ᤕᤛᤤᤕᤠ 13 - LIFOTNTᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤒᤣᤒᤡᤗᤥᤏ ᤕᤧᤰᤕᤰᤁᤡᤴ ᤂᤢᤶᤍᤡᤱ ᤐᤡᤖᤢ᤹ 1 ᤁᤴ ᤔᤠᤱᤏᤡᤱᤘᤠ᤹ᤐᤠᤴᤏᤡᤱᤃ ᤒᤣᤒᤡᤗᤥᤏ ᤕᤧᤰᤕᤰᤁᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤀᤠᤔᤥᤈᤖᤧ ᤁᤢᤛ᤻ᤛᤠ ᤕᤛᤤᤕᤠ᤺ᤸᤗᤧ ᤛᤢᤑᤥᤀᤥ ᤏᤡᤛᤢᤒᤠᤖᤥ— 2 “ᤂᤸᤗᤧ᤺ᤰ ᤌᤣᤀᤠᤱ ᤁᤧᤜᤥᤵᤐᤠ ᤁᤥ᤺ᤰᤔᤠᤀᤥ ᤗᤳᤇᤠ ᤏᤡᤛᤠᤎᤡᤰ ᤜᤠᤰᤋᤧ᤹ᤀᤥ॥ ᤜᤧᤰᤁᤩᤠᤱ ᤂᤧᤱᤜᤠ᤹ ᤕᤶᤒᤠ ᤀᤡᤰᤗᤠ᤺ᤸᤗᤧ ᤑᤧ᤺ᤰᤋᤧᤛᤧ᤹ᤀᤥ ᤜᤧᤰᤁᤩᤠᤱ ᤛᤢᤜᤠᤱᤕᤢᤰᤐᤠᤜᤠ᤹ ᤐᤕᤶ ᤗᤠᤶᤎᤣ᤺ᤵᤐᤥ ᤜᤢᤰᤆᤠ᤺ᤸᤁᤡ᤺ᤸᤗᤧ ‘ᤗᤠᤛᤠᤶᤔᤧ᤹’ ᤔᤧᤳᤋᤧᤛᤧ᤹ᤀᤥ॥ 3 ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤴ ᤕᤠ᤺ᤶᤒᤰᤁᤡᤴ ᤆᤥ᤺ᤰᤔᤠᤖᤧ ᤗᤠᤃᤡ ᤛᤢᤳᤌᤥ ᤆᤥ᤺ᤰᤔᤏᤠᤛᤡᤒᤠ ᤌᤰᤛᤢᤒᤠᤜᤠ᤹ ᤔᤢᤖᤠ ᤔᤧᤳᤋᤢᤱᤛᤡᤱᤅᤠᤱ ᤘᤠ᤹ᤖᤥ॥ ᤀᤠᤱᤃᤠ᤹ ᤀᤠᤛᤠᤰᤁᤧᤴ ᤀᤥ᤺ᤴᤎᤠᤰᤋᤠᤶᤛᤡᤶᤔᤧ᤹ ᤑᤠ᤹ᤀᤠᤱ ᤌᤱ ᤁᤧᤈᤥ᤺ᤰᤐᤠ ᤀᤠᤎᤰᤛᤢᤒᤠᤜᤠ᤹ ᤀᤡᤱᤈᤠᤱ ᤐᤡᤖᤢᤱᤛᤡᤱᤅᤠᤱ ᤘᤠ᤹ᤖᤥ॥ ᤜᤧᤰᤁᤩᤠᤱ ᤀᤠᤱᤃᤠ᤹ ᤌᤱ ᤆᤥ᤺ᤰᤔᤠ ᤏᤠ᤺ᤴᤍᤢᤱᤅᤡᤸᤗᤧ ᤂᤧᤱᤜᤠ᤹ ᤔᤧᤛ᤺ᤳᤗᤥ॥” 