ᤕᤛᤤᤕᤠ 2 - LIFOTNT

ᤕᤜᤘᤣ ᤍᤠᤱᤒᤧᤸᤗᤧ ᤏᤢ᤹ᤔᤠᤍᤠᤔᤠ ᤋᤠᤖᤢ᤹

¹ ᤀᤠᤔᤥᤈᤖᤧ ᤁᤢᤛ᤻ᤛᤠ ᤕᤛᤤᤕᤠ᤺ᤸᤗᤧ ᤕᤜᤢᤍᤠ ᤏᤢ ᤕᤖᤢᤛᤗᤧᤔ ᤕᤧᤰᤕᤰᤁᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤏᤡᤛᤢᤒᤠ ᤛᤢᤑᤥᤖᤧ ᤐᤠ᤺ᤴᤈᤠ᤺ᤰᤁᤡᤴ ᤜᤠᤒᤠ ᤁᤴᤗᤥ—

² ᤁᤧᤍᤠᤒᤠ ᤕᤧᤶᤔᤥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶ ᤕᤢᤱᤛᤡᤱᤒᤠ ᤕᤖᤢᤛᤗᤧᤔ ᤕᤧᤰᤕᤰᤁᤡᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤁᤥ ᤁᤧᤖᤧᤰᤏᤢ᤺ᤸᤗᤧ ᤁᤧᤕᤧᤰᤐᤠ ᤐᤥᤱᤗᤥ॥ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤁᤧᤖᤧᤰ ᤐᤡᤛᤠᤱᤒᤠ ᤁᤥ᤺ᤰᤔᤠ ᤑᤠᤱᤈᤱ ᤌᤧᤃᤢ ᤔᤠᤱᤘᤠᤜᤠ᤹ᤏᤢ᤺ᤸᤗᤧ ᤂᤧᤴ ᤛᤠ᤹ᤖᤡᤰ ᤁᤧᤕᤧᤰᤐᤠ ᤐᤥᤱᤗᤥ. ᤜᤧᤰᤁᤩᤠᤱ ᤁᤧᤖᤧᤰ ᤔᤧᤴᤇᤠᤶ ᤕᤠᤵᤔᤡᤜᤠ᤹ ᤂᤧ᤹ᤕᤥ ᤔᤠᤱᤛᤧᤘᤠ ᤆᤥ᤺ᤰᤛᤧ ᤔᤧᤈᤢᤶ ᤔᤧᤍᤠᤖᤥ॥

³ ᤕᤖᤡᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤂᤧ᤹ᤕᤥ ᤔᤧᤍᤠᤀᤠᤱ ᤔᤧᤒᤠ᤺ᤳᤋᤢᤖᤥ. “ᤋᤩᤧᤶᤔᤧ᤹ᤀᤥ. ᤀᤠᤏᤡ᤹ ᤁᤧᤖᤧᤰ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤃᤥ᤺ᤰᤔᤠᤀᤥ ᤌᤠ᤺ᤱ ᤗᤡᤅᤢᤶᤔᤠᤱ ᤕᤠᤁᤢᤒᤖᤧ ᤁᤢᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤜᤡᤶᤔᤥ ᤐᤣᤃᤡᤖᤥ॥ ᤂᤢᤏᤧ᤹ ᤀᤠᤒᤠᤅᤣ ᤁᤢᤗᤠᤶᤔᤡᤴ ᤀᤠᤏᤡ᤹ ᤀᤥᤛᤣ᤺ᤴ ᤀᤠᤎᤠᤰᤗᤥ. ᤜᤧᤰᤁᤣᤗ᤹ᤖᤡᤰ ᤁᤢᤗᤠᤶᤔᤥ ᤀᤠᤏᤡ᤹ ᤗᤠᤱᤄᤣ᤺ᤰᤔᤠ ᤀᤠᤛᤢᤰᤗᤥ॥” ᤌᤣᤀᤠᤱᤓᤧᤸᤗᤧ ᤛᤠᤶᤕᤥᤌᤡᤶᤔᤡᤴ ᤛᤡᤕᤥᤏᤗᤠᤶ ᤏᤢ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤒᤠ᤺ᤴᤈᤠ᤺ᤰᤁᤡᤱᤃ ᤕᤖᤢᤛᤗᤧᤔᤗᤠᤶ ᤋᤠᤖᤥ॥

