ᤕᤛᤤᤕᤠ 22 - LIFOTNTᤕᤖᤢᤛᤗᤧᤶᤔᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤔᤠᤱᤏᤡᤱᤘᤠ᤹ᤐᤠᤴ 1 ᤁᤱᤃ ᤛᤢᤑᤥ ᤏᤡᤔᤠ ᤏᤧᤏᤧᤒᤠ ᤋᤧᤶᤒᤣ᤹ᤀᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤔᤠᤱᤏᤡᤱᤘᤠ᤹ᤐᤠᤴᤗᤥ— ᤌᤧᤔᤠ ᤐᤥᤱᤗ ᤐᤳᤋᤠᤱ ᤕᤧᤰᤕᤰᤁᤥᤒᤠ ᤔᤏᤠᤜᤠ᤹ ᤜᤡᤶᤜᤠ᤹ᤖᤧ ᤁᤢᤛᤶᤎᤠᤱ ᤋᤱᤏᤠᤶ ᤔᤧᤍᤥᤖ ᤔᤧᤕᤠᤰᤐᤠᤒᤣ᥅ 2 ᤜᤕᤱ ᤁᤡᤸᤗᤡᤱ ᤏᤢ ᤀ᤺ᤰᤔᤠ ᤑᤡ᤺ᤰᤔᤠᤖᤧ ᤁᤧᤍᤡᤶᤒᤠ ᤕᤧᤰᤕᤰᤁᤥᤒᤠ ᤔᤏᤠᤛᤣ. ᤜᤧᤰᤁᤩᤠᤱ ᤛᤥᤛᤥᤳᤗᤖᤠᤱ ᤆᤥ᤺ᤰᤔᤠᤖᤧ ᤁᤢᤎᤡᤶ ᤁᤧᤒᤥᤱᤒᤠ ᤕᤧᤰᤕᤰᤁᤥᤒᤠ ᤔᤏᤠᤛᤣ॥ ᤁᤧᤛᤡᤒᤠ ᤁᤧᤔᤏᤠᤜᤠ᤹ ᤋᤠᤓᤣ᤺ᤸᤗᤧ ᤔᤧᤛᤧᤖᤢᤛᤡᤒᤠ ᤔᤣ᤺ᤴᤗᤥ. ᤜᤧᤰᤁᤩᤠᤱ ᤌᤱᤅᤥ ᤔᤧᤛᤧᤖᤢᤛᤡᤒᤠᤀᤠᤱ ᤔᤣ᤺ᤴᤗᤥ॥ 3 ᤂᤧᤏᤧ᤹ ᤁᤧᤕᤢᤰᤛᤠᤒᤠᤜᤠ᤹ ᤁᤧᤖᤧᤰ ᤌᤡᤰᤗᤧᤱᤗᤧ ᤛᤥᤖᤡᤰ ᤔᤧᤄᤧᤳᤇᤡᤱ ᤔᤧᤒᤣᤖᤥ. ᤜᤧᤰᤁᤩᤠᤱ ᤂᤧᤱᤜᤠ᤹ ᤋᤥᤱ ᤗᤡᤖᤧ ᤔᤧᤴᤀᤠᤵᤛᤡᤱᤅᤣᤀᤣ ᤀᤡᤄᤣ᤺ᤱᤅᤥ ᤔᤧᤎᤩᤧᤖᤥ॥ ᤏᤡᤱᤔᤡᤜᤠ᤹ ᤔᤠ᤺ᤱᤄᤠ ᤔᤧᤘᤕᤧ᤺ᤸᤗᤧᤛᤠ ᤂᤧᤏᤡ᤹ ᤁᤧᤄᤧᤳᤋᤠᤛᤡ ᤁᤧᤒᤣᤃᤡᤖᤥ. ᤜᤧᤰᤁᤩᤠᤱ ᤂᤧᤏᤡ᤹ ᤌᤡᤰᤗᤧᤱᤗᤧ ᤛᤥᤖᤡᤰ ᤀᤡᤄᤣ᤺ᤱᤅᤥ ᤁᤧᤎᤠᤒᤠᤜᤠ᤹ ᤁᤧᤖᤧᤰ ᤁᤧᤶᤍᤧᤶᤛᤡᤀᤠᤱ ᤁᤧᤶᤍᤣ᤹ᤖᤡᤖᤥ॥ 