4 ᤁᤥ᤺ᤰᤔᤠ ᤑᤠᤱᤈᤱ ᤌᤧᤃᤢ ᤔᤠᤱᤘᤠᤜᤠ᤹ᤀᤥ ᤜᤕᤱ ᤁᤡᤸᤗᤡᤱ ᤁᤧᤒᤥᤱᤒᤠ. ᤕᤶᤒᤠ ᤔᤏᤠᤗᤢᤵᤗᤡ ᤜᤧᤰᤋᤱᤒᤠ ᤀᤡᤰᤗᤠᤴ ᤂᤧᤵᤛᤧᤶᤔᤧ᤹ᤀᤥ᥄ ᤜᤧᤰᤁᤩᤠᤱ ᤜᤠᤱᤈᤢᤶᤜᤠ᤹ᤀᤥᤗᤠᤶ ᤁᤧᤗ᤺ᤶᤒᤠ ᤜᤕᤱ ᤁᤡᤸᤗᤡᤱᤜᤠ᤹. ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤌᤡᤰᤔᤧᤳ ᤔᤧᤓᤢᤱᤛᤡᤱᤅᤡᤸᤗᤧ ᤁᤧᤗ᤺ᤶᤒᤠ ᤀᤡᤰᤗᤠᤴ ᤂᤧᤵᤛᤧᤶᤔᤧ᤹ᤀᤥ᥄ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤌᤱ ᤆᤥ᤺ᤰᤔᤠᤖᤧ ᤗᤠᤃᤡ ᤀᤠᤒᤠᤅᤣ ᤂᤢᤏᤧ᤹ ᤁᤢᤎᤰᤛᤢᤒᤠᤜᤠ᤹ ᤑᤢᤰᤂᤢᤛᤡᤖ ᤕᤠᤰᤗᤥ॥ 5 ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤧᤸᤗᤧ ᤏᤠᤛᤔᤠ ᤁᤢᤕᤠ ᤔᤠ᤺ᤱᤄᤠ ᤔᤠ᤺ᤱᤄᤠᤒᤠ ᤗᤠᤈᤣ᤹ᤗᤠᤶ ᤂᤧᤱᤜᤠ᤹ ᤔᤧᤍᤠᤖ ᤔᤧᤒᤳᤗᤥ॥ ᤕᤜᤘᤣ ᤍᤠᤱᤒᤧᤸᤗᤧ ᤛᤠ᤹ᤖᤡᤰ ᤁᤢᤛᤠᤰᤁᤧᤴ ᤐᤥᤃᤧᤒᤠᤸᤗᤧ ᤆᤥᤃᤢᤸᤗᤧ ᤁᤧᤖᤧᤰ ᤗᤠᤈᤣ᤹ᤜᤠ᤹ ᤂᤠᤵᤐᤢᤌᤩ᤺ᤱ ᤆᤥ᤺ᤰᤔᤠᤖᤧ ᤗᤠᤃᤡ ᤂᤢᤏᤧ᤹ ᤋᤠᤖ ᤐᤳᤗᤥ॥ 6 ᤀᤢ᤺ᤰᤁᤠᤱ ᤀᤢ᤺ᤰ ᤜᤠᤒᤠᤶᤔᤧ᤹. ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤧᤱᤔᤠ ᤕᤧᤴᤏᤡᤴ ᤂᤠ ᤏᤡ᤺ᤳᤋᤠᤱ ᤋᤠᤖ ᤐᤳᤗᤥ. ᤔᤢᤰᤛᤠᤶᤍᤠᤱᤒᤠᤗᤠᤶ ᤛᤠ᤹ᤖᤡᤰ ᤁᤡᤵᤔᤠ ᤁᤧᤄᤢᤒᤠ ᤔᤧᤰᤔᤠᤛᤡᤔᤧᤴ ᤋᤠᤖᤥ॥ 