ᤕᤛᤤᤕᤠ 21 - LIFOTNT

ᤒᤣᤒᤡᤗᤥᤏ ᤕᤧᤰᤕᤰᤁᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤔᤠᤱᤏᤡᤱᤘᤠ᤹ᤐᤠᤴ

¹ ᤘᤖ᤺ᤱᤅᤡᤸᤗᤧ ᤁᤢᤕᤠᤀᤥ ᤁᤧᤏᤧᤒᤠ ᤔᤢᤖᤧᤰ ᤂᤠᤖᤧᤰᤐᤠ ᤕᤧ᤺ᤱᤄᤠᤍᤧᤴᤏᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤔᤠᤱᤏᤡᤱᤘᤠ᤹ᤐᤠᤴ— ᤗᤠᤱᤃᤧᤳ ᤐᤡᤛᤠᤱᤒᤠ ᤗᤠᤈᤣ᤹ᤀᤥ ᤕᤶᤒᤠ ᤛᤠᤶᤔᤡ᤺ᤳ ᤀᤡᤛᤫᤠᤖᤡ ᤐᤥ᤺ᤰᤐᤠ ᤁᤢᤀᤡᤛᤡᤰ. ᤔᤢᤖᤧᤰ ᤂᤠᤖᤧᤰᤐᤠ ᤕᤧ᤺ᤱᤄᤠᤍᤧᤴᤏᤥᤗᤠᤶ. ᤁᤡᤵᤔᤠ ᤁᤧᤄᤢᤒᤠ ᤗᤠᤈᤣ᤹ᤗᤠᤶ ᤗᤳᤇᤠ ᤀᤠᤛᤧᤳᤛᤧᤵᤐᤠᤎᤡᤰ ᤌᤠᤱᤗ ᤐᤳᤗᤥ॥

² ᤁᤡᤵᤔᤠ ᤁᤧᤄᤢᤒᤠ ᤗᤳᤇᤠ ᤛᤢᤑᤥᤎᤡᤰ ᤀᤠᤱᤃᤠ᤹ ᤀᤥᤛᤣ᤺ᤴᤔᤧᤎᤠᤰᤋᤠᤱᤗᤥ— ᤀᤡᤱᤗᤧᤰ ᤁᤧᤈᤥ᤺ᤰᤐᤧᤸᤗᤧ ᤀᤡᤱᤗᤧᤰᤁᤣ ᤆᤥᤃᤢᤖᤥ. ᤜᤧᤰᤁᤩᤠᤱ ᤁᤧᤔᤧᤱᤒᤧᤸᤗᤧ ᤔᤧᤰᤂᤢᤖᤥ॥ ᤀᤣᤗᤠᤔᤒᤠ ᤌᤰᤛᤢᤒᤠᤛᤣ. ᤋᤧᤴᤎᤱ ᤆᤥᤃᤧᤶᤔᤧ᤹ᤀᤥ. ᤔᤠᤍᤡᤒᤠ ᤌᤰᤛᤢᤒᤠᤛᤣ. ᤕᤧᤰᤕᤰᤜᤠ᤹ ᤁᤒᤪᤡᤱ ᤁᤒᤠᤶᤛᤡᤶᤔᤧ᤹ᤀᤥ ᤒᤣᤒᤡᤗᤥᤏᤒᤠᤜᤠ᤹ᤖᤧ ᤔᤧᤕᤠ᤺ᤳᤗ ᤔᤧᤕᤠ᤺ᤴᤍᤢᤛᤡᤒᤠᤴ ᤀᤠᤱᤃᤠ᤹ ᤏᤢᤵᤛᤢᤱ ᤐᤡᤖᤢᤱᤛᤡᤱᤗᤥ॥