⁴ ᤂᤢᤏᤧ᤹ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤂᤠᤛᤧᤴ ᤆᤥᤃᤢᤛᤡᤖᤥ. ᤜᤧᤰᤁᤩᤠᤱ ᤂᤢᤏᤧ᤹ ᤕᤖᤡᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤂᤢᤴᤇᤡ᤹ ᤂᤧᤔᤠ᤹ᤀᤡᤴ ᤋᤱᤄᤢ ᤐᤡᤖᤢᤛᤡᤖᤥ॥ ᤂᤧᤴ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤂᤢᤴᤇᤡ᤹ ᤋᤠᤓᤣᤜᤠ᤹ ᤔᤧᤕᤥ᤺ᤴᤍᤢᤖᤥ ᤜᤧᤰᤁᤩᤠᤱ ᤁᤧᤰᤆᤢ ᤌᤥ᤺ᤱᤔᤠ ᤆᤢᤃᤧᤱ ᤔᤧᤎᤃᤢᤖᤥ ᤂᤧᤶᤒᤩᤠᤱ ᤂᤢᤴᤇᤡ᤹ ᤕᤧᤴ-ᤗᤠ᤺ᤰᤜᤠ᤹ ᤔᤧᤓᤧ᤺ᤳᤇᤢᤖᤥ ᤜᤧᤰᤁᤩᤠᤱ ᤆᤠ ᤜᤧᤰᤔᤠ ᤁᤠᤳᤆᤩᤠ ᤔᤧᤎᤃᤢᤖᤥ॥ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤌᤱ ᤆᤥ᤺ᤰᤔᤠᤖᤧ ᤗᤠᤃᤡ ᤋᤠᤓᤣᤴ ᤔᤧᤶᤓᤡ᤺ᤰᤂᤢᤴᤗᤥ. ᤜᤧᤰᤁᤩᤠᤱ ᤀᤠᤸᤗᤀᤠᤱᤎᤥ ᤂᤧᤱᤜᤠ᤹ ᤕᤠᤶᤔᤥ ᤋᤧᤴᤎᤱ ᤆᤥ᤺ᤰᤔᤠ ᤑᤠ᤹ᤀᤠᤱ ᤔᤧᤴᤜᤢ᤹ᤛᤡᤱᤏᤧᤴᤗᤥ॥

