ᤕᤛᤤᤕᤠ 23 - LIFOTNT

ᤋᤢᤖᤥᤛ ᤕᤧᤰᤕᤰᤁᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤔᤠᤱᤏᤡᤱᤘᤠ᤹ᤐᤠᤴ

¹ ᤋᤢᤖᤥᤛ ᤕᤧᤰᤕᤰᤁᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤔᤠᤱᤏᤡᤱᤘᤠ᤹ᤐᤠᤴ— ᤗᤧᤱᤜᤱ ᤁᤧᤈᤥ᤺ᤰᤐᤠ ᤕᤶᤒᤠ ᤘᤠᤗᤠᤎᤠᤜᤠ᤹ᤀᤥ ᤁᤧᤕᤠᤰᤐᤠ ᤔᤏᤠᤛᤣ. ᤔᤧᤖᤡᤱ ᤌᤰᤋᤠᤶᤔᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤋᤢᤖᤥᤛ ᤕᤧᤰᤕᤰᤁᤡᤴ ᤂᤠᤵᤐᤢᤌᤩ᤺ᤱ ᤐᤥ᤺ᤰᤂᤧᤀᤠᤱ ᤏᤧᤖᤥ. ᤜᤧᤰᤁᤩᤠᤱ ᤂᤧ᤹ᤕᤥ ᤜᤡᤶᤎᤠ᤺ᤱ ᤏᤢ ᤘᤠᤃᤵᤂᤣ᤺ᤱᤜᤠ᤹ ᤌᤣᤀᤠᤱ ᤔᤧᤕᤠ᤺ᤰᤋᤧᤴᤏᤠᤱ ᤔᤧᤏᤧᤏᤧᤴᤗᤥ॥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤛᤠᤀᤡᤐᤪᤛᤗᤠᤶ ᤗᤳᤇᤠ ᤀᤡᤱᤄᤱᤎᤡᤰ ᤋᤩᤧᤀᤠᤱ ᤘᤠ᤹ᤖᤥ॥

² ᤘᤠᤃᤵᤂᤠᤶᤔᤥ ᤁᤧᤕᤢᤱᤒᤠ ᤔᤏᤠᤛᤣ. ᤜᤧᤰᤁᤩᤠᤱ ᤛᤡᤍᤥᤏ ᤕᤧᤰᤕᤰᤁᤥ ᤁᤧᤕᤢᤱᤒᤠ ᤗᤧᤱᤜᤱ ᤁᤧᤈᤥ᤺ᤰᤐᤠ ᤔᤏᤠᤛᤣ᥄ ᤘᤖ᤺ᤱᤅᤥ ᤗᤧᤱᤜᤱ ᤁᤧᤈᤥ᤺ᤰᤐᤠᤜᤠ᤹ᤖᤧ ᤂᤧᤏᤡ᤹ ᤕᤧᤰᤕᤰᤁᤡᤴ ᤕᤠᤱᤛᤠᤁᤢᤴᤎᤣᤛᤠᤒᤠ ᤁᤧᤈᤥᤃᤢᤶᤗᤥ. ᤂᤧᤏᤡ᤹ ᤛᤫᤠ᤺ᤳ ᤘᤕᤧᤶᤔᤧ᤹ᤀᤥ॥

³ ᤕᤶᤒᤠ ᤆᤫᤠ᤺ᤳᤋᤥᤗᤠᤶ ᤛᤡᤜᤥᤖᤒᤠ ᤐᤥᤃᤢᤃᤧᤴ ᤁᤢᤈᤠᤜᤠ᤹ ᤋᤩᤧᤖᤥ. ᤏᤡᤗ ᤘᤜ᤺ᤱᤅᤥᤒᤠ ᤆᤠᤛᤢᤶᤔᤠᤴ ᤋᤢᤖᤥᤛ ᤕᤧᤰᤕᤰᤁᤥ ᤜᤢᤱᤔᤠ ᤁᤧᤒᤥᤱᤒᤠ ᤀᤣ᤺ᤱᤕᤠᤱ ᤘᤕᤧᤖᤥ॥ ᤜᤧᤰᤁᤩᤠᤱ ᤂᤧᤴ ᤗᤠᤈᤣᤴ ᤘᤣ᤹ ᤘᤣ᤹ ᤛᤢᤘᤠᤱᤜᤠ᤹ᤖᤧ ᤂᤢᤴᤇᤡ᤹ ᤛᤱᤀᤡᤱᤍᤧᤴ ᤐᤥ᤺ᤰᤂᤧᤖᤥ॥

