ᤕᤛᤤᤕᤠ 19 - LIFOTNTᤔᤡᤛᤪ ᤗᤠᤈᤣ᤹ᤒᤠ ᤔᤏᤠᤜᤠ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤢᤶᤍᤡᤱ ᤐᤡᤖᤢᤛᤡ 1 ᤔᤡᤛᤪ ᤗᤠᤈᤣ᤺ᤸᤗᤧ ᤁᤢᤕᤠ᤺ᤶᤒᤣᤀᤥ ᤁᤧᤍᤠᤒᤠ ᤔᤠᤱᤏᤡᤱᤘᤠ᤹ᤐᤠᤴᤏᤡᤴ ᤀᤰᤋᤱᤒᤠ ᤘᤠ᤹ᤖᤥ— ᤀᤥᤔᤧᤳᤋᤧᤶᤔᤧ᤹. ᤕᤜᤘᤣ ᤍᤠᤱᤒᤧᤴ ᤂᤠ᤹ᤔᤡ᤺ᤳᤋᤡᤴ ᤕᤢᤰᤋᤢᤀᤠᤱ ᤔᤡᤛᤪ ᤗᤠᤈᤣ᤹ᤀᤥ ᤕᤢᤖ ᤐᤳᤗᤥ॥ ᤂᤢᤏᤧ᤹ ᤕᤢ᤺ᤸᤗᤧ ᤔᤡᤛᤪ ᤗᤠᤈᤣ᤹ᤒᤠ ᤏᤠᤘᤠᤀᤡᤳᤗᤠᤜᤠ᤹ ᤔᤧᤃᤡᤀᤠᤱ ᤌᤧᤃᤰᤁᤰᤏᤠ ᤔᤧᤕᤱᤗᤥ. ᤜᤧᤰᤁᤩᤠᤱ ᤔᤡᤛᤪ ᤁᤧᤕᤢᤱᤒᤠ ᤔᤏᤠᤜᤠ᤹ ᤂᤢᤴᤇᤡ᤹ ᤁᤡᤔᤧᤸᤗᤧ ᤕᤢᤶᤛᤢᤱᤔᤠ ᤔᤧᤒᤥᤱᤅᤠᤱ ᤛᤠᤶᤔᤡᤰᤗᤧ ᤗᤧᤖᤢᤛᤡᤖᤥ॥ 2 “ᤀᤠᤱᤃᤠ᤹ ᤔᤡᤛᤪᤒᤠ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤋᤰᤗᤧᤱᤘᤠᤀᤥ ᤔᤡᤛᤪᤒᤠ ᤔᤏᤠᤜᤠ᤹ᤀᤣ ᤜᤢᤛᤢᤱᤛᤡᤱ ᤐᤰᤛᤢᤱᤛᤡᤱᤗᤥ॥ ᤑᤢ᤹ᤏᤢᤛᤠ᤹ᤜᤠ᤹ ᤂᤢᤴᤇᤡ᤹ ᤀᤠᤒᤠᤅᤣ ᤑᤢ᤹ᤏᤢᤛᤠ᤹ᤜᤠ᤹ᤏᤢᤀᤣ ᤔᤧᤄᤣ ᤔᤧᤎᤰᤗᤥ. ᤜᤡᤶᤒᤣᤛᤠᤱᤒᤠᤜᤠ᤹ ᤀᤠᤒᤠᤅᤣ ᤂᤢᤴᤇᤡ᤹ ᤜᤡᤶᤒᤣᤛᤠᤒᤠᤜᤠ᤹ᤏᤢᤀᤣ ᤔᤧᤍᤴᤇᤡᤱᤗᤥ. ᤕᤧᤰᤕᤰᤁᤥ ᤁᤧᤕᤢᤱᤒᤠᤜᤠ᤹ ᤀᤠᤒᤠᤅᤣ ᤂᤢᤴᤇᤡ᤹ ᤕᤧᤰᤕᤰᤁᤥ ᤁᤧᤕᤢᤱᤒᤠᤜᤠ᤹ᤏᤢ ᤔᤧᤄᤣ ᤔᤧᤈᤢᤱᤗᤥ. ᤜᤧᤰᤁᤩᤠᤱ ᤜᤠᤱᤈᤢᤶᤜᤠ᤹ ᤜᤠᤱᤈᤢᤶᤜᤠ᤹ᤏᤢᤀᤣ ᤔᤧᤎᤰᤗᤥ॥ 