ᤕᤛᤤᤕᤠ 11 - LIFOTNT

ᤁᤢᤏᤢᤵᤔᤠ ᤕᤧᤴᤏᤥ ᤛᤏᤠᤖᤢᤱ ᤜᤠᤱᤈᤢᤶ ᤋᤠᤖᤥ

¹ ᤍᤠᤀᤢᤍᤖᤧ ᤜᤠᤱᤅᤡᤸᤗᤧ ᤁᤢᤜᤡᤶᤛᤕᤱᤅᤡᤴ ᤛᤡᤱᤒᤢᤱ ᤜᤧᤰᤁᤣ ᤗ᤹ᤖᤥ ᤁᤖ ᤂᤧᤴ ᤛᤡᤱᤔᤢ᤺ᤳᤋᤥᤗᤠᤶ ᤁᤢᤈᤠ᤹ ᤁᤧᤎᤥ᤺ᤰᤐᤠ ᤁᤢᤒᤥᤖᤠᤰ ᤗᤡᤱᤎᤠᤱᤒᤠ ᤁᤢᤀᤡᤛᤡᤰ ᤌᤡᤰᤕᤧᤴ ᤍᤠᤀᤢᤍᤖᤧ ᤁᤢᤜᤡᤶᤛᤕᤱᤅᤥᤗᤠᤶᤒᤠ ᤗᤳᤇᤠ ᤔᤏᤠᤎᤡᤰ ᤜᤠᤱ ᤐᤥᤱᤗᤥ॥

² ᤕᤜᤘᤣ ᤍᤠᤱᤒᤧᤸᤗᤧ ᤁᤢᤕᤠᤶᤛᤠᤶᤔᤡᤴ ᤂᤢᤏᤧ᤹ᤏᤢ ᤘᤠ᤹ᤖᤥ— ᤛᤡᤰᤁᤢᤶ ᤏᤡᤱᤘᤠ᤹ ᤏᤢ ᤂᤠᤛᤡᤱᤏᤡ᤺ᤵᤔᤠ ᤕᤠᤶᤛᤠᤶ. ᤛᤢᤈᤠ ᤏᤢ ᤔᤢᤰᤛᤠᤶᤗᤧ ᤕᤠᤶᤛᤠᤶ. ᤂᤧᤒᤩᤠᤱ ᤏᤡᤱᤘᤠ᤹ ᤏᤧᤜᤡ ᤏᤢ ᤕᤜᤘᤣ ᤍᤠᤱᤒᤠᤴ ᤔᤡᤱᤛᤥ ᤀᤡᤱᤎᤠᤱ ᤐᤡᤔᤠ ᤕᤠᤶᤛᤠᤶᤔᤡᤴ ᤂᤢᤏᤧ᤹ᤀᤥ ᤕᤢᤖᤥ॥

³ ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤀᤡᤱᤈᤠᤱ ᤂᤧᤶᤔᤠ ᤏᤢ ᤁᤡᤵᤔᤠ ᤂᤥᤛᤢᤒᤠᤀᤥ ᤂᤢᤏᤧ᤹ ᤛ᤺ᤳᤗᤥ॥ ᤔᤡᤰᤁᤡᤸᤗᤧ ᤏᤡᤛᤢᤀᤠᤱ ᤂᤢᤏᤧ᤹ ᤂᤠᤛᤧᤴ ᤔᤧᤗᤥ᤺ᤴᤍᤢᤴᤗᤥ. ᤜᤧᤰᤁᤩᤠᤱ ᤏᤧᤰᤂᤥ᤹ᤒᤠᤸᤗᤧ ᤂᤧᤵᤛᤢᤀᤠᤱᤗᤰ ᤏᤡ᤺ᤴᤎᤥ ᤔᤧᤈᤥᤃᤢᤴᤗᤥ॥

