ᤕᤛᤤᤕᤠ 24 - LIFOTNTᤕᤜᤘᤣ ᤍᤠᤱᤒᤧᤸᤗᤧ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤂᤢᤶᤍᤡᤱ ᤐᤡᤖᤢ᤹ 1 ᤀᤥᤔᤧᤳᤋᤧᤶᤔᤧ᤹ᤀᤥ᥄ ᤕᤜᤘᤣ ᤍᤠᤱᤒᤧᤸᤗᤧ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤔᤧᤱᤔᤠ ᤆᤥᤃᤢᤖᤥ॥ ᤂᤢᤏᤧ᤹ ᤁᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤔᤧᤰᤂᤢᤀᤠᤱ ᤂᤧᤵᤔᤥ ᤁᤧᤕᤢᤱᤒᤠ ᤔᤧᤴᤇᤠᤶ ᤕᤠᤵᤔᤡᤜᤠ᤹ ᤑᤢᤳᤇᤡᤱᤇᤠ᤺ᤱ ᤔᤧᤛᤧ ᤔᤧᤒᤣ᤺ᤰᤗ ᤕᤠ᤺ᤴᤍᤢᤛᤡᤖᤥ॥ 2 ᤔᤏᤠᤜᤠ᤹ᤖᤧ ᤔᤧᤍᤢᤔᤢᤒᤠ ᤋᤢᤰᤂᤣ ᤜᤧᤰᤋᤱᤒᤠᤀᤣ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤧᤀᤠᤱ ᤔᤧᤍᤢᤔᤢᤖᤥ. ᤛᤧᤘᤠᤖᤥᤒᤠᤜᤠ᤹ᤖᤧ ᤔᤧᤍᤢᤔᤢᤒᤠ ᤁᤢᤀᤡᤛᤡᤰ ᤂᤢᤴᤇᤡ᤹ ᤍᤠᤱᤒᤠᤜᤠ᤹ᤖᤧᤀᤠᤱ ᤔᤧᤍᤢᤔᤢᤖᤥ. ᤛᤣᤘᤠᤖᤥᤔᤠᤸᤗᤧ ᤋᤢᤔᤢᤒᤠ ᤜᤧᤰᤁᤣᤀᤣ ᤁᤢᤴᤍᤠᤱᤔᤧᤸᤗᤧᤀᤠᤱ ᤋᤢᤔᤢᤖᤥ. ᤜᤧᤰᤁᤩᤠᤱ ᤆᤡᤃᤰᤘᤠ ᤁᤧᤀᤡᤱᤒᤠᤜᤠ᤹ᤖᤧ ᤔᤧᤍᤢᤔᤢᤒᤠ ᤜᤧᤰᤁᤣᤀᤣ ᤁᤧᤛᤱᤒᤠᤜᤠ᤹ᤖᤧᤀᤠᤱ ᤔᤧᤍᤢᤔᤢᤖᤥ. ᤌᤧᤳᤗᤱ ᤁᤧᤗᤰᤐᤧᤸᤗᤧ ᤋᤢᤔᤢᤒᤠ ᤁᤢᤀᤡᤛᤡ᤺ᤰᤁᤣ ᤌᤧᤳᤗᤱ ᤁᤧᤒᤡᤒᤧᤸᤗᤧᤀᤠᤱ ᤋᤢᤔᤢᤖᤥ॥ ᤛᤡᤱᤏᤠᤳ ᤁᤧᤍᤣ᤹ᤒᤠᤜᤠ᤹ᤖᤧ ᤔᤧᤍᤢᤔᤢᤒᤠ ᤜᤧᤰᤁᤣᤀᤣ ᤛᤡᤱᤏᤠᤳ ᤁᤧᤒᤡᤒᤠᤜᤠ᤹ᤖᤧᤀᤠᤱ ᤋᤢᤰᤂᤣ ᤔᤧᤍᤢᤔᤢᤖᤥ॥ 