³ ᤁᤸᤗᤧᤆᤥᤃᤢᤸᤗᤧ ᤀᤠᤱᤃᤠ᤹ ᤀᤠᤎᤰᤁᤡᤴ ᤁᤧᤖᤧᤰ ᤛᤠ᤹ᤖᤡᤰ ᤋᤢᤰᤗᤥ. ᤛᤠᤃᤵᤔᤠ ᤋᤢᤱᤅᤡᤸᤗᤧ ᤋᤖᤢᤔᤠ ᤔᤧᤴᤇᤢᤔᤠᤴ ᤁᤢᤀᤡᤛᤡᤰ ᤋᤢᤰᤔᤧᤸᤗᤧ ᤕᤠᤱᤛᤠᤱᤅᤠᤱ ᤘᤠ᤹ᤖᤥ॥ ᤌᤣ᤺ᤴ ᤂᤧᤵᤛᤢᤱ ᤂᤧᤸᤗᤧ ᤀᤠᤱᤃᤠ᤹ ᤕᤠ᤺ᤴᤏᤠᤖᤥ ᤌᤣ᤺ᤴ ᤏᤡᤛᤢᤱ ᤂᤧᤸᤗᤧ ᤀᤠᤱᤃᤠ᤹ ᤀᤠᤏᤡᤱᤘᤠ᤹ ᤋᤢᤰᤗᤥ॥

⁴ ᤀᤠᤱᤃᤠ᤹ ᤀᤠᤗᤢᤱᤔᤠ᤹ ᤑᤩᤠ᤺ᤱᤓᤩᤠ᤺ᤱ ᤗ᤹ᤀᤠᤱ ᤘᤠ᤹ᤀᤠᤖᤥ ᤀᤠᤱᤃᤠ᤹ ᤐᤃᤡ ᤁᤡᤀᤧᤀᤠᤱ ᤕᤱᤅᤠᤖᤥ॥ ᤀᤠᤛᤡᤖᤠ᤹ ᤁᤧᤎᤠᤱᤒᤠ ᤕᤢ᤺ᤴᤇᤡᤰᤐᤠ ᤔᤠᤰᤆᤡᤘᤈᤡ ᤗ᤹ᤔᤧᤴᤗᤥ ᤀᤠᤱᤃᤠ᤹ ᤀᤠᤃᤡᤔᤠ ᤀᤠᤕᤱᤔᤠ ᤐᤥ᤺ᤰᤂᤧᤀᤠᤱ ᤘᤠ᤹ᤖᤥ॥

⁵ ᤀᤥᤔᤧᤳᤋᤧᤶᤔᤧ᤹. ᤂᤧᤱᤜᤠ᤹ᤖᤧ ᤆᤠᤔᤠ ᤌᤢᤱᤔᤠᤜᤠ᤹ ᤔᤧᤎᤠᤒᤢᤖᤥ. ᤕᤢᤱᤏᤠ ᤔᤧᤓᤧᤛᤢ᤹. ᤜᤧᤰᤁᤩᤠᤱ ᤔᤧᤈ ᤔᤧᤎᤢᤅᤢᤖᤥ ᤛᤢᤜᤠᤱᤕᤢᤰᤐᤠᤛᤣ. ᤐᤥᤃᤧᤶᤔᤧ᤹. ᤂᤥᤜᤠ᤹ ᤕᤠᤖᤡᤵ ᤆᤥᤃᤠᤶᤔᤧ᤹ᤀᤥ᥄

⁶ ᤕᤜᤘᤣ ᤍᤠᤱᤒᤧᤸᤗᤧ ᤀᤠᤱᤃᤠ᤹ ᤀᤰᤂᤣ ᤔᤧᤳᤋᤠᤱᤗᤥ. “ᤐᤣᤃᤧ᤹. ᤀᤡᤰᤁᤧᤃᤥᤒᤠ ᤕᤢᤰᤂᤧ᤹ᤀᤥ ᤂᤧᤸᤗᤧ ᤌᤣ᤺ᤴ ᤏᤡᤛᤢ᤹ ᤂᤧᤴ ᤐᤠ᤺ᤳᤋᤢᤖᤥ॥