⁴ ᤁᤖ ᤁᤢᤜᤥ᤺ᤵᤔᤠ ᤁᤢᤛᤠᤰᤔᤠᤀᤥ ᤁᤧᤎᤠᤒᤠᤀᤠᤱ ᤁᤧᤘᤠ᤹ᤒᤠ ᤔᤧᤴᤇᤠᤶ ᤕᤠᤵᤔᤡᤜᤠ᤹ᤖᤧ ᤗᤠᤃᤡ ᤂᤢᤏᤧ᤹ ᤁᤢᤍᤥ᤺ᤵᤔᤠ ᤂᤠᤛᤧᤴ ᤗᤥ᤺ᤴᤍᤢ ᤐᤡᤖᤢᤛᤡᤖᤥ. ᤜᤧᤰᤁᤩᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤁᤥᤒᤠ ᤕᤠᤱᤃᤧᤛᤠ᤹ᤒᤠ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤂᤢᤏᤧ᤹ ᤏᤢᤖᤡᤰᤁᤠᤱ ᤂᤠᤛᤧᤴ ᤗᤥ᤺ᤴᤍᤢ ᤐᤡᤖᤢᤛᤡᤖᤥ॥ ᤜᤧᤰᤁᤩᤠᤱ ᤁᤢᤒᤠ᤺ᤴᤈᤠᤰ ᤔᤢᤰᤛᤠᤶᤔᤡᤸᤗᤧ ᤕᤥ᤹ᤒᤠ ᤗᤠᤈᤣᤴ ᤕᤱᤗᤥ. ᤁᤢᤶᤒᤪᤠᤀᤥᤒᤠ ᤁᤢᤛᤰᤔᤠ᤺ᤸᤗᤧ ᤁᤢ᤹ᤀᤡᤃᤧᤓᤧᤶᤒᤠ ᤔᤏᤠᤜᤠ᤹ ᤔᤧᤰᤂᤢᤛᤡᤖᤥ॥

⁵ ᤂᤢᤏᤧ᤹ ᤕᤢᤵᤛᤢᤒᤠ ᤕᤢᤵᤐᤧᤴ ᤛᤠᤶᤕᤥᤒᤠ ᤐᤥᤱᤗᤥ. ᤜᤧᤰᤁᤩᤠᤱ ᤂᤢᤏᤧ᤹ ᤕᤢᤵᤛᤢᤒᤠ ᤑ᤹ᤀᤡ᤺ᤴ ᤛᤧᤰᤂᤠᤒᤠ ᤐᤥᤱᤗᤥ॥

⁶ ᤂᤧᤴ ᤕᤧᤴᤏᤥ ᤐᤖᤠᤒᤧᤴ ᤏᤢ ᤔᤧᤸᤗᤢᤰ ᤆᤩᤠ᤺ᤰᤁᤧᤴ ᤛᤥᤛᤥᤖᤡᤰ ᤘᤠ᤹ᤛᤡᤖᤥ. ᤜᤧᤰᤁᤩᤠᤱ ᤌᤧᤖᤡᤱᤒᤠᤴ ᤏᤢ ᤔᤧ᤺ᤴᤍᤠᤰ ᤛᤠ᤺ᤵᤔᤧᤴ ᤛᤥᤖᤡᤰ ᤏᤧᤛᤡᤖᤥ॥ ᤜᤧᤰᤁᤩᤠᤱ ᤐᤡᤳᤛᤠᤳᤋᤧᤴ ᤏᤢ ᤂᤡᤖᤡᤱᤒᤠᤴ ᤌᤡᤰᤔᤧᤳᤌᤡᤰ ᤐᤥᤱᤛᤡᤀᤠᤱ ᤏᤧᤛᤡᤖᤥ. ᤂᤧᤒᤩᤠᤱ ᤆᤢᤰᤛᤠ ᤜᤡᤴᤈᤠ᤹ ᤌᤡᤰᤗᤧ ᤂᤧᤱᤜᤠ᤹ ᤋᤡ᤺ᤰᤋᤢᤛᤡᤖᤥ॥

⁷ ᤐᤡᤳᤜᤠ᤹ ᤏᤢ ᤔᤠ᤹᤺ᤕᤢᤜᤠ᤹ ᤗᤳᤇᤠ ᤆᤠᤖᤠᤶᤔᤠᤍᤧᤴᤏᤥ ᤆᤠᤔᤧᤖᤠᤶᤗᤥ. ᤜᤧᤰᤁᤩᤠᤱ ᤂᤧᤴ ᤌᤰᤛᤠ ᤛᤠᤜᤠ᤹ ᤌᤡᤰᤋᤧᤴᤏᤥ ᤔᤧᤏᤧᤛᤡᤱᤅᤠᤱ ᤔᤧᤏᤧᤖᤥ॥ ᤂᤧᤒᤩᤠᤱ ᤐᤡᤳᤋᤧᤸᤗᤧ ᤆᤒᤠ ᤜᤧᤰᤁᤣ ᤌᤧᤖᤡᤱᤒᤧᤸᤗᤧ ᤁᤢᤜᤣᤍᤩᤠ᤹ ᤕᤠ᤹ᤗᤠᤱᤅᤡᤴ ᤆᤖᤥ॥

