ᤜᤥᤛᤣ 9 - LIFOTNT

ᤀᤡᤛᤪᤠᤀᤡᤗᤖᤧ ᤂᤢᤶᤍᤡᤱ ᤁᤢᤄᤥᤔᤠ ᤀᤡᤱᤄᤱ

¹ ᤀᤡᤛᤪᤠᤀᤡᤗᤀᤣ. ᤘᤣ᤹ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤜᤧᤰᤁᤣ ᤔᤧᤛ᤺ᤳᤋᤧᤶᤔᤡᤴᤏᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ ᤀᤠᤵᤑᤣᤰ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤁᤧᤗᤧᤖᤢᤶᤔᤠᤱ ᤂᤡᤏᤡ᤹ ᤕᤠᤶᤒᤥ᤺ᤵᤔᤠ ᤕᤠ᤺ᤶᤒᤰ ᤁᤧᤈᤥᤃᤢᤶᤗᤥ᥄ ᤁᤧᤖᤧᤰ ᤐᤥᤃᤢᤃᤧᤴ ᤁᤢᤈᤠ ᤌᤠᤶᤔᤠᤍᤧᤴᤏᤥ ᤕᤠᤶᤒᤥ᤺ᤵᤔᤠ ᤕᤠ᤺ᤶᤒᤰᤁᤡᤸᤗᤧ ᤏᤠᤗᤡᤃᤧᤴ ᤁᤢᤈᤧᤴ ᤋᤠ᤺ᤰᤔᤠ ᤂᤡᤏᤡ᤹ ᤛᤡᤖᤠ᤹ᤌᤠᤱᤗᤥ॥

² ᤐᤥᤃᤢᤃᤧᤴ ᤁᤢᤈᤠ ᤌᤠᤶᤔᤠᤍᤧᤴᤏᤡᤴ ᤏᤢ ᤆᤧᤸᤗᤧᤰᤛᤣ᤹ ᤀᤣ᤺ᤶᤔᤠᤍᤧᤴᤏᤡᤸᤗᤧ ᤁᤢᤈᤠ ᤁᤧᤴᤈᤠ᤺ᤳᤋᤡᤴᤗᤥ. ᤁᤢᤒᤥᤰ ᤆᤧᤸᤗᤧᤰᤛᤣ᤹ ᤌᤡᤴ ᤂᤡᤏᤡ᤹ ᤗᤠᤃᤡ ᤛᤢ᤺ᤴᤗᤥ॥

³ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤈᤣ᤹ᤀᤥ ᤂᤡᤏᤡ᤹ ᤁᤧᤴᤕᤢᤅᤡᤴᤗᤥ. ᤀᤣᤑᤪᤠᤀᤡᤶᤔᤡᤴ ᤔᤡᤛᤪ ᤏᤢ᤺ᤱᤅᤠᤱ ᤐᤣ᤺ᤰᤗᤥ. ᤜᤧᤰᤁᤩᤠᤱ ᤀᤛ᤻ᤛᤢᤖᤀᤥ ᤀᤠᤛᤢᤳᤌᤥ ᤁᤢᤈᤠ ᤆᤖᤥ॥

⁴ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤂᤡᤏᤡ᤹ ᤆᤧᤸᤗᤧᤰᤛᤣ᤹ ᤌᤡ ᤛᤡᤍᤢᤱᤈᤓᤠ ᤁᤢᤛᤡᤱᤒᤠ ᤆᤧᤸᤗᤧᤰᤛᤣ᤹ ᤌᤡᤴ ᤔᤧᤴᤜᤢᤰᤂᤢᤴᤗᤥ. ᤂᤡᤏᤡ᤹ ᤛᤡᤍᤢᤱᤈᤓᤠᤜᤠ᤹ᤖᤧ ᤂᤢᤏᤧ᤹ ᤁᤢᤏᤡᤱᤘᤠ᤹ᤀᤠᤱ ᤔᤧᤍᤠᤏᤧᤴᤗᤥ॥ ᤀᤰᤋᤱᤒᤠ ᤛᤡᤍᤢᤱᤈᤓᤠᤜᤠ᤹ᤃ ᤁᤧᤛᤡᤒᤠᤜᤠ᤹ᤖᤧ ᤗᤠᤃᤡ ᤏᤧᤳᤁᤧᤕᤢᤰᤐᤠᤜᤠ᤹ᤖᤧ ᤂᤢᤴᤇᤡ᤹ ᤂᤖᤧ᤺ᤱ ᤜᤧᤰᤁᤣ ᤐᤥᤱᤗᤥ ᤂᤧᤴ ᤁᤧᤈᤠᤒᤠᤜᤠ᤹ ᤁᤧᤖᤧᤰ ᤀᤠᤛᤢᤳᤌᤥ ᤔᤧᤒᤥᤱᤗᤥ॥ ᤀᤰᤋᤱᤒᤠ ᤁᤢᤈᤠ᤺ᤱᤃ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡᤖᤰ ᤐᤥᤱᤗᤥ. ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤥ ᤂᤧᤴ ᤔᤧᤴᤍᤠᤖᤢᤴᤗᤥ॥