7 ᤂᤧᤸᤗᤧᤆᤥᤃᤢᤸᤗᤧ ᤁᤧᤖᤧᤰ ᤜᤢᤰᤜᤠ᤹ ᤕᤱᤗᤥ. ᤁᤧᤖᤧᤰ ᤔᤏᤠᤜᤠ᤹ ᤁᤡᤔᤧᤸᤗᤧ ᤂᤢᤴᤇᤡ᤹ ᤛᤠᤶᤔᤡᤰ ᤔᤠᤖᤥ॥ 8 ᤜᤧᤰᤁᤩᤠᤱ ᤂᤧᤱᤜᤠ᤹ ᤐᤃᤡ ᤔᤧᤃᤡ ᤔᤧᤕᤱᤅᤠᤱ ᤋᤢᤰᤂᤣ ᤗᤠᤰᤂᤣᤜᤠ᤹ ᤏᤢ ᤏᤡᤱᤛᤠᤶᤜᤠ᤹ᤖᤧ ᤂᤧᤱᤜᤠ᤹ ᤋᤧᤶᤛᤢᤛᤡᤖᤥ॥ ᤔᤧᤴᤇᤢᤔᤠ᤺ᤴ ᤀᤅᤧ᤺ᤰᤘᤠ ᤁᤵᤔᤠ ᤛᤠᤘᤠ᤺ᤴᤍᤢᤸᤗᤧ ᤋᤢᤰᤐᤠ ᤁᤢᤀᤡᤛᤡᤰ ᤂᤧᤱᤜᤠ᤹ ᤋᤢᤰᤔᤠ ᤏᤢ ᤁᤡᤔᤠ ᤕᤱᤔᤠᤀᤥ ᤔᤧᤎᤠᤖᤥ. ᤂᤧᤱᤜᤠ᤹ ᤀᤠᤒᤠᤅᤣ ᤂᤢᤴᤇᤡ᤹ᤗᤢᤶᤔᤥ ᤏᤡᤱᤘᤠ᤹ ᤔᤠᤀᤠᤱ ᤘᤖᤧᤰ ᤘᤖᤧᤰ ᤀᤥᤔᤧᤔᤧᤳᤇᤡᤱᤗᤥ॥ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤏᤠᤖᤠᤴ ᤔᤡ ᤁᤧᤍᤡ᤺ᤵᤐᤠ ᤁᤢᤀᤡᤛᤡᤰ ᤐᤥᤱᤗᤥ॥ ᤂᤧᤴ ᤕᤧᤴᤏᤥ ᤗᤢᤱᤔᤠ᤹ ᤋᤢᤰᤛᤡᤱᤔᤠ ᤜᤥᤵ 9 ᤀᤥᤔᤧᤳᤋᤧᤶᤔᤧ᤹. ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤡᤰ ᤐᤥ᤺ᤰᤔᤠ ᤏᤢ ᤛᤠ᤹ᤖᤡᤰ ᤁᤡᤵᤔᤠ ᤁᤧᤄᤢᤒᤠ ᤁᤢᤛᤠᤰᤁᤧᤴᤏᤡᤸᤗᤧ ᤂᤧᤴ ᤕᤧᤴᤏᤡᤴ ᤋᤠᤖ ᤐᤳᤗᤥ॥ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤁᤧᤴ ᤔᤢᤖᤧᤰ ᤂᤠᤖᤧ᤺ᤰ ᤂᤠᤵᤐᤢᤌᤩ᤺ᤱ ᤐᤥᤱᤗᤥ ᤜᤧᤰᤁᤩᤠᤱ ᤗᤠᤕᤥᤒᤠᤜᤠ᤹ ᤁᤧᤖᤧᤰ ᤔᤧᤛᤡᤖᤥ॥ 10 ᤋᤠᤱᤛᤠᤱᤅᤥᤒᤠ ᤂᤣᤛᤣ ᤂᤣ᤺ᤶᤛᤡᤰᤐᤠᤜᤠ᤹ ᤏᤢ ᤔᤧᤴᤇ᤻ᤕᤠᤒᤢᤖᤢᤰᤔᤠᤜᤠ᤹ ᤀᤥ᤺ᤵᤔᤠ ᤔᤧᤏᤠ᤹ᤖᤥ॥ ᤁᤧᤗᤡᤱᤒᤠᤀᤠᤱ ᤁᤧᤃᤧᤵᤐᤠᤖ ᤁᤧᤒᤵᤐᤠ ᤏᤠᤶᤔᤡᤴᤏᤠᤱ ᤔᤠᤰᤋᤠᤱᤒᤠ ᤐᤥᤱᤗᤥ ᤜᤧᤰᤁᤩᤠᤱ ᤗᤠᤒᤧᤴᤏᤠᤱ ᤔᤧᤀᤥ᤺ᤳᤏᤧᤴᤗᤥ॥ 11 ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤴ ᤀᤡᤰᤛᤠ ᤂᤠᤶᤒᤣ᤺ᤰᤁᤧᤴ ᤁᤢᤓᤧᤴ ᤕᤠ᤺ᤶᤒᤰᤁᤧᤸᤗᤧ ᤆᤥᤃᤢᤸᤗᤧ ᤂᤢᤶᤍᤡᤱ ᤐᤡᤖᤢᤱᤗᤥ. ᤜᤧᤰᤁᤩᤠᤱ ᤋᤠᤵᤑᤧ᤺ᤶᤒᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤜᤠ᤹ ᤂᤢᤴᤇᤡ᤹ ᤗᤠᤕᤥᤸᤗᤧ ᤗᤠᤃᤡ ᤛᤠᤶᤒᤠᤴ ᤁᤢ᤺ᤳᤋᤢᤱᤛᤡᤱᤗᤥ॥ ᤂᤧᤒᤩᤠᤱ ᤕᤶᤒᤠ ᤁᤧᤗᤧᤱᤛᤡᤱᤒᤠᤜᤠ᤹ᤖᤧ ᤂᤢᤴᤇᤡ᤹ ᤀᤠᤱᤍᤡᤱ ᤗ᤹ᤔᤧᤴ ᤏᤢᤵᤛᤢᤱ ᤐᤡᤖᤢᤱᤛᤡᤱᤗᤥ. ᤂᤧᤒᤩᤠᤱ ᤛᤠ᤹ᤖᤡᤰ ᤁᤢ᤹ᤀᤡᤃᤧᤓᤧᤶᤒᤠᤜᤠ᤹ᤖᤧ ᤂᤢᤴᤇᤡ᤹ ᤜᤧᤴᤇᤡᤱᤔᤧᤴ ᤔᤠᤖ ᤕᤠ᤺ᤴᤍᤢᤱᤗᤥ॥ 12 ᤂᤧᤴ ᤁᤧᤜᤡᤱᤒᤠ ᤁᤧᤕᤠ᤺ᤰᤐᤠ ᤔᤏᤠᤜᤠ᤹ ᤂᤥᤔᤧᤴᤍᤧᤵᤏᤠᤒᤠ ᤛᤠᤶᤔᤩᤠᤱ ᤀᤡᤛ᤻ᤛᤣ᤺ᤱᤒᤠ ᤜᤧᤰᤁᤣ ᤆᤥᤃᤢᤱᤛᤡᤱᤗᤥ. ᤀᤥᤐᤡᤖᤒᤠ ᤂᤥᤔᤧᤴᤍᤧᤵᤔᤏᤠ ᤛᤠᤶᤔᤩᤠᤱ ᤁᤢᤀᤡᤛᤡᤰ ᤆᤥᤃᤢᤱᤛᤡᤱᤗᤥ॥ 13 ᤌᤣᤀᤠᤱᤓᤧᤸᤗᤧ ᤂᤧᤴ ᤕᤧᤴᤏᤥ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤀᤠᤛᤡᤰᤁᤧᤴ ᤀᤥᤛᤣ᤺ᤴᤎᤠᤱ ᤆᤥᤃᤢᤱᤅᤡᤸᤗᤧ ᤛᤠᤱᤃᤪᤠᤶᤐᤣᤍᤠᤱᤜᤠ᤹ ᤌᤧᤃᤰᤁᤰᤏᤠ ᤕᤰᤂᤢᤱᤗᤥ. ᤜᤧᤰᤁᤩᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤁᤢᤕᤢᤰᤏᤠᤍᤧᤴᤏᤥ ᤌᤢᤖᤢᤵᤗᤢᤵᤏᤠ ᤕᤱᤗ ᤕᤠ᤺ᤴᤍᤢᤱᤗᤥ॥ 