⁵ ᤕᤠᤁᤢᤒᤖᤧ ᤁᤢᤔᤢ᤹ᤀᤡᤍᤠᤱᤛᤠᤛᤣ. ᤋᤩᤧᤶᤔᤧ᤹ᤀᤥ. ᤕᤜᤘᤣ ᤍᤠᤱᤒᤧᤸᤗᤧ ᤁᤢᤀᤥ᤺ᤳᤋᤡᤀᤥ ᤀᤠᤏᤡ᤹ ᤗᤠᤱᤄᤣᤃᤡᤖᤥ॥

ᤕᤶᤒᤠ ᤁᤧᤜᤧᤴᤇᤡᤱᤒᤠᤜᤠ᤹ ᤔᤧᤔᤧᤰ

⁶ ᤀᤠᤍᤠᤱᤒᤠᤖᤧ ᤀᤠᤒᤠᤅᤣ ᤁᤧᤕᤥᤓᤥᤒᤠ ᤁᤧᤔᤏᤠ ᤕᤠᤁᤢᤒᤖᤧ ᤁᤢᤔᤢ᤹ᤀᤡᤍᤠᤱᤛᤠᤜᤠ᤹ ᤗᤠᤵᤁᤧᤓᤢᤛᤢᤛᤡᤀᤠᤱ ᤁᤧᤘᤠ᤹ᤖᤥ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ ᤋᤀᤡᤏᤠᤱᤃᤧᤴ ᤐᤡᤛᤠᤱᤒᤠ ᤋᤠᤵᤑᤧ᤺ᤶᤒᤠ ᤛᤠᤰᤌᤡᤶᤔᤡᤸᤗᤧ ᤁᤢᤎᤡᤶ ᤔᤧᤒᤥ᤺ᤰᤂᤧᤀᤠᤱ ᤔᤧᤘᤠ᤹ᤖᤥ॥ ᤂᤧᤱᤜᤠ᤹ ᤐᤗᤡᤛ᤻ᤋᤡᤒᤠ ᤔᤏᤠᤜᤠ᤹ ᤁᤢᤀᤡᤛᤡᤰ ᤂᤠᤃᤧᤗᤥ᤺ᤶᤒᤠ ᤔᤧᤒᤥ᤺ᤰᤂᤧᤀᤠᤱ ᤔᤧᤘᤠ᤹ᤖᤥ ᤂᤧᤱᤜᤠ᤹ ᤏᤡᤱᤘᤠ᤹ᤑᤢᤔᤠᤱ ᤏᤛᤠᤴ ᤔᤧᤴᤈᤥ᤺ᤰᤔᤏᤠᤒᤠ ᤛᤢᤘᤠᤱᤜᤠ᤹ᤏᤢ ᤔᤧᤍᤱᤛᤡᤱᤅᤠᤱ ᤔᤧᤘᤠ᤹ᤖᤥ॥

⁷ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤠᤈᤣᤴ ᤛᤠᤶᤔᤩᤠᤱ ᤏᤢ ᤕᤢᤵᤐᤠ᤺ᤸᤗᤧ ᤛᤎᤧᤰ ᤋᤡᤶᤛᤧᤀᤠᤱ ᤏᤧᤖᤥ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤕᤠᤱᤛᤠ ᤁᤢᤴᤎᤣᤜᤠ᤹ᤖᤧᤱᤃ ᤂᤠᤏᤡ᤺ᤳᤋᤣ ᤜᤥᤵᤗᤥ॥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤠᤈᤣ᤺ᤱᤃ ᤀᤴᤜᤠ᤹ᤖᤧ ᤔᤧᤎᤡᤶᤛᤢᤀᤠᤱ ᤔᤧᤘᤠ᤹ᤖᤥ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤀᤴᤗᤠᤎᤠᤜᤠ᤹ᤃ ᤏᤡ᤺ᤵᤔᤠᤀᤣ ᤛᤢᤰᤔᤧᤍᤧᤳᤏᤧᤴᤗᤥ॥

⁸ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤠᤈᤣᤴ ᤏᤠᤘᤠᤀᤡᤳᤗᤠᤜᤠ᤹ᤖᤧ ᤋᤡᤶᤛᤧᤀᤠᤱ ᤏᤧᤖᤥ. ᤜᤧᤰᤁᤩᤠᤱ ᤀᤠᤒᤠᤅᤣ ᤜᤢᤰᤁᤡᤸᤗᤧ ᤔᤧᤈᤥᤃᤢᤛᤡᤒᤠ ᤆᤡᤃᤰᤘᤠᤜᤠ᤹ ᤂᤧᤱᤜᤠ᤹ᤖᤧ ᤛᤧᤘᤠ ᤔᤧᤔᤧᤳᤋᤢᤛᤡᤖᤥ॥ ᤂᤧᤴ ᤆᤡᤃᤰᤘᤠ᤺ᤸᤗᤧ ᤆᤀᤡ᤺ᤳᤋᤡᤴ ᤀᤠᤰᤋᤱᤒᤠ ᤆᤥᤰ ᤂᤧᤴ ᤀᤠᤒᤠᤅᤣ ᤂᤢᤴᤇᤡ᤹ ᤜᤢᤰᤁᤡᤸᤗᤧ ᤔᤧᤈᤥᤃᤢᤒᤠᤖᤥ॥

⁹ ᤂᤧᤸᤗᤧᤆᤥᤃᤢᤸᤗᤧ ᤔᤏᤠᤜᤠ᤹ ᤏ᤺ᤶᤏ᤺ᤶᤒᤠ ᤔᤧᤈᤥᤃᤢᤛᤡᤖᤥ ᤜᤧᤰᤁᤩᤠᤱ ᤕᤥᤕᤥᤰ ᤔᤧᤎᤠᤛᤢᤛᤡᤖᤥ ᤂᤧᤱᤜᤠ᤹ ᤗᤧᤵᤔᤡ ᤔᤧᤶᤒᤡᤛᤧ᤹ᤀᤥ॥

