ᤕᤛᤤᤕᤠ 16 - LIFOTNT

ᤔᤥᤀᤠᤒ ᤗᤠᤈᤣ᤹ᤀᤥ ᤔᤧᤰᤔᤠᤛᤡᤔᤠ ᤋᤠ᤹᤺

¹ ᤛᤣᤗᤠ ᤕᤧᤰᤕᤰᤗᤠᤶ ᤔᤢᤖᤧᤰ ᤂᤠᤖᤧᤰᤐᤠ ᤕᤧ᤺ᤱᤄᤠᤍᤧᤴ ᤏᤠᤎᤠ᤺ᤶᤒᤡᤒᤠ ᤗᤠᤈᤣ᤹ᤀᤥ ᤜᤠᤱᤕᤢᤰ ᤁᤧᤈᤥ᤺ᤰᤐᤠᤸᤗᤧ ᤁᤢᤗᤠᤃᤡ ᤏᤢᤔᤠᤛᤢᤰᤔᤠ ᤛᤡᤕᤥᤏᤀᤥ ᤌᤢ᤺ᤶᤒᤠᤜᤠ᤹ ᤔᤡᤰᤋᤥᤰ ᤜᤠᤅᤠᤶᤍᤣᤛᤠᤶᤛᤧ᤹ᤀᤥ॥

² ᤐᤢᤜᤠ᤹ ᤂᤢᤴᤇᤡ᤹ ᤜᤠᤵᤜᤠ᤹ᤀᤥᤗᤠᤶ ᤑᤱᤔᤠᤍᤣᤔᤠᤛᤡᤀᤠᤱ ᤏᤠ ᤏᤢ ᤁᤳᤏᤠ ᤔᤧᤒᤧᤀᤠᤱ ᤔᤧᤘᤠ᤹ᤒᤠ ᤁᤢᤀᤡᤛᤡᤰ ᤔᤥᤀᤠᤒᤒᤠ ᤔᤧᤴᤇᤢᤔᤠᤜᤠ᤹ ᤀᤷᤏᤥᤏ ᤘᤜ᤺ᤱᤅᤡᤸᤗᤧ ᤁᤢᤕᤠ ᤁᤢᤕᤠ ᤏᤠ ᤏᤢ ᤁᤳᤏᤠ ᤔᤧᤒᤥ᤺ᤰᤂᤧᤀᤠᤱ ᤔᤧᤘᤠ᤹ᤖᤥ॥

³ ᤂᤧᤱᤜᤠ᤹ᤖᤧ ᤕᤜᤢᤍᤠᤒᤠ ᤔᤏᤠᤜᤠ᤹ ᤔᤧᤔᤧᤳᤋᤢᤛᤡᤖᤥ. “ᤀᤠᤏᤡᤃᤣ ᤌᤣ ᤆᤥᤃᤢᤶᤒᤧᤒᤠᤒᤣ᥅ ᤀᤠᤏᤡᤃᤣ ᤕᤠᤵᤔᤡ ᤀᤠᤔᤧᤳᤋᤧ᤹ᤀᤥ॥ ᤗᤧᤴᤍᤡᤰ ᤏᤠᤶᤛᤧ᤺ᤰᤁᤡᤸᤗᤧ ᤛᤡᤱᤒᤢᤱᤅᤡᤸᤗᤧ ᤁᤢᤛᤡᤃᤠᤱ ᤛᤢᤛᤢ ᤁᤧᤗ᤹ᤒᤠ ᤏᤠᤶᤈᤡ᤺ᤰᤂᤥ᤹ ᤁᤢᤀᤡᤛᤡᤰ ᤀᤠᤏᤡᤃᤣ ᤀᤠᤀᤡ᤺ᤵᤋᤧ᤹ᤀᤥ॥ ᤜᤧᤰᤁᤣᤗ᤹ᤖᤡᤰ ᤂᤧᤏᤡ᤹ ᤁᤧᤀᤡ᤺ᤵᤋᤢᤶᤒᤠ ᤏᤠᤶᤀᤡ᤺ᤰᤂᤱᤅᤥ ᤀᤠᤏᤡᤃᤣ ᤀᤡ᤺ᤶᤛᤡᤱᤔᤠ ᤂᤥᤛᤢᤶᤒᤧᤖᤖᤥ॥ ᤀᤠᤏᤡᤃᤣ ᤘᤧᤵᤔᤡᤒᤠᤛᤡᤃᤧ. ᤜᤠ᤺ᤳᤗᤧᤀᤠᤱ ᤔᤧᤄᤥᤛᤡᤃᤧᤴᤒᤠᤍᤧᤴᤏᤥ ᤀᤠᤈᤡᤰᤂᤧ᤹ᤀᤥ॥

