ᤕᤛᤤᤕᤠ 1 - LIFOTNT1 ᤕᤜᤢᤍᤠᤒᤠ ᤜᤠᤱ ᤀᤢᤈ᤻ᤈᤡᤕᤠᤜ. ᤕᤥᤋᤠᤔ. ᤀᤠᤜᤠᤈ ᤜᤧᤰᤁᤩᤠᤱ ᤜᤡᤈᤁᤡᤕᤠᤖᤧ ᤕᤢᤰ ᤔᤧᤈᤥᤃᤢᤒᤠ ᤕᤧᤶᤔᤥ ᤕᤜᤢᤍᤠ ᤏᤢ ᤕᤖᤢᤛᤗᤧᤔᤖᤧ ᤁᤢᤕᤠ᤺ᤶᤒᤣᤀᤥ ᤀᤠᤔᤥᤈᤖᤧ ᤁᤢᤛ᤻ᤛᤠ ᤕᤧᤶᤒᤡᤳᤇᤠ ᤕᤛᤤᤕᤠ᤺ᤸᤗᤧ ᤏᤡᤛᤢᤒᤠ ᤛᤢᤑᤥᤖᤥ॥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤏᤠᤜᤠ᤹ ᤑᤧ᤺ᤰᤋᤢᤛᤡ 2 ᤋᤠᤱᤛᤠᤱᤒᤣ. ᤂᤧᤵᤛᤧ᤹᥄ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤁᤣ. ᤁᤧᤴᤓᤠᤰᤁᤡᤸᤗᤧ ᤂᤧᤶᤛᤧ᤹ᤀᤥ᥄ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤀᤠᤱ ᤘᤠ᤹ᤖᤥ. “ᤀᤠᤱᤃᤠ᤹ ᤀᤠᤛ᤻ᤛᤠᤜᤠ᤹ ᤜᤡᤱᤛᤢᤱᤛᤡᤱᤅᤠᤱ ᤕᤶᤒᤠ ᤕᤶᤔᤠ ᤆᤥᤃᤢᤱᤛᤡᤱᤗᤥ. ᤁᤖ ᤂᤧᤱᤜᤠ᤹ ᤀᤠᤍᤰᤗᤧᤱᤘᤠᤀᤥ ᤐᤡᤑᤩᤢᤱᤒᤠ ᤔᤧᤒᤥ᤺ᤰᤂᤧᤀᤠᤱ ᤔᤧᤘᤠ᤹ᤖᤥ॥ 3 ᤐᤡᤳᤋᤧᤸᤗᤧ ᤀᤠᤒᤠᤅᤣ ᤁᤢᤴᤍᤠᤱᤒᤧᤴ ᤁᤢᤛᤡᤱ ᤏᤡ᤺ᤳᤋᤢᤖᤥ. ᤜᤧᤰᤁᤩᤠᤱ ᤀᤍᤱᤅᤡᤸᤗᤧᤀᤠᤱ ᤀᤠᤒᤠᤅᤣ ᤁᤢᤴᤍᤠᤱᤒᤧᤴ ᤏᤢ ᤁᤢᤈᤠᤈᤠᤔᤠ ᤋᤧᤴᤏᤡᤴ ᤁᤢᤛᤡᤱ ᤏᤡ᤺ᤳᤋᤢᤖᤥ ᤁᤖ ᤀᤡᤛᤪᤠᤀᤡᤗᤒᤠ ᤀᤠᤔᤏᤠᤜᤠ᤹ᤖᤧ ᤀᤠᤱᤃᤠ᤹ ᤁᤢᤛᤡᤱ ᤔᤧᤴᤏᤡ᤺ᤳᤏᤠᤴᤗᤥ ᤜᤧᤰᤁᤩᤠᤱ ᤀᤠᤱᤃᤠ᤹ ᤕᤠᤖ ᤆᤥᤃᤢᤱᤛᤡᤱᤒᤠ ᤐᤠ᤺ᤴᤏᤡᤴ ᤁᤢᤛᤡᤱ ᤔᤧᤴᤏᤡ᤺ᤳᤋᤢᤸᤗᤥ॥” 4 ᤏᤠ᤹ᤖᤠᤱᤛᤩᤠᤱ. ᤗᤠᤕᤥᤒᤠ ᤛᤢᤘᤠᤱ. ᤀᤠᤵᤋᤡᤰᤛᤠᤒᤠ ᤔᤏᤠᤜᤠ᤹. ᤋᤠᤵᤑᤧ᤺ᤶᤒᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤜᤠ᤹ᤖᤧ ᤂᤢᤴᤇᤡ᤹ ᤛᤠᤜᤠ᤹. ᤜᤧᤰᤁᤩᤠᤱ ᤛᤫᤠ᤺ᤳᤋᤠᤱ ᤛᤢᤖᤢᤋᤩᤠᤱ ᤁᤧᤈᤠᤒᤠᤜᤠ᤹ᤖᤧ ᤂᤢᤴᤇᤡ᤹ ᤌᤡᤴᤍᤠᤱ ᤛᤠᤕᤥᤒᤥᤖᤠᤜᤠ᤹᥄ ᤂᤧᤱᤜᤠ᤹ᤖᤧ ᤕᤜᤘᤣ ᤍᤠᤱᤒᤧᤴ ᤔᤧᤏᤠ᤹ᤖᤢᤀᤠᤱ ᤘᤠ᤹ᤖᤥ. ᤂᤧᤱᤜᤠ᤹ᤖᤧ ᤀᤡᤛᤪᤠᤀᤡᤗᤒᤠ ᤛᤣᤛᤣᤒᤧᤴ ᤁᤢᤏᤠᤔᤧᤴᤇᤠ᤹ ᤔᤧᤔᤧᤳᤋᤢᤖᤥ ᤜᤧᤰᤁᤩᤠᤱ ᤀᤣ᤺ᤰᤔᤧᤔᤧᤳᤋᤢᤀᤠᤱ ᤔᤧᤘᤠ᤹ᤖᤥ॥ 5 ᤌᤣᤀᤠᤱ ᤂᤡᤏᤡ᤹ ᤀᤠᤸᤗᤛᤠᤱ ᤋᤧ᤺ᤶᤓᤢᤰ ᤁᤧᤃᤥ᤺ᤳᤋᤢᤶᤒᤠᤒᤣ᥅ ᤜᤧᤰᤁᤩᤠᤱ ᤌᤣᤀᤠᤱ ᤀᤠᤸᤗᤛᤠᤱ ᤂᤡᤏᤡ᤹ ᤀᤠᤍᤰᤗᤧᤱᤘᤠᤀᤥ ᤐᤡᤑᤩᤢᤱᤒᤠ ᤁᤧᤒᤥ᤺ᤰᤂᤡᤒᤠᤒᤣ᥅ ᤂᤧᤏᤡ᤹ ᤌᤧᤃᤣ᤺ᤰᤁᤥ ᤁᤧᤖᤧᤰ ᤁᤠ᤺ᤴᤍᤧᤀᤠᤱ ᤐᤳᤗᤥ. ᤜᤧᤰᤁᤩᤠᤱ ᤁᤧᤖᤧᤰ ᤂᤧᤏᤡ᤹ ᤏᤡᤱᤘᤠ᤹ ᤋᤢᤃᤧᤀᤠᤱ ᤘᤠ᤹ᤖᤥ॥ 6 ᤔᤢ ᤏᤢ ᤌᤠ᤺ᤱ ᤌᤧᤃᤣ᤺ᤰᤐᤥᤏᤢ ᤗᤠᤱᤍᤠᤵᤐᤣᤀᤥ ᤌᤠᤖᤡᤰ ᤕᤠᤱᤄᤣ᤺ᤰ ᤔᤧᤶᤒᤵᤔᤏᤠᤒᤠᤍᤧᤴ ᤀᤠᤳᤋᤡᤀᤠᤱ ᤜᤥᤵᤗᤥ॥ ᤁᤧᤃᤠ᤺ᤶᤒᤤ ᤁᤧᤃᤠ᤺ᤶᤒᤠ. ᤋᤧ᤺ᤶᤓᤢᤰᤁᤡᤸᤗᤧ ᤜᤡᤵᤔᤏᤠᤒᤠ ᤁᤒᤜᤠ᤹ ᤜᤧᤰᤁᤩᤠᤱ ᤁᤧᤃᤡᤒᤠ ᤕᤠᤱᤄᤣ᤺ᤰᤜᤠ᤹ᤖᤰ ᤐᤳᤗᤥ॥ ᤂᤧᤴ ᤕᤠᤱᤄᤣ᤺ᤰᤜᤠ᤹ ᤔᤧᤴᤕ᤹ᤀᤣ ᤀᤡᤔᤧᤱᤄᤣ᤺ᤱᤅᤣ ᤐᤳᤗᤥ. ᤂᤧᤒᤩᤠᤱ ᤏᤡ᤺ᤱᤃᤣ᤺ᤸᤗᤧᤀᤠᤱ ᤆᤢᤴᤈᤢᤶᤒᤠ ᤐᤥᤱᤗ ᤑᤠ᤹ᤀᤠᤱ ᤔᤧᤴᤀᤠᤶᤔᤣ ᤘᤠ᤹ᤖᤥ॥ 7 ᤂᤡᤏᤡ᤹ ᤗᤠᤈᤣᤴ ᤆᤡᤈᤡ ᤂᤰᤂᤰ ᤐᤥ᤺ᤰᤂᤧᤀᤠᤱ ᤏᤧᤖᤥ. ᤂᤡᤏᤡ᤹ ᤐᤠᤱᤈᤢᤶᤜᤠ᤹ᤃ ᤀᤠᤶᤓᤠ ᤂᤧᤏᤡ᤹ ᤋᤃᤡᤀᤣ ᤘᤣ᤹ ᤗᤠᤈᤣ᤹ᤒᤠ ᤔᤏᤠᤜᤠ᤹ᤖᤧ ᤔᤡᤔᤧᤎᤡᤰᤂᤢᤀᤠᤱ ᤏᤧᤖᤥ॥ ᤘᤣ᤹ ᤗᤠᤈᤣ᤹ᤒᤠ ᤔᤏᤠᤜᤠ᤹ᤖᤧ ᤔᤧᤔᤧᤰᤛᤢᤒᤠ ᤁᤢᤀᤡᤛᤡᤰ ᤂᤧᤴ ᤋᤧᤴᤏᤡᤴ ᤆᤡᤈᤡ ᤂᤰᤂᤰ ᤐᤥ᤺ᤰᤂᤧᤀᤠᤱ ᤏᤧᤖᤥ॥ 8 ᤏᤢᤔᤠᤛᤢᤰᤔᤠ ᤕᤖᤢᤛᤗᤧ᤺ᤶᤔᤡᤴ ᤀᤡᤰᤋᤠᤵᤐᤥᤒᤠ ᤕᤠᤰᤔᤠᤜᤡᤶ ᤜᤧᤰᤋᤱᤒᤠ ᤐᤥ᤺ᤰᤂᤧᤀᤠᤱ ᤏᤧᤖᤥ. ᤜᤧᤰᤁᤩᤠᤱ ᤐᤀᤡᤳ ᤀᤡᤰᤋᤠᤵᤐᤥᤒᤠ ᤋᤠᤖᤠᤶᤜᤡᤶ ᤏᤢ ᤏᤡᤱᤔᤡᤜᤠ᤹ᤖᤧ ᤁᤒᤪᤡᤱ ᤔᤧᤃᤒᤢᤒᤠ ᤕᤧᤰᤕᤰ ᤁᤢᤀᤡᤛᤡᤰ ᤐᤥ᤺ᤰᤂᤧᤀᤠᤱ ᤏᤧᤖᤥ॥ 9 ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤠᤏᤡ᤹ ᤁᤢᤓᤠ ᤁᤢᤜᤡᤱᤘᤧᤳ ᤀᤠᤴᤗᤧᤖᤧᤴᤏᤡᤸᤗᤧᤃ ᤛᤍᤥᤔ ᤏᤢ ᤃᤔᤥᤖᤠ ᤁᤢᤀᤡᤛᤡ᤺ᤰᤁᤣ ᤂᤠᤵᤐᤢᤌᤩ᤺ᤱ ᤀᤠᤒᤥ᤺ᤰᤂᤧᤒᤠᤖᤥ॥ 10 ᤛᤍᤥᤔ ᤐᤠᤱᤈᤢᤶᤔᤥᤒᤠ ᤕᤢᤰᤛᤠᤒᤠᤛᤣ. ᤕᤜᤘᤣ ᤍᤠᤱᤒᤧᤸᤗᤧ ᤁᤢᤒᤠ᤺ᤴᤈᤠ᤺ᤰᤁᤡᤴ ᤂᤧᤵᤛᤧᤶᤔᤧ᤹ᤀᤥ᥄ ᤃᤔᤥᤖᤠ ᤐᤠᤱᤈᤢᤶᤔᤥᤒᤠ ᤔᤧᤴᤇᤠᤶ ᤕᤠᤵᤔᤡᤛᤣ. ᤀᤠᤏᤡᤃᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤓᤠᤱᤅᤡᤴ ᤛᤡᤱᤛᤡᤱ ᤕᤧᤰᤕᤧᤰᤁᤠᤱ ᤂᤧᤶᤛᤧᤶᤔᤧ᤹ᤀᤥ᥄ 11 ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢ᤹. “ᤂᤧᤏᤡ᤹ ᤁᤧᤍᤠᤖᤢᤶᤒᤠ ᤕᤖᤡᤰ ᤘᤕᤠᤃᤧᤴ ᤛᤡᤍᤢᤱᤈᤓᤠᤜᤠ᤹ᤖᤧ ᤌᤧᤔᤠ ᤕᤠ᤺ᤶᤒᤰ ᤐᤡᤀᤠᤒᤣ᥅” ᤔᤧᤸᤗᤢᤰᤜᤠ᤹ ᤏᤢ ᤜᤡᤶᤔᤥ ᤁᤧᤜᤡᤱᤄᤢᤶᤛᤡᤶᤒᤠ ᤀᤖᤢᤵᤗᤢᤵᤐᤠ ᤌᤰᤛᤠ ᤛᤥ᤺ᤳ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤛᤡᤍᤢᤱᤈᤓᤠᤜᤠ᤹ ᤀᤠᤛᤡᤖᤠ᤹ ᤔᤧᤎᤠᤱᤏᤧᤴᤗᤥ॥ ᤐᤡᤳ. ᤌᤢ᤺ᤶᤒᤠ ᤏᤢ ᤁᤢᤶᤒᤠᤒᤠ ᤔᤧ᤺ᤴᤍᤠ ᤔᤠᤰᤂᤡᤸᤗᤧ ᤀᤠᤱᤃᤠ᤹ ᤀᤠᤏᤡᤱᤘᤠ᤹ ᤔᤧᤍᤠᤏᤧᤴᤗᤥ॥ 12 ᤂᤧᤏᤡ᤹ ᤀᤠᤒᤣᤛᤠᤱ ᤁᤧᤍᤩᤧ᤹ᤀᤡᤀᤠᤱ ᤁᤧᤍᤥ᤺ᤴᤍᤢᤶᤒᤠ ᤁᤴ ᤁᤢᤛᤢᤶ ᤔᤧᤴᤍᤶᤔᤏᤠᤒᤠ ᤛᤡᤍᤢᤱᤈᤓᤠᤜᤠ᤹ ᤋᤠ᤺ᤰᤋᤢᤱ ᤑᤠ᤹ᤀᤠᤱ ᤏᤡᤱᤘᤠ᤹ ᤁᤧᤀᤡ᤺ᤳᤋᤢᤶᤒᤡ᥅ ᤂᤧᤏᤡ᤹ ᤌᤣᤏᤠᤎᤣ ᤀᤠᤗᤰᤂᤢᤶᤜᤠ᤹ ᤆᤡᤖᤠᤰ ᤆᤡᤖᤠᤰ ᤗᤠ᤺ᤰᤋᤠᤶᤔᤧ᤹ ᤑᤠ᤹ᤀᤠᤱ ᤔᤧᤳᤏᤡᤱᤅᤠᤱ ᤘᤕᤧᤒᤡ᥅ 13 ᤀᤠᤸᤗᤀᤠᤱᤎᤥ ᤁᤢᤛᤢᤶ ᤔᤧᤴᤍᤶᤔᤏᤠᤒᤠ ᤛᤡᤍᤢᤱᤈᤓᤠᤜᤠ᤹ ᤔᤧᤍᤠᤖᤠᤶᤔᤡᤴᤏᤧ᤹ᤀᤥ॥ ᤛᤢᤰᤐᤧᤱᤃ ᤀᤠᤱᤃᤠ᤹ ᤀᤠᤗᤠᤃᤡ ᤀᤠᤛᤡᤰᤁᤧᤗᤧ᤺ᤱᤒᤠ ᤆᤥᤰᤗᤥ॥ ᤋᤠᤵᤑᤧ᤺ᤶᤒᤠ ᤕᤠ᤺ᤶᤒᤰᤗᤧ ᤁᤧᤍᤡᤶᤒᤠ ᤗᤠᤍᤢᤵ. ᤏᤠ᤺ᤶᤛᤡᤱᤔᤠ ᤕᤧᤴ. ᤜᤧᤰᤁᤩᤠᤱ ᤛᤥᤖᤡᤰ ᤁᤧᤈᤢᤵᤛᤡᤒᤠ ᤛᤠᤶᤕᤥ ᤛᤠᤰᤌᤡᤶᤒᤠ ᤆᤢᤶᤗᤢᤱᤅᤡᤴ ᤀᤠᤱᤃᤠ᤹ ᤀᤥᤔᤧᤵᤔᤠ ᤔᤧᤛᤢᤰᤁᤠᤴᤗᤥ॥ 14 ᤂᤧᤏᤡ᤹ ᤗᤠᤍᤢᤵ ᤕᤧᤴᤜᤠ᤹ ᤏᤢ ᤋᤱᤒᤣ ᤗᤠᤘᤠᤒᤠ ᤋᤱᤏᤠᤶᤜᤠ᤹ ᤀᤠᤱᤃᤠ᤹ ᤀᤠᤕᤠᤶᤗᤧ ᤔᤧᤍᤠ᤺ᤰᤋᤢᤴᤗᤥ॥ ᤂᤧᤱᤜᤠ᤹ᤃ ᤀᤠᤗᤠᤃᤡ ᤁᤧᤗᤡ᤺ᤵᤐᤠ ᤁᤰ ᤐᤥ᤺ᤰᤂᤧᤀᤠᤱ ᤘᤠ᤹ᤖᤥ॥ ᤂᤧᤱᤜᤠ᤹ ᤁᤢᤔᤠᤖᤧ ᤁᤢᤔᤠᤖᤧ ᤐᤏᤠ ᤏᤠᤛᤠᤱᤅᤠᤱ ᤘᤠ᤹ᤀᤠᤖᤥ॥ 15 ᤂᤧᤏᤡ᤹ ᤐᤣᤗᤡᤃᤧᤴ ᤋᤢᤘᤠ ᤁᤧᤈᤥᤃᤡᤒᤠ ᤕᤧᤶᤔᤥ ᤂᤧᤏᤡ᤹ ᤜᤢᤰᤜᤠ᤹ ᤁᤧᤓᤥ᤺ᤰᤛᤢᤶᤛᤠᤱ ᤀᤠᤔᤡᤰᤜᤠ᤹ ᤋᤧᤵᤋᤢᤱᤗᤥ॥ ᤂᤧᤏᤡ᤹ ᤛᤠ᤹ᤖᤡᤰ ᤋᤢᤘᤠ ᤁᤧᤈᤥᤃᤡᤛᤠᤱ ᤔᤧᤄᤧᤶᤔᤠᤴᤗᤥ॥ ᤌᤣᤀᤠᤱᤓᤧᤸᤗᤧ ᤂᤧᤏᤡ᤹ ᤑᤥᤋᤩᤠ ᤔᤣ᤺ᤴᤏᤣᤒᤠ ᤔᤏᤠᤜᤠ᤹ ᤁᤧᤛᤧᤖᤢᤶᤛᤡᤶᤔᤠᤱ ᤂᤧᤏᤡ᤹ ᤜᤢᤰᤜᤠ᤹ ᤔᤠᤰᤂᤡᤸᤗᤧ ᤏᤧ᤺ᤰᤋᤢᤀᤠᤱ ᤐᤳᤗᤥ॥ 16 ᤘᤠᤖᤢ᤺ᤶᤔᤠᤛᤡᤶᤔᤧ᤹ᤀᤠᤱ ᤛᤣᤛᤣᤛᤠᤱᤛᤠᤱ ᤐᤥ᤺ᤰᤂᤧᤶᤔᤧ᤹ᤀᤥ. ᤀᤠᤱᤃᤠ᤹ ᤀᤠᤍᤃᤡᤗᤠᤶ ᤀᤠᤀᤡᤴᤏᤠᤱᤎᤥ ᤂᤧᤏᤡ᤹ ᤋᤠᤵᤑᤧ᤺ᤶᤒᤠ ᤕᤠ᤺ᤶᤒᤰᤜᤠ᤹ ᤆᤥ᤺ᤰᤔᤠ ᤗᤧᤖᤠᤶᤔᤧ᤹ᤀᤥ᥄ ᤑᤧᤴᤕᤠ᤺ᤶᤒᤰ ᤆᤥ᤺ᤰᤔᤠ ᤏᤠ᤹ᤖᤠᤶᤔᤧ᤹ᤀᤥ॥ 17 ᤏᤢᤒᤠ ᤕᤠ᤺ᤶᤒᤰ ᤆᤥ᤺ᤰᤔᤠ ᤜᤢ᤹ᤀᤠᤛᤡᤶᤔᤧ᤹ᤀᤥ᥄ ᤂᤧᤏᤡ᤹ ᤗᤧᤵᤔᤠᤱ ᤂᤠᤛᤧᤴ ᤁᤥ᤺ᤳᤋᤠᤶᤔᤧ᤹ᤀᤥ. ᤋᤢᤰᤂᤣ ᤔᤧᤈᤠ᤺ᤳᤋᤢᤛᤡ ᤋᤠᤵᤑᤧ᤺ᤸᤗᤡᤰ ᤔᤧᤔᤧᤳᤋᤢᤛᤡᤒᤠᤜᤠ᤹ ᤀᤠ᤺ᤴᤇᤡᤱᤔᤠ ᤐᤡᤖᤠᤶᤛᤡᤶᤔᤧ᤹ᤀᤥ. ᤕᤧᤳᤇᤠᤒᤠ ᤕᤧᤳᤇᤠᤔᤠᤜᤠ᤹ ᤛᤧ᤺ᤵᤋᤠᤶᤛᤡᤶᤔᤧ᤹ᤀᤥ. ᤕᤧᤶᤒᤠ ᤁᤧᤛᤡᤔᤠ ᤔᤣᤔᤣᤍᤢᤔᤠᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤐᤠᤖᤠᤶᤔᤧ᤹ᤀᤥ॥ 18 ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢ. “ᤀᤠᤸᤗ ᤋᤩᤧᤶᤔᤧ᤹ᤀᤥ. ᤀᤠᤏᤡ᤹ ᤛᤥᤖᤡᤰ ᤕᤢᤅᤡᤀᤠᤱ ᤐᤠ᤺ᤴᤎᤰᤋᤡᤖᤥ॥ ᤂᤡᤏᤡ᤹ ᤗᤠᤕᤥᤜᤠ᤹ ᤜᤧ᤺ᤳᤋᤠᤱᤒᤠ ᤆᤥ᤺ᤰᤛᤠᤱ. ᤂᤧᤱᤜᤠ᤹ ᤏᤠ᤺ᤱ ᤁᤢᤀᤡᤛᤡᤰ ᤑᤍᤠᤱᤒᤠ ᤐᤥᤱᤗᤥ॥ ᤜᤧᤰᤁᤩᤠᤱ ᤂᤧᤏᤡ᤹ ᤗᤠᤕᤥᤴ ᤜᤧ᤺ᤰᤁᤱᤃᤱᤒᤠ ᤆᤥ᤺ᤰᤛᤠᤱ ᤂᤧᤴ ᤑ ᤁᤧᤗ᤹ᤒᤠ ᤂᤡ ᤁᤢᤀᤡᤛᤡᤰ ᤐᤥᤱᤗᤥ॥ 