⁵ ᤏᤡ᤺ᤴᤎᤥ ᤁᤧᤒᤥᤱᤒᤠ ᤂᤡᤏᤡ᤹ ᤋᤱᤏᤠᤶᤜᤠ᤹ᤀᤥᤒᤠ ᤕᤧᤴᤏᤥ. ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤱᤏᤠᤶᤜᤠ᤹ᤀᤥᤒᤠ ᤕᤧᤴᤏᤥ ᤀᤠᤰᤂᤣ ᤁᤧᤈᤥᤃᤢᤶᤒᤣ᥅

⁶ ᤂᤧᤱᤜᤠ᤹ ᤔᤧᤰᤔᤠᤗᤠᤶ ᤔᤧᤄᤧᤳᤇᤡᤱᤛᤠᤱ ᤔᤡᤛᤪ ᤗᤠᤈᤣ᤺ᤸᤗᤧ ᤂᤧᤱᤜᤠ᤹ ᤑᤢᤰᤂᤢᤛᤡᤖᤥ. ᤜᤧᤰᤁᤩᤠᤱ ᤔᤥᤐᤒᤠ ᤔᤏᤠᤜᤠ᤹ᤖᤧ ᤂᤧᤱᤜᤠ᤹ ᤔᤧᤗᤢᤵᤋᤢᤛᤡᤖᤥ॥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤕᤢᤵᤐᤠ ᤕᤠᤱᤛᤠᤁᤢᤴᤎᤣᤜᤠ᤹ ᤋᤡᤱᤃᤪᤣᤰ ᤗᤠ᤺ᤸᤗᤧ ᤛᤢ᤺ᤵᤋᤢᤖᤥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤛᤠ᤺ᤱᤃᤠᤜᤡᤶᤜᤠ᤹ ᤋᤡᤱᤅᤡᤸᤗᤧ ᤁᤢᤒᤢᤱᤜᤠ᤹ᤖᤧ ᤌᤡᤶᤛᤢᤖᤥ॥

⁷ ᤂᤢᤶᤍᤡᤱ ᤐᤡᤔᤠ ᤕᤧᤴᤜᤠ᤹ ᤏᤡ᤺ᤳᤋᤠᤱ ᤋᤩᤧᤀᤠᤱ ᤘᤠ᤹ᤖᤥ. ᤁᤢᤗᤧᤰᤘᤠ ᤏᤢ᤺ᤰᤔᤠ ᤕᤧᤴᤜᤠ᤹ ᤆᤡᤍᤢᤵ ᤘᤠ᤹ᤖᤥ॥ ᤁᤴ ᤐᤠ᤺ᤴᤜᤠ᤹ ᤀᤡᤛᤪᤠᤀᤡᤗᤖᤧ ᤏᤡᤱᤘᤠ᤹ ᤂᤥᤛᤢᤖᤖᤥ॥ ᤂᤡᤏᤡ᤹ ᤗᤠᤕᤥᤜᤠ᤹ ᤕᤖᤡᤰ ᤘᤠ᤹ᤒᤠ ᤏᤢ ᤛᤡᤰᤆᤥ᤺ᤰᤔᤠᤴ ᤕᤶᤒᤠ ᤆᤥ᤺ᤰᤐᤧᤸᤗᤧ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤧᤴ ᤀᤍᤱ ᤏᤢ ᤕᤠᤶᤛᤠᤶᤔᤡᤸᤗᤧ ᤌᤢᤰᤋᤢᤒᤠ ᤔᤏᤠ᤺ᤱᤃ ᤁᤧᤏᤠᤱᤒᤠ ᤁᤧᤗᤣ᤺ᤳᤋᤢᤶᤗᤥ॥

⁸ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤧᤱᤃ ᤀᤣᤑᤪᤠᤀᤡᤶᤔᤡᤴ ᤁᤶᤒᤪᤠᤱ ᤁᤧᤔᤧᤵᤐᤠᤖᤥ ᤂᤢᤏᤧ᤹ ᤀᤠᤱᤃᤠ᤹ ᤀᤠᤏᤡᤱᤘᤠ᤹ᤑᤢᤔᤠᤱᤅᤡᤴᤏᤢ ᤛᤥᤛᤥᤖᤡᤰ ᤘᤠ᤹ᤖᤥ॥ ᤁᤖ ᤂᤢᤏᤧ᤹ ᤁᤧᤖᤧᤰ ᤁᤢᤗᤠᤶᤔᤥ ᤆᤧᤴᤜᤠ᤹ ᤔᤧᤃᤧᤛᤢᤀᤠᤱ ᤏᤧᤖᤥ. ᤜᤧᤰᤁᤩᤠᤱ ᤁᤢᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤜᤡᤶᤔᤥᤀᤠᤱ ᤂᤢᤏᤧ᤹ ᤔᤧᤈᤡ᤺ᤳᤋᤢᤖᤥ॥

⁹ ᤃᤡᤒᤠᤀᤥᤒᤠ ᤕᤧᤴᤜᤠ᤹ ᤁᤢᤀᤡᤛᤡᤰ ᤂᤧᤱᤜᤠ᤹ ᤂᤢᤴᤇᤡ᤹ ᤀᤠᤵᤑᤣᤰ ᤛᤠ᤹ᤖᤡᤰ ᤋᤠᤵᤑᤧ᤺ᤸᤗᤡᤰ ᤑᤧᤳᤔᤧᤗᤠ᤺ᤴᤇᤡᤱᤅᤠᤱ ᤔᤧᤘᤠ᤹ᤖᤥ॥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤢᤴᤇᤡ᤹ ᤑᤧᤴᤕᤠ᤺ᤶᤒᤰᤁᤡᤴ ᤏᤡᤱᤘᤠ᤹ ᤀᤡ᤺ᤳᤋᤢᤖᤥ. ᤂᤢᤏᤧ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤠᤕᤥᤸᤗᤧ ᤁᤢᤗᤧᤰᤘᤠ ᤂᤢᤶᤍᤡᤱ ᤐᤡᤖᤢᤛᤡᤖᤥ॥

ᤀᤡᤛᤪᤠᤀᤡᤗᤖᤧ ᤁᤢᤗᤠᤕᤥᤸᤗᤧ ᤁᤢᤗᤧᤰᤘᤠ ᤋᤢᤔᤢ

¹⁰ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤖᤥ. “ᤀᤠᤱᤃᤠ᤹ ᤀᤡᤛᤪᤠᤀᤡᤗᤧᤴ ᤂᤥᤔᤠᤃ ᤔᤢᤖᤧᤰ ᤂᤠᤖᤧᤰᤐᤠ ᤕᤧ᤺ᤱᤄᤠᤍᤧᤴᤏᤥ ᤆᤧᤸᤗᤧᤰᤛᤣ᤹ᤜᤠ᤹ ᤂᤥᤔᤠᤏᤢ ᤁᤢᤍᤱᤒᤠ ᤘᤕᤧᤖᤥ. ᤀᤠᤱᤃᤠ᤹ ᤂᤡᤏᤡ᤹ ᤐᤠᤎᤧᤒᤠᤜᤠ᤹ ᤏᤡᤔᤠᤛᤡ ᤐ᤺ᤳᤇᤣ᤹ ᤐᤢᤱᤅᤥᤒᤠ ᤋᤃᤡ ᤁᤧᤍᤢᤶᤒᤠ ᤁᤢᤈᤠ᤹ ᤜᤧᤰᤋᤱᤒᤠ ᤆᤥᤃᤧᤖᤥ॥ ᤁᤖ ᤀᤠᤸᤗ ᤂᤧᤱᤜᤠ᤹ ᤒᤠᤗ-ᤐᤥᤖᤀᤥ ᤔᤧᤒᤣ᤺ᤸᤗᤧ ᤂᤧᤱᤜᤠ᤹ ᤂᤧᤴ ᤛᤡᤖᤡᤱ ᤀᤠᤔᤔᤒᤠ ᤐᤠ᤺ᤴᤏᤥ ᤔᤧᤍᤥ᤺ᤴᤇᤡᤱᤗᤥ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤛᤡᤖᤠ᤹ ᤁᤧᤎᤠᤱᤒᤠ ᤏᤠᤘᤠᤀᤡᤳᤗᤠᤴ ᤜᤧᤰᤁᤣ ᤂᤧᤱᤜᤠ᤹ ᤕᤠᤶᤃᤧᤛᤡᤱᤒᤠ ᤔᤧᤒᤥ᤺ᤰᤂᤧᤖᤥ॥

