ᤕᤛᤤᤕᤠ 15 - LIFOTNT

ᤔᤥᤀᤠᤒ ᤗᤠᤈᤣ᤺ᤸᤗᤧ ᤁᤢᤍᤰᤗᤧᤱᤘᤠᤀᤥ ᤔᤠᤱᤏᤡᤱᤘᤠ᤹ᤐᤠᤴ

¹ ᤔᤥᤀᤠᤒ ᤗᤠᤈᤣ᤺ᤸᤗᤧ ᤁᤢᤍᤰᤗᤧᤱᤘᤠᤀᤥ ᤔᤠᤱᤏᤡᤱᤘᤠ᤹ᤐᤠᤴ— ᤌᤡᤰ ᤛᤧᤴᤍᤡᤰᤗᤧᤛᤠ ᤀᤠᤖ ᤕᤧᤰᤕᤰᤁᤡᤴ ᤔᤢᤖᤧᤰ ᤂᤠᤖᤧᤰ ᤏᤢ ᤂᤠᤵᤐᤢᤌᤩ᤺ᤱ ᤐᤥ᤺ᤰᤂᤧᤖᤥ᥄ ᤌᤡᤰ ᤛᤧᤴᤍᤡᤰᤗᤧᤛᤠ ᤁᤡᤖ ᤐᤠᤱᤈᤢᤶᤔᤡᤴ ᤆᤡᤈᤡ ᤂᤰᤂᤰ ᤐᤥ᤺ᤰᤂᤧ ᤜᤧᤰᤁᤩᤠᤱ ᤔᤧᤃᤧᤖᤥ॥

² ᤍᤡᤒᤥᤏ ᤁᤧᤕᤢᤱᤒᤠ ᤁᤧᤔᤏᤠᤜᤠ᤹ ᤔᤧᤖᤡᤱ ᤌᤰᤔᤠᤖᤧ ᤗᤠᤃᤡ ᤁᤣ᤺ᤶᤒᤠ ᤁᤥ᤺ᤰᤔᤠᤜᤠ᤹ᤀᤥ ᤁᤧᤏᤧᤒᤠ ᤂᤢᤴᤇᤡ᤹ ᤔᤠᤱᤜᤡᤶᤔᤥ ᤌᤥ ᤔᤧᤒᤣᤖᤥ. ᤏᤣᤒᤥ ᤏᤢ ᤔᤣᤍᤒᤠ ᤕᤧᤰᤕᤰ ᤁᤧᤕᤢᤱᤒᤠ ᤔᤏᤠᤜᤠ᤹ᤖᤧ ᤗᤠᤃᤡ ᤔᤥᤀᤠᤒ ᤁᤧᤕᤢᤱᤒᤠᤜᤠ᤹ ᤀᤢ᤺ᤰᤁᤠᤱ ᤀᤢ᤺ᤰ ᤔᤧᤜᤠ᤺ᤵᤗᤥ॥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤌᤧᤃᤣ᤺ᤰᤜᤠ᤹ ᤁᤧᤖᤧᤰ ᤔᤧᤏ᤺ᤰᤂᤢᤀᤠᤱ ᤔᤧᤘᤠ᤹ᤖᤥ ᤂᤧᤒᤩᤠᤱ ᤂᤢᤴᤇᤡ᤹ ᤔᤢᤎᤥ᤹ᤜᤠ᤹ ᤂᤰᤐᤧᤳ ᤗᤡᤃᤥ᤹ ᤔᤧᤄᤰᤋᤢ ᤔᤧᤍᤣᤛᤢᤀᤠᤱ ᤔᤧᤘᤠ᤹ᤖᤥ॥

³ ᤔᤠᤖᤠᤶᤜᤠ᤹ᤀᤥ ᤂᤧᤱᤜᤠ᤹ ᤋᤠᤰᤔᤧᤃᤴᤏᤠᤱ ᤔᤧᤘᤠ᤹ᤀᤡᤸᤗᤧ ᤛᤠᤃᤡ ᤋᤣᤳ ᤔᤧᤈᤠᤰᤂᤢᤖᤥ॥ ᤂᤧᤱᤜᤠ᤹ ᤜᤡᤶᤜᤠ᤹ᤀᤥᤒᤠ ᤁᤦᤛᤡᤜᤠ᤹ᤀᤥ ᤏᤢ ᤗᤠᤶᤍᤥᤜᤠ᤹ᤀᤥ ᤔᤧᤜᤠ᤺ᤵᤗ ᤔᤧᤖᤡᤱ ᤔᤧᤎᤰᤗ ᤗᤧᤶᤒᤧᤳ ᤗᤧᤶᤒᤧᤳ ᤔᤧᤏᤧᤖᤥ॥

