ᤕᤛᤤᤕᤠ 14 - LIFOTNTᤔᤧᤍᤧᤶᤛᤢ ᤔᤧᤍᤣ᤹ᤖᤢᤛᤡᤒᤠ ᤀᤡᤛᤪᤠᤀᤡᤗᤡᤜᤠ᤹ ᤔᤧᤏᤢ᤺ᤱ 1 ᤁᤖ ᤕᤜᤘᤣ ᤍᤠᤱᤒᤧᤸᤗᤧ ᤕᤠᤶᤔᤥ ᤌᤡᤰᤗᤧᤱ ᤕᤠᤁᤢᤒᤖᤧ ᤁᤢᤔᤢ᤹ᤀᤡᤍᤠᤱᤛᤠᤜᤠ᤹ ᤗᤢᤱᤔᤠ᤹ ᤋᤢᤰᤋᤢᤛᤡᤖᤥ॥ ᤜᤧᤰᤁᤩᤠᤱ ᤀᤡᤛᤪᤠᤀᤡᤗᤡ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤕᤠᤶᤔᤥ ᤌᤡᤰᤗᤧᤱ ᤂᤢᤏᤧ᤹ ᤁᤢᤔᤏᤠ ᤐᤥᤱᤛᤧ ᤛᤣᤃᤢᤛᤡᤖᤥ॥ ᤕᤜᤘᤣ ᤍᤠᤱᤒᤧᤸᤗᤧ ᤂᤧᤱᤜᤠ᤹ ᤕᤠᤶᤔᤥ ᤀᤠᤒᤠᤅᤣ ᤂᤢᤴᤇᤡ᤹ ᤗᤠᤈᤣ᤹ᤀᤥ ᤕᤢᤱᤛᤧ ᤋᤠᤖᤢᤛᤡᤖᤥ॥ ᤜᤧᤰᤁᤩᤠᤱ ᤕᤖᤡᤰ ᤘᤣ᤹ ᤘᤣ᤹ ᤗᤠᤈᤣ᤹ᤜᤠ᤹ᤗᤠᤶ ᤔᤏᤠᤜᤠ᤹ ᤔᤧᤍᤠᤀᤠᤱ ᤂᤧ᤹ᤕᤥ ᤔᤧᤓᤢᤱᤛᤡᤱᤗᤥ ᤜᤧᤰᤁᤩᤠᤱ ᤀᤡᤛᤪᤠᤀᤡᤗᤒᤠ ᤔᤏᤠᤜᤠ᤹ᤏᤢ ᤂᤢᤴᤇᤡ᤹ ᤌᤡᤰᤜᤢᤵ ᤔᤧᤒᤥᤱᤗᤥ॥ 2 ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤁᤥᤒᤠ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤏᤠᤜᤠ᤹ ᤏᤢ᤺ᤱᤔᤠ ᤐᤣ᤺ᤰᤔᤠ ᤔᤧᤓᤠ᤹ᤖᤢᤛᤡᤖᤥ. ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤈᤣ᤹ᤀᤥ ᤕᤢᤱᤛᤧ ᤁᤧᤍᤠᤒᤠ ᤔᤏᤠᤜᤠ᤹ᤖᤧ ᤀᤡᤛᤪᤠᤀᤡᤗᤡᤜᤠ᤹ ᤛᤧᤘᤠ ᤔᤧᤔᤧᤳᤋᤢᤛᤡᤀᤠᤱ ᤕᤠ᤺ᤶᤒᤰ ᤔᤧᤈᤥᤃᤢ ᤔᤧᤒᤡᤖᤢᤛᤡᤖᤥ॥ ᤂᤧᤴ ᤀᤡᤛᤪᤠᤀᤡᤗᤡᤜᤠ᤹ ᤁᤧᤍᤧᤶᤒᤠ ᤁᤧᤄᤣ᤺ᤱᤒᤠᤜᤠ᤹ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤔᤧᤍᤧᤶᤛᤢ ᤔᤧᤄᤣ᤺ᤰᤂᤢᤛᤡᤖᤥ. ᤂᤧᤒᤩᤠᤱ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤏᤡᤱᤔᤡᤜᤠ᤹ ᤛᤶᤎᤠᤱ ᤕᤢᤰ ᤔᤧᤈᤥᤃᤢᤖᤥ॥ ᤒᤣᤒᤡᤗᤥᤏᤒᤠ ᤜᤠᤱᤜᤠ᤹ ᤔᤧᤛ᤻ᤛᤡ᤹᤺ 3 ᤕᤜᤘᤣ ᤍᤠᤱᤒᤧᤸᤗᤧ ᤀᤡᤛᤪᤠᤀᤡᤗᤒᤠ ᤔᤏᤠᤜᤠ᤹ ᤂᤧᤱᤜᤠ᤹ᤖᤧ ᤔᤧᤍᤢᤔᤢᤒᤠ ᤋᤢᤰᤂᤣ ᤗᤠᤰᤂᤣ ᤏᤢ ᤁᤧᤛᤠᤰᤐᤠ ᤕᤠ᤺ᤶᤒᤰᤗᤠᤶ ᤛᤧ᤺ᤵᤋᤢᤛᤡᤖᤥ॥ 4 ᤁᤴ ᤕᤧᤴᤏᤡᤴ ᤋᤠ᤺ᤸᤗᤧ ᤂᤧᤱᤜᤠ᤹ᤖᤧ ᤒᤣᤒᤡᤗᤥᤏᤒᤠ ᤜᤠᤱᤅᤡᤴ ᤀᤰᤂᤣ ᤔᤧᤔᤧᤳᤋᤢᤖ ᤁᤡᤏᤠ᤺ᤴᤍᤡ ᤔᤧᤒᤡᤖᤢᤖᤥ. “ᤛᤠ᤹ᤖᤡᤰ ᤁᤢ᤹ᤀᤡᤃᤧᤓᤧᤶᤒᤠ ᤜᤠᤱᤅᤡᤴ ᤆᤥ᤺ᤴᤍᤧᤖᤥ᥄ ᤂᤧᤸᤗᤧ ᤕᤠᤶᤔᤥ ᤀᤠᤳᤋᤡᤴᤜᤠ᤹ᤀᤠᤱ ᤋᤢᤰᤂᤣ ᤔᤧᤈᤠ᤺ᤳᤋᤢᤛᤡᤴᤗᤥ᥄ 5 ᤕᤜᤘᤣ ᤍᤠᤱᤒᤧᤸᤗᤧ ᤂᤧᤴ ᤁᤢ᤹ᤀᤡᤃᤧᤓᤧᤶᤒᤠ ᤜᤠᤱᤜᤠ᤹ᤖᤧ ᤂᤢᤴᤇᤡ᤹ ᤜᤠᤱᤋᤰᤁᤠ᤺ᤳᤋᤡᤴ ᤏᤢ ᤕᤢᤰᤛᤠᤒᤠᤜᤠ᤹ᤖᤧ ᤂᤢᤴᤇᤡ᤹ ᤋᤰᤁᤠ᤺ᤳᤋᤡᤴ ᤀᤧᤰᤂᤢ ᤐᤡᤖᤢᤛᤡᤖᤥ॥ 6 ᤂᤧᤴ ᤜᤠᤱᤜᤠ᤹ᤖᤧ ᤂᤢᤴᤇᤡ᤹ ᤛᤠᤰᤁᤧᤴ ᤐᤥ᤺ᤰᤔᤥ ᤔᤏᤠᤜᤠ᤹ ᤆᤰᤔᤧᤸᤗ᤹ᤀᤣ ᤔᤧᤜᤡᤵᤋᤢᤛᤡᤖᤥ. ᤜᤧᤰᤁᤩᤠᤱ ᤂᤢᤴᤇᤡ᤹ ᤔᤧᤏᤠ᤺ᤴᤍᤢᤛᤡᤒᤠ ᤗᤠᤈᤣ᤹ᤜᤠ᤹ ᤀᤠᤓᤧᤸᤗᤧᤛᤠᤱ ᤋᤢᤰᤂᤣ ᤆᤠ᤺ᤵᤔᤠ ᤔᤧᤸᤗᤧᤖᤢᤛᤡᤴᤗᤥ॥ 7 ᤀᤠᤸᤗᤥ ᤁᤢᤏᤢᤵᤔᤥᤃ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤁᤥᤒᤠ ᤁᤧᤖᤧᤰ ᤔᤏᤠᤜᤠ᤹ᤖᤧ ᤏᤠ᤺ᤶᤛᤡᤱᤔᤠ ᤏᤢ ᤛᤏᤠᤖᤢᤱ ᤔᤧᤄᤥᤛᤢᤀᤠᤱ ᤔᤧᤘᤠ᤹ᤖᤥ. ᤜᤧᤰᤁᤩᤠᤱ ᤂᤧᤱᤜᤠ᤹ ᤛᤠᤶᤔᤧᤗᤥᤖᤥ॥ 8 ᤀᤠ᤺ᤱᤜᤠ᤹ ᤏᤢ ᤗᤧᤒᤠᤏᤠᤏ ᤗᤠᤈᤣ᤹ᤀᤥᤒᤠ ᤛᤠᤶᤔᤠᤱᤛᤡᤱᤜᤠ᤹ ᤂᤧᤏᤧ᤹ᤏᤢ ᤀᤰᤂᤣ ᤔᤧᤗ᤹ᤖ ᤔᤧᤛ᤺ᤳᤗᤥ. ‘ᤂᤧᤏᤧ᤹ ᤁᤧᤶᤛᤥ᤺ᤴᤍᤧᤒᤠ ᤕᤧᤴᤏᤠᤱᤎᤥ ᤀᤠᤏᤡᤃᤣ ᤀᤠ᤺ᤳᤇᤧ ᤜᤠ᤺ᤳᤋᤠᤱ ᤔᤧᤴᤍᤠᤀᤣ ᤘᤠ᤹ᤖᤥ॥’ 9 “ᤒᤣᤒᤡᤗᤥᤏᤒᤠ ᤜᤠᤱᤅᤣ. ᤂᤧᤔᤠᤕᤱᤛᤱᤅᤡᤸᤗᤧ ᤁᤧᤗᤠᤶᤍᤠ᤺ᤰᤔᤠ ᤕᤠᤖᤡᤵ ᤆᤥᤃᤢᤖ ᤘᤠ᤹ᤖᤥ॥ ᤕᤖᤡᤰ ᤋᤱᤒᤣ ᤋᤃᤡ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤁᤥᤒᤠ ᤁᤧᤛᤡᤒᤠ ᤗᤠᤶᤗᤥᤒᤠᤜᤠ᤹ ᤂᤧᤏᤧ᤹ ᤀᤥᤔᤧᤵᤔᤠᤖᤧ ᤗᤠᤃᤡ ᤂᤧ᤹ᤕᤥ ᤔᤧᤘᤠ᤹ᤖᤥ. ᤜᤠᤱᤜᤠ᤹ᤖᤧ ᤂᤢᤴᤇᤡ᤹ ᤛᤡᤛᤠᤶᤜᤠ᤹ ᤜᤠᤱᤕᤢᤰᤏᤠᤗᤠᤶ ᤔᤧᤒᤥ᤺ᤰᤗ ᤔᤧᤒᤳᤗᤥ॥ 10 ᤂᤧᤱᤜᤠ᤹ ᤁᤧᤖᤧᤰ ᤌᤡᤰᤜᤢᤵ ᤔᤧᤒᤥᤱᤅᤠᤱ ᤔᤧᤒᤠ᤺ᤳᤋᤢᤖᤥ. ‘ᤀᤠᤸᤗ ᤂᤧᤏᤧ᤹ᤀᤠᤱ ᤀᤠᤏᤡᤃᤣ ᤁᤢᤀᤡᤛᤡᤰ ᤔᤧᤴᤎᤢᤶᤔᤏᤠᤒᤠ ᤁᤧᤒᤥᤰᤂᤧᤀᤠᤱ ᤁᤧᤘᤠ᤹ᤖᤥ. ᤂᤧᤏᤧ᤹ ᤀᤠᤏᤡᤃᤣ ᤜᤧᤰᤋᤱᤒᤠᤀᤣ ᤁᤧᤒᤥ᤺ᤰᤂᤧᤖᤥ॥’ 11 ᤋᤢ᤺ᤱᤃᤣ ᤔᤧᤔᤢᤰᤂᤢᤀᤠᤱ ᤂᤧᤏᤧ᤹ ᤔᤡᤱᤛᤥ ᤀᤡᤱᤎᤠᤱ ᤁᤧᤶᤒᤡᤖᤧᤀᤠᤱ ᤘᤕᤧᤖᤥ. ᤁᤖ ᤀᤠᤸᤗᤥ ᤂᤧᤏᤧ᤹ ᤂᤧᤔᤠ ᤕᤱᤛᤱᤅᤥ ᤁᤧᤃᤧᤖᤧᤀᤠᤱ ᤁᤧᤘᤠ᤹ᤖᤥ॥ ᤂᤠ᤹ᤘᤍᤡ᤺ᤰᤐᤧᤴ ᤁᤧᤏᤧᤳᤏᤠ ᤏᤢ ᤑᤣ᤹ᤒᤠ᤺ᤳᤋᤧᤴ ᤁᤧᤄᤠᤶᤍᤣᤳ ᤐᤥ᤺ᤰᤂᤧᤀᤠᤱ ᤘᤠ᤹ᤖᤥ॥ 12 “ᤂᤧᤏᤧ᤹ ᤒᤣᤒᤡᤗᤥᤏᤒᤠ ᤜᤠᤱ ᤋᤠᤏᤠᤶᤒᤠ ᤋᤠᤴᤇᤥ᤺ᤰᤐᤠ ᤜᤧᤰᤋᤱᤒᤠᤀᤣ. ᤋᤠᤏᤠᤶᤒᤠ ᤛᤠᤀᤣ. ᤛᤠᤱᤃᤪᤠᤶᤐᤣᤍᤠᤱ ᤌᤥᤗᤠᤶ ᤂᤧᤏᤧ᤹ ᤀᤠᤰᤂᤣᤀᤠᤱ ᤔᤰᤁᤧᤎᤩᤧᤀᤠᤱ ᤁᤧᤘᤠ᤹ᤒᤣ᥄ ᤋᤃᤡ ᤂᤧᤏᤧ᤹ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤁᤥᤒᤠ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤋᤢᤰᤂᤣ ᤁᤧᤈᤠ᤺ᤵᤐᤣ. ᤂᤧᤏᤧ᤹ ᤀᤠᤓᤣᤗ᤹ᤖᤡᤰ ᤂᤠᤶᤒᤠᤱᤅᤥ ᤗᤠᤵᤐᤢᤱ ᤁᤧᤎᤩᤧᤒᤣ᥄ 13 ᤌᤣᤀᤠᤱᤓᤧᤸᤗᤧ ᤂᤧᤏᤧ᤹ ᤀᤠᤒᤠᤅᤣ ᤁᤧᤏᤡᤱᤘᤠ᤹ᤀᤥ ᤀᤰᤂᤣ ᤁᤧᤒᤠ᤺ᤳᤋᤢᤀᤠᤱ ᤁᤧᤘᤕᤧᤖᤥ. ‘ᤀᤠᤱᤃᤠ᤹ ᤛᤠᤱᤃᤪᤠᤶᤐᤣᤍᤠᤱᤅᤥ ᤌᤥ ᤌᤥ᤺ᤰᤛᤡᤱᤅᤠᤖᤥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤄᤣᤛᤣ᤹ ᤁᤢᤄᤣ᤺ᤶᤛᤡᤰᤜᤠ᤹ᤏᤢ᤺ᤸᤗᤧᤀᤠᤱ ᤌᤠ᤺ᤱᤎᤠᤰ ᤀᤠᤜᤠᤱ ᤕᤢᤰᤏᤠᤴ ᤕᤢᤰᤂᤢᤱᤗᤥ॥ ᤁᤧᤖᤧᤰᤏᤢ᤺ᤸᤗᤧ ᤆᤴᤈᤶᤒᤠ ᤛᤣᤛᤣ ᤏᤠᤱᤈᤱᤗᤢᤱᤅᤡᤸᤗᤧ ᤁᤢᤈᤱᤅᤥᤏᤢ ᤆᤢᤶᤗᤢᤱ ᤆᤥ᤺ᤰᤔᤠᤍᤧᤴ ᤁᤥ᤺ᤰᤔᤠ ᤛᤶᤎᤠᤱ ᤀᤠᤱᤃᤠ᤹ ᤜᤠᤱᤕᤢᤰ ᤆᤥᤃᤢᤱᤗᤥ॥ 14 ᤀᤠᤱᤃᤠ᤹ ᤛᤠᤱᤃᤪᤠᤶᤐᤣᤍᤠᤱᤜᤠ᤹ᤏᤢ᤺ᤸᤗᤧᤀᤠᤱ ᤌᤥᤎᤥᤰ ᤐᤣ᤺ᤰᤁᤠᤖᤥ. ᤀᤠᤱᤃᤠ᤹ ᤁᤧᤖᤧᤰᤏᤢ᤺ᤸᤗᤧ ᤕᤶᤒᤠ ᤏᤡᤱᤘᤠ᤹ᤑᤢᤔᤠᤱ ᤁᤢᤀᤡᤛᤡᤰ ᤐᤥᤱᤅᤠᤖᤥ॥’ 15 ᤁᤖ ᤂᤧᤏᤧ᤹ᤃ ᤂᤧᤔᤠᤕᤱᤛᤱ ᤗᤢᤶᤒᤠ᤺ᤳᤋᤥ ᤌᤠᤖᤡᤰ ᤔᤰᤁᤧᤎᤩᤧᤀᤠᤱ ᤁᤧᤘᤠ᤹ᤖᤥ॥ 16 “ᤔᤏᤠᤜᤠ᤹ᤖᤧ ᤂᤧᤏᤧ᤹ ᤁᤧᤶᤏᤡᤀᤠᤱ ᤀᤍᤰᤋᤰᤏᤠ ᤀᤥᤃᤧᤶᤔᤧᤳᤗᤥ. ᤜᤧᤰᤁᤩᤠᤱ ᤂᤧᤏᤧ᤹ ᤁᤧᤕᤠ᤺ᤶᤒᤣᤀᤥ ᤔᤧᤀᤡ᤺ᤳᤇᤡᤱᤗ ᤔᤧᤀᤡ᤺ᤳᤇᤡᤱᤗ ᤔᤧᤒᤠ᤺ᤳᤋᤢᤖᤥ. ‘ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤁᤧᤴ ᤌᤢᤖᤢᤵᤗᤢᤵᤏᤠ ᤁᤧᤕᤱᤒᤠ ᤏᤢ ᤜᤠᤱᤜᤠ᤹ ᤔᤧᤕᤱᤗ ᤁᤧᤕᤠ᤺ᤶᤒᤠ 17 ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤧᤴ ᤔᤢᤖᤧᤰ ᤂᤠᤖᤧᤰᤐᤠ ᤕᤧ᤺ᤱᤄᤠᤍᤧᤴ ᤁᤧᤈᤥ᤺ᤰᤐᤠ. ᤜᤧᤰᤁᤩᤠᤱ ᤂᤧ᤹ᤕᤥ ᤁᤧᤏᤧᤒᤠ ᤕᤧᤰᤕᤰᤜᤠ᤹ ᤁᤧᤏᤠ᤺ᤶᤒᤠ ᤂᤧᤒᤩᤠᤱ ᤔᤧᤍᤧᤶᤛᤢ ᤔᤧᤍᤣ᤹ᤖᤢᤛᤡᤒᤠᤜᤠ᤹ ᤜᤡᤶᤔᤥ ᤐᤣ᤺ᤰᤔᤠ ᤔᤧᤶᤓᤠ᤺ᤰᤔᤏᤠᤒᤠ ᤔᤏᤠᤴ ᤜᤠᤒᤠ ᤁᤴ ᤔᤣ᤺ᤶᤒᤡ᥅’ 18 “ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤁᤥᤒᤠ ᤁᤧᤖᤧᤰ ᤜᤠᤱᤜᤠ᤹ ᤀᤠᤒᤠᤅᤣ ᤂᤢᤴᤇᤡ᤹ ᤏᤢ᤺ᤒ᤻ᤏᤢᤒᤠ ᤀᤡ᤺ᤵᤐᤢᤱᤜᤠ᤹ᤀᤥ ᤔᤧᤗᤠᤛᤧᤀᤠᤱ ᤔᤧᤏᤧᤖᤥ॥ 