¹⁰ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤃᤡᤵᤔᤠᤄᤢᤔᤠᤴ ᤏᤢ ᤔᤡᤔᤡᤍᤡᤱᤃᤧᤴ ᤁᤢᤀᤥ᤺ᤵᤔᤠᤴ ᤋᤠᤔᤠᤏᤢ᤺ᤸᤗᤧ ᤋᤃᤡ ᤕᤠᤰᤐᤣ᤹ᤀᤥᤒᤠ ᤗᤢᤱᤑᤢᤰᤁᤥᤀᤥ ᤗᤠᤛᤠᤶᤔᤧ᤹ᤀᤥ ᤂᤧᤒᤩᤠᤱ ᤂᤠᤶ ᤛᤡᤃᤠᤱ ᤆᤡᤱᤅᤠᤛᤡᤶᤔᤧ᤹ᤀᤥ᥄

¹¹ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤀᤠᤱᤍᤡᤱ ᤗ᤹ᤔᤠ ᤏᤠᤖᤠᤴ ᤕᤥ ᤔᤢᤵᤔᤧᤎᤠᤛᤢ ᤔᤧᤒᤡᤖᤢᤛᤡᤖᤥ. ᤜᤧᤰᤁᤩᤠᤱ ᤂᤢᤴᤇᤡ᤹ ᤀᤠᤱᤃᤠ᤹ᤀᤣ᤺ᤰ ᤗ᤹ᤔᤧᤴ ᤏ᤺ᤶᤏ᤺ᤶᤒᤠ ᤔᤧᤈᤥᤃᤢ ᤔᤧᤒᤡᤖᤢᤛᤡᤖᤥ. ᤂᤧᤴ ᤕᤧᤴᤏᤥ ᤕᤜᤘᤣ ᤍᤠᤱᤒᤠᤸᤗᤰ ᤌᤠ᤺ᤱᤎᤠ᤺ᤱ ᤐᤥᤱᤗᤥ॥

¹² ᤌᤣᤀᤠᤱᤓᤧᤸᤗᤧ ᤁᤧᤖᤧᤰ ᤕᤶᤒᤠ ᤁᤧᤗᤧᤱᤛᤡᤱᤒᤠᤜᤠ᤹ ᤏᤢ ᤛᤡᤰᤁᤧᤃᤢᤒᤠᤜᤠ᤹ ᤜᤧᤰᤁᤩᤠᤱ ᤁᤧᤖᤧᤰ “ᤀᤠᤱᤃᤠ᤹ᤀᤣ᤺ᤰ” ᤁᤧᤗ᤹ᤒᤠᤜᤠ᤹ ᤛᤶᤎᤠᤱ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤋᤱᤒᤠ ᤁᤢᤕᤧᤴᤎᤡᤰ ᤀᤡᤍᤠᤖᤥ ᤂᤧᤒᤩᤠᤱ ᤂᤧᤱᤜᤠ᤹ ᤆᤢᤱᤈᤡᤃᤧᤴ ᤏ᤺ᤶᤏ᤺ᤶᤒᤠ ᤔᤧᤈᤥᤃᤢᤛᤡᤖᤥ.

¹³ ᤂᤢᤏᤧ᤹ ᤗᤣᤒᤏᤠᤏ ᤗᤠᤈᤣ᤹ᤀᤥᤒᤠ ᤁᤧᤖᤧᤰ ᤁᤣ᤺ᤶᤒ ᤁᤣ᤺ᤶᤒᤠ ᤛᤠᤶᤔᤠᤱᤛᤡᤱᤜᤠ᤹. ᤒᤛᤠᤏᤒᤠ ᤁᤧᤖᤧᤰ ᤕᤜᤡᤒᤠ ᤛᤡᤱᤒᤢᤱᤜᤠ᤹ ᤔᤢᤖᤧᤰ ᤂᤠᤖᤧ᤺ᤰ ᤆᤥᤃᤢᤖᤥ॥

