ᤕᤛᤤᤕᤠ 18 - LIFOTNT

ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛ ᤗᤠᤈᤣᤴ ᤂᤢᤶᤍᤡᤱ ᤐᤡᤖᤢ

¹ ᤏᤡ᤺ᤱᤄᤢᤰᤘᤠᤜᤠ᤹ᤖᤧ ᤔᤧᤎᤡᤶᤛᤢᤒᤠ ᤗᤠᤈᤣ᤺ᤱᤃ. ᤆᤡ᤺ᤳᤋᤧᤛᤩᤧᤖᤥ. ᤁᤢᤛ ᤗᤠᤈᤣ᤹ᤒᤠ ᤕᤱᤄᤱᤜᤠ᤹ᤖᤧ ᤁᤢᤕᤠᤀᤥ ᤂᤧᤴ ᤏᤧᤖᤥ॥

² ᤂᤧᤵᤔᤥᤒᤠ ᤔᤏᤠᤜᤠ᤹ᤖᤧ ᤔᤡᤰᤗᤠ᤺ᤸᤗᤧ ᤆᤥ᤺ᤰᤔᤏᤠᤒᤠ ᤁᤧᤈᤠᤵᤐᤠ ᤂ᤺ᤱᤒᤣᤜᤠ᤹ᤀᤥ ᤜᤠᤱᤗᤠᤀᤡᤱᤒᤠᤜᤠ᤹ ᤔᤧᤒᤠᤱᤄᤢᤛᤡᤖᤥ॥ ᤁᤧᤈᤠᤵᤐᤠ ᤀᤡᤱᤄᤱᤛᤠᤒᤠᤛᤣ. ᤁᤣ᤺ᤶᤒᤠ ᤏᤢ ᤘᤖᤧᤱᤗᤧᤱᤒᤠ ᤜᤥᤖᤡᤰ ᤁᤧᤒᤵᤐᤠ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤀᤥ ᤐᤣᤃᤧᤶᤔᤧ᤹ᤀᤥ. ᤂᤧᤱᤜᤠ᤹ ᤏᤡ᤺ᤳᤋᤠᤱᤒᤠ ᤏᤢ ᤔᤠ᤺ᤱᤄᤠᤒᤠ ᤔᤏᤠᤜᤠ᤹ᤖᤧ ᤔᤧᤃᤡᤖᤢᤛᤡᤖᤥ. ᤂᤧᤱᤜᤠ᤹ ᤁᤧᤎᤢᤶᤒᤠ ᤏᤢ ᤔᤢᤰᤁᤧᤃᤢᤒᤠ ᤔᤧᤈᤥᤰᤗᤥ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤠᤈᤣᤴ ᤘᤜ᤺ᤱᤜᤠ᤹ᤖᤧ ᤁᤢᤗᤰ ᤁᤢᤗᤰᤁᤥ ᤛᤧᤴᤍᤢᤀᤠᤱ ᤏᤧᤖᤥ॥

³ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤁᤧᤖᤧᤰ ᤔᤧᤴᤇᤠᤶ ᤕᤠᤵᤔᤡᤛᤣ. ᤂᤧᤏᤡ᤹ᤃ ᤕᤥ᤹ᤒᤠ ᤗᤠᤈᤣ᤹ᤀᤥ ᤁᤧᤕᤢᤅᤡᤖᤥ᥄ ᤁᤥ᤺ᤰᤔᤠ ᤑᤠᤱᤈᤱ ᤌᤧᤃᤢ ᤔᤠᤱᤘᤠᤜᤠ᤹ᤀᤥ ᤔᤡᤰᤛᤣ᤺ᤴᤗᤧ ᤗᤠᤃᤡ ᤗᤳᤇᤠ ᤏᤡᤛᤠᤎᤡᤰ ᤔᤧᤜᤠᤰᤋᤢᤖᤥ. ᤂᤡᤏᤡ᤹ ᤂᤧᤴ ᤏᤡᤛᤠᤏ ᤁᤧᤏᤡᤛᤢᤶᤗᤥ᥄ ᤜᤧᤰᤁᤩᤠᤱ ᤌᤱᤗᤧ ᤗᤠᤃᤡ ᤌᤢᤳᤌᤢᤖᤡ᤺ᤵᤐᤠᤴ ᤗᤠᤀᤡᤰᤗᤥ. ᤂᤧᤴ ᤂᤧᤏᤡ᤹ ᤁᤧᤄᤧᤵᤛᤢᤶᤗᤥ॥

⁴ ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤴ ᤐᤠ᤺ᤴᤏᤡᤴ ᤀᤠᤱᤃᤠ᤹ ᤔᤧᤳᤋᤠᤱᤅᤠᤱ ᤘᤠ᤹ᤖᤥ. “ᤛᤠ᤹ᤖᤡᤰ ᤏᤠᤶᤛᤧ᤺ᤰᤔᤠ ᤏᤢ ᤆᤠᤛᤢᤶᤔᤠ ᤜᤠᤱᤘᤠᤛᤧ᤺ᤰᤔᤠ ᤕᤧᤶᤔᤥ ᤛᤢᤛᤢ ᤁᤧᤗ᤹ᤒᤠ ᤂᤠ᤹ᤔᤡᤳ ᤜᤧᤰᤁᤣ ᤀᤠᤱᤃᤠ᤹ ᤛᤫᤠ᤺ᤳ ᤕᤢᤱᤅᤠᤖᤥ. ᤜᤧᤰᤁᤩᤠᤱ ᤀᤠᤕᤢᤱᤔᤠ ᤋᤧᤴᤏᤥᤗᤠᤶ ᤀᤥᤔᤧᤳᤋᤢᤱᤗᤥ॥”