¹¹ ᤀᤣᤑᤪᤠᤀᤡᤔᤖᤧ ᤁᤢᤔᤡᤔᤡᤍᤡᤱᤅᤡᤴ ᤐᤢ ᤜᤧᤰᤁᤣ ᤐᤧᤒᤣ᤺ᤰᤗᤥ. ᤂᤧᤱᤜᤠ᤹ ᤛᤠᤀᤠᤱ ᤔᤧᤱᤃᤳᤏᤧᤴ. ᤛᤠᤀᤠᤱ ᤔᤧᤕᤠᤰᤏᤧᤴᤗᤥ. ᤂᤧᤱᤜᤠ᤹ ᤔᤧᤇᤢᤰᤔᤠᤀᤠᤱ ᤔᤧᤶᤒᤥᤱᤏᤧᤴᤗᤥ॥

¹² ᤂᤧᤱᤜᤠ᤹ᤖᤧ ᤛᤠᤀᤣᤜᤠ᤹ ᤕᤶᤒᤠ ᤔᤧᤈᤥᤃᤢᤛᤡᤛᤠᤱ ᤀᤠᤱᤃᤠ᤹ ᤗᤳᤌᤡᤰ ᤀᤅᤧ᤺ᤰᤘᤠᤀᤠᤱ ᤔᤧᤴᤕᤠ᤺ᤰᤁᤣ ᤌᤠᤖᤡᤰ ᤂᤧᤱᤜᤠ᤹ ᤔᤧᤔᤠᤛᤡᤱᤗ ᤕᤠ᤺ᤴᤍᤢᤱᤛᤡᤱᤗᤥ॥ ᤀᤠᤸᤗ ᤀᤠᤱᤃᤠ᤹ ᤂᤧᤱᤜᤠ᤹ᤗᤠᤶ ᤏᤢ᤺ᤱᤅᤠ ᤐᤣ᤺ᤰᤁᤠᤸᤗᤧ. ᤀᤣ ᤂᤧᤱᤜᤠ᤹ᤃ ᤔᤧᤈᤡ᤺ᤳᤋᤧ ᤔᤧᤛᤩᤧᤖᤥ᥄

¹³ ᤀᤠᤱᤃᤠ᤹ ᤀᤣᤑᤪᤠᤀᤡᤶᤔᤡᤴ ᤛᤡᤖᤠ᤹ ᤐᤎᤠᤱᤃᤣᤎᤠᤱᤒᤠᤍᤧᤴᤏᤥ ᤂᤧᤒᤰᤛᤡᤱ ᤜᤧᤰᤁᤣ ᤋᤢᤖᤥᤛᤧᤴ ᤁᤢᤀᤡᤛᤡᤰ ᤔᤧᤗᤣ᤺ᤳᤋᤢᤒᤠ ᤏᤡᤛᤢᤱᤗᤥ. ᤁᤖ ᤀᤣᤑᤪᤠᤀᤡᤔᤖᤧ ᤁᤢᤛ᤻ᤛᤠᤜᤠ᤹ ᤁᤧᤛᤧᤵᤐᤠᤀᤥ ᤋᤡ᤺ᤰᤋᤢ ᤋᤠᤖᤢᤛᤡᤖᤥ॥”

¹⁴ ᤕᤜᤘᤣ ᤍᤠᤱᤒᤠᤀᤣ. ᤂᤧᤏᤧ᤹ ᤂᤧᤱᤜᤠ᤹ ᤐᤡᤖᤧᤛᤧ᤹ᤀᤥ— ᤂᤧᤏᤧ᤹ ᤂᤧᤱᤜᤠ᤹ ᤌᤧᤔᤠ ᤁᤧᤒᤡᤖᤢᤛᤡᤒᤣ᥅ ᤛᤠᤃᤧᤗᤧᤶᤒᤠ ᤁᤧᤍᤣᤒᤠ ᤛᤠᤖᤠᤓᤣ᤺ᤳ ᤐᤡᤖᤧᤛᤧ᤹ᤀᤥ ᤜᤧᤰᤁᤩᤠᤱ ᤁᤧᤈᤵᤐᤠ ᤁᤧᤒᤣ᤺ᤰᤐᤠ ᤏᤢᤒᤰ ᤐᤡᤖᤧᤛᤧ᤹ᤀᤥ॥

