ᤜᤥᤛᤣ 8 - LIFOTNT

ᤀᤡᤛᤪᤠᤀᤡᤗᤖᤧ ᤁᤢᤀᤠᤵᤋᤡᤰ

¹ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤖᤥ. “ᤌᤢᤳᤋᤢᤖᤡ᤺ᤵᤐᤧᤴ ᤂᤡᤏᤡ᤹ ᤔᤢᤖᤠᤀᤥ ᤑᤳᤇᤧᤶᤔᤧ᤹ᤀᤠᤱ ᤔᤢ᤺ᤳᤋᤧᤶᤔᤧ᤹ᤀᤥ᥄ ᤁᤰᤁᤑᤡ᤺ᤰᤔᤠ ᤌᤡᤰ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶ ᤛᤶᤎᤠᤱ ᤛᤢ᤺ᤰ ᤕᤢᤖᤥ᥄ ᤌᤣᤀᤠᤱᤓᤧᤸᤗᤧ ᤔᤏᤠᤜᤠ᤹ᤖᤧ ᤀᤠᤱᤃᤠ᤹ ᤀᤠᤔᤠᤱᤜᤢᤵᤐᤡᤴ ᤔᤧᤓᤣ᤺ᤴᤍᤢᤀᤠᤱ ᤘᤠ᤹ᤖᤥ. ᤂᤧᤒᤩᤠᤱ ᤀᤠᤛᤠᤶᤕᤥ ᤌᤡᤶᤔᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤐᤡᤑᤩᤢᤱᤒᤠ ᤔᤧᤒᤥ᤺ᤰᤂᤧᤀᤠᤱ ᤔᤧᤘᤠ᤹ᤖᤥ॥

² ᤀᤡᤛᤪᤠᤀᤡᤗᤖᤧ ᤀᤠᤱᤃᤠ᤹ ᤀᤰᤂᤣᤗ᤹ᤖᤡᤰ ᤐᤣᤗᤡ ᤑᤠᤰᤁᤠᤖᤥ. ‘ᤀᤠᤏᤡᤃᤣ ᤏᤡᤱᤘᤠ᤹ᤑᤢᤔᤠᤱᤅᤣ. ᤀᤠᤏᤡᤃᤣ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤧᤏᤧ᤹ ᤁᤢᤛᤡᤱ ᤏᤡ᤺ᤳᤋᤠᤛᤡᤃᤧᤖᤥ॥’

³ ᤁᤖ ᤀᤠᤳᤋᤡᤴ ᤐᤠ᤺ᤴᤏᤡᤴ ᤏᤢᤒᤠ ᤆᤥᤰ. ᤀᤡᤛᤪᤠᤀᤡᤗᤖᤧ ᤂᤧᤴ ᤀᤳᤋᤢᤀᤠᤱ ᤘᤠ᤹ᤖᤥ. ᤂᤧᤸᤗᤧᤆᤥᤃᤢᤸᤗᤧ ᤏᤡᤱᤔᤡ᤺ᤸᤗᤧ ᤂᤢᤏᤧ᤹ ᤏᤠ᤺ᤳᤋᤢᤖᤥ॥

⁴ ᤂᤧᤱᤜᤠ᤹ᤖᤧ ᤀᤠᤱᤃᤠ᤹ ᤔᤧᤴᤍᤧᤴᤏᤣ ᤜᤠᤱᤜᤠ᤹ ᤕᤢᤰᤋᤡᤱ ᤔᤧᤈᤥᤃᤢᤛᤡᤖᤥ. ᤂᤧᤱᤜᤠ᤹ᤖᤧ ᤀᤠᤱᤃᤠ᤹ ᤔᤧᤴᤍᤧᤴᤏᤣ ᤗᤠᤶᤗᤥᤒᤠᤜᤠ᤹ ᤔᤧᤛᤣᤃᤢᤛᤡᤖᤥ॥ ᤂᤧᤱᤜᤠ᤹ ᤀᤠᤵᤑᤣᤰ ᤔᤧᤰᤔᤠᤖᤧ ᤗᤠᤃᤡ ᤂᤢᤴᤇᤡ᤹ ᤛᤠᤶᤔᤩᤠᤱ ᤏᤢ ᤕᤢᤵᤐᤠᤴ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤀᤠᤵᤑᤣᤰ ᤗᤠᤃᤡ ᤏᤠᤘᤠᤀᤡᤳᤗᤠ ᤔᤧᤎᤃᤢᤛᤡᤖᤥ॥