14 ᤒᤣᤒᤡᤗᤥᤏ ᤕᤧᤰᤕᤰᤁᤥ ᤁᤧᤕᤢᤱᤒᤠ ᤘᤣ᤹ ᤗᤠᤈᤣ᤹ᤒᤠ ᤔᤏᤠᤜᤠ᤹ ᤀᤠᤒᤠᤅᤣ ᤀᤠᤒᤠᤅᤣ ᤂᤢᤴᤇᤡ᤹ ᤗᤠᤈᤣ᤹ᤀᤥ ᤔᤧᤄᤧᤳᤇᤡᤱ ᤔᤧᤒᤣ᤺ᤰᤗᤥ॥ ᤀᤠᤵᤆᤠᤖᤠᤜᤠ᤹ᤖᤧ ᤔᤧᤏᤠ᤺ᤳᤋᤢᤛᤡᤀᤠᤱ ᤁᤧᤗᤥ᤺ᤰᤐᤠ ᤐᤧ᤺ᤱᤘᤠᤜᤠ᤹ ᤜᤧᤰᤁᤣ ᤏᤢ ᤁᤢᤴᤍᤠᤱᤒᤠ ᤔᤣ᤺ᤴᤏᤣᤒᤠ ᤔᤧᤸᤗᤢᤰᤜᤠ᤹ ᤁᤢᤀᤡᤛᤡᤰ ᤐᤢᤒᤣᤗᤠᤵᤛᤠ ᤔᤧᤒᤥᤱᤗᤥ॥ 15 ᤔᤧᤕᤠᤱᤄᤢᤛᤡᤒᤠ ᤔᤏᤠᤜᤠ᤹ ᤗᤠ᤺ᤰᤁᤡᤸᤗᤧ ᤔᤧᤎᤢᤒᤢᤛᤡᤖᤥ. ᤜᤧᤰᤁᤩᤠᤱ ᤁᤧᤖᤧᤰ ᤔᤧᤍᤧᤶᤛᤢᤛᤡᤒᤠᤜᤠ᤹ ᤋᤠᤓᤣ᤺ᤸᤗᤧ ᤔᤧᤈᤧᤵᤋᤢ ᤔᤧᤛᤧᤖᤢᤛᤡᤖᤥ॥ 16 ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤋᤃᤡᤀᤣ ᤛᤠ-ᤀᤣᤜᤠ᤹ ᤔᤡᤰᤁᤧᤸᤗᤧ ᤏᤡᤛᤢᤖ ᤔᤧᤒᤰᤂᤢᤛᤡᤀᤠᤱ ᤔᤧᤓᤰ ᤔᤧᤛ᤻ᤛᤡᤖ ᤔᤧᤎᤠᤵᤛᤢᤛᤡᤖᤥ॥ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤕᤠᤱᤛᤠᤁᤢᤴᤎᤣᤜᤠ᤹ ᤔᤧᤏᤠᤵᤋᤢᤛᤡᤖᤥ ᤂᤧᤒᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤔᤣ᤺ᤳᤜᤠ᤹ ᤔᤣ᤺ᤳ ᤔᤧᤔᤧᤳᤋᤢᤛᤡᤖᤥ॥ 