ᤕᤛᤤᤕᤠ 10 - LIFOTNT1 ᤔᤧᤴᤘᤠ᤹ᤔᤏᤠᤒᤠ ᤂᤠᤛᤧᤴ ᤗᤥ᤺ᤶᤔᤠ ᤌᤡᤶ ᤁᤧᤈᤥ᤺ᤰᤐᤠᤜᤠ᤹ᤃ. ᤔᤧᤈᤡ᤺ᤳᤋᤧ ᤔᤧᤛᤩᤧᤖᤥ. ᤂᤧᤱᤜᤠ᤹ᤖᤧᤃ ᤋᤢᤰᤂᤣ ᤆᤠ᤺ᤵᤔᤠ ᤆᤥ᤺ᤰᤌᤡᤶᤜᤠ᤹ ᤔᤧᤈᤥᤃᤢᤖᤥ॥ 2 ᤕᤠᤱᤃᤧᤛᤠ᤹ᤒᤠᤜᤠ᤹ᤖᤧ ᤂᤢᤴᤇᤡ᤹ ᤕᤢᤰᤁᤡᤴ ᤏᤠᤵᤔᤠᤛᤡ ᤏᤢ ᤏᤡᤱᤄᤢᤶᤔᤥ ᤁᤧᤎᤠᤒᤠ ᤀᤠᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤂᤠᤛᤧᤴ ᤔᤧᤴᤈᤥ᤺ᤰᤔᤠᤖᤧ ᤗᤠᤃᤡ. ᤜᤧᤰᤁᤩᤠᤱ ᤔᤣᤔᤣᤍᤢᤔᤠᤜᤠ᤹ᤖᤧ ᤔᤧᤃᤳᤋᤢᤒᤠ ᤐᤠ᤺ᤴᤜᤠ᤹ ᤏᤠᤵᤔᤠᤛᤡᤖᤧ ᤗᤠᤃᤡ ᤂᤧᤒᤩᤠᤱ ᤕᤧᤳᤇᤠᤒᤠ ᤕᤧᤳᤇᤠᤔᤠᤜᤠ᤹ᤖᤧ ᤔᤧᤃᤳᤋᤢᤒᤠ ᤐᤠ᤺ᤴᤜᤠ᤹ ᤏᤠᤵᤔᤠᤛᤡᤖᤧ ᤗᤠᤃᤡ ᤂᤧᤱᤜᤠ᤹ᤖᤧ ᤀᤰᤂᤣ ᤔᤧᤈᤥᤃᤢᤖᤥ॥ 3 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤡᤏᤡ᤹ ᤂᤢᤶᤍᤡᤱ ᤁᤧᤒᤡᤖᤧᤸᤗᤧ ᤜᤧᤰᤁᤩᤠᤱ ᤔᤠ᤺ᤱᤄᤠ ᤗᤠᤈᤣ᤹ᤗᤠᤶᤒᤠ ᤋᤢᤰᤂᤣ ᤗᤠᤰᤂᤣᤜᤠ᤹ ᤂᤡᤏᤡ᤹ ᤛᤶᤎᤠᤱ ᤐᤠᤱᤄᤢ ᤋᤠᤛᤢᤸᤗᤧ ᤂᤧᤏᤡ᤹ ᤀᤠᤰᤂᤣ ᤁᤧᤈᤥᤃᤢᤶᤒᤣ᥅ ᤜᤧᤰᤁᤩᤠᤱ ᤏᤠᤱᤛᤡᤱᤛᤧ ᤜᤠ᤺ᤳᤗᤧ᤹ᤀᤥ ᤁᤧᤒᤣᤃᤡᤒᤣ᥅ ᤂᤧᤏᤡ᤹ ᤕᤠᤱᤛᤠᤁᤢᤴᤎᤣᤜᤠ᤹ ᤀᤠᤳᤋᤡ ᤁᤧᤈᤡᤰᤂᤢᤶᤔᤡᤸᤗᤧ ᤋᤠᤱᤒᤠᤒᤣ᥅ 4 ᤔᤧᤍᤧᤶᤛᤢ ᤔᤧᤍᤣ᤹ᤖᤢᤛᤡᤒᤠᤜᤠ᤹ᤏᤢ ᤛᤥᤛᤥᤖᤡᤰ ᤛ᤹ᤛᤡᤱᤔᤠ ᤜᤧᤰᤁᤩᤠᤱ ᤔᤧᤛᤧᤖᤢᤛᤡᤒᤠᤜᤠ᤹ᤖᤧ ᤂᤢᤏᤡ᤹ ᤗᤢᤶᤔᤥ ᤋᤥ᤺ᤰᤔᤠᤀᤠᤱ ᤆᤥ᤺ᤶᤔᤠᤏᤢ᤺ᤸᤗᤧ ᤘᤣ᤹ ᤏᤢᤒᤠ ᤌᤣᤀᤠᤱ ᤜᤥᤵᤗᤥ॥ ᤜᤧᤰᤁᤣᤛᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤡᤰᤁᤧᤴ ᤔᤧᤈᤡ᤺ᤰᤋᤢᤴᤗᤥ ᤂᤧᤒᤩᤠᤱ ᤂᤢᤶᤍᤡᤱ ᤐᤡᤔᤠᤛᤡᤖᤧ ᤗᤠᤃᤡ ᤂᤢᤏᤧ᤹ ᤁᤢᤜᤢᤰᤁᤡᤴ ᤀᤠᤸᤗᤛᤠᤱ ᤑᤥ᤺ᤰᤂᤢᤀᤠᤱᤅᤣ ᤐᤳᤗᤥ॥ ᤀᤛ᤻ᤛᤢᤖᤒᤠ ᤜᤠᤱᤅᤡᤴ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤢᤶᤍᤡᤱ ᤐᤡᤖᤢ 5 ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢ. “ᤆᤡ᤺ᤳᤋᤧᤛᤩᤧᤖᤥ᥄ ᤆᤡ᤺ᤳᤋᤧᤛᤩᤧᤖᤥ᥄᥄ ᤀᤛ᤻ᤛᤢᤖ ᤗᤠᤈᤣ᤹ᤀᤣ. ᤀᤠᤳᤋᤡᤴᤏᤢ ᤀᤠᤱᤃᤠ᤹ ᤋᤸᤗᤡᤰ ᤀᤠᤛᤡᤰ ᤐᤥᤃᤧᤀᤠᤱ ᤘᤠ᤹ᤖᤥ. ᤂᤧᤴ ᤂᤢᤶᤍᤡᤱ ᤐᤡᤔᤠᤖᤧ ᤗᤠᤃᤡ ᤂᤧᤏᤧ᤹ ᤀᤠᤱᤃᤠ᤹ ᤀᤠᤜᤢᤰᤁᤥ ᤔᤖ᤺ᤱᤃᤩᤠ ᤆᤥ᤺ᤰᤏᤧᤀᤠᤱ ᤘᤠ᤹ᤖᤥ॥ 6 ᤔᤧᤏᤠᤵᤋᤢᤛᤡᤒᤠ ᤆᤡᤃᤰᤘᤠᤜᤠ᤹ ᤏᤠᤵᤔᤠᤛᤡ ᤏᤢ ᤜᤡᤵᤔᤠᤛᤡ ᤌᤰᤔᤠᤛᤡᤀᤠᤱ ᤔᤧᤱᤔᤠᤛᤡ ᤑᤠ᤹ᤀᤠᤱ ᤔᤠᤖᤠᤶᤔᤥᤒᤠ ᤗᤧᤰᤘᤠᤴ ᤁᤢᤀᤡᤛᤡᤰ ᤆᤡᤍᤥ᤹ ᤆᤡᤍᤥ᤹ ᤋᤥ᤹ᤔᤠᤛᤡᤖᤧ ᤗᤠᤃᤡ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤁᤢᤛᤡᤱ ᤔᤧᤴᤏᤡ᤺ᤵᤏᤠᤒᤠ ᤛᤢᤘᤠᤱᤅᤡᤴ ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤛᤡᤰ ᤁᤧᤓᤥᤱᤒᤠᤜᤠ᤹ᤖᤧ ᤂᤢᤴᤇᤡ᤹ ᤋᤰᤗᤧᤱᤘᤠᤀᤥ ᤂᤧᤱᤜᤠ᤹ ᤜᤠᤖᤠᤜᤠᤖᤠ ᤐᤠᤱᤄᤢᤱᤛᤡᤱᤅᤠᤱ ᤘᤠ᤹ᤖᤥ॥ 7 ᤁᤖ ᤂᤧᤸᤗᤧ ᤀᤰᤋᤱᤒᤠ ᤁᤢᤏᤡᤱᤘᤠ᤹ ᤜᤥᤵᤗᤥ ᤜᤧᤰᤁᤩᤠᤱ ᤂᤧᤸᤗᤧ ᤀᤰᤂᤣ ᤆᤥ᤺ᤰᤔᤠᤀᤠᤱ ᤔᤧᤀᤡ᤺ᤳᤋᤢᤴᤗᤥ॥ ᤁᤖ ᤂᤧᤸᤗᤧ ᤁᤢᤏᤡᤱᤘᤠ᤹ᤃ ᤀᤰᤋᤱᤒᤠᤏᤡ ᤘᤠ᤹ᤖᤥ. ᤕᤖᤡᤰ ᤔᤏᤠᤜᤠ᤹ ᤔᤧᤱᤔᤠᤛᤡ ᤏᤢ ᤕᤖᤡᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤂᤢᤴᤇᤡ᤹ ᤔᤡᤱ ᤔᤠᤔᤠ ᤐᤡᤔᤠᤛᤡ ᤁᤧᤗ᤹ᤒᤠᤏᤡ ᤀᤡ᤺ᤳᤋᤢᤀᤠᤱ ᤘᤠ᤹ᤖᤥ॥ 