⁵ “ᤛᤠᤔᤖᤡᤕᤠᤀᤣ. ᤂᤧᤏᤧ᤹ ᤁᤧᤒᤡᤳᤛᤠᤳ ᤏᤠᤘᤠᤀᤡᤳᤗᤠᤴ ᤗᤠᤵᤑᤣᤛᤧ᤹ᤀᤥ. ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤋᤰᤗᤧᤱᤘᤠᤀᤥ ᤛᤠ᤹ᤖᤡᤰ ᤀᤠᤛᤡᤰ ᤐᤥᤃᤧᤀᤠᤱ ᤘᤠ᤹ᤖᤥ॥ ᤂᤧᤱᤜᤠ᤹ ᤀᤠᤵᤑᤠᤸᤗᤧ ᤌᤠᤖᤡᤰ ᤛᤢᤳᤌᤥ ᤐᤥᤱᤔᤠᤖᤧ ᤗᤠᤃᤡ ᤛᤢᤳᤌᤥ ᤐᤥᤱᤔᤠ ᤔᤧᤴᤇᤢᤰᤔᤏᤠᤒᤠ ᤔᤧᤒᤥᤱᤒᤠᤒᤣ᥅

⁶ ᤁᤴ ᤛᤠᤔᤖᤡᤒᤠ ᤐᤡᤳᤛᤠᤳ ᤏᤠᤘᤠᤀᤡᤳᤗᤠ᤺ᤱᤃ ᤀᤡᤛᤪᤠᤀᤡᤗᤒᤠᤖᤥ᥄ ᤁᤱᤃ ᤆᤥᤒᤣᤃᤢ᤺ᤸᤗᤧ ᤆᤥᤃᤢᤒᤠᤖᤥ. ᤏᤡᤱᤘᤠ᤹ᤑᤢᤔᤠᤱ ᤔᤣ᤺ᤴᤗᤥ ᤁᤴ ᤁᤢᤶᤈᤡᤰᤔᤠ ᤐᤥᤱᤗᤥ॥

⁷ “ᤂᤧᤱᤜᤠ᤹ᤖᤧ ᤛᤠᤶᤔᤡᤳ ᤁᤣᤈᤱᤅᤡᤴ ᤔᤧᤜᤣ᤹ᤖᤢᤖᤥ. ᤜᤧᤰᤁᤩᤠᤱ ᤁᤧᤀᤡᤰᤛᤡᤱᤒᤠ ᤛᤢᤖᤡᤳ ᤁᤣᤈᤱᤅᤡᤴ ᤔᤧᤛᤢᤵᤛᤢᤛᤡᤖᤥ॥ ᤀᤡᤰᤋᤠᤵᤐᤥᤒᤠ ᤆᤠᤗᤠᤱᤅᤥ ᤁᤢᤍᤠᤵᤔᤠ ᤔᤧᤎᤥ᤺ᤰᤏᤧᤴᤗᤥ. ᤂᤧᤸᤗᤧ ᤌᤣᤀᤠᤱ ᤁᤢᤈᤠ᤹ᤀᤠᤱ ᤔᤧᤎᤥ᤺ᤰᤏᤧᤴᤗᤥ ᤌᤥ᤺ᤰᤛᤠᤱ ᤘᤣ᤹ ᤗᤠᤈᤣ᤹ᤒᤠᤜᤠ᤹ᤖᤧ ᤂᤧᤴ ᤔᤧᤗᤖᤢ ᤔᤧᤍᤣᤛᤢᤖᤥ॥