¹⁵ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤖᤥ. “ᤃᤡᤗᤃᤠᤗᤀᤥ ᤂᤧᤱᤜᤠ᤹ᤖᤧ ᤔᤧᤈᤥᤃᤢᤒᤠ ᤂᤢᤴᤇᤡ᤹ ᤁᤧᤖᤧᤰ ᤑᤧᤴᤕᤠ᤺ᤶᤒᤰᤁᤡᤸᤗᤧ ᤆᤥᤃᤢᤸᤗᤧ ᤀᤠᤱᤃᤠ᤹ ᤂᤧᤱᤜᤠ᤹ ᤆᤡ᤺ᤳᤋᤢᤱᤛᤡᤱᤗᤥ॥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤠᤕᤥᤒᤠ ᤕᤠ᤺ᤶᤒᤰᤁᤡᤸᤗᤧ ᤆᤥᤃᤢᤸᤗᤧ ᤀᤠᤱᤃᤠ᤹ ᤂᤧᤱᤜᤠ᤹ ᤀᤠᤜᤡᤶᤔᤥᤗᤠᤶ ᤏᤠ᤺ᤳᤋᤢᤱᤍᤣᤛᤢᤱᤛᤡᤱᤗᤥ॥ ᤂᤧᤱᤜᤠ᤹ ᤕᤠᤶᤔᤥ ᤀᤠᤓᤧᤸᤗᤧᤀᤠᤱ ᤗᤢᤱᤔᤠ᤹ ᤔᤧᤍᤢᤰᤋᤢᤱᤛᤡᤱᤅᤡᤴᤗᤥ. ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤁᤧᤖᤧᤰ ᤗᤠᤶᤗᤥᤒᤠᤜᤠ᤹ ᤐᤡᤑᤩᤢᤱᤒᤠᤛᤡᤖᤥ॥

¹⁶ ᤀᤣᤑᤪᤠᤀᤡᤔᤡᤴ ᤔᤧᤎᤃᤢᤀᤠᤱ ᤘᤠ᤹ᤖᤥ᥄ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤛᤠ᤺ᤵᤐᤡᤴ ᤜᤣᤖᤧᤒᤣᤖᤥ. ᤂᤧᤱᤜᤠ᤹ᤖᤧ ᤁᤢᤈᤠ᤹ ᤑᤶᤔᤠ ᤔᤧᤴᤇᤢᤰᤋᤢᤴᤗᤥ॥ ᤂᤧᤱᤜᤠ᤹ᤖᤧ ᤀᤅᤧ᤺ᤰᤘᤠ ᤛᤠᤜᤠ᤹ ᤔᤧᤃᤳᤋᤢᤛᤡᤛᤠᤱ ᤗᤢᤱᤔᤠ᤹ ᤔᤧᤍᤢᤰᤋᤢᤛᤡᤒᤠ ᤂᤢᤴᤇᤡ᤹ ᤛᤠᤜᤠ᤹ ᤛᤧᤖᤢᤱᤛᤡᤱᤗᤥ॥”

ᤀᤡᤛᤪᤠᤀᤡᤗᤖᤧ ᤁᤢᤕᤠ᤺ᤶᤒᤣᤀᤥ ᤔᤠᤱᤏᤡᤱᤘᤠ᤹ᤐᤠᤴ

¹⁷ ᤀᤠᤱᤃᤠ᤹ ᤀᤠᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤱᤜᤠ᤹ ᤏᤠ᤹ᤖᤢᤛᤡᤖᤥ. ᤌᤣᤀᤠᤱᤓᤧᤸᤗᤧ ᤁᤢᤒᤠ᤺ᤴᤈᤠᤰᤁᤡᤴ ᤂᤧᤱᤜᤠ᤹ᤖᤧ ᤔᤧᤴᤀᤡ᤺ᤳᤋᤣ ᤔᤧᤴᤏᤠ᤺ᤳᤋᤣ ᤔᤧᤘᤠ᤹ᤖᤥ॥ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤂᤧᤱᤜᤠ᤹ ᤋᤠᤰᤁᤴᤈᤠᤖᤡ ᤔᤧᤒᤥᤱᤗᤥ॥