ᤕᤛᤤᤕᤠ 17 - LIFOTNT

ᤀᤡᤛᤪᤠᤀᤡᤗ ᤗᤠᤈᤣ᤹ ᤏᤢ ᤍᤔᤛ᤻ᤁᤛ ᤕᤧᤰᤕᤰᤁᤥ ᤂᤢᤶᤍᤡᤱ

¹ ᤍᤔᤛ᤻ᤁᤛᤧᤸᤗᤧ ᤁᤢᤕᤠ᤺ᤶᤒᤣᤀᤥ ᤔᤠᤱᤏᤡᤱᤘᤠ᤹ᤐᤠᤴ—ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤖᤥ— “ᤍᤔᤛ᤻ᤁᤛ ᤕᤧᤰᤕᤰᤁᤡᤴ ᤀᤠᤸᤗ ᤂᤠᤵᤐᤢᤌᤩ᤺ᤱ ᤐᤥᤱᤗᤥ. ᤜᤧᤰᤁᤩᤠᤱ ᤁᤧᤎᤢᤵᤐᤠ ᤁᤧᤗᤢ᤺ᤶᤒᤠ ᤜᤡᤶᤜᤠ᤹ᤖᤧ ᤁᤢᤕᤰᤜᤠ᤹ ᤗᤢᤶᤛᤡᤱᤗᤥ॥

² ᤀᤖᤥᤀᤣᤖᤒᤠ ᤕᤧᤰᤕᤰᤜᤠ᤹ ᤔᤢᤖᤧᤰ ᤂᤠᤖᤧᤰ ᤏᤢ ᤆᤡᤈᤡ ᤂᤰᤂᤰ ᤐᤥᤱᤗᤥ. ᤜᤧᤰᤁᤩᤠᤱ ᤔᤠᤖᤠᤶᤜᤠ᤹ᤀᤥ ᤔᤧᤸᤗᤢᤰ ᤔᤧ᤺ᤴᤍᤠ ᤆᤠᤔᤧᤖᤠᤶᤔᤠᤱ ᤔᤧᤀᤡᤶᤔᤠᤱ ᤔᤧᤏᤧᤖᤥ. ᤂᤧ᤹ᤕᤥ ᤔᤧᤸᤗᤢᤰᤜᤠ᤹ ᤁᤧᤏᤠ᤺ᤵᤐᤠ ᤁᤧᤍᤣᤒᤠ ᤜᤠ᤺ᤳᤋᤠᤱ ᤜᤥᤵᤗᤥ॥

³ ᤗᤢᤱᤎᤠᤰᤁᤡᤸᤗᤧ ᤁᤒᤪᤡᤱ ᤔᤧᤃᤒᤢᤒᤠ ᤀᤡᤛᤪᤠᤀᤡᤗᤒᤠ ᤕᤧᤰᤕᤰᤜᤠ᤹ ᤂᤠᤵᤐᤢᤌᤩ᤺ᤱ ᤐᤥᤱᤗᤥ. ᤜᤧᤰᤁᤩᤠᤱ ᤍᤔᤛ᤻ᤁᤛᤒᤠ ᤜᤠᤱᤕᤢᤰ ᤆᤥ᤺ᤰᤔᤠ ᤔᤢᤰᤛᤠᤶᤔᤡᤴ ᤔᤧᤰᤗᤥ॥ ᤛᤡᤖᤡᤕᤠᤒᤠ ᤁᤧᤍᤠᤱᤒᤠ ᤁᤧᤕᤠ᤺ᤰᤐᤠ ᤁᤧᤖᤧᤰᤗᤧ ᤂᤢᤴᤇᤡ᤹ ᤀᤡᤱᤏᤠᤶᤔᤡᤴ ᤀᤡᤛᤪᤠᤀᤡᤗᤖᤧ ᤁᤧᤒᤣ᤺ᤰᤐᤠ ᤁᤢᤀᤡᤱᤏᤠᤶ ᤁᤢᤀᤡᤛᤡᤰ ᤐᤥᤱ ᤑᤠ᤹ᤀᤠᤱ ᤀᤠᤱᤃᤠ᤹ ᤔᤢᤰᤛᤠᤶᤍᤠᤱᤒᤧᤸᤗᤧ ᤐᤠ᤺ᤳᤋᤢᤱᤅᤠᤱ ᤘᤠ᤹ᤖᤥ॥”