19 ᤁᤖ ᤂᤧᤏᤧ᤹ᤃ ᤁᤧᤏᤧᤔᤠᤍᤧᤴ ᤀᤡ᤺ᤵᤐᤢᤱᤅᤠᤱ ᤜᤥᤵᤗᤥ. ᤂᤧᤏᤧ᤹ ᤁᤧᤈᤣ ᤌᤰᤁᤡᤴ ᤁᤡᤒᤣ᤺ᤰᤗ ᤑᤠ᤹ᤀᤠᤱ ᤗᤠ᤺ᤰᤁᤠᤳ ᤗᤠᤵᤔᤧᤓᤢᤛᤢᤀᤠᤱ ᤏᤧᤖᤥ॥ ᤁᤴ ᤁᤧᤈᤣ ᤌᤰᤁᤧᤴ ᤌᤱᤅᤥ ᤔᤧᤛᤧᤖᤢᤛᤡᤒᤠ ᤌᤰᤛᤢᤒᤠᤜᤠ᤹ᤖᤧ ᤂᤢᤴᤇᤡ᤹ ᤆᤣ ᤌᤰᤜᤠ᤹ᤖᤧ ᤗᤢᤵᤋᤢᤀᤠᤱ ᤏᤧᤖᤥ॥ ᤁᤧᤖᤧᤰ ᤁᤧᤛᤡᤒᤠ ᤌᤰᤜᤠ᤹ ᤗᤢᤱᤅᤣ ᤗᤢᤱ ᤁᤧᤏᤧᤒᤠ ᤕᤠᤰᤐᤣ᤹ᤑᤡ᤺ᤵᤔᤥ ᤗᤠᤵᤔᤧᤓᤢᤛᤢᤛᤡᤀᤠᤱ ᤔᤧᤏᤧᤒᤠᤸᤗᤧ ᤆᤥᤃᤢᤸᤗᤧ ᤔᤏᤠᤜᤠ᤹ᤖᤧ ᤆᤡᤖᤠᤰ ᤆᤡᤖᤠᤰ ᤔᤧᤗᤠ᤺ᤰᤋᤢᤛᤡᤖᤥ॥ 20 ᤂᤧᤏᤧ᤹ ᤘᤣ᤹ᤜᤠ᤹ ᤜᤧᤰᤁᤣ ᤏᤢᤖᤡᤰᤁᤠᤱ ᤁᤧᤔᤧᤴᤗᤢᤵᤏᤧᤴᤗᤥ. ᤌᤣᤀᤠᤱᤓᤧᤸᤗᤧ ᤂᤧᤏᤧ᤹ ᤀᤠᤒᤠᤅᤣ ᤁᤧᤗᤠᤈᤣᤴ ᤂᤠᤵᤐᤢᤌᤩ᤺ᤱ ᤁᤧᤈᤥᤃᤢᤀᤠᤱ ᤏᤧᤖᤥ. ᤂᤧᤏᤧ᤹ ᤀᤠᤒᤠᤅᤣ ᤁᤧᤔᤏᤠᤜᤠ᤹ ᤁᤧᤛᤧᤖᤢᤛᤡᤀᤠᤱ ᤔᤧᤘᤠ᤹ᤖᤥ॥ ᤁᤢ᤹ᤀᤡᤁᤧᤓᤧᤶᤒᤧᤸᤗᤧ ᤁᤢᤔᤢ᤹ᤀᤡᤍᤠᤱᤜᤠ᤹ᤖᤧ ᤂᤢᤴᤇᤡ᤹ ᤔᤡᤱᤜᤠ᤹ ᤕᤠᤶᤔᤥ ᤀᤠᤓᤧᤸᤗᤧᤀᤠᤱ ᤔᤧᤴᤈᤧᤰᤂᤢᤴ ᤔᤧᤶᤒᤠ᤺ᤳᤋᤢᤴᤗᤥ॥ 21 ᤁᤴ ᤜᤠᤱᤅᤡᤸᤗᤧ ᤁᤢᤛ᤻ᤛᤠᤜᤠ᤹ ᤔᤧᤛᤧᤖᤢᤛᤡᤖᤖᤥ᥄ ᤌᤣᤀᤠᤱᤓᤧᤸᤗᤧ ᤁᤴᤜᤠ᤹ᤖᤧ ᤂᤢᤴᤇᤡ᤹ ᤌᤠ᤺ᤰᤌᤧᤒᤠᤜᤠ᤹ᤖᤧ ᤗᤠᤕᤥ ᤗᤠᤛᤥᤳ ᤔᤧᤈᤥᤃᤢᤀᤠᤱ ᤘᤕᤧᤖᤥ॥ ᤁᤴ ᤔᤏᤠᤜᤠ᤹ᤀᤥ ᤀᤠᤳᤋᤡᤴᤏᤠᤱ ᤁᤴ ᤗᤠᤈᤣ᤹ᤀᤥ ᤜᤠᤱᤕᤢᤰ ᤁᤧᤈᤥ᤺ᤰᤐᤠ ᤔᤧᤒᤥᤱᤏᤧᤸᤗᤖᤥ. ᤜᤧᤰᤁᤩᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤁᤡᤴ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤕᤧᤰᤕᤰᤜᤠ᤹ᤖᤧ ᤔᤧᤍᤡᤶᤏᤧᤸᤗᤖᤥ॥” ᤒᤣᤒᤡᤗᤥᤏ ᤕᤧᤰᤕᤰᤁᤡᤴ ᤂᤠᤵᤐᤢ ᤌᤩ᤺ᤱ ᤐᤥᤱ 22 ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤁᤴ ᤐᤠ᤺ᤴᤏᤡᤴ ᤀᤢᤘᤠ ᤆᤥᤃᤢᤀᤠᤱ ᤘᤠ᤹ᤖᤥ. “ᤀᤠᤱᤃᤠ᤹ ᤀᤠᤒᤠᤅᤣ ᤒᤣᤒᤡᤗᤥᤏᤒᤠ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤋᤰᤗᤧᤱᤘᤠᤀᤥ ᤐᤥᤃᤠᤱᤅᤠᤱ ᤘᤠ᤹ᤀᤠᤖᤥ᥄ ᤀᤠᤱᤃᤠ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤛᤠᤜᤠ᤹. ᤔᤧᤴᤇᤠ᤹ᤜᤠ᤹. ᤜᤧᤰᤁᤩᤠᤱ ᤆᤰᤔᤧᤴᤇᤠ᤹ᤜᤠ᤹ ᤂᤢᤏᤧ᤹ ᤁᤢᤜᤠᤱᤕᤢᤰᤏᤠᤀᤥ ᤀᤠᤑᤠᤸᤗᤧᤀᤠᤱ ᤕᤢᤱᤔᤠ ᤔᤧᤱᤄᤥᤏᤧᤸᤗ ᤑᤠ᤹ᤀᤠᤱ ᤔᤧᤰᤂᤢᤱᤛᤡᤱᤗᤥ॥” 23 ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤁᤴ ᤐᤠ᤺ᤴᤏᤡᤴ ᤐᤠ᤺ᤳᤋᤢᤀᤠᤱ ᤘᤠ᤹ᤖᤥ. “ᤀᤠᤱᤃᤠ᤹ ᤒᤣᤒᤡᤗᤥᤏ ᤕᤧᤰᤕᤰᤁᤧᤴ ᤀᤠᤜᤢᤶᤜᤢᤶᤒᤠ ᤗᤧᤰᤘᤠ ᤐᤥᤱᤗ ᤆᤥᤃᤢᤱᤗᤥ. ᤜᤧᤰᤁᤩᤠᤱ ᤂᤧ᤹ᤕᤥ ᤑᤰᤌᤡ᤺ᤶᤒᤠᤜᤠ᤹ ᤕᤠᤱᤔᤧᤎᤥ᤺ᤰᤗᤥ॥ ᤀᤠᤱᤃᤠ᤹ ᤒᤣᤒᤡᤗᤥᤏ ᤕᤧᤰᤕᤰᤁᤧᤴ ᤋᤠᤶᤍᤢ᤺ᤰᤂᤣ᤺ᤸᤗᤧ ᤋᤢ᤺ᤰᤔᤏᤠᤒᤠ ᤁᤢᤀᤡᤛᤡᤰ ᤁᤧᤖᤧᤰ ᤐᤠ᤺ᤴᤜᤠ᤹ ᤋᤢᤃᤢᤱᤍᤣᤛᤢᤱᤗᤥ॥” ᤀᤛ᤻ᤛᤢᤖ ᤗᤠᤈᤣᤴ ᤔᤧᤰ ᤁᤧᤗ᤹ᤒᤠ ᤔᤠᤱᤏᤡᤱᤘᤠ᤹ᤐᤠᤴ 24 ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤀᤠᤱ ᤔᤠᤱᤜᤧᤰᤛᤡᤱᤗᤥ. “ᤀᤠᤱᤃᤠ᤹ ᤏᤡᤱᤛᤣ᤺ᤰ ᤆᤥᤃᤢᤱᤅᤠᤱ ᤁᤧᤘᤠ᤹ᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤁᤧᤳᤗᤥ. ᤀᤠᤱᤃᤠ᤹ ᤆᤥ᤺ᤰᤔᤠ ᤏᤡᤱᤘᤠ᤹ ᤏᤡ᤺ᤴᤎᤥ ᤆᤥᤃᤢᤱᤒᤠ ᤁᤢᤀᤡᤛᤡᤰ ᤐᤥᤱᤗᤥ॥ 