤢᤏᤧ᤹ ᤁᤢᤗᤠᤱᤓᤥ ᤛᤡᤃᤠᤱ ᤐᤥᤱᤗᤥ॥

¹¹ ᤘᤖᤰ ᤁᤧᤈᤠ᤺ᤰᤐᤠ ᤔᤏᤠ᤺ᤸᤗᤧ ᤘᤖᤰᤁᤧᤴ ᤆᤥᤃᤢᤸᤗᤧ ᤀᤠᤰᤂᤣᤗ᤹ᤖᤡᤰ ᤁᤢᤜᤢᤰᤁᤧᤴ ᤛᤴᤇᤢ᤹. ᤜᤧᤰᤁᤣᤗ᤹ᤖᤡᤰᤁᤣ ᤀᤠᤒᤠᤅᤣ ᤛᤧ᤺ᤵᤛᤡᤱᤔᤠᤖᤧ ᤗᤠᤃᤡ ᤜᤢᤰᤜᤠ᤹ ᤔᤧᤛᤴᤇᤢᤖᤥ॥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤜᤢᤰᤜᤠ᤹ ᤀᤥᤃᤵ ᤆᤥ᤺ᤰᤔᤠ ᤁᤧᤗᤧᤒᤠ ᤔᤧᤗᤧᤱᤛᤡᤱᤛᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤀᤠᤱᤍᤡᤱ ᤗ᤹ᤔᤠᤴ ᤕᤥ ᤌᤠᤛᤢ ᤐᤡᤖᤢᤛᤡᤖᤥ॥

¹² ᤕᤜᤘᤣ ᤍᤠᤱᤒᤧᤸᤗᤧ ᤔᤥᤀᤠᤒᤒᤠ ᤜᤠᤱᤕᤰ ᤁᤧᤏᤧᤒᤠ ᤂᤧᤴ ᤕᤧᤰᤕᤰᤁᤥᤒᤠ ᤗᤢᤱᤎᤠᤰᤜᤠ᤹ ᤗᤢ᤺ᤴᤍᤢᤍᤣᤛᤢ ᤐᤡᤖᤢᤛᤡᤖᤥ. ᤜᤧᤰᤁᤩᤠᤱ ᤂᤧᤴ ᤗᤢᤱᤎᤠᤰᤜᤠ᤹ ᤂᤠᤶᤒᤣ᤺ᤰᤁᤥ ᤗᤖᤧ᤺ᤱᤓᤖᤧ᤺ᤱ ᤆᤥᤃᤢᤀᤠᤱ ᤂᤠᤶᤜᤡ᤺ᤰᤁᤥ ᤋᤱᤄᤢᤖᤥ॥