⁴ ᤛᤡᤍᤥᤏ ᤏᤢ ᤘᤖ᤺ᤱᤅᤡᤸᤗᤧ ᤁᤢᤕᤠᤀᤥ ᤁᤧᤏᤧᤒᤠ ᤜᤠᤱᤕᤰᤁᤥ ᤁᤧᤕᤢᤱᤒᤠᤛᤣ. ᤂᤧᤏᤡ᤹ ᤛᤡᤖᤡᤱ ᤔᤕᤧᤶᤔᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤘᤖ᤺ᤱᤅᤡᤸᤗᤧ ᤀᤰᤂᤣ ᤐᤠ᤺ᤳᤋᤢᤀᤠᤱ ᤘᤠ᤹ᤖᤥ. “ᤀᤠᤱᤃᤠ᤹ᤃ ᤀᤅᤧ᤺ᤰᤘᤠ ᤛᤠᤘᤠ᤺ᤶᤔᤠ ᤋᤢᤱᤅᤧᤸᤗᤧᤀᤠᤱ ᤔᤧᤶᤍᤧᤶᤔᤣ ᤁᤳᤋᤠᤖᤥ. ᤀᤅᤧ᤺ᤰᤘᤠ ᤛᤠᤀᤠᤱ ᤔᤧᤱᤃᤳᤋᤣ ᤘᤠ᤹ᤀᤠᤖᤥ॥ ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤅᤧ᤺ᤰᤘᤠ ᤕᤧᤶᤒᤡᤳᤇᤠ ᤏᤢ ᤔᤧᤴᤇᤢᤔᤠ ᤛᤠᤜᤠ᤹ᤀᤠᤱ ᤔᤧᤴᤜᤡᤱ ᤔᤧᤱᤃᤢᤶᤛᤣ ᤘᤠ᤹ᤀᤠᤖᤥ. ᤂᤧᤒᤩᤠᤱ ᤕᤶᤒᤠ ᤕᤶᤔᤠᤀᤠᤱ ᤔᤧᤴᤈᤥ᤺ᤰᤛᤡᤱᤅᤣ ᤘᤠ᤹ᤀᤠᤖᤥ॥”

⁵ ᤋᤢᤖᤥᤛ ᤕᤧᤰᤕᤰᤁᤡᤴ ᤂᤠᤵᤐᤢᤌᤩ᤺ᤱ ᤐᤥᤱᤒᤠ ᤀᤡᤱᤄᤱᤅᤡᤴ ᤔᤡᤛᤪ ᤗᤠᤈᤣ᤹ᤀᤥ ᤁᤧᤳᤗᤥ. ᤜᤧᤰᤁᤣ᤺ᤸᤗᤧ ᤂᤧᤵᤔᤥᤒᤠ ᤔᤏᤠᤜᤠ᤹ᤖᤧ ᤂᤧᤴ ᤀᤡᤱᤄᤱᤅᤡᤴ ᤔᤧᤄᤧᤵᤛᤢᤀᤠᤱ ᤂᤧᤱᤜᤠ᤹ ᤛᤠ᤹ᤖᤡᤰ ᤔᤧᤖᤡᤱ ᤔᤧᤎᤰᤗᤥ॥