⁴ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤖᤥ. “ᤂᤧᤴ ᤕᤧᤴᤏᤥ ᤕᤠᤁᤢᤒᤖᤧ ᤁᤢᤜᤠᤱᤘᤠ ᤁᤢᤔᤠᤱᤘᤠᤴ ᤔᤠᤒᤣ᤺ᤰᤗᤥ. ᤜᤧᤰᤁᤩᤠᤱ ᤕᤠᤱᤛᤠᤁᤢᤴᤎᤣ᤺ᤸᤗᤧ ᤁᤢᤗᤧᤰᤘᤠ ᤕᤠᤱᤛᤠ᤹ᤔᤠ ᤐᤥᤱᤗᤥ॥

⁵ ᤁᤧᤍᤢᤶᤒᤠᤀᤠᤱ ᤁᤧᤏᤧᤒᤠ ᤁᤢᤈᤠᤴ ᤆᤠ ᤁᤧᤛᤢᤶᤒᤧᤸᤗᤧ ᤛᤢᤵᤛᤢᤒᤠ ᤜᤧᤰᤁᤣ. ᤜᤧᤰᤁᤩᤠᤱ ᤀᤠᤒᤠᤅᤣ ᤁᤢᤜᤢᤰᤁᤡᤸᤗᤧ ᤁᤧᤍᤢᤶᤒᤠ ᤆᤠ᤺ᤴ ᤜᤧᤃᤢᤒᤠ ᤜᤧᤰᤁᤣ. ᤖᤐᤠᤀᤡᤒᤠ ᤏᤧᤏᤧᤒᤠ ᤀᤡᤰᤋᤠᤵᤐᤥ ᤗᤳᤇᤠ ᤔᤏᤠᤎᤡᤰᤗᤧ ᤁᤧᤔᤠᤒᤠ ᤁᤧᤕᤠ᤺ᤰᤐᤠ ᤁᤢᤈᤠᤜᤠ᤹ ᤁᤥ᤺ᤳᤋᤢᤒᤠ ᤜᤧᤰᤁᤣ ᤀᤡᤛᤪᤠᤀᤡᤗᤧᤴ ᤐᤥᤱᤗᤥ॥

⁶ ᤜᤧᤰᤁᤣᤛᤠᤱ ᤗᤳᤇᤠ ᤆᤤᤋᤢᤏ ᤛᤡᤱᤒᤢᤱᤅᤡᤸᤗᤧ ᤁᤢᤈᤠ᤹ᤜᤠ᤹ ᤋᤢᤵᤔᤠᤀᤠᤱ ᤆᤧ᤹ᤈᤧ᤺ᤳ ᤁᤢᤈᤠ᤹ ᤐᤵᤐᤠ ᤁᤢᤀᤡᤛᤡᤰ. ᤂᤧ᤹ᤕᤥ ᤁᤢᤓᤠ ᤁᤢᤈᤠ᤹ᤜᤠ᤹ ᤐᤋᤩᤠ᤺ᤰᤗᤥ— ᤌᤥᤛᤔᤠ ᤁᤢᤒᤥᤖᤠᤰᤁᤥ ᤁᤢᤈᤠ᤹ ᤏᤧᤳᤇᤡ ᤛᤢᤶᤛᤡ ᤏᤢ ᤁᤢᤈᤠ᤹ ᤁᤧᤎᤥ᤺ᤰᤐᤠ ᤁᤢᤒᤥᤖᤠᤰᤁᤥ ᤁᤢᤈᤠ᤹ ᤗᤡᤛᤡ ᤅᤠᤛᤡ ᤐᤵᤐᤠ ᤜᤧᤰᤁᤣ ᤀᤡᤛᤪᤠᤀᤡᤗᤧᤴ ᤐᤥᤱᤗᤥ.” ᤕᤜᤘᤣ ᤍᤠᤱᤒᤠ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤠ᤺ᤳᤋᤢᤖᤥ॥