⁸ ᤏᤢᤃᤧᤎᤢᤱᤒᤠ ᤀᤅᤧ᤺ᤰᤘᤠᤴ ᤕᤠᤱᤜ᤺ᤰ ᤀᤛᤣ᤺ᤰᤁᤡᤸᤗᤧ ᤁᤢᤄᤠ᤺ᤸᤗᤧ ᤁᤢᤒᤣᤛᤠᤱ ᤁᤣ᤺ᤰᤘᤠ ᤆᤥᤰᤗᤥ. ᤜᤧᤰᤁᤩᤠᤱ ᤛᤠ᤹ᤖᤡᤰ ᤁᤧᤀᤠ᤺ᤵᤐᤠ ᤁᤢᤏᤡᤱ ᤁᤧᤕᤠᤰᤐᤠ ᤀᤛᤣ᤺ᤰᤁᤧᤸᤗᤧ ᤁᤢᤜᤱᤅᤥ ᤂᤠᤖᤰ ᤏᤢᤎᤢᤱᤔᤠ ᤁᤧᤗᤧᤵᤐᤠ ᤜᤡᤴᤈᤠ᤹ᤀᤡᤸᤗᤧ ᤁᤢᤜᤢᤰᤁᤡᤴ ᤁᤣ᤺ᤳᤋᤢᤖᤥ॥

⁹ ᤂᤧᤱᤜᤠ᤹ᤖᤧ ᤀᤠᤱᤃᤠ᤹ ᤁᤧᤖᤧᤰ ᤀᤠᤛᤣᤛᤣ ᤁᤥ᤺ᤰᤔᤠᤀᤥ ᤋᤠᤵᤑᤧ᤺ᤶᤒᤠ ᤀᤡᤃᤪ ᤜᤠᤴᤋᤡ ᤌᤣᤀᤠᤱ ᤆᤥ᤺ᤰᤔᤠ ᤔᤧᤴᤇᤢᤰᤋᤢᤴᤗᤥ. ᤌᤣᤀᤠᤱᤓᤧᤸᤗᤧ ᤘᤜ᤺ᤱᤅᤡᤴ ᤆᤫᤠ᤺ᤳᤋᤡᤸᤗᤧ ᤋᤡᤶᤒᤠ ᤁᤢᤀᤡᤛᤡᤰ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤡᤰᤁᤢᤶ ᤏᤡᤱᤘᤠ᤺ᤸᤗᤧ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤛᤎᤧᤰ ᤋᤡᤶᤗᤥ॥

ᤁᤧᤛᤧᤒᤠ ᤁᤧᤒᤣ᤺ᤰᤐᤠᤒᤠᤜᤠ᤹ ᤔᤧᤏᤢ᤺ᤱ᤹

¹⁰ ᤂᤧᤸᤗᤧ ᤕᤠ᤺ᤴᤍᤡᤰ ᤕᤡᤛᤤᤖᤧ ᤁᤢᤎᤠ᤺ᤰᤗᤠᤶ ᤗᤳᤇᤠ ᤁᤢᤛᤱ ᤜᤠᤱᤎᤡᤰ ᤐᤥᤱ॥ ᤂᤢᤏᤧ᤹ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤁᤧᤖᤧᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤗᤠᤃᤡ ᤏᤡᤛᤠ ᤜᤧᤰᤁᤣ ᤔᤡᤰᤛᤣᤴ ᤐᤥᤱ ᤜᤧᤰᤁᤩᤠᤱ ᤂᤢᤏᤧ᤹ᤀᤥ ᤔᤧᤈᤢᤶ. ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤏᤠ᤺ᤶᤛᤡᤱᤔᤠ ᤋᤧᤴᤏᤡᤴ ᤔᤡᤔᤡᤍᤡᤱᤃᤧᤴ ᤐᤥᤱ॥