4 ᤂᤧᤸᤗᤧᤆᤥᤃᤢᤸᤗᤧ ᤀᤠᤱᤃᤠ᤹ ᤔᤧᤳᤏᤧᤖᤥ. “ᤀᤠᤱᤃᤠ᤹ ᤀᤣ᤺ᤰᤛᤧᤳᤇᤠ ᤗᤧᤖᤠᤱ ᤌᤩᤠᤱᤅᤧ᤹ᤀᤥ॥ ᤀᤠᤱᤃᤠ᤹ ᤀᤢ᤺ᤰᤁᤠᤱ ᤀᤢᤰ ᤜᤠ᤺ᤵᤔᤠ ᤂᤥᤀᤠᤖᤖᤥ. ᤐᤵᤐᤪᤠ᤹ᤔᤠ ᤀᤠᤔᤏᤠᤜᤠ᤹ ᤔᤧᤔᤧᤃᤧ ᤔᤧᤔᤠᤖᤧᤒᤠᤸᤗᤧ ᤆᤥᤃᤢᤸᤗᤧ ᤀᤠᤱᤃᤠ᤹ ᤜᤠᤱᤜᤠᤱ ᤔᤧᤵᤔᤠ ᤋᤶᤛᤡᤱ ᤔᤧᤈᤥᤃᤠᤶᤔᤡᤴᤏᤧ᤹॥” 5 ᤛᤢᤑᤥ ᤏᤡᤔᤠ ᤏᤧᤏᤧᤒᤠ ᤋᤧᤶᤒᤣ᤹ᤀᤥ ᤕᤜᤘᤣ ᤍᤠᤱᤒᤠ. ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤠᤴᤗᤠᤶ ᤐᤥ᤺ᤰᤂᤧᤒᤠ ᤁᤴ ᤜᤕᤱ ᤁᤡᤸᤗᤡᤱ ᤜᤧᤰᤁᤩᤠᤱ ᤆᤡᤍᤥ᤹ ᤆᤡᤍᤥ᤹ ᤋᤥ᤹ᤔᤠ ᤏᤢ ᤁᤡᤔᤠ ᤕᤱᤔᤠ ᤕᤧᤴᤗᤥ. ᤂᤧᤒᤩᤠᤱ ᤗᤢᤱᤎᤠᤰᤜᤠ᤹ ᤗᤢ᤺ᤶᤔᤠ. ᤏᤢ ᤀᤠᤓᤠ᤹ᤖᤧ ᤑᤠ᤹ᤀᤠᤱ ᤐᤣᤗᤡ ᤑᤠᤰᤔᤏᤠᤒᤠ ᤀᤡᤰᤗᤠᤴ ᤁᤥ᤺ᤰᤔᤠ ᤑᤠᤱᤈᤱ ᤌᤧᤃᤢ ᤔᤠᤱᤘᤠᤜᤠ᤹ᤀᤥ ᤋᤥ᤺ᤰᤁᤠᤱ ᤗᤥ᤺ᤰᤂᤢᤒᤠ ᤕᤧᤴᤗᤥ॥ 6 ᤀᤣᤗᤠᤔ ᤁᤧᤕᤢᤱᤒᤠ ᤀᤴᤗᤠᤎᤠ ᤁᤧᤗᤥᤱᤒᤠ ᤌᤰᤛᤢᤒᤠᤜᤠ᤹ᤖᤧ ᤀᤴᤜᤠ᤹ᤏᤢ ᤛᤥᤖᤡᤰ ᤋᤥᤱ ᤕᤠᤱᤔᤠ ᤁᤠ᤺ᤴᤍᤩᤠᤴ ᤔᤧᤜᤣ᤹ᤛᤡᤱᤗᤥ॥ ᤜᤧᤰᤁᤩᤠᤱ ᤁᤡᤖ ᤋᤧᤱᤃᤵᤐᤥ ᤁᤧᤕᤢᤱᤒᤠ ᤌᤰᤛᤢᤒᤠᤜᤠ᤹ᤖᤧ ᤂᤥ᤺ᤴ ᤁᤢᤛᤢ᤺ᤶᤔᤥᤗᤠᤶ ᤔᤧᤗ᤺ᤳᤋᤢᤀᤠᤱ ᤔᤧᤕᤠᤱᤛᤡᤱᤗᤥ॥ 