⁸ ᤀᤡᤛᤪᤠᤀᤡᤗᤧᤴ ᤔᤧᤗᤖᤢ ᤔᤧᤍᤣᤛᤢᤀᤠᤱ ᤏᤧᤖᤥ. ᤀᤠᤸᤗ ᤂᤧᤴ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤜᤏᤧᤒᤠ ᤂᤵᤐᤩᤠ ᤜᤧᤰᤋᤱᤒᤠ ᤐᤥ᤺ᤰᤂᤧᤀᤠᤱ ᤏᤧᤖᤥ॥

⁹ ᤋᤠᤶᤓᤢᤱ ᤀᤍᤱᤅᤡᤴ ᤀᤣ᤺ᤰᤛᤧᤳᤇᤠ ᤏᤠ ᤏᤢ ᤁᤳᤏᤠ ᤗᤠᤱᤄᤣ᤺ᤰᤁᤠᤱ ᤘᤠ᤹ᤒᤠ ᤜᤧᤰᤁᤣ ᤂᤧᤱᤜᤠ᤹ ᤀᤛ᤻ᤛᤢᤖ ᤔᤧᤒᤣᤀᤠᤱ ᤔᤧᤘᤠ᤹ᤖᤥ॥ ᤀᤣᤑᤪᤠᤀᤡᤶᤔᤡᤸᤗᤧ ᤁᤢᤔᤧᤴ ᤜᤢᤅᤢᤀᤠᤱ ᤂᤢᤏᤧ᤹ ᤗᤢᤱᤔᤠ᤹ ᤜᤡ᤺ᤵᤋᤢᤛᤡᤒᤠᤜᤠ᤹ ᤀᤡᤅᤢᤛᤡᤀᤠᤱ ᤘᤠ᤹ᤖᤥ॥

¹⁰ ᤂᤧᤱᤜᤠ᤹ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤀᤥ ᤔᤧᤛᤱᤛᤡᤱᤅᤠᤱ ᤔᤧᤘᤠ᤹ᤛᤠᤱ ᤀᤠᤸᤗ ᤀᤠᤱᤃᤠ᤹ ᤂᤧᤱᤜᤠ᤹ ᤛᤥᤖᤡᤰ ᤛᤢᤵᤛᤢᤱᤛᤡᤱᤗᤥ. ᤔᤢᤰᤛᤠᤶᤛᤠᤒᤠ ᤜᤠᤱᤅᤡᤸᤗᤧ ᤀᤠᤕᤢᤰᤕᤢᤰᤐᤠ ᤁᤢᤕᤢᤰᤁᤥ ᤂᤧᤱᤜᤠ᤹ ᤕᤧ᤺ᤱᤄᤡ᤺ᤰᤂᤡ᤺ᤰᤐᤠ ᤔᤧᤒᤥᤱ ᤔᤧᤒᤣ᤺ᤰᤗᤥ॥

¹¹ “ᤀᤣᤑᤪᤠᤀᤡᤔᤖᤧ ᤗᤠᤕᤥᤗᤠᤶ ᤗᤧᤵᤔᤡ ᤂᤥᤔᤠ ᤛᤡᤍᤢᤱᤈᤜᤠ᤹ᤖᤧ ᤗᤠᤃᤡ ᤕᤖᤡᤰ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤜᤠ᤹ ᤆᤥᤃᤢᤛᤡᤀᤠᤱ ᤔᤧᤏᤧᤛᤠᤱ ᤂᤧᤱᤜᤠ᤹ᤃ ᤂᤢᤏᤧ᤹ ᤁᤢᤗᤠᤃᤡ ᤗᤠᤕᤥ ᤆᤥ᤺ᤰᤔᤠ ᤗᤧᤳᤋᤡ ᤋᤥ᤺ᤶᤔᤠᤍᤧᤴ ᤐᤥ᤺ᤰᤂᤧᤀᤠᤱ ᤏᤧᤖᤥ॥