⁴ ᤔᤥᤀᤠᤒᤗᤠᤶ ᤔᤧᤗ᤺ᤳᤋᤢ ᤔᤧᤍᤣᤛᤢᤛᤡᤒᤠ ᤔᤏᤠᤜᤠ᤹ ᤂᤧᤏᤧ᤹ᤏᤢ ᤔᤧᤕᤢᤱᤗᤖᤥ. ᤀᤠᤔᤧᤱᤔᤧᤱᤒᤠ ᤔᤏᤠᤜᤠ᤹ᤗᤠᤶ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤂᤧᤏᤡ᤹ ᤗᤳᤇᤠ ᤛᤧ᤺ᤵᤛᤡᤱᤔᤠᤍᤧᤴ ᤐᤥ᤺ᤰᤂᤧ ᤀᤠᤒᤡᤖᤧ᤹ᤀᤥ॥” ᤕᤠᤵᤔᤡ ᤋᤢᤰᤂᤣ ᤁᤧᤈᤠ᤺ᤵᤐᤠ ᤔᤏᤠᤜᤠ᤹ ᤀᤠᤸᤗ ᤜᤠᤖᤠᤀᤣ ᤔᤧᤔᤧᤰᤁᤠᤱ ᤋᤢᤰᤂᤣ ᤛᤡᤔᤠ ᤔᤧᤰᤔᤠ ᤔᤧᤒᤥᤱᤏᤧᤴᤗᤥ. ᤕᤠᤵᤔᤡ ᤏᤡᤱᤄᤢᤶ ᤋᤢᤰᤂᤣ ᤁᤧᤈᤠ᤺ᤵᤐᤠᤜᤠ᤹ ᤗᤠᤈᤣ᤹ᤗᤠᤶ ᤔᤧᤔᤠ ᤔᤧᤒᤣ᤺ᤰᤗᤥ॥

⁵ ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤍᤠᤀᤢᤍᤖᤧ ᤁᤢᤜᤡᤶᤛᤕᤱᤅᤥᤗᤠᤶ ᤗᤳᤇᤠ ᤔᤏᤠᤎᤡᤰ ᤜᤠᤱ ᤆᤥᤃᤢᤖᤥ. ᤜᤧᤰᤁᤩᤠᤱ ᤂᤧᤴ ᤜᤠᤱᤅᤡᤴ ᤏᤛᤠ᤺ᤴᤛᤠᤒᤠ ᤐᤥᤱᤅᤠᤱ ᤆᤰᤔᤧᤸᤗ᤹ᤀᤣ ᤁᤢᤔᤏᤠᤜᤠ᤹ ᤗᤢᤱᤔᤠ᤹ ᤋᤢᤰᤋᤢᤛᤡᤖᤥ ᤂᤧᤒᤩᤠᤱ ᤁᤢᤍᤥ᤺ᤵᤔᤠ ᤂᤠᤛᤧᤴ ᤗᤥ᤺ᤴᤍᤢ ᤐᤡᤖᤢᤛᤡᤖᤥ॥ ᤁᤢᤍᤥ᤺ᤵᤔᤠ ᤕᤠ᤺ᤶᤒᤰᤜᤠ᤹ ᤂᤧᤸᤗᤧ ᤂᤡᤔᤥ ᤆᤥᤃᤢᤍᤣᤛᤢᤖᤥ ᤂᤧᤶᤒᤩᤠᤱ ᤁᤢᤍᤥ᤺ᤵᤔᤠ ᤂᤠᤛᤧᤴ ᤐᤥᤱᤗ ᤕᤠ᤺ᤴᤍᤢᤖᤥ॥