7 ᤏᤢ᤺ᤒ᤻ᤏᤢᤒᤠ ᤁᤧᤏᤧᤘᤠᤗᤠ ᤋᤧᤶᤒᤣ᤹ᤜᤠ᤹ ᤀᤴᤗᤠᤎᤠᤜᤠ᤹ᤖᤧ ᤛᤎᤧᤰ ᤋᤡᤶᤗᤥ. ᤜᤧᤰᤁᤩᤠᤱ ᤀᤴᤃᤧᤗᤥᤱᤒᤠᤜᤠ᤹ ᤕᤧᤰᤕᤰᤁᤥᤒᤠ ᤔᤠᤗᤠᤶᤎᤣ᤺ᤳᤜᤠ᤹ᤀᤥ ᤁᤥᤔᤠᤀᤠᤱ ᤕᤧᤵᤔᤠᤖᤧ ᤗᤠᤃᤡ ᤔᤢᤖᤠ ᤔᤧᤔᤧᤳᤋᤢᤛᤡᤀᤠᤱ ᤔᤧᤘᤠ᤹ᤖᤥ॥ 8 ᤕᤜᤢᤍᤠ ᤗᤠᤈᤣ᤹ᤀᤥᤒᤠ ᤁᤶᤒᤪᤠᤱᤜᤠ᤹ ᤑᤧᤈᤢᤶᤓᤧᤕᤠ ᤔᤣ᤺ᤴᤏᤣ ᤔᤧᤈᤥᤃᤢᤛᤡᤀᤠᤱ ᤔᤧᤘᤠ᤹ᤖᤥ॥ ᤂᤧᤴ ᤕᤧᤴᤏᤥ ᤋᤠᤶᤓᤢᤱᤅᤥᤒᤠ ᤜᤠᤱᤜᤡᤶᤔᤥ ᤁᤧᤘᤠ᤹ᤒᤠ ᤑᤧᤈᤢᤶᤓᤧᤕᤠᤜᤠ᤹ ᤂᤧᤏᤡ᤹ ᤁᤧᤃᤥ᤺ᤳᤋᤢᤶᤗᤥ॥ 9 ᤍᤠᤀᤢᤍ ᤜᤠᤱᤅᤡᤸᤗᤧ ᤁᤢᤕᤧᤰᤕᤰᤁᤥᤒᤠ ᤛᤧ᤺ᤵᤛᤡᤱᤔᤠᤍᤧᤴ ᤗᤢᤱᤎᤠᤰᤜᤠ᤹ᤀᤥ ᤕᤖᤡᤰ ᤁᤢᤜᤱᤜᤠ᤹ ᤐᤳᤗᤳᤇ ᤑᤠ᤹ᤀᤠᤱ ᤂᤧᤏᤡ᤹ ᤁᤧᤏᤡᤛᤢᤶᤗᤥ. ᤂᤧᤏᤡ᤹ ᤕᤥᤛᤔᤠ ᤘᤖᤰᤁᤥ ᤆᤫᤠ᤺ᤳᤋᤡᤴ ᤁᤧᤎᤧᤅᤢᤶᤗᤥ॥ 10 ᤂᤧᤏᤡ᤹ ᤕᤖᤢᤛᤗᤧᤔ ᤕᤧᤰᤕᤰᤁᤥ ᤁᤧᤒᤣᤃᤡᤀᤠᤱ ᤜᤡᤶᤜᤠ᤹ ᤁᤧᤏᤡᤖᤢᤶᤛᤡᤶ. ᤜᤧᤰᤁᤩᤠᤱ ᤗᤢᤱᤎᤠᤰᤁᤧᤴ ᤛᤧᤵᤔᤠ ᤑᤠ᤹ᤀᤠᤱ ᤜᤡᤶᤜᤠ᤹ ᤁᤧᤎᤢᤵᤛᤢᤶᤛᤡᤶᤗᤥ॥ 11 ᤕᤧᤰᤕᤰᤁᤡᤸᤗᤧ ᤁᤢᤗᤢᤶᤔᤥᤒᤠ ᤗᤢᤱᤎᤠᤰᤜᤠ᤹ᤀᤥ ᤁᤧᤏᤧᤒᤠ ᤋᤃᤡᤒᤠ ᤘᤖᤰᤗᤠᤶ ᤘᤠᤃᤧᤃᤢᤒᤠᤀᤠᤱ ᤁᤧᤒᤣ᤺ᤰᤐᤠ ᤆᤫᤠ᤺ᤳᤋᤡᤸᤗᤧ ᤗᤠᤃᤡ ᤂᤧᤏᤡ᤹ ᤗᤳᤇᤠ ᤆᤫᤠ᤺ᤳ ᤕᤠᤱᤔᤠ ᤘᤖᤰ ᤌᤡᤰ ᤁᤧᤈᤥᤃᤢᤶᤗᤥ॥ ᤁᤖ ᤀᤢᤏᤠᤜᤢᤖᤡᤒᤠ ᤕᤧᤶᤔᤠᤱᤎᤥᤀᤣ ᤁᤴ ᤏᤡᤱᤛᤣ᤺ᤰ ᤁᤧᤈᤥ᤺ᤰᤐᤠ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤂᤧᤏᤡ᤹ ᤏᤡᤱᤘᤠ᤹ ᤁᤧᤴᤀᤡ᤺ᤳᤋᤢᤶᤔᤡᤴᤗᤥ॥ ᤔᤧᤖᤡᤱᤎᤰᤔᤠ ᤁᤧᤒᤥᤱᤒᤠ ᤕᤧᤴᤎᤡᤰ ᤋᤠ᤹᤺ 12 ᤂᤧᤴ ᤕᤧᤴᤏᤥ ᤕᤜᤘᤣ ᤍᤠᤱᤒᤠ. ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤂᤧᤏᤡ᤹ ᤜᤠ᤺ᤵᤔᤠ ᤏᤢ ᤔᤧᤖᤡᤱᤎᤰᤔᤠ. ᤌᤧᤃᤣᤰ ᤏ᤺ᤱᤔᤠ ᤜᤧᤰᤁᤩᤠᤱ ᤛᤠᤃᤡ ᤋᤣᤳ ᤆᤠᤱᤔᤠᤖᤧ ᤗᤠᤃᤡ ᤁᤧᤀᤢ᤺ᤳᤋᤡᤀᤠᤱ ᤘᤕᤧᤖᤥ॥ 13 ᤁᤖ ᤀᤥᤔᤧᤳᤋᤧᤶᤔᤧ᤹ᤀᤥ. ᤕᤠᤶᤏᤠ᤺ᤶ ᤏᤢ ᤛᤠᤛᤠᤱ ᤛᤪᤥ᤺ᤳ ᤆᤥ᤺ᤰᤔᤠ ᤕᤠ᤺ᤶᤒᤰᤏᤡ ᤐᤥᤱᤗ ᤐᤳᤗᤥ॥ ᤌᤰᤛᤠᤜᤠ᤹ ᤔᤧᤱᤔᤠᤛᤡ ᤏᤢ ᤔᤧᤸᤗᤢᤰᤜᤠ᤹ ᤛᤧᤵᤔᤠᤛᤡ. ᤛᤠᤈᤠᤔᤠ ᤏᤢ ᤌᤡ ᤌᤢᤱᤔᤠ ᤕᤠ᤺ᤶᤒᤰᤏᤡ ᤐᤥᤱᤗ ᤐᤵᤐᤠ᥄ ᤂᤧᤏᤡ᤹ ᤁᤧᤒᤠ᤺ᤳᤋᤢᤶ. “ᤗ. ᤆᤠᤶ ᤌᤢᤅᤢᤶᤗᤥ. ᤌᤣᤀᤠᤱᤓᤧᤸᤗᤧ ᤋᤠ᤺ᤴᤍᤡᤰᤁ ᤀᤠᤏᤡ᤹ ᤀᤠᤛᤡᤀᤣᤖᤥ᥄” 14 ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤠᤏᤧᤰᤂᤥ᤹ᤀᤥ ᤀᤠᤱᤃᤠ᤹ ᤁᤴ ᤐᤠ᤺ᤴᤏᤡᤴ ᤔᤧᤳᤋᤠᤱᤗᤥ. “ᤁᤴ ᤗᤠᤕᤥᤴ ᤂᤧᤏᤡ᤹ ᤛᤡᤔᤠ ᤕᤧᤶᤔᤥ ᤌᤠᤖᤡᤰᤛᤠᤱ ᤗᤧᤵᤔᤡ ᤔᤧᤒᤥᤱᤏᤧᤴᤗᤥ॥” ᤛᤣᤒ᤻ᤏᤠ᤺ᤸᤗᤧ ᤁᤢᤗᤠᤃᤡ ᤛᤠᤶᤍᤡᤱ 15 ᤁᤸᤗᤧᤆᤥᤃᤢᤸᤗᤧ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤖᤥ. “ᤐᤣᤃᤧ᤹ᤀᤠᤱ ᤜᤠᤱᤜᤡᤶᤔᤥ ᤜᤡᤔᤠ ᤋᤱᤔᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤴ ᤀᤰᤂᤣ ᤔᤧᤳᤋᤧ᤹ᤀᤥ. 16 ᤂᤧᤏᤧ᤹ ᤁ᤹ᤕᤥ ᤌᤧᤔᤠ ᤁᤧᤈᤥ᤺ᤰᤗ ᤁᤧᤘᤠ᤹᥅ ᤜᤧᤰᤁᤩᤠᤱ ᤀᤠᤒᤠᤅᤣ ᤂᤧᤏᤧ᤹ ᤁᤧᤗᤠᤃᤡ ᤁ᤹ᤕᤥ ᤀᤡᤐᤢᤱ ᤂᤥ᤺ᤶᤔᤠ ᤜᤠ᤺ᤳᤗᤧ ᤕᤢᤰ ᤁᤧᤒᤡᤖᤧ᥅ ᤌᤣᤀᤠᤱ ᤁᤴ ᤆᤴᤈᤶᤒᤠᤍᤧᤴᤏᤥ ᤀᤠᤒᤠᤅᤣ ᤂᤧᤏᤧ᤹ ᤁᤧᤗᤠᤃᤡ ᤀᤡᤐᤢᤱ ᤆᤥ᤺ᤰᤛᤧ ᤏᤢ ᤕᤠᤰᤐᤣ᤹ᤀᤥ ᤀᤠᤵᤑᤣᤰ ᤁᤧᤏᤧᤔᤠᤍᤧᤴ ᤆᤥ᤺ᤰᤛᤧ ᤂᤧᤏᤧ᤹ ᤁ᤹ᤕᤥ ᤁᤧᤄᤥ᤺ᤴᤍᤢᤖ ᤁᤧᤕᤠᤰᤐᤠᤒᤣ᥅ 17 ᤁᤧᤎᤢᤶᤒᤠ ᤔᤏᤠᤀᤣ. ᤀᤥᤔᤧᤳᤋᤧ᥄ ᤕᤜᤘᤣ ᤍᤠᤱᤒᤧᤸᤗᤧ ᤂᤧᤏᤧ᤹ ᤌᤎᤵ ᤗ᤹ᤔᤠ ᤔᤧᤱᤄᤥᤀᤣ ᤁᤧᤍᤧᤶ ᤜᤧᤰᤁᤩᤠᤱ ᤔᤠ᤺ᤱᤄᤠ ᤗᤠᤵᤐᤢᤱ ᤁᤧᤍᤣᤖᤥ॥ 18 “ᤕᤜᤘᤣ ᤍᤠᤱᤒᤧᤸᤗᤧ ᤂᤧᤏᤧ᤹ ᤆᤡᤖᤡᤰᤁᤡᤸᤗᤧ ᤁᤧᤛᤢᤱᤅᤠᤱ ᤗᤠᤱᤓᤱᤘᤠ ᤁᤢᤀᤡᤛᤡᤰ ᤗᤳᤇᤠ ᤕᤶᤒᤠ ᤗᤠᤈᤣ᤹ᤀᤥ ᤗᤠᤵᤁᤧᤍᤣᤖᤥ॥ ᤀᤠᤶᤓᤠ ᤂᤧ᤹ᤕᤥ ᤂᤧᤏᤧ᤹ ᤁᤧᤛᤡᤖᤥ ᤜᤧᤰᤁᤩᤠᤱ ᤁᤢᤔᤠᤱᤘᤠ ᤁᤢᤜᤠᤱᤘᤠ ᤁᤧᤕᤠᤰᤐᤠ ᤁᤧᤀᤴᤗᤠᤎᤠᤜᤠ᤹ ᤔᤧᤃᤧᤱᤅᤠᤱ ᤔᤧᤏᤧᤖᤥ— ᤂᤧᤏᤧ᤹ ᤁᤧᤴᤍᤠᤱᤒᤧᤸᤗᤧ ᤁᤢᤜᤡᤶᤔᤥ ᤏᤠᤎᤠᤔᤠ ᤛᤠᤶᤎᤠᤔᤠ ᤐᤠ᤺ᤴᤜᤠ᤹ ᤁᤧᤍᤠᤖᤢᤖᤥ॥ 