¹⁴ ᤁᤧᤖᤧᤰ ᤁᤣ᤺ᤶᤒ ᤁᤣ᤺ᤶᤒᤠ ᤁᤥ᤺ᤰᤔᤠ ᤑᤠᤱᤈᤱᤜᤠ᤹ ᤏᤢ ᤁᤧᤖᤧᤰ ᤌᤧᤃᤢ ᤔᤠᤱᤘᤠᤜᤠ᤹ ᤏᤧᤏᤧᤒᤠ ᤆᤥᤃᤢᤖᤥ॥

¹⁵ ᤂᤢᤏᤧ᤹ ᤁᤧᤖᤧᤰ ᤁᤣ᤺ᤶᤒ ᤁᤣ᤺ᤶᤒᤠ ᤆᤱᤜᤡᤶᤜᤠ᤹. ᤜᤧᤰᤁᤩᤠᤱ ᤁᤠᤰ ᤆᤠᤱᤈᤠᤱᤒᤠ ᤛᤧ᤺ᤵᤛᤡᤱᤔᤠᤍᤧᤴ ᤗᤢᤱᤎᤠᤰᤜᤠ᤹ ᤌᤢᤵᤛᤢᤖᤥ॥

¹⁶ ᤋᤷᤛᤡᤛ ᤘᤠᤃᤵᤂᤣ᤺ᤱᤅᤥᤒᤠ ᤁᤧᤖᤧᤰ ᤕᤶᤒᤠ ᤆᤡᤃᤰᤘᤠ ᤁᤧᤃᤢᤒᤠ ᤘᤠᤗᤠᤎᤠᤜᤠ᤹ ᤏᤢ ᤏᤢᤒᤠ ᤘᤠᤗᤠᤎᤠᤜᤠ᤹ ᤘᤖ᤺ᤱᤅᤥ ᤜᤢᤶᤛᤢ ᤁᤣ᤺ᤳᤋᤢᤛᤡᤖᤥ॥

¹⁷ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤀᤠᤱᤍᤡᤱ ᤗ᤹ᤔᤧᤴ ᤕᤥ ᤔᤰᤔᤧᤎᤠᤛᤢ ᤔᤧᤒᤡᤖᤢᤛᤡᤖᤥ. ᤜᤧᤰᤁᤩᤠᤱ ᤂᤢᤴᤇᤡ᤹ ᤀᤠᤱᤃᤠ᤹ᤀᤣ᤺ᤰ ᤗ᤹ᤔᤧᤴ ᤏ᤺ᤶᤏ᤺ᤶᤒᤠ ᤔᤧᤈᤥᤃᤢ ᤔᤧᤒᤡᤖᤢᤛᤡᤖᤥ. ᤂᤧᤴ ᤕᤧᤴᤏᤥ ᤕᤜᤘᤣ ᤍᤠᤱᤒᤠᤸᤗᤰ ᤌᤠ᤺ᤱᤎᤠ᤺ᤱ ᤐᤥᤱᤗᤥ.