8 ᤂᤧᤴ ᤀᤛ᤻ᤛᤢᤖᤒᤠ ᤜᤠᤱᤅᤡᤴ ᤕᤶᤒᤠ ᤜᤧᤴᤇᤡᤱᤒᤠ ᤐᤠ᤺ᤳᤋᤢᤖᤥ. ‘ᤀᤠᤱᤃᤠ᤹ ᤀᤠᤎᤰᤛᤢᤒᤠ ᤀᤠᤎᤰᤔᤥᤒᤠᤜᤠ᤹ ᤜᤠᤱᤛᤡᤖᤥ॥ 9 ᤀᤠᤱᤃᤠ᤹ ᤁᤸᤏᤥ. ᤁᤷᤁᤔᤡᤛ. ᤜᤔᤠᤋ ᤏᤢ ᤀᤷᤐᤠᤍ ᤕᤧᤰᤕᤰᤜᤠ᤹ ᤏᤠ᤺ᤴᤍᤢᤱᤛᤡᤱᤗᤥ॥ ᤜᤧᤰᤁᤩᤠᤱ ᤀᤠᤱᤃᤠ᤹ ᤛᤠᤔᤖᤡᤕᤠ ᤏᤢ ᤍᤔᤛ᤻ᤁᤛ ᤕᤧᤰᤕᤰᤜᤠ᤹ᤀᤠᤱ ᤏᤠ᤺ᤴᤍᤢᤱᤛᤡᤱᤗᤥ॥ 10 ᤏᤠᤘᤠᤀᤡᤳᤗᤠ ᤛᤧᤘᤠ ᤁᤧᤔᤧᤵᤐᤠ ᤗᤠᤈᤣ᤹ᤜᤠ᤹ ᤀᤠᤱᤃᤠ᤹ ᤜᤢᤰᤁᤠᤵ ᤔᤧᤳᤇᤡᤅᤠᤖᤥ. ᤂᤧ᤹ᤕᤥ ᤔᤧᤄᤥ᤺ᤴᤍᤢ ᤔᤧᤗᤰᤋᤢᤛᤡᤀᤠᤱ ᤔᤧᤈᤥᤃᤢᤛᤡᤒᤠ ᤏᤠᤘᤠᤀᤡᤳᤗᤠᤜᤠ᤹ᤃ ᤕᤖᤢᤛᤗᤧᤔ ᤏᤢ ᤛᤠᤔᤖᤡᤕᤠᤒᤠ ᤏᤠᤘᤠᤀᤡᤳᤗᤠᤜᤠ᤹ᤏᤢ᤺ᤸᤗᤧᤀᤠᤱ ᤕᤖᤡᤰ ᤔᤧᤘᤕᤧᤖᤥ॥ 11 ᤀᤠᤱᤃᤠ᤹ ᤛᤠᤔᤖᤡᤕᤠᤴ ᤂᤠᤵᤐᤢᤌᤩ᤺ᤱ ᤆᤥᤃᤢᤱᤅᤠᤱ ᤏᤧᤖᤥ ᤜᤧᤰᤁᤩᤠᤱ ᤂᤧᤵᤔᤥᤒᤠ ᤁᤧᤖᤧᤰ ᤏᤠᤘᤠᤀᤡᤳᤗᤠᤜᤠ᤹ ᤔᤧᤰᤂᤢᤱᤛᤡᤱᤗᤥ. ᤜᤧᤰᤁᤣᤗ᤹ᤖᤡᤰᤁᤣ ᤕᤖᤢᤛᤗᤧᤔ ᤏᤢ ᤂᤧᤴ ᤕᤧᤰᤕᤰᤁᤥ ᤔᤠᤱᤛᤧᤘᤠ ᤔᤧᤔᤧᤳᤋᤢᤛᤡᤒᤠ ᤏᤠᤘᤠᤀᤡᤳᤗᤠᤜᤠ᤹ ᤜᤷᤃᤢᤵ ᤔᤧᤰᤂᤢᤱᤛᤡᤱᤗᤥ॥’” 12 ᤍᤠᤱᤒᤧᤸᤗᤧ ᤛᤡᤕᤥᤏ ᤁᤥ᤺ᤰᤔᤠᤴ ᤏᤢ ᤕᤖᤢᤛᤗᤧᤔ ᤕᤧᤰᤕᤰᤁᤥ ᤁᤧᤕᤢᤱᤒᤠ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤋᤰᤗᤧᤱᤘᤠᤀᤥ ᤕᤠ᤺ᤶᤒᤰ ᤆᤥ᤺ᤰᤔᤠ ᤛᤢᤖᤢ᤹. ᤂᤧᤒᤩᤠᤱ ᤂᤢᤏᤧ᤹ ᤐᤠ᤺ᤳᤋᤢ᤹. “ᤀᤠᤱᤃᤠ᤹ ᤂᤧᤴ ᤕᤶᤒᤠ ᤁᤧᤗᤧᤱᤛᤡᤱᤒᤠ ᤏᤢ ᤀᤠᤱᤍᤡᤱ ᤁᤧᤗ᤹ᤒᤠ ᤀᤛ᤻ᤛᤢᤖᤒᤠ ᤜᤠᤱᤅᤡᤴ ᤂᤢᤶᤍᤡᤱ ᤐᤡᤖᤢᤱ᤹॥ 13 ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤀᤠᤒᤠᤅᤣ ᤐᤠ᤺ᤳᤋᤢᤖᤥ. “‘ᤀᤠᤱᤃᤠ᤹ ᤀᤠᤔᤢᤰᤛᤠᤶ ᤏᤢ ᤀᤠᤒᤠᤅᤣ ᤀᤠᤱᤃᤠ᤹ ᤀᤠᤛᤡᤰᤁᤢᤶ ᤏᤡᤱᤘᤠ᤺ᤸᤗᤧ ᤁᤴ ᤆᤥᤃᤢᤱᤒᤠᤖᤥ. ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤂᤠᤛᤡᤱᤏᤡ᤺ᤵᤔᤠ ᤏᤡᤱᤘᤠ᤹ ᤁᤳᤋᤢᤱᤗᤥ॥ ᤜᤧᤰᤁᤩᤠᤱ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤂᤢᤴᤇᤡ᤹ ᤀᤡ᤺ᤴᤍᤥᤜᤠ᤹ ᤆᤳᤋᤢᤱᤍᤣᤛᤢᤱᤗᤥ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤆᤠᤕᤠᤱᤔᤠ ᤏᤢ ᤕᤠᤱᤛᤠᤁᤢᤴᤎᤣ ᤕᤠᤱᤔᤠᤜᤠ᤹ᤀᤠᤱ ᤏᤠᤵᤋᤢᤱ ᤋᤣ᤹ᤖᤢᤱ ᤐᤡᤖᤢᤱᤛᤡᤱᤗᤥ॥ ᤂᤧᤒᤩᤠᤱ ᤗᤳᤇᤠ ᤁᤢᤜᤠᤱᤘᤠ ᤁᤢᤔᤠᤱᤘᤠ ᤁᤧᤕᤠᤰᤐᤠ ᤔᤏᤠ ᤁᤢᤛᤡᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤜᤠᤱᤜᤠ᤹ ᤕᤢᤰᤋᤢᤱᤛᤡᤱᤅᤠᤱ ᤔᤧᤘᤠ᤹ᤖᤥ॥ 14 ᤁᤢᤓᤠᤖᤧ ᤂᤢᤴᤇᤡ᤹ ᤜᤢᤰᤁᤡᤴ ᤐᤢ᤺ᤸᤗᤧ ᤁᤢᤜᤠᤵᤐᤥ ᤔᤧᤃᤧᤳᤋᤢᤒᤠ ᤁᤢᤛᤡᤱ ᤀᤠᤱᤃᤠ᤹ ᤀᤠᤜᤢᤰᤁᤧᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤁᤧᤖᤧᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤂᤢᤴᤇᤡ᤹ ᤕᤠᤱᤛᤠᤁᤢᤴᤎᤣᤀᤥ ᤁᤧᤖᤧᤀᤠᤱ ᤘᤠ᤹ᤖᤥ॥ ᤜᤧᤰᤁᤩᤠᤱ ᤐᤢ᤺ᤸᤗᤧ ᤗᤧᤖᤢᤎᤒᤠ ᤁᤢᤎᤡ᤺ᤴᤏᤧᤴ ᤁᤢᤓᤠ ᤔᤏᤠᤎᤡᤰᤗᤧ ᤑᤢᤰᤂᤢᤒᤠ ᤜᤧᤰᤁᤣ ᤀᤠᤱᤃᤠ᤹ ᤁᤧᤖᤧᤰ ᤗᤠᤈᤣ᤹ᤜᤠ᤹ ᤑᤢᤰᤂᤢᤱᤛᤡᤱᤗᤥ॥ ᤁᤖ ᤐᤢᤜᤠ᤹ᤖᤧ ᤂᤢᤴᤇᤡ᤹ ᤗᤠᤵᤜᤠ᤹ ᤑᤧᤍᤧᤳᤋᤠᤱ ᤔᤧᤶᤔᤧᤳᤋᤢᤴᤗᤥ ᤜᤧᤰᤁᤩᤠᤱ ᤔᤧᤶᤒᤠᤖᤧᤴᤏᤠᤱᤗᤥ॥’” 