3 ᤔᤡᤛᤪᤒᤠ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤛᤠᤘᤣ᤺ᤳ ᤕᤱᤗᤥ. ᤀᤠᤱᤃᤠ᤹ ᤔᤡᤛᤪ ᤁᤧᤕᤢᤱᤒᤠ ᤔᤏᤠᤜᤠ᤹ᤖᤧ ᤆᤥ᤺ᤰᤔᤠ ᤐᤠ᤺ᤵᤔᤠ ᤔᤧᤃᤥ᤺ᤳᤋᤢᤒᤠ ᤐᤠ᤺ᤴᤜᤠ᤹ ᤑᤥ᤺ᤳᤋᤢᤱ ᤐᤡᤖᤢᤱᤛᤡᤱᤗᤥ॥ ᤂᤧᤱᤜᤠ᤹ᤖᤧ ᤔᤠᤱᤛᤠᤶᤔᤠᤱᤜᤠ᤹. ᤛᤡᤛᤠᤶᤜᤠ᤹. ᤁᤡᤳᤆᤠᤰ ᤁᤧᤈᤥ᤺ᤰᤐᤠᤜᤠ᤹ ᤏᤢ ᤑᤧᤍᤠᤱᤔᤠᤜᤠ᤹ ᤔᤧᤒᤣ᤺ᤰᤁᤠᤱ ᤛᤣ᤺ᤴᤔᤧᤗᤠᤵᤋᤢᤛᤡᤖᤥ॥ 4 ᤜᤧᤰᤁᤩᤠᤱ ᤀᤠᤱᤃᤠ᤹ ᤔᤡᤛᤪᤒᤠ ᤔᤏᤠᤜᤠ᤹ ᤛᤠ᤹ᤖᤡᤰ ᤋᤠᤵᤑᤧ᤺ᤸᤗᤡᤰ ᤀᤠᤔᤧᤵᤔᤧᤵᤐᤠ ᤗᤳᤇᤠ ᤍᤠᤱᤒᤠᤎᤡᤰᤗᤧ ᤁᤢᤜᤢᤰᤁᤥ ᤐᤠᤱᤄᤢᤱᤛᤡᤱᤗᤥ. ᤜᤧᤰᤁᤩᤠᤱ ᤋᤸᤗᤡᤰ ᤁᤧᤈᤡ᤺ᤵᤐᤠ ᤜᤠᤱᤎᤡᤰᤗᤧ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤛᤶᤍᤠᤱ ᤜᤠᤱᤕᤢᤰ ᤆᤥᤃᤢᤖᤥ.” ᤁᤴ ᤐᤠ᤺ᤴᤏᤡᤴ ᤀᤠᤱᤃᤠ᤹ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤱᤅᤠᤱ ᤘᤠ᤹ᤖᤥ॥ ᤏᤡᤗ ᤘᤜ᤺ᤱᤅᤥ ᤋᤢᤰᤂᤣ 5 ᤏᤡᤗ ᤘᤜ᤺ᤱᤅᤥᤒᤠ ᤆᤫᤠ᤺ᤳᤋᤡᤴ ᤜᤣᤖ ᤐᤣ᤺ᤰᤗᤥ. ᤜᤧᤰᤁᤩᤠᤱ ᤘᤜ᤺ᤱᤅᤡᤴ ᤀᤅᤣ᤺ᤰᤁᤠᤱ ᤆᤵᤐᤪᤧᤰ ᤆᤵᤋᤢᤖᤥ॥ 6 ᤜᤧᤰᤁᤣᤗ᤹ᤖᤡᤰ ᤆᤫᤠ᤺ᤳᤋᤡᤴ ᤌᤡᤰᤕᤠ᤺ᤴᤎᤰ ᤆᤵᤗ ᤐᤣ᤺ᤰᤁᤡᤸᤗᤧ ᤘᤠᤗᤠᤶᤜᤠ᤹ ᤏᤠᤶᤛᤢᤖᤥ॥ ᤔᤡᤛᤪ ᤗᤠᤈᤣ᤹ᤀᤥᤒᤠ ᤕᤱᤄᤱ ᤘᤜ᤺ᤱᤜᤠ᤹ ᤕᤢᤶᤔᤠᤱ ᤜᤣᤒᤣ᤺ᤰᤗᤥ. ᤜᤧᤰᤁᤩᤠᤱ ᤛᤡᤍᤠᤰᤐᤠᤜᤠ᤹ ᤏᤢ ᤛᤠᤖᤠᤜᤠ᤹ ᤀᤡᤖᤧᤶᤔᤠᤱ ᤜᤣᤛᤡᤖᤥ॥ 