ᤕᤛᤤᤕᤠ 12 - LIFOTNT

ᤏᤢᤃᤧᤴ ᤛᤠᤶᤗᤥ

¹ ᤂᤧᤴ ᤕᤧᤴᤏᤥ ᤂᤧᤏᤡ᤹ ᤀᤰᤂᤣ ᤁᤧᤒᤠ᤺ᤳᤋᤢᤶᤗᤥ. “ᤕᤜᤘᤣ ᤍᤠᤱᤒᤠᤀᤣ. ᤂᤧᤏᤧ᤹ ᤏᤢᤃᤧᤴ ᤐᤡᤏᤧᤖᤥ᥄ ᤂᤧᤏᤧ᤹ ᤀᤠᤱᤃᤠ᤹ᤏᤢ ᤁᤧᤕᤠ᤺ᤰᤗᤧ᤹ᤖᤧᤀᤠᤱ ᤘᤕᤧᤖᤥ. ᤁᤖᤛᤠᤱ ᤀᤠᤸᤗᤥᤃ ᤂᤧᤏᤧ᤹ ᤁᤧᤛᤡᤰᤁᤧᤴ ᤆᤡ᤺ᤰᤋᤢᤖᤥ. ᤜᤧᤰᤁᤩᤠᤱ ᤀᤠᤸᤗᤥ ᤀᤠᤱᤃᤠ᤹ ᤜᤠᤱᤜᤠᤱ ᤁᤧᤔᤧᤳᤋᤠᤱᤅᤠᤱ ᤘᤠ᤹ᤖᤥ॥

² ᤛᤧᤰᤂᤠᤛᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤀᤠᤱᤃᤠ᤹ ᤀᤠᤛᤧᤴᤗᤵᤍᤠᤱᤒᤠᤖᤥ. ᤀᤠᤱᤃᤠ᤹ ᤏᤛᤠᤴ ᤆᤥᤃᤢᤱ ᤜᤧᤰᤁᤩᤠᤱ ᤔᤧᤃᤡᤀᤠᤴᤗᤥ॥ ᤕᤜᤘᤣ ᤍᤠᤱᤒᤠ. ᤕᤜᤘᤣ ᤍᤠᤱᤒᤧᤴᤏᤣ ᤀᤠᤱᤃᤠ᤹ ᤀᤠᤔᤢᤰᤛᤠᤶ ᤏᤢ ᤀᤠᤛᤠᤶᤗᤥᤖᤥ. ᤂᤢᤏᤧ᤹ᤀᤣ ᤀᤠᤱᤃᤠ᤹ ᤀᤠᤛᤧᤴᤗᤵᤍᤠᤱᤒᤠ ᤐᤥ᤺ᤰᤂᤧᤀᤠᤱ ᤘᤠ᤹ᤖᤥ॥”

³ ᤂᤧᤏᤧ᤹ ᤛᤣᤛᤣᤒᤠ ᤆᤫᤠ᤺ᤳᤋᤡᤴ ᤁᤧᤎᤢᤅᤢᤸᤗᤧ ᤁᤧᤛ᤺ᤳᤗᤥ. ᤜᤧᤰᤁᤣᤗ᤹ᤖᤡᤰᤁᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤏᤠᤜᤠ᤹ ᤂᤢᤏᤧ᤹ ᤛᤧ᤺ᤵᤋᤢᤛᤡᤸᤗᤧ ᤂᤧᤱᤜᤠ᤹ ᤂᤢᤴᤇᤡ᤹ ᤏᤡᤱᤘᤠ᤹ ᤋᤠᤖᤥ॥

⁴ ᤂᤧᤴ ᤕᤧᤶᤔᤥ ᤂᤡᤏᤡ᤹ ᤀᤰᤂᤣ ᤁᤧᤒᤠ᤺ᤳᤋᤢᤶᤗᤥ. “ᤕᤜᤘᤣ ᤍᤠᤱᤒᤠᤴ ᤏᤢᤃᤧᤴ ᤐᤡᤖᤧᤶᤔᤧ᤹ᤀᤥ. ᤂᤢᤏᤧ᤹ ᤐᤕᤶ ᤕᤶᤒᤠ ᤆᤥᤰ ᤑᤠ᤹ᤀᤠᤱ ᤕᤶᤒᤠ ᤀᤡᤰᤗᤠᤀᤥ ᤀᤡᤱᤓᤥᤛᤧᤶᤔᤧ᤹ᤀᤥ॥ ᤂᤢᤏᤧ᤹ ᤆᤥᤃᤢᤒᤠ ᤕᤠ᤺ᤶᤒᤰᤁᤡᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤁᤥᤒᤠ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤆᤧᤰᤋᤧᤶᤛᤡᤶᤔᤧ᤹ᤀᤥ. ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤔᤡᤱᤅᤡᤴ ᤁᤧᤖᤧᤰᤏᤢ᤺ᤸᤗᤧ ᤕᤶᤒᤠ ᤐᤥ᤺ᤰᤂᤧᤀᤠᤱ ᤘᤠ᤹ ᤑᤠ᤹ᤀᤠᤱ ᤀᤢᤘᤠ ᤆᤥᤃᤧᤶᤔᤧ᤹ᤀᤥ॥

⁵ ᤕᤜᤘᤣ ᤍᤠᤱᤒᤠᤀᤥ ᤛᤠᤶᤗᤥᤖᤠᤶᤔᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰᤜᤠ᤹ ᤆᤥᤃᤢᤀᤠᤱ ᤘᤠ᤹ᤖᤥ. ᤁᤴ ᤐᤠ᤺ᤴᤏᤡᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤁᤥᤒᤠ ᤁᤧᤖᤧᤰᤗᤧ ᤁᤢᤛᤡᤱ ᤔᤧᤏᤡ᤺ᤳᤋᤢᤖᤖᤥ॥

⁶ ᤛᤡᤕᤥᤏ ᤕᤧᤰᤕᤰᤁᤥᤒᤠ ᤔᤏᤠᤛᤣ. ᤕᤶᤒᤠ ᤀᤡᤰᤗᤠᤀᤥ ᤀ᤺ᤰᤋᤠᤶᤔᤧ᤹ ᤜᤧᤰᤁᤩᤠᤱ ᤛ᤺ᤳᤋᤠᤶᤔᤧ᤹ᤖ ᤛᤠᤶᤗᤥᤖᤠᤶᤔᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤂᤧᤏᤡ᤹ ᤗᤢᤶᤔᤥ ᤁᤧᤘᤠ᤹ᤒᤠ ᤀᤡᤛᤪᤠᤀᤡᤗᤒᤠ ᤛᤣᤛᤣ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤐᤕᤶ ᤕᤶᤒᤠ ᤆᤥᤰᤗᤥ॥”