⁷ ᤜᤧᤰᤁᤩᤠᤱ ᤂᤧᤴ ᤁᤢᤏᤢᤵᤔᤠ ᤕᤧᤴᤏᤥ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤏᤠᤘᤠᤃᤧᤴ ᤆᤀᤡ᤺ᤳᤍᤠᤱᤒᤠᤴ ᤀᤥᤔᤧᤔᤧᤳᤋᤢᤖᤥ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤔᤡᤰᤁᤥ ᤛᤢᤖᤡᤳ ᤗᤠ᤺ᤳᤗ ᤌᤠᤖᤡᤰ ᤀᤡᤛᤪᤠᤀᤡᤗᤒᤠ ᤛᤣᤛᤣ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤀᤥᤔᤧᤔᤧᤳᤋᤢᤖᤥ॥

⁸ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤀᤠᤒᤠᤅᤣ ᤜᤢᤰᤁᤡᤸᤗᤧ ᤔᤧᤈᤥᤃᤢᤒᤠ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤜᤠ᤹ ᤀᤥᤔᤧᤶᤔᤧᤳᤋᤢᤴᤗᤥ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤀᤠᤒᤠᤅᤣ ᤜᤢᤰᤆᤥ᤺ᤸᤗᤧ ᤔᤧᤈᤥᤃᤢᤛᤡᤒᤠ ᤀᤛᤣᤖᤠ ᤔᤠᤱᤅᤡᤸᤗᤧᤴ ᤛᤡᤳᤗᤠᤱᤜᤠ᤹ ᤏᤢ ᤛᤢᤰᤐᤠ ᤜᤠ᤺ᤶᤔᤠᤍᤧᤴᤜᤠ᤹ ᤀᤥᤔᤧᤶᤔᤧᤳᤋᤢᤴᤗᤥ॥

⁹ ᤀᤡᤛᤪᤠᤀᤡᤗᤒᤠ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤋᤃᤡᤗᤠᤶ ᤜᤡᤒ᤻ᤒᤡ ᤏᤢ ᤀᤔᤥᤖᤡᤜᤠ᤹ ᤔᤧᤄᤧᤳᤇᤡᤱᤅᤡᤸᤗᤧ ᤔᤧᤗᤧᤖᤢᤎᤒᤠ ᤕᤧᤰᤕᤰᤜᤠ᤹ ᤆᤡᤈᤡ ᤂᤰᤂᤰ ᤐᤥ᤺ᤰᤂᤧ. ᤜᤧᤰᤁᤣᤗ᤹ᤖᤡᤰᤁᤣ ᤂᤧᤴ ᤕᤧᤴᤏᤡᤴ ᤋᤠ᤺ᤸᤗᤧ ᤗᤢᤱᤎᤠᤰ ᤔᤧᤛᤧᤳᤋᤢᤀᤠᤱ ᤔᤧᤛᤧ᤺ᤵᤋᤢᤒᤠ ᤕᤧᤰᤕᤰᤜᤠ᤹ ᤔᤢᤖᤧᤰ ᤂᤠᤖᤧᤰ ᤐᤥᤱ᤹॥