7 ᤂᤧᤴᤏᤢ ᤛᤥᤛᤥᤖᤡᤰ ᤏᤡᤗ ᤘᤜ᤺ᤱᤅᤡᤸᤗᤧ ᤁᤢᤕᤠᤀᤥ ᤁᤧᤕᤢᤱᤒᤠ ᤁᤧᤖᤧᤰ ᤗᤣ᤺ᤳᤋᤠᤱᤒᤠ ᤕᤠ᤺ᤴᤛᤢᤱᤜᤠ᤹ ᤏᤢ ᤀᤡᤰᤋᤠᤵᤜᤠ᤹ ᤜᤣᤛᤡᤖᤥ॥ ᤂᤧᤒᤩᤠᤱ ᤂᤧᤴ ᤛᤢᤖᤡᤳᤋᤧᤸᤗᤧ ᤐᤰᤂᤢ ᤋᤣ᤹ᤖᤢᤀᤠᤱ ᤂᤧ᤹ᤕᤥ ᤌᤣᤎᤡᤰᤁᤠᤱ ᤔᤧᤏᤧᤏᤧᤴᤗᤥ॥ 8 ᤅᤠ ᤁᤧᤛᤧᤵᤐᤠᤜᤠ᤹ ᤔᤧᤜᤠ᤺ᤵᤗᤥ. ᤂᤣ᤺ᤱ ᤁᤧᤍᤣᤒᤠᤜᤠ᤹ ᤔᤧᤖᤡᤱ ᤔᤧᤎᤰᤗᤥ ᤜᤧᤰᤁᤩᤠᤱ ᤏᤡᤗ ᤘᤜ᤺ᤱᤅᤥᤒᤠ ᤆᤫᤠ᤺ᤳᤋᤥ ᤕᤥ᤺ᤱ ᤁᤧᤗᤧᤵᤐᤠᤜᤠ᤹ ᤂᤢᤴᤇᤡ᤹ ᤏᤡᤱᤛᤠᤱ ᤐᤢᤰᤗᤥ॥ 9 ᤂᤡ ᤁᤧᤗ᤺ᤶᤒᤠᤜᤠ᤹ ᤏᤡᤱᤛᤠᤶᤔᤥ ᤔᤧᤎᤠᤖᤥ. ᤜᤧᤰᤁᤩᤠᤱ ᤏᤠᤀᤡᤏᤠᤛᤢ᤺ᤳ ᤁᤧᤎᤠᤰᤐᤠᤜᤠ᤹ ᤂᤢᤴᤇᤡ᤹ ᤛᤠ᤹ᤀᤡ ᤕᤱᤗᤥ॥ 10 ᤆᤡᤖᤡᤰᤗᤧ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤜᤠ᤹ ᤂᤢᤴᤇᤡ᤹ ᤛᤡᤰᤑᤧᤰᤗᤥ. ᤜᤧᤰᤁᤩᤠᤱ ᤏᤡᤶᤕᤠᤰᤁᤥ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤁᤧᤖᤧᤰᤗᤧ ᤂᤢᤴᤇᤡ᤹ ᤗᤧᤶᤍ᤹ᤖᤢᤖᤥ॥ 11 ᤛᤥᤀᤏᤒᤠ ᤕᤢᤰᤛᤠᤒᤠᤜᤠ᤹ ᤆᤠ᤹ᤖᤡᤰ ᤀᤍᤱ ᤔᤧᤈᤥᤰᤗᤥ᥄ ᤔᤡᤛᤪ ᤗᤠᤈᤣ᤹ᤒᤠ ᤑᤠᤖᤥ ᤜᤠᤱᤅᤡᤸᤗᤧ ᤛᤡᤰᤁᤢᤶᤛᤠᤒᤠ ᤁᤢᤛᤢᤈᤠᤍᤠᤱᤒᤠᤜᤠ᤹ᤖᤧ ᤁᤢᤛᤢᤶ ᤔᤧᤴᤍᤶᤔᤏᤠᤒᤠ ᤐᤠᤴ ᤔᤧᤒᤠ᤺ᤳᤋᤢᤖᤥ॥ ᤂᤡᤏᤡ᤹ ᤀᤠᤰᤂᤣᤗ᤹ᤖᤡᤰ ᤑᤠᤖᤥ ᤜᤠᤱᤅᤡᤴ ᤀᤰᤂᤣ ᤁᤧᤔᤧᤳᤋᤢᤶᤒᤣ. “ᤌᤣ ᤛᤡᤰᤁᤢᤶᤛᤠᤒᤠᤜᤠ᤹ᤀᤥ ᤀᤠᤱᤃᤠ᤹ᤀᤠᤱ ᤗᤳᤇᤠᤀᤠ ᤔᤣ᤺ᤶᤒᤡ᥅ ᤜᤧᤰᤁᤩᤠᤱ ᤀᤢᤴᤇᤥᤴ ᤀᤢᤏᤠᤜᤢᤖᤡᤒᤠ ᤜᤠᤱᤜᤠ᤹ᤖᤧ ᤂᤢᤴᤇᤡ᤹ ᤜᤢ᤹ᤛᤠᤶᤒᤠᤀᤠ ᤔᤣ᤺ᤶᤒᤡ᥅” 12 ᤔᤡᤛᤪᤒᤠ ᤑᤠᤖᤥ ᤜᤠᤱᤅᤣ᥄ ᤛᤡᤰᤁᤢᤶᤛᤠᤒᤠ ᤁᤧᤛᤢᤈᤠᤍᤠᤱᤒᤠᤜᤠ᤹ ᤀᤠᤳᤋᤡ ᤔᤧᤒᤣᤒᤣ᥅ ᤔᤡᤛᤪ ᤗᤠᤈᤣ᤹ᤒᤠ ᤔᤏᤠᤜᤠ᤹ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤌᤣ ᤔᤧᤵᤔᤠᤛᤡ ᤁᤢᤏᤡᤱᤘᤠ᤹ ᤘᤠ᤹ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤂᤧᤱᤜᤠ᤹ᤖᤧ ᤂᤧᤏᤧ᤹ ᤁᤧᤶᤔᤧᤳᤗ ᤜᤧᤰᤁᤩᤠᤱ ᤁᤧᤶᤈᤧᤰᤗᤖᤥ॥ 13 ᤛᤥᤀᤏ ᤕᤧᤰᤕᤰᤁᤥᤒᤠ ᤕᤢᤰᤛᤠᤒᤠᤜᤠ᤹ ᤀᤍᤱ ᤔᤧᤒᤥ᤺ᤰᤂᤧᤀᤠᤱ ᤔᤧᤘᤠ᤹ᤖᤥ॥ ᤜᤧᤰᤁᤩᤠᤱ ᤔᤣᤶᤑᤡᤛᤒᤠ ᤕᤧᤰᤕᤰᤁᤥᤒᤠ ᤛᤢᤜᤠᤱᤕᤢᤰᤐᤠᤜᤠ᤹ ᤀᤡᤱᤗᤧᤰᤁᤥ ᤔᤧᤎᤩᤧᤀᤠᤱ ᤔᤧᤘᤠ᤹ᤖᤥ॥ ᤂᤧᤴ ᤁᤧᤖᤧᤰ ᤔᤏᤠᤜᤠ᤹ ᤜᤠᤱᤈᤢᤶᤔᤥᤒᤠ ᤗᤠᤶᤗᤥᤒᤠᤛᤡᤖᤥ. ᤁᤖ ᤂᤧᤱᤜᤠ᤹ᤖᤧ ᤔᤡᤛᤪ ᤗᤠᤈᤣ᤹ᤀᤥᤒᤠ ᤂᤢᤴᤇᤡ᤹ ᤔᤏᤠᤜᤠ᤹ ᤋᤠᤵᤑᤧ᤺ᤶᤒᤠ ᤛᤢᤈᤠ ᤔᤧᤒᤡᤖᤢᤛᤡᤀᤠᤱ ᤘᤠ᤹ᤖᤥ॥ 14 ᤕᤜᤘᤣ ᤍᤠᤱᤒᤧᤸᤗᤧ ᤂᤧᤱᤜᤠ᤹ ᤂᤢᤴᤇᤡ᤹ ᤏᤡᤱᤘᤠ᤹ ᤁᤧᤀᤡᤒᤠ ᤆᤥᤃᤢᤛᤡᤀᤠᤱ ᤔᤧᤘᤠ᤹ᤖᤥ. ᤂᤧᤸᤗᤧᤆᤥᤃᤢᤸᤗᤧ ᤔᤡᤛᤪᤒᤠ ᤔᤏᤠᤜᤠ᤹ᤖᤧ ᤁᤧᤖᤧᤰ ᤕᤠ᤺ᤶᤒᤰᤜᤠ᤹ ᤑᤧᤳᤔᤧᤗᤠ᤺ᤴᤍᤢᤀᤠᤱ ᤔᤧᤘᤠ᤹ᤖᤥ॥ ᤜᤧᤰᤁᤩᤠᤱ ᤌᤡ᤺ᤸᤗᤧ ᤁᤧᤔᤒᤠ ᤔᤏᤠᤴ ᤀᤠᤵᤑᤣᤰ ᤁᤢᤒᤧ᤹ᤔᤠ᤺ᤳᤋᤥ ᤛ᤹ᤛᤡᤱᤒᤠ ᤁᤢᤀᤡᤛᤡᤰ ᤔᤡᤛᤪ ᤗᤠᤈᤣᤴ ᤌᤥ ᤏᤠ ᤕᤥᤒᤠ ᤔᤧᤈᤥᤃᤢᤀᤠᤱ ᤘᤠ᤹ᤖᤥ. 15 ᤔᤡᤛᤪ ᤗᤠᤈᤣ᤺ᤸᤗᤧ ᤌᤣᤀᤠᤱ ᤆᤥ᤺ᤰᤔᤠ ᤔᤧᤛᤢᤰᤋᤢᤴᤗᤥ॥ ᤁᤢᤎᤧᤃᤣᤰ ᤏᤢ ᤁᤢᤔᤡᤴ ᤜᤧᤰᤁᤩᤠᤱ ᤂᤧᤒᤰᤛᤡᤱ ᤐᤥᤖᤠ᤺ᤰᤜᤠ᤹ ᤏᤢ ᤛᤡᤍᤠᤰᤐᤠᤜᤠ᤹ ᤁᤧᤖᤧᤰ ᤁᤢᤓᤠ᤹ ᤐᤡᤔᤠ ᤔᤧᤴᤇᤢᤰᤔᤏᤠᤒᤠ ᤔᤧᤒᤥ᤺ᤰᤂᤧᤀᤠᤱ ᤘᤠ᤹ᤖᤥ॥ ᤔᤡᤛᤪᤒᤠ ᤔᤏᤠᤜᤠ᤹ᤖᤧ ᤕᤜᤘᤣ ᤍᤠᤱᤒᤠᤴ ᤛᤧᤘᤠ ᤔᤧᤔᤧᤳᤋᤢ᤹ 16 ᤂᤧᤴ ᤕᤧᤶᤔᤡᤴ ᤋᤠ᤺ᤸᤗᤧ ᤔᤡᤛᤪᤒᤠ ᤔᤏᤠᤜᤠ᤹ ᤋᤠᤱᤛᤧ᤺ᤵᤔᤠ ᤔᤧᤴᤇᤢᤰᤛᤡᤱᤔᤏᤠᤔᤠ ᤔᤧᤴᤇᤢᤔᤠ ᤜᤧᤰᤋᤱᤔᤠ ᤔᤧᤒᤥᤱ॥ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤂᤧᤱᤜᤠ᤹ ᤂᤢᤶᤍᤡᤱ ᤐᤡᤔᤠᤛᤡᤖᤧ ᤗᤠᤃᤡ ᤁᤢᤜᤢᤰᤁᤡᤴ ᤛᤴᤇᤢᤀᤠᤱ ᤐᤳ. ᤂᤧᤱᤜᤠ᤹ᤖᤧ ᤂᤧᤴ ᤔᤧᤏᤡᤛᤢᤀᤠᤱ ᤁᤡᤔᤧᤸᤗᤧ ᤆᤡᤖᤡᤶᤗᤡᤶᤏᤠ ᤔᤧᤕᤱ॥ 17 ᤜᤧᤰᤁᤩᤠᤱ ᤕᤜᤢᤍᤠ ᤗᤠᤈᤣ᤹ᤒᤠ ᤔᤏᤠᤜᤠ᤹ᤖᤧ ᤔᤡᤛᤪᤀᤥ ᤁᤡᤔᤠ ᤕᤱᤔᤠ ᤐᤠ᤺ᤴᤜᤠ᤹ ᤔᤧᤍᤠᤖᤢ᤹॥ ᤕᤜᤢᤍᤠ ᤗᤠᤈᤣ᤺ᤸᤗᤧ ᤁᤢᤔᤡᤱ ᤁᤧᤄᤧᤶᤒᤠ ᤁᤧᤖᤧᤰ ᤔᤏᤠᤜᤠ᤹ ᤐᤃᤡ ᤔᤧᤃᤡᤖᤥ. ᤌᤣᤀᤠᤱᤓᤧᤸᤗᤧ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤂᤧᤱᤜᤠ᤹ ᤂᤢᤶᤍᤡᤱ ᤐᤡᤔᤠᤛᤡ ᤏᤡᤱᤛᤣ᤺ᤰ ᤆᤥᤃᤢᤖ ᤘᤠ᤹॥ 