15 ᤀᤥᤃᤠᤵ ᤁᤧᤈᤥ᤺ᤰᤐᤠ ᤔᤏᤠᤔᤧ᤺ᤴᤏᤣ ᤋ᤺ᤴᤍᤡᤴ ᤌᤣ ᤀᤠᤒᤠᤅᤣ ᤕᤶᤒᤠ ᤗᤧᤱᤛᤡᤱᤒᤡ᥅ ᤀᤡᤃᤪ ᤌᤣ ᤛᤡᤱᤃᤧᤜᤧᤰᤐᤠ ᤔᤏᤠ᤺ᤴᤏᤢ᤺ᤸᤗᤧᤀᤠᤱ ᤆᤧᤴᤍᤡᤖᤡᤴ ᤕᤶᤒᤠ ᤏᤡᤎᤠ᤺ᤶᤛᤡᤱᤒᤡ᥅ ᤌᤣ ᤜᤢᤰᤁᤧᤴ ᤔᤧᤴᤔᤢᤴᤏᤣ ᤀᤠᤒᤠᤅᤣ ᤋᤧ᤺ᤶᤓᤢᤰᤁᤡᤸᤗᤧᤖᤰ ᤜᤡᤵᤔᤠ ᤛᤢᤰᤋᤢᤒᤡ᥅ ᤌᤣ ᤁᤢᤀᤠ᤺ᤳ ᤌᤡᤰ ᤛᤥ᤺ᤳᤗᤠᤱᤅᤧᤴ ᤀᤠᤒᤠᤅᤣ ᤗᤠᤱᤄᤣ᤺ᤰᤔᤠ ᤛᤢᤰᤐᤡ᥅ 16 ᤁᤸᤗᤧᤆᤥᤃᤢᤸᤗᤧ ᤔᤢᤰᤛᤠᤶᤍᤠᤱᤒᤠ ᤍᤠᤱᤒᤧᤸᤗᤧ ᤀᤛ᤻ᤛᤢᤖᤒᤠ ᤜᤠᤱᤅᤡᤸᤗᤧ ᤁᤢᤎᤰᤛᤢᤒᤠᤜᤠ᤹ᤖᤧ ᤂᤢᤴᤇᤡ᤹ᤗᤢᤶᤔᤥ ᤀᤠᤛᤡᤛᤡᤒᤠ ᤋᤢᤰᤔᤠ ᤕ᤹ᤔᤠᤜᤠ᤹ ᤐᤠᤱᤄᤢ ᤋᤠᤛᤢᤖᤥ. ᤜᤧᤰᤁᤩᤠᤱ ᤂᤧᤸᤗᤧ ᤁᤢᤔᤡᤔᤡᤍᤡᤱ ᤛᤡᤃᤠᤱ ᤜᤢᤖᤢᤖᤢᤏᤠ ᤁᤧᤍᤡ᤺ᤵᤐᤠ ᤔᤡ ᤋᤡ᤺ᤳᤗᤥ॥ 17 ᤀᤡᤛᤪᤠᤀᤡᤗᤒᤠ ᤀᤥ᤺ᤳᤋᤡ᤺ᤴ ᤔᤡ ᤐᤥᤱᤗᤥ. ᤀᤡᤛᤪᤠᤀᤡᤗᤒᤠ ᤛᤣᤛᤣᤒᤠ ᤔᤠᤱᤅᤡᤴ ᤔᤡᤎᤢᤱᤍᤡᤱ ᤔᤡᤖᤠ᤺ᤰ ᤐᤥᤱᤗᤥ. ᤜᤧᤰᤁᤩᤠᤱ ᤂᤧᤴ ᤔᤡ᤺ᤸᤗᤧ ᤌᤡᤰᤕᤠ᤺ᤴᤎᤡᤰᤗᤧ ᤂᤧ᤹ᤕᤥᤒᤠ ᤋᤡᤱᤗᤠᤴ ᤏᤢ ᤛᤣᤷᤍᤠ᤺ᤰᤔᤠᤜᤠ᤹ ᤔᤡᤍᤡᤰᤁᤠᤱ ᤂᤠᤵᤐᤢᤌᤩ᤺ᤱ ᤆᤥᤃᤢᤖᤥ॥ 18 ᤂᤧᤸᤗᤧ ᤁᤢᤍᤠᤶᤓᤢᤱᤜᤠ᤹ ᤏᤢ ᤆᤠ ᤁᤧᤏᤢ᤹ᤒᤠ ᤏᤢᤒᤠ ᤐᤩᤠᤱᤛᤡᤜᤠ᤹ ᤛᤢᤎᤠ᤺ᤶ ᤔᤧᤰᤗᤥ ᤂᤧᤱᤃ ᤁᤧᤍᤢᤰᤐᤠᤀᤠᤱ ᤁᤧᤈᤵᤐᤠᤖ ᤁᤧᤒᤣ᤺ᤰᤐᤠ ᤔᤏᤠ ᤜᤧᤰᤋᤱᤒᤠ ᤐᤥᤱᤗᤥ॥ 19 ᤂᤧᤴ ᤛᤡᤱᤒᤢᤱᤜᤠ᤹ᤀᤥ ᤆᤒᤧ᤺ᤳᤇᤡᤰᤗᤰ ᤔᤧᤕᤢᤱ ᤔᤧᤕᤠ᤺ᤰᤗᤥ ᤂᤧᤴ ᤆᤒᤧ᤺ᤳᤇᤡᤰ ᤛᤡᤱᤒᤢᤱᤜᤠ᤹ ᤜᤡᤴᤈᤠ᤹ ᤌᤡᤰᤗᤧᤀᤠᤱ ᤀᤢᤛᤢᤖᤢ ᤏᤡ᤺ᤵᤔᤠ ᤛᤢᤰᤋᤢᤛᤡᤖᤥ॥ ᤀᤡᤛᤪᤠᤀᤡᤗᤒᤠ ᤁᤧᤍᤠᤱᤒᤠ ᤁᤧᤕᤠ᤺ᤰᤐᤠᤜᤠ᤹ 20 ᤂᤧᤴ ᤕᤧᤴᤏᤥ ᤀᤡᤛᤪᤠᤀᤡᤗᤗᤠᤶ ᤁᤧᤍᤠᤱᤒᤠ ᤁᤧᤕᤠ᤺ᤰᤐᤠᤜᤠ᤹. ᤁᤧᤜᤡᤱᤒᤠ ᤁᤧᤕᤠ᤺ᤰᤐᤠ ᤕᤠᤁᤢᤒᤖᤧ ᤁᤢᤔᤢ᤹ᤀᤡᤍᤠᤱᤛᤠᤜᤠ᤹ᤖᤧ ᤀᤠᤒᤠᤅᤣ ᤂᤢᤴᤇᤡ᤹ᤀᤥ ᤔᤧᤰᤔᤠᤛᤡᤔᤠ ᤁᤧᤍᤠ᤺ᤵᤐᤠ ᤛᤢᤘᤠᤱᤜᤠ᤹ᤀᤥ ᤂᤢᤴᤇᤡ᤹ ᤏᤡᤱᤘᤠ᤹ ᤔᤧᤴᤕᤢᤰᤂᤢᤴᤗᤥ. ᤁᤖ ᤀᤡᤛᤪᤠᤀᤡᤗᤒᤠ ᤛᤣᤛᤣ ᤏᤡᤱᤘᤠ᤹ᤑᤢᤔᤠᤱ. ᤕᤜᤘᤣ ᤍᤠᤱᤒᤠᤀᤥ ᤂᤢᤴᤇᤡ᤹ ᤏᤡᤱᤘᤠ᤹ ᤔᤧᤕᤢᤰᤂᤢᤖᤥ॥ 