⁴ ᤜᤣᤛ᤻ᤒᤥᤏ ᤏᤢ ᤀᤣᤗᤠᤒᤠ ᤔᤏᤠᤜᤠ᤹ ᤕᤶᤒᤠ ᤀᤡᤰᤗᤠᤀᤥ ᤀᤢ᤺ᤰᤁᤠᤱ ᤀᤢᤰ ᤔᤧᤜᤠ᤺ᤵᤗᤥ॥ ᤂᤧᤱᤜᤠ᤹ ᤔᤧᤜᤠ᤺ᤵᤐᤠ ᤀᤡᤰᤗᤠᤴ ᤕᤜᤛᤠ ᤌᤠᤖᤡᤰᤁᤣ ᤂᤧᤶᤍᤧᤳᤗᤥ ᤂᤧᤸᤗᤧᤆᤥᤃᤢᤸᤗᤧ ᤔᤥᤀᤠᤒ ᤁᤧᤕᤢᤱᤒᤠ ᤑᤧᤈᤢᤶᤓᤧᤕᤠ ᤁᤧᤜᤣᤒᤠᤜᤠ᤹ ᤕᤶᤒᤠ ᤀᤡᤰᤗᤠᤀᤥ ᤔᤧᤜᤠ᤺ᤵᤗᤥ. ᤜᤧᤰᤁᤩᤠᤱ ᤌᤡᤰ ᤛᤧᤴᤍᤡᤰᤗᤧᤛᤠ ᤂᤧᤱᤜᤠ᤹ ᤂᤢᤴᤇᤡ᤹ ᤛᤠᤶᤔᤡᤰᤗᤧ ᤗᤧᤖᤢᤛᤡᤖᤥ॥

⁵ ᤔᤥᤀᤠᤒᤖᤧ ᤁᤢᤗᤠᤃᤡ ᤀᤠᤱᤃᤠ᤹ ᤀᤠᤏᤡᤱᤘᤠᤴ ᤜᤠ᤺ᤵᤗᤥ. ᤌᤣᤀᤠᤱᤓᤧᤸᤗᤧ ᤁᤴ ᤔᤥᤀᤠᤒ ᤁᤧᤕᤢᤱᤒᤠ ᤀᤵᤔᤡᤒᤠᤜᤠ᤹ ᤛᤥᤀᤖ ᤌᤠᤖᤡᤰ ᤏᤢ ᤀᤣᤃ᤻ᤗᤋ-ᤛᤗᤡᤛᤡᤕᤠ ᤌᤠᤖᤡᤰᤁᤣ ᤔᤧᤄᤧᤳᤇᤡᤱᤅᤠᤱ ᤔᤧᤒᤣ᤺ᤰᤗᤥ॥ ᤗᤢᤜᤡᤋᤒᤠ ᤌᤠᤶᤔᤠᤱᤒᤠ ᤗᤠᤶᤔᤥ ᤂᤧᤱᤜᤠ᤹ ᤔᤧᤜᤠ᤺ᤵᤗ ᤔᤧᤎᤥ᤺ᤰᤛᤡᤱᤗᤥ ᤜᤧᤰᤁᤩᤠᤱ ᤜᤥᤖᤥᤏᤤᤔᤒᤠ ᤗᤠᤶᤔᤥ ᤂᤧᤱᤜᤠ᤹ᤖᤧ ᤀᤠᤒᤠᤅᤣ ᤂᤢᤴᤇᤡ᤹ ᤔᤧᤰᤔᤠ ᤛᤡᤔᤧᤴᤗᤧ ᤁᤢᤕᤠ᤺ᤶᤒᤣ᤹ᤀᤥ ᤔᤧᤖᤡᤱ ᤔᤧᤎᤰᤗᤥ॥

⁶ ᤏᤡᤔᤪᤡᤔᤀᤥᤒᤠ ᤂᤖ᤺ᤰᤘᤠᤴ ᤆᤵᤐᤪᤧᤰ ᤆᤵᤋᤢᤖᤥ. ᤜᤧᤰᤁᤩᤠᤱ ᤕᤠ᤺ᤴᤛᤢᤱᤜᤠ᤹ ᤀᤡᤖᤧᤔᤧᤖᤥ॥ ᤐᤥ᤺ᤰᤗᤠ-ᤛᤡᤱᤒᤢᤱ ᤂᤠᤵᤐᤢᤌᤩ᤺ᤱ ᤐᤥ᤺ᤰᤂᤧᤖᤥ. ᤗᤣ᤺ᤳᤋᤠᤱᤒᤠ ᤔᤧᤵᤔᤏᤠᤒᤠ ᤌᤣᤀᤠᤱ ᤜᤥᤵᤗᤥ॥