⁶ ᤘᤖ᤺ᤱᤅᤡᤴ ᤁᤠ᤺ᤰᤋᤠᤶᤔᤧ᤹ᤀᤠᤱ ᤋᤷᤛᤡᤛ ᤐᤣᤃᤠᤶᤔᤧ᤹ᤀᤥ. ᤘᤖ᤺ᤱᤅᤡᤸᤗᤧ ᤁᤢᤕᤠᤀᤥ ᤁᤧᤕᤢᤱᤒᤠ ᤔᤏᤠᤛᤣ. ᤂᤧᤏᤡ᤹ ᤔᤧᤖᤡᤱ ᤌᤰᤋᤠᤶᤔᤧ᤹ᤀᤠᤱ ᤜᤠᤒᤠᤶᤔᤧ᤹ᤀᤥ॥

⁷ ᤀᤢᤏᤠᤜᤢᤖᤡᤀᤠᤱᤎᤥ ᤔᤧᤏᤧᤛ᤻ᤛᤢᤒᤠ ᤛᤛᤠᤱᤛᤪᤥᤳ ᤆᤥ᤺ᤰᤔᤠ ᤋᤢᤖᤥᤛ ᤕᤧᤰᤕᤰᤁᤡᤴ ᤜᤠᤒᤠ ᤁᤴᤒᤡ᥅ ᤘᤖ᤺ᤱᤅᤠᤱ ᤏᤠᤎᤠ᤺ᤶᤒᤡ ᤁᤢᤛᤱ ᤗᤠᤈᤣ᤹ ᤑᤧ᤺ᤱᤛᤧ ᤁᤢᤔᤏᤠ ᤁᤧᤒᤠᤱᤒᤠ ᤕᤧᤰᤕᤰᤁᤡᤴ ᤀᤠᤶᤓᤠ ᤁᤴᤏᤣᤒᤡ᥅

⁸ ᤋᤡᤆᤜᤠ᤹ ᤀᤠᤒᤡᤒᤠ ᤋᤢᤖᤥᤛ ᤕᤧᤰᤕᤰᤁᤥ ᤗᤧᤱᤜᤱ ᤁᤧᤈᤥ᤺ᤰᤐᤠᤜᤠ᤹ᤃ ᤜᤠᤱᤛᤠᤛᤡᤖᤥ. ᤁ᤹ᤕᤥ ᤁᤧᤕᤢᤱᤒᤠ ᤗᤧᤱᤜᤱ ᤁᤧᤈᤥ᤺ᤰᤐᤠᤜᤠ᤹ᤃ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤁᤥ ᤂᤢᤴᤇᤡ᤹ ᤔᤡᤱ ᤁᤧᤍᤡ᤺ᤵᤐᤠ ᤔᤧᤈᤥᤃᤧᤖᤥ ᤂᤧᤴ ᤕᤧᤰᤕᤰᤁᤡᤴ ᤔᤧᤱᤔᤠ ᤜᤠ᤺ᤳᤗᤧ ᤀᤰᤋᤱᤒᤠ ᤏᤡᤱᤛᤣ᤺ᤰ ᤆᤥᤃᤢᤒᤣ᥅

⁹ ᤂᤧᤴ ᤕᤧᤰᤕᤰᤁᤥ ᤁᤧᤕᤢᤱᤒᤠ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤁᤧᤖᤧᤰ ᤀᤠᤱᤍᤡᤱ ᤗ᤹ᤔᤧᤴ ᤁᤢᤛᤢᤶ ᤔᤧᤴᤍᤶᤔᤏᤠᤒᤠ ᤆᤥ᤺ᤰᤔᤠᤖᤧ ᤗᤠᤃᤡ ᤜᤧᤰᤁᤩᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤁᤥᤒᤠ ᤁᤧᤖᤧᤰ ᤁᤢᤔᤡᤱ ᤁᤧᤍᤡ᤺ᤵᤐᤠ ᤔᤏᤠᤜᤠ᤹ ᤔᤧᤏ᤺ᤶᤛᤡᤱᤗ ᤆᤥ᤺ᤰᤔᤠᤛᤡᤖᤧ ᤗᤠᤃᤡ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤁᤴ ᤏᤡᤱᤛᤣ᤺ᤰᤁᤧᤴ ᤆᤥᤃᤢᤒᤠᤖᤥ॥