19 ᤀᤠᤱᤃᤠ᤹ ᤂᤧᤏᤧ᤹ ᤁᤧᤕᤠ᤺ᤶᤒᤰᤁᤥᤏᤢ ᤗᤠ᤺ᤰᤁᤠᤳ ᤗ᤺ᤳᤏᤧᤍᤣᤏᤧᤖᤥ. ᤜᤧᤰᤁᤩᤠᤱ ᤀᤠᤒᤠᤅᤣ ᤁᤧᤕᤢᤰᤏᤠᤍᤧᤴᤏᤥᤗᤠᤶ ᤕᤥ ᤔᤰᤌᤠ᤺ᤴᤏᤧᤖᤥ॥” 20 ᤕᤜᤘᤣ ᤍᤠᤱᤒᤧᤸᤗᤧ ᤛᤣᤒ᤻ᤏᤠ᤺ᤴ ᤔᤧᤳᤋᤢ. “ᤂᤧᤴ ᤕᤧᤴᤏᤥ ᤜᤡᤸᤁᤡᤕᤠᤜᤖᤧ ᤁᤢᤛ᤻ᤛᤠ ᤀᤠᤱᤃᤠ᤹ ᤀᤠᤛᤧᤘᤠᤖᤥᤒᤠ ᤀᤣᤗᤩᤠᤁᤡᤶᤔᤧᤴ ᤂᤧᤏᤧ᤹ ᤁᤧᤗᤧᤰᤘᤠᤀᤥ ᤀᤢ᤺ᤳᤋᤢᤱᤅᤠᤱ ᤕᤢᤰᤂᤢᤱ᤹॥ 21 ᤀᤠᤱᤃᤠ᤹ ᤂᤧᤴ ᤔᤏᤠᤴ ᤂᤧᤏᤧ᤹ ᤁᤧᤈᤠᤱᤜᤠ᤹ ᤆᤠᤰᤋᤢᤱ᤹ ᤜᤧᤰᤁᤩᤠᤱ ᤂᤧᤏᤧ᤹ ᤁᤧᤓ᤹ᤀᤡᤴ ᤂᤢᤏᤧ᤹ ᤕᤢᤵᤋᤢᤱ᤹. ᤂᤧᤒᤩᤠᤱ ᤂᤧᤏᤧ᤹ ᤁᤧᤕᤢᤰᤁᤧᤴ ᤂᤧᤸᤗᤧ ᤁᤢᤜᤢᤰᤁᤥ ᤜᤢᤰᤛᤢᤵᤋᤢᤱ᤹॥ ᤂᤧᤴ ᤔᤏᤠᤴ ᤕᤖᤢᤛᤗᤧᤔ ᤕᤧᤰᤕᤰᤁᤥ ᤁᤧᤕᤢᤱᤒᤠ ᤏᤢ ᤕᤜᤢᤍᤠ ᤗᤠᤈᤣ᤹ᤀᤥ ᤁᤧᤕᤢᤱᤒᤠ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤜᤡᤶᤛᤕᤱᤅᤥᤒᤠ ᤐᤠᤏᤢᤍᤡᤱ ᤐᤠ ᤜᤧᤰᤁᤣ ᤐᤥᤱ᤹॥ 22 ᤍᤠᤀᤢᤍ ᤜᤠᤱᤅᤡᤸᤗᤧ ᤁᤢᤜᤡᤶᤛᤕᤱᤅᤥᤒᤠ ᤋᤡᤔᤡᤰᤁᤧᤴ ᤀᤠᤱᤃᤠ᤹ ᤂᤧᤸᤗᤧ ᤁᤢᤗᤰᤐᤧᤴᤏᤥ ᤜᤢᤰᤛᤢᤵᤋᤢᤱ᤹॥ ᤂᤧᤸᤗᤧ ᤜᤴᤍᤢᤒᤠᤴ ᤜᤠ᤺ᤳᤗᤧᤀᤠᤱ ᤛᤢᤵᤔᤠ ᤔᤧᤛᤢᤰᤋᤢᤴ᤹. ᤜᤧᤰᤁᤩᤠᤱ ᤂᤧᤸᤗᤧ ᤛᤢᤒᤢᤒᤠᤴ ᤜᤠ᤺ᤳᤗᤧᤀᤠᤱ ᤜᤶᤔᤠ ᤔᤧᤛᤢᤰᤋᤢᤴ᤹॥ 