21 ᤂᤧᤱᤜᤠ᤹ᤗᤠᤶ ᤁᤧᤜᤡᤱᤒᤠ ᤁᤧᤕᤠ᤺ᤰᤐᤠᤜᤠ᤹. ᤕᤠᤁᤢᤒᤖᤧ ᤁᤢᤜᤡᤶᤛᤕᤱᤅᤥᤗᤠᤶ ᤁᤧᤍᤠᤱᤒᤠᤜᤠ᤹ ᤔᤢᤰᤛᤠᤶᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱ ᤗᤧᤵᤔᤠᤱ ᤔᤧᤏᤢ᤺ᤱ ᤔᤧᤍᤠᤖᤥ॥ 22 ᤀᤡᤛᤪᤠᤀᤡᤗᤒᤠ ᤔᤏᤠᤛᤣ. ᤂᤡᤏᤡ᤹ ᤔᤏᤠᤜᤠ᤹ ᤕᤠᤖᤡᤰ ᤂᤠᤶᤜᤡ᤺ᤰ ᤕᤸᤗᤡᤰ ᤔᤧᤕᤥᤛᤠᤱ ᤂᤧᤴ ᤕᤧᤶᤔᤥ ᤆᤒᤧ᤺ᤳᤇᤡᤰᤗᤰ ᤔᤧᤏᤢ᤺ᤱ ᤔᤧᤍᤠᤖᤥ॥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤋᤫᤠᤒᤥ ᤔᤧᤰᤔᤠ ᤛᤡᤔᤠᤀᤣ ᤛᤠᤵᤋᤧᤀᤠᤱ ᤐᤳᤗᤥ. ᤜᤧᤰᤁᤩᤠᤱ ᤂᤧᤱᤜᤠᤖᤧ ᤂᤢᤶᤍᤡᤱ ᤂᤥᤔᤠᤀᤣ ᤁᤧᤒᤥᤱᤒᤠ ᤘᤠ᤹ᤖᤥ॥ 23 ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤁᤧᤖᤧᤰ ᤗᤠᤈᤣ᤹ᤜᤠ᤹ ᤂᤠᤵᤐᤢᤌᤩ᤺ᤱ ᤆᤥᤃᤢᤖᤥ॥ ᤀᤛ᤻ᤛᤢᤖᤒᤠ ᤔᤏᤠᤜᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤂᤢᤶᤛᤢᤛᤡ 24 ᤂᤧᤸᤗᤧᤆᤥᤃᤢᤸᤗᤧ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤖᤥ. “ᤕᤖᤢᤛᤗᤧᤔ ᤁᤧᤕᤢᤱᤒᤠ ᤀᤠᤔᤏᤠᤛᤣ. ᤔᤡᤛᤪᤒᤠ ᤔᤏᤠᤜᤠ᤹ᤖᤧ ᤁᤢᤀᤡᤛᤡᤰ ᤋᤰᤁᤠᤳ ᤏᤢ ᤔᤖ᤺ᤱᤃᤩᤠ᤺ᤸᤗᤧ ᤂᤧᤏᤡ᤹ ᤁᤧᤶᤜᤡᤵᤋᤡᤸᤗᤧ ᤀᤛ᤻ᤛᤢᤖᤒᤠ ᤔᤏᤠᤜᤠ᤹ᤏᤢ ᤂᤧᤏᤡ᤹ ᤔᤧᤃᤡᤛᤧᤶᤔᤧᤴᤏᤧ᤹ᤀᤥ॥ 25 ᤂᤧᤏᤡ᤹ ᤋᤰᤗᤧᤱᤘᤠᤀᤥ ᤁᤧᤒᤥ᤺ᤰᤐᤠ ᤀᤠᤱᤃᤠ᤹ ᤀᤠᤛᤠᤰᤁᤧᤴ ᤜᤠᤖᤠᤀᤣ ᤆᤡ᤺ᤰᤋᤢᤖᤥ. ᤁᤖ ᤀᤠᤱᤃᤠ᤹ ᤀᤠᤕᤠ᤺ᤰᤗᤧ᤹ᤔᤧᤴ ᤂᤧᤱᤜᤠ᤹ ᤔᤧᤱᤔᤠᤛᤡᤖᤧ ᤗᤠᤃᤡ ᤂᤢᤴᤇᤡ᤹ ᤗᤧᤵᤔᤠᤱ ᤜᤡᤛᤡᤱᤗᤥ॥” 