17 ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢ᤹. “ᤀᤥᤔᤧᤳᤋᤧᤶᤔᤧ᤹ᤀᤥ. ᤀᤠᤱᤃᤠ᤹ ᤒᤣᤒᤡᤗᤥᤏᤒᤠ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤋᤰᤗᤧᤱᤘᤠᤀᤥ ᤔᤠᤍᤡᤒᤠ ᤔᤏᤠᤜᤠ᤹ ᤔᤧᤒᤥ᤺ᤰᤗ ᤕᤠ᤺ᤴᤍᤢᤛᤡᤱᤗᤥ. ᤂᤧᤱᤜᤠ᤹ᤖᤧ ᤛᤠᤶᤔᤩᤠᤱᤜᤠ᤹ ᤀᤥᤔᤧᤶᤔᤧᤳᤋᤢᤴᤗᤥ. ᤂᤧᤒᤩᤠᤱ ᤕᤢᤵᤐᤠᤜᤠ᤹ᤀᤥ ᤏᤡᤱᤘᤠ᤹ ᤔᤧᤶᤒᤡᤖᤢᤴᤗᤥ॥ 18 ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤡ ᤏᤢ ᤋᤥ᤺ᤱᤅᤡᤸᤗᤧ ᤏᤠᤗᤡᤃᤧᤴ ᤌᤠᤱᤒᤧᤴᤜᤠ᤹ ᤔᤧᤀᤠᤒᤢᤛᤡᤀᤠᤱ ᤔᤧᤛᤧᤖᤢᤛᤡᤖᤥ॥ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤏᤢᤕᤠᤶᤔᤥᤒᤠ ᤀᤅᤧ᤺ᤰᤘᤠᤜᤠ᤹ ᤗᤢᤱᤔᤠ᤹ ᤔᤧᤴᤍᤢᤰᤋᤢᤛᤡᤴᤗᤥ. ᤂᤧᤱᤜᤠ᤹ᤖᤧ ᤜᤡᤴᤈᤠ᤹ ᤐᤡᤳᤇᤠᤜᤠ᤹ ᤀᤥᤔᤧᤔᤧᤳᤋᤢᤛᤡᤀᤠᤱ ᤂᤢᤴᤇᤡ᤹ ᤗᤢᤱᤔᤠ᤹ ᤛᤩᤠ᤺ᤳᤋᤠᤱ ᤔᤧᤗ᤹ᤏᤧᤴᤗᤥ॥” 19 ᤒᤣᤒᤡᤗᤥᤏ ᤜᤠᤱᤈᤢᤶᤔᤡᤴ ᤁᤧᤖᤧᤰᤏᤢ᤺ᤸᤗᤧ ᤏᤢᤒᤠ ᤆᤥᤰ ᤑᤠ᤹ᤀᤠᤱ ᤒᤣᤒᤡᤗᤥᤏ ᤁᤧᤕᤢᤱᤒᤠ ᤔᤏᤠᤜᤠ᤹ ᤀᤠᤱᤍᤡᤱ ᤔᤧᤗ᤹ᤖᤥ॥ ᤁᤖ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤛᤍᤥᤔ ᤏᤢ ᤃᤔᤥᤖᤠ ᤕᤧᤰᤕᤰᤁᤡᤴ ᤑᤧᤳᤗᤠ᤺ᤴᤍᤢᤱᤒᤠ ᤁᤢᤀᤡᤛᤡᤰ ᤁᤴ ᤜᤠᤱᤈᤢᤶᤔᤡᤴ ᤂᤠᤵᤐᤢᤌᤩ᤺ᤱ ᤆᤥᤃᤢᤱᤗᤥ॥ 