¹⁰ ᤀᤡᤛᤪᤠᤀᤡᤗᤒᤠ ᤔᤏᤠᤛᤣ. ᤂᤧᤏᤡ᤹ ᤁᤧᤛᤧ᤺ᤵᤐᤠ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤂᤧᤏᤡ᤹ ᤏᤡᤱᤘᤠ᤹ ᤁᤧᤔᤢ᤺ᤳᤇᤢᤶᤔᤠᤱ ᤁᤧᤘᤕᤡᤖᤥ. ᤜᤧᤰᤁᤩᤠᤱ ᤛᤡᤕᤠᤰᤐᤣ᤹ ᤌᤧᤕᤠᤰᤐᤣ᤹ ᤛᤧ᤺ᤵᤛᤡᤱᤔᤠᤍᤧᤴ ᤏᤢ ᤂᤧᤏᤡ᤹ ᤜᤠᤱᤕᤰᤁᤡᤴ ᤏᤡᤱᤘᤠ᤹ ᤁᤧᤴᤀᤡ᤺ᤳᤋᤢᤶᤔᤡᤴᤗᤥ॥ ᤁᤸᤗᤧᤆᤥᤃᤢᤸᤗᤧ. ᤂᤧᤏᤡ᤹ ᤛᤠ᤹ᤖᤡᤰ ᤏᤢᤒᤠ ᤑᤢᤱᤜᤠ᤹ ᤁᤧᤗᤣ᤺ᤳᤋᤢᤶᤗᤥ ᤜᤧᤰᤁᤩᤠᤱ ᤘᤣ᤹ ᤗᤠᤈᤣ᤹ᤗᤠᤶ ᤁᤧᤍᤠᤖᤢᤶᤒᤠ ᤆᤧᤸᤗᤧᤰᤛᤣ᤹ᤀᤡᤸᤗᤧ ᤁᤢᤒᤢᤱᤜᤠ᤹ ᤁᤧᤗᤣ᤺ᤳᤋᤢᤶᤗᤥ.

¹¹ ᤜᤧᤰᤁᤩᤠᤱ ᤁᤧᤗᤣ᤺ᤳᤋᤢᤶᤒᤠ ᤕᤧᤴᤏᤥ ᤂᤧᤏᤡ᤹ ᤂᤧᤴ ᤑᤢᤱᤜᤠ᤹ ᤐᤥᤖ ᤁᤧᤕᤠ᤺ᤴᤍᤢᤶᤗᤥ. ᤂᤧᤶᤒᤩᤠᤱ ᤋᤠᤏᤠᤶ ᤌᤠᤖᤡᤰᤗᤧ ᤂᤧᤴ ᤆᤧᤸᤗᤧᤰᤛᤣᤸᤗᤧ ᤁᤢᤒᤢᤱᤜᤠ᤹ ᤁᤢᤓᤢᤱᤑᤧᤰᤔᤣᤳ ᤁᤧᤗ᤺ᤶᤒᤠ ᤁᤧᤈᤥᤃᤢᤶᤗᤥ. ᤜᤧᤰᤁᤣᤛᤠᤱ ᤁᤢᤈᤠ᤹ ᤔᤧᤎᤥ᤺ᤰᤏᤧᤴᤗᤥ ᤜᤧᤰᤁᤩᤠᤱ ᤕ᤹ᤎᤧᤳᤋᤢ ᤆᤣ᤹ᤖᤢᤀᤠᤱ ᤋᤢᤰᤂᤣ ᤋᤢᤶᤔᤠ ᤕᤧᤴᤗᤰ ᤐᤥᤱᤗᤥ॥

ᤏᤡᤱᤔᤡᤜᤠ᤹ ᤜᤠᤖᤡᤔᤧᤍᤠ᤹᤺

¹² ᤀᤠᤶᤒᤡ. ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤕᤖᤡᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤔᤧᤀ᤺ᤰ ᤔᤧᤓᤡ᤺ᤰᤐᤠ ᤜᤕᤱ ᤁᤡᤸᤗᤡᤱᤜᤠ᤹ ᤘᤖ᤺ᤱᤅᤡᤴ ᤛ᤺ᤰᤐᤠ ᤁᤢᤀᤡᤛᤡᤰ ᤂᤧᤶᤍᤧᤳᤗᤥ᥄ ᤀᤠᤶᤒᤡ. ᤕᤖᤡᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤔᤧᤀ᤺ᤰᤐᤠ ᤀᤡᤰᤗᤠᤴ ᤕᤶᤒᤕᤶᤒᤠ ᤘᤜ᤺ᤱᤜᤠ᤹ ᤛ᤺ᤰᤐᤠ ᤁᤢᤀᤡᤛᤡᤰ ᤗ᤹ᤖᤥ᥄