¹⁰ ᤋᤠᤷᤛᤡᤛᤒᤠ ᤔᤏᤠᤛᤣ᥄ ᤐᤣᤃᤧᤶᤔᤧ᤹ᤀᤠᤱ ᤂᤧ᤹ᤕᤥᤒᤠ ᤂᤠᤶᤔᤡᤴ ᤀᤃᤠᤶᤔᤧ᤹ᤀᤥ᥄ ᤀᤠᤸᤗ ᤂᤧᤏᤡ᤹ ᤁᤶᤒᤪᤠᤱ ᤁᤧᤔᤧᤵᤐᤠ ᤜᤠ᤺ᤳᤋᤠᤱ ᤜᤥᤵᤗᤥ॥

¹¹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤢᤰᤜᤠ᤹ ᤘᤖ᤺ᤱᤅᤡᤸᤗᤧ ᤁᤢᤛᤶᤍᤠᤱ ᤛᤴᤇᤢᤀᤠᤱ ᤐᤳᤗᤥ ᤜᤧᤰᤁᤩᤠᤱ ᤂᤧᤸᤗᤧ ᤁᤢᤕᤠᤀᤥ ᤁᤧᤏᤧᤒᤠ ᤜᤠᤱᤈᤢᤶᤜᤠ᤹ ᤔᤧᤕᤱᤗ ᤕᤠ᤺ᤴᤍᤢᤛᤡᤀᤠᤱ ᤘᤠ᤹ᤖᤥ॥ ᤂᤢᤏᤧ᤹ ᤘᤖ᤺ᤱᤅᤡᤸᤗᤧ ᤁᤢᤕᤠᤀᤥ ᤁᤧᤏᤧᤒᤠ ᤑᤥᤏᤡᤛᤡᤕᤠ ᤗᤠᤈᤣᤒᤠ ᤜᤠᤱᤕᤰᤜᤠ᤹ ᤂᤠᤵᤐᤢᤌᤩ᤺ᤱ ᤆᤥ᤺ᤰᤔᤠ ᤀᤡᤱᤈᤠᤱ ᤐᤡᤖᤢᤛᤡᤀᤠᤱ ᤘᤠ᤹ᤖᤥ॥

¹² ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤖᤥ. “ᤛᤡᤍᤥᤏᤧᤸᤗᤧ ᤁᤢᤛ᤻ᤛᤠ ᤔᤧᤴᤇᤡᤴᤛᤣ. ᤀᤠᤸᤗ ᤂᤧᤏᤡ᤹ ᤛᤛᤠᤱᤛᤪᤥᤳ ᤗ᤹ᤔᤧᤴ ᤔᤧᤃᤧᤀᤠᤱ ᤘᤠ᤹ᤖᤥ॥ ᤜᤧᤰᤁᤩᤠᤱ ᤕᤧᤰᤕᤰᤁᤥ ᤁᤧᤕᤢᤱᤒᤠ ᤂᤡᤏᤡ᤹ ᤔᤏᤠᤜᤠ᤹ ᤋᤢᤰᤂᤣ ᤔᤧᤈᤠ᤺ᤳᤋᤢᤛᤡᤀᤠᤱ ᤔᤧᤘᤠ᤹ᤖᤥ॥ ᤂᤧᤱᤜᤠ᤹ ᤔᤧᤄᤧᤳᤇᤡᤱᤅᤠᤱ ᤛᤠᤀᤡᤐᤪᤛ ᤗᤧᤵᤔᤠᤱ ᤔᤧᤒᤣ᤺ᤰᤛᤠᤱ ᤂᤧᤵᤔᤥᤀᤠᤱ ᤂᤢᤴᤇᤡ᤹ ᤋᤢᤰᤂᤣᤴ ᤆᤰᤔᤧᤗ᤹ᤏᤧᤸᤗᤥ॥”