ᤔᤥᤀᤠᤒ ᤁᤧᤕᤢᤱᤒᤠ ᤔᤏᤠᤜᤠ᤹ ᤕᤶᤒᤠ ᤔᤧᤗᤧᤱᤛᤡᤱ

⁶ ᤕᤜᤢᤍᤠᤒᤠ ᤔᤏᤠᤜᤠ᤹ᤖᤧ ᤔᤧᤒᤠ᤺ᤳᤋᤢᤖᤥ. “ᤔᤥᤀᤠᤒᤒᤠ ᤔᤏᤠᤜᤠ᤹ ᤕᤶᤒᤠ ᤔᤧᤗᤧᤱᤛᤡᤱ ᤁᤧᤗ᤹ᤒᤧᤴ ᤂᤧᤵᤛᤢᤶᤒᤧᤀᤠᤱ ᤘᤠ᤹ᤖᤥ. ᤁᤴ ᤗᤠᤈᤣ᤹ᤀᤥ ᤁᤧᤕᤢᤱᤒᤠᤜᤠ᤹ ᤀᤠᤱᤍᤡᤱ ᤔᤧᤗ᤹ᤀᤠᤱ ᤗᤠᤱᤔᤧᤄᤣ᤺ᤰᤗᤥ. ᤁᤖᤛᤠᤱ ᤂᤧᤱᤜᤠ᤹ ᤌᤣᤏᤠᤎᤣᤖᤰ ᤕᤶᤒᤠ ᤔᤧᤗᤧᤱᤛᤡᤱᤅᤠᤱ ᤔᤧᤘᤠ᤹ᤖᤥ॥”

⁷ ᤂᤧᤸᤗᤧᤆᤥᤃᤢᤸᤗᤧ ᤔᤥᤀᤠᤒᤡᤜᤠ᤹ ᤔᤧᤖᤡᤱ ᤔᤧᤎᤰᤗᤥ. ᤂᤧᤱᤜᤠ᤹ ᤛᤥᤛᤥᤖᤡᤰ ᤗᤳᤇᤠ ᤔᤧᤒᤥᤱᤅᤠᤱ ᤔᤥᤀᤠᤒᤒᤠ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤔᤧᤜᤠ᤺ᤵ ᤔᤧᤈᤡ᤺ᤱᤗᤥ॥ ᤁᤡᤖ-ᤜᤖᤣᤛᤣᤋᤀᤥ ᤔᤧᤈᤒᤠ ᤁᤢᤈᤠ ᤁᤧᤏᤢ᤹ᤒᤠ ᤁᤢᤜᤣᤍᤩᤠ᤹ ᤆᤧᤸᤗᤧᤰᤛᤣᤴ ᤏᤢ ᤘᤣ᤹ ᤁᤢᤈᤠᤜᤠ᤹ ᤏᤡᤱᤘᤠ᤹ ᤔᤧᤀᤡ᤺ᤳᤋᤢᤀᤠᤱ ᤔᤧᤜᤠ᤺ᤵᤗᤥ॥