25 ᤀᤠᤱᤃᤠ᤹ ᤀᤠᤗᤠᤈᤣ᤹ ᤀᤡᤛᤪᤠᤀᤡᤗᤀᤥᤀᤣ ᤀᤛ᤻ᤛᤢᤖᤒᤠ ᤌᤰᤛᤢᤒᤠᤜᤠ᤹ ᤔᤧᤰᤂᤢᤱᤛᤡᤱᤗᤥ. ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤃᤥ᤺ᤰᤔᤠ ᤑᤠᤱᤈᤱ ᤌᤧᤃᤢ ᤔᤠᤱᤘᤠᤜᤠ᤹ᤀᤥ ᤂᤧᤱᤜᤠ᤹ ᤆᤡᤖᤠᤰ ᤆᤡᤖᤠᤰ ᤗᤠ᤺ᤰᤋᤢᤱᤛᤡᤱᤗᤥ॥ ᤂᤧᤱᤜᤠ᤹ᤖᤧ ᤀᤠᤱᤃᤠ᤹ ᤀᤠᤔᤏᤠᤜᤠ᤹ ᤔᤧᤃᤢ᤺ᤳᤋᤢᤛᤡᤒᤠ ᤐᤗᤡ᤺ᤵ ᤁᤧᤗᤡ᤺ᤵᤐᤠ ᤁᤰᤜᤠ᤹ ᤂᤧᤳᤋᤢᤱᤅᤠᤱ ᤆᤥ᤺ᤰᤕᤢᤶᤓᤥ ᤐᤡᤖᤢᤱᤛᤡᤱᤗᤥ॥ 26 ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤁᤡᤸᤗᤧ ᤁᤢᤗᤠᤃᤡ ᤀᤠᤱᤃᤠ᤹ ᤁᤴ ᤆᤥ᤺ᤰᤔᤠ ᤏᤡᤱᤘᤠ᤹ ᤆᤥᤃᤢᤱᤅᤠᤱ ᤘᤠ᤹ᤖᤥ. ᤜᤧᤰᤁᤩᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤂᤢᤶᤍᤡᤱ ᤐᤡᤔᤠᤛᤡᤖᤧ ᤗᤠᤃᤡ ᤀᤠᤜᤢᤰᤁᤧᤴ ᤛᤴᤇᤢᤱᤅᤠᤱ ᤘᤠ᤹ᤖᤥ॥ 27 ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤆᤥᤃᤢᤱ ᤑᤠ᤹ᤀᤠᤱ ᤀᤡ᤺ᤳᤋᤢᤱᤅᤠᤱ ᤘᤠ᤹ᤖᤥ. ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤂᤢᤶᤍᤡᤱ ᤐᤡᤔᤠᤛᤡᤖᤧ ᤗᤠᤃᤡ ᤀᤠᤜᤢᤰᤜᤠ᤹ ᤛᤴᤇᤢᤱᤅᤠᤱ ᤘᤠ᤹ᤖᤥ. ᤀᤠᤱᤃᤠ᤹ ᤜᤠ᤺ᤳᤗᤧ ᤌᤣ᤺ᤰᤔᤠ ᤛᤢᤰᤁᤠᤒᤣ᥅” ᤐᤗᤡᤛ᤻ᤋᤡ ᤗᤠᤈᤣᤴ ᤔᤧᤰ ᤁᤧᤗ᤹ᤒᤠ ᤔᤠᤱᤏᤡᤱᤘᤠ᤹ᤐᤠᤴ 28 ᤀᤠᤜᤠᤈ ᤜᤠᤱᤅᤡᤴ ᤛᤩᤧᤒᤠ ᤋᤱᤒᤣᤀᤥ ᤀᤠᤱᤃᤠ᤹ ᤁᤴ ᤔᤠᤱᤏᤡᤱᤘᤠ᤹ᤐᤠᤴᤏᤡᤴ ᤂᤧᤵᤛᤢᤱᤗᤥ— 29 “ᤐᤗᤡᤛ᤻ᤋᤡ ᤕᤧᤰᤕᤰᤜᤠ᤹ᤀᤥ ᤁᤧᤕᤢᤱᤒᤠ ᤔᤏᤠᤛᤣ. ᤂᤧᤏᤡ᤹ ᤁᤧᤶᤜᤡᤵᤋᤡᤒᤠ ᤂᤧᤴ ᤋᤰᤁᤠ᤺ᤳᤋᤡᤴ ᤀᤧᤃᤧ ᤑᤠ᤹ᤀᤠᤱ ᤔᤧᤛ᤺ᤳᤋᤠᤶᤔᤡᤴᤏᤧ᤹ᤀᤥ॥ ᤌᤣᤀᤠᤱᤓᤧᤸᤗᤧ ᤜᤠᤒᤠ ᤂᤧᤴ ᤀᤛᤣ᤺ᤰᤐᤠᤸᤗᤧ ᤁᤢᤛ᤻ᤛᤠᤜᤠ᤹ᤀᤥᤗᤠᤶ ᤂᤧᤴᤏᤢ᤺ᤸᤗᤧᤀᤠᤱ ᤛᤠ᤹ᤖᤡᤰ ᤁᤢᤏᤡᤱ ᤁᤧᤕᤠᤰᤐᤠ ᤘᤣ᤹ᤛᤔᤠ ᤀᤛᤣ᤺ᤰᤐᤠᤎᤡᤰ ᤗ᤺ᤴᤗᤥ॥ ᤜᤧᤰᤁᤩᤠᤱ ᤂᤧᤴ ᤀᤛᤣ᤺ᤰᤐᤠᤸᤗᤧ ᤁᤢᤎᤡ᤺ᤴᤏᤥᤗᤠᤶ ᤁᤧᤒᤧᤒᤠ ᤀᤛᤣ᤺ᤰ ᤌᤡᤰ ᤗ᤺ᤴᤗᤥ॥ 30 ᤕᤜᤘᤣ ᤍᤠᤱᤒᤠᤴ ᤕᤠᤱᤃᤧᤛᤠ᤹ᤒᤠ ᤁᤢᤔᤏᤠᤜᤠ᤹ᤖᤧ ᤗᤠᤃᤡ ᤂᤢᤏᤧ᤹ ᤀᤠᤒᤠᤅᤣ ᤂᤢᤴᤇᤡ᤹ ᤔᤧᤸᤗᤢᤰᤁᤶᤒᤠ ᤐᤥᤱᤗᤥ. ᤜᤧᤰᤁᤩᤠᤱ ᤂᤧᤱᤜᤠ᤹ ᤛᤧ᤺ᤵᤋᤢᤛᤡᤀᤠᤱ ᤁᤶᤒᤪᤠᤱ ᤔᤧᤳᤋᤢᤛᤡᤖᤥ॥ ᤁᤖ ᤂᤢᤏᤧ᤹ ᤂᤡᤏᤡ᤹ ᤐᤗᤡᤛ᤻ᤋᤡᤜᤠ᤹ᤀᤥ ᤋᤸᤗᤡᤰ ᤕᤶᤒᤠ ᤛᤠᤰᤘᤠᤔᤠᤎᤡᤰ ᤐᤠᤱᤄᤢᤍᤠᤛᤢᤖᤥ ᤂᤧᤒᤩᤠᤱ ᤛᤠᤰᤁᤧᤸᤗᤧ ᤂᤡᤏᤡ᤹ ᤀᤠᤳᤋᤡᤴᤜᤠ᤹ᤀᤠᤱ ᤁᤧᤴᤜᤡᤅᤡᤴᤗᤥ॥ 31 “ᤐᤗᤡᤛ᤻ᤋᤡᤒᤠ ᤁᤧᤖᤧᤰ ᤕᤧᤰᤕᤰᤜᤠ᤹ᤀᤥ ᤁᤧᤕᤢᤱᤒᤠ ᤔᤏᤠᤛᤣ. ᤂᤧᤏᤡ᤹ ᤁᤢᤓᤠ᤹ᤖᤧ ᤗᤠᤃᤡ ᤀᤢ᤺ᤰᤁᤠᤱ ᤀᤢᤰ ᤜᤠᤒᤧᤶᤔᤧ᤹ᤀᤥ᥄ ᤂᤧᤏᤡ᤹ ᤁᤧᤖᤧᤰ ᤁᤡᤛᤠᤶᤔᤧ᤹ ᤕᤰᤂᤠᤶᤔᤧ᤹ᤀᤥ᥄ ᤌᤠᤱᤃᤧᤳ ᤐᤡᤛᤠᤱᤗᤠᤶ ᤗᤳᤇᤠ ᤁᤡᤵᤔᤠ ᤁᤧᤄᤢᤒᤠ ᤔᤡ᤺ᤰᤂᤢᤎᤡᤰ ᤕᤢᤖ ᤐᤳᤗᤥ. ᤌᤱ ᤆᤥ᤺ᤰᤔᤠᤖᤧ ᤗᤠᤃᤡ ᤂᤧᤱᤜᤠ᤹ᤖᤧ ᤂᤧᤏᤡ᤹ ᤁᤧᤖᤧᤰ ᤌᤰᤛᤢᤒᤠᤜᤠ᤹ᤀᤥ ᤗᤳᤇᤠᤀᤠᤱ ᤁᤧᤃᤡᤒᤠ ᤁᤧᤕᤱᤒᤠ ᤔᤧᤜᤥᤵᤗᤥ॥ 32 “ᤜᤧᤰᤁᤣ᤺ᤸᤗᤧ ᤂᤧᤴ ᤛᤢᤘᤠᤱᤅᤥᤒᤠ ᤜᤠᤱᤗᤠᤀᤡᤱᤒᤠᤜᤠ᤹ ᤀᤠᤏᤡ᤹ ᤌᤣ ᤏᤢᤃᤵ ᤐᤡᤔᤠᤛᤡᤒᤣ᥅ ‘ᤕᤜᤘᤣ ᤍᤠᤱᤒᤧᤸᤗᤧ ᤕᤖᤢᤛᤗᤧ᤺ᤶᤔᤡᤴ ᤌᤢᤶᤎᤢᤶᤒᤠ ᤆᤥᤃᤢᤀᤠᤱ ᤘᤠ᤹ᤖᤥ. ᤜᤧᤰᤁᤩᤠᤱ ᤂᤧᤴ ᤕᤠᤱᤃᤧᤛᤠ᤹ᤒᤠ ᤂᤢᤏᤧ᤹ ᤁᤢᤔᤏᤠᤜᤠ᤹ᤖᤧ ᤂᤧ᤹ᤕᤥ ᤛᤧ᤺ᤵᤛᤡᤱᤔᤠ ᤔᤧᤄᤥᤛᤢᤖᤥ॥’” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.