3 ᤁᤠᤰ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤔᤢᤖᤧ᤺ᤰ ᤂᤠᤖᤧᤰ ᤐᤥᤱᤗᤥ. ᤜᤧᤰᤁᤩᤠᤱ ᤕᤠᤱᤛᤠᤁᤢᤴᤎᤣ ᤏᤠᤵᤛᤡᤱᤔᤠ ᤋᤠᤵᤑᤧ᤺ᤶᤒᤠ ᤕᤠ᤺ᤶᤒᤰ ᤐᤥᤱᤗᤥ ᤌᤣᤀᤠᤱᤓᤧᤸᤗᤧ ᤁᤴ ᤕᤜᤘᤣ ᤍᤠᤱᤒᤧᤸᤗᤧ ᤀᤠᤒᤠᤅᤣ ᤐᤠ᤺ᤳᤋᤢᤀᤠᤱ ᤘᤠ᤹ᤖᤥ॥ 4 ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤜᤣᤀᤠᤱ ᤀᤡᤖᤧᤶᤗᤥ. ᤁᤧᤖᤧᤰ ᤂᤠᤶᤒᤣ᤺ᤰᤔᤠᤴ ᤆᤵᤐᤠᤱ ᤂᤧᤰᤋᤢᤖᤥ॥ ᤜᤧᤰᤁᤩᤠᤱ ᤕᤥ᤹ᤒᤠ ᤗᤠᤈᤣ᤹ᤀᤥᤒᤠ ᤕᤶᤒᤕᤶᤒᤠ ᤔᤏᤠᤜᤠ᤹ ᤂᤢᤴᤇᤡ᤹ ᤛᤠ᤹ᤀᤡ ᤕᤰᤗᤥ॥ 5 ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤁᤧᤕᤢᤱᤒᤠ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤗᤠᤕᤥᤸᤗᤧ ᤆᤥᤃᤢᤸᤗᤧ ᤁᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤆᤡ᤺ᤴᤈᤡ᤺ᤴ ᤁᤧᤄᤢᤒᤠ ᤐᤥ᤺ᤰᤂᤧᤀᤠᤱ ᤏᤧᤖᤥ॥ ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤀᤡᤱᤈᤠᤱᤅᤡᤴ ᤔᤧᤓᤣ᤺ᤴᤍᤢᤀᤠᤱ ᤘᤠ᤹ᤖᤥ. ᤁᤢᤓᤠᤱᤜᤠ᤹ ᤔᤧᤓᤣ᤺ᤴᤍᤢᤀᤠᤱ ᤘᤠ᤹ᤖᤥ ᤜᤧᤰᤁᤩᤠᤱ ᤛᤍᤠᤍᤡᤱᤒᤠ ᤔᤠᤱᤜᤢᤵᤐᤡᤴ ᤀᤡ᤺ᤵᤔᤠ ᤏᤠ᤺ᤵᤔᤠ ᤔᤧᤗᤧᤖᤢᤀᤠᤱ ᤘᤠ᤹ᤖᤥ॥ 6 ᤁᤸᤗᤧᤆᤥᤃᤢᤸᤗᤧ ᤗᤳᤇᤠ ᤔᤠᤱᤍᤣᤎᤡᤰᤗᤧ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤂᤠᤵᤐᤢᤌᤩ᤺ᤱ ᤐᤥᤱᤗᤥ॥ ᤜᤧᤰᤁᤩᤠᤱ ᤂᤧᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤁᤧᤕᤢᤱᤒᤠ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤀᤠᤵᤋᤡᤰᤁᤡᤸᤗᤧ ᤂᤢᤶᤍᤡᤱ ᤔᤧᤄᤥᤛᤢᤖᤀᤣ ᤐᤥᤱᤗᤥ॥ ᤐᤠ ᤁᤸᤗᤧᤆᤥᤃᤢᤸᤗᤧ ᤕᤥ᤹ᤒᤠ ᤗᤠᤈᤣ᤹ᤀᤥ ᤁᤧᤕᤢᤱᤒᤠ ᤔᤏᤠᤜᤠ᤹ᤖᤧ ᤔᤡᤔᤧᤎᤡᤰᤂᤢ ᤔᤧᤛᤧᤖᤢᤛᤡᤖᤥ. ᤜᤧᤰᤁᤩᤠᤱ ᤆᤒᤧ᤺ᤳᤇᤡᤰ ᤔᤏᤠᤜᤠ᤹ᤖᤰ ᤔᤧᤜᤡᤅᤧ ᤔᤧᤕᤠ᤺ᤰᤋᤧᤀᤠᤱ ᤔᤧᤘᤠ᤹ᤖᤥ॥ 7 ᤁᤢᤛᤱ ᤆᤧᤸᤗᤧᤰᤛᤣ᤹ ᤌᤡᤴ ᤆᤵᤗᤥ. ᤜᤧᤰᤁᤩᤠᤱ ᤆᤧᤸᤗᤧᤰᤛᤣᤸᤗᤧ ᤁᤢᤒᤢᤱᤅᤡᤴ ᤀᤡᤗᤧᤶᤗᤥ॥ ᤛᤥᤛᤥᤳᤗᤖᤠᤱ ᤁᤧᤈᤥ᤺ᤰᤐᤠ ᤔᤏᤠᤜᤠ᤹ ᤂᤢᤏᤡ᤹ ᤛᤰᤔᤠ ᤐᤢ᤹ᤀᤠᤱ ᤂᤥᤀᤡᤰᤘᤠ ᤔᤧᤍᤣᤖᤥ॥ 8 ᤏᤡᤱᤘᤠ᤹ ᤁᤧᤍᤠᤒᤠ ᤂᤡᤳᤆᤡᤱ ᤂᤡᤳᤆᤡᤱ ᤁᤧᤗ᤹ᤒᤠ ᤔᤢᤰᤗᤠ᤺ᤴ ᤔᤢᤰᤔᤠ ᤏᤠ᤹ᤖᤧᤀᤠᤱ ᤘᤠ᤹ᤖᤥ॥ ᤁᤧᤛ᤺ᤵᤐᤠ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤀᤡᤰᤗᤠ᤺ᤴᤏᤠᤱ ᤗ᤺ᤶᤔᤠ ᤏᤠ᤹ᤖᤧᤀᤠᤱ ᤘᤠ᤹ᤖᤥ॥ ᤏᤡᤱᤘᤠ᤹ ᤕᤧᤕᤧ ᤁᤧᤔᤧᤵᤐᤠ ᤀᤴᤔᤣ ᤂᤡᤱᤔᤏᤠᤒᤠ ᤔᤢᤰᤗᤠ᤺ᤴ ᤔᤢᤰᤔᤠ ᤏᤠ᤹ᤖᤧᤀᤠᤱ ᤘᤠ᤹ᤖᤥ॥ 9 ᤀᤠᤸᤗᤀᤠᤱᤎᤥ ᤂᤧᤱᤜᤠ᤹ ᤛᤠᤶᤔᤧᤗᤥ᤺ᤸᤗᤧ ᤆᤧᤸᤗᤧᤰᤛᤣ᤹ ᤌᤡᤴ ᤔᤧᤴᤎᤢᤅᤢᤴᤗᤥ॥ ᤁᤧᤎᤢᤱᤒᤠᤜᤠ᤹ᤖᤧ ᤆᤧᤸᤗᤧᤰᤛᤣ᤹ ᤌᤡᤴ ᤐᤄᤡ᤺ᤰ ᤂᤡ᤺ᤰᤐᤠ ᤔᤧᤏᤡᤛᤢᤖᤥ॥ 