¹³ ᤒᤣᤒᤡᤗᤥᤏᤒᤠ ᤗᤠᤈᤣᤴ ᤀᤥᤔᤧᤳᤋᤠᤶᤔᤧ᤹ᤀᤥ. ᤂᤧᤴ ᤗᤠᤈᤣ᤹ᤀᤥ ᤁᤧᤕᤢᤱᤒᤠ ᤛᤢᤘᤠᤱᤜᤠ᤹ ᤀᤠᤸᤗ ᤔᤧᤜᤥᤵᤗᤥ॥ ᤀᤛ᤻ᤛᤢᤖᤒᤠ ᤔᤏᤠᤜᤠ᤹ᤖᤧ ᤂᤧᤴ ᤗᤠᤈᤣᤴ ᤔᤢᤖᤧᤰ ᤂᤠᤖᤧᤰᤐᤠ ᤕᤧ᤺ᤱᤄᤠᤍᤧᤴᤏᤥ ᤁᤧᤕᤠᤰᤐᤠ ᤌᤰᤛᤠᤐᤢᤛᤠ ᤕᤠᤰᤏᤠᤍᤧᤴ ᤔᤧᤈᤥᤃᤢ ᤔᤧᤒᤡᤖᤢᤛᤡᤀᤠᤱ ᤘᤠ᤹ᤖᤥ॥ ᤂᤧᤱᤜᤠ᤹ᤖᤧ ᤌᤱ ᤌᤰᤔᤠ ᤆᤱᤜᤡᤶᤜᤠ᤹ ᤔᤧᤓᤥ᤺ᤰᤂᤢᤖᤥ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤜᤠᤱᤕᤰᤜᤠ᤹ ᤔᤧᤗᤢ᤺ᤴᤍᤢᤀᤠᤱ ᤔᤧᤗᤢᤵᤛᤢ ᤔᤧᤏᤧᤛ᤻ᤛᤢᤖᤥ॥

¹⁴ ᤗᤧᤱᤜᤱ ᤁᤧᤈᤥ᤺ᤰᤐᤠ ᤕᤶᤒᤠ ᤘᤠᤗᤠᤎᤠᤜᤠ᤹ᤀᤥ ᤁᤧᤕᤠᤰᤐᤠ ᤔᤏᤠᤛᤣ. ᤔᤧᤖᤡᤱ ᤌᤰᤋᤠᤶᤔᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤂᤧᤏᤡ᤹ ᤜᤠᤱᤕᤰᤁᤡᤴ ᤂᤠᤵᤐᤢᤌᤩ᤺ᤱ ᤔᤧᤈᤥᤃᤢᤀᤠᤱ ᤏᤧᤖᤥ॥

¹⁵ ᤂᤧᤴ ᤕᤧᤶᤔᤥ ᤋᤢᤖᤥᤛ ᤕᤧᤰᤕᤰᤁᤡᤴ ᤋᤱᤒᤣ᤹ ᤏᤢᤒᤥᤱ ᤌᤠᤖᤡᤰ ᤀᤡᤃᤪ ᤗᤳᤇᤠ ᤜᤠᤱᤎᤡᤰᤗᤧ ᤁᤢᤎᤠ᤺ᤰ ᤌᤠᤖᤡᤰ ᤏᤡᤱᤘᤠ᤹ᤔᤢ᤺ᤴ॥ ᤁᤖ ᤋᤱᤒᤣ᤹ ᤏᤢᤒᤥᤱ ᤁᤠ᤺ᤰᤋᤢᤀᤠᤱ ᤋᤢᤖᤥᤛ ᤕᤧᤰᤕᤰᤁᤡᤴ ᤗᤳᤇᤠ ᤁᤧᤳᤏᤡᤔᤠᤎᤡᤰᤗᤧ ᤁᤢᤛᤠᤶᤗᤥ ᤜᤧᤰᤋᤱᤒᤠ ᤐᤥᤱᤗᤥ—