19 ᤂᤡᤏᤡ᤹ ᤁᤧᤍᤧᤴᤍᤡᤀᤠᤱ ᤀᤠᤀᤡᤱᤈᤠᤱ ᤁᤧᤀᤡ᤺ᤵᤐᤠ ᤁᤧᤏᤠ᤺ᤵᤐᤠ ᤁᤧᤒᤥᤰᤂᤡᤏᤧᤓᤃᤪ ᤁᤴ ᤗᤠᤈᤣ᤹ᤀᤥᤒᤠ ᤏᤢ᤺ᤒ᤻ᤏᤢᤒᤠ ᤛᤡᤱᤛᤣ᤹ ᤏᤢ ᤆᤠᤜᤠ᤹ ᤆᤠᤔᤠ ᤁᤧᤄᤥᤛᤢᤶᤗᤥ॥ 20 ᤁᤖ ᤁᤧᤴᤍᤧᤴᤍᤡᤴᤏᤠᤱ ᤐᤡᤑᤩᤢᤱᤒᤠ ᤁᤧᤒᤥᤰᤂᤡᤏᤧᤓᤃᤪ ᤂᤡᤏᤡ᤹ ᤏᤡᤱᤔᤡᤜᤠ᤹ᤖᤧ ᤋᤠᤓᤣ᤺ᤸᤗᤧ ᤁᤧᤶᤈᤩᤧᤵᤋᤡ ᤁᤧᤶᤛᤩᤧᤖᤡᤖᤥ॥” ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤧᤸᤗᤧᤀᤣ ᤁᤴ ᤐᤠ᤺ᤴᤏᤡᤴ ᤐᤠ᤺ᤳᤋᤢᤀᤠᤱ ᤘᤠ᤹ᤖᤥ॥ ᤏᤛᤠᤴ ᤁᤧᤜᤥᤵᤐᤠ ᤕᤖᤢᤛᤗᤧᤔ ᤕᤧᤰᤕᤰ 21 ᤀᤥᤔᤧᤳᤋᤧᤶᤔᤧ᤹. ᤏᤛᤠ᤺ᤴᤛᤠᤔᤠ ᤁᤧᤘᤠ᤹ᤔᤠ ᤕᤖᤢᤛᤗᤧᤔ ᤕᤧᤰᤕᤰᤁᤡᤴ ᤀᤠᤰᤂᤣᤗ᤹ᤖᤡᤰ ᤁᤧᤳᤏᤡᤔᤠ ᤜᤧᤰᤋᤱᤒᤠ ᤐᤥ᤺ᤰᤂᤧᤒᤣ᥄ ᤀᤠᤛᤣ᤺ᤱᤃ ᤂᤧᤴ ᤂᤠᤛᤧᤴᤗᤧ ᤁᤢᤎᤡᤶ ᤘᤕᤧᤖᤥ॥ ᤜᤧᤰᤁᤩᤠᤱ ᤂᤧᤴ ᤕᤧᤰᤕᤰᤁᤥ ᤛᤠᤶᤕᤥᤒᤠᤜᤠ᤹ ᤔᤧᤘᤕᤧᤖᤥ. ᤁᤖ ᤀᤠᤸᤗᤥᤃ ᤂᤧᤴ ᤔᤏᤠ ᤁᤧᤛᤧᤵᤐᤠᤜᤠ᤹ᤖᤧ ᤂᤢᤴᤇᤡ᤹ ᤘᤠ᤹ᤔᤠᤍᤧᤴ ᤐᤥ᤺ᤰᤂᤧᤀᤠᤱ ᤘᤠ᤹ᤖᤥ᥄ 22 ᤂᤧᤏᤧ᤹ ᤌᤡᤰᤗᤧᤱ ᤀᤡᤛᤣ᤺ᤱᤒᤠ ᤕᤢᤵᤐᤠ ᤁᤧᤘᤕᤧᤖᤥ ᤁᤖ ᤀᤠᤸᤗ ᤜᤡᤱᤎᤥ᤺ᤰ ᤜᤧᤰᤋᤱᤒᤠ ᤁᤧᤒᤥ᤺ᤰᤂᤧᤖᤥ॥ ᤜᤧᤰᤁᤩᤠᤱ ᤏᤢᤒᤠ ᤁᤧᤈᤧᤸᤗᤧᤰᤛᤣ᤺ᤸᤗᤧ ᤁᤢᤘᤠᤀᤥ ᤆᤫᤠ᤺ᤳ ᤐ᤺ᤴᤍᤧᤀᤠᤱ ᤕᤠᤰᤗᤥ॥ 23 ᤂᤧᤏᤧ᤹ ᤁᤧᤕᤢᤰᤛᤠᤒᤠᤜᤠ᤹ ᤐᤡᤑᤩᤢᤱᤒᤠ ᤏᤢ ᤂᤢ᤺ᤴᤍᤪᤡᤰᤐᤠᤜᤠ᤹ᤖᤧ ᤂᤢᤴᤇᤡ᤹ ᤆᤢᤶᤍᤣᤱ ᤔᤧᤒᤥ᤺ᤰᤂᤧᤀᤠᤱ ᤔᤧᤘᤠ᤹ᤖᤥ॥ ᤂᤧᤱᤜᤠ᤹ ᤁᤧᤖᤧᤰᤗᤧ ᤛᤫᤠ᤺ᤳ ᤛᤢᤖᤢᤋᤩᤠᤱ ᤆᤠᤔᤠ ᤂᤢᤴᤇᤡ᤹ ᤛᤡᤖᤠ᤹ᤌᤠᤱᤗᤥ. ᤜᤧᤰᤁᤩᤠᤱ ᤂᤧᤱᤜᤠ᤹ ᤆᤧᤛᤢᤱ ᤔᤡᤰᤋᤥᤰ ᤂᤥᤔᤠ ᤂᤡ᤺ᤶᤕᤰ ᤔᤧᤈᤥᤰᤗᤥ॥ ᤂᤧᤱᤜᤠ᤹ᤖᤧ ᤕᤧᤳᤇᤠᤒᤠ ᤕᤧᤳᤇᤠᤔᤠᤜᤠ᤹ ᤂᤠᤛᤧᤴ ᤔᤧᤸᤗᤥ᤺ᤴᤍᤢᤴ ᤔᤧᤶᤒᤡᤖᤢᤛᤡᤴᤗᤥ॥ ᤜᤧᤰᤁᤩᤠᤱ ᤁᤢᤕᤧᤶᤒᤠ ᤁᤧᤛᤡᤔᤠ ᤔᤣᤔᤣᤍᤢᤔᤠᤜᤠ᤹ᤖᤧ ᤂᤢᤴᤇᤡ᤹ ᤕᤧᤰᤐᤣᤗᤡᤴ ᤂᤧᤱᤜᤠ᤹ᤖᤧ ᤔᤧᤱᤄᤧᤵᤛᤢᤴ ᤔᤧᤶᤒᤡᤖᤢᤛᤡᤴᤗᤥ॥ 24 ᤂᤧᤸᤗᤧᤆᤥᤃᤢᤸᤗᤧ ᤀᤠᤍᤠᤱᤒᤠ. ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤠ. ᤀᤡᤛᤪᤠᤀᤡᤗᤒᤠ ᤁᤧᤖᤧᤰᤏᤢ᤺ᤸᤗᤧ ᤔᤢᤰᤛᤠᤶᤛᤠᤒᤠᤸᤗᤧ ᤀᤰᤂᤣ ᤐᤠ᤺ᤳᤋᤢᤖᤥ. “ᤀᤠᤏᤡᤱᤔᤡᤜᤠ᤹ ᤁᤢᤗᤧᤰᤘᤠ ᤏᤢ᤺ᤰᤋᤢᤱ ᤐᤡᤖᤢᤱᤛᤡᤱᤗᤥ ᤜᤧᤰᤁᤩᤠᤱ ᤀᤠᤍᤰᤗᤧᤱᤘᤠᤀᤥ ᤁᤧᤒᤥ᤺ᤰᤐᤠᤜᤠ᤹ᤗᤠᤶ ᤀᤠᤱᤃᤠ᤹ ᤆᤥ᤺ᤰᤕᤢᤶᤓᤥ ᤂᤥᤀᤠᤖᤥ॥ 25 ᤀᤠᤱᤃᤠ᤹ ᤀᤠᤜᤢᤰᤜᤠ᤹ ᤂᤧᤏᤧ᤹ ᤁᤧᤍᤰᤗᤧᤱᤘᤠᤀᤥ ᤑᤥ᤺ᤰᤂᤢᤱᤗᤥ. ᤕᤢᤵᤐᤠᤴ ᤛᤠᤱᤔᤏᤠᤒᤠ ᤁᤢᤀᤡᤛᤡᤰ ᤛᤣᤛᤣ ᤆᤥ᤺ᤰᤏᤧᤖᤥ. ᤜᤧᤰᤁᤩᤠᤱ ᤁᤠᤰ ᤁᤧᤀᤠᤛᤢᤳᤌᤥ ᤐᤠ᤺ᤴᤜᤠ᤹ ᤂᤧᤳᤋᤢᤱᤍᤣᤛᤢᤱ ᤐᤡᤏᤧᤖᤥ॥ 26 ᤂᤧᤏᤧ᤹ ᤁᤧᤄᤠᤛᤧᤴᤗᤥ᤺ᤶᤒᤠᤜᤠ᤹ ᤋᤃᤡ ᤜᤧᤰᤁᤣᤀᤣ. ᤜᤧᤰᤁᤩᤠᤱ ᤂᤧᤏᤧ᤹ ᤁᤧᤛᤢᤈᤠᤍᤠᤱᤒᤠᤜᤠ᤹ ᤀᤠᤴᤇᤥ᤺ᤶᤒᤠ ᤁᤢᤀᤡᤛᤡᤰ ᤕᤠᤶᤔᤥ ᤕᤢᤰᤋᤡᤱ ᤆᤥᤃᤢᤱᤛᤡᤱᤗᤥ॥ ᤜᤧᤰᤁᤣ ᤐᤥᤱᤅᤠᤱ ᤀᤣᤃᤠᤱ ᤁᤴ ᤕᤧᤰᤕᤰᤁᤡᤴ ᤛᤠᤶᤕᤥᤒᤠ ᤕᤧᤰᤕᤰ ᤏᤢ ᤏᤛᤠᤏᤡᤒᤠ ᤕᤧᤰᤕᤰ ᤔᤧᤔᤧᤳᤋᤢᤖᤥ॥” 