¹¹ ᤂᤧᤴ ᤕᤧᤴᤏᤡᤴ ᤋᤠᤀᤠᤱ ᤍᤠᤱᤒᤧᤸᤗᤧ ᤕᤠᤶᤔᤥ ᤌᤡᤰᤗᤧᤱ ᤂᤢᤏᤧ᤹ ᤁᤢᤔᤢᤰᤛᤠᤶᤔᤡᤴ ᤀᤥ᤺ᤴᤎᤠᤰᤋᤢᤛᤡ ᤜᤧᤰᤁᤩᤠᤱ ᤀᤛ᤻ᤛᤢᤖᤗᤠᤶ. ᤕᤥᤛᤔᤠ ᤔᤡᤛᤪᤗᤠᤶ ᤏᤢ ᤌᤥᤛᤔᤠ ᤔᤡᤛᤪᤗᤠᤶ. ᤁᤢᤛᤗᤠᤶ. ᤀᤣᤗᤠᤔᤗᤠᤶ. ᤒᤣᤒᤡᤗᤥᤏᤡᤕᤠᤗᤠᤶ ᤏᤢ ᤜᤔᤠᤋ ᤗᤠᤈᤣ᤹ᤜᤠ᤹ᤗᤠᤶ ᤜᤧᤰᤁᤩᤠᤱ ᤁᤧᤖᤧᤰ ᤔᤠ᤺ᤱᤄᤠ ᤔᤠ᤺ᤱᤄᤠᤒᤠ ᤘᤖ᤺ᤱᤅᤡᤸᤗᤧ ᤁᤢᤕᤠᤀᤥ ᤁᤧᤏᤧᤒᤠ ᤘᤠᤃᤵᤂᤠᤶ ᤗᤠᤈᤣ᤹ᤜᤠ᤹ᤀᤥᤗᤠᤶ ᤂᤢᤏᤧ᤹ ᤁᤢᤔᤏᤠᤜᤠ᤹ ᤕᤠᤶᤔᤥ ᤀᤡᤛᤪᤠᤀᤡᤗ ᤗᤠᤈᤣ᤹ᤀᤥ ᤏᤢ᤺ᤰᤋᤢ᤹ ᤋᤠᤖᤢᤛᤡᤖᤥ॥

¹² ᤕᤜᤘᤣ ᤍᤠᤱᤒᤧᤸᤗᤧ ᤁᤧᤖᤧᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤗᤳᤇᤠ ᤏᤡᤛᤠᤎᤡᤰ ᤜᤠᤰᤋᤢᤖᤥ. ᤜᤧᤰᤁᤩᤠᤱ ᤀᤡᤛᤪᤠᤀᤡᤗ ᤗᤠᤈᤣ᤹ᤗᤠᤶ ᤗᤠ᤺ᤰᤁᤠᤳ ᤔᤧᤗ᤺ᤳᤋᤢᤛᤡᤒᤠ ᤔᤏᤠᤜᤠ᤹ ᤏᤢ ᤑᤢᤳᤇᤡᤱᤇᤠ᤺ᤱ ᤁᤧᤛᤧᤒᤠ ᤕᤜᤢᤍᤠᤒᤠ ᤔᤏᤠᤜᤠ᤹ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤁᤧᤖᤧᤰ ᤐᤡᤛᤠᤱᤗᤠᤶ ᤑᤢᤰᤂᤢ ᤋᤠᤖᤢᤛᤡᤖᤥ॥

¹³ ᤀᤡᤛᤪᤠᤀᤡᤗ ᤜᤠᤱᤈᤢᤶᤔᤡᤴ ᤀᤠᤸᤗᤀᤠᤱᤎᤥ ᤕᤜᤢᤍᤠ ᤜᤠᤱᤈᤢᤶᤔᤡᤴᤏᤢ ᤁᤢᤏᤠᤔᤧᤜᤧᤴᤏᤧᤴᤗᤥ. ᤜᤧᤰᤁᤩᤠᤱ ᤕᤜᤢᤍᤠᤴ ᤀᤡᤛᤪᤠᤀᤡᤗᤖᤧ ᤁᤢᤏᤡᤱᤔᤡ ᤔᤧᤒᤥᤱᤏᤧᤴᤗᤥ॥