¹⁶ ᤏᤡᤱᤘᤠ᤹ ᤁᤧᤔᤢ᤺ᤶᤔᤠ ᤁᤧᤳᤏᤡᤔᤠᤀᤣ. ᤔᤢᤰᤗᤠᤜᤠ᤹ ᤔᤢᤰᤂᤧ᤹ᤖ ᤕᤧᤰᤕᤰᤁᤡᤸᤗᤧ ᤁᤢᤗᤢᤶᤔᤥᤗᤠᤶ ᤐᤥ᤺ᤰᤂᤧᤀᤠᤱ ᤐᤣᤃᤧ᤹ᤀᤥ॥ ᤔᤢᤰᤗᤠ ᤔᤢᤰᤂᤧ᤹ᤀᤠᤱ ᤕᤖᤡᤰ ᤛᤠᤶᤗᤥᤜᤠ᤹ ᤛᤠᤶᤔᤧᤳᤋᤧ᤹ ᤂᤧᤸᤗᤧᤆᤥᤃᤢᤸᤗᤧ ᤕᤠᤶᤔᤥ ᤂᤧᤏᤧ᤹ ᤏᤡᤱᤘᤠ᤹ᤛᤢᤶ ᤁᤧᤗ᤹ᤖᤥ॥

¹⁷ ᤏᤢᤒᤥᤱ ᤋᤱᤒᤣᤖᤧ ᤁᤢᤏᤢᤵᤔᤥ ᤕᤜᤘᤣ ᤍᤠᤱᤒᤧᤸᤗᤧ ᤋᤢᤖᤥᤛ ᤕᤧᤰᤕᤰᤁᤡᤴ ᤕᤠᤶᤔᤥ ᤀᤠᤒᤠᤅᤣ ᤂᤢᤏᤧ᤹ ᤁᤢᤃᤧᤳᤏᤡᤔᤠ ᤆᤥ᤺ᤰᤔᤠ ᤕᤠ᤺ᤶᤒᤰᤁᤥ ᤏᤢ᤺ᤱᤔᤠ ᤐᤠᤱᤄᤢ᤹. ᤜᤧᤰᤁᤩᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤁᤥᤒᤠ ᤁᤧᤖᤧᤰ ᤜᤠᤱᤈᤢᤶᤜᤠ᤹ᤏᤢ ᤂᤧᤸᤗᤧ ᤗᤧᤱᤜᤱ ᤆᤥ᤺ᤰᤔᤠ ᤕᤠ᤺ᤶᤒᤰ ᤆᤥᤃᤢ᤹॥

¹⁸ ᤜᤧᤰᤁᤣᤛᤠᤱ ᤂᤧᤸᤗᤧ ᤁᤢᤀᤡᤴᤎᤠ᤺ᤰᤁᤡᤴ ᤏᤢ ᤂᤧᤸᤗᤧ ᤕᤠ᤺ᤶᤒᤰ ᤆᤥᤃᤢᤀᤠᤱ ᤌᤃᤢᤒᤠ ᤁᤢᤕᤠᤱᤅᤡᤴ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤃᤡ ᤗᤠ᤺ᤳᤗᤠ᤺ᤳ ᤔᤧᤛᤧᤴᤍᤢ᤹॥ ᤂᤧᤴ ᤗᤠ᤺ᤳᤗᤠ᤺ᤳ ᤔᤧᤛᤧᤴᤍᤢᤒᤠ ᤕᤠᤱᤅᤡᤴ ᤕᤠᤱ ᤕᤠᤱᤔᤠᤍᤧᤴᤏᤥ ᤔᤧᤴᤕᤢᤰᤂᤢᤴ᤹॥ ᤂᤧᤸᤗᤧ ᤗᤧᤱᤜᤱ ᤆᤥᤃᤢᤀᤠᤱ ᤌᤃᤢᤒᤠ ᤕᤠᤱᤅᤡᤴ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤏᤠᤜᤠ᤹ᤖᤧ ᤗᤠᤃᤡ ᤘᤧᤳᤋᤧᤛᤖᤧ ᤆᤠᤔᤠ ᤌᤢᤱᤔᤠ ᤏᤢ ᤏᤢ᤺ᤒ᤻ᤏᤢᤒᤠ ᤆᤠᤱ ᤆᤠᤱᤔᤠᤖᤧ ᤗᤠᤃᤡ ᤐᤥᤱᤗᤥ॥