20 ᤂᤧᤵᤔᤥ ᤀᤠᤳᤋᤡᤴᤜᤠ᤹ᤀᤠᤱ ᤔᤧᤴᤕᤢᤱᤏᤧᤴᤗᤥ. ᤌᤠ᤺ᤰᤌᤠ᤺ᤰ ᤌᤠᤖᤡᤰ ᤋᤠ᤺ᤴᤍᤡᤀᤠᤱ ᤜᤠ᤺ᤳᤋᤠᤱ ᤔᤧᤴᤕᤢᤱᤏᤧᤴᤗᤥ॥ ᤋᤠᤰᤁᤧᤃᤶᤒᤠᤀᤠᤱ ᤁᤧᤘᤠ᤹ᤒᤠ ᤀᤖᤒᤡᤜᤠ᤹ᤖᤧ ᤂᤧ᤹ᤕᤥ ᤛᤠ᤺ᤱᤃᤠᤜᤡᤶ ᤔᤧᤴᤈᤥᤃᤢᤴᤗᤥ॥ ᤜᤧᤰᤁᤩᤠᤱ ᤀᤠᤳᤋᤡᤴ ᤔᤧᤸᤗᤢᤰᤁᤶᤒᤠᤜᤠ᤹ᤖᤧᤀᤠᤱ ᤂᤢᤴᤇᤡ᤹ ᤔᤧᤸᤗᤢ᤺ᤰᤜᤠ᤹ ᤏᤧᤔᤠ ᤔᤧᤶᤓᤠ᤺ᤰᤋᤢᤛᤡᤴᤗᤥ॥ 21 ᤁᤖ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥᤵᤐᤠ ᤋᤧᤴᤏᤥᤒᤠ ᤋᤠᤶᤓᤢᤱ ᤌᤰᤛᤠᤜᤠ᤹ ᤂᤧ᤹ᤕᤥ ᤔᤧᤏᤠ᤺ᤶᤛᤡᤱᤗᤥ॥ ᤂᤧᤵᤔᤥᤒᤠ ᤁᤧᤗᤢ᤺ᤶᤒᤠ ᤜᤡᤶᤜᤠ᤹ ᤛᤩᤠᤗᤠᤜᤠ᤹ᤖᤧ ᤔᤧᤎᤡᤶᤛᤢᤖᤥ ᤑᤰᤌᤡ᤺ᤶᤒᤠᤜᤠ᤹ ᤂᤧᤵᤔᤥ ᤔᤧᤕᤢᤱᤗᤥ. ᤜᤧᤰᤁᤩᤠᤱ ᤋᤠᤶᤓᤢᤱ ᤔᤧ᤺ᤴᤍᤠᤜᤠ᤹ ᤂᤧ᤹ᤕᤥ ᤐᤡᤳᤆᤠᤰ ᤐᤡᤳᤆᤠᤰ ᤔᤧᤒᤡᤴᤗ ᤔᤧᤘᤠ᤹ᤖᤥ॥ 22 ᤋᤠᤶᤓᤢᤱ ᤁᤥ᤺ᤳᤆᤥ ᤜᤧᤰᤋᤱᤒᤠ ᤌᤰᤛᤠᤜᤠ᤹ ᤏᤢ ᤛᤩᤠᤗᤠᤜᤠ᤹ ᤁᤴ ᤁᤒᤪᤡᤱ ᤑᤠᤰᤔᤏᤠᤒᤠ ᤏᤢ᤺ᤒ᤻ᤏᤢᤒᤠ ᤜᤡᤶᤜᤠ᤹ᤀᤥ ᤏᤢ ᤕᤧᤰᤕᤰᤜᤠ᤹ᤀᤥ ᤔᤧᤀ᤺ᤰᤗᤥ॥ ᤒᤣᤒᤡᤗᤥᤏ ᤜᤠᤱᤈᤢᤶᤔᤡᤸᤗᤧ ᤁᤢᤔᤧᤰᤔᤠ ᤕᤧᤶᤔᤡᤴ ᤏᤡ᤺ᤳᤋᤠᤱ ᤋᤩᤧᤀᤠᤱ ᤘᤠ᤹ᤖᤥ. ᤜᤧᤰᤁᤩᤠᤱ ᤁᤴ ᤜᤠᤱᤈᤢᤶᤔᤡᤸᤗᤧ ᤁᤢᤔᤧᤰᤔᤠᤴ ᤜᤠᤖᤠ ᤋᤠᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.