⁷ ᤀᤠᤸᤗ ᤂᤧᤸᤗᤧ ᤁᤢᤍᤡ᤺ᤰ ᤁᤢᤍᤡ᤺ᤰ ᤀᤴᤗᤠᤎᤠ ᤁᤧᤗᤥᤱᤒᤠᤜᤠ᤹. ᤀᤍᤱᤜᤠ᤹ ᤏᤢ ᤀᤢᤔᤣᤜᤠ᤹ ᤁᤧᤕᤢᤰᤐᤠᤜᤠ᤹ ᤔᤧᤓᤧᤴᤗ ᤔᤧᤒᤵᤐᤠ ᤏᤡᤛᤢᤛᤡᤖᤥ. ᤜᤧᤰᤁᤣ᤺ᤸᤗᤧ ᤂᤧᤴ ᤆᤠ᤺ᤳᤆᤠ᤺ᤳᤋᤠᤱ ᤛᤡᤱᤛᤡᤱ ᤕᤧᤰᤕᤧᤰ ᤗ᤹ᤖᤥ॥”

⁸ ᤂᤧᤴ ᤀᤡᤰᤁᤧᤃᤥᤒᤧᤴ ᤀᤰᤂᤣ ᤗ᤹ᤖᤧᤀᤠᤱ ᤀ᤺ᤰᤋᤧᤖᤥ. “ᤀᤠᤍᤠᤱᤒᤣ. ᤀᤠᤱᤃᤠ᤹ ᤌᤡᤰᤕᤠ᤺ᤴᤎᤰ ᤀᤡᤰᤁᤧᤃᤥᤒᤧᤴ ᤆᤱᤜᤡᤶᤔᤥ ᤕᤧᤵᤔᤠᤃᤴᤏᤠᤖᤥ. ᤜᤧᤰᤁᤩᤠᤱ ᤛᤧᤴᤍᤡᤰ ᤌᤵᤔᤣ ᤀᤡᤰᤁᤥᤔᤠᤍᤧᤴᤏᤥ ᤘᤠ᤹ᤀᤠᤖᤥ॥

⁹ ᤀᤥᤔᤧᤳᤋᤧᤶᤔᤧ᤹. ᤁᤢᤃᤠᤵᤌᤡᤰ ᤀᤴᤗᤧ ᤀᤢ᤺ᤱᤛᤢᤒᤠ ᤗᤳᤇᤠ ᤗᤠᤎᤠᤛᤶᤎᤠᤱ ᤗᤳᤇᤠ ᤔᤏᤠᤎᤡᤰ ᤑᤧᤴᤗ ᤐᤳᤗᤥ॥ ᤜᤧᤰᤁᤩᤠᤱ ᤏᤢᤃᤵ ᤐᤡᤖᤢᤛᤡᤖ ᤐᤠ᤺ᤳᤋᤢᤖᤥ. ‘ᤒᤣᤒᤡᤗᤥᤏ ᤕᤧᤰᤕᤰᤁᤡᤴ ᤂᤠᤵᤐᤢᤌᤩ᤺ᤱ ᤐᤥ᤺ᤰᤂᤧᤖᤥ. ᤂᤠᤵᤐᤢᤌᤩ᤺ᤱ ᤐᤥ᤺ᤰᤂᤧᤖᤥ. ᤂᤧᤒᤩᤠᤱ ᤂᤧ᤹ᤕᤥ ᤔᤧᤗᤰᤋᤢ ᤔᤧᤄᤥ᤺ᤴᤍᤢᤀᤠᤱ ᤔᤧᤈᤥᤃᤢᤛᤡᤒᤠ ᤁᤧᤖᤧᤰ ᤔᤠᤱ ᤏᤠᤘᤠᤀᤡᤳᤗᤠᤜᤠ᤹ ᤑᤸᤗᤰ ᤘᤖᤰ ᤔᤧᤀᤧᤰᤂᤢᤛᤡᤀᤠᤱ ᤂᤠᤶᤒᤠᤱᤅᤥ ᤔᤧᤃᤧᤅᤧᤀᤠᤱ ᤔᤧᤏᤧᤖᤥ॥’”