⁷ ᤂᤧᤸᤗᤧᤆᤥᤃᤢᤸᤗᤧ ᤂᤧᤱᤜᤠ᤹ᤖᤧ ᤔᤧᤄᤥᤛᤢᤒᤠ ᤕᤠᤱᤛᤠᤁᤢᤴᤎᤣ᤺ᤴ ᤏᤢ ᤂᤧᤱᤜᤠ᤹ᤖᤧ ᤔᤧᤗᤢᤵᤛᤢᤒᤠ ᤕᤠᤱᤛᤠᤁᤢᤴᤎᤣ᤺ᤴ ᤔᤧᤕᤠᤱᤛᤡᤱᤅᤠᤱ ᤐᤡᤐᤥᤖ ᤐᤥ᤺ᤰᤗᤠ ᤁᤧᤏᤧᤒᤠ ᤂᤖ᤺ᤰᤘᤠ ᤏᤠᤎᤠ᤺ᤶᤒᤡ ᤔᤧᤍᤣ᤹ᤖᤢᤖᤥ॥

⁸ ᤜᤧᤰᤁᤩᤠᤱ ᤂᤧᤱᤜᤠ᤹ ᤔᤧᤜᤠ᤺ᤵᤐᤠ ᤀᤡᤰᤗᤠᤴ ᤔᤥᤀᤠᤒ ᤗᤠᤈᤣ᤹ᤒᤠ ᤀᤡ᤺ᤴᤍᤥᤀᤥ ᤁᤧᤕᤢᤱᤒᤠᤜᤠ᤹ᤖᤧ ᤔᤧᤄᤧᤵᤛᤢᤖᤥ॥ ᤂᤧᤱᤜᤠ᤹ ᤔᤧᤖᤡᤱ ᤔᤧᤎᤰᤐᤠ ᤜᤠ᤺ᤶᤗᤠᤰᤘᤠᤴ ᤀᤣᤃ᤻ᤗᤤᤔ ᤌᤠᤖᤡᤰ ᤏᤢ ᤂᤧᤱᤜᤠ᤹ ᤏᤡᤱᤛᤠᤶ ᤔᤧᤈᤥ᤺ᤰᤐᤠ ᤐᤠ᤺ᤴᤏᤡᤴ ᤒᤣᤀᤖ-ᤀᤣᤗᤡᤔ ᤌᤠᤖᤡᤰᤁᤣ ᤁᤧᤖᤧᤀᤠᤱ ᤘᤠ᤹ᤖᤥ॥

⁹ ᤍᤡᤒᤥᤏᤒᤠ ᤂᤖ᤺ᤰᤘᤠ ᤘᤜ᤺ᤱᤅᤡᤴ ᤔᤠᤰᤂᤡᤸᤗᤧ ᤋᤡᤶᤛᤧᤀᤠᤱ ᤏᤧᤖᤥ. ᤁᤖ ᤀᤠᤱᤃᤠ᤹ ᤂᤧᤴᤏᤢ᤺ᤸᤗᤧᤀᤠᤱ ᤁᤧᤛᤠᤰᤐᤠ ᤋᤢᤰᤂᤣ ᤗᤠᤰᤂᤣᤜᤠ᤹ ᤍᤡᤒᤥᤏ ᤕᤧᤰᤕᤰᤁᤥ ᤋᤠᤖᤢᤱᤗᤥ॥ ᤔᤥᤀᤠᤒᤒᤠ ᤘᤧᤵᤔᤡᤒᤠᤜᤠ᤹ᤖᤧ ᤂᤢᤴᤇᤡ᤹ ᤛᤶᤍᤠᤱ ᤂᤧᤒᤩᤠᤱ ᤁᤧᤜᤡᤱᤒᤠ ᤁᤧᤕᤠ᤺ᤰᤐᤠᤜᤠ᤹ᤖᤧ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤛᤶᤎᤠᤱ ᤀᤠᤱᤃᤠ᤹ ᤗᤳᤇᤠ ᤁᤣᤒᤠᤎᤡᤰ ᤐᤠᤱᤄᤢᤱᤗᤥ॥