18 ᤂᤧᤴ ᤕᤧᤶᤔᤡᤴ ᤋᤠ᤺ᤸᤗᤧ ᤔᤡᤛᤪ ᤗᤠᤈᤣ᤹ᤀᤥ ᤁᤧᤏᤧᤒᤠ ᤅᤠᤛᤡ ᤕᤧᤰᤕᤰᤁᤥᤒᤠ ᤔᤏᤠᤜᤠ᤹ ᤜᤡᤒᤪᤢ ᤐᤠ᤺ᤴᤍᤠᤱ ᤔᤧᤒᤠ᤺ᤳ. ᤜᤧᤰᤁᤩᤠᤱ ᤂᤧ᤹ᤕᤥᤒᤠ ᤔᤏᤠᤜᤠ᤹ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤠᤴ ᤛᤧᤘᤠ ᤔᤧᤵᤔᤠᤖᤧ ᤗᤠᤃᤡ ᤔᤠᤱᤔᤧᤜᤧᤰᤛᤡᤱ᤹॥ ᤂᤧᤴ ᤕᤧᤰᤕᤰᤜᤠ᤹ᤀᤥ ᤗᤳᤇᤠ ᤕᤧᤰᤕᤰᤌᤡᤰ ᤔᤧᤰᤔᤠᤛᤡᤔᤠ ᤕᤧᤰᤕᤰ ᤔᤧᤔᤧᤳᤋᤢ᤹॥ 19 ᤂᤧᤴ ᤕᤧᤴᤏᤥ ᤔᤡᤛᤪ ᤗᤠᤈᤣ᤺ᤸᤗᤧ ᤁᤢᤗᤢᤶᤔᤥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤃᤡ ᤗᤳᤇᤠ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤎᤡᤰ ᤔᤧᤈᤥᤃᤢ᤹. ᤜᤧᤰᤁᤩᤠᤱ ᤔᤡᤛᤪ ᤗᤠᤈᤣ᤺ᤸᤗᤧ ᤀᤡ᤺ᤴᤍᤥᤀᤥ ᤕᤜᤘᤣ ᤍᤠᤱᤒᤠᤀᤥ ᤗᤳᤇᤠ ᤏᤡᤱᤘᤠ᤹ᤛᤥ ᤗᤢᤱ ᤛᤡᤳᤗᤠᤱᤎᤡᤰ ᤔᤧᤗᤣ᤺ᤳᤋᤢ᤹॥ 20 ᤔᤡᤛᤪ ᤗᤠᤈᤣ᤹ᤀᤥ ᤂᤧᤴ ᤗᤢᤱ ᤛᤡᤳᤗᤠᤱᤅᤡᤴ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤃᤡ ᤗᤳᤇᤠ ᤔᤡᤰᤛᤣᤴ ᤏᤢ ᤋᤥ᤺ᤴᤍᤡ ᤐᤥᤱ᤹॥ ᤀᤠᤕᤢᤰᤕᤢᤰᤐᤠ ᤏᤢ ᤛᤠᤰᤁᤧᤸᤗᤧᤰ ᤁᤧᤈᤥ᤺ᤰᤐᤠ ᤔᤏᤠᤜᤠ᤹ᤖᤧ ᤔᤧᤈᤥᤃᤢᤸᤗᤧ ᤕᤜᤘᤣ ᤍᤠᤱᤒᤠᤴ ᤁᤢᤓᤠ᤹ᤖᤧ ᤗᤠᤃᤡ ᤐᤣᤗᤡ ᤔᤧᤓᤠᤰᤋᤢ᤹. ᤜᤧᤰᤁᤩᤠᤱ ᤂᤢᤏᤧ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤗᤳᤇᤠ ᤛᤧᤴᤗᤵᤍᤠᤱᤒᤠᤎᤡᤰ ᤏᤢ ᤁᤧᤛᤧ᤺ᤵᤐᤠᤎᤡᤰ ᤐᤠᤱᤄᤢᤕᤢᤛᤢ᤹. ᤂᤧᤒᤩᤠᤱ ᤂᤧᤸᤗᤧ ᤂᤧᤴ ᤔᤏᤠᤜᤠ᤹ ᤂᤢᤴᤇᤡ᤹ ᤏᤡᤱᤔᤡᤜᤠ᤹ᤗᤠᤶ ᤛᤧ᤺ᤵᤋᤢᤛᤡ᤹॥ 21 ᤀᤰᤂᤣᤗ᤹ᤖᤡᤰ ᤕᤜᤘᤣ ᤍᤠᤱᤒᤠᤴ ᤔᤡᤛᤪ ᤗᤠᤈᤣ᤹ᤒᤠ ᤔᤏᤠᤜᤠ᤹ᤀᤥ ᤀᤥᤛᤣ᤺ᤴᤎᤠᤰᤛᤡᤱ᤹. ᤜᤧᤰᤁᤩᤠᤱ ᤂᤧᤴ ᤕᤧᤴᤏᤠᤱᤎᤥ ᤂᤧᤱᤜᤠ᤹ᤖᤧ ᤕᤜᤘᤣ ᤍᤠᤱᤒᤠᤴ ᤏᤛᤠᤴ ᤔᤧᤈᤥᤃᤢ᤹॥ ᤂᤧᤱᤜᤠ᤹ᤖᤧ ᤘᤕᤠᤃᤧᤴ ᤛᤡᤍᤢᤱᤈᤓᤠ ᤏᤢ ᤆᤠ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤛᤡᤍᤢᤱᤈᤓᤠᤗᤠᤶ ᤂᤢᤏᤧ᤹ ᤛᤧᤘᤠ ᤔᤧᤔᤧᤳᤋᤢ᤹. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤃᤡ ᤔᤠᤱᤜᤧᤰ ᤔᤧᤈᤥᤃᤢᤀᤠᤱ ᤂᤧᤴ ᤐᤠ᤺ᤴᤏᤡᤴ ᤔᤧᤃᤧᤳᤋᤢ᤹॥ 22 ᤕᤜᤘᤣ ᤍᤠᤱᤒᤧᤸᤗᤧ ᤔᤡᤛᤪ ᤗᤠᤈᤣ᤹ᤀᤥ ᤐᤕᤶ ᤕᤶᤒᤠ ᤔᤡᤴᤍᤣ᤹ ᤐᤥ᤺ᤰᤗ ᤕᤠ᤺ᤴᤍᤢ॥ ᤂᤢᤏᤧ᤹ ᤂᤧ᤹ᤕᤥ ᤁᤧᤕᤢᤱᤒᤠ ᤔᤏᤠᤜᤠ᤹ ᤔᤧᤍᤢᤰᤗ ᤕᤠ᤺ᤴᤍᤢᤛᤡ᤹. ᤜᤧᤰᤁᤩᤠᤱ ᤂᤧᤱᤜᤠ᤹ ᤕᤠᤶᤔᤥ ᤘᤣ᤺ᤴᤍᤢᤛᤡ᤹॥ ᤂᤧᤒᤩᤠᤱ ᤂᤧᤱᤜᤠ᤹ ᤕᤜᤘᤣ ᤍᤠᤱᤒᤠᤴ ᤗᤧᤵᤔᤠᤱ ᤔᤧᤏᤢ᤺ᤱ᤹॥ ᤜᤧᤰᤁᤩᤠᤱ ᤂᤢᤏᤧ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤐᤣᤗᤡᤴ ᤂᤧᤵᤛᤢᤀᤠᤱ ᤘᤣ᤺ᤴᤍᤢᤛᤡ᤹॥ 