¹⁰ ᤀᤠᤔᤏᤠᤛᤣ. ᤕᤠ᤹ ᤌᤠᤶᤔᤠᤍᤧᤴᤏᤥ ᤛᤡ ᤔᤧᤏᤢᤃᤢᤒᤠ ᤁᤢᤀᤡᤛᤡᤰ ᤂᤡᤏᤢᤰ ᤂᤡᤏᤢᤰ ᤔᤧᤏᤢᤃᤢᤛᤡᤒᤠᤛᤣ᥄ ᤀᤡᤛᤪᤠᤀᤡᤗᤒᤠ ᤔᤠᤱ. ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤠᤴᤗᤠᤶ ᤂᤧᤵᤛᤢᤱᤒᤠ ᤐᤠ᤺ᤴᤜᤠ᤹ ᤀᤠᤱᤃᤠ᤹ ᤂᤧᤏᤡ᤹ ᤔᤧᤳᤏᤡᤱᤗᤥ॥

ᤀᤧᤍᤥᤔ ᤗᤠᤈᤣ᤺ᤸᤗᤧ ᤁᤢᤕᤠ᤺ᤶᤒᤣᤀᤥ ᤔᤠᤱᤏᤡᤱᤘᤠ᤹ᤐᤠᤴ

¹¹ ᤀᤧᤍᤥᤔ ᤗᤠᤈᤣ᤺ᤸᤗᤧ ᤁᤢᤕᤠ᤺ᤶᤒᤣᤀᤥ ᤔᤠᤱᤏᤡᤱᤘᤠ᤹ᤐᤠᤴ— “ᤀᤡᤰᤁᤧᤃᤥᤒᤣ. ᤂᤠᤀᤥ᤺ᤵᤔᤠ ᤀᤠᤰᤂᤩᤠᤖᤡᤰ ᤘᤠ᤹᥅ ᤀᤡᤰᤁᤧᤃᤥᤒᤣ. ᤂᤠᤀᤥ᤺ᤵᤔᤠ ᤀᤠᤰᤂᤩᤠᤖᤡᤰ ᤘᤠ᤹ᤒᤣ᥅” ᤑᤠ᤹ᤀᤠᤱ ᤁᤢᤓᤠᤖᤧ ᤛᤣᤀᤡᤖᤗᤠᤶ ᤀᤠᤱᤃᤠ᤹ ᤔᤧᤔᤧᤳᤋᤠᤖ ᤔᤧᤒᤳᤗᤥ॥

¹² ᤀᤡᤰᤁᤧᤃᤥᤒᤧᤸᤗᤧ ᤏᤢᤃᤵ ᤐᤡᤖᤢᤛᤡᤖᤥ. “ᤋᤠᤏᤠᤶ ᤐᤥᤱᤗ ᤐᤳ. ᤜᤧᤰᤁᤩᤠᤱ ᤂᤠᤎᤠᤶᤗᤀᤠᤱ ᤐᤳᤗᤥ॥ ᤂᤧᤏᤧ᤹ ᤁᤢᤓᤠ ᤐᤠ᤺ᤴᤜᤠ᤹ ᤛᤣ᤺ᤴᤍᤥᤔᤠ ᤁᤧᤃᤳᤋᤢᤏᤧᤓᤃᤪ. ᤛᤣ᤺ᤴᤍᤥᤛᤧ᤹ᤀᤥ. ᤂᤧᤒᤩᤠᤱ ᤕᤠᤶᤔᤥ ᤏᤢ᤺ᤰᤂᤧ᤹ᤀᤠᤱ ᤑᤧᤖᤧ᤹ᤀᤥ॥”

ᤀᤖᤒ ᤗᤠᤈᤣ᤺ᤸᤗᤧ ᤁᤢᤕᤠ᤺ᤶᤒᤣᤀᤥ ᤔᤠᤱᤏᤡᤱᤘᤠ᤹ᤐᤠᤴ

¹³ ᤀᤖᤒ ᤗᤠᤈᤣ᤺ᤸᤗᤧ ᤁᤢᤕᤠ᤺ᤶᤒᤣᤀᤥ ᤔᤠᤱᤏᤡᤱᤘᤠ᤹ᤐᤠᤴ— ᤍᤍᤠᤏ ᤁᤧᤕᤢᤱᤒᤠ ᤔᤏᤠᤛᤣ. ᤂᤧᤏᤡ᤹ ᤗᤠᤶᤍᤡᤰ ᤁᤧᤈᤥ᤺ᤰᤐᤠ ᤋᤡ᤺ᤰᤗᤠᤜᤠ᤹ ᤀᤖᤒ ᤈᤠᤈᤣ᤹ᤒᤠ ᤕᤧ᤺ᤱᤄᤠᤍᤧᤴᤏᤥᤒᤠ ᤑᤠᤳᤋᤠᤵᤜᤠ᤹ᤀᤥ ᤕᤠᤱᤔᤧᤎᤥ᤺ᤰᤗᤥ॥