27 ᤛᤡᤕᤥᤏᤧᤴ ᤛᤠᤶᤕᤥᤒᤠ ᤂᤠᤛᤧᤴᤗᤧ ᤕᤠ᤺ᤶᤒᤰᤗᤠᤶ ᤕᤠᤶᤔᤥ ᤋᤠᤱᤛᤧ᤺ᤵᤗᤥ. ᤗᤠᤕᤥᤗᤠᤶ ᤁᤧᤏᤢ᤺ᤱᤒᤠ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤛᤧᤴᤗᤵᤐᤡᤴ ᤛᤠᤶᤕᤥᤏᤡᤔᤠᤗᤠᤶ ᤐᤥᤱᤗᤥ॥ 28 ᤁᤖ ᤐᤡᤑᤩᤢᤱᤒᤠᤜᤠ᤹ ᤏᤢ ᤗᤠᤕᤥᤒᤠᤜᤠ᤹ ᤌᤡᤰᤗᤧᤱᤗᤧ ᤔᤧᤔᤧᤰᤗᤥ. ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤠᤴ ᤁᤧᤗᤧᤵᤐᤠᤜᤠ᤹ ᤑᤢᤳᤗᤢᤶ ᤌᤩ᤺ᤱ ᤔᤧᤒᤥᤱᤗᤥ॥ 29 “ᤕᤜᤡᤒᤠ ᤛᤡᤱᤒᤢᤱᤗᤠᤀᤥ ᤏᤠᤘᤠᤀᤡᤳᤗᤠ ᤛᤧᤘᤠ ᤁᤧᤔᤧᤳᤋᤢᤶᤒᤠᤸᤗᤧ ᤆᤥᤃᤢᤸᤗᤧ ᤂᤧᤏᤡ᤹ ᤏᤠᤎᤠᤔᤥ ᤁᤧᤎᤩᤧ᤹ᤀᤡᤖᤥ. ᤜᤧᤰᤁᤩᤠᤱ ᤂᤧᤏᤡ᤹ ᤁᤧᤛᤣᤃᤢᤶᤒᤠ ᤛᤡᤱᤛᤣ᤹ᤀᤡᤰᤜᤠ᤹ᤖᤧ ᤆᤥᤃᤢᤸᤗᤧ ᤂᤧᤏᤡ᤹ ᤁᤧᤏᤢ᤺ᤴᤍᤡᤖᤥ॥ 30 ᤁᤢᤓᤧᤰᤘᤠ ᤀᤡᤃᤧᤗᤧᤶᤒᤠ ᤕᤜᤡᤒᤠ ᤛᤡᤱᤒᤢᤱ ᤏᤢ ᤆᤫᤠ᤺ᤳ ᤁᤧᤜᤥᤵᤐᤠ ᤑᤢᤱᤀᤡᤰ ᤛᤡᤱᤛᤣ᤹ᤀᤡᤰ ᤜᤧᤰᤋᤱᤒᤠ ᤁᤧᤒᤥᤰᤂᤡᤖᤥ॥ 31 ᤔᤢᤰᤁᤧᤃᤢᤒᤠ ᤔᤏᤠᤜᤠ᤹ᤃ ᤔᤡᤍᤢᤵᤔᤠ ᤇᤢᤸᤗᤠ ᤜᤧᤰᤋᤱᤒᤠ ᤏᤢ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤕᤠ᤺ᤶᤒᤰᤁᤡᤴ ᤔᤡᤛᤣᤰ ᤁᤧᤓᤧᤰᤐᤠ ᤁᤢᤀᤡᤛᤡᤰ ᤐᤥᤱᤗᤥ॥ ᤂᤧᤴ ᤏᤧᤵᤔᤠᤱ ᤌᤡᤰᤗᤧᤱᤗᤧ ᤔᤡᤍᤡᤰᤗᤥ. ᤜᤧᤰᤁᤩᤠᤱ ᤜᤠ᤺ᤳᤗᤧᤀᤠᤱ ᤂᤧᤴ ᤔᤡᤴ ᤛᤧᤵᤔᤠ ᤔᤧᤛᤢᤰᤋᤢᤴᤗᤥ॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.