¹⁴ ᤂᤧᤱᤜᤠ᤹ ᤔᤧᤓᤢᤱᤛᤡᤱᤅᤠᤱ ᤏᤠᤶᤎᤠ ᤐᤡᤛᤠᤱᤒᤠ ᤑᤡᤗᤡᤛ᤻ᤋᤡ ᤗᤠᤈᤣ᤹ᤀᤥ ᤁᤧᤏᤧᤒᤠ ᤕᤠᤰᤁᤣ᤺ᤰᤁᤣ᤺ᤰᤐᤠᤍᤧᤴᤏᤥ ᤔᤧᤛ᤺ᤰ ᤔᤧᤒᤣ᤺ᤰᤗᤥ॥ ᤂᤧᤱᤜᤠ᤹ ᤔᤧᤍᤱᤛᤡᤱᤅᤠᤱ ᤏᤠᤱᤃᤧᤴ ᤐᤡᤛᤠᤱᤒᤠ ᤔᤏᤠᤜᤠ᤹ ᤔᤧᤏᤠᤵᤋᤢᤛᤡᤖᤥ. ᤂᤧᤱᤜᤠ᤹ᤖᤧ ᤀᤧᤍᤥᤔ ᤏᤢ ᤔᤥᤀᤠᤒ ᤗᤠᤈᤣ᤹ᤜᤠ᤹ ᤔᤧᤗᤡᤛᤢᤖᤥ. ᤂᤧᤒᤩᤠᤱ ᤀᤶᤔᤥᤏᤒᤠ ᤔᤏᤠᤜᤠ᤹ ᤂᤧᤱᤜᤠ᤹ᤖᤧ ᤕᤢᤰᤁᤥ ᤔᤧᤍᤠᤖᤢᤛᤡᤖᤥ॥

¹⁵ ᤕᤜᤘᤣ ᤍᤠᤱᤒᤧᤸᤗᤧ ᤜᤧ᤺ᤳᤋᤠᤱᤒᤠ ᤘᤖ᤺ᤱᤅᤡᤴ ᤆᤵᤐᤪᤧᤰ ᤆᤵᤗ ᤕᤠ᤺ᤴᤍᤢᤖᤥ ᤜᤧᤰᤁᤩᤠᤱ ᤛᤢᤖᤡᤳ ᤁᤣᤈᤱ ᤜᤢᤖ ᤕᤠ᤺ᤴᤍᤢᤀᤠᤱ ᤕᤢᤑᤪᤣᤋᤡᤛ ᤘᤜ᤺ᤱᤅᤡᤴᤏᤠᤱ ᤜᤣᤖ ᤆᤥᤃᤢᤖᤥ॥ ᤂᤧᤒᤩᤠᤱ ᤂᤧ᤹ᤕᤥ ᤆᤢᤈᤢᤰᤛᤠ ᤏᤢᤛᤡ ᤘᤜ᤺ᤱ ᤔᤧᤒᤥᤱᤗᤥ. ᤂᤧᤴ ᤘᤜ᤺ᤱᤜᤠ᤹ ᤀᤠᤳᤋᤡᤴᤜᤠ᤹ᤖᤧᤛᤠᤱ ᤀᤢᤛᤢᤖᤢ ᤆᤠ᤺ᤰᤔᤠ ᤔᤧᤛᤢᤰᤋᤢᤖᤥ॥

¹⁶ ᤔᤡᤛᤪ ᤗᤠᤈᤣ᤹ᤗᤠᤶ ᤀᤡᤛᤪᤠᤀᤡᤗᤡᤜᤠ᤹ ᤔᤧᤏᤢ᤺ᤰᤛᤧᤸᤗᤧ ᤐᤥ᤺ᤰᤂᤧᤒᤠ ᤁᤢᤀᤡᤛᤡᤰ ᤁᤧᤜᤡᤱᤒᤠ ᤁᤧᤕᤠ᤺ᤰᤐᤠ ᤂᤢᤏᤧ᤹ ᤁᤢᤔᤏᤠᤜᤠ᤹ ᤀᤛ᤻ᤛᤢᤖᤗᤠᤶ ᤗ᤺ᤶᤔᤠᤓᤧᤶᤔᤠᤖᤧ ᤗᤠᤃᤡ ᤔᤠᤖᤠᤶᤎᤡᤰ ᤐᤥᤱᤗᤥ॥