ᤕᤛᤤᤕᤠ 20 - LIFOTNT

ᤔᤡᤛᤪ ᤏᤢ ᤁᤢᤛ ᤗᤠᤈᤣ᤹ᤀᤥ ᤂᤢᤶᤍᤡᤱ

¹ ᤁᤴ ᤐᤠ᤺ᤴᤜᤠ᤹ ᤐᤥ᤺ᤰᤂᤧᤒᤠ ᤋᤱᤒᤣᤀᤥ ᤀᤛ᤻ᤛᤢᤖᤒᤠ ᤛᤖᤃᤠᤏ ᤜᤠᤱᤅᤡᤸᤗᤧ ᤔᤧᤳᤋᤢᤒᤠ ᤁᤢᤀᤡᤛᤡᤰ ᤂᤢᤏᤧ᤹ ᤁᤧᤖᤧᤰᤏᤢ᤺ᤸᤗᤧ ᤕᤶᤒᤠ ᤁᤢᤎᤰᤔᤥᤒᤠᤴ ᤀᤛᤍᤥᤍᤀᤥ ᤐᤣ. ᤜᤧᤰᤁᤩᤠᤱ ᤌᤱ ᤆᤥᤃᤢᤀᤠᤱ ᤗᤠᤈᤣᤴ ᤜᤢᤰᤁᤠᤵ ᤔᤧᤳᤇᤡᤱ॥

² ᤁᤴ ᤐᤠ᤺ᤴᤏᤡᤴ ᤀᤰᤂᤣ ᤐᤥ᤺ᤰᤂᤧᤸᤗᤧ ᤕᤜᤘᤣ ᤍᤠᤱᤒᤠᤴ ᤀᤠᤔᤥᤈᤖᤧ ᤁᤢᤛ᤻ᤛᤠ ᤕᤛᤤᤕᤠᤗᤠᤶ ᤐᤥ᤺ᤰᤂᤧᤀᤠᤱ ᤐᤠᤖᤧ॥ ᤂᤢᤏᤧ᤹ ᤕᤛᤤᤕᤠᤴ ᤀᤰᤂᤣ ᤔᤧᤳᤋᤢ. “ᤂᤧᤏᤧ᤹ ᤐᤣᤃᤧ᤹ᤀᤠᤱ ᤁᤧᤎᤰᤁᤥᤗᤠᤶ ᤁᤧᤛᤃᤡ ᤋᤣᤳᤋᤧᤴ ᤑᤧᤴᤍᤧ᤹. ᤜᤧᤰᤁᤩᤠᤱ ᤁᤧᤗᤠᤱᤅᤥᤗᤠᤶ ᤗᤠᤱᤛᤢ᤺ᤵᤐᤡᤴ ᤑᤧᤴᤍᤧ᤹॥” ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤒᤠ ᤁᤢᤀᤡᤛᤡᤰ ᤂᤢᤏᤧ᤹ ᤆᤥᤃᤢ. ᤂᤧᤒᤩᤠᤱ ᤗᤧᤰᤆᤠ᤹ᤒᤧᤎᤡ᤺ᤰ ᤐᤥ᤺ᤰᤂᤧᤀᤠᤱ ᤗᤠᤱᤛᤢ᤺ᤵ ᤔᤧᤴᤈᤠᤱᤅᤣ ᤗᤠᤱᤄᤣ᤺ᤰᤔᤠ ᤜᤣ᤺ᤰᤋᤧ॥

³ ᤕᤠᤱᤛᤡ ᤀᤛ᤻ᤍᤥᤍ ᤕᤧᤰᤕᤰᤁᤡᤴ ᤀᤛ᤻ᤛᤢᤖᤡᤜᤠ᤹ᤖᤧ ᤂᤢᤴᤇᤡ᤹ ᤜᤢᤰᤁᤥ ᤌᤩᤧᤀᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢ. “ᤀᤠᤱᤃᤠ᤹ ᤀᤠᤛᤧᤘᤠᤖᤥᤒᤠ ᤕᤛᤤᤕᤠᤴ ᤔᤡᤛᤪ ᤗᤠᤈᤣ᤹ ᤏᤢ ᤁᤢᤛ ᤗᤠᤈᤣ᤺ᤸᤗᤧ ᤗᤠᤃᤡ ᤔᤡᤰᤛᤣᤴ ᤜᤧᤰᤁᤩᤠᤱ ᤛᤠᤶᤍᤡᤱ ᤐᤥᤱᤗ ᤑᤠ᤹ᤀᤠᤱ ᤋᤱᤒᤣ᤹ ᤛᤢᤶᤛᤡ ᤌᤠᤖᤡᤰ ᤗᤧᤰᤆᤠ᤹ᤒᤧᤎᤡ᤺ᤰ ᤏᤢ ᤗᤠᤱᤛᤢ᤺ᤵ ᤔᤣ᤺ᤴᤏᤣ ᤗᤠᤱᤄᤣᤃᤧ॥