10 ᤂᤠᤵᤐᤢᤌᤩ᤺ᤱ ᤁᤧᤒᤥᤱᤒᤠ ᤕᤧᤰᤕᤰᤁᤡᤴ ᤔᤢᤖᤧᤰ ᤂᤠᤖᤧᤰ ᤐᤥ᤺ᤰᤂᤧᤀᤠᤱ ᤏᤧᤖᤥ॥ ᤜᤧᤰᤁᤩᤠᤱ ᤁᤧᤖᤧᤰ ᤜᤡᤶᤜᤠ᤹ᤀᤥᤒᤠ ᤗᤠᤶᤎᤣ᤺ᤵᤐᤠᤜᤠ᤹ ᤔᤧᤀᤧᤳᤋᤢᤀᤠᤱ ᤐᤳᤗᤥ॥ 11 ᤛᤣᤈ᤺ᤱᤘᤠ ᤜᤥᤵᤐᤠᤸᤗᤧ ᤆᤥᤃᤢᤸᤗᤧ ᤔᤠᤖᤠᤶᤜᤠ᤹ᤀᤥ ᤔᤏᤠᤜᤠ᤹ ᤔᤧᤀ᤺ᤰᤗᤥ. ᤁᤧᤖᤧᤰ ᤛ᤺ᤵᤔᤠ ᤀᤣ᤺ᤵᤔᤠ ᤐᤠ᤺ᤴᤜᤠ᤹ ᤏᤡᤱᤛᤠᤱ ᤁᤧᤒᤢᤰᤐᤠ ᤐᤥ᤺ᤰᤂᤧᤀᤠᤱ ᤘᤠ᤹ᤖᤥ॥ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤁᤥᤗᤠᤶ ᤏᤡᤱᤘᤠ᤹ ᤁᤧᤍᤠᤒᤠ ᤐᤠ᤺ᤴᤜᤠ᤹ ᤔᤕᤧᤒᤣᤀᤠᤱ ᤜᤥᤵᤗᤥ॥ 12 ᤕᤧᤰᤕᤰᤁᤥᤃ ᤁᤧᤔᤧᤰᤔᤠ ᤐᤠ᤺ᤴᤜᤠ᤹ᤖᤰ ᤕᤠ᤺ᤰᤋᤧᤀᤠᤱ ᤘᤠ᤹ᤖᤥ. ᤜᤧᤰᤁᤩᤠᤱ ᤏᤡᤱᤔᤡᤜᤠ᤹ᤖᤧ ᤐᤕᤶ ᤕᤶᤒᤠ ᤗᤠᤶᤎᤣ᤺ᤳᤜᤠ᤹ ᤔᤧᤕᤴᤇᤢᤀᤠᤱ ᤁᤢᤄᤧᤸᤗᤧᤰ ᤁᤢᤄᤧᤸᤗᤧᤰ ᤔᤧᤈᤣᤃᤢᤀᤠᤱ ᤏᤧᤖᤥ॥ 13 ᤈᤤᤋᤢᤏ ᤛᤡᤱᤒᤢᤱᤅᤡᤸᤗᤧ ᤁᤢᤒᤢᤱᤅᤡᤴ ᤕᤱᤔᤠᤀᤠᤱ ᤁᤢᤈᤠ᤹ᤜᤠ᤹ ᤌᤠᤔᤏᤠᤒᤠ ᤜᤧᤰᤁᤣ ᤀᤡᤃᤪ ᤆᤧᤸᤗᤧᤰᤛᤣᤸᤗᤧ ᤁᤢᤈᤠ᤹ᤀᤡᤴ ᤋᤢᤵᤔᤠᤀᤠᤱ ᤌᤡᤰᤏᤧᤳᤇᤡ ᤁᤢᤈᤠ᤹ ᤐᤋᤩᤠ᤺ᤰᤐᤠ ᤁᤢᤀᤡᤛᤡᤰ ᤂᤧᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤁᤥ ᤀᤠᤈᤧ᤺ᤳᤇᤡᤰᤗᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤔᤧᤍᤠᤱ ᤔᤧᤕᤠ᤺ᤰᤗᤥ॥ 14 ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤀᤡᤰᤗᤠᤴ ᤔᤧᤀᤢ᤺ᤰᤂᤢᤖᤥ. ᤜᤧᤰᤁᤩᤠᤱ ᤂᤧᤱᤜᤠ᤹ ᤔᤧᤛ᤺ᤳᤋᤠᤱ ᤕᤶᤒᤠ ᤀᤡᤰᤗᤠᤀᤥ ᤔᤧᤀ᤺ᤰᤗᤥ॥ ᤂᤧᤒᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤐᤕᤶ ᤕᤶᤒᤠ ᤁᤢᤔᤡᤔᤡᤍᤡᤱᤅᤡᤸᤗᤧ ᤗᤠᤃᤡ ᤂᤧᤱᤜᤠ᤹ᤖᤧ ᤋᤀᤡ ᤏᤠᤶᤎᤠ ᤗᤧᤵᤛᤠᤱᤗᤠᤶ ᤋᤡᤕᤠᤜᤠ ᤔᤧᤗ᤹ᤖ ᤁᤢᤏᤠᤖᤠ ᤔᤧᤓᤥᤛᤢᤖᤥ॥ 15 ᤂᤧᤸᤗᤧᤆᤥᤃᤢᤸᤗᤧ ᤋᤀᤡᤏᤠᤱᤃᤧᤴ ᤐᤡᤛᤠᤱᤒᤠᤜᤠ᤹ᤖᤧ ᤕᤜᤘᤣ ᤍᤠᤱᤒᤠᤴ ᤔᤡᤔᤡᤍᤡᤱᤅᤡᤴ ᤐᤡᤖᤧᤶᤔᤧ᤹ᤀᤥ॥ ᤘᤖ᤺ᤱᤅᤥ ᤁᤧᤏᤧᤒᤠ ᤘᤠᤃᤵᤂᤠᤶᤜᤠ᤹ᤀᤥ ᤁᤧᤕᤢᤱᤒᤠᤜᤠ᤹ᤖᤧ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤡᤱᤅᤡᤴ ᤌᤠ᤺ᤱᤎᤠ᤺ᤱ ᤑᤥ᤺ᤰᤂᤠᤶᤔᤧ᤹ᤀᤥ॥ 16 ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤸᤗᤧ ᤏᤠᤛᤔᤠ ᤁᤢᤛᤢᤰᤐᤥᤗᤠᤶ “ᤛᤠᤶᤕᤥᤒᤠᤸᤗᤧ ᤁᤢᤔᤡᤔᤡᤍᤡᤱ ᤐᤥᤱᤗᤥ” ᤁᤧᤗ᤹ᤒᤠ ᤛᤠᤶᤗᤥᤴ ᤛᤠᤶᤔᤧᤔᤧᤳᤋᤢᤒᤠ ᤀᤠᤏᤡᤃᤣ ᤂᤧᤵᤛᤢᤶᤒᤧᤖᤥ॥ ᤁᤖ ᤀᤠᤱᤃᤠ᤹ ᤔᤧᤳᤋᤢᤱᤛᤡᤱᤗᤥ. “ᤀᤠᤱᤃᤠ᤹ ᤜᤣᤀᤠ ᤆᤵᤐᤠᤖ ᤐᤳᤋᤠᤖᤥ. ᤀᤠᤱᤃᤠ᤹ ᤜᤣᤀᤠ ᤆᤵᤐᤠᤖ ᤐᤳᤋᤠᤖᤥ ᤀᤠᤱᤃᤠ᤹ ᤁᤢᤛᤢᤶ ᤔᤧᤍᤴᤏᤠᤴ ᤆᤡ᤺ᤳᤋᤠᤱᤗᤰ ᤛᤩᤧᤖᤥ᥄ ᤀᤡᤱᤃᤧᤗᤧᤰᤛᤡᤱᤒᤠ ᤔᤏᤠᤜᤠ᤹ ᤀᤡᤱᤔᤧᤗᤧᤰᤛᤡᤱᤗᤥ᥄ ᤀᤡᤱᤔᤧᤗᤧᤰᤛᤡᤅᤠᤱᤅᤣ ᤀᤡᤱᤗᤧᤰ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤔᤏᤠᤜᤠ᤹ ᤏᤛᤠᤴ ᤔᤧᤗᤧᤱᤛᤡᤱ ᤔᤧᤒᤡᤛᤡᤱᤗᤥ᥄” 