26 ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤥᤖᤣᤒ ᤕᤠᤰᤐᤣ᤹ᤀᤥ ᤔᤡᤎᤩᤠᤏᤒᤠ ᤔᤏᤠᤜᤠ᤹ ᤜᤡᤵᤋᤢᤛᤡᤀᤠᤱ ᤛᤥ᤺ᤴᤍᤢᤛᤡᤒᤠ ᤜᤧᤰᤁᤣ ᤀᤛ᤻ᤛᤢᤖᤡᤜᤠ᤹ ᤋᤧ᤺ᤶᤓᤢᤰᤁᤡᤸᤗᤧ ᤜᤡᤵᤋᤢᤛᤡᤖᤥ॥ ᤜᤧᤰᤁᤩᤠᤱ ᤂᤢᤏᤧ᤹ ᤔᤡᤛᤪ ᤗᤠᤈᤣ᤹ᤀᤥ ᤁᤢᤍᤰᤁᤠ᤺ᤳᤋᤧᤴ ᤑᤥ᤺ᤰᤂᤢᤒᤠ ᤁᤢᤀᤡᤛᤡᤰ ᤆᤫᤠ᤺ᤳ ᤛᤶᤎᤠᤱ ᤂᤢᤏᤧ᤹ ᤁᤢᤍᤰᤁᤠ᤺ᤳᤋᤧᤴ ᤑᤥ᤺ᤰᤂᤢᤖᤥ॥ 27 ᤂᤧᤴ ᤕᤧᤶᤔᤡᤴ ᤋᤠ᤺ᤸᤗᤧ ᤂᤢᤏᤧ᤹ ᤀᤛ᤻ᤛᤢᤖᤡᤜᤠ᤹ᤖᤧ ᤂᤢᤴᤇᤡ᤹ ᤜᤢᤰᤁᤥ ᤌᤠᤔᤠᤗᤠᤶ ᤛᤧ᤺ᤵᤋᤢᤛᤡᤖᤥ ᤜᤧᤰᤁᤩᤠᤱ ᤁᤧᤗᤡ᤺ᤵᤐᤠ ᤁᤰᤁᤧᤴ ᤂᤧᤏᤡ᤹ ᤑᤰᤋᤠᤱᤜᤠ᤹ᤀᤥᤗᤠᤶ ᤂᤧᤳᤋᤢᤍᤣᤛᤢᤖᤥ. ᤜᤧᤰᤁᤩᤠᤱ ᤂᤧᤏᤡ᤹ ᤁᤧᤔᤧ᤹ᤖᤡᤀᤠᤱ ᤂᤧ᤺ᤵᤛᤡᤱᤅᤧᤴ ᤀᤧᤰᤂᤢᤖᤥ॥ 28 ᤀᤥᤔᤧᤳᤋᤠᤶᤔᤧ᤹. ᤏᤡᤱᤔᤡᤜᤠ᤹ᤖᤧ ᤀᤕᤩᤠᤋ ᤕᤧᤰᤕᤰᤁᤡᤴ ᤜᤢᤰᤁᤠᤵ ᤔᤧᤔᤧᤳᤇᤡᤱᤅᤠᤱ ᤘᤠ᤹ᤖᤥ. ᤜᤧᤰᤁᤩᤠᤱ ᤕᤠᤶᤔᤥ ᤀᤠᤸᤗᤥᤃ ᤂᤧᤱᤜᤠ᤹ ᤔᤡᤃᤪᤥᤏᤗᤠᤶ ᤔᤧᤒᤥᤱᤅᤠᤱ ᤔᤧᤒᤣ᤺ᤰᤗᤥ॥ ᤔᤡᤁᤔᤠᤛ ᤔᤧᤵᤔᤏᤠᤒᤠ ᤋᤧᤴᤏᤥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤛᤠᤔᤠ ᤐᤢᤔᤠᤜᤠ᤹ ᤔᤧᤗᤢᤵᤛᤢᤀᤠᤱ ᤕᤢᤱᤗᤥ॥ 29 ᤂᤧᤱᤜᤠ᤹ ᤏᤧᤏᤧᤒᤠ ᤋᤧᤴᤏᤡᤴ ᤔᤧᤃᤠ᤺ᤰᤋᤢᤀᤠᤱ ᤔᤧᤒᤣ᤺ᤰᤗᤥ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤔᤧᤒᤠ᤺ᤳᤋᤢᤖᤥ. “ᤛᤧᤴᤍᤡᤰ ᤃᤣᤒᤠ ᤔᤧᤵᤔᤏᤠᤒᤠ ᤋᤧᤴᤏᤥ ᤕᤠᤱᤎᤥ᤺ᤰᤋᤡᤃᤧᤖᤥ॥” ᤖᤠᤔᤠ ᤕᤧᤰᤕᤰᤁᤥ ᤁᤧᤕᤢᤱᤒᤠ ᤔᤏᤠᤜᤠ᤹ ᤁᤡᤔᤧᤸᤗᤧ ᤌᤧᤃᤰᤁᤰᤏᤠ ᤔᤧᤕᤱᤗᤥ. ᤜᤧᤰᤁᤩᤠᤱ ᤛᤠᤘᤗ ᤜᤠᤱᤅᤡᤸᤗᤧ ᤁᤢᤕᤧᤰᤕᤰ ᤃᤡᤒᤠ ᤁᤧᤕᤢᤱᤒᤠ ᤁᤧᤖᤧᤰ ᤔᤏᤠᤜᤠ᤹ ᤔᤧᤄᤧᤳᤇᤡᤱ ᤔᤧᤒᤣ᤺ᤰᤗᤥ॥ 