⁸ ᤜᤣᤛ᤻ᤒᤥᤏᤒᤠ ᤐᤩᤠᤱᤛᤡᤃᤧᤴ ᤀᤡᤰᤋᤠᤵᤜᤠ᤹ ᤏᤢ ᤛᤡᤒ᤻ᤔᤠᤒᤠ ᤆᤧᤸᤗᤧᤰᤛᤣ᤹ᤀᤡᤸᤗᤧ ᤁᤢᤒᤢᤱᤜᤠ᤹ᤀᤠᤱ ᤀᤡᤗᤧᤶᤗᤥ॥ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤔᤧᤴᤇᤠᤶ ᤛᤢᤘᤠᤱᤛᤔᤠ ᤕᤢᤰᤛᤠᤒᤠᤜᤠ᤹ᤖᤧ ᤂᤧᤴ ᤏᤢ᤺ᤒ᤻ᤏᤢᤒᤠ ᤆᤧᤸᤗᤧᤰᤛᤣᤸᤗᤧ ᤁᤢᤒᤢᤱᤜᤠ᤹ ᤗᤠᤱᤅᤡᤸᤗᤧ ᤆᤡᤖᤠᤰ ᤆᤡᤖᤠᤰ ᤔᤧᤗᤠ᤺ᤰᤋᤢᤀᤠᤱ ᤏᤧᤛ᤻ᤛᤧᤖᤥ॥ ᤂᤧᤴ ᤆᤧᤸᤗᤧᤰᤛᤣᤸᤗᤧ ᤁᤢᤍᤠᤵᤜᤠ᤹ ᤋᤃᤡᤃ ᤕᤠᤈᤣᤖ ᤌᤠᤖᤡᤰ ᤁᤧᤖᤧᤀᤠᤱ ᤏᤧᤛ᤻ᤛᤧᤖᤥ. ᤜᤧᤰᤁᤩᤠᤱ ᤔᤢᤖᤧᤰ ᤂᤠᤖᤧᤰᤐᤠ ᤕᤧ᤺ᤱᤄᤠᤍᤧᤴᤏᤥ ᤌᤠᤖᤡᤰᤁᤣ ᤋᤠᤒᤧᤀᤠᤱ ᤏᤧᤛ᤻ᤛᤧᤖᤥ॥ ᤂᤧᤸᤗᤧ ᤁᤢᤈ᤺ᤰᤁᤡᤴ ᤁᤧᤖᤧᤰ ᤐᤡᤛᤠᤱ ᤛᤧᤖᤧᤀᤠᤱ ᤕᤢᤶᤗᤠ᤺ᤱ ᤘᤖ᤺ᤱ ᤏᤠᤎᤠ᤺ᤶᤒᤡ ᤌᤠᤖᤡᤰ ᤁᤧᤖᤧᤀᤠᤱ ᤏᤧᤛ᤻ᤛᤧᤖᤥ॥

⁹ ᤁᤸᤗᤧᤆᤥᤃᤢᤸᤗᤧ ᤀᤠᤸᤗ ᤛᤡᤒ᤻ᤔᤠᤒᤠ ᤆᤧᤸᤗᤧᤰᤛᤣ᤹ ᤀᤡᤰᤁᤧᤸᤗᤧ ᤁᤢᤗᤠᤃᤡ ᤕᤠᤈᤣᤖᤧᤴ ᤜᤠ᤺ᤵᤐᤠ ᤁᤢᤀᤡᤛᤡᤰ ᤀᤠᤱᤃᤠ᤹ ᤜᤠ᤺ᤵᤀᤧᤖᤥ॥ ᤜᤣᤛ᤻ᤒᤥᤏ ᤏᤢ ᤀᤣᤗᤠᤗᤧ ᤗᤠᤃᤡ ᤀᤠᤱᤃᤠ᤹ ᤀᤠᤔᤡᤰᤘᤠ ᤋᤧᤖᤧᤖᤧ ᤌᤠᤵᤗᤥ᥄ ᤌᤣᤀᤠᤱᤓᤧᤸᤗᤧ ᤔᤏᤠᤜᤠ᤹ ᤔᤧᤛ᤺ᤳᤗ ᤁᤧᤕᤠ᤺ᤶᤒᤠ ᤆᤠᤛᤢᤶᤔᤠ ᤕᤧᤶ ᤜᤥᤵᤗᤥ॥

¹⁰ ᤀᤠᤸᤗ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤛ᤺ᤵᤔᤠ ᤏᤢ ᤀᤣ᤺ᤵᤔᤧᤴ ᤐᤣᤖᤥ. ᤆᤧᤸᤗᤧᤰᤛᤣ᤹ ᤀᤡᤰᤋᤠᤵᤐᤥ ᤜᤠ᤺ᤳᤋᤠᤱ ᤛᤠᤶᤔᤧᤗᤥᤏᤧᤴᤗᤥ. ᤜᤠ᤺ᤳᤋᤠᤱ ᤔᤧᤀ᤺ᤰᤏᤧᤴᤗᤥ॥ ᤆᤧᤸᤗᤧᤰᤛᤣ᤹ ᤀᤣ᤺ᤶᤔᤠᤍᤧᤴᤏᤥ ᤜᤠ᤺ᤳᤗᤧᤀᤠᤱ ᤆᤧᤸᤗᤧᤰᤛᤣᤴ ᤔᤧᤀᤣ᤺ᤵᤛᤢᤴᤗᤥ॥ ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤛ᤺ᤵᤔᤠ ᤀᤡᤰᤗᤠᤴ ᤀᤠᤱᤃᤠ᤹ ᤛᤠᤰᤋᤢᤱ ᤐᤡᤖᤢᤱᤛᤡᤱᤅᤠᤱ ᤘᤠ᤹ᤖᤥ॥