¹³ ᤜᤧᤰᤁᤣᤛᤠᤱ ᤁᤧᤃᤢᤱᤒᤠ ᤁᤧᤕᤢᤒᤠ ᤆᤫᤠ᤺ᤳᤋᤡᤴ ᤛ᤺ᤰᤐᤠ ᤁᤢᤀᤡᤛᤡᤰ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤔᤧᤀ᤺ᤰᤗᤥ. ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤱᤜᤠ᤹ ᤑᤧ᤺ᤰᤋᤢᤛᤡᤖᤥ. ᤜᤧᤰᤁᤣ᤺ᤸᤗᤧ ᤂᤧᤱᤜᤠ᤹ ᤔᤠ᤺ᤱᤄᤠ ᤔᤧᤄᤧᤳᤇᤡᤱ ᤔᤧᤒᤣ᤺ᤰᤗᤥ. ᤂᤧᤒᤩᤠᤱ ᤛᤢᤖᤡᤳ ᤁᤣᤈᤱᤅᤡᤸᤗᤧ ᤁᤥ᤺ᤰᤔᤠᤀᤥ ᤑᤧᤛᤢ ᤋᤣ᤹ᤖᤢᤒᤠ ᤆᤠᤛᤡᤵ ᤏᤢ ᤂᤀᤡᤰ ᤂᤀᤡᤰ ᤁᤧᤀᤡᤰᤛᤡᤱᤒᤠ ᤛᤠᤶᤔᤡ᤺ᤳ ᤁᤣᤈᤱᤅᤡᤸᤗᤧ ᤑᤧᤛᤢ ᤋᤣ᤹ᤖᤢᤒᤠ ᤕᤠ᤺ᤴᤛᤢᤱᤜᤠ᤹ ᤁᤢᤀᤡᤛᤡᤰ ᤂᤧᤱᤜᤠ᤹ ᤐᤢᤒᤣᤗᤠᤵᤛᤠ ᤔᤧᤏᤠ᤺ᤳᤋᤢᤛᤡᤖᤥ॥

¹⁴ ᤕᤢ᤺ᤴᤇᤡᤰᤐᤠ ᤕᤧᤶᤔᤥ ᤂᤧᤱᤜᤠ᤹ᤖᤧ ᤜᤰᤆᤄᤳ ᤁᤡᤔᤠ ᤕᤱᤔᤠ ᤐᤥᤱᤗ ᤔᤧᤈᤥᤃᤢᤖᤥ. ᤁᤖ ᤋᤠᤏᤠᤶᤃ ᤂᤠᤀᤥ᤺ᤵᤔᤠᤏᤢ᤺ᤸᤗᤧ ᤋᤃᤡ ᤂᤧᤱᤜᤠ᤹ ᤔᤧᤔᤠ ᤔᤧᤒᤣ᤺ᤰᤗᤥ॥ ᤀᤠᤏᤡ᤹ ᤕᤠᤱᤛᤠᤁᤢᤴᤎᤣ ᤕᤠᤵᤔᤡ ᤁᤧᤏᤠᤵᤐᤠᤜᤠ᤹ᤖᤧ ᤂᤢᤴᤇᤡ᤹ ᤗᤰᤁᤡᤴᤏᤠᤱ ᤀᤠᤶᤓᤠ ᤜᤧᤰᤋᤱᤒᤠ ᤐᤥᤱᤗᤥ. ᤂᤧᤒᤩᤠᤱ ᤀᤠᤏᤡ᤹ ᤕᤠᤵᤔᤡ ᤁᤧᤏᤠᤵᤐᤠ ᤁᤧᤜᤡᤵᤐᤠᤜᤠ᤹ᤖᤧᤀᤠᤱ ᤜᤠᤒᤠ ᤜᤧᤰᤋᤱᤒᤠᤀᤣ ᤔᤧᤍᤢᤔᤢᤖᤥ॥