30 ᤃᤠᤸᤗᤡᤔᤒᤠ ᤔᤏᤠᤛᤣ. ᤀᤠᤒᤠᤅᤣ ᤂᤧᤏᤡ᤹ ᤕᤶᤒᤠ ᤀᤡᤰᤗᤠᤀᤥ ᤀ᤺ᤰᤋᤠᤶᤔᤧ᤹ᤀᤥ᥄ ᤗᤤᤛᤠ ᤁᤧᤕᤢᤱᤒᤠ ᤔᤧᤴᤇᤠᤶ ᤕᤠᤵᤔᤡᤛᤣ. ᤂᤡᤏᤡ᤹ ᤏᤢᤖᤡᤰᤁᤠᤱ ᤂᤧᤵᤛᤧᤶᤔᤧ᤹ᤀᤥ॥ ᤜᤧᤰᤁᤩᤠᤱ ᤀᤏᤠᤋᤥᤋ ᤁᤧᤕᤢᤱᤒᤠᤛᤣ. ᤐᤵᤐᤪᤠ᤹ᤔᤠ᥄ ᤂᤧᤏᤡ᤹ᤃ ᤁᤧᤈᤡ᤺ᤳᤋᤡ ᤁᤧᤛᤩᤧ᤹ᤀᤡᤖᤥ᥄ 31 ᤔᤍᤔᤣᤏᤠ ᤁᤧᤕᤢᤱᤒᤠ ᤔᤏᤠᤜᤠ᤹ ᤔᤧᤄᤧᤳᤇᤡᤱ ᤔᤧᤒᤣᤀᤠᤱ ᤔᤧᤘᤠ᤹ᤖᤥ. ᤃᤣᤒᤡᤔ ᤁᤧᤕᤢᤱᤒᤠ ᤔᤏᤠᤜᤠ᤹ ᤔᤧᤈᤡᤱᤛᤡᤱᤗᤥ॥ 32 ᤀᤠᤀᤡᤴᤇᤠ ᤂᤧᤱᤜᤠ᤹ ᤏᤥᤒ ᤔᤧᤵᤔᤏᤠᤒᤠ ᤕᤧᤰᤕᤰᤁᤥ ᤔᤧᤏᤠ᤺ᤶᤛᤡᤱᤗᤥ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤕᤖᤢᤛᤗᤧ᤺ᤶᤒᤠ ᤁᤥ᤺ᤰᤔᤠ. ᤏᤢᤔᤠᤛᤢᤰᤔᤠ ᤛᤡᤕᤥᤏ ᤁᤥ᤺ᤰᤔᤠᤴ ᤀᤡᤱᤎᤠᤱ ᤔᤧᤒᤡᤖᤢᤶᤒᤧᤴ ᤗ᤹ᤖᤡᤰ ᤂᤢᤴᤇᤡ᤹ ᤜᤢᤰᤜᤠ᤹ ᤔᤧᤜᤡᤰᤛᤢ ᤔᤧᤒᤡᤖᤢᤖᤥ॥ 33 ᤁᤖ ᤀᤥᤔᤧᤳᤋᤧᤶᤔᤧ᤹. ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤐᤕᤶ ᤕᤶᤒᤠ ᤁᤢᤔᤢᤰᤛᤠᤶᤔᤡᤸᤗᤧ ᤕᤶᤒᤠ ᤛᤡᤱᤒᤥᤖᤠ᤺ᤰᤜᤠ᤹ ᤗᤧᤴᤍᤢᤒᤠ ᤁᤢᤀᤡᤛᤡᤰ ᤀᤛ᤻ᤛᤢᤖᤒᤠ ᤌᤰᤋᤢᤶᤒᤠᤜᤠ᤹ ᤌᤣ᤺ᤰᤋᤢᤛᤡᤖᤥ. ᤂᤧᤒᤩᤠᤱ ᤁᤣ᤺ᤶᤒᤠᤜᤠ᤹ ᤋᤠᤱᤒᤠ ᤆᤥᤃᤢᤛᤡ᤹ᤖᤥ॥ 34 ᤋᤠᤶᤓᤢᤱᤅᤥ ᤁᤧᤕᤢᤱᤒᤠ ᤛᤡᤱᤒᤢᤱᤜᤠ᤹ ᤋ᤺ᤴᤍᤡ᤺ᤸᤗᤧ ᤋᤠᤱᤔᤏᤠᤒᤠ ᤀᤡᤛᤡ᤺ᤰ ᤗᤧᤒᤏᤠᤏᤧᤴ ᤔᤢᤰᤛᤠᤶᤍᤠᤱᤒᤧᤸᤗᤧ ᤁᤢᤍᤃᤡ ᤆᤥ᤺ᤴᤗᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.