23 ᤀᤠᤱᤃᤠ᤹ ᤂᤧᤴ ᤔᤏᤠᤴ ᤕᤧᤵᤌᤣ᤺ᤰᤁᤥ ᤁᤧᤒᤵᤐᤠ ᤗᤳᤇᤠ ᤋᤎᤵ ᤔᤧᤸᤗ᤹ᤔᤏᤠᤒᤠ ᤘᤣ᤹ᤔᤠᤛᤡᤱ ᤁᤢᤀᤡᤛᤡᤰ ᤆᤥᤃᤢᤱ᤹॥ ᤜᤧᤰᤁᤩᤠᤱ ᤂᤧᤴ ᤀᤠᤒᤠᤅᤣ ᤁᤢᤶᤒᤠᤖᤧ ᤁᤢᤜᤡᤶᤔᤡᤸᤗᤧ ᤗᤠᤃᤡ ᤗᤳᤇᤠ ᤔᤡᤱᤛᤥ ᤌᤠ᤺ᤱᤛᤥᤖᤧ ᤕᤢᤰᤏᤠᤍᤧᤴ ᤐᤥᤱ᤹॥ 24 “ᤁᤖ ᤂᤢᤏᤧ᤹ ᤀᤠᤒᤠᤅᤣ ᤁᤢᤜᤡᤶᤛᤕᤱᤅᤥᤒᤠ ᤁᤧᤖᤧᤰ ᤜᤠᤱᤘᤠ ᤔᤠᤱᤘᤠ ᤁᤢᤔᤢ᤹ᤀᤡᤍᤠᤱᤛᤠᤜᤠ᤹ ᤏᤢ ᤁᤢᤎᤠ᤺ᤰᤜᤠ᤹. ᤜᤧᤰᤁᤩᤠᤱ ᤁᤢᤜᤡᤶᤛᤕᤱᤅᤥᤒᤠ ᤂᤰᤐᤧᤳ ᤆᤢᤈᤢᤰᤛᤠ ᤔᤏᤠᤜᤠ᤹ ᤗᤳᤇᤠ ᤛᤡᤳᤗᤠᤱᤅᤥ ᤕᤖᤡᤰ ᤛᤠᤔᤠᤜᤠ᤹ ᤗᤡ᤺ᤵᤗ ᤑᤥ᤺ᤶᤔᤏᤠᤀᤠᤱ ᤁᤧᤒᤵᤐᤠ ᤁᤢᤀᤡᤛᤡᤰ ᤂᤢᤏᤧ᤹ᤀᤣ ᤁᤢᤗᤰᤐᤧᤴᤏᤥ ᤌᤠᤖᤥ॥ 25 ᤂᤧᤴ ᤕᤧᤴᤏᤥ. ᤕᤧᤵᤌᤣ᤺ᤰᤁᤥ ᤁᤧᤒᤵᤐᤠ ᤌᤎᤵ ᤔᤧᤸᤗ᤹ᤔᤏᤠᤒᤠ ᤂᤧᤴ ᤘᤣ᤹ᤔᤠᤛᤡᤱᤅᤡᤴ ᤆᤳᤇᤡᤱ᤹॥ ᤜᤧᤰᤁᤩᤠᤱ ᤂᤧᤴ ᤘᤣ᤹ᤔᤠᤛᤡᤱᤅᤡᤴ ᤔᤧᤀᤠ᤺ᤰᤂᤢ ᤔᤧᤍᤣᤛᤢ᤹. ᤂᤧᤒᤩᤠᤱ ᤂᤧᤴ ᤘᤣ᤹ᤔᤠᤛᤡᤱᤅᤥ ᤁᤧᤓᤥ᤺ᤴᤇᤡᤱᤒᤠᤱ ᤁᤧᤒᤵᤐᤠ ᤁᤧᤗᤡ᤺ᤵᤐᤠ ᤁᤰᤁᤡᤴ ᤔᤧᤄᤰᤋᤢᤀᤠᤱ ᤔᤰᤌᤠ॥” ᤕᤜᤘᤣ ᤍᤠᤱᤒᤧᤸᤗᤧ ᤀᤠᤒᤠᤅᤣ ᤐᤠ᤺ᤳᤋᤢᤀᤠᤱ ᤘᤠ᤹ᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.