¹⁴ ᤁᤢᤘᤠᤃᤧᤔᤡ᤺ᤰᤐᤠᤜᤠ᤹ᤖᤧ ᤗᤠᤃᤡ ᤆᤫᤠ᤺ᤳ ᤋᤠᤖᤧᤶᤔᤧ᤹ᤀᤥ. ᤋᤣᤔᤠ ᤗᤠᤈᤣ᤹ ᤁᤧᤕᤢᤱᤒᤠᤜᤠ᤹ᤖᤧ ᤘᤧᤵᤔᤡᤒᤠᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤆᤠᤔᤠ ᤌᤢᤱᤔᤠ ᤋᤠᤖᤧᤶᤔᤧ᤹ᤀᤥ॥

¹⁵ ᤂᤧᤱᤜᤠ᤹ ᤋᤠᤓᤣᤗᤠᤶ. ᤋᤖᤵ ᤑᤡ᤺ᤱᤔᤏᤠᤒᤠ ᤛᤧᤸᤗᤧᤱ ᤛᤧᤸᤗᤧᤱ ᤁᤧᤗ᤹ᤒᤠ ᤋᤠᤓᤣᤗᤠᤶ ᤏᤢ ᤁᤡᤰᤋᤢ᤺ᤱ ᤁᤧᤍᤢ᤺ᤱᤒᤠ ᤗᤡ ᤗᤠᤶ. ᤜᤧᤰᤁᤩᤠᤱ ᤛᤠ᤹ᤖᤡᤰ ᤕᤶᤒᤠ ᤋᤧᤱᤎᤱᤗᤠᤶ ᤛᤧ᤺ᤵᤛᤡᤱᤛᤧ ᤔᤧᤄᤧᤳᤇᤡᤱ ᤔᤧᤒᤣ᤺ᤰᤗᤥ॥

¹⁶ ᤂᤧᤒᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤀᤠᤱᤃᤠ᤹ ᤀᤰᤂᤣ ᤔᤧᤳᤋᤠᤱ. “ᤋᤱᤒᤣ᤹ ᤌᤡᤰᤗᤧ ᤗᤠᤃᤡ ᤏᤠᤶᤕᤠᤰᤁᤥ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤛᤧᤘᤠᤖᤥᤒᤧᤸᤗᤧ ᤋᤱᤒᤣᤴ ᤏᤡᤖᤢ᤹. ᤜᤧᤰᤁᤣᤗ᤹ᤖᤡᤰᤁᤣ ᤋᤱᤒᤣ᤹ ᤌᤡᤰ ᤗᤧᤵ ᤁᤧᤳᤋᤡᤸᤗᤧᤛᤠ ᤁᤣᤍᤠᤖᤒᤠ ᤁᤧᤖᤧᤰ ᤜᤠᤱᤘᤠ ᤔᤠᤱᤘᤠᤴ ᤔᤧᤰ॥

¹⁷ ᤋᤥᤱ ᤗᤡ ᤁᤧᤀᤠᤵᤐᤠᤜᤠ᤹ᤃ ᤁᤧᤍᤠᤖ ᤁᤧᤕᤢᤱᤒᤠ ᤔᤢᤰᤁᤧᤃᤢᤒᤠ ᤔᤧᤈᤥᤰ. ᤁᤖ ᤂᤧᤱᤜᤠ᤹ ᤆᤒᤧ᤺ᤳᤇᤡᤰᤗᤰ ᤔᤧᤜᤡᤱ ᤔᤧᤕᤠ᤺ᤰ॥” ᤁᤴ ᤐᤠ᤺ᤴᤏᤡᤴ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤠ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤠ᤺ᤳᤋᤢᤱᤗᤥ॥