⁴ ᤜᤧᤰᤁᤣᤗ᤹ᤖᤡᤰᤁᤣ ᤀᤛ᤻ᤛᤢᤖ ᤗᤠᤈᤣ᤹ᤒᤠ ᤜᤠᤱᤅᤡᤸᤗᤧ ᤔᤡᤛᤪ ᤗᤠᤈᤣ᤹ᤒᤠ ᤔᤏᤠᤜᤠ᤹ ᤏᤠᤎᤠᤔᤠ ᤛᤠᤶᤎᤠᤔᤥ ᤔᤧᤎᤠᤖ ᤑᤠ᤹ᤀᤠᤱ ᤔᤡᤛᤪ ᤗᤠᤈᤣ᤹ᤀᤥᤒᤠ ᤐᤢᤱᤗᤠᤎᤠᤒᤠᤜᤠ᤹ ᤜᤧᤰᤁᤩᤠᤱ ᤁᤢᤛ ᤗᤠᤈᤣ᤹ᤗᤠᤶ ᤔᤧᤗ᤺ᤳᤋᤢ ᤔᤧᤍᤣᤛᤢᤛᤡᤒᤠ ᤏᤠᤗᤡᤃᤧᤴ ᤌᤠᤱᤒᤧᤴᤜᤠ᤹ ᤏᤢ ᤁᤠᤵᤐᤥ ᤋᤢᤶᤛᤠᤜᤠ᤹ ᤁᤧᤖᤧᤰ ᤂᤢᤴᤇᤡ᤹ ᤔᤡᤃᤰᤔᤠᤜᤠ᤹ ᤏᤡᤎᤠ᤺ᤵᤗ ᤗᤧᤰᤆᤠ᤹ᤒᤧᤎᤡ᤺ᤰ ᤏᤢ ᤗᤠᤱᤛᤢ᤺ᤵ ᤔᤣ᤺ᤴᤏᤣ ᤐᤢᤱᤗᤠᤎᤠᤒᤠ ᤆᤥᤃᤢᤱᤛᤡᤱᤅᤠᤱ ᤋᤣ᤹ᤖᤢᤛᤡ॥

⁵ ᤁᤢᤛ ᤗᤠᤈᤣ᤹ᤒᤠ ᤔᤏᤠᤜᤠ᤹ ᤏᤠᤃᤧᤛᤠ᤹ᤒᤠ ᤏᤢ ᤔᤡᤛᤪ ᤗᤠᤈᤣ᤹ᤀᤥ ᤕᤶᤒᤠ ᤁᤧᤗᤧᤱᤛᤡᤱᤒᤠᤜᤠ᤹ ᤁᤡᤔᤠ ᤕᤱᤔᤠᤀᤥ ᤔᤧᤎᤠ᤹᤺ ᤜᤧᤰᤁᤩᤠᤱ ᤔᤧᤏᤢ᤺ᤴ ᤔᤧᤛᤡ᤹᤺॥

⁶ ᤂᤧᤴ ᤕᤧᤴᤏᤥ ᤘᤖ᤺ᤱᤅᤡᤸᤗᤧ ᤁᤢᤕᤠᤀᤥ ᤁᤧᤕᤢᤱᤒᤠ ᤔᤏᤠᤜᤠ᤹ᤖᤧ ᤔᤧᤒᤠ᤺ᤳᤋᤢ᤹. ‘ᤀᤥᤔᤧᤳᤋᤧᤶᤔᤧ᤹. ᤀᤛ᤻ᤛᤢᤖᤒᤠ ᤜᤠᤱᤅᤡᤸᤗᤧ ᤁᤢᤜᤢᤰᤁᤥᤗᤠᤶ ᤛᤧ᤺ᤵᤛᤡᤱᤔᤠᤖᤧ ᤗᤠᤃᤡ ᤀᤠᤏᤡ᤹ ᤏᤠᤀᤠᤛᤠ᤹ᤖᤢᤶᤛᤡᤶᤒᤠ ᤏᤢ ᤀᤠᤶᤓᤠ᤹ᤖ ᤑᤠ᤹ᤀᤠᤱ ᤀᤠᤄᤧᤳᤋᤠᤛᤡᤀᤠᤱ ᤀᤠᤘᤕᤧᤒᤠ ᤔᤏᤠᤜᤠ᤹ᤀᤣ ᤀᤰᤋᤱᤒᤠ ᤔᤧᤒᤥ᤺ᤰᤂᤧᤀᤠᤱ ᤔᤧᤘᤠ᤹॥ ᤜᤧᤰᤁᤣ᤺ᤸᤗᤧ ᤀᤠᤏᤡ᤹ ᤀᤠᤰᤂᤣᤗ᤹ᤖᤡᤰ ᤂᤧᤳᤇᤡᤱᤔᤠ ᤏᤢ ᤛᤧ᤺ᤵᤛᤡᤱᤔᤠ ᤀᤠᤛᤢᤰᤋᤢᤶᤒᤠᤒᤣ᥅’”