¹⁸ ᤜᤧᤰᤁᤩᤠᤱ ᤏᤠᤘᤠᤀᤡᤳᤗᤠᤜᤠ᤹ᤃ ᤌᤡᤰᤁᤠᤱ ᤔᤣ᤺ᤴᤏᤣ ᤔᤧᤔᤠ ᤔᤧᤄᤧᤳᤗᤥ॥

¹⁹ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤁᤡᤵᤔᤠ ᤁᤧᤄᤢᤒᤠ ᤆᤥ᤺ᤰᤔᤠᤖᤧ ᤗᤠᤃᤡ ᤕᤜᤘᤣ ᤍᤠᤱᤒᤠᤴ ᤐᤥ᤺ᤰᤁᤡᤸᤗᤧ ᤂᤢᤏᤧ᤹ ᤁᤢᤃᤡᤵᤔᤠᤄᤢᤔᤥ ᤏᤢ ᤔᤡᤔᤡᤍᤡᤱᤃᤧᤴ ᤁᤢᤀᤥ᤺ᤵᤔᤠᤸᤗᤧ ᤆᤥᤃᤢᤸᤗᤧ ᤔᤏᤠᤜᤠ᤹ ᤔᤧᤄᤧᤳᤇᤡᤱᤗᤥ ᤜᤧᤰᤁᤩᤠᤱ ᤛᤡᤕᤠᤰᤐᤣ-ᤌᤧᤕᤠᤰᤐᤧᤀᤥ ᤁᤧᤏᤧᤒᤠ ᤗᤢᤱᤑᤢᤰᤁᤥᤜᤠ᤹ᤀᤥ ᤏᤢ ᤂᤠᤶᤒᤠᤱᤅᤥ ᤁᤧᤏᤧᤒᤠ ᤜᤱᤃᤠᤖᤡᤱᤒᤠ ᤛᤡᤃᤠᤱ ᤔᤧᤗᤠ᤺ᤳᤗᤥ॥

²⁰ ᤔᤏᤠᤜᤠ᤹ᤖᤧ ᤀᤠᤒᤠᤅᤣ ᤗᤠᤃᤡ ᤛᤧᤘᤠ ᤔᤧᤵᤔᤠᤛᤡ ᤑᤠ᤹ᤀᤠᤱ ᤔᤧᤈᤥᤃᤢᤛᤡ ᤔᤧᤎᤃᤢᤛᤡᤒᤠ ᤛᤠᤶᤔᤩᤠᤱ ᤕᤢᤵᤐᤠ ᤏᤠᤘᤠᤀᤡᤳᤗᤠᤜᤠ᤹ ᤔᤧᤏᤠ᤹ᤖᤢᤛᤡᤖᤥ. ᤜᤧᤰᤁᤩᤠᤱ ᤂᤧᤴ ᤕᤧᤴ ᤀᤈᤡᤰᤕᤢᤔᤠ ᤏᤢ ᤏᤧᤰᤘᤠ ᤔᤧᤘᤠᤖᤠᤵ ᤋᤃᤡ ᤗᤠᤵᤔᤧᤓᤢᤛᤢᤛᤡᤖᤥ॥

²¹ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤁᤡᤵᤔᤠ ᤁᤧᤄᤢᤒᤠ ᤆᤥ᤺ᤰᤔᤠᤖᤧ ᤗᤠᤃᤡ ᤕᤜᤘᤣ ᤍᤠᤱᤒᤠᤴ ᤐᤥ᤺ᤰᤁᤡᤸᤗᤧ ᤂᤢᤏᤧ᤹ ᤁᤢᤃᤡᤵᤔᤠᤄᤢᤔᤧᤴ ᤏᤢ ᤁᤢᤔᤡᤔᤡᤍᤡᤱ ᤁᤢᤀᤥ᤺ᤵᤔᤠᤸᤗᤧ ᤆᤥᤃᤢᤸᤗᤧ ᤂᤧᤱᤜᤠ᤹ ᤔᤧᤄᤧᤳᤇᤡᤱᤗᤥ ᤜᤧᤰᤁᤩᤠᤱ ᤛᤡᤕᤠᤰᤐᤣ᤹ ᤌᤧᤕᤠᤰᤐᤣ᤹ᤜᤠ᤹ᤖᤧ ᤁᤢᤜᤱᤜᤠ᤹ᤀᤥ ᤏᤢ ᤕᤠᤰᤐᤣ᤹ᤜᤠ᤹ᤖᤧ ᤁᤢᤓᤡ᤺ᤵᤔᤠᤜᤠ᤹ᤀᤥ ᤔᤧᤒᤣ᤺ᤰᤁᤠᤱ ᤔᤧᤈᤡᤱᤛᤡᤱᤗᤥ॥

²² ᤁᤢᤛᤰᤔᤠ ᤁᤧᤕᤠᤰᤐᤠ ᤔᤧᤴᤇᤠᤶ ᤕᤠᤵᤔᤡᤀᤥ ᤏᤡᤱᤘᤠ᤹ ᤔᤧᤕᤢᤰᤂᤠᤶᤔᤡᤴᤏᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤂᤧᤸᤗᤧ ᤁᤢᤔᤧᤸᤗᤢᤱ ᤌᤣ ᤘᤠ᤹ᤀᤠᤱᤒᤣ᥅