⁵ ᤌᤣᤀᤠᤱᤓᤧᤸᤗᤧ ᤆᤠᤛᤢᤶᤔᤠᤏᤢ᤺ᤸᤗᤧ ᤋᤃᤡ ᤆᤠ᤺ᤸᤗᤧ ᤁᤢᤓᤢᤱ ᤑᤧᤰᤔᤣ᤺ᤳᤋᤧᤴ ᤑᤧᤰᤁᤠᤱ ᤗᤢ᤺ᤰᤐᤣ᤺ᤰᤗᤥ. ᤜᤧᤰᤁᤩᤠᤱ ᤂᤧᤴ ᤁᤢᤓᤢᤱ ᤑᤧᤰᤔᤣ᤺ᤳᤋᤧᤴ ᤁᤧᤍᤢᤶᤒᤠ ᤆᤧᤸᤗᤧᤰᤛᤣ᤹ ᤐᤥᤱᤗᤥ. ᤂᤧᤒᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤂᤧᤴ ᤆᤧᤸᤗᤧᤰᤛᤣᤸᤗᤧ ᤁᤢᤒᤥᤖᤠ᤺ᤰᤜᤠ᤹ ᤘᤠᤓᤣ᤺ᤳᤋᤡᤸᤗᤧ ᤛᤠ᤺ᤰᤋᤢᤖᤥ. ᤜᤧᤰᤁᤩᤠᤱ ᤁᤧᤒᤥᤒᤠ ᤁᤧᤍᤠᤵᤐᤠ ᤐᤥᤖᤠ᤺ᤰᤜᤠ᤹ ᤀᤠ᤺ᤳᤋᤢᤍᤣᤛᤢᤖᤥ॥

⁶ ᤂᤧᤱᤜᤠ᤹ ᤁᤧᤖᤧᤰ ᤁᤥ᤺ᤰᤔᤠ ᤑᤠᤱᤈᤱ ᤌᤧᤃᤢ ᤔᤠᤱᤘᤠᤜᤠ᤹ᤀᤥ ᤁᤧᤕᤠᤰᤐᤠ ᤁᤡᤌ ᤏᤢ ᤋᤠᤶᤓᤢᤱ ᤌᤰᤛᤠᤜᤠ᤹ᤖᤧ ᤆᤠᤔᤠᤖᤧ ᤗᤠᤃᤡ ᤕᤢᤱ ᤕᤠ᤺ᤰᤗᤥ॥ ᤜᤧᤰᤁᤣᤗ᤹ᤖᤡᤰ ᤐᤢᤛᤠᤜᤠ᤹ᤖᤧ ᤜᤠᤱᤘᤠᤔᤠ ᤕᤧᤶ ᤂᤠᤖᤠᤰ ᤔᤧᤈᤖᤥ ᤜᤧᤰᤁᤩᤠᤱ ᤋᤠᤶᤓᤢᤱ ᤌᤰᤛᤠᤜᤠ᤹ᤖᤧ ᤆᤢᤱᤈᤡ᤺ᤰᤔᤠ ᤕᤧᤶ ᤂᤠᤖᤠᤰ ᤔᤧᤈᤖᤥ॥

⁷ ᤂᤧᤴ ᤕᤧᤴᤏᤥ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤔᤡᤰᤋᤥᤰ ᤔᤧᤍᤠᤖᤢᤖᤥ॥ ᤏᤡ᤺ᤳᤋᤠᤱ ᤏᤢ ᤔᤠ᤺ᤱᤄᤠᤒᤠ ᤔᤏᤠᤜᤠ᤹ᤖᤧ ᤔᤧᤃᤡᤖᤢᤛᤡᤒᤠ ᤂᤧᤴ ᤁᤣ᤺ᤶᤒᤠ ᤏᤢ ᤘᤖᤧᤱᤗᤧᤱᤒᤠ ᤏᤧᤰᤛᤠ ᤁᤧᤃᤵᤐᤠ. ᤁᤧᤎᤢᤶᤒᤠ ᤏᤢ ᤔᤢᤰᤁᤧᤃᤢᤒᤠ. ᤜᤧᤰᤁᤩᤠᤱ ᤂᤢᤴᤇᤡ᤹ ᤗᤠᤈᤣᤴ ᤘᤜ᤺ᤱᤜᤠ᤹ᤖᤧ ᤁᤢᤗᤰ ᤁᤢᤗᤰ ᤑ᤺ᤰᤂᤢᤀᤠᤱ ᤁᤧᤏᤧᤒᤠ ᤛᤢᤘᤠᤱᤜᤠ᤹ ᤔᤧᤍᤠᤀᤠᤱ ᤛᤡᤕᤥᤏ ᤁᤥ᤺ᤰᤔᤠᤀᤥ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤠᤴ ᤂᤧᤱᤜᤠ᤹ᤖᤧ ᤆᤧᤛᤢᤱᤜᤠ᤹ ᤔᤧᤜᤢ᤹ᤖᤢᤖᤥ॥