¹¹ ᤀᤠᤱᤃᤠ᤹ ᤀᤠᤏᤡᤱᤘᤠᤴ ᤔᤥᤀᤠᤒᤖᤧ ᤁᤢᤗᤠᤃᤡ ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤛᤡᤰᤗᤢᤱᤔᤧᤴ ᤁᤡᤖ-ᤜᤖᤣᤛᤣᤋᤖᤧ ᤁᤢᤗᤠᤃᤡ ᤀᤴᤔᤣ ᤂᤡᤱᤔᤏᤠᤒᤠ ᤋᤢᤱᤏᤠ᤺ᤴ ᤜᤧᤰᤁᤣ ᤜᤠ᤺ᤵᤗ ᤜᤠ᤺ᤵᤗ ᤔᤧᤖᤡᤱ ᤌᤰᤗᤥ॥

¹² ᤔᤥᤀᤠᤒ ᤁᤧᤕᤢᤱᤒᤠ ᤔᤏᤠᤜᤠ᤹ ᤐᤏᤠ ᤔᤧᤏᤠᤖ ᤁᤣ᤺ᤶᤒᤠ ᤁᤥ᤺ᤰᤔᤠᤸᤗᤧ ᤁᤢᤈᤱᤜᤠ᤹ᤀᤥ ᤏᤠᤘᤠᤀᤡᤳᤗᤠ ᤛᤧᤘᤠ ᤔᤧᤳᤇᤧ ᤔᤧᤒᤣ᤺ᤰᤗᤥ॥ ᤏᤠᤘᤠᤀᤡᤳᤗᤠ ᤕᤢᤰᤏᤠᤍᤧᤴᤏᤥ ᤐᤣᤗᤡ ᤑᤠᤰᤛᤧ ᤁᤧᤒᤣ᤺ᤰᤐᤠᤜᤠ᤹ᤖᤧ ᤌᤣᤀᤠᤱ ᤁᤢᤓᤠ᤹ ᤔᤧᤱᤄᤥᤛᤢᤴᤗᤥ॥

¹³ ᤁᤧᤒᤣ᤺ᤰᤐᤠ ᤕᤧᤶᤔᤥ ᤋᤃᤡᤛᤠ ᤕᤜᤘᤣ ᤍᤠᤱᤒᤧᤸᤗᤧ ᤁᤴ ᤐᤠ᤺ᤴᤏᤡᤴ ᤔᤥᤀᤠᤒᤖᤧ ᤁᤢᤕᤠ᤺ᤶᤒᤣᤀᤥ ᤐᤠ᤺ᤳᤋᤢᤀᤠᤱ ᤘᤕᤧ॥

¹⁴ ᤁᤖ ᤀᤠᤸᤗ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢ᤹. “ᤋᤱᤒᤣ᤹ ᤛᤢᤶᤛᤡ ᤗᤧᤵ ᤁᤧᤳᤋᤡᤸᤗᤧᤛᤠ ᤔᤥᤀᤠᤒ ᤗᤠᤈᤣ᤹ᤀᤥ ᤁᤧᤕᤢᤱᤒᤠᤜᤠ᤹ᤖᤧ ᤂᤢᤴᤇᤡ᤹ ᤕᤠᤱᤛᤠᤁᤢᤴᤎᤣᤴ ᤜᤍ᤹ ᤔᤧᤰ. ᤜᤧᤰᤁᤩᤠᤱ ᤁ᤹ᤕᤥ ᤁᤧᤕᤢᤱᤒᤠ ᤔᤏᤠᤜᤠ᤹ ᤔᤧᤴᤎᤢᤶᤔᤏᤠᤒᤠ ᤔᤧᤒᤥᤱᤅᤠᤱ ᤆᤒᤧ᤺ᤳᤇᤡᤰᤗᤰ ᤔᤧᤜᤡᤱ ᤔᤧᤕᤠ᤺ᤰᤗᤥ॥”