¹² ᤀᤠᤱᤃᤠ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤕᤖᤡᤰ ᤌᤡᤶᤜᤠ᤹ ᤀᤠᤱᤃᤠ᤹ ᤀᤠᤛᤠᤶᤕᤥᤌᤡᤶ ᤀᤡᤱᤈᤠᤱᤅᤥ ᤛᤠᤵᤋᤢᤱᤗᤥ. ᤁᤖ ᤂᤧᤱᤜᤠ᤹ᤖᤧ ᤂᤧᤴ ᤁᤢᤓᤠ ᤘᤣ᤹ ᤗᤠᤈᤣ᤹ᤒᤠ ᤌᤡᤶ ᤜᤧᤰᤋᤱᤒᤠ ᤔᤧᤗᤣ᤺ᤳᤋᤢᤖᤥ॥

¹³ ᤀᤠᤱᤃᤠ᤹ ᤔᤧᤒᤡᤖᤠᤱᤒᤠ ᤛᤡᤍᤢᤱᤈᤓᤠᤜᤠ᤹ ᤂᤧᤱᤜᤠ᤹ᤖᤧ ᤔᤧᤍᤥᤴᤍᤢᤖᤥ ᤜᤧᤰᤁᤩᤠᤱ ᤛᤡᤍᤢᤱᤈᤓᤠ ᤛᤠᤴ ᤂᤧᤱᤜᤠ᤹ᤖᤧ ᤔᤧᤈᤖᤥ. ᤁᤖ ᤕᤜᤘᤣ ᤍᤠᤱᤒᤧᤴ ᤂᤧᤱᤜᤠ᤹ᤏᤢ ᤁᤢᤏᤡᤱᤘᤠ᤹ ᤔᤧᤍᤠᤏᤧᤴᤗᤥ॥ ᤀᤠᤸᤗ ᤂᤢᤏᤧ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤑᤧᤴᤕᤠ᤺ᤶᤒᤰᤁᤡᤴ ᤏᤡᤱᤘᤠ᤹ ᤀᤡ᤺ᤳᤋᤢᤖᤥ ᤜᤧᤰᤁᤩᤠᤱ ᤂᤢᤴᤇᤡ᤹ ᤗᤠᤕᤥᤸᤗᤧ ᤁᤢᤗᤧᤰᤘᤠ ᤂᤢᤶᤍᤡᤱ ᤐᤡᤖᤢᤛᤡᤖᤥ. ᤂᤶᤓᤩᤠᤱ ᤂᤧᤱᤜᤠ᤹ ᤔᤡᤛᤪ ᤗᤠᤈᤣ᤹ ᤔᤧᤏᤢ᤺ᤱᤅᤠᤱ ᤔᤧᤒᤣ᤺ᤰᤗᤥ॥

¹⁴ ᤀᤡᤛᤪᤠᤀᤡᤗᤖᤧ ᤁᤢᤏᤠᤘᤠ ᤆᤀᤡ᤺ᤳᤍᤠᤱᤒᤧᤴ ᤏᤡᤱᤘᤠ᤹ ᤑᤣ᤺ᤳᤇᤢᤀᤠᤱ ᤘᤠ᤹ᤖᤥ ᤜᤧᤰᤁᤩᤠᤱ ᤐᤕᤶ ᤕᤶᤒᤠ ᤜᤡᤶᤜᤠ᤹ ᤆᤥᤃᤢᤛᤡᤀᤠᤱ ᤕᤢᤱᤗᤥ. ᤕᤜᤢᤍᤠ᤺ᤸᤗᤧ ᤕᤖᤡᤰ ᤕᤧᤰᤕᤰᤜᤠ᤹ᤀᤥ ᤜᤠᤱᤕᤰᤜᤠ᤹ ᤆᤥᤃᤢᤛᤡᤀᤠᤱ ᤏᤧᤖᤥ॥ ᤁᤖ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤕᤧᤰᤕᤰᤜᤠ᤹ᤀᤥ ᤔᤡ ᤁᤣ᤺ᤳᤋᤢᤱᤗᤥ. ᤜᤧᤰᤁᤩᤠᤱ ᤂᤧᤸᤗᤧ ᤂᤢᤴᤇᤡ᤹ ᤜᤠᤱᤕᤰᤜᤠ᤹ ᤂᤠᤵᤐᤢᤌᤩ᤺ᤱ ᤆᤥᤃᤢᤖᤥ॥”