23 ᤂᤧᤴ ᤕᤧᤴᤏᤥ ᤔᤡᤛᤪ ᤗᤠᤈᤣ᤹ᤗᤠᤶ ᤀᤛ᤻ᤛᤢᤖ ᤗᤠᤈᤣ᤹ ᤌᤠᤖᤡᤰ ᤗᤳᤇᤠ ᤔᤠᤖᤠᤶᤎᤡᤰ ᤐᤥᤱ᤹॥ ᤀᤛ᤻ᤛᤢᤖᤒᤠ ᤔᤏᤠᤜᤠ᤹ ᤔᤡᤛᤪ ᤗᤠᤈᤣ᤹ᤀᤥ ᤔᤧᤒᤣ᤺ᤰ ᤜᤧᤰᤁᤩᤠᤱ ᤔᤡᤛᤪᤒᤠ ᤔᤏᤠᤜᤠ᤹ ᤀᤛ᤻ᤛᤢᤖ ᤗᤠᤈᤣ᤹ᤀᤥ ᤔᤧᤒᤣ᤺ᤰ॥ ᤂᤧᤒᤩᤠᤱ ᤔᤡᤛᤪᤒᤠ ᤔᤏᤠᤜᤠ᤹ ᤏᤢ ᤀᤛ᤻ᤛᤢᤖᤒᤠ ᤔᤏᤠᤜᤠ᤹ ᤛᤥᤖᤡᤰ ᤔᤠᤱᤛᤧᤘᤠ ᤔᤧᤈᤥᤰ॥ 24 ᤂᤧᤴ ᤕᤧᤴᤏᤥ ᤀᤡᤛᤪᤠᤀᤡᤗ ᤗᤠᤈᤣᤴ ᤔᤡᤛᤪ ᤏᤢ ᤀᤛ᤻ᤛᤢᤖ ᤗᤠᤈᤣ᤹ᤜᤠ᤹ᤀᤥ ᤛᤥᤖᤡᤰ ᤑᤢᤱᤛᤡᤱ᤹. ᤜᤧᤰᤁᤩᤠᤱ ᤁᤴ ᤛᤢᤶᤛᤡ ᤗᤠᤈᤣ᤹ᤜᤠ᤹ᤗᤠᤶ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤁᤧᤖᤧᤰ ᤔᤏᤠᤜᤠ᤹ᤖᤧ ᤜᤠᤱᤘᤠᤃᤧᤴ ᤔᤢ᤹ᤀᤡᤛᤠᤶ ᤔᤧᤄᤥᤛᤢ᤹॥ 25 ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤂᤧᤱᤜᤠ᤹ ᤀᤰᤂᤣ ᤔᤧᤳᤋᤢᤛᤡᤀᤠᤱ ᤜᤠᤱᤘᤠᤃᤧᤴ ᤔᤢ᤹ᤀᤡᤛᤠᤶ ᤐᤡᤖᤢᤛᤡ᤹. “ᤔᤡᤛᤪᤒᤠ ᤔᤏᤠᤜᤠ᤹ ᤀᤠᤱᤃᤠ᤹ ᤀᤠᤔᤏᤠᤛᤡ. ᤀᤛ᤻ᤛᤢᤖᤡᤜᤠ᤹ ᤀᤠᤱᤃᤠ᤹ ᤀᤠᤜᤢᤰᤁᤡᤸᤗᤧ ᤆᤥᤃᤢᤱᤛᤡᤱᤒᤠᤛᤡ ᤜᤧᤰᤁᤩᤠᤱ ᤀᤡᤛᤪᤠᤀᤡᤗᤡᤜᤠ᤹ ᤀᤠᤱᤃᤠ᤹ ᤀᤠᤒᤠᤅᤣ ᤛᤣᤃᤢᤱᤛᤡᤱᤒᤠ ᤗᤰᤁᤧᤄᤥᤒᤠ ᤀᤠᤔᤏᤠᤛᤡᤖᤥ॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.