17 ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤔᤧᤴᤇᤠᤶ ᤕᤠᤵᤔᤡᤛᤣ. ᤁᤡᤔᤠ ᤕᤱᤔᤠ ᤏᤢ ᤗᤢᤶᤒᤠ᤺ᤳ ᤜᤧᤰᤁᤩᤠᤱ ᤆᤧᤴᤏᤧᤸᤗᤧ ᤂᤡᤏᤡ᤹ ᤁᤧᤜᤠᤱᤄᤡᤀᤠᤱ ᤁᤧᤘᤕᤡᤖᤥ॥ 18 ᤁᤡᤔᤠ ᤕᤱᤔᤠ ᤀᤡᤰᤗᤠᤴ ᤁᤧᤄᤧᤶᤒᤠᤀᤠᤱ ᤁᤧᤄᤧᤳᤇᤡᤱᤒᤠ ᤔᤏᤠᤜᤠ᤹ ᤗᤢᤶᤒᤠ᤺ᤳᤋᤥ ᤔᤢᤵᤔᤧᤎᤠᤖᤥ. ᤜᤧᤰᤁᤩᤠᤱ ᤗᤢᤶᤒᤠ᤺ᤳᤋᤥᤗᤠᤶ ᤌᤠ᤺ᤱ ᤁᤧᤗ᤺ᤶᤒᤠ ᤁᤧᤎᤠᤱᤒᤠᤜᤠ᤹ ᤆᤧᤴᤏᤥ ᤔᤧᤎᤠᤖᤥ॥ ᤛᤠᤱᤃᤪᤠᤶᤐᤣᤍᤠᤱᤅᤥᤒᤠ ᤐᤣᤎᤠ᤺ᤵᤜᤠ᤹ ᤔᤧᤜᤖᤧᤀᤠᤱ ᤔᤧᤒᤳᤗᤥ. ᤂᤧᤒᤩᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤸᤗᤧ ᤁᤢᤕᤢᤰᤏᤠᤴ ᤌᤢᤖᤢᤵᤗᤢᤵᤏᤠ ᤕᤱᤗᤥ॥ 19 ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤁᤡᤴ ᤁᤠ᤹ᤖᤧᤀᤠᤱ ᤏᤧᤖᤥ. ᤜᤧᤰᤁᤩᤠᤱ ᤐ᤺ᤰᤂᤧᤀᤠᤱ ᤁᤢᤗᤰ ᤏᤧᤳᤇᤡ ᤐᤥ᤺ᤰᤂᤧᤀᤠᤱ ᤏᤧᤖᤥ ᤂᤧᤒᤩᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤌᤢᤖᤢᤵᤗᤢᤵᤏᤠ ᤕᤰᤂᤧᤖᤥ॥ 20 ᤌᤡ᤺ᤸᤗᤧ ᤁᤧᤔᤒᤠ ᤔᤏᤠᤴ ᤜᤥ᤹ᤍᤥᤴ ᤜᤥ᤹ᤍᤥᤴ ᤗ᤹ᤒᤠ ᤁᤢᤀᤡᤛᤡᤰ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤔᤢᤴᤈᤡᤱ ᤔᤢᤴᤈᤡᤱ ᤗ᤹ᤖᤥ॥ ᤋᤧᤜᤧ᤹ᤜᤧ᤹ᤒᤠ ᤕᤠᤰᤔᤠᤜᤡᤶᤔᤡᤴ ᤛᤢᤖᤡ᤺ᤳᤋᤡᤸᤗᤧ ᤘᤠ᤺ᤴᤍᤢᤒᤠ ᤜᤧᤰᤁᤣ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤏᤠ ᤏᤢ ᤁᤳᤏᤠ ᤔᤢᤴᤗᤥ॥ ᤂᤢᤴᤇᤡ᤹ ᤀᤠᤒᤠᤅᤣ ᤐᤡᤑᤩᤢᤱᤅᤡᤴ ᤂᤧᤴ ᤀᤡᤰᤛᤠ ᤂᤠᤶᤒᤣᤰ ᤛᤶᤎᤠᤱ ᤛᤠ᤹ᤖᤡᤰ ᤗᤡ᤺ᤵᤐᤠᤱ ᤐᤳᤗᤥ ᤂᤧᤸᤗᤧᤆᤥᤃᤢᤸᤗᤧ ᤂᤧᤴ ᤀᤠᤑᤠᤸᤗᤧᤀᤠᤱ ᤐᤥ᤺ᤰᤔᤠ ᤔᤧᤴᤇᤢᤰᤁᤣ ᤆᤥ᤺ᤴᤗᤥ॥ 21 ᤂᤧᤴ ᤕᤧᤴᤏᤥ ᤕᤜᤘᤣ ᤍᤠᤱᤒᤧᤸᤗᤧ ᤌᤠ᤺ᤱ ᤛᤠᤱᤃᤪᤠᤶᤐᤣᤍᤠᤱᤒᤠ ᤔᤢᤰᤛᤠᤶᤜᤠ᤹ ᤏᤢ ᤕᤥ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤁᤥᤒᤠ ᤜᤠᤱᤜᤠ᤹ ᤂᤢᤶᤍᤡᤱ ᤐᤡᤖᤢᤛᤡᤖᤥ॥ 22 ᤐᤢᤱᤗᤠᤎᤠᤒᤠᤜᤠ᤹ ᤐᤢᤱᤗᤠᤜᤡᤶᤔᤥ ᤔᤧᤄᤣ᤺ᤰᤂᤢᤛᤡᤀᤠᤱ ᤔᤧᤕᤢᤰᤂᤢᤛᤡᤒᤠ ᤁᤢᤀᤡᤛᤡᤰ ᤂᤧᤱᤜᤠ᤹ ᤁᤧᤖᤧᤰ ᤌᤡᤰᤔᤧᤳᤌᤡᤰ ᤔᤧᤓᤢᤰᤂᤢᤛᤡᤖᤥ॥ ᤂᤧᤱᤜᤠ᤹ ᤐᤢᤱᤗᤠᤜᤡᤶᤔᤥ ᤔᤧᤛᤠᤰᤋᤢᤛᤡᤖᤥ ᤂᤧᤒᤩᤠᤱ ᤕᤖᤡᤰ ᤕᤧᤴ ᤀᤣᤃᤠᤱ ᤂᤧᤱᤜᤠ᤹ ᤂᤢᤶᤍᤡᤱ ᤔᤧᤒᤡᤖᤢᤛᤡᤖᤥ॥ 23 ᤜᤧᤰᤁᤩᤠᤱ ᤗᤠᤒᤧᤴ ᤔᤠᤰᤋᤠᤱᤒᤠ ᤐᤥᤱᤅᤠᤱ ᤔᤧᤀᤥ᤺ᤳᤏᤧᤴᤗᤥ. ᤂᤶᤓᤩᤠᤱ ᤏᤠᤶᤔᤡᤴᤏᤠᤱ ᤔᤧᤛᤧ᤺ᤰᤏᤧᤴᤗᤥ ᤌᤣᤀᤠᤱᤓᤧᤸᤗᤧ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤛᤡᤕᤥᤏ ᤁᤥ᤺ᤰᤔᤠᤀᤥ ᤏᤢ ᤕᤖᤢᤛᤗᤧᤔ ᤕᤧᤰᤕᤰᤁᤥ ᤁᤧᤘᤠ᤹ᤒᤠ ᤛᤠᤶᤕᤥᤛᤡᤰᤛᤠᤶᤒᤠᤜᤠ᤹ᤖᤧ ᤂᤢᤴᤇᤡ᤹ ᤋᤃᤡ ᤔᤡᤔᤡᤍᤡᤱᤃᤧᤴ